Kawża T-308/00 RENV

Salzgitter AG

vs

Il-Kummissjoni Ewropea

“Għajnuna mill-Istat — Industrija tal-azzar u tal-ħadid — Inċentivi fiskali intiżi sabiex jikkontribwixxu għall-iżvilupp taż-żona tul il-fruntiera mal-ex Repubblika Demokratika tal-Ġermanja u mal-ex Repubblika Ċekoslovakka — Għajnuna mhux innotifikata — Deċiżjoni li tiddikjara l-għajnuna inkompatibbli mas-suq komuni — Irkupru — Dewmien — Ċertezza legali — Kalkolu tal-għajnuna li għandha tiġi rrimborsata — Għajnuna li taqa’ taħt it-Trattat KEFA — Investimenti intiżi għall-protezzjoni tal-ambjent — Rata ta’ tnaqqis”

Sommarju — Sentenza tal-Qorti Ġenerali (It-Tieni Awla Estiża) tat-22 ta’ Jannar 2013

1. Rikors għal annullament – Ġurisdizzjoni tal-qorti tal-Unjoni – Talbiet intiżi li tinkiseb ordni indirizzata lil istituzzjoni – Inammissibbiltà

   (Artikoli 263 TFUE u 266 TFUE)

2. KEFA – Għajnuna lill-industrija tal-azzar u tal-ħadid – Irkupru ta’ għajnuna illegali – Miżuri ta’ għajnuna mhux innotifikati – Nuqqas ta’ azzjoni min-naħa tal-Kummissjoni matul perijodu relattivament twil – Ċertezza legali – Protezzjoni – Kundizzjonijiet u limiti – Ċirkustanzi eċċezzjonali

   (Artikolu 4(ċ) KEFA)

3. KEFA – Għajnuna lill-industrija tal-azzar u tal-ħadid – Irkupru ta’ għajnuna illegali – Miżuri ta’ għajnuna mhux innotifikati – Nuqqas ta’ azzjoni min-naħa tal-Kummissjoni matul perijodu relattivament twil – Assenza ta’ ksur tal-prinċipju ta’ ċertezza legali – Evalwazzjoni mill-Qorti Ġenerali

4. KEFA – Kamp ta’ applikazzjoni tat-Trattat – Regoli dwar l-għajnuna mill-Istat – Applikabbiltà tad-dispożizzjonijiet tat-Trattat KE biss b’mod sussidjarju

   (Artikolu 305(1) KE)

5. KEFA – Għajnuna lill-industrija tal-azzar u tal-ħadid – Kunċett – Evalwazzjoni fir-rigward biss tad-dispożizzjonijiet rilevanti tat-Trattat KEFA – Teħid inkunsiderazzjoni ta’ prattika deċiżjonali preċedenti tal-Kummissjoni – Esklużjoni

   (Artikolu 4(ċ) KEFA)

6. KEFA – Kamp ta’ applikazzjoni tat-Trattat – Regoli dwar l-għajnuna mill-Istat – Applikazzjoni għall-attivitajiet kollha ta’ impriża li topera fl-industrija tal-azzar u tal-ħadid – Kundizzjonijiet – Riskju reali li għajnuna tintuża favur attivitajiet ta’ produzzjoni li jaqgħu taħt il-kamp ta’ applikazzjoni tat-Trattat KEFA – Kunċett

   (Artikoli 4(ċ) KEFA, 80 KEFA u 81 KEFA)

7. KEFA – Għajnuna lill-industrija tal-azzar u tal-ħadid – Kunċett – Miżuri li għandhom għan ambjentali – Inklużjoni

   (Artikolu 4(ċ) KEFA)

8. Atti tal-istituzzjonijiet – Applikazzjoni ratione temporis – Retroattività ta’ regola sostantiva – Kundizzjonijiet – Nuqqas ta’ retroattività tar-regoli tal-Kodiċi ta’ Għajnuna lill-Industrija tal-Azzar u tal-Ħadid

   (Artikoli 2 KEFA sa 4 KEFA; Deċiżjoni Ġenerali Nru 2496/96)

9. Atti tal-istituzzjonijiet – Motivazzjoni – Obbligu – Portata – Deċiżjoni tal-Kummissjoni fil-qasam tal-għajnuna mill-Istat

   (Artikoli 4(ċ) KEFA u 15 KEFA; Artikolu 253 KE)

