EUR-Lex Access to European Union law
This document is an excerpt from the EUR-Lex website
Document 52012DC0615
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS Gender balance in business leadership: a contribution to smart, sustainable and inclusive growth
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-bilanċ bejn is-sessi fit-tmexxija tan-negozju: kontribuzzjoni għal tkabbir intelliġenti, sostenibbli u inklussiv
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-bilanċ bejn is-sessi fit-tmexxija tan-negozju: kontribuzzjoni għal tkabbir intelliġenti, sostenibbli u inklussiv
/* COM/2012/0615 final */
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-bilanċ bejn is-sessi fit-tmexxija tan-negozju: kontribuzzjoni għal tkabbir intelliġenti, sostenibbli u inklussiv /* COM/2012/0615 final */
KOMUNIKAZZJONI TAL-KUMMISSJONI
LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI
EWROPEW U LILL-KUMITAT TAR-REĠJUNI Il-bilanċ bejn
is-sessi fit-tmexxija tan-negozju: kontribuzzjoni għal tkabbir
intelliġenti, sostenibbli u inklussiv WERREJ 1........... Introduzzjoni u kuntest.................................................................................................... 4 2........... L-istat attwali
tal-parteċipazzjoni tan-nisa fil-bordijiet korporattivi fl-UE........................... 7 3........... Liema huma l-ostakoli
għall-bilanċ bejn is-sessi fil-pożizzjonijiet fit-tmexxija
tan-negozju. 10 4........... Miżuri meħuda fil-livell
tal-Istati Membri biex jittejjeb il-bilanċ bejn is-sessi
f’pożizzjonijiet ta' tmexxija korporattiva.................................................................................................................................... 13 5........... Nibnu fuq il-każ ekonomiku u
tan-negozju: inizjattiva leġiżlattiva ġdida tal-UE biex
jiżdied il-pass tal-progress lejn parteċipazzjoni bbilanċjata
bejn is-sessi fuq il-bordijiet tal-kumpaniji elenkati.................. 14 6........... Politika komprensiva biex isservi
ta' bażi għall-inizjattiva leġiżlattiva l-ġdida tal-UE.......... 16 1. Introduzzjoni u
kuntest L-aħħar deċennji raw progress
sinifikanti għan-nisa fil-kisbiet edukattivi, il-parteċipazzjoni
fis-suq tax-xogħol u l-pożizzjoni fis-soċjetà Ewropea kollha
kemm hi. Illum, jiggradwaw iktar nisa milli rġiel mill-universitajiet: 60%
tal-gradwati mill-università huma nisa. Illum il-ġurnata, aktar nisa
jaħdmu fl-Ewropa minn qatt qabel: ir-rata tal-impjieg tagħhom
qabżet is-60% u l-UE qed tagħmel iktar użu mit-talenti
tagħha u użu aħjar mill-ħiliet tagħha. Illum, huwa
ċar li n-nisa u l-irġiel ma jistgħux jiġu diskriminati
għal raġunijiet ta' sess. L-UE kkontribwiet għal dan il-progress
permezz ta' bosta miżuri bħal-leġiżlazzjoni, finanzjament
immirat u programmi ta' azzjoni, miżuri speċifiċi
għall-avvanz tan-nisa, djalogu soċjali u djalogu mas-soċjetà
ċivili. L-ugwaljanza bejn is-sessi hija dritt fundamentali, valur komuni
tal-UE, u kundizzjoni neċessarja għall-kisba tal-objettivi tal-UE ta'
tkabbir intelliġenti, sostenibbli u inklussiv. Hija saret qasam stabbilit
sew ta' azzjoni ta' politika kif inhu minqux fit-Trattati tal-UE u l-Karta
tad-Drittijiet Fundamentali tal-UE. L-ugwaljanza bejn is-sessi ġiet
progressivament integrata fil-politiki kollha tal-UE, u issa hija ankrata sew,
pereżempju fil-politiki tal-impjieg u l-koeżjoni, ir-riċerka,
l-edukazzjoni, il-kooperazzjoni għall-iżvilupp u l-proċess
tal-Ewropa 2020. Dan kien possibbli għaliex sa mis-snin
bikrija tagħha, l-Unjoni Ewropea ngħatat mill-Istati Membri
l-kompetenza u l-awtorità sabiex taġixxi dwar l-ugwaljanza bejn is-sessi. Lura
fl-1957, it-Trattat ta' Ruma diġà inkluda l-prinċipju ta' paga ndaqs
għall-istess xogħol għan-nisa u l-irġiel. Bil-każ
Defrenne fl-1971[1],
il-Qorti tal-Ġustizzja tal-Unjoni Ewropea kkonfermat li dan
il-prinċipju kien applikabbli direttament, u b'hekk tat
liċ-ċittadini d-dritt li jiddependu fuqha direttament fil-qrati
nazzjonali u wittiet it-triq għal-liġi moderna Ewropea tal-ugwaljanza
bejn is-sessi. Billi t-Trattati tal-UE jagħtu s-setgħa
lill-Kummissjoni Ewropea biex tadotta miżuri sabiex tiżgura
opportunitajiet ugwali u trattament ugwali bejn in-nisa u l-irġiel fi
kwistjonijiet ta' impjiegi u xogħol, il-Kummissjoni matul is-snin
ħadet għadd ta' passi leġiżlattivi fil-qasam tal-impjieg,
b'mod partikolari l-prinċipju ta' paga ndaqs u l-prinċipju li n-nisa
u l-irġiel għandu jkollhom l-istess opportunitajiet ta' taħriġ
u promozzjoni[2]. Hija pproponiet ukoll strumenti legali li jistabbilixxu trattament
ugwali fis-sigurtà soċjali u għal persuni li jaħdmu għal
rashom u l-konjuġi li jgħinuhom[3], u b'hekk
tejbet b’mod konsiderevoli l-protezzjoni tas-sigurtà soċjali tagħhom.
