31999R2680

Ir-Regolament tal-Kummissjoni (KE) Nru 2680/1999

tas-17 ta’ Diċembru 1999

li japprova sistema ta’ identifikazzjoni għall-barrin maħsuba għall-ġrajjiet kulturali u sportivi

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 820/97 tal-21 ta’ April 1997 li jistabbilixxi sistema ta’ identifikazzjoni u reġistrazzjoni ta’ annimali bovini u t-tikkettjar ta’ ċanga u prodotti taċ-ċanga [1], u b’mod partikolari l-Artikolu 4(1) tiegħu,

Wara li kkunsidrat it-talbiet magħmula minn Spanja, il-Portugall u Franza,

(1) Billi Spanja, il-Portugall u Franza kienu għamlu talbiet dwar l-identifikazzjoni ta’ barrin maħsuba għall-ġrajjiet kulturali u sportivi, minħabba diffikultajiet marbuta mat-tradizzjoni.

(2) Billi huwa ġustifikat li jingħata kont ta’ dawk it-talbiet, sakemm is-sistema li għandha tkun prevvista toffri garanziji ekwivalenti għal dawk prevvisti bir-Regolament (KE) Nru 820/97; billi d-dispożizzjonijiet speċjali li għandhom isiru għall barrin maħsuba għall-ġrajjiet kulturali u sportivi għandhom ikunu limitati biss għall-imsielet; billi l-elementi l-oħra għas-sistema ta’ identifikazzjoni kif jipprovdi għalihom l-Artikolu 3 tar-Regolament (KE) Nru 820/97 għandhom jiġu implimentati skond il-leġislazzjoni kurrenti tal-Komunità.

(3) Billi għall-barrin maħsuba għall-ġrajjiet kulturali u sportivi l-awtorità kompetenti għandha tagħżel wieħed mill-mezzi ta’ mmarkar li ġejjin: (a) żewġ imsielet tal-plastik, (b) misluta jew tnejn tal-metall flimkien b’marka ta’ identifikazzjoni, jew (ċ) misluta waħda tal-plastik flimkien mal-marka ta’ identifikazzjoni; billi f’kull każ iż-żewġ imsielet maħsuba fil-leġislazzjoni kurrenti tal-Komunità għandhom ikunu mwaħħla ma’ dawk l-annimali jew għandhom jakkumpanjawhom meta jkun suġġetti għall-kummerċ intra-Komunitarju.

(4) Billi l-imsielet jistgħu jitneħħew mill-annimali maħsuba għal dawk il-ġrajjiet qabel iċ-ċaqliq lejn il-post fejn tkun sejra tiġi organiżżata dik il-ġrajja jew fil-fatma; billi meta jitneħħew iż-żewġ imsielet fil-fatma l-annimali għandhom jiġu mmarkati b’ħadida mikwija fl-istess żmien.

(5) Billi rabtiet xierqa bejn l-elementi kollha ta’ identifikazzjoni użati għandhom jiġu stabbiliti biex tiġi garantita koerenza u akkuratezza.

(6) Billi minħabba li barrin maħsuba għall-ġrajjiet kulturali u sportivi jistgħu jiġu mkabbra fi Stati Membri oħra wkoll, dawn id-dispożizzjonijiet speċjali għandhom japplikaw għall-Istati Membri kollha,

ADOTTAT DAN IR-REGOLAMENT:

Artikolu 1

Ir-Regolament preżenti jirreferi għall-barrin maħsuba għall-grajjiet kulturali u sportivi reġistrati fil-kotba tal-merħla ta’ l-organizzazzjonijiet li ġejjin:

(a) - "Asociación nacional de ganaderías de Lidia",

- "Asociación de ganaderos de Lidia unidos",

- "Agrupación española de reses bravas",

- "Unión de criadores de toros de Lidia",

dwar ir-razza raza bovina de Lidia, għal annimali mwielda fi Spanja;

(b) "Associação de Criadores de Toiros de Lide dwar ir-razza Brava għal annimali mwielda fil-Portugall";

(ċ) "Association des éleveurs Franza de taureaux de combat" dwar ir-razza Brave jew de combat u "Association des éleveurs de la Raço di biou" dwar ir-razza Camargue jew Raço di biou, għal annimali mwielda fi Franza (inkludi bastardi ta’ dawn).

Artikolu 2

1. L-annimali definiti fl-Artikolu 1 għandhom ikunu suġġetti għad-dispożizzjonijiet speċjali mniżżla fil-paragrafi 2 sa 5.

2. L-awtorita kompetenti għandha tagħżel wieħed mill-mezzi li ġejjin għall-immarkar ta’ l-annimali:

- żewġ imsielet tal-plastik;

- misluta jew tnejn tal-metall flimkien ma’ marka maħruqa;

- misluta waħda tal-plastik flimkien ma’ marka maħruqa;

3. L-awtorità kompetenti tista’ tneħħi l-imsielet mill-annimali maħsuba għal dawk il-ġrajjiet qabel iċ-ċaqliq lejn il-post fejn il-ġrajja hija organizzata jew fil-fatma. Meta ż-żewġ imsielet jitneħħew mal-fatma, l-annimali għandhom jiġu mmarkati b’ħarqa fl-istess żmien.

4. F’kull każ, dak li jżomm dawn l-annimali għandu jkun fil-pussess taż-żewġ imsielet li jikkonformaw mal-leġislazzjoni kurrenti tal-Komunità. Meta dwak l-annimali jkunu suġġetti għall-kummerċ intra-Komunitarju dawn iż-żewġ imsielet għandhom jiġu mwaħħla magħhom jew għandhom jakkumpanjawhom matul kull ċaqliq.

5. Rabtiet xierqa bejn l-elementi kollha ta’ identifikazzjoni użati għandhom jiġu stabbiliti biex tiġi garantita koerenza u preċiżjoni;

Artikolu 3

Dan ir-Regolament għandu jidħol fis-seħħ fil-jum tal-pubblikazzjoi tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fis-17 ta’ Diċembru 1999.

Għall-Kummissjoni

David Byrne

Membru tal-Kummissjoni

[1] ĠU L 117, tas-7.5.1997, p. 1.

--------------------------------------------------