12003T/PRO/03

Protokoll nru. 3

dwar l-Arei ta' Bażi Sovrani tar-Renju Unit tal-Gran Brittanja u l-Irlanda ta' Fuq f'Ċipru

IL-PARTIJIET KONTRAENTI GĦOLJA,

FILWAQT LI JIFTAKRU li d-Dikjarazzjoni Konġunta ta' l-Arei ta' Bażi Sovrani tar-Renju Unit tal-Gran Brittanja u l-Irlanda ta' Fuq f'Ċipru annessa ma' l-Att Finali tat-Trattat rigward l-Adeżjoni tar-Renju Unit mal-Kommunitajiet Ewropej tipprovdi li l-arranġamenti applikabbli għar-relazzjonijiet bejn il-Kommunita' Ekonomika Ewropea u l-Arei ta' Bażi Sovrani għandhom ikunu definiti fil-kuntest ta' kwalunkwe ftehim bejn il-Kommunita' u r-Repubblika ta' Ċipru,

TENUT KONT tad-disposizzjonijiet rigward l-Arei ta' Bażi Sovrani mniżżla fit-Trattat għat-twaqqif tar-Repubblika ta' Ċipru (minn hawn 'il quddiem imsejħa t-"Trattat ta' l-Istabbiliment") u l-Iskambji ta' Noti assoċjati bid-data tas- 16 ta' Awissu 1960,

FILWAQT LI JINNOTAW li l-Iskambju ta' Noti bejn il-Gvern tar-Renju Unit u l-Gvern tar-Repubblika ta' Ċipru dwar l-amministrazzjoni ta' l-Arei ta' Bażi Sovrani, bid-data tas- 16 ta' Awissu 1960, u d-Dikjarazzjoni mehmuża miegħu mill-Gvern tar-Renju Unit li waħda mill-iskopijiet prinċipali li għandha tintlaħaq hija l-protezzjoni ta' l-interessi ta' dawk residenti jew li jaħdmu fl-Arei ta' Bażi Sovrani, u filwaqt li jikkunsidraw f'dan il-kuntest li l-persuni msemmija għandu jkollhom, sa fejn possibbli, l-istess trattament bħal dawk residenti jew li jaħdmu fir-Repubblika ta' Ċipru,

FILWAQT LI JINNOTAW UKOLL li d-disposizzjonijiet tat-Trattat ta' l-Istabbiliment rigward l-arranġamenti tad-dwana bejn l-Arei ta' Bażi Sovrani u r-Repubblika ta' Ċipru u b'mod partikolari dawk ta' l-Anness F ta' l-imsemmi Trattat,

FILWAQT LI JINNOTAW UKOLL l-impenn tar-Renju Unit li ma toħloqx posti tad-dwana jew xi barrieri oħra mal-fruntiera bejn l-Arei ta' Bażi Sovrani u r-Repubblika ta' Ċipru u l-arranġamenti li saru skond it-Trattat ta' l-Istabbiliment li permezz tiegħu l-awtoritajiet tar-Repubblika ta' Ċipru jamministraw firxa kbira ta' servizz pubbliċi fl-Arei ta' Bażi Sovrani, inkluż l-oqsma ta' l-agrikoltura, id-dwana u t-tassazzjoni;

FILWAQT li jikkonfermaw li l-adeżjoni tar-Repubblika ta' Ċipru għall-Unjoni Ewropea m'għandhiex taffetwa id-drittijiet u l-obbligi tal-partijiet għat-Trattat ta' l-Istabbiliment;

FILWAQT li tirrikonoxxi għalhekk il-ħtieġa li jkunu applikati ċerti disposizzjonijiet tat-Trattat li jistabilixxi il-Kommunita' Ewropea u l-liġi relatata tal-KE għall-Arei ta' Bażi Sovrani u li jsiru arranġamenti speċjali rigward l-implimentazzjoni ta' dawk id-disposizzjonijiet fl-Arei ta' Bażi Sovrani,

FTIEHMU DWAR ID-DISPOSIZZJONIJIET LI ĠEJJIN:

Artikolu 1

L-Artikolu 299(6)(b) tat-Trattat li jistabilixxi il-Komunità Ewropea għandu jinbidel b'dan li ġej:

