Kawżi magħquda C‑451/21 P u C‑454/21 P

Il-Gran Dukat tal-Lussemburgu et

vs

Il-Kummissjoni Ewropea

Sentenza tal-Qorti tal-Ġustizzja (Awla Manja) tal-5 ta’ Diċembru 2023

“Appell – Għajnuna mill-Istat – Artikolu 107(1) TFUE – Deċiżjonijiet tat-taxxa bil-quddiem adottati minn Stat Membru – Għajnuna ddikjarata inkompatibbli mas-suq intern – Obbligu ta’ rkupru ta’ din l-għajnuna – Kunċett ta’ ‘vantaġġ’ – Determinazzjoni tal-qafas ta’ riferiment – Tassazzjoni ‘normali’ skont id-dritt nazzjonali – Stħarriġ mill-Qorti tal-Ġustizzja tal-interpretazzjoni u tal-applikazzjoni tad-dritt nazzjonali mill-Qorti Ġenerali tal-Unjoni Ewropea – Tassazzjoni diretta – Interpretazzjoni stretta – Setgħat tal-Kummissjoni Ewropea – Obbligu ta’ motivazzjoni – Klassifikazzjoni ġuridika tal-fatti – Kunċett ta’ ‘abbuż ta’ dritt’ – Evalwazzjoni ex ante mill-awtorità tat-taxxa tal-Istat Membru kkonċernat – Prinċipju ta’ ċertezza legali”

1. Appell – Aggravji – Evalwazzjoni żbaljata tal-fatti u tal-provi – Inammissibbiltà – Stħarriġ mill-Qorti tal-Ġustizzja tal-evalwazzjoni tal-fatti u tal-provi – Esklużjoni ħlief fil-każ ta’ żnaturament – Eżami mill-Kummissjoni tal-eżistenza ta’ għajnuna mill-Istat fil-qasam tat-taxxa – Delimitazzjoni tal-qafas ta’ riferiment fid-dritt nazzjonali u interpretazzjoni tad-dispożizzjonijiet li jikkostitwixxuh – Kwistjoni ta’ liġi li tista’ tiġi invokata fil-kuntest ta’ appell

   (subparagrafu 2 tal-Artikolu 256(1) TFUE; Statut tal-Qorti tal-Ġustizzja, Artikolu 58(1))

   (ara l-punti 76 sa 80)

2. Għajnuna mogħtija mill-Istati – Kunċett – Natura selettiva tal-miżura – Miżura li tagħti vantaġġ fiskali – Deċiżjoni tat-taxxa bil-quddiem dwar struttura korporattiva u finanzjarja kumplessa – Qafas ta’ riferiment għad-determinazzjoni tal-eżistenza ta’ vantaġġ selettiva – Identifikazzjoni tas-sistema fiskali komuni jew normali – Teħid inkunsiderazzjoni biss tad-dritt nazzjonali fil-qasam tat-tassazzjoni diretta – Obbligu għall-Kummissjoni li taċċetta l-interpretazzjoni letterali tad-dritt nazzjonali mogħtija mill-Istat Membru – Limiti – Eżistenza ta’ interpretazzjoni oħra prevalenti fil-ġurisprudenza jew fil-prassi amministrattiva ta’ dan l-Istat – Oneru tal-prova li jaqa’ fuq il-Kummissjoni – Neċessità li jiġu pprovduti elementi affidabbli u konkordanti, suġġetti għal dibattitu kontradittorju

   (Artikolu 107(1) TFUE)

   (ara l-punti 106 sa 131)

3. Għajnuna mogħtija mill-Istati – Kunċett – Natura selettiva tal-miżura – Miżura li tagħti vantaġġ fiskali – Deċiżjoni tat-taxxa bil-quddiem dwar struttura korporattiva u finanzjarja kumplessa – Nuqqas ta’ applikazzjoni mill-awtorità tat-taxxa ta’ dispożizzjoni nazzjonali intiża sabiex tipprekludi l-abbuż ta’ dritt fil-qasam tat-taxxa – Għoti ta’ vantaġġ selettiv – Kundizzjoni – Ommissjoni ta’ applikazzjoni tad-dispożizzjoni kontra l-abbuż b’mod li jitbiegħed mill-ġurisprudenza jew mill-prassi amministrattiva nazzjonali

   (Artikolu 107(1) TFUE)

   (ara l-punti 151 sa 159)

