31995D0342

Id-Deċiżjoni tal-Kummissjoni

tas-27 ta’ Lulju 1995

dwar it-trattament tal-ħalib u l-prodotti li l-bażi tagħhom hu l-ħalib għall-konsum tal-bniedem minn pajjiżi mhux membri jew partijiet minn pajjiżi mhux membri fejn hemm ir-riskju tal-marda ta’ l-ilsien u d-dwiefer

(Test b’rilevanza għaż-ŻEE)

(95/342/KE)

IL-KUMMISSJONI TAL-KOMUNITAJIET EWROPEJ

Wara li kunsidrat it-Trattat li jwaqqaf il-Komunità Ewropea,

Wara li kunsidrat id-Direttiva tal-Kunsill 92/46/KEE tas-16 ta’ Ġunju 1992 li tistabilixxi r-regoli tas-saħħa għall-produzzjoni u t-tqegħid fis-suq ta’ ħalib mhux ipproċessat, ħalib ittrattat bis-sħana u prodotti li l-bażi tagħhom hi l-ħalib [1] skond l-aħħar emendi peremezz ta’ l-Att ta’ Adeżjoni ta’ l-Awstrija, il-Fillandja u l-Isvezja, u b’mod partikolari l-Artikolu 23(3)(d) tiegħu;

Billi l-ħalib u l-prodotti li l-bażi tagħhom hi l-ħalib għall-konsum tal-bniedem li ġejjin minn pajjiżi mhux membri jew partijiet minn pajjiżi mhux membri jistgħu jippreżentaw xi riskju għar-rigward tal-marda ta’ l-ilsien u d-dwiefer;

Billi t-tipi tat-trattament li għandhom ikunu preskritti għall-ħalib u l-prodotti li l-bażi tagħhom hi l-ħalib għall-konsum tal-bniedem minn dawk il-pajjiżi mhux membri jew partijiet minn pajjiżi mhux membri għandhom ikunu stabbiliti;

Billi t-tipi tat-trattament għandhom ikunu elenkati fuq iċ-ċertifikati mudell tas-saħħa għall-importazzjonijiet tal-ħalib u l-prodotti li l-bażi tagħhom hi l-ħalib minn pajjiżi mhux membri jew partijiet minn pajjiżi mhux membri fejn ikun hemm xi riskju tal-marda ta’ l-ilsien u d-dwiefer;

Billi t-tipi tat-trattament li għandhom ikunu stabbiliti għandu jkollhom bażi xjentifika tax-xorta kif rakkomandata mill-Kumitat Veterinarju Permanenti u għandhom jieħdu in-kunsiderazzjoni r-rekwiżiti tal-protezzjoni tas-saħħa pubblika u s-saħħa ta’ l-annimali;

Billi l-miżuri stabbilti f’din id-Deċiżjoni huma skond l-opinjoni tal-Kumitat Veterinarju Permanenti,

ADOTTAT DIN ID-DEĊIŻJONI:

Artikolu 1

Il-ħalib u l-prodotti li l-bażi tagħhom hi l-ħalib għall-konsum tal-bniedem minn pajjiżi mhux membri jew parti minn pajjiżi mhux membri fejn faqqgħet il-marda ta’ l-ilsien u d-dwiefer fl-aħħar 12-il xahar jew li għamlu tilqim kontra l-marda ta’ l-ilsien u d-dwiefer fl-aħħar 12-il xahar għandhom, qabel ma jkunu introdotti fit-territorju tal-Komunità, jiġu suġġetti għal:

(a) sterilizzazzjoni tali li jkollha valur Fo ugwali għal jew ogħla minn 3; jew

(b) trattament bis-sħana inizjali li jkollu effett għall-inqas daqs dak miksub permezz ta’ pasterizzazzjoni f’temperatura ta’ mill-inqas 72 °C għal mill-inqas 15-il sekonda, sabiex tkun prodotta reazzjoni negattiva għall-phosphatase test, segwit b’dan li ġej:

(i) it-tieni trattament bis-sħana li jinvolvi pasterizzazzjoni f’temperatura għolja, UHT jew sterilizazzjoni, sabiex tkun prodotta reazzjoni negattiva għall-peroxidase test; jew

(ii) fil-każ ta’ trab tal-ħalib jew prodott li l-bażi tiegħu hu l-ħalib, it-tieni trattament bis-sħana li jkollu l-effett għall-inqas ekwivalenti għal dak milħuq mill-ewwel trattament bis-sħana, sabiex jipproduċi reazzjoni negattiva għall-phosphatase test, segwit bi proċess ta’ tnixxif; jew

(iii) proċess ta’ aċidifikazzjoni tali li l-valur pH jiġi mnaqqas u miżmum taħt 6 għal mill-inqas siegħa.

Artikolu 2

Din id-Deċiżjoni għandha tgħodd mit-2 ta’ Frar 1996.

Artikolu 3

Din id-Deċiżjoni hija indirizzata lill-Istati Membri.

Magħmulha fi Brussel, fis-27 ta’ Lulju 1995.

Għall-Kummissjoni

Franz Fischler

Membru tal-Kummissjoni

[1] ĠU L 268, ta’ l-14.9.1992, p. 1.

--------------------------------------------------