Leġiżlazzjoni importanti ġiet promossa wkoll fil-qasam
tar-rikonċiljazzjoni bejn il-ħajja privata u dik professjonali[4]. Il-Kummissjoni Ewropea tippromwovi bil-qawwa
l-ugwaljanza bejn is-sessi wkoll fost il-ħaddiema tagħha stess. Hija
adottat fl-2010 l-Istrateġija interna tagħha stess[5], bil-għan li tkompli tibni fuq il-progress konsiderevoli li sar
matul dawn l-aħħar snin f'termini ta' rappreżentazzjoni tan-nisa
fost il-persunal tagħha. L-istrateġija tiddefinixxi miri
għar-rappreżentanza tan-nisa f'livell ta' maniġment għoli u
tan-nofs, u wkoll fil-livell ta' amministraturi mhux maniġerjali, li jridu
jintlaħqu sa tmiem l-2014. Grazzi għal dawn il-miri, fl-1 ta' Ottubru
2012, 27,2% tal-maniġers għolja tal-Kummissjoni kienu nisa
(inkluża s-Segretarju Ġenerali tal-Kummissjoni) filwaqt li n-nisa
kienu jikkostitwixxu 28,7% tal-maniġers ta' livell tan-nofs[6], li huwa punt tat-tluq tajjeb biex isir iktar progress sal-2020. Barra
minn hekk, wara s-sejħa tal-President Barroso lill-kapijiet ta' Stat u
Gvern biex iħarsu lejn il-bilanċ bejn is-sessi bħala għan
komuni u responsabilità komuni u biex jagħtu attenzjoni partikulari
għall-preżenza tan-nisa fil-Kulleġġ, illum, terz tal-membri
tal-Kulleġġ huma nisa. Minkejja l-progress, it-triq lejn l-ugwaljanza
effettiva tibqa', madankollu, twila u mimlija ostakli. L-iżbilanċi
bejn is-sessi fit-teħid ta' deċiżjonijiet ekonomiċi huma
emblematiċi ta' din ir-realtà, u s-sitwazzjoni fil-bordijiet korporattivi
hija ta' diżappunt bi ftit sinjali ta' titjib. Madwar l-UE, il-bordijiet
tal-kumpaniji huma bħalissa ddominati minn sess wieħed: 86,3%
tal-membri tal-bordijiet huma rġiel filwaqt li n-nisa jirrappreżentaw
biss 13,7% (15% fost id-diretturi mhux eżekuttivi). 96,8%
taċ-Chairpersons huma rġiel u 3.2% biss huma nisa. In-nisa u l-irġiel għandu jkollhom
l-istess opportunitajiet u jingħataw l-istess possibbiltajiet biex
jieħdu pożizzjonijiet ta' tmexxija. Dan il-prinċipju ġie
mniżżel b'mod ċar fl-Istrateġija tal-Kummissjoni Ewropea
għall-Ugwaljanza bejn in-nisa u l-irġiel 2010-2015. Din mhijiex biss
kwistjoni tal-ugwaljanza bejn is-sessi. Hemm ukoll każ kummerċjali u
ekonomiku stabbilit sew favur żieda fil-preżenza tan-nisa
f'pożizzjonijiet ta' tmexxija fin-negozju. Użu effiċjenti
tal-kapital uman jikkostitwixxi l-aktar fattur importanti tal-kompetittività
ta' ekonomija u huwa kruċjali biex jiġu indirizzati l-isfidi
demografiċi tal-UE u biex nikkompetu b'suċċess f'ekonomija
globalizzata. Bosta studji wrew li hemm korrelazzjoni pożittiva bejn
id-diversità tas-sessi fl-ogħla livell ta' ġestjoni u l-prestazzjoni
finanzjarja u l-profittabilità tal-kumpanija. Rappreżentazzjoni akbar
tan-nisa fuq il-bordijiet ta' kumpaniji elenkati fl-Unjoni għalhekk jista'
jkollha impatt pożittiv fuq il-prestazzjoni tal-kumpaniji. L-ugwaljanza fis-suq
tax-xogħol tikkontribwixxi għat-tkabbir ekonomiku. It-tisħiħ
tal-preżenza tan-nisa fil-bordijiet ta' kumpaniji elenkati fil-borża
fl-UE mhux biss jaffettwa b’mod pożittiv lin-nisa maħtura, iżda
għandu wkoll il-potenzjal li jiġbed it-talent femminili lejn il-kumpanija
u jżid il-preżenza tan-nisa fil-livelli kollha tal-amministrazzjoni u
fost il-ħaddiema. Għalhekk, li jsir użu sħiħ
mir-riżerva ta' talent femminili jtejjeb ir-rendiment fuq l-edukazzjoni
kemm għall-individwi kif ukoll għas-settur pubbliku. Fl-aħħar
mill-aħħar, li jsir użu sħiħ mir-riżerva tat-talent
tan-nisa huwa indispensabbli biex jintlaħqu l-miri tal-Istrateġija
Ewropa 2020 għal tkabbir intelliġenti, sostenibbli u inklużiv,
partikolarment il-mira ta' 75% tagħha. Matul is-snin, l-Unjoni Ewropea ħadet
għadd ta' miżuri li ma jorbtux immirati biex itejbu
l-parteċipazzjoni tan-nisa fit-teħid tad-deċiżjonijiet. B'mod
partikolari, fuq proposti mill-Kummissjoni, żewġ rakkomandazzjonijiet
ġew adottati mill-Kunsill dwar dan is-suġġett, fl-1984[7] u l-1996[8]. Madankollu, dawn (ir-rakkomandazzjonijiet mhux vinkolanti) ma
rriżultawx fi progress materjali. Bħala konsegwenza, il-livell baxx
ta' parteċipazzjoni tan-nisa f'pożizzjonijiet ta' responsabilità
żviluppa fi kwistjoni ta' tħassib dejjem akbar. L-2010 u l-2011 raw impenn imġedded
fil-livell tal-UE għall-promozzjoni tal-ugwaljanza bejn is-sessi fuq
il-bordijiet tal-akbar kumpaniji elenkati. Il-Kummissjoni identifikat
"L-ugwaljanza fit-teħid tad-deċiżjonijiet” bħala
waħda mill-prijoritajiet tal-Karta dwar in-Nisa[9] u
tal-Istrateġija tagħha għall-ugwaljanza bejn in-nisa u
l-irġiel 2010-2015[10]. F'Marzu 2011, il-Kummissjoni nidiet “Impenn għall-Ewropa Nisa
fuq il-Bordijiet"[11], sejħa għal kumpaniji kkwotati fil-borża fl-Ewropa biex
volontarjament jintrabtu li jżidu l-preżenza tan-nisa fuq
il-bordijiet tagħhom għal 30% sal-2015 u għal 40% sal-2020. Il-Parlament
Ewropew, fir-riżoluzzjoni tiegħu dwar in-nisa u t-tmexxija
tan-negozju tas-6 ta' Lulju 2011[12],
ħeġġeġ lill-kumpaniji biex jilħqu l-limitu kritiku ta'
parteċipazzjoni femminili ta' 30 fil-mija fil-korpi tal-ġestjoni
sal-2015 u 40 fil-mija sal-2020. Hu stieden lill-Kummissjoni, jekk il-passi
meħuda mill-kumpaniji u l-Istati Membri jinstabu li huma inadegwati, li
tipproponi leġiżlazzjoni sal-2012, inklużi kwoti. Il-Parlament
Ewropew tenna dik is-sejħa għal leġiżlazzjoni
fir-riżoluzzjoni tiegħu tat-13 ta' Marzu 2012 dwar l-ugwaljanza bejn
in-nisa u l-irġiel fl-Unjoni Ewropea – 2011[13]. Barra
minn hekk, fil-programm ta' ħidma 2012-14 tagħhom, l-imsieħba
soċjali Ewropej irriaffermaw l-impenn tagħhom għal aktar azzjoni
biex jippromwovu n-nisa fit-teħid tad-deċiżjonijiet. F’Marzu 2012, il-Kummissjoni ħadet kont
tas-sitwazzjoni[14], u sabet titjib annwali medju ta' 0,6 punti perċentwali biss
matul l-aħħar snin. B’din ir-rata baxxa ta' progress, ikunu
meħtieġa aktar minn 40 sena qabel ma l-kumpaniji b’mod naturali
jilħqu rappreżentazzjoni bilanċjata bejn is-sessi fil-bordijiet.