"(b) Dan it-Trattat m'għandux japplika għall-Arei ta' Bażi Sovrani tar-Renju Unit f'Akrotiri u Dhekelia f'Ċipru għajr safejn hu meħtieġ biex tkun żgurata l-implimentazzjoni ta' l-arranġamenti imniżżla fil-Protokoll dwar l-Arei ta' Bażi Sovrani tar-Renju Unit tal-Gran Brittanja u l-Irlanda ta' Fuq f'Ċipru annessi ma' l-Att li jikkonċerna l-kondizzjonijiet ta' l-adeżjoni tar-Repubblika Ċeka, ir-Repubblika ta' l-Estonja, ir-Repubblika ta' Ċipru, ir-Repubblika tal-Latvja, ir-Repubblika tal-Litwanja, ir-Repubblika ta' l-Ungerija, ir-Repubblika ta' Malta, ir-Repubblika tal-Polonja, ir-Repubblika tas-Slovenja u r-Repubblika Slovakka għall-Unjoni Ewropea u skond it-termini ta' dak il-Protokoll."

Artikolu 2

1. L-Arei ta' Bażi Sovrani għandhom jiġu nklużi fit-territorju tad-dwana tal-Komunità u, għal dan l-iskop, l-atti dwar id-dwana u l-politika kummerċjali komuni mniżżla fl-Ewwel Parti ta' l-Anness għal dan il-Protokoll għandhom japplikaw għall-Arei ta' Bażi Sovrani bl-emendi imniżżla fl-Anness.

2. L-atti dwar it-taxxa fuq il-valur tal-bejgħ, is-sisa u formi oħra ta' tassazzjoni indiretta mniżżla fit- Tieni Parti ta' l-Anness għal dan il-Protokoll għandhom japplikaw għall-Arei ta' Bażi Sovrani bl-emendi mniżżla fl-Anness kif ukoll id-disposizzjonijiet relevanti li japplikaw għal Ċipru kif stipulati fl-Att li jikkonċerna l-kondizzjonijiet ta' l-adeżjoni tar-Repubblika Ċeka, ir-Repubblika ta' l-Estonja, ir-Repubblika ta' Ċipru, ir-Repubblika tal-Latvja, ir-Repubblika tal-Litwanja, ir-Repubblika ta' l-Ungerija, ir-Repubblika ta' Malta, ir-Repubblika tal-Polonja, ir- Repubblika tas-Slovenja u r-Repubblika Slovakka għall-Unjoni Ewropea.

3. L-atti mniżżla fit-Tielet Parti ta' l-Anness għal dan il-Protokoll għandhom jiġu emendati kif stipulat fl-Anness sabiex jgħinu lir-Renju Unit iżomm il-ħelsien u l-eżenzjonijiet mid-dazji u taxxi li jingħataw mit-Trattat ta' l-Istabbiliment fuq il-provvisti għal forzi u l-impjegati assoċjati tagħha.

Artikolu 3

It-Trattat u d-disposizzjonijiet relatati li ġejjin għandhom japplikaw għall-Arei ta' Bażi Sovrani:

(a) It-Titolu II tat-Tielet Parti tat-Trattat tal-KE, fuq l-agrikoltura, u d-disposizzjonijiet adottati fuq dik il-bażi;

(b) Miżuri adottati taħt l-Artikolu 152(4)(b) tat-Trattat tal-KE.

Artikolu 4

Il-persuni residenti jew impjegati fit-territorju ta' l-Arei ta' Bażi Sovrani li, taħt l-arranġamenti magħmula skond it-Trattat ta' l-Istabbiliment u l-Iskambju ta' Noti assoċjati bid-data tas- 16 ta' Awissu 1960, huma soġġetti għall-leġislazzjoni dwar is-sigurtà soċjali tar-Repubblika ta' Ċipru għandhom, għall-iskopijiet tar-Regolament tal-Kunsill (KEE) Nru. 1408/71 ta' l- 14 ta' Ġunju 1971 dwar l-applikazzjoni ta' skemi għas-sigurtà soċjali għal persuni mpjegati, għal persuni impjegati għal rashom u għal membri tal-familji tagħhom li jiċċaqilqu fi ħdan il-Komunità [1], jkunu trattati bħallikieku kienu residenti jew impjegati fit-territorju tar-Repubblika ta' Ċipru.

