Akkwist pubbliku — regoli għas-setturi tal-ilma, l-enerġija, it-trasport u postali

PUNTI EWLENIN

L-entitajiet attivi fis-setturi tal-ilma, l-enerġija, it-trasport u postali li huma entitajiet pubbliċi, huma proprjetà pubblika jew jibbenefikaw minn drittijiet speċjali jew esklussivi għandhom isegwu r-regoli stabbiliti fid-direttiva.

Limiti

l-kuntratti jeħtieġ li jingħataw skont ir-regoli tad-direttiva meta l-ammonti involuti jkunu ’l fuq mil-limiti sussegwenti:

• EUR 443,000 għal kuntratti ta’ forniment u servizzi u għal kompetizzjonijiet ta’ disinn (mill-1 ta’ Jannar 2024);
• EUR 5,538,000 għal kuntratti ta’ xogħlijiet (mill-1 ta’ Jannar 2024);
• EUR 1,000,000 għal kuntratti ta’ servizzi għal servizzi soċjali u oħrajn speċifiċi.

Il-Kummissjoni Ewropea tevalwa dawn il-limiti kull sentejn skont l-obbligi internazzjonali tal-UE.

Attivitajiet koperti

Id-direttiva tapplika għall-akkwist pubbliku:

• fil-produzzjoni, it-trasport jew id-distribuzzjoni b’konnessjoni mas-setturi tal-gass u tat-tisħin, tal-elettriku u tal-ilma, meta dawn ikunu servizzi fornuti lill-pubbliku;
• fit-trasport pubbliku permezz ta’ ferrovija, tramm, trolley, karozza tal-linja jew funikular;
• fl-ajruporti, il-portijiet marittimi u interni u terminali oħrajn għall-ajru, il-baħar jew kanali;
• fis-servizzi postali u negozji oħrajn li jipprovdu lill-pubbliku b’servizzi simili li jinvolvu l-clearance, it-tqassim, it-twassil u l-kunsinna ta’ oġġetti postali;
• fl-estrazzjoni taż-żejt u l-gass u l-esplorazzjoni għal, jew l-estrazzjoni ta’ faħam u fjuwils solidi oħrajn.

Eżenzjonijiet

Id-Direttiva ma tapplikax għal:

• xiri ta’ oġġetti biex jerġgħu jinbiegħu jew jinkrew;
• kuntratti f’pajjiżi mhux tal-UE;
• kuntratti li jinvolvu aspetti tad-difiża jew tas-sigurtà li huma koperti jew esklużi mid-Direttiva 2009/81/KE (ara s-sommarju).