10. KEFA – Għajnuna lill-industrija tal-azzar u tal-ħadid – Irkupru ta’ għajnuna illegali – Stabbiliment mill-ġdid tas-sitwazzjoni preċedenti – Għajnuna fil-forma ta’ differiment tat-taxxa – Rimbors tal-interessi kollha mhux imħallsa mill-benefiċjarju – Determinazzjoni ta’ rata tal-interessi ta’ referenza – Setgħa diskrezzjonali tal-Kummissjoni – Stħarriġ ġudizzjarju – Limiti

    (Artikolu 4(ċ) KEFA)

11. KEFA – Għajnuna lill-industrija tal-azzar u tal-ħadid – Irkupru ta’ għajnuna illegali – Applikazzjoni tad-dritt nazzjonali – Tnaqqis, mill-awtoritajiet nazzjonali, ta’ ċerti somom mill-ammont li għandu jiġi rkuprat – Limiti

    (Artikolu 4(ċ) KEFA)

1.  Ara t-test tad-deċiżjoni.

   (ara l-punt 19)

2.  Anki fin-nuqqas ta’ perijodu ta’ preskrizzjoni stabbilit mil-leġiżlatur Komunitarju, ir-rekwiżit fundamentali ta’ ċertezza legali jipprekludi li l-Kummissjoni tista’ iddewwem indefinittivament l-eżerċizzju tas-setgħat tagħha.

   Madankollu, in-notifika mill-Istati tal-għajnuna mill-Istat hija element ċentrali tar-regoli Komunitarji bil-għan tal-kontroll tagħha u, għaldaqstant, fin-nuqqas ta’ notifika, l-impriżi benefiċjarji minn din l-għajnuna ma jistgħux ikollhom aspettattiva leġittima.

   F’dan ir-rigward is-sistema prevista mit-Trattat KEFA fir-rigward tal-għajnuna mill-Istat hija distinta, min-natura tagħha partikolarment stretta, minn dik tat-Trattat KE.

   Għaldaqstant, meta, fil-kuntest tat-Trattat KEFA, għajnuna ngħatat mingħajr ma kienet innotifikata, id-dewmien mill-Kummissjoni sabiex teżerċita s-setgħat tagħha ta’ kontroll u sabiex tordna l-irkupru ta’ din l-għajnuna jivvizzja b’illegalità din id-deċiżjoni ta’ rkupru, biss f’każijiet eċċezzjonali li juru nuqqas manifest tal-Kummissjoni u ksur evidenti tal-obbligu tagħha ta’ diliġenza.

   (ara -punti 23-26)

3.  Ara t-test tad-deċiżjoni.

   (ara l-punti 27-67)

4.  Ara t-test tad-deċiżjoni.

   (ara l-punti 51, 52)

5.  Ara t-test tad-deċiżjoni.

   (ara l-punt 66)

6.  Skont l-Artikoli 80 KEFA u 81 KEFA, biss l-impriżi li jeżerċitaw attività ta’ produzzjoni fil-qasam tal-faħam u tal-azzar huma suġġetti għar-regoli tat-Trattat KEFA. F’dan ir-rigward, biss il-prodotti elenkati fl-Anness I tat-Trattat KEFA huma koperti mill-espressjonijiet “faħam” [traduzzjoni mhux uffiċjali] u “azzar” [traduzzjoni mhux uffiċjali]. Għaldaqstant, impriża hija suġġetta għall-projbizzjoni mniżżla fl-Artikolu 4(ċ) KEFA biss sa fejn hija teżerċita tali attività ta’ produzzjoni.

   Madankollu, il-fatt li impriża teżerċita attivitajiet ta’ produzzjoni fil-qasam tal-azzar ma jimplikax li l-attivitajiet kollha tagħha għandhom jitqiesu li huma attivitajiet suġġetti għat-Trattat KEFA. F’dan ir-rigward, fl-impriżi li jimmanifatturaw kemm prodotti li jaqgħu taħt it-Trattat KEFA kif ukoll prodotti li jaqgħu taħt it-Trattat KE, l-applikazzjoni tat-Trattat KEFA fir-rigward ta’ għajnuna intiża sabiex issostni settur ta’ produzzjoni li ma jaqax taħt il-kamp ta’ applikazzjoni ta’ dan tal-aħħar tista’ tiġi ġġustifikata meta jeżisti riskju reali li din l-għajnuna tintuża favur attivitajiet ta’ produzzjoni inklużi f’dan il-kamp ta’ applikazzjoni. Fil-fatt, b’rigward, minn naħa, tal-partikolaritajiet tas-settur tal-azzar u tal-ħadid u, min-naħa l-oħra, tal-projbizzjoni stretta u assoluta tal-għajnuna mill-Istat stabbilita fl-Artikolu 4(ċ) KEFA, ikun kuntrarju għall-għan tas-sistema stabbilita mit-Trattat KEFA li l-eżami tal-għajnuna li tista’ potenzjalment tibbenefika lis-setturi ta’ produzzjoni ta’ impriża li jaqgħu taħt it-Trattat KEFA jiġi sottomess għar-regoli inqas stretti tat-Trattat KE.