Artikolu 5

1. Ir-Repubblika ta' Ċipru m'għandhiex tkun meħtieġa tagħmel kontrolli fuq il-persuni li jaqsmu l-konfini tagħha ta' l-art jew tal-baħar ma' l-Arei ta' Bażi Sovrani u kwalunkwe restrizzjonijiet Komunitarja fuq il-qsim tal-fruntieri esterni m'għandhomx japplikaw fir-rigward ta' dawn il-persuni.

2. Ir-Renju Unit għandu jeżerċita kontrolli fuq il-persuni li jaqsmu l-fruntieri esterni ta' l-Arei ta' Bażi Sovrani bi qbil ma' l-impriżi stipulati fir-Raba' Parti ta' l-Anness għal dan il-Protokoll.

Artikolu 6

Il-Kunsill, billi jaġixxi unanimament fuq proposta mill-Kummissjoni, jista' sabiex jiżgura l-implimentazzjoni effettiva ta' l-iskopijiet ta' dan il-Protokoll, jemenda l-Artikoli 2 sa 5 hawn fuq, inkluż l-Anness, jew japplikaw għall-Arei ta' Bażi Sovrani xi disposizzjonijiet oħra tat-Trattat tal-KE u l-leġislazzjoni Komunitarja relatata skond it-termini u l-kondizzjonijiet li hu jispeċifika. Il-Kummissjoni għandha tikkonsulta mar-Renju Unit u r-Repubblika ta' Ċipru qabel ma tissottometti xi proposta.

Artikolu 7

1. Bla ħsara għall-paragrafu 2, ir-Renju Unit għandu jkun responsabbli għall-implimentazzjoni ta' dan il-Protokoll fl-Arei ta' Bażi Sovrani. B'mod partikolari:

(a) ir-Renju Unit għandu jkun responsabbli għall-applikazzjoni tal-miżuri Komunitarji speċifikati f'dan il-Protokoll fl-oqsma tad-dwana, tassazzjoni indiretta u l-politika kummerċjali komuni rigward il-merkanzija li tiddaħħal fi jew tinħareġ mill-gżira ta' Ċipru permezz ta' port jew ajruport fl-Arei ta' Bażi Sovrani;

(b) il-kontrolli tad-dwana fuq il-merkanzija importata fi jew esportata mill-gżira ta' Ċipru mill-forżi tar-Renju Unit permezz ta' port jew ajruport fir-Repubblika ta' Ċipru jistgħu jsiru fl-Arei ta' Bażi Sovrani;

(ċ) ir-Renju Unit għandu jkun responsabbli li joħroġ il-liċenzji, l-awtorizzazzjonijiet jew iċ-ċertifikati li jistgħu jkunu meħtieġa taħt xi miżura Komunitarja applikabbli rigward merkanzija importata fi jew esportata mill-gżira ta' Ċipru mill-forzi tar-Renju Unit.

2. Ir-Repubblika ta' Ċipru għandha tkun responsabbli mill-amministrazzjoni u l-pagament ta' kwalunkwe fondi Komunitarji li jistgħu jkollhom dritt għalihom xi persuni fl-Arei ta' Bażi Sovrani skond l-applikazzjoni tal-politika agrikola komuni fl-Arei ta' Bażi Sovrani taħt l-Artikolu 3 ta' dan il-Protokoll u r-Repubblika ta' Ċipru għandha tagħti kont ta' egħmilha fuq dan l-infiq lill-Kummissjoni.

3. Bla ħsara għall-paragrafi 1 u 2, ir-Renju Unit jista' jiddelega lill-awtoritajiet kompetenti tar-Repubblika ta' Ċipru, bi qbil ma' l-arranġamenti magħmula skond it-Trattat ta' l-Istabbiliment, il-qadi ta' kwalunkwe funzjonijiet imposti fuq Stat Membru minn jew taħt xi proviżjoni li hemm referenza għaliha fl-Artikoli 2 sa 5 ta' hawn fuq.

4. Ir-Renju Unit u r-Repubblika ta' Ċipru għandhom jikkoperaw sabiex jiżguraw l-implimentazzjoni effettiva ta' dan iil-Protokoll fl-Arei ta' Bażi Sovrani, u fejn xieraq, għandhom jikkonkludu aktar arranġamenti rigward id-delegazzjoni ta' l-implimentazzjoni ta' kwalunkwe disposizzjoni li hemm referenza għaliha fl-Artikoli 2 sa 5 ta' hawn fuq. Kopja ta' dawn l-arranġamenti għandha tingħata lill-Kummissjoni.

