Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32014R1141

Finanzjament trasparenti tal-partiti politiċi Ewropej

Datatal-aħħarreviżjoni:
15/03/2023
Data tal-ħolqien inizjali:
24/04/2015
Dokument(i) mqassar/mqassra:
Awtur:
Uffiċċju tal-Pubblikazzjonijiet tal-Unjoni Ewropea
Entita(jiet) responsabbli:
Il-Parlament Ewropew

Finanzjament trasparenti tal-partiti politiċi Ewropej

 

SOMMARJU TA’:

Regolament (UE, Euratom) Nru 1141/2014 dwar l-istatut u l-finanzjament tal-partiti politiċi Ewropej u l-fondazzjonijiet politiċi Ewropej

X’INHU L-GĦAN TAR-REGOLAMENT?

  • Dan għandu l-għan li joħloq sistema speċifika legali, finanzjarja u regolatorja għal partiti politiċi Ewropej u fondazzjonijiet politiċi Ewropej*. Din iżżid il-viżibiltà, rikonoxximent u effettività tagħhom billi ttihom status legali* Ewropew Ewropea u flessibbilità ta’ finanzjament akbar.
  • Regolament li jemenda (UE, KEEA) 2018/673 jissikka numru ta’ regoli mniżżla f’Regolament (UE, KEEA) Nru 1141/2014, pereżempju fir-rigward ta’ reġistrazzjoni ta’ partiti politiċi u fondazzjonijiet, u trasparenza fir-rigward ta’ programmi politiċi u logos tal-partiti.
  • Regolament li jemenda (UE, KEEA) 2019/493 għandu l-għan li jevita li partiti politiċi Ewropej jużaw ħażin data personali f’elezzjonijiet tal-Parlament Ewropew (PE).

PUNTI EWLENIN

  • Ir-regolament joħloq l-Awtorità għall- Partiti Politiċi Ewropej (APPF) li hi indipendenti u li tirreġistra, tivverifika u tista’ timponi pieni fuq partiti politiċi Ewropej u fondazzjonijiet. Informazzjoni li tikkonċerna l-partiti u l-fondazzjonijiet tinsab f’reġistru online li huwa aċċessibbli għall-pubbliku.
  • Biex tirreġistra mal-APPF bħala partit politiku Ewropew, alleanza politika* trid tissodisfa ċerti kundizzjonijiet. Dawn jinkludu:
    • li jkollha siġġu fi Stat Membru tal-Unjoni Ewropea (UE) kif indikat fl-istatuti tagħha;
    • li partiti membri rappreżentati, f’tal-inqas kwart mill-Istati Membri, minn membri tal-Parlament Ewropew (MEPs) ta’ parliamenti nazzjonali, ta’ parlamenti reġjonali jew ta’ assembleji reġjonali (klawsola f’Regolament (UE) 2018/673); jew
    • hi jew il-partiti membri tagħha jkunu rċivew, f’tal-inqas kwart tal-Istati Membri, tal-inqas 3% tal-voti mitfugħa f’kull wieħed minn dawk il-pajjiżi fl-elezzjonijiet l-aktar riċenti tal-PE.
    • li l-partiti membri tagħha ma jistgħux ikunu membri ta’ partit politiku Ewropew ieħor (biex nevitaw li membri individwali ta’ partit nazzjonali jifforma iktar minn partit Ewropew wieħed sabiex nimmassimizzaw l-aċċess għal fondi pubbliċi)
  • Jekk partit Ewropew u l-fondazzjoni affiljata tiegħu jonqos milli jissodisfa l-kundizzjonijiet, jew jipprovdi informazzjoni falza meta jirreġistra, l-APPE tista’ tħassru mir-reġistru; il-partiti jistgħu jeħlu pieni wkoll jew jitneħħew mir-reġistru għal ċerti ksur tar-regoli.
  • Il-partiti jistgħu jużaw il-finanzjament tal-UE biex jiffinanzjaw kampanja elettorali, l-infiq marbut ma’ kampanji jrid ikun identifikat b’mod ċar bħala tali mill-partiti fid-dikjarazzjonijiet finanzjarji tagħhom ta’ kull sena.
  • Partit politiku Ewropew reġistrat li għandu tal-inqas MEP wieħed jista’ japplika għal finanzjament tal-UE.
  • Partiti nazzjonali jridu juru l-logo u l-manifest politiku tal-partit Ewropew affiljat tagħhom fuq is-siti web tagħhom bħala kundizzjoni biex jaċċessaw il-fondi. Dan irid isir minn partiti membri tal-inqas 12-il xahar qabel jintbagħtu l-applikazzjonijiet tal-finanzjament.
  • Regolament Emendatorju (UE) 2018/673 jiżgura li 10% tal-finanzjament annwali tal-UE jkun allokat b’mod ugwal bejn partiti eliġibbli. Id-90% li jkun fadal jiġi mqassam skont in-numru tal-MEPs tagħhom. L-istess regola ta’ distribuzzjoni tapplika għal fondazzjonijiet politiċi li jistgħu jkollhom 90% tal-ispejjeż annwali tagħhom rimborżati.
  • Regoli stretti japplikaw għal donazzjonijiet annwali individwali li l-partiti u l-fondazzjonijiet jistgħu jaċċettaw. Dawn ma jistgħux ikunu aktar minn €18,000. Kwalunkwe donazzjoni ‘l fuq minn €12,000 trid tkun irrappurtata fil-pront lill-APPE. L-ismijiet tad-donaturi ta’ donazzjonijiet individwali li ma jaqbżux €1,500 m’għandhomx għalfejn jiġu ppubblikati. Donazzjonijiet anonimi ma jistgħux jiġu aċċettati.
  • Regolament Emendatorju (UE, KEEA) 2019/493 jintroduċi sistema ta’ multi fuq partiti politiċi Ewropej u fondazzjonijiet li jiksru r-regoli tal-protezzjoni tad-data biex jinfluwenzaw intenzjonalment, jew jippruvaw jinfluwenzaw, l-eżitu tal-elezzjonijiet Ewropej. Meta setgħa ta’ sorveljanza nazzjonal tiddeċiedi li dan ikun ġara, din tinforma lill-APPE, li, hi wkoll, tirreferi l-kwistjoni lill-kumitat ta’ persuni eminenti indipendenti. Ibbażat fuq l-opinjoni tal-kumitat, l-APPE tista’ tiddeċiedi li timponi piena finanzjarja li tista’ tkun daqs 5% tal-baġit annwali tal-partit Ewropew jew fondazzjoni kkonċernata. Il-partit jew fondazzjoni sanzjonat ma jkollux permess li jirċievi finanzjament mill-baġit tal-UE s-sena ta’ wara.
  • Il-PE jista’ jirkupra l-ammonti li tħallsu meta mhux suppost, u individwi li jkunu ħatja għal-frodi jridu jħallsu lura l-fondi li jkunu ntefqu ħażin. L-Uffiċċju tal-Prosekutur Pubbliku Ewropew ser jintalab biex jinvestiga abbużi allegati fil-futur (ara s-sommarju).
  • Regoli dwar kontribuzzjonijiet mill-baġit tal-UE lil partiti politiċi Ewropej huma inklużi f’Regolament (UE) 2018/1046, ir-regolament finanzjarju tal-UE.

