Ikel għal skopijiet mediċi speċjali

 

SOMMARJU TA’:

Regolament Delegat (UE) 2016/128 li jissupplimenta r-Regolament (UE) Nru 609/2013 — ir-rekwiżiti speċifiċi dwar il-kompożizzjoni u l-informazzjoni għall-ikel għal skopijiet mediċi speċjali

X’INHU L-GĦAN TAR-REGOLAMENT?

• Huwa jimmodifika r-rekwiżiti tat-tikkettar għall-ikel għal skopijiet mediċi speċjali, u jintroduċi projbizzjoni fuq l-użu ta’ indikazzjonijiet dwar in-nutrizzjoni u s-saħħa mogħtija fuq tali prodotti tal-ikel.
• Huwa jestendi r-regoli għall-formuli tat-trabi u formuli ta’ prosegwiment dwar it-tikkettar, il-preżentazzjoni, ir-reklamar u l-kummerċjalizzazzjoni, biex ikopri ikel għal skopijiet mediċi speċjali maħsub għat-trabi.
• Jestendi wkoll ir-regoli dwar il-pestiċidi għall-ikel għal skopijiet mediċi speċjali maħsuba għat-trabi u t-tfal żgħar.

PUNTI EWLENIN

Id-direttiva tħassar id-Direttiva 1999/21/KE. Hija att delegat li tissupplimenta r-Regolament (UE) Nru 609/2013 dwar l-ikel għal gruppi speċifiċi.

Ikel għal skopijiet mediċi speċjali:

• jista’ jitqiegħed biss fis-suq jekk jikkonforma ma’ dan ir-regolament;
• huwa kklassifikat f’dawn it-tliet (3) kategoriji:
  • ikel nutrizzjonalment komplut b’formulazzjoni tan-nutrijenti standard, li jista’ jkun is-sors waħdieni tan-nutrizzjoni, jew jintuża bħala sostituzzjoni jew suppliment parzjali;
  • ikel nutrizzjonalment komplut b’formulazzjoni tan-nutrijenti speċifika għal marda, disturb jew kundizzjoni medika, li jista’ jkun is-sors waħdieni tan-nutrizzjoni, jew jintuża bħala sostituzzjoni jew suppliment parzjali;
  • ikel nutrizzjonalment mhux komplut li mhux adattat biex jintuża bħala sors waħdieni ta’ nutrizzjoni.

Pestiċidi

Ikel għal skopijiet mediċi speċjali żviluppat għat-trabi u għat-tfal żgħar m’għandux ikun fih residwi ta’ pestiċidi li jaqbżu l-0.01 mg/kg għal kull sustanza attiva.

Tikkettar ta’ informazzjoni dwar l-ikel

L-ikel għal skopijiet mediċi speċjali għandu jikkonforma mar-Regolament (UE) Nru 1169/2011 dwar it-tikkettar tal-oġġetti tal-ikel u dawn id-dikjarazzjonijiet jew twissijiet (l-ewwel 4 punti preċeduti mill-kliem “avviż importanti” jew ekwivalenti) għandhom jidhru fuq it-tikketta:

• il-prodott għandu jintuża taħt superviżjoni medika;
• jekk il-prodott huwiex adattat għall-użu bħala s-sors waħdieni ta’ nutrizzjoni;
• jekk il-prodott huwiex maħsub għal grupp ta’ età speċifiku;
• jekk il-prodott jistax ikun ta’ riskju għas-saħħa meta jiġi kkunsmat minn persuni li ma għandhomx il-kundizzjoni li għaliha huwa maħsub il-prodott;
• id-dikjarazzjoni “Għall-ġestjoni tad-dieta ta’ (il-mard, id-disturbi jew il-kundizzjoni medika li għalihom huwa maħsub il-prodott)”;
• il-prekawzjonijiet u l-kontraindikazzjonijiet;
• deskrizzjoni tal-karatteristiki li jagħmlu l-prodott utli, b’rabta mal-mard, id-disturbi jew il-kundizzjonijiet mediċi, b’rabta mal-ipproċessar u l-formulazzjoni speċjali, in-nutrijenti, kif ukoll il-ġustifikazzjoni għall-użu tal-prodott;
• twissija li l-prodott għandu jittieħed biss mill-ħalq;
• struzzjonijiet għall-preparazzjoni, l-użu u l-ħżin tal-prodott wara l-ftuħ tiegħu.