Għal din ir-raġuni, il-Kummissjoni nediet konsultazzjoni pubblika
dwar azzjoni possibbli biex tittratta dan l-iżbilanċ. Hija
għamlet ukoll valutazzjoni tal-impatt dwar l-ispejjeż u
l-benefiċċji tat-titjib tal-bilanċ bejn is-sessi fuq
il-bordijiet ta' kumpaniji elenkati. Din il-Komunikazzjoni tippreżenta
l-qagħda attwali tas-sottorappreżentazzjoni tan-nisa
f'pożizzjonijiet ta' tmexxija. Hija tenfasizza l-ostakli ewlenin
għall-progress fil-karrieri tan-nisa u tispjega kif inizjattiva
leġiżlattiva ġdida tal-UE, kif proposta mill-Kummissjoni
flimkien ma' din il-Komunikazzjoni[15], biex
jittejjeb il-bilanċ bejn is-sessi fil-bordijiet tal-kumpaniji elenkati,
tagħmel il-bidla strutturali u irriversibbli. Billi r-raġunijiet
għas-sottorappreżentazzjoni tan-nisa fit-tmexxija tan-negozju
għandhom bosta aspetti, il-Kummissjoni tipproponi sett ta' miżuri ta'
akkumpanjament biex ittejjeb il-bilanċ bejn is-sessi fit-tmexxija
tan-negozju sabiex tgħin lill-Istati Membri jimplimentaw proposti
leġiżlattivi u jtejbu l-ugwaljanza bejn is-sessi fit-teħid
tad-deċiżjonijiet fil-livelli kollha. 2. L-istat attwali
tal-parteċipazzjoni tan-nisa fil-bordijiet korporattivi fl-UE Il-parteċipazzjoni tan-nisa
fil-bordijiet korporattivi għadha baxxa Minkejja li jirrappreżentaw madwar 45%
tal-persuni impjegati fl-UE u 56% tan-nies fl-edukazzjoni terzjarja, in-nisa
jirrappreżentaw biss 13,7% tal-membri tal-bordijiet fl-akbar kumpaniji
elenkati fil-borża fl-UE (ara l-Figura 1). In-nisa jokkupaw kwart
tas-siġġijiet fuq il-bordijiet ta' kumpaniji elenkati kbar
fil-Finlandja, il-Latvja u l-Isvezja u ftit aktar minn wieħed minn
ħamsa fi Franza. Iżda hemm inqas minn waħda minn 10 fl-Irlanda,
il-Greċja, l-Estonja, l-Italja, il-Portugall, il-Lussemburgu u l-Ungerija,
inqas minn waħda minn 20 f'Ċipru u madwar waħda minn 30 f'Malta[16]. Figura 1 – in-nisa u l-irġiel fuq
il-bordijiet tal-akbar kumpaniji elenkati, Jannar 2012 Sors: Il-Kummissjoni Ewropea, Bażi ta'
Dejta dwar in-nisa u l-irġiel fit-teħid tad-deċiżjonijiet u
Stħarriġ tal-Eurostat dwar il-Forza tax-Xogħol Nota: F'pajjiżi b'sistemi unitarji (b'livell
wieħed), jingħadd il-bord tad-diretturi (inklużi diretturi
non-eżekuttivi u eżekuttivi). F'pajjiżi
b'sistema b'żewġ livelli, jingħadd biss il-bord
superviżorju. Fost id-diretturi mhux eżekuttivi tal-ikbar
kumpaniji kkwotati fil-borża fl-UE in-nisa jirrappreżentaw biss 15%
(ara Figura 2). Figura 2 – Nisa fuq il-bordijiet tal-akbar
kumpaniji elenkati: il-membri eżekuttivi u mhux eżekuttivi (Jannar
2012) Sors: Il-Bażi tad-Dejta tal-Kummissjoni Ewropea dwar
in-nisa u l-irġiel fit-teħid tad-deċiżjonijiet Nota: F'sistema bbażata fuq livell wieħed, dejta dwar persuni li
mhumiex eżekuttivi tirreferi għall-membri tal-bord mhux
eżekuttivi u dejta dwar eżekuttivi tirreferi għall-membri
tal-bord eżekuttivi. F'sistema
bbażata fuq żewġ livelli, dejta dwar persuni li mhumiex
eżekuttivi tirreferi għall-membri tal-bord superviżorju u dejta
dwar eżekuttivi tirreferi għall-membri tal-bord
eżekuttiv/tal-ġestjoni. F'xi
okkażjonijiet, huwa possibbli li l-bord superviżorju jinkludi
wieħed jew aktar mill-membri eżekuttivi (pereżempju, is-CEO u
s-CFO). F'dan il-każ dawn huma
inklużi fiċ-ċifri tal-eżekuttivi, għalkemm l-individwi
li jieħdu sehem fiż-żewġ bordijiet jingħaddu darba
biss. Iċ-ċifri mhux
eżekuttivi f’dan il-każ xorta jirriferu għat-total tal-membri
tal-bord superviżorju u jistgħu, għalhekk, jinkludu xi
eżekuttivi iżda n-numri kkonċernati mhumiex sinifikanti u ma
għandhomx jaffettwaw ir-riżultat finali. Il-progress
huwa bil-mod u inkonsistenti madwar l-Istati Membri tal-UE Bejn
l-aħħar tal-2003 u l-bidu tal-2012, is-sehem tan-nisa fil-bordijiet
tela’ minn 8,5% għal 13,7%, bidla ta' medja ta' 0,6 punti perċentwali
kull sena. Titjib żgħir ta' 1,9 punti perċentwali ġie
rreġistrat bejn Ottubru 2010 u Jannar 2012, marbut mad-dibattitu pubbliku
intensiv mibdi mill-appelli għall-azzjoni tal-Kummissjoni u tal-Parlament
Ewropew. Dan kien segwit f'xi Stati Membri b'passi konkreti biex jiġi
aċċellerat il-pass tal-bidla. Madankollu, il-progress jibqa’ wieħed bil-mod
billi aktar minn sitta minn kull seba' membri tal-bordijiet huma rġiel
(86,3%) u s-sitwazzjoni fil-pajjiżi individwali tvarja. Franza, li adottat
kwota legalment vinkolanti f'Jannar 2011, rat l-aktar titjib notevoli (10 punti
perċentwali) u rrappreżentat 40% tat-total tal-bidla fl-UE kollha,
filwaqt li xi Stati Membri saħansitra rreġistraw tendenza negattiva
(ir-Rumanija, l-Ungerija, is-Slovakkja, l-Isvezja, id-Danimarka u l-Estonja). Figura 3 – Bidla fis-sehem tan-nisa