Artikolu 8

L-arranġamenti li jipprovdi għalihom dan il-Protokoll għandhom l-iskop waħdieni li jirregolaw is-sitwazzjoni partikolari ta' l-Arei ta' Bażi Sovrani ta' l-Unjoni Ewropea f'Ċipru u m'għandhomx japplikaw għal kwalunkwe territorju ieħor tal-Kommnita', u lanqas iservu bħala preċedent, kollha kemm huma jew in parti, għal xi arraġamenti speċjali oħra li jew jeżistu diġà jew li jistgħu jiġu stabbiliti f'territorju Ewropew ieħor li jipprovdi għalih l-Artikolu 299 tat-Trattat.

Artikolu 9

Kull ħames snin il-Kummissjoni għandha tirraporta dwar l-implimentazzjoni tad-disposizzjonijiet ta' dan il-Protokoll lill-Parlament Ewropew u lill-Kunsill.

[1] ĠU L 149, 5.7.1971, p. 2.

--------------------------------------------------

ANNESS

Ir-referenzi f'dan il-Protokoll għad-Direttivi u rRegolamenti għandhom jkunu interpretati bħala referenzi għal dawk id-Direttivi u Regolamenti kif emendati jew mibdula minn żmien għall-ieħor u l-atti tagħhom li jimplimentawhom.

L-EWWEL PARTI

1. Ir-Regolament tal-Kunsill (KEE) Nru. 2913/92 tat- 12 Ottubru 1992 li jistabilixxi il-Kodiċi tad-Dwana Komunitarja li fih l-Artikolu 3(2) jinbidel b'li ġej:

"2. it-territorji li ġejjin li jinsabu barra t-territorju ta' l-Istati Membri, filwaqt li jittieħdu in konsiderazzjoni l-konvenzjonijiet u t-trattati applikabbli għalihom, għandhom jiġu kkunsidrati bħala parti tat-territorju tad-dwana tal-Kommunita':

(a) FRANZA

It-territorju tal-prinċipat ta' Monako kif imfisser fil-Konvenzjoni tad-Dwana ffirmata f'Pariġi fit- 18 ta' Mejju 1963 (Ġurnal Uffiċjali tar-Repubblika Franċiża tas- 27 ta' Settembru 1963, p. 8679)

(b) ĊIPRU

It-territorju tal-Arei ta' Bażi Sovrani tar-Renju Unit ta' Akotiri u Dhekelia kif imfissra fit-Trattat rigward l-Istabbiliment tar-Repubblika ta' Ċipru, iffirmat f'Nikosija fis- 16 ta' Awissu 1960 (Is-Serje tat-Trattat tar-Renju Unit No. 4 (1961) Cmnd. 1252)"

;

2. Ir-Regolament tal-Kunsill (KEE) Nru. 2658/87 tat- 23 ta' Lulju 1987 dwar it-tariffa u n-nomenklatura statistika dwar it-Tariffa Komuni tad-Dwana;

3. Ir-Regolament tal-Kunsill (KEE) Nru. 918/83 tat- 28 ta' Marzu 1983 li jistabilixxi sistema Komunitarja ta' sollievi mid-dazju tad-Dwana;

4. Ir-Regolament tal-Kummissjoni (KEE) Nru. 2454/93 tat- 2 ta' Lulju 1993 li jistipula disposizzjonijiet sabiex jiġi mplimentat ir-Regolament tal-Kunsill (KEE) Nru. 2913/92 li jistabilixxi il-Kodiċi tad-Dwana tal-Komunità;

5. Ir-Regolament tal-Kunsill (KEE) Nru. 3677/90 tat- 13 ta' Diċembru 1990 li jistipula miżuri li għandhom jittieħdu sabiex jiskoraġġixxu l-bdil tar-rotta ta' ċerti sustanzi għall-manifattura illeċita ta' drogi narkotiċi u sustanzi psikotropiċi;

6. Id-Direttiva tal-Kunsill 92/109/KEE ta' l- 14 ta' Diċembru 1992 dwar il-manifattura u t-tqegħid fis-suq ta' ċerti sustanzi użati fil-manifattura illeċita ta' drogi narkotiċi u sustanzi psikotropiċi.