4. Għajnuna mogħtija mill-Istati – Kunċett – Natura selettiva tal-miżura – Miżura li tagħti vantaġġ fiskali – Deċiżjoni tat-taxxa bil-quddiem dwar struttura korporattiva u finanzjarja kumplessa – Analiżi tal-Kummissjoni li tikkonkludi li ngħata vantaġġ selettiva – Analiżi vvizzjata minn żbalji ta’ liġi

   (Artikolu 107(1) TFUE)

   (ara l-punti 163 sa 186)

Sunt

Bejn l-2008 u l-2014, l-awtorità tat-taxxa Lussemburgiża ħarġet żewġ sensiliet ta’ deċiżjonijiet tat-taxxa bil-quddiem (“tax rulings”, iktar ’il quddiem “DTQ”) dwar żewġ operazzjonijiet ta’ ristrutturazzjoni mwettqa minn diversi kumpanniji Lussemburgiżi tal-grupp Engie.

L-operazzjonijiet ta’ ristrutturazzjoni inkwistjoni, li kellhom struttura ekonomika u ġuridika simili, kienu bbażati, it-tnejn li huma, fuq iċ-ċessjoni, fi ħdan il-grupp Engie, tal-assi ta’ kumpannija lil kumpannija sussidjarja. Sabiex tiffinanzja dan ix-xiri, il-kumpannija sussidjarja kisbet mingħand kumpannija intermedjarja self mingħajr interessi li b’mod obbligatorju seta’ jiġi kkonvertit f’azzjonijiet fl-iskadenza, imsejjaħ obbligu b’interessi żero rimborsabbli f’azzjonijiet (iktar ’il quddiem l-“OŻRA”). Fi tmiem is-self, il-kumpannija sussidjarja kellha tirrimborsa, permezz ta’ ħruġ ta’ azzjonijiet, l-ammont nominali tas-self flimkien ma’ “primjum” li kien jikkonsisti fil-profitti kollha li hija kienet għamlet matul il-perijodu tas-self, ikklassifikati bħala “akkumulazzjonijiet fuq l-OŻRA”.

Sabiex tiffinanzja s-sottoskrizzjoni tagħha għas-self, il-kumpannija intermedjarja, min-naħa tagħha, għamlet użu minn kuntratt ta’ bejgħ forward imħallas minn qabel konkluż ma’ kumpannija holding tal-grupp Engie, li kienet l-unika azzjonista kemm tal-kumpannija sussidjarja kif ukoll tal-kumpannija intermedjarja. Waqt il-konklużjoni tal-imsemmi kuntratt, il-kumpannija holding ħallset lill-kumpannija intermedjarja ammont li kien jikkorrispondi għall-ammont nominali tal-OŻRA, li bħala korrispettiv għalih il-kumpannija intermedjarja ttrasferixxiet lill-kumpannija holding id-drittijiet relatati mal-azzjonijiet li nħarġu fi tmiem l-OŻRA, inklużi dawk li jikkorrispondu, jekk ikun il-każ, għall-valur akkumulat tal-akkumulazzjonijiet fuq l-OŻRA.

Wara li talbet informazzjoni mingħand l-awtoritajiet Lussemburgiżi dwar id-DTQ adottati fir-rigward tal-grupp Engie, il-Kummissjoni fetħet il-proċedura ta’ investigazzjoni formali. Fi tmiem din il-proċedura, il-Kummissjoni kkonstatat, permezz ta’ deċiżjoni tal-20 ta’ Ġunju 2018 ( 1 ), li l-Gran Dukat tal-Lussemburgu kien, permezz tal-awtorità tat-taxxa tiegħu, ta, bi ksur tal-Artikolu 107(1) u tal-Artikolu 108(3) TFUE, vantaġġ selettiv lill-grupp Engie. Hija ordnat l-irkupru ta’ dan il-vantaġġ mingħand il-benefiċjarji. Fid-deċiżjoni tagħha, il-Kummissjoni essenzjalment qieset li, minħabba d-DTQ inkwistjoni, kważi l-profitti kollha magħmula mis-sussidjarji ta’ Engie fil-Lussemburgu ma kinux ġew intaxxati.

Il-Gran Dukat tal-Lussemburgu u l-kumpanniji tal-grupp Engie ppreżentaw rikorsi għall-annullament ta’ din id-deċiżjoni, li ġew miċħuda mill-Qorti Ġenerali ( 2 ).

