31987D0369

Id-Deċiżjoni tal-Kunsill

tas-7 ta'April 1987

dwar il-konklużjoni tal-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika ta' Oġġetti u tal-Protokoll li Jemendaha

(87/369/KEE)

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jistabbilixxi l-Komunità Ekonomika Ewropea, u partikolarment Artikoli 28, 113 u 235 tiegħu,

Wara li kkunsidra l-proposta mill-Kummissjoni [1],

Wara li kkunsidra l-opinjoni tal-Parlament Ewropew [2],

Billi l-Kunsill tal-Kooperazzjoni Doganali, fis-sessjoni plenarja tiegħu ta' Ġunju 1983, adotta l-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika ta' Oġġetti;

Billi l-iskop ta' din il-Konvenzjoni huwa li jiffaċilita l-kummerċ internazzjonali u l-ġbir, tqabbil u analiżi ta' l-istatistiċi applikabbli għal dan il-kummerċ;

Billi din il-Konvenzjoni hija maħsuba biex tissostitwixxi, bħala l-bażi internazzjonali għat-tariffi tad-dwana u nomenklaturi statistiċi, il-Konvenzjoni dwar in-Nomenklatura ffirmata fi Brussel fil-15 ta' Diċembru 1950, li bħalissa qiegħda tintuża bħala l-bażi tat-Tariffa Komuni Doganali u NIMEXE;

Billi din il-Konvenzjoni ġiet iffirmata, f'isem il-Komunità, soġġetta għal li tiġi aċċettata, fl-10 ta' Ġunju 1985; billi Protokoll ta' Emenda għal dik il-Konvenzjoni ġie adottat mill-Kunsill ta' Kooperazzjoni Doganali fl-24 ta' Ġunju 1986; billi huwa mixtieq li l-istrument ta' l-aċċettazzjoni ta' dak il-Protokoll jiġi depożitat fl-istess ħin ma’ l-istrument ta' aċċettazzjoni tal-Konvenzjoni Ewropea dwar is-Sistema Armonizzata;

Billi l-Komunità tipproponi li tapplika s-sistema armonizzata mill-1 ta' Jannar 1988;

Billi huwa ta' interess essenzjali għall-Komunità li taderixxi għal din il-Konvenzjoni, flimkien ma’ l-aktar pajjiżi importanti involuti fil-kummerċ internazzjonali,

IDDEĊIEDA KIF ĠEJ:

Artikolu 1

Il-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika ta' Oġġetti, magħmula fi Brussel fl-14 ta' Ġunju 1983, u l-Protokoll ta' Emenda li hemm magħha, magħmula fi Brussel fl-24 ta' Ġunju 1986, huma b'dan approvati f'isem il-Komunità.

It-testi tal-Konvenzjoni u tal-Protokoll ta' Emenda li hemm magħha huma mehmużin ma’ din id-Deċiżjoni.

Artikolu 2

Din id-Deċiżjoni m'għandha bl-ebda mod tippreġudika l-pożizzjoni tal-Komunitá fin-negozjati dwar l-adozzjoni ta' skedi riveduti ta' konċessjonijiet fit-tariffi bażati fuq is-Sistema Armonizzata. Dawn in-negozjati għandhom ikomplu jsiru fi qbil strett mal-linji gwida speċifiċi miftiehma mill-GATT bl-għan li tkun żgurata n-newtralità fit-traspożizzjoni ta' skedi ta' tariffi.

Artikolu 3

Il-President tal-Kunsill huwa b'din awtorizzat li jinnomina l-persuna bis-setgħa li tiddepożita l-istrumenti ta' l-aċċettazzjoni f'isem il-Komunità [3].

Magħmul fil-Lussemburgu, fis-7 ta' April 1987.

Għall-Kunsill

Il-President

Ph. Maystadt

[1] ĠU Ċ 120, ta' l- 4.5.1984, p. 2.

[2] ĠU Ċ 300, tat- 12.11.1984, p. 53.

[3] Id-data tad-dħul fis-seħħ tal-Konvenzjoni u l-Protokoll ta' Emenda li hemm magħha għandhom jiġu ppubblikati fil-Ġurnal Uffiċjali tal-Komunitajiet Ewropej mis-Segretarjat Ġenerali tal-Kunsill.

--------------------------------------------------