7. Ir-Regolament tal-Kunsill (KEE) Nru. 3911/92 tad- 9 ta' Diċembru 1992 dwar l-esportazzjoni ta' oġġetti kulturali;

8. Ir-Regolament tal-Kunsill (KE) Nru. 3295/94 tat- 22 ta' Diċembru 1994 li jistipula miżuri dwar id-dħul fil-Komunità u l-esportazzjoni u ir-ri-esportazzjoni mill-Komunità ta' oġġetti li jiksru xi drittijiet tal-proprjetà intelletwali;

9. Ir-Regolament tal-Kummissjoni (KE) Nru. 1367/95 tas- 16 ta' Ġunju 1995 li jistipula d-disposizzjonijiet sabiex jiġi mplimentat ir-Regolament tal-Kunsill (KE) Nru. 3295/94 li jistipula miżuri dwar id-dħul fil-Komunità u l-esportazzjoni u ir-ri-esportazzjoni mill-Komunità ta' oġġetti li jiksru xi drittijiet tal-proprjetà intellettwali;

10. Ir-Regolament tal-Kunsill (KE) Nru. 1334/2000 tat- 22 ta' Ġunju 2000 li jistabilixxi reġim Komunitarju għall-kontroll ta' l-esportazzjoni ta' oġġetti u teknoloġija b'użu doppju.

IT-TIENI PARTI

1. Is-Sitt Direttiva tal-Kunsill 77/388/KEE tas- 17 ta' Mejju 1977 dwar l-armonizzazzjoni tal-liġijiet ta' l-Istati Membri li għandhom x'jaqsmu mat-taxxi fuq il-valur tal-bejgħ — Sistema komuni ta' taxxa fuq il-valur miżjud: bażi uniformi ta' stima li minnha:

(a) L-ewwel sub-paragrafu ta' l-Artikolu 3(4) jinbidel b'dan li ġej:

"B'deroga mill-paragraph 1, minħabba:

- il-konvenzjonijiet u t-trattati li l-Prinċipalità ta' Monaco u l-Isle of Man ikkonkludew rispettivament mar-Repubblika Franċiża u r-Renju Unit tal-Gran Brittanja u l-Irlanda ta' Fuq,

- it-Trattat ta' l-Istabbiliment tar-Repubblika ta' Ċipru,

għall-applikazzjoni ta' din id-Direttiva, il-Prinċipalità ta' Monaco, l-Isle of Man u l-Arei ta' Bażi Sovrani tar-Renju Unit ta' Akrotiri u Dhekelia m'għandhomx ikunu trattati bħala territorji terzi."

(b) L-Artikolu 3(4), it-tieni sub-paragrafu għandu jiġi emendat biż-żieda ta' tielet inċiż kif

"— l-Arei ta' Bażi Sovrani tar-Renju Unit ta' Akotiri u Dhekelia huma trattati bħala transazzjonijiet li joriġinaw fi jew huma destinati għar-Repubblika ta' Ċipru."

2. Id-Direttiva tal-Kunsill 92/12/KEE tal- 25 ta' Frar 1992 dwar l-arranġamenti ġenerali għal prodotti li huma soġġetti għas-sisa u għaż-żamma, il-moviment u l-kontroll ta' dawn il-prodotti: L-Artikolu 2(4) għandu jiġi emendat billi jiżdied il-ħames inċiż kif ġej:

"— l-Arei ta' Bażi Sovrani tar-Renju Unit ta' Akotiri u Dhekelia huma trattati bħala transazzjonijiet li joriġinaw fi jew huma destinati għar-Repubblika ta' Ċipru."