MINN META JAPPLIKA R-REGOLAMENT?

Dan ilu japplika mill-1 ta’ Jannar 2017

SFOND

Għal aktar informazzjoni, ara:

TERMINI EWLENIN

Fondazzjoni politika Ewropea. Entità li hi affiljata formalment ma’ partit politiku Ewropew li hu reġistrat mal-APPE u li, permezz tal-attivitajiet tiegħu, fi ħdan l-għanijiet u valuri fundamentali mħaddna mill-UE, jsaħħu u jikkumplimentaw l-objettivi tal-partit politiku Ewropew billi jwettqu xi wieħed jew aktar minn dawn il-kompiti li ġejjin:
  • tosserva, tanalizza u tikkontribwixxi għad-dibattitu dwar kwistjonijiet ta’ politika pubblika Ewropea u dwar il-proċess ta’ integrazzjoni Ewropea;
  • tiżviluppa attivitajiet marbuta ma’ kwistjonijiet ta’ politika pubblika Ewropea, bħall-organizzazzjoni u l-appoġġar ta’ seminars, taħriġ, konferenzi u studji dwar tali kwistjonijiet bejn partijiet interessati rilevanti, inklużi organizzazzjonijiet taż-żgħażagħ u rappreżentanti tas-soċjetà ċivili oħrajn;
  • tiżviluppa kooperazzjoni sabiex tippromwovi d-demokrazija, inkluż f’pajjiżi mhux tal-UE;
  • isservi bħala qafas għal fondazzjonijiet politiċi nazzjonali, akkademiċi u individwi u entitajiet rilevanti oħra biex jaħdmu flimkien fil-livell tal-UE.
Status legali. Li jkollok drittijiet u doveri legali, bħal li tkun tista’ tidħol f’kuntratti, li tħarrek u tkun imħarrek.
Alleanza politika. Kooperazzjoni strutturata bejn partiti politiċi u/jew ċittadini

DOKUMENT PRINĊIPALI

Ir-Regolament (UE, KEEA) Nru 1141/2014 tal-Parlament Ewropew u tal-Kunsill tat-22 ta’ Ottubru 2014 dwar l-istatut u l-finanzjament ta’ partiti politiċi Ewropej u l-fondazzjonijiet politiċi Ewropej (ĠU L 317, 4.11.2014, pp. 1–27).

L-emendi suċċessivi għar-Regolament (UE, Euratom) Nru 1141/2014 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Id-Deċiżjoni tal-Bureau tal-Parlament Ewropew tal-1 ta’ Lulju 2019 li tistipula l-proċeduri għar-Regolament ta’ implimentazzjoni (UE, KEEA) Nru 1141/2014 tal-Parlament Ewropew u tal-Kunsill dwar l-istatut u l-finanzjament ta’ partiti politiċi Ewropej u l-fondazzjonijiet politiċi Ewropej (ĠU C 249, 25.7.2019, pp. 2–46).

Ir-Regolament (UE, KEEA) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni u li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014 u d-Deċiżjoni Nru 541/2014/UE u li jħassar ir-Regolament (UE, KEEA) Nru 966/2012 (ĠU L 193, 30.7.2018, pp. 1–222).

Ara l-verżjoni konsolidata.

Riżoluzzjoni tal-Parlament Ewropew tal-15 ta’ Ġunju 2017 dwar il-finanzjament ta’ partiti politiċi u fondazzjonijiet politiċi f’livell Ewropew (2017/2733(RSP)) (ĠU C 331, 18.9.2018, p. 150).

Ir-Regolament tal-Kunsill (UE) 2017/1939 tat-12 ta’ Ottubru 2017 li jimplimenta kooperazzjoni msaħħa dwar it-twaqqif tal-Uffiċċju tal-Prosekutur Pubbliku Ewropew (“l-UPPE”) (ĠU L 283, 31.10.2017, pp. 1–71).

Ara l-verżjoni konsolidata.

l-aħħar aġġornament 15.03.2023

Fuq