31995R0491

Ir-Regolament tal-Kummissjoni (KE) Nru 491/95

tat-3 ta’ Marzu 1995

li jemenda r-Regolament (KEE) Nru 3600/92 u r-Regolament (KE) Nru 933/94, b’mod partikolari fir-rigward ta’ l-integrazzjoni ta’ l-awtoritajiet pubbliċi nominati u l-produtturi fl-Awstrija, fil-Finlandja u fl-Isvezja fl-implimentazzjoni ta’ l-ewwel stadju tal-programm ta’ xogħol riferit f’Artikolu 8 (2) tad-Direttiva tal-Kunsill 91/414/KEE dwar it-tqegħid fis-suq ta’ prodotti għall-ħarsien tal-pjanti.

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunitajiet Ewropej,

Wara li kkunsidrat id-Direttiva tal-Kunsill 91/414/KEE tal-15 ta’ Lulju 1991 dwar it-tqegħid fis-suq ta’ prodotti għall-ħarsien talpjanti [1], l-aħħar emendata bid-Direttiva tal-Kummissjoni 94/79/KE [2], u b’mod partikolari l-Artikolu 8(2) tagħha,

Wara li kkunsidrat ir-Regolament tal-Kummissjoni (KEE) Nru 3600/92 tal-11 ta’ Diċembru 1992 li jistabbilixxi r-regoli dettaljati għall-implimentazzjoni ta’ l-ewwel stadju tal-programm ta’ xogħol riferit fl-Artikolu 8(2) tad-Direttiva 91/414/KEE dwar it-tqegħid fis-suq ta’ prodotti għall-ħarsien tal-pjanti [3], u b’mod partikolari l-Artikoli 5(2) u (5) tiegħu,

Billi minħabba l-adeżjoni ta’ l-Awstrija, il-Finlandja u l-Isvezja mal-Komunità Ewropea inħoloq żbilanċ fir-responsabbiltajiet merfugħa mill-Istati Membri bħala relaturi għad-89 sustanza attiva koperti mill-ewwel fażi tal-programm ta’ xogħol għall-assessjar mill-ġdid tas-sustanzi attivi fis-suq sentejn wara d-data tan-notifika tad-Direttiva 91/414/KEE; billi f’sitwazzjoni bħal din, trid issir riallokazzjoni ta’ sustanzi attivi; billi l-Annessi I u III għar-Regolament tal-Kummissjoni (KE) Nru 933/94 tas-27 ta’ April 1994 li jistabbilixxu s-sustanzi attivi ta’ prodotti għall-ħarsien tal-pjanti u li jaħtru l-Istati Membri relaturi għall-implimentazzjoni tar-Regolament tal-Kummissjoni (KEE) Nru 3600/92 [4] għandhom għalhekk jiġu emendati;

Billi n-numru ta’ sustanzi li għandhom jiġu riallokati jrid jiġi limitat għall-minimu meħtieġ biex ikun żgurat bilanċ xieraq fir-responsabbiltajiet merfugħa minn kull wieħed mill-15-il Stat Membru;

Billi, madanakollu, ir-riallokazzjoni għandha wkoll tqis il-ħtieġa li sustanzi bi proprjetajiet simili jiġu evalwati minn Stat Membru wieħed u wkoll il-ħtieġa li jiġi żgurat li wara l-allokazzjoni mill-ġdid, is-sustanzi kollha jiġu eżaminati mill-Istat Membru nominat bħala relatur li jkun awtorizza s-sustanza;

Billi kellhom ukoll jitqiesu indikazzjonijiet minn ċerti Stati Membri dwar l-istadju avvanzat diġà milħuq fil-preparazzjoni ta’ l-evalwazzjoni ta’ ċerti sustanzi attivi;

Billi, biex jiġu sodisfatti dawn il-ħtiġiet, kien meħtieġ li sustanza waħda tiġi riallokata bejn l-Istati Membri tal-Komunità kif kostitwita fil-31 ta’ Diċembru 1994;

Billi min jinnotifika sustanzi attivi riallokati lil Stat Membru relatur ieħor irid ikollu garanzija ta’ flessibilità fir-rigward ta’ l-adeżjoni mat-temma taż-żmien iffissata għall-introduzzjoni ta’ l-inkartamenti, fejn jista’ juri li l-allokazzjoni mill-ġdid wasslet għal dewmien fil-preżentazzjoni ta’ l-inkartamenti lill-Istat Membru nominat relatur ġdid;

Billi jeħtieġ disposizzjoni biex l-Istat Membru relatur oriġinali jgħaddi lill-Istat Membru nominat relatur ġdid il-korrispondenza u l-informazzjoni kollha li jkun irċieva bħala Stat Membru relatur fuq is-sustanza attiva kkonċernata;

Billi l-produtturi kollha (jiġifieri fabbrikanti u importaturi ta’ sustanzi prodotti barra mill-Komunità) li għandhom uffiċċju permanenti fit-territorju ta’ wieħed mill-Istati Membri ġodda iridu jingħataw l-opportunità li jieħdu sehem fil-programm bi dritt; billi din l-opportunità m’għandhiex madanakollu taffettwa l-iskeda oriġinali tax-xogħol;

Billi l-parteċipazzjoni ta’ min jinnotifika fil-programm ta’ xogħol hija eżerċizzju fit-tul li teħtieġ disposizzjonijiet iktar speċifiċi għal każijiet fejn in-notifikatur jiddeċiedi li jirtira l-parteċipazzjoni tiegħu jew li jilħaq ftehim għat-trasferiment tal-parteċipazzjoni tiegħu lil produttur ieħor; billi trasferiment simili jista’ jkun ta’ interess partikolari għal produtturi fl-Istati Membri ġodda li oriġinarjament kienu mitluba jipparteċipaw permezz ta’ notifikatur li kellu l-uffiċċju permanenti f’wieħed mit-12-il Stat Membru qabel id-dħul;