IT-TIELET PARTI

1. L-Artikolu 135 tar-Regolament tal-Kunsill (KE) Nru. 918/83 tat- 28 ta' Marzu 1983 li jistabilixxi sistema Komunitarja ta' sollievi għad-dazji tad-Dwana għandu jiġi emendat permezz taż-żieda ta' punt ġdid (d), kif ġej:

"(d) mir-Renju Unit tas-sollievi fuq l-importazzjoni ta' merkanzija għall-użu mill-forzi tagħha jew minn impjegati pajsana li jakkumpanjawhom jew għall-provvista' tal-mess jew il-canteen tagħhom li jirriżultaw mit-Trattat ta' l-Istabbiliment rigward ir-Repubblika ta' Ċipru, bid-data tas- 16 ta' Awissu 1960"

2. Is-Sitt Direttiva tal-Kunsill 77/388/KEE tas- 17 ta' Mejju 1977 dwar l-armonizzazzjoni tal-liġijiet ta' l-Istati Membri li għandhom x'jaqsmu mat-taxxi fuq il-valur tal-bejgħ- sistema Komuni ta' taxxa fuq il-valur miżjud: bażi uniformi ta' stima, għandha tiġi emendata:

(a) billi jiddaħħal raba' inċiż fl-Artikolu 14(1)(g), kif ġej:

"— l-eżenzjonijiet stipulatai fit-tielet inċiż għandhom jestendu għall-importazzjoni minn u l-provvisti ta' merkanzija u servizzi lill-forzi tar-Renju Unit stazzjonati fil-gżira ta' Ċipru skond it-Trattat ta' l-Istabbiliment rigward ir-Repubblika ta' Ċipru, bid-data tas- 16 ta' Awissu 1960, li huma għall-użu tal-forzi jew l-impjegati pajsana li jakkumpanjawhom jew għall-provvista' tal-mess jew il-kanteen."

(b) billi jinbidel l-Artikolu 17(3)(b) b'dan li ġej:

"(b) transazzjonijiet li mhumiex eżenti taħt l-Artikolu 14(1)(g) u (i) u taħt l-Artikoli 15, u 16(1)(B) u (Ċ), u l-paragrafu 2"

.

3. L-Artikolu 23(1), l-ewwel sub-paragrafu, tad-Direttiva tal-Kunsill 92/12/KE tal- 25 ta' Frar 1992 dwar l-arranġamenti ġenerali għall-prodotti soġġetti għas-sisa u dwar iż-żamma, il-moviment u l-kontroll ta' dawn il-prodotti għandu jiġi emendat biż-żieda ta' inċiż ġdid, kif ġej:

"— għall-forzi armati tar-Renju Unit stazzjonati fil-gżira ta' Ċipru skond it-Trattat ta' l-Istabbiliment rigward ir-Repubblika ta' Ċipru, bid-data tas- 16 ta' Awissu 1960, għall-użu minn dawn il-forzi, għall-impjegati pajsani li jakkumpanjawhom jew għall-provvista' tal-mess u l-kanteen tagħhom"

.

IR-RABA' PARTI

1. F'dan il-Protokoll:

(a) "fruntieri esterni ta' l-Arei ta' Bażi Sovrani" ifissru l-konfini tal-baħar tagħhom u l-ajruporti tagħhom u l-portijiet tal-baħar tagħhom, iżda mhux il-konfini ta' l-art jew tal-baħar tagħhom mar-Repubblika ta' Ċipru;

(b) "postijiet għall-qsim tal-fruntiera" għandha tfisser kull post fejn tinqasam il-fruntiera awtorizzat mill-awtoritajiet kompetenti tar-Renju Unit għall-qsim tal-fruntieri esterni.

2. Ir-Renju Unit għandu jawtorizza li l-fruntieri esterni ta' l-Arei ta' Bażi Sovrani għandhom jinqasmu biss fil-postijiet għall-qsim tal-fruntiera.

3. (a) Ċittadini ta' pajjiżi terzi għandu jkunu awtorizzati jaqsmu l-fruntier esterni ta' l-Arei ta' Bażi Sovrani biss jekk -

(i) għandhom fil-possessjoni tagħhom dokument ta'l -ivvaġġjar validu;

(ii) għandhom fil-possessjoni tagħhom visa valida għar-Repubblika ta' Ċipru, jekk din hi meħtieġa;

(iii) huma qegħdin jaħdmu f'attività li għandha x'taqsam mad-difiża jew huma membru tal-familja ta' persuna li qed taħdem f'attività bħal din; u

(iv) mhumiex ta' theddida għas-sigurtà nazzjonali.

(b) Ir-Renju Unt jista' jidderoga minn dawn il-kondizzjonijiet biss għar-raġunijiet umanitarji, għar-raġunijiet ta' interess nazzjonali jew sabiex jikkonforma ma' l-obbligi internazzjonali tiegħu.