Adita b’appelli ppreżentati mill-Gran Dukat tal-Lussemburgu u mill-kumpanniji tal-grupp Engie, il-Qorti tal-Ġustizzja, bl-Awla Manja bħala l-kulleġġ ġudikanti, annullat is-sentenza tal-Qorti Ġenerali, u sussegwentement, fid-deċiżjoni definittiva tagħha tat-tilwima, annullat ukoll id-deċiżjoni kontenzjuża. F’dan il-kuntest, hija ppreċiżat il-ġurisprudenza tagħha dwar id-definizzjoni u l-analiżi tal-qafas ta’ riferiment li fid-dawl tiegħu kellha tiġi evalwata s-selettività ta’ miżuri fiskali sabiex jiġi ddeterminat jekk dawn kinux jikkostitwixxu għajnuna mill-Istat fis-sens tal-Artikolu 107(1) TFUE.

Il-kunsiderazzjonijiet tal-Qorti tal-Ġustizzja

Qabelxejn, il-Qorti tal-Ġustizzja ddikjarat ammissibbli l-aggravji li kienu qegħdin jikkontestaw l-evalwazzjonijiet tal-Qorti Ġenerali tal-qafas ta’ riferiment li kien joħroġ mid-dritt Lussemburgiż u li l-Kummissjoni ddeterminat sabiex teżamina jekk id-DTQ inkwistjoni kinux jagħtu vantaġġ selettiv lill-grupp Engie.

F’dan ir-rigward, il-Qorti tal-Ġustizzja rrilevat li l-kwistjoni dwar jekk il-Qorti Ġenerali kinitx iddelimitat b’mod xieraq is-sistema ta’ riferiment fid-dritt Lussemburgiż u, b’estensjoni, interpretatx b’mod korrett id-dispożizzjonijiet nazzjonali li jikkostitwixxu din is-sistema kienet kwistjoni ta’ dritt li setgħet tkun is-suġġett tal-istħarriġ tal-Qorti tal-Ġustizzja fl-istadju tal-appell. Għalhekk, l-argumenti tal-appellanti intiżi li jikkontestaw l-għażla tal-qafas ta’ riferiment jew it-tifsira tiegħu fl-ewwel stadju tal-analiżi tal-eżistenza ta’ vantaġġ selettiv kienu ammissibbli, peress li din l-analiżi kienet tirriżulta minn klassifikazzjoni ġuridika tad-dritt nazzjonali abbażi ta’ dispożizzjoni tad-dritt tal-Unjoni.

Wara li ddikjarat dawn l-aggravji ammissibbli, il-Qorti tal-Ġustizzja fakkret, fil-mertu, li, sabiex miżura fiskali nazzjonali tiġi kklassifikata “selettiva” għall-finijiet tal-applikazzjoni tal-Artikolu 107(1) TFUE, il-Kummissjoni għandha tidentifika, l-ewwel nett, is-sistema ta’ riferiment, jiġifieri s-sistema fiskali “normali” applikabbli fl-Istat Membru kkonċernat, u għandha, sussegwentement, turi li l-miżura fiskali inkwistjoni tidderoga minn din is-sistema ta’ riferiment, sa fejn hija kienet tintroduċi differenzazzjonijiet bejn operaturi li, fid-dawl tal-għan imfittex minn din tal-aħħar, ikunu jinsabu f’sitwazzjoni fattwali u legali komparabbli.

Fuq dan il-punt, il-Qorti tal-Ġustizzja osservat, barra minn hekk, li, minbarra l-oqsma li fihom id-dritt fiskali tal-Unjoni huwa s-suġġett ta’ armonizzazzjoni, huwa l-Istat Membru kkonċernat li għandu jiddetermina, permezz tal-eżerċizzju tal-kompetenzi tiegħu fil-qasam tat-tassazzjoni diretta, il-karatteristiċi li jikkostitwixxu t-taxxa, li jiddefinixxu, bħala prinċipju, is-sistema ta’ riferiment jew is-sistema fiskali “normali”. Dan japplika b’mod partikolari għad-determinazzjoni tal-bażi tat-taxxa, tal-fatt taxxabbli tagħha u tal-eżenzjonijiet eventwali marbuta miegħu. Minn dan isegwi li huwa biss id-dritt nazzjonali applikabbli fl-Istat Membru kkonċernat li għandu jittieħed inkunsiderazzjoni sabiex tiġi identifikata l-imsemmija sistema ta’ riferiment. Madankollu, din il-konklużjoni hija bla ħsara għall-possibbiltà li jiġi kkonstatat li l-qafas ta’ riferiment innifsu, kif jirriżulta mid-dritt nazzjonali, ikun inkompatibbli mad-dritt tal-Unjoni fil-qasam tal-għajnuna mill-Istat, peress li s-sistema fiskali inkwistjoni tkun ġiet ikkonfigurata skont parametri manifestament diskriminatorji, intiżi li jiġi evitat l-imsemmi dritt.