Dikjarazzjoni dwar in-nutrizzjoni

• Id-dikjarazzjoni obbligatorja dwar in-nutrizzjoni, b’xi eċċezzjonijiet speċifiċi, għandha tinkludi l-ammont (fejn xieraq) tal-minerali, il-vitamini, il-proteina (inkluż is-sors u n-natura tagħha), il-karboidrati, ix-xaħam u n-nutrijenti l-oħra u l-komponenti tagħhom.
• Indikazzjonijiet dwar in-nutrizzjoni u s-saħħa m’għandhomx isiru fuq l-ikel għal skopijiet mediċi speċjali.

Rekwiżiti speċifiċi għall-ikel għal skopijiet mediċi speċjali żviluppati għat-trabi

• L-informazzjoni obbligatorja għandha tkun f’lingwa li tinftiehem faċilment mill-konsumaturi.
• L-ittikkettar m’għandux jinkludi stampi ta’ trabi, jew stampi jew testi oħra li jistgħu jidealizzaw l-użu tal-prodott, bl-eċċezzjoni ta’ grafika għall-identifikazzjoni faċli jew biex juru l-metodi ta’ preparazzjoni.
• L-itikkettar għandu jkun iddisinjat sabiex il-konsumaturi jkunu jistgħu jagħmlu distinzjoni ċara bejn dawn il-prodotti u l-formula għat-trabi.
• Ir-reklamar għandu jkun ristrett għal pubblikazzjonijiet li jispeċjalizzaw fil-kura tat-trabi u l-pubblikazzjonijiet xjentifiċi.
• M’għandu jkun hemm l-ebda reklamar fil-punt tal-bejgħ, kampjuni b’xejn jew kwalunkwe apparat promozzjonali ieħor direttament lill-konsumatur fil-livell tal-bejgħ bl-imnut.
• Il-manifatturi u d-distributuri m’għandhomx jipprovdu direttament, lill-pubbliku ġenerali jew lil nisa tqal, ommijiet jew membri tal-familji tagħhom, prodotti b’xejn, jew bi prezz baxx, kampjuni jew xi rigali promozzjonali oħra.

L-operaturi fin-negozju tal-ikel għandhom jinnotifikaw lill-awtorità kompetenti ta’ kull pajjiż tal-UE, fejn il-prodott qiegħed jitqiegħed fis-suq, billi jibagħtu mudell tat-tikketta użata għall-prodott, u kwalunkwe informazzjoni oħra mitluba biex tiġi stabbilita konformità ma’ dan ir-regolament.

MINN META JAPPLIKA R-REGOLAMENT?

Huwa ilu japplika mit-22 ta’ Frar 2019, ħlief fir-rigward tal-ikel għal skopijiet mediċi speċjali żviluppat għat-trabi, li għalih ilu japplika mit-22 ta’ Frar 2020

SFOND

Għal aktar informazzjoni, ara:

• Ikel għal skopijiet mediċi speċjali (Kummissjoni Ewropea)
• FAQs: ikel għal skopijiet mediċi speċjali (Awtorità Ewropea dwar is-Sigurtà fl-Ikel).

