31981R1659

Ir-Regolament tal-Kunsill (KEE) Nru 1659/81

tad-19 ta’ Mejju, 1981

li jemenda r-Regolament (KEE) Nru 1674/72 li jistabbilixxi regoli ġenerali għall-għoti u l-finanzjament ta’ għajnuna għal żerriegħa

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jwaqqaf il-Komunità Ekonomika Ewropea,

Wara li kkunsidra r-Regolament tal-Kunsill (KEE) Nru 2358/71 tas-26 ta’ Ottubru, 1971 dwar l-organizzazzjoni komuni tas-suq fiż-żrieragħ [1], kif l-aħħar emendat bl-Att ta’ Adeżjoni ta’ l-1979, u partikolarment Artikolu 3(4) ta’ dan,

Wara li kkunsidra l-proposta mill-Kummissjoni,

Billi r-Regolament (KEE) Nru 1674/72 [2], kif l-aħħar emendat bir-Regolament (KEE) Nru 1969/80 [3], jistabbilixxi li tista’ tingħata għajnuna biss għal żerriegħa li tkun ċertifikata uffiċjalment u li tissodisfa d-definizzjonijiet stabbiliti fid-Direttivi dwar il-bejgħ tagħhom fis-suq, u l-livelli u l-kondizzjonijiet stabbiliti fid-Direttivi msemmija;

Billi Artikolu 113(1) ta’ l-Att ta’ Adeżjoni ta’ l-1979 jipprovdi li, sal-31 ta’ Diċembru, 1985, il-Greċja tista’ tapplika r-regoli tagħha dwar iċ-ċertifikar u l-kontroll tal-produzzjoni ta’ żrieragħ; billi Artikolu 113(2)(ċ) jipprovdi li l-Greċja tesporta biss lejn it-territorju ta’ l-Istati Membri żrieragħ li jikkonformaw mad-dispożizzjonijiet Komunitarji; billi Artikolu 113(3) jagħmel dispożizzjoni għal deċiżjoni dwar il-liberalizzazzjoni progressiva tal-kummerċ fi żrieragħ ta’ ċerti speċi bejn il-Greċja u l-Istati Membri l-oħra;

Billi ż-żrieragħ fir-rigward tagħhom tittieħed deċiżjoni bħal din jissodisfaw il-kondizzjonijiet stabbiliti fid-dispożizzjonijiet li japplikaw għal produzzjoni Komunitarja; billi għajnuna tal-Komunità għandha għalhekk tingħata lil żrieragħ maħsuda fil-Greċja li jkunu ċertifikati u li fir-rigward tagħhom tkun ittieħdet deċiżjoni għal-liberalizzazzjoni tal-kummerċ bejn dak l-Istat Membru u l-Istati Membri l-oħra,

ADOTTA DAN IR-REGOLAMENT:

Artikolu 1

Ir-Regolament (KEE) Nru 1674/72 huwa hawnhekk emendat kif ġej:

1. Artikolu 1 jitbiddel b’dan li ġej:

"Artikolu 1

1. Jekk tkun iffissata għajnuna skond Artikolu 3 tar-Regolament (KEE) Nru 2358/71, din tingħata, bla ħsara għall-kondizzjonjiet dikjarati fl-Artikoli li ġejjin, għal produzzjoni ta’ żrieragħ bażiċi u ċċertifikati:

- kif definiti bid-Direttiva tal-Kunsill 66/401/KEE ta’ l-14 ta’ Ġunju, 1966 dwar il-bejgħ ta’ żerriegħa minn pjanti tal-għalf(3), bid-Direttiva tal-Kunsill 66/402/KEE ta’ l-14 ta’ Ġunju, 1966 dwar il-bejgħ ta’ żerriegħa taċ-ċereali(4) u bid-Direttiva tal-Kunsill 69/208/KEE tat-30 ta’ Ġunju, 1969 dwar il-bejgħ ta’ żerriegħa ta’ pjanti taż-żejt u tal-fibri(5), filwaqt li jitqiesu l-emendi magħmula lil dawn id-Direttivi,

- li jikkonformaw mal-livelli stabbiliti u l-kondizzjonijiet stabbiliti f’dawk id-Direttivi, u

- li jkunu ċċertifikati uffiċjalment.

2. Mill-1 ta’ Jannar, 1981 sal-31 ta’ Diċembru, 1985, tingħata wkoll għajnuna għal żerriegħa bażika u ċertifikata prodotta fil-Greċja u li rigward tagħha tkun ittieħdet deċiżjoni skond Artikolu 113(3) ta’ l-Att ta’ Adeżjoni ta’ l-1979."

2. In-Noti (3), (4) u (5) fil-qiegħ tal-paġna jitbiddlu b’li ġejjin:

"(3) ĠU Nru 125, 11.7.1966, p. 2298/66

(4) ĠU Nru 125, 11.7.1966, p. 2309/66

(5) ĠU Nru L. 169, 10.7.1969, p. 3"

Artikolu 2

Dan ir-Regolament jidħol fis-seħħ fil-jum tal-pubblikazzjoni tiegħu fil-Ġurnal Uffiċjali tal-Komunitajiet Ewropej.

Huwa japplika b’effett mill-1 ta’ Jannar, 1981.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, 19 ta’ Mejju, 1981.

Għall-Kunsill

Il-President

D. F. van der Mei

[1] ĠU L 246, tal-5.11.1971, p. 1.

[2] ĠU L 177, ta’ l-4.8.1972, p. 1.

[3] ĠU L 192, tas-26.7.1980, p. 4.

--------------------------------------------------