fil-bordijiet korporattivi, Ottubru 2010-Jannar 2012 Sors: Il-Kummissjoni Ewropea, Bażi
tad-Dejta dwar in-nisa u l-irġiel fit-teħid
tad-deċiżjonijiet 3. Liema huma l-ostakoli
għall-bilanċ bejn is-sessi fil-pożizzjonijiet fit-tmexxija
tan-negozju L-iżbilanċi bejn is-sessi
f’pożizzjonijiet ta' tmexxija korporattiva huma biss il-parti
żgħira li tidher L-iżbilanċi bejn is-sessi
f’pożizzjonijiet ta' tmexxija korporattiva huma importanti, iżda huma
biss il-parti żgħira li tidher minn sitwazzjoni iktar mifruxa ta'
inugwaljanzi fis-soċjetà tagħna. Hemm diversi kawżi ta' dan li
jakkumulaw matul il-ħajja tal-mara jew tar-raġel. Għalkemm
l-għadd ta' nisa fit-tmexxija qed jiżdied, l-evidenza turi li
għad hemm ħafna ostakli li jridu jingħelbu. Il-kawżi jirriżultaw mir-rwoli
tradizzjonali tas-sessi, id-diviżjoni tax-xogħol,
l-għażliet edukattivi tan-nisa u l-irġiel, u
l-konċentrazzjoni tan-nisa fi ftit setturi okkupazzjonali. Għad hemm differenzi kbar fit-tip ta'
edukazzjoni segwita min-nisa u l-irġiel. In-nisa għadhom mhux
rappreżentati biżżejjed fis-suġġetti tax-xjenzi,
it-teknoloġija, l-inġinerija u l-matematika (STEM)[17], li hemm l-akbar domanda għalihom fis-suq tax-xogħol. Dawn
id-differenzi bejn is-sessi huma relatati mal-attitudni tal-istudenti lejn
is-suġġetti, bħall-motivazzjoni u l-interess, li huma ffurmati
minn età żgħira[18] u li huma marbuta wkoll mal-perċezzjoni tar-rwoli differenti
tan-nisa u l-irġiel fis-soċjetà. Darba jkunu fis-suq tax-xogħol, in-nisa
għandhom it-tendenza jikkonċentraw fuq numru żgħir ta'
okkupazzjonijiet li ħafna drabi huma mħallsa inqas u inqas
apprezzati. Dan jista' jkollu impatt negattiv fuq il-possibbiltajiet ta'
aċċess tagħhom fl-ogħla pożizzjonijiet fil-kumpaniji. Kważi
29% tan-nisa li jaħdmu fl-UE huma impjegati f’biss sitta minn 130
kategorija standard tax-xogħol[19] filwaqt
li l-ogħla sitt impjiegi għall-irġiel jirrappreżentaw
kważi 20% tal-irġiel kollha fis-suq tax-xogħol. Fl-attivitajiet
ekonomiċi differenti[20], in-nisa jikkostitwixxu kważi 83% ta' dawk li jaħdmu
fil-qasam tas-saħħa u l-ħidma soċjali u ftit aktar minn 71%
ta' dawk impjegati fl-edukazzjoni, filwaqt li jammontaw għal ftit aktar
minn 62% tal-impjiegi totali fil-bejgħ bl-imnut[21]. In-nuqqas ta' appoġġ biex jiġu
bbilanċjati r-responsabbiltajiet tal-kura max-xogħol jibqa' sfida
ewlenija In-nuqqas ta' offerta komprensiva u
bilanċjata ta' miżuri ta' xogħol flessibbli għadha ostakolu
kbir biex in-nisa jitilgħu f’pożizzjonijiet ta' tmexxija[22]. Għaxar Stati Membri tal-UE biss laħqu l-għan ta'
Barċellona[23] ta' rata ta' kopertura tal-kura tat-tfal ta' 33% għal tfal
taħt it-tliet snin, filwaqt li disgħa Stati Membri biss laħqu
l-għan ta' Barċellona ta' rata ta' kopertura ta' 90% għal tfal
bejn it-tliet snin u l-età mandatorja tal-iskola[24]. Dan għandu konsegwenzi
żbilanċjati fuq ix-xejriet tax-xogħol tan-nisa u
tal-irġiel. In-nisa jkomplu jadattaw il-mudelli
tax-xogħol tagħhom għan-nuqqas jew l-inadegwatezza ta'
miżuri ta' rikonċiljazzjoni bejn il-ħajja tax-xogħol u
l-ħajja privata. Ir-rata tal-impjiegi tan-nisa tonqos mal-għadd ta'
tfal, filwaqt li r-rata tal-impjieg tal-irġiel tiżdied mal-ewwel u
t-tieni wild. In-nisa jiffaċċjaw interruzzjonijiet tal-karriera aktar
frekwenti u inċidenzi ogħla ta' arranġamenti ta' xogħol flessibbli
u ta' xogħol part-time mill-irġiel. Dan għandu impatt qawwi fuq
il-possibilità tan-nisa li jaħdmu full time, jibbenefikaw
mill-opportunitajiet tat-taħriġ u javvanzaw fil-karrieri tagħhom
b’kundizzjonijiet ugwali bħall-irġiel. Fl-aħħar
mill-aħħar, dan għandu impatt negattiv fuq il-paga u
l-pensjonijiet tagħhom. Huwa rikonoxxut li x-xogħol part-time u
l-interruzzjonijiet fil-karriera huma ostakli għall-promozzjoni
f'pożizzjonijiet għolja. Figura 4 – Ir-rata tal-impjiegi skont
l-istatus tal-ġenituri (fl-etajiet bejn 25-49 sena) — 2011 (Differenza f'punti perċentwali fir-rata
tal-impjiegi bil-preżenza ta' wild wieħed taħt it-12-il sena u
mingħajr il-preżenza ta' tfal) Sors: Eurostat, Stħarriġ dwar
il-Forza tax-Xogħol Ewropea, medji annwali. Is-“saqaf tal-ħġieġ”
għadu limitu kbir. L-esperjenza turi li anke nisa li rnexxielhom
jegħlbu l-ostakli msemmija hawn fuq u huma lesti biex jiddaħħlu
fil-bordijiet fl-aħħar mill-aħħar jibqgħu
jiffaċċjaw ostakoli għall-progress tagħhom sal-ogħla
livelli tat-teħid tad-deċiżjonijiet, li ħafna drabi ssir
referenza għalihom bħala “s-saqaf tal-ħġieġ”,
irrispettivament mir-rieda tagħhom li javvanzaw u l-kwalifiki
akkademiċi u professjonali tagħhom. In-nisa fuq il-bordijiet tal-kumpaniji tal-FTSE 100