Fid-dawl ta’ dawn il-prinċipji, il-Qorti tal-Ġustizzja kkonstatat li, sabiex tistabbilixxi s-selettività tad-DTQ inkwistjoni, il-Kummissjoni kienet ibbażat ruħha fuq erba’ linji ta’ raġunament, li t-tieni waħda minnhom ġiet approvata mill-Qorti Ġenerali fis-sentenza appellata. Fil-kuntest ta’ din it-tieni linja ta’ raġunament, il-Kummissjoni sostniet li l-eżenzjoni tad-dħul li jikkorrispondi għall-akkumulazzjonijiet fuq l-OŻRA, mogħtija skont id-DTQ fil-livell tal-kumpanniji holding, kienet tidderoga mill-applikazzjoni “normali” tal-Artikoli 164 u 166 tal-Liġi Lussemburgiża dwar it-Taxxa fuq id-Dħul (iktar ’il quddiem il-“LIR”) ( 3 ), relatati rispettivament mat-tassazzjoni tad-distribuzzjonijiet tal-profitti u mal-eżenzjoni tad-dħul mill-ishma.

Peress li l-Gran Dukat tal-Lussemburgu kkontesta l-interpretazzjoni tal-Artikoli 164 u 166 tal-LIR adottata mill-Kummissjoni, il-Qorti tal-Ġustizzja rrilevat li, meta l-interpretazzjoni tas-sistema fiskali “normali” mogħtija mill-Istat Membru kkonċernat tkun kompatibbli mal-formulazzjoni tad-dispożizzjonijiet inkwistjoni, il-Kummissjoni tista’ titbiegħed minn din l-interpretazzjoni biss jekk tkun f’pożizzjoni li tistabbilixxi li interpretazzjoni oħra tipprevali fil-ġurisprudenza jew fil-prassi amministrattiva ta’ dan l-Istat Membru, billi tibbaża ruħha fuq elementi affidabbli u konkordanti, suġġetti għal dibattitu kontradittorju.

Issa, l-elementi li fuqhom il-Qorti Ġenerali bbażat ruħha ma kinux jippermettulha tikkonstata validament li l-Kummissjoni setgħet tistabbilixxi b’mod suffiċjenti fid-dritt li, fid-dawl tal-interpretazzjoni tal-Artikoli 164 u 166 tal-LIR, kienet tipprevali fid-dritt Lussemburgiż interpretazzjoni differenti minn dik imressqa mill-Gran Dukat tal-Lussemburgu, peress li din tal-aħħar kienet kompatibbli mal-formulazzjoni ta’ dawn id-dispożizzjonijiet. Għalhekk, il-Qorti tal-Ġustizzja kkonstatat li kien fi tmiem analiżi vvizzjata bi żball ta’ liġi u bi żnaturament tal-fatti li l-Qorti Ġenerali kkonfermat il-fondatezza tat-tieni linja ta’ raġunament imressqa mill-Kummissjoni sabiex tistabbilixxi s-selettività tad-DTQ.

Il-Qorti tal-Ġustizzja eżaminat, barra minn hekk, l-argumentazzjoni tal-appellanti dwar ir-raba’ linja ta’ raġunament ippreżentata, sussidjarjament, mill-Kummissjoni sabiex tistabbilixxi s-selettività tad-DTQ inkwistjoni, li l-vantaġġ selettiv kien jirriżulta mill-assenza ta’ applikazzjoni, mill-awtoritajiet tat-taxxa Lussemburgiżi, tal-Artikolu 6 tal-Liġi dwar l-Adattament Fiskali ( 4 ) dwar l-abbuż ta’ dritt. Fuq dan il-punt, l-appellanti kkontestaw l-analiżi tal-Qorti Ġenerali li kienet tgħid li l-Kummissjoni setgħet tistabbilixxi n-natura selettiva tad-DTQ fid-dawl tal-imsemmi artikolu, mingħajr ma tieħu inkunsiderazzjoni l-prassi amministrattiva nazzjonali relatata ma’ din id-dispożizzjoni, għar-raġuni li din tal-aħħar ma kinitx tqajjem diffikultà ta’ interpretazzjoni.

