Regoli għal pagamenti diretti tal-UE lill-bdiewa

PUNTI EWLENIN

Pagamenti diretti lill-bdiewa jitħallsu permezz ta’ skemi ta’ appoġġ f’kull pajjiż tal-UE.

Il-pajjiżi tal-UE jridu jiddedikaw ammont partikolari mill-allokazzjoni tal-fondi tal-PAK tagħhom għal skemi obbligatorji ta’ appoġġ, kif deskritt hawn taħt.

• Pagamenti standard għal kull ettaru. Biex l-appoġġ jitqassam b’mod aktar ġust, mill-2015 il-pajjiżi kollha tal-UE jridu jimxu lejn pagament uniformi għal kull ettaru (skema ta’ pagament bażiku “pagament bażiku għall-bdiewa”).
• Pagamenti ta’ ekoloġizzazzjoni għal kull ettaru. Biex jingħataw lill-bdiewa talli josservaw prattiki ta’ benefiċċju għall-klima u l-ambjent (30 % tal-allokazzjoni ta’ finanzjament nazzjonali);
• Pagamenti lill-bdiewa żgħażagħ għal kull ettaru. Pagamenti għal bdiewa li ma għandhomx aktar minn 40 sena, u li jsiru l-kap tal-farm tagħhom għall-ewwel darba, mhux aktar minn 5 snin wara li jiksbu l-appoġġ; dan il-pagament mhux disponibbli għal aktar minn 5 snin.

Hemm ukoll xi skemi ta’ appoġġ fakultattivi. Il-pajjiżi tal-UE jistgħu jagħżlu li:

• jappoġġjaw farms iżgħar billi jħallsu ammont ogħla fuq l-ewwel ettari (“pagament ridistributtiv”)
• jagħtu pagamenti addizzjonali għal żoni b’restrizzjonijiet naturali;
• jagħtu ammonti limitati ta’ appoġġ relatat mal-produzzjoni (“appoġġ akkoppjat” — pagamenti marbuta ma’ għelejjel jew tipi ta’ bhejjem speċifiċi) biex jgħinu biex tinżamm il-produzzjoni f’setturi f’diffikultà;
• joffru skema ssimplifikata lill-bdiewa b’azjenda agrikola żgħira - pagament annwali sa EUR 1 250.

Mill-1 ta’ Jannar 2018, ir-regoli l-ġodda fir-Regolament (UE) 2017/2393 daħlu fis-seħħ u jinkludu dawn li ġejjin:

• Fil-prinċipju, bdiewa attivi (jiġifieri dawk li l-attività agrikola tagħhom mhijiex insinifikanti) biss jistgħu jingħataw appoġġ dirett. Madanakollu, f’xi pajjiżi tal-UE, l-amministrazzjoni saret piż tqil wisq. B’mod partikolari, rikorrenti li joperaw ajruporti, servizzi tal-ferrovija, impjanti għat-trattament tal-ilma, servizzi tal-proprjetà immobbli u artijiet tal-isport u rikreattivi permanenti tqiesu mhux attivi ħlief jekk jiġi ppruvat mod ieħor. L-applikazzjoni ta’ din il-klawsola saret volontarja għall-pajjiżi tal-UE.
• Xi aspetti tar-regoli li japplikaw għall-pagamenti ta’ ekoloġizzazzjoni ġew simplifikati, speċjalment għar-rekwiżiti tad-diversifikazzjoni tal-għelejjel.
• Estensjoni tad-definizzjoni ta’ bur permanenti:
  • Il-pajjiżi tal-UE jistgħu jiddeċiedu li jinkludu ċerti arbuxelli jew siġar li jipproduċu l-għalf tal-annimali f’bur permanenti fejn il-ħaxix u foraġġ erbaċew ieħor jippredomina, fit-territorju kollu jew f’parti mit-territorju tagħhom;
  • huma jistgħu jqisu art mhux maħruta jew użata għan-newba tal-għelejjel għal 5 snin jew aktar bħala kriterju għall-klassifikazzjoni ta’ bur permanenti;
• Il-bdiewa żgħażagħ jistgħu jaċċessaw aktar faċilment il-5 snin ta’ pagamenti kollha.
• Ir-responsabbiltajiet tal-pajjiżi tal-UE fir-rigward tan-natura li tillimita l-produzzjoni tal-appoġġ akkoppjat huma ċċarati;
• Itt-tipi ta’ żoni ta’ interess ekoloġiku għal pagamenti ta’ ekoloġizzazzjoni (żoni ta’ enfasi ekoloġika) huma estiżi biex ikopru żoni fejn jitkabbru varjetajiet ta’ pjanti bħall-Miscanthus u s-Silphium perfoliatum, kif ukoll art mistrieħa baxxa għal pjanti li huma ta’ benefiċċju għall-pollinaturi.

Regoli trażizzjonali għas-snin 2021 u 2022

Ir-Regolament (UE) 2020/2220 li jemenda, adottat f’Diċembru 2020, jippermetti għall-applikazzjoni kontinwa tar-regoli taħt il-qafas tal-PAK 2014-2020 u jiżgura l-kontinwità tal-pagamenti lill-bdiewa u benefiċjarji oħra ta’ appoġġ mill-FAEG u l-FAEŻR fl-2021 u l-2022, sad-data tal-applikazzjoni tal-qafas il-ġdid. L-għan tal-perjodu tranżizzjonali huwa li jiffaċilita tranżizzjoni mingħajr xkiel għall-benefiċjarji għal perjod ġdid ta’ programmar .