   Il-kundizzjoni relatata ma’ riskju reali ta’ devjazzjoni tal-għajnuna hija sodisfatta, b’mod partikolari, jekk l-organizzazzjoni tal-attivitajiet tar-rikorrenti ma toffrix garanziji suffiċjenti li jippermettu li tiġi eskluża devjazzjoni tal-għajnuna għall-investiment ikkontestata favur l-attivitajiet ta’ produzzjoni tagħha suġġetti għat-Trattat KEFA u, għaldaqstant, effett fuq il-kompetizzjoni fis-suq li jaqa’ taħt dan it-trattat. Għaldaqstant, ir-riskju ta’ devjazzjoni għandu jiġi stabbilit permezz ta’ indizji serji li jagħtu raġonevolment x’jiġi mifhum li l-għajnuna tista’, fid-dawl taċ-ċirkustanzi tal-każ, tkun is-suġġett ta’ devjazzjoni favur attivitajiet KEFA tal-impriża tal-azzar u tal-ħadid ikkonċernata.

   (ara l-punti 75, 77, 78, 80)

7.  Anki jekk il-protezzjoni tal-ambjent tikkostitwixxi wieħed mill-għanijiet essenzjali tal-Unjoni, il-ħtieġa li dan l-għan jittieħed inkunsiderazzjoni ma tiġġustifikax l-esklużjoni ta’ miżuri selettivi mill-kamp ta’ applikazzjoni tal-Artikolu 4(ċ) KEFA. Fil-fatt, sabiex jiġi ddeterminat jekk miżura nazzjonali tistax tiġi kklassifikata bħala għajnuna mill-Istat, ma huwiex l-għan tagħha li huwa importanti, iżda l-effetti tagħha. Għaldaqstant, l-għan ambjentali li miżuri tal-Istat iridu jilħqu ma huwiex biżżejjed sabiex dawn il-miżuri jiġu għalkollox esklużi mill-klassifikazzjoni bħala “għajnuna”.

   (ara l-punti 98, 99)

8.  Kuntrarjament għad-dispożizzjonijiet tat-Trattat KE relatati mal-għajnuna mill-Istat, li jawtorizzaw b’mod permanenti lill-Kummissjoni tiddeċiedi dwar il-kompatibbiltà tagħha, il-Kodiċi ta’ Għajnuna lill-Industrija tal-Azzar u tal-Ħadid jagħtu din is-setgħa lill-Kummissjoni biss għal perijodu speċifiku. Għaldaqstant, meta għajnuna ma hijiex innotifikata lill-Kummissjoni fil-perijodu previst minn kodiċi għal dan il-għan, il-Kummissjoni ma tistax iktar tiddeċiedi dwar il-kompatibbiltà ta’ din l-għajnuna fir-rigward ta’ dan il-kodiċi Għaldaqstant, ladarba l-perijodu ta’ applikazzjoni tal-kodiċi jkun skada, il-Kummissjoni ma għandhiex iktar is-setgħa tawtorizza, abbażi tad-derogi previsti, għajnuna lill-industrija tal-azzar u tal-ħadid mhux innotifikata fil-kuntest ta’ dan il-kodiċi.

   Barra minn hekk, mill-prinċipju ta’ ċertezza legali jirriżulta li l-kompatibbiltà ta’ għajnuna mas-suq komuni tista’ tkun evalwata, fil-kuntest tal-Kodiċi ta’ Għajnuna lill-Industrija tal-Azzar u tal-Ħadid, biss fid-dawl tar-regoli fis-seħħ fid-data li fiha hija effettivament imħallsa. F’dan ir-rigward, id-dispożizzjonijiet legali sostantivi Komunitarji għandhom jiġu interpretati fis-sens li dawn japplikaw għal sitwazzjonijiet eżistenti qabel id-dħul fis-seħħ tagħhom biss sa fejn jirriżulta b’mod ċar mill-kliem, mill-għanijiet jew mill-istruttura ġenerali tagħhom li tali effett għandu jiġi attribwit lilhom