(ċ) Għall-iskop ta' l-impriża f'ittra (a)(ii) il-membri ta' xi forza, xi parti pajsana u d-dependenti, kif imfissra fl-Anness Ċgħat-Trattat ta' l-Istabbiliment, għandhom ikunu trattati bħala li m'għandhomx bżonn viża għar-Repubblika ta' Ċipru.

4. Ir-Renju Unit għandu jagħmel kontrolli fuq il-persuni li jaqsmu l-fruntieri esterni ta' l-Arei ta' Bażi Sovrani. Dawn il-kontrolli għandhom jinkludu verifika tad-dokumenti ta' l-ivvjaġġar. Il-persuni kollha għandhom jgħaddu minn mill-inqas kontroll wieħed sabiex tiġi stabbilita l-indentità tagħhom.

5. L-awtoritajiet kompetenti tar-Renju Unit għandhom jużaw units mobbli sabiex jagħmlu sorveljanza tal-fruntieri esterni bejn il-postijiet għall-qsim mall-fruntiera u fil-postijiet għall-qsim tal-fruntiera barra mill-ħin tal-ftuħ normali. Din is-sorveljanza għandha ssir b'tali mod li tiskoraġġixxi nies milli jaħarbu l-kontrolli fil-postijiet ta' qsim. L-awtoritajiet kompetenti ta-Renju Unit għandhom jibgħatu biżżejjed uffiċjali kwalifikati kif xieraq sabiex jagħmlu l-kontrolli u s-sorveljanza mal-fruntieri esterni ta' l-Arei ta' Bażi Sovrani.

6. L-awtoritajiet tar-Renju Unit għandhom iżommu koperazzjoni mill-qrib u kostanti ma' l-awtoritajiet tar-Repubblika ta' Ċipru sabiex issir implimentazzjoni effettiva tal-kontrolli u s-sorveljar.

7. (a) Applikant għar-refuġju li daħal għall-ewwel darba fil-gzira ta' Ċipru min barra l-Komunità Ewropea permezz ta' waħda mill-Arei ta' Bażi Sovrani għandu jittieħed lura jew jiġi ri-ammess għall-Arei ta' Bażi Sovrani fuq it-talba ta' l-Istat Membru tal-Kommunita' Ewropea li fit-territorju tiegħu jinsab l-applikant..

(b) Ir-Repubblika ta' Ċipru, tenut kont tal-konsiderazzjonijiet umanitarji, għandha taħdem mar-Renju Unit sabiex jippjanaw metodi u modijiet prattiċi għar-rispett tad-drittijiet u s-satisfazzjoni tal-bżonnijiet ta' persuni li jitolbu refuġju u emigranti illegali fl-Arei ta' Bażi Sovrani, bi qbil mal-leġislazzjoni rilevanti ta' l-Amministrazzjoni ta' l-Arei ta' Bażi Sovrani.

--------------------------------------------------

DIKJARAZZJONI MILL-KUMMISSJONI EWROPEA

Il-Kummissjoni Ewropea tikkonferma il-fehma tagħha li d-disposizzjonijiet tal-liġi Komunitarja applikabbli għall-Arei ta' Bażi Sovrani skond l-Artikolu 3(a) ta' dan il-Protokoll jinkludu:

(a) ir-Regolament tal-Kunsill (KE) Nru. 3448/93 tas- 6 ta' Diċembru 1993 li jistipula l-arranġamenti kummerċjali applikabbli għal ċerti oġġetti li jirriżultaw mill-ipproċessar ta' prodotti agrikoli;

(b) Ir-Regolament tal-Kunsill (KE) Nru. 1260/1999 tal- 21 ta' Ġunju 1999 li jniżżel disposizzjonijiet ġenerali dwar il-Fondi Strutturali, safejn hu meħtieġ mir-Regolament tal-Kunsill (KE) Nru. 1257/1999 tas- 17 ta' Mejju 1999 dwar l-appoġġ għall-iżvilupp rurali mill-Fond Ewropew ta' Gwida u Garanzija Agrikola (EAGGF) sabiex ikunu ffinanzjati miżuri ta' żvilupp rurali fl-Arei ta' Bażi Sovrani taħt it-Taqsima Garanziji tal-EAGGF.

--------------------------------------------------