DOKUMENT EWLIENI

Regolament Delegat tal-Kummissjoni (UE) 2016/128 tal-25 ta’ Settembru 2015 li jissupplimenta r-Regolament (UE) Nru 609/2013 tal-Parlament Ewropew u tal-Kunsill fir-rigward tar-rekwiżiti speċifiċi dwar il-kompożizzjoni u l-informazzjoni għall-ikel għal skopijiet mediċi speċjali (ĠU L 25, 2.2.2016, p. 30-43)

DOKUMENTI RELATATI

Ir-Regolament (UE) Nru609/2013 tal-Parlament Ewropew u tal-Kunsill tat-12 ta’ Ġunju 2013 dwar ikel maħsub għat-trabi u tfal żgħar, ikel għal skopijiet mediċi speċjali u bħala sostitut għat-dieta kollha u għall-kontroll tal-piż u li jħassar id-Direttiva tal-Kunsill 92/52/KEE, id-Direttivi tal-Kummissjoni 96/8/KE, 1999/21/KE, 2006/125/KE u 2006/141/KE, id-Direttiva 2009/39/KE tal-Parlament Ewropew u tal-Kunsill u r-Regolamenti tal-Kummissjoni (KE) Nru 41/2009 u (KE) Nru 953/2009, (ĠU L 181, 29.6.2013, pp. 35-56)

L-emendi suċċessivi għar-Regolament (UE) Nru 609/2013 ġew inkorporati fid-dokument oriġinali. Din il-verżjoni konsolidata għandha valur dokumentarju biss.

Ir-Regolament (UE) Nru 1169/2011 tal-Parlament Ewropew u tal-Kunsill tal-25 ta’ Ottubru 2011 dwar l-għoti ta’ informazzjoni dwar l-ikel lill-konsumaturi, li jemenda r-Regolamenti (KE) Nru 1924/2006 u (KE) Nru 1925/2006 tal-Parlament Ewropew u tal-Kunsill u li jħassar id-Direttiva tal-Kummissjoni 87/250/KEE, id-Direttiva tal-Kunsill 90/496/KEE, id-Direttiva tal-Kummissjoni 1999/10/KE, id-Direttiva 2000/13/KE tal-Parlament Ewropew u tal-Kunsill, id-Direttivi tal-Kummissjoni 2002/67/KE u 2008/5/KE u r-Regolament tal-Kummissjoni (KE) Nru 608/2004, (ĠU L 304, 22.11.2011, p. 18-63)

Ara l-verżjoni konsolidata.

Id-Direttiva 2009/128/KE tal-Parlament Ewropew u tal-Kunsill tal-21 ta’ Ottubru 2009 li tistabbilixxi qafas għal azzjoni Komunitarja biex jinkiseb użu sostenibbli tal-pestiċidi (ĠU L 309, 24.11.2009, pp. 71-86)

Ara l-verżjoni kkonsolidata.

Direttiva tal-Kummissjoni 2006/141/KE tat-22 ta’ Diċembru 2006 dwar formuli tat-trabi u formuli tal-prosegwiment u li temenda d-Direttiva 1999/21/KE (ĠU L 401, 30.12.2006, p. 1-33)

Ara l-verżjoni kkonsolidata.

Ir-Regolament (KE) Nru 1924/2006 tal-Parlament Ewropew u tal-Kunsill tal-20 ta’ Diċembru 2006 dwar indikazzjonijiet dwar in-nutrizzjoni u s-saħħa mogħtija fuq l-ikel (ĠU L 404, 30.12.2006, p. 9-25).

Ara l-verżjoni konsolidata.

Direttiva tal-Kummissjoni 2006/125/EC tal-5 ta’ Diċembru 2006 dwar ikel ipproċessat ibbażat fuq iċ-ċereali u ikel tat-trabi għat-trabi u għat-tfal żgħar (Verżjoni kkodifikata) (ĠU L 339, 6.12.2006, p. 16-35). Test pubblikat mill-ġdid fil-corrigendum (ĠU L 76M, 24.3.2009, p. 422-441)

Id-Direttiva tal-Kummissjoni 1999/21/KE tal-25 ta’ Marzu 1999 dwar l-ikel dietetiku għal skopijiet mediċi speċjali (ĠU L 91, 7.4.1999, p. 29-36)

Ara l-verżjoni kkonsolidata.

l-aħħar aġġornament 24.05.2019