Billi l-miżuri provduti f’dan ir-Regolament jaqblu ma’ l-opinjoni tal-Kumitat Permanenti għas-Saħħa tal-Pjanti,

ADOTTAT DAN IR-REGOLAMENT:

Artikolu 1

Ir-Regolament (KEE) Nru 3600/92 huwa emendat kif ġej:

1. fl-Artikolu 4, jidħol il-paragrafu 1a:

"’1a. Minkejja d-disposizzjonijiet fil-paragrafu 1, produtturi li għandhom uffiċċju permanenti fl-Awstrija, fil-Finlandja jew fl-Isvezja jistgħu jinnotifikaw lill-Kummissjoni sa mhux iktar tard mit-30 ta’ April 1995’";

2. L-Artikolu 5 huwa emendat kif ġej:

(a) is-subparagrafu li ġej jiżdied ma’ paragrafu 5:

"Fejn dan l-Istat Membru differenti ġie nominat bħala Stat Membru relatur, l-Istat Membru oriġinali għandu jinforma dwar dan lin-notifikaturi interessati u għandu jgħaddi lill-Istat Membru nominat relatur ġdid, il-korrispondenza u l-informazzjoni kollha li hu kien irċieva bħala Stat Membru relatur għas-sustanza attiva kkonċernata. ’";

(b) jiżdied il-paragrafu 6 li ġej:

"’6 . Meta min jinnotifika jiddeċiedi li jtemm il-parteċipazzjoni tiegħu fil-programm ta’ xogħol għal sustanza attiva, huwa għandu jinforma b’dan lill-Istat Membru relatur, lill-Kummissjoni u lin-notifikaturi l-oħra għas-sustanza kkonċernata.

Meta min jinnotifika jaqbel ma’ produttur ieħor biex dan jieħu postu għall-iskopijiet ta’ parteċipazzjoni fil-programm ta’ xogħol skond dan ir-Regolament, in-notifikatur u dan il-produttur l-ieħor għandhom jinfurmaw lill-Istat Membru relatur u lill-Kummissjoni permezz ta’ dikjarazzjoni komuni fejn jiġi miftiehem li dan il-produttur l-ieħor se jieħu post in-notifikatur oriġinali fit-twettiq tad-doveri ta’ notifikatur stabbiliti fl-Artikoli 6 sa 8; huma għandhom jiżguraw li n-notifikaturi l-oħra għas-sustanza kkonċernata jiġu infurmati wkoll.’";

3. fl-Artikolu 6(5), l-ewwel inċiż jinbidel b’dan li ġej:

"’— temma taż-żmien ġdida ngħatat għas-sottomissjoni ta’ l-inkartament skond il-ħtiġiet ta’ paragrafi 2 u 3; temma taż-żmien ġdida tingħata biss fejn id-dewmien ikun ippruvat li ġie kkaġunat minn sforzi biex jiġu preżentati inkartamenti kollettivi, jew bi sforzi addizzjonali li jrid jagħmel in-notifikatur (jew notifikaturi) minħabba deċiżjoni li jiġi nominat relatur Stat Membru ieħor skond l-Artikolu 5(5),’’";

4. fl-Artikolu 7(1)(a), jiżdied dan li ġej:

"l-ordni ta’ l-eżami, madankollu, ma tiġix affettwata minn inkartamenti preżentati min-notifikaturi riferiti fl-Artikolu 4(1)(a)’."

Artikolu 2

Ir-Regolament (KE) Nru 933/94 huwa b’dan emendat kif ġej:

1. fl-Anness I, għas-sustanzi attivi li ġejjin li huma msemmija f’kolonna A, l-Istati Membri nominati relaturi huma emendati kif ġej f’kolonna B:

"A | B |

Isem | Stat Membru li Jirrapporta |

Amitráz | L-Awstrija |

Lamba-cyhalothrin | L-Iżvezja |

Deltamethrin | L-Iżvezja |

Lindane | L-Awstrija |

Dinocap | L-Awstrija |

Propiconazol | Il-Finlandja |

Alachlor | Spanja |

Ethofumesate | L-Iżvezja |

Desmedipham | Il-Finlandja |

Phenmedipham | Il-Finlandja |

Propyzamide | L-Iżvezja |

Pyridate | L-Awstrija" |

2. dan li ġej jiżdied ma’ l-Anness III:

AWSTRIJA

Bundesministerium fuer Land- und Forstwirtschaft,

p.a. Bundesamt und Forschungszentrum fuer Landwirtschaft,

Trunnerstrasse 5,

A-1020 Wien;

FINLANDJA

Kasvintuotannon tarkastuskeskus,

Torjunta-aineiden toimiala,

PL 42,

FIN-00501 Helsinki;

SVEZJA

Kemikalieinspektionen,

PO Box 1384,

S-17127 Solna.

Artikolu 3

Dan ir-Regolament għandu jidħol fis-seħħ fis-seba’ jum wara l-publikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fit 3 ta’ Marzu 1995.

Għall-Kummissjoni

Franz Fischler

Membru tal-Kummissjoni

[1] ĠU L 230, tad-19.8.1991, p. 1.

[2] ĠU L 354, tal-31.12.1994, p. 16.

[3] ĠU L 366, tal-15.12.1992, p. 10.

[4] ĠU L 107, tat-28.4.1994, p. 8.

--------------------------------------------------