F’dan ir-rigward, il-Qorti tal-Ġustizzja fakkret li l-klassifikazzjoni ta’ miżura fiskali bħala “selettiva” tippreżupponi mhux biss l-għarfien tal-kontenut tar-regoli ta’ dritt rilevanti, iżda teżiġi wkoll l-eżami tal-portata tagħhom ibbażat, fost l-oħrajn, fuq il-prassi amministrattiva u ġudizzjarja tal-Istat Membru kkonċernat. Barra minn hekk, hija enfasizzat li l-Artikolu 6 tal-Liġi dwar l-Adattament Fiskali dwar l-abbuż ta’ dritt jippreżenta min-natura tiegħu livell partikolarment għoli ta’ ġeneralità. L-għażla li tiġi prevista tali dispożizzjoni u li jiġu ddefiniti l-modalitajiet ta’ implimentazzjoni tagħha taqa’ taħt il-kompetenzi proprji tal-Istati Membri fil-qasam tat-tassazzjoni diretta fl-oqsma li ma kinux is-suġġett ta’ armonizzazzjoni fid-dritt tal-Unjoni u, għaldaqstant, tal-awtonomija fiskali tagħhom.

F’dawn iċ-ċirkustanzi, il-Kummissjoni ma setgħetx tikkonkludi li l-ommissjoni tal-awtoritajiet tat-taxxa Lussemburgiżi li japplikaw l-Artikolu 6 tal-Liġi dwar l-Adattament Fiskali sabiex jirrifjutaw trattament fiskali mitlub minn persuna taxxabbli f’talba għal DTQ wasslet għall-għoti ta’ vantaġġ selettiv ħlief sa fejn din l-ommissjoni tmur kontra l-ġurisprudenza jew il-prassi amministrattiva nazzjonali dwar din id-dispożizzjoni. Fil-każ kuntrarju, il-Kummissjoni tkun f’pożizzjoni li tiddefinixxi hija stess x’jikkostitwixxi jew le applikazzjoni korretta ta’ tali dispożizzjoni, u dan jeċċedi l-limiti tal-kompetenzi mogħtija lilha mit-Trattati fil-qasam tal-kontroll tal-għajnuna mill-Istat.

Għaldaqstant, il-Qorti tal-Ġustizzja kkonkludiet li l-Qorti Ġenerali wettqet ukoll żball ta’ liġi meta qieset li t-teħid inkunsiderazzjoni mill-Kummissjoni tal-prassi amministrattiva tal-awtoritajiet tat-taxxa Lussemburgiżi dwar l-Artikolu 6 tal-Liġi dwar l-Adattament Fiskali ma kienx meħtieġ, minħabba li din id-dispożizzjoni ma kienet qajmet ebda diffikultà ta’ interpretazzjoni.

Fid-dawl tal-premess, il-Qorti tal-Ġustizzja annullat is-sentenza appellata. Barra minn hekk, peress li qieset li t-tilwima kienet fi stat li tiġi deċiża, il-Qorti tal-Ġustizzja eżaminat, sussegwentement, hija stess ir-rikorsi għall-annullament tad-deċiżjoni kontenzjuża ppreżentati mill-Gran Dukat tal-Lussemburgu u mill-kumpanniji tal-grupp Engie.

Insostenn tar-rikorsi għal annullament tagħhom, dawn il-partijiet kienu qegħdin jikkontestaw, essenzjalment, l-erba’ linji ta’ raġunament li fuqhom kienet ibbażat ruħha l-Kummissjoni sabiex tistabbilixxi s-selettività tad-DTQ inkwistjoni.

Fir-rigward tat-tieni linja ta’ raġunament imressqa mill-Kummissjoni, li kienet tgħid li l-eżenzjoni tad-dħul li jikkorrispondi għall-akkumulazzjonijiet fuq l-OŻRA, mogħtija skont id-DTQ fil-livell tal-kumpanniji holding, kienet tidderoga mill-applikazzjoni “normali” tal-Artikoli 164 u 166 tal-LIR, il-Qorti tal-Ġustizzja enfasizzat, minn naħa, li mill-analiżi tagħha tal-aggravji kien jirriżulta li l-evalwazzjoni tal-Qorti Ġenerali kienet ivvizzjata bi żnaturament tal-fatti. Min-naħa l-oħra, il-Qorti tal-Ġustizzja kkonfermat li, fid-deċiżjoni kontenzjuża, il-Kummissjoni kienet tbiegħdet mill-interpretazzjoni tal-Artikoli 164 u 166 tal-LIR mogħtija mill-Gran Dukat tal-Lussemburgu mingħajr ma stabbilixxiet li din kienet inkompatibbli mal-formulazzjoni tal-imsemmija dispożizzjonijiet jew li kienet tipprevali interpretazzjoni oħra fil-ġurisprudenza jew fil-prassi amministrattiva Lussemburgiża, fatt li jikkostitwixxi żball ta’ liġi.