   Fir-rigward, b’mod partikolari, tas-Sitt Kodiċi ta’ Għajnuna lill-Industrija tal-Azzar u tal-Ħadid, ebda dispożizzjoni ta’ dan il-kodiċi ma tistabbilixxi li dan jista’ jiġi applikat retroattivament. Barra minn hekk, mill-istruttura u mill-għanijiet tal-Kodiċi ta’ Għajnuna suċċessivi jirriżulta li kull wieħed minnhom jistabbilixxi regoli għall-adattament tal-industrija tal-azzar u tal-ħadid għall-għanijiet tal-Artikoli 2 KEFA, 3 KEFA u 4 KEFA abbażi tal-ħtiġijiet eżistenti f’perijodu speċifiku. Għaldaqstant, l-applikazzjoni tar-regoli adottati f’ċertu perijodu, skont is-sitwazzjoni tiegħu, għal għajnuna mħallsa matul perijodu preċedenti, ma tikkorrispondix la għall-istruttura u lanqas għall-għanijiet ta’ dawn it-tip ta’ regoli.

   (ara l-punti 103-105, 109)

9.  Ara t-test tad-deċiżjoni.

   (ara -punti 112-115)

10.  L-irkupru ta’ għajnuna mill-Istat mogħtija illegalment huwa intiż sabiex tiġi stabbilita mill-ġdid is-sitwazzjoni eżistenti qabel l-għoti ta’ din l-għajnuna u ma jistax, bħala regola ġenerali, jitqies li huwa miżura sproporzjonata fir-rigward tal-għanijiet tal-Artikolu 4(ċ) KEFA. Madankollu dan l-irkupru għandu jkun limitat għall-vantaġġi finanzjarji li effettivament jirriżultaw mit-tqegħid għad-dispożizzjoni tal-benefiċjarju tal-għajnuna u għandu jkun proporzjonali għaliha. Għaldaqstant, fil-każ li l-għajnuna mogħtija tieħu l-forma ta’ differiment tat-taxxa fuq diversi snin, u għaldaqstant, ta’ avvanz ta’ likwidità bla ħlas jew ta’ self mingħajr interessi, huwa neċessarju, bil-għan li terġa tinkiseb is-sitwazzjoni preċedenti, li jiġi ordnat ir-rimbors tal-interessi kollha li l-benefiċjarju kien ikollu jħallas skont ir-rati pprattikati fis-suq.

    Il-Kummissjoni, bil-għan li tordna l-istabbiliment mill-ġdid tas-sitwazzjoni preċedenti, għandha s-setgħa li tiddetermina r-rata tal-interessi li tippermetti li jintlaħaq tali stabbiliment mill-ġdid. Għaldaqstant, il-qorti tal-Unjoni, fil-kuntest tal-istħarriġ tal-legalità tal-eżerċizzju ta’ tali setgħa, ma għandhiex tissostitwixxi l-evalwazzjoni tagħha f’dan il-qasam għal dik tal-Kummissjoni, iżda għandha teżamina jekk din l-aħħar evalwazzjoni hijiex ivvizzjata bi żball manifest ta’ evalwazzjoni jew b’użu ħażin ta’ poter.

    Fir-rigward tad-determinazzjoni tar-rati applikabbli, għandu jitfakkar li r-rati ta’ referenza suppost jirrappreżentaw il-livell medju tar-rati tal-interessi fis-seħħ f’kull wieħed mill-Istati Membri. Għaldaqstant ir-rati ta’ referenza jikkostitwixxu indikazzjoni valida tar-rati tas-suq għal self intiż għal investimenti industrijali. F’dan ir-rigward, għal raġunijiet ta’ ċertezza legali u ta’ ugwaljanza fit-trattament, il-Kummissjoni tista’ tqis, bħala regola ġenerali, li huwa leġittimu li tapplika r-rata ta’ referenza fis-seħħ matul perijodu speċifiku fir-rigward tas-self kollu mogħti matul dan il-perijodu. Barra minn hekk, il-Kummissjoni tista’ tieħu bħala rata ta’ referenza r-rati stabbiliti għall-evalwazzjoni tal-iskemi ta’ għajnuna b’għan reġjonali, kif ippubblikati perjodikament f’Il-Ġurnal Uffiċjali tal-Komunitajiet Ewropej, peress li dawn ir-rati favorevoli, applikabbli għal impriżi finanzjarjament b’saħħithom, kienu ntużaw sabiex tiġi ddeterminata l-eżistenza ta’ elementi ta’ għajnuna fil-każ li l-iskema kkontestata tkun ġiet innotifikata.

    (ara l-punti 137-143)

11.  Ara t-test tad-deċiżjoni.

    (ara l-punti 165-167)