(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali, kif ukoll ir-raġunijiet u l-proċeduri għall-għoti u għat-tiġdid ta’ din l-awtorizzazzjoni.

(2)

Preparat ta’ endo–1,4-beta-glukanażi prodott mit-Trichoderma citrinoviride IMI 360748 (li qabel kien identifikat tassonomikament bħala Trichoderma citrinoviride Bisset (IM SD142)) ġie awtorizzat għal perjodu ta’ 10 snin bħala addittiv tal-għalf għat-tiġieġ għas-simna, għall-ispeċijiet minuri ta’ pollam għas-simna u għall-qżieqeż miftuma bir-Regolament ta’ Implimentazzjoni tal-Kummissjoni (UE) 2015/2305 (2).

(3)

F’konformità mal-Artikolu 14(1) tar-Regolament (KE) Nru 1831/2003, tressqet applikazzjoni għat-tiġdid tal-awtorizzazzjoni tal-preparat ta’ endo–1,4-beta-glukanażi prodott mit-Trichoderma citrinoviride IMI 360748 għat-tiġieġ għas-simna, għall-ispeċijiet minuri ta’ pollam għas-simna u għall-qżieqeż miftuma, fejn ġie mitlub li l-addittiv jiġi kklassifikat fil-kategorija tal-addittivi “addittivi żootekniċi” u fil-grupp funzjonali “sustanzi li jsaħħu d-diġestibbiltà”. F’konformità mal-Artikolu 7 tar-Regolament (KE) Nru 1831/2003, dik l-applikazzjoni kienet tikkonċerna wkoll l-awtorizzazzjoni ta’ użi ġodda tal-istess preparat bħal addittiv tal-għalf għad-dundjani għas-simna, għall-ispeċijiet kollha ta’ pollam imrobbija għall-bajd jew għat-tnissil, għall-għasafar ornamentali u għad-driefeġ tal-ħalib. Flimkien ma’ dik l-applikazzjoni ntbagħtu d-dettalji u d-dokumenti meħtieġa skont l-Artikolu 14(2) u l-Artikolu 7(3) ta’ dak ir-Regolament.

(4)

Fl-opinjoni tagħha tal-21 ta’ Marzu 2023 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-preparat ta’ endo–1,4-beta-glukanażi prodott mit-Trichoderma citrinoviride IMI 360748 għadha sikura għat-tiġieġ għas-simna, għall-ispeċijiet minuri ta’ pollam għas-simna u għall-qżieqeż miftuma, kif ukoll għall-konsumaturi u għall-ambjent skont il-kundizzjonijiet tal-użu li huma awtorizzati bħalissa, u indikat li din il-konklużjoni dwar is-sikurezza tapplika wkoll għad-dundjani għas-simna, għall-ispeċijiet kollha ta’ pollam imrobbija għall-bajd jew għat-tnissil, għall-għasafar ornamentali u għad-driefeġ tal-ħalib. L-Awtorità kkonkludiet ukoll li l-preparat mhux meqjus bħala korrużiv għall-ġilda jew irritant tal-għajnejn. Hija ddikjarat li l-preparat jenħtieġ li jitqies bħala sensitizzatur tal-ġilda u sensitizzatur respiratorju, filwaqt li ma setgħet tintlaħaq l-ebda konklużjoni dwar il-potenzjal tal-addittiv li jkun irritant tal-ġilda. L-Awtorità indikat li ma kienx meħtieġ li tiġi vvalutata l-effikaċja tal-preparat ta’ endo–1,4-beta-glukanażi prodott mit-Trichoderma citrinoviride IMI 360748 fil-kuntest tat-tiġdid tal-awtorizzazzjoni għat-tiġieġ għas-simna, għall-ispeċijiet minuri ta’ pollam għas-simna u għall-qżieqeż miftuma, u dehrilha li l-konklużjonijiet dwar l-effikaċja milħuqa għat-tiġieġ għas-simna u għall-qżieqeż miftuma jistgħu jiġu estiżi għad-dundjani għas-simna, għall-ispeċijiet kollha ta’ pollam imrobbija għall-bajd jew għat-tnissil, għall-għasafar ornamentali u għad-driefeġ tal-ħalib. L-Awtorità ma dehriliex li hemm il-ħtieġa għal rekwiżiti speċifiċi ta’ sorveljanza ta’ wara l-introduzzjoni fis-suq.

(5)

Il-Laboratorju ta’ Referenza stabbilit bir-Regolament (KE) Nru 1831/2003 deherlu li l-konklużjonijiet u r-rakkomandazzjonijiet li ntlaħqu fil-valutazzjoni mwettqa fir-rigward tal-metodu ta’ analiżi tal-endo–1,4-beta-glukanażi bħala addittiv tal-għalf fil-kuntest tal-awtorizzazzjoni preċedenti huma validi u applikabbli għall-applikazzjoni attwali. Għalhekk, f’konformità mal-Artikolu 5(4), il-punti (a) u (c), tar-Regolament tal-Kummissjoni (KE) Nru 378/2005 (4), mhux meħtieġ rapport ta’ evalwazzjoni tal-Laboratorju ta’ Referenza.

(6)

Fid-dawl ta’ dan ta’ hawn fuq, il-Kummissjoni jidhrilha li l-preparat tal-endo–1,4-beta-glukanażi prodott mit-Trichoderma citrinoviride IMI 360748 jissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-awtorizzazzjoni ta’ dak il-preparat tiġġedded għat-tiġieġ għas-simna, għall-ispeċijiet minuri ta’ pollam għas-simna u għall-qżieqeż miftuma, u jenħtieġ li l-użu ta’ dak il-preparat jiġi awtorizzat għad-dundjani għas-simna, għall-ispeċijiet kollha ta’ pollam imrobbija għall-bajd jew għat-tnissil, għall-għasafar ornamentali u għad-driefeġ tal-ħalib. Barra minn hekk, il-Kummissjoni hija tal-fehma li jenħtieġ li jittieħdu miżuri protettivi xierqa biex jiġu evitati effetti negattivi fuq is-saħħa tal-utenti tal-addittiv.

(7)

Bħala konsegwenza tat-tiġdid tal-awtorizzazzjoni tal-preparat ta’ endo–1,4-beta-glukanażi prodott mit-Trichoderma citrinoviride IMI 360748 bħala addittiv tal-għalf għat-tiġieġ għas-simna, għall-ispeċijiet minuri ta’ pollam għas-simna u għall-qżieqeż miftuma, jenħtieġ li r-Regolament ta’ Implimentazzjoni (UE) 2015/2305 jiġi emendat.

(8)

Billi r-raġunijiet ta’ sikurezza ma jeħtiġux l-applikazzjoni immedjata tal-modifiki fil-kundizzjonijiet tal-awtorizzazzjoni tal-preparat ta’ endo–1,4-beta-glukanażi prodott mit-Trichoderma citrinoviride IMI 360748 għat-tiġieġ għas-simna, għall-ispeċijiet minuri ta’ pollam għas-simna u għall-qżieqeż miftuma, jixraq li jiġi previst perjodu tranżitorju għall-partijiet interessati biex iħejju ruħhom ħalli jissodisfaw ir-rekwiżiti l-ġodda li jirriżultaw mit-tiġdid tal-awtorizzazzjoni.

(9)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

L-Artikolu 1 jitħassar;

(2)

l-Anness jitħassar.