Wara li kkonstatat li mill-analiżi tagħha tal-aggravji kien jirriżulta li r-raba’ linja ta’ raġunament kienet ukoll ivvizzjata fid-dritt, il-Qorti tal-Ġustizzja eżaminat il-motivi għal annullament li kienu jirrigwardaw l-ewwel u t-tielet linji ta’ raġunament, li fihom il-Kummissjoni bbażat ruħha fuq qafas ta’ riferiment estiż għas-sistema Lussemburgiża ta’ tassazzjoni tal-kumpanniji sabiex tistabbilixxi s-selettività tad-DTQ.

F’dan ir-rigward tal-aħħar, il-Qorti tal-Ġustizzja osservat b’mod partikolari li s-sistema ta’ riferiment jew is-sistema fiskali “normali” kellha tinkludi d-dispożizzjonijiet li jipprevedu l-eżenzjonijiet li l-awtorità fiskali nazzjonali qieset applikabbli għall-każ inkwistjoni, meta, bħal f’dan il-każ, dawn id-dispożizzjonijiet ma kinux, fihom innifishom, vantaġġ selettiv fis-sens tal-Artikolu 107(1) TFUE. F’tali ipoteżi, fid-dawl tal-kompetenzi proprji tal-Istati Membri fil-qasam tat-tassazzjoni diretta u tar-rispett dovut għall-awtonomija fiskali tagħhom, il-Kummissjoni ma setgħetx tistabbilixxi deroga minn qafas ta’ riferiment billi tillimita ruħha li tikkonstata li miżura titbiegħed minn għan ġenerali ta’ tassazzjoni tal-kumpanniji kollha residenti fl-Istat Membru kkonċernat, mingħajr ma tieħu inkunsiderazzjoni dispożizzjonijiet tad-dritt nazzjonali li jispeċifikaw il-modalitajiet li bihom l-imsemmi għan jiġi implimentat. Issa, f’dan il-każ, il-Kummissjoni ma inkludietx l-Artikolu 166 tal-LIR fil-qafas ta’ riferiment estiż għas-sistema Lussemburgiża tat-tassazzjoni tal-kumpanniji, meta din id-dispożizzjoni kienet tikkostitwixxi l-bażi legali tad-DTQ inkwistjoni. Għalhekk, il-Qorti tal-Ġustizzja kkonkludiet li dan l-iżball neċessarjament kien ivvizzja l-analiżi kollha ta’ selettività mwettqa mill-Kummissjoni abbażi tal-qafas ta’ riferiment estiż għas-sistema Lussemburgiża tat-tassazzjoni tal-kumpanniji.

Fid-dawl ta’ dan kollu, il-Qorti tal-Ġustizzja laqgħet il-motivi għall-annullament tad-deċiżjoni kontenzjuża bbażati fuq żbalji ta’ evalwazzjoni u ta’ liġi fl-identifikazzjoni ta’ vantaġġ selettiv u annullat, konsegwentement, din id-deċiżjoni.

( 1 ) Deċiżjoni tal-Kummissjoni (UE) 2019/421 tal-20 ta’ Ġunju 2018 dwar l-Għajnuna mill-Istat SA.44888 (2016/C) (ex 2016/NN) implimentata mil-Lussemburgu favur Engie (ĠU 2019, L 78, p. 1, iktar ’il quddiem id-“deċiżjoni kontenzjuża”).

( 2 ) Sentenza tat-12 ta’ Mejju 2021, Il-Lussemburgu et vs Il-Kummissjoni (T‑516/18 u T‑525/18, EU:T:2019:251).

( 3 ) Loi du 4 décembre 1967, concernant l’impôt sur le revenu (il-Liġi tal-4 ta’ Diċembru 1967 dwar it-Taxxa fuq id-Dħul) (Mémorial A 1967, p. 1228), kif emendata.

( 4 ) Steueranpassungsgesetz (il-Liġi dwar l-Adattament Fiskali), tas-16 ta’ Ottubru 1934 (Mémorial A 1934, p. 9001).