fir-Renju Unit għandhom kredenzjali edukattivi aħjar minn
tal-irġiel[25] bħala medja. L-istess jgħodd għan-nisa li jidħlu
f’bordijiet korporattivi fin-Norveġja[26]. F'Settembru 2011, l-Iskejjel tal-Kummerċ
Ewropej u n-Nisa Eżekuttivi Għolja nedew sejħa għal azzjoni
kontra s-saqaf tal-ħġieġ. Fl-2012 huma stabbilixxew lista ta'
"Nisa Lesti għall-Bordijiet" (b’madwar 7 500 isem) biex
jagħmluha ċara li hemm aktar milli biżżejjed nisa
eminentement kwalifikati biex jgħinu fit-tmexxija tal-korporazzjonijiet
tal-Ewropa u tad-dinja u li wasal iż-żmien biex jitkisser is-saqaf li
żamm lin-nisa milli jilħqu pożizzjonijiet fil-bordijiet
tad-diretturi[27]. In-nisa għandhom żvantaġġ
relattiv meta mqabbla mal-irġiel billi jridu jegħlbu
l-prekonċezzjonijiet dwar ir-rekwiżiti għal pożizzjonijiet
ta' tmexxija, id-diskriminazzjoni u l-isterjotipi[28]. Ostakli
sottili, inkluż il-perċezzjoni li n-nisa jew mhumiex interessati jew
mhumiex kapaċi li jwettqu ċerti kompiti, jew li dawn il-karigi huma
impjiegi “maskili”, ikomplu jżommu l-biċċa l-kbira tan-nisa
staġnati f'livelli ta' ġestjoni aktar baxxi fil-kumpaniji. Skont stħarriġ tal-Ewrobarometru
mill-2011, 88% tal-Ewropej jaħsbu li n-nisa għandhom ikunu
rappreżentati b'mod ugwali f’pożizzjonijiet ta' tmexxija tan-negozju
u 78% minnhom jaħsbu li l-komunità tan-negozju Ewropea hija ddominata minn
irġiel li ma għandhomx biżżejjed fiduċja
fl-abbiltajiet tan-nisa[29]. Fi stħarriġ ta' 500 mara
f’pożizzjonijiet għolja f’korporazzjonijiet u ditti professjonali
madwar l-Ewropa[30], żewġ terzi ta' dawk intervistati enfasizzaw l-isterjotipi u
l-prekonċezzjonijiet dwar ir-rwoli u l-abilitajiet tan-nisa bħala
l-akbar ostaklu li ffaċċjaw. In-nuqqas ta' trasparenza fir-rigward
tal-prattika tar-reklutaġġ u l-promozzjoni. In-nuqqas attwali ta' nisa f'pożizzjonijiet
għolja jinfluwenza d-deċiżjonijiet tal-kumpaniji, inklużi
l-attitudni tagħhom lejn l-ugwaljanza tas-sessi u l-ħatra ta' aktar
nisa fil-bordijiet, kemm fuq perjodu qasir kif ukoll fit-tul. Dan huwa aggravat
min-nuqqas ta' trasparenza fir-rigward tal-proċessi
tar-reklutaġġ u l-promozzjoni. Il-ħatriet fuq bordijiet
jiddependu ħafna mill-kuntatti personali u professjonali kurrenti ta'
membri kurrenti tal-bord. In-nuqqas ta' trasparenza fil-ħatriet
għall-pożizzjonijiet fuq il-bordijiet għadu ostakolu
għall-progressjoni tal-karrieri tan-nisa. Din il-kwistjoni kienet
enfasizzata minn diversi partijiet interessati li rrispondew
għall-konsultazzjoni pubblika mnedija mill-Kummissjoni[31]. Iż-żieda fis-sehem ta' nisa
fil-bordijiet korporattivi tista' tattira talent femminili lejn il-kumpaniji u
twassal għal rappreżentazzjoni akbar tan-nisa fil-livelli kollha
tal-maniġment. Hija wkoll mistennija li jkollha effett residwu pożittiv
fuq l-impjieg tan-nisa fil-kumpaniji kkonċernati u fuq it-tkabbir
ekonomiku fit-tul fl-ekonomija kollha. Il-promozzjoni ta' mentoring adegwat,
sponsorizzazzjoni, opportunitajiet ta' taħriġ u mudelli
għall-oħrajn huma meħtieġa biex jiżdied in-numru ta'
nisa fir-riżerva ta' talent fl-operazzjonijiet ta' ġestjoni u fi
rwoli eżekuttivi għolja, li minnhom ħafna drabi huma reklutati
l-kandidati għall-bordijiet. 4. Miżuri
meħuda fil-livell tal-Istati Membri biex jittejjeb il-bilanċ bejn
is-sessi f’pożizzjonijiet ta' tmexxija korporattiva Firxa ta' inizjattivi ttieħdu fl-Istati
Membri L-importanza li tittejjeb malajr il-preżenza
tan-nisa fit-tmexxija tan-negozju, partikolarment fil-bordijiet korporattivi,
hija għolja fuq l-aġenda politika mhux biss fil-livell tal-UE,
iżda wkoll fil-livell nazzjonali. Ittieħdu firxa ta' inizjattivi
mill-gvernijiet, mill-imsieħba soċjali, min-negozji individwali u
minn partijiet interessati oħra biex jiżdied il-pass tal-progress. Inizjattivi volontarji Diversi Stati Membri tal-UE żviluppaw
għodod u inizjattivi volontarji biex jindirizzaw
is-sottorappreżentazzjoni tan-nisa f’pożizzjonijiet ta' tmexxija
għolja[32]. Dawn il-miżuri għandhom il-vantaġġ ta' aktar
flessibilità u sens akbar ta' responsabilità diretta għall-kumpaniji li
jieħdu dawn il-miżuri. Madankollu, minkejja li ppromwovew
żviluppi pożittivi, għadhom ma wasslux għal progress
notevoli. Miżuri
leġiżlattivi bi kwoti obbligatorji Iċ-ċifri juru li l-miżuri
leġiżlattivi jwasslu għal progress aktar sostanzjali meta
mqabbla ma' inizjattivi volontarji, speċjalment jekk ikunu akkumpanjati
b'sanzjonijiet. Dan huwa manifestat bl-aktar mod ċar permezz tal-impatt
tal-leġiżlazzjoni Norveġiża, li issa hija stabbilita sew,
li timponi kwota legalment vinkolanti ta' 40% bix-xoljiment tal-kumpanija
bħala sanzjoni f’każ ta' nuqqas ta' konformità, u – fi ħdan l-UE
– bis-sitwazzjoni fi Franza fejn hija fis-seħħ fkwota legalment
vinkolanti ta' 20% fi żmien 3 snin (2014) u 40% fi żmien 6 snin
(2017). Stati Membri oħra tal-UE adottaw ukoll tipi differenti ta' regoli
ta' kwota (l-Awstrija, il-Belġju, id-Danimarka, il-Finlandja,
il-Greċja, l-Italja, il-Pajjiżi l-Baxxi, il-Portugall, is-Slovenja u
Spanja)[33]. 5. Nibnu fuq il-każ
ekonomiku u tan-negozju: inizjattiva leġiżlattiva ġdida tal-UE
biex jiżdied il-pass tal-progress lejn parteċipazzjoni
bbilanċjata bejn is-sessi fuq il-bordijiet tal-kumpaniji elenkati Il-każ ekonomiku u tan-negozju huwa
kkonfermat L-isforzi biex tintlaħaq
il-parteċipazzjoni bbilanċjata bejn is-sessi f’pożizzjonijiet
ta' tmexxija korporattiva għadhom ma pproduċewx riżultati
sostantivi u hemm distakk dejjem akbar bejn l-Istati Membri fl-UE, kemm
f'termini ta' progress fattwali kif ukoll fit-tip ta' miżuri meħuda
fil-livell nazzjonali. L-UE ma tistax taffordja dan l-iżbilanċ
sistematiku bejn is-sessi fl-ogħla livell ta' teħid ta'
deċiżjonijiet ekonomiċi u l-ħela ta' talenti u riżorsi
li jirriżultaw. Hemm każ ekonomiku u kummerċjali favur
id-diversità tas-sessi fil-bordijiet, inkluż riċerka reċenti[34]. Id-diversità tas-sessi fil-bordijiet intwera li twassal għal
ideat innovattivi, żieda fil-kompetittività u prestazzjoni, u governanza
korporattiva mtejba. Huwa sinjal ta' ftuħ għal aktar fehmiet u
rispett għad-differenzi bejn il-partijiet interessati – l-azzjonisti,
l-investituri, l-impjegati u l-konsumaturi — u dan juri r-rikonoxximent
tal-kumpanija tal-kumplessità tas-swieq dinjija u t-tħejjija tagħha
biex tikkompeti b’mod effettiv fil-livell dinji. Minħabba n-nuqqas ta' progress
suffiċjenti u sostenibbli fil-kisba ta' bilanċ bejn is-sessi fil-bordijiet
u l-fatt li din hija sfida li jaffaċċjaw l-Istati Membri kollha
tal-UE, il-Kummissjoni Ewropea esplorat firxa ta' għażliet għal
miżuri mmirati biex itejbu l-parteċipazzjoni tan-nisa fit-teħid
tad-deċiżjonijiet fuq livell Ewropew. L-analiżi ta' dawn l-għażliet turi
li li jsir użu sħiħ mill-forza tax-xogħol femminili tal-UE
se jikkontribwixxi għat-tkabbir sostenibbli u l-kompetittività
tal-ekonomija tal-UE, partikolarment quddiem il-bidla demografika u l-kriżi
attwali. Il-ħtieġa li tittieħed azzjoni
fuq il-livell tal-UE Li nkomplu għaddejjin bir-ritmu attwali mhux
se jwassal għal żieda sostanzjali ta' nisa fuq il-bordijiet
tal-kumpaniji elenkati madwar l-UE. Ir-regolamentazzjoni mferrxa u
diverġenti jew in-nuqqas ta' regolamentazzjoni fil-livell nazzjonali
fir-rigward tal-bilanċ bejn is-sessi fuq il-bordijiet tal-kumpaniji
jwasslu għal diskrepanzi fl-għadd ta' nisa fost diretturi
eżekuttivi u mhux eżekuttivi u rati differenti ta' titjib madwar
l-Istati Membri. Jistgħu wkoll joħolqu ostakoli għas-suq intern
billi jimponu rekwiżiti ta' governanza korporattiva u sanzjonijiet
diverġenti fuq il-kumpaniji Ewropej. Il-potenzjal għall-ugwaljanza bejn is-sessi,
il-kompetittività u t-tkabbir jista' jinkiseb aħjar permezz ta' azzjoni
kkoordinata fuq il-livell tal-UE minflok milli permezz ta' inizjattivi
nazzjonali ta' ambitu, ambizzjoni u effikaċja varjabbli. Għalhekk,
il-Kummissjoni tipproponi miżura leġiżlattiva biex jittejjeb
il-bilanċ bejn is-sessi fuq il-bordijiet ta' kumpaniji elenkati fuq
il-borża. L-iffukar fuq kumpaniji elenkati Minħabba l-importanza ekonomika tagħhom,
il-viżibilità u l-impatt tagħhom fuq is-suq tal-UE, miżura
leġiżlattiva fil-livell tal-UE għandha tapplika biss għal
kumpaniji elenkati, jiġifieri kumpaniji fi Stat Membru li t-titoli tagħhom
huma miftuħa għan-negozju f'suq regolat[35]. Kumpaniji
elenkati li huma SMEs għandhom ikunu eżentati, għaliex l-obbligu
li jilħqu l-mira jista' joħolqilhom piż amministrattiv
sproporzjonat. Minbarra l-importanza ekonomika tagħhom —
b’fatturat totali ekwivalenti għal 68% tal-PDG tal-UE — il-kumpaniji
elenkati huma wkoll viżibbli ħafna. Huma jistabbilixxu standards
għall-ekonomija kollha u jista' jiġi mistenni li l-prattiċi
tagħhom jiġu segwiti minn tipi oħra ta' kumpaniji. Twaqqif ta' objettivi Il-miżura leġiżlattiva,
ibbażata fuq l-Artikolu 157(3)
TFUE, tistabbilixxi objettiv minimu ta' 40% għas-sess l-anqas
irrappreżentat fost id-diretturi mhux eżekuttivi fil-bordijiet
tal-kumpaniji elenkati, li għandu jintlaħaq sal-2020, jew sal-2018
għall-kumpaniji elenkati li huma impriżi pubbliċi. Hija tobbliga
lil kumpaniji taħt dan il-livell ta' rappreżentazzjoni sabiex
jagħmlu ħatriet għal dawn il-pożizzjonijiet sabiex jiksbu
dan l-objettiv fuq il-bażi ta' proċedura ta' selezzjoni bbażata
fuq kriterji ta' kwalifika prestabbiliti, ċari, ifformulati b'mod newtrali
u mhux ambigwi f'konformità mal-ġurisprudenza tal-Qorti tal-Ġustizzja
tal-Unjoni Ewropea. L-objettivi stabbiliti taħt din il-proposta
għandhom japplikaw biss għal diretturi mhux eżekuttivi sabiex
jinstab il-bilanċ ġust bejn il-ħtieġa li tiżdied
id-diversità tas-sessi tal-bordijiet fuq naħa u l-ħtieġa li
jiġu mminimizzati l-interferenzi mal-ġestjoni ta' kuljum
tal-kumpaniji fuq in-naħa l-oħra. Sabiex jinkiseb dak l-objettiv u, b’konformità
mal-każistika tal-Qorti tal-Ġustizzja tal-Unjoni Ewropea, l-Istati
Membri għandhom jiżguraw li fl-għażla tad-diretturi mhux
eżekuttivi, tingħata prijorità lill-kandidat mis-sess l-anqas
rappreżentat jekk dak il-kandidat ikun ikkwalifikat b'mod ugwali
għall-kandidat tas-sess l-ieħor f'termini ta' adegwatezza, kompetenza
u prestazzjoni professjonali, u jekk valutazzjoni oġġettiva li tqis
il-kriterji kollha speċifiċi għall-kandidati individwali ma
tinklinax il-bilanċ favur kandidat tas-sess l-ieħor. Fir-rigward ta' diretturi eżekuttivi,
il-kumpaniji elenkati għandhom ikunu obbligati li jistabbilixxu l-impenji
tagħhom stess, li għandhom jintlaħqu fi ħdan l-istess qafas
ta' żmien bħall-objettivi għal diretturi mhux eżekuttivi. Sistema ta' infurzar u monitoraġġ
effettiva L-Istati Membri għandhom jipprovdu għal
sanzjonijiet effettivi, proporzjonati u dissważivi jekk dawn l-obbligi
jiġu miksura. Il-kumpaniji kkwotati huma meħtieġa li
jipprovdu informazzjoni dwar il-kompożizzjoni tal-bordijiet tagħhom
skont is-sess lill-awtoritajiet kompetenti nazzjonali. Din l-informazzjoni
għandha tiġi ppubblikata fuq il-websajt tal-kumpanija u, jekk
il-kumpanija inkwistjoni ma tilħaqx l-għan, għandha tinkludi
deskrizzjoni tal-miżuri li l-kumpanija ħadet sa issa u li bi
ħsiebha tieħu sabiex tilħaq l-objettiv fil-ġejjieni. Skont il-prinċipju tal-proporzjonalità,
l-azzjoni tal-UE għandha tkun limitata fiż-żmien u l-miżura
leġiżlattiva se tiġi revokata malli jintlaħaq progress
sostenibbli fil-kompożizzjoni tal-bordijiet skont is-sessi. 6. Politika komprensiva
biex isservi ta' bażi għall-inizjattiva leġiżlattiva
l-ġdida tal-UE Parteċipazzjoni akbar tan-nisa fis-suq
tax-xogħol u f'pożizzjonijiet ta' tmexxija Il-Kummissjoni qed tipproponi li l-miżura
leġiżlattiva tiġi kkumplimentata bi strateġija komprensiva
li tinkludi miżuri ta' politika u appoġġ finanzjarju. Uħud
huma t-tkomplija ta' miżuri li għadhom għaddejjin, filwaqt li
oħrajn huma ġodda[36]. Barra minn hekk, il-Kummissjoni se tħeġġeġ
lill-Istati Membri biex jikkomplimentaw l-attivitajiet attwalment proposti
għas-settur privat ukoll fis-settur pubbliku, notevolment fir-rigward
tal-bordijiet tal-banek ċentrali nazzjonali, li huma prinċipalment
magħmula minn irġiel (83% bħala medja fl-UE-27). Fi sħubija mal-gvernijiet nazzjonali u
l-partijiet interessati l-oħra Il-Kummissjoni se tikkoopera mal-partijiet
interessati kollha – il-gvernijiet, l-imsieħba soċjali,
l-intrapriżi, l-iskejjel tan-negozju, eċċ. — u
tappoġġjahom fix-xogħol tagħhom u fit-tfassil u
l-implimentazzjoni ta' attivitajiet madwar l-UE biex titjieb
il-parteċipazzjoni tan-nisa fis-suq tax-xogħol u jinkiseb bilanċ
bejn is-sessi f’pożizzjonijiet ta' tmexxija. Fi ħdan dan il-qafas, il-Kummissjoni se: a) Tappoġġja
l-inizjattivi biex jiġu miġġielda r-rappreżentazzjonijiet
sterjotipati tar-rwol tan-nisa u l-irġiel fis-soċjetà, fis-suq
tax-xogħol u f’pożizzjonijiet ta' tmexxija ·
Tinkoraġġixxi ditti ta' tiftix
tal-eżekuttivi sabiex iħejju kodiċi ta' kondotta volontarju
fil-livell tal-UE li jindirizza d-diversità tas-sessi u l-aħjar prattika,
sabiex id-diversità tas-sessi titqiegħed fuq l-aġenda
fil-proċess ta' nominazzjoni. ·
Tħeġġeġ lill-iskejjel
tan-negozju biex jippromwovu d-diversità tas-sessi f'pożizzjonijiet ta'
tmexxija u biex ikabbru l-għarfien fis-settur korporattiv u dak akkademiku
permezz tal-kurrikuli u l-attivitajiet tagħhom. b) Tikkontribwixxi għall-ħolqien ta' ambjent soċjali,
ekonomiku u tan-negozju li jappoġġja l-parteċipazzjoni
bbilanċjata tan-nisa u l-irġiel f'pożizzjonijiet ta' tmexxija ·
Tikkontribwixxi għall-iżvilupp ta'
politiki għar-rikonċiljazzjoni tal-ħajja tax-xogħol, dik
privata u dik tal-familja, inkluż l-użu ta' approċċi
innovattivi li jirriżultaw mill-użu tal-ICT, li jappoġġjaw
il-parteċipazzjoni tan-nisa u l-irġiel fis-suq tax-xogħol u
fil-pożizzjonijiet tat-teħid tad-deċiżjonijiet. Fl-2013,
il-Kummissjoni se tirrapporta dwar il-politiki favur ir-rikonċiljazzjoni
tal-ħajja tax-xogħol, dik privata u dik tal-familja, filwaqt li tqis
ukoll il-progress li sar lejn l-ilħuq tal-"miri ta'
Barċellona" għall-faċilitajiet għall-kura tat-tfal[37], filwaqt li tenfasizza
l-isfidi li għad baqa' u tipprovdi gwida għall-politika. ·
Issaħħaħ l-aspett tal-ġeneru
tal-istrateġija Ewropa 2020 sabiex tgħin fil-kisba ta' rata ta'
impjiegi ta' 75% sal-2020. Dan se jsir billi tiżdied il-kooperazzjoni
mal-Istati Membri, inkluż fil-qafas tal-Kumitati tal-Impjiegi u
tal-Protezzjoni Soċjali. Ser tingħata attenzjoni speċifika
lid-dimensjoni tal-ugwaljanza bejn is-sessi tal-outputs tas-Semestru Ewropew,
inkluż is-segwitu tar-Rakkomandazzjonijiet Speċifiċi
għall-Pajjiżi relatati mal-parteċipazzjoni tan-nisa fis-suq
tax-xogħol. ·
Tikkontribwixxi għall-ġlieda kontra
l-isterjotipi tas-sessi u l-promozzjoni tal-ugwaljanza bejn is-sessi
fil-livelli kollha tal-edukazzjoni u t-taħriġ, b'mod partikolari
inkluż permezz tal-Fond Soċjali Ewropew u l-programm ta' Tagħlim
tul il-Ħajja tal-UE u s-suċċessur tiegħu; Barra minn hekk,
b'mod partikolari fil-kuntest tal-Istrateġija Ewropa 2020 u l-ipprogrammar
tal-Fond Soċjali Ewropew, tagħti attenzjoni speċifika
għat-tranżizzjoni bejn l-edukazzjoni u s-suq tax-xogħol, u
għad-distakk bejn il-kisbiet edukattivi u l-iżvilupp professjonali,
partikolarment tan-nisa, bil-ħsieb li jiġu eliminati l-ostakoli li
jiltaqgħu magħhom fl-għażla tagħhom tal-karriera,
speċjalment fir-rigward tal-matematika, ix-xjenzi u t-teknoloġiji. c) Tippromwovi
l-għarfien dwar il-każ ekonomiku u kummerċjali favur
l-ugwaljanza bejn is-sessi u r-rappreżentazzjoni bbilanċjata tan-nisa
u l-irġiel fit-teħid tad-deċiżjonijiet ·
Tappoġġja l-attivitajiet li jqajmu
l-għarfien permezz tal-promozzjoni tal-iskambji u t-tixrid tal-esperjenzi
u l-prattika tajba. ·
Tappoġġja l-attivitajiet li jqajmu
l-għarfien fil-livell tal-kumpaniji. Dan se jsir billi jinħolqu,
jiġu mxerrda u implimentati fl-Istati Membri kollha tal-UE u
f’kooperazzjoni mad-dinja tan-negozju, moduli ta' taħriġ għal
intrapriżi żgħar, medji u kbar u l-iskambju ta' prattiki tajba
minn u fost l-intrapriżi. d) Tappoġġja u
tissorvelja l-progress lejn parteċipazzjoni bilanċjata tan-nisa u
l-irġiel fil-pożizzjonijiet tat-teħid tad-deċiżjonijiet
madwar l-UE ·
Iżżid ir-responsabilità billi tirrapporta
regolarment dwar il-progress li sar fl-Istati Membri tal-UE u billi xxerred
ir-riżultati b’mod wiesa’. ·
Tikkontribwixxi lejn it-titjib u d-disponibilità
tad-dejta billi tkompli tiġbor, ixxerred u tiżviluppa dejta
komparabbli fuq il-livell tal-UE permezz tal-bażi tad-dejta
tal-Kummissjoni dwar in-nisa u l-irġiel fit-teħid
tad-deċiżjonijiet. ·
Tissorvelja jekk l-istrument legalment vinkolanti
ġiex traspost u implimentat b’mod korrett fil-livell nazzjonali u
tirrapporta f’intervalli regolari lill-Parlament Ewropew u lill-Kunsill dwar
il-progress li jkun sar. ·
Tħeġġeġ lill-Istati Membri biex
isegwu s-sejħa tal-Parlament Ewropew biex itejbu s-sitwazzjoni
tal-bilanċ bejn is-sessi fil-banek ċentrali nazzjonali, biex b’hekk
jittejbu wkoll il-kundizzjonijiet għall-bilanċ tas-sessi fil-Kunsill
Governattiv tal-Bank Ċentrali Ewropew. Il-Kummissjoni se tiffinanzja, fejn xieraq,
il-lista mhux eżawrjenti ta' hawn fuq ta' attivitajiet taħt
il-Programm PROGRESS u, bla ħsara għall-konklużjonijiet
tan-negozjati li jinsabu għaddejjin bħalissa għall-Qafas
Finanzjarju Pluriennali, taħt l-istrument finanzjarju futur li jkopri
l-qasam ta' politika tal-ugwaljanza bejn is-sessi. Dan għandu jinkiseb
b'mod partikolari billi jiġu ppubblikati sejħiet ristretti u
miftuħa għall-proposti fl-2012, l-2013 u l-2014. Il-Kummissjoni se taħdem mal-Istati Membri
biex tagħmel użu sħiħ mill-opportunitajiet ta'
kofinanzjament offruti mill-Fondi Strutturali, inkluż il-perjodu ta'
programmar futur, sabiex jiġi promoss l-aċċess tan-nisa
għall-impjiegi u l-progress fil-karriera u biex jittejjeb il-bilanċ
bejn ix-xogħol u l-ħajja personali, b'mod partikolari permezz
tal-provvista ta' faċilitajiet għall-kura tat-tfal bi prezz
raġonevoli u ta' kwalità. [1] Sentenza tal-Qorti tal-Ġustizzja tal-Unjoni Ewropea
tal-25.05.1971 (C-80/70). [2] Pereżempju: Id-Direttiva 2006/54/KE tal-5 ta' Lulju
2006 tal-Parlament Ewropew u tal-Kunsill dwar l-implimentazzjoni
tal-prinċipju ta' opportunitajiet indaqs u ta' trattament ugwali
tal-irġiel u n-nisa fi kwistjonijiet ta' impjiegi u xogħol. [3] Pereżempju: Id-Direttiva 2010/41/UE tas-7 ta' Lulju
2010 tal-Parlament Ewropew u tal-Kunsill dwar l-applikazzjoni
tal-prinċipju ta’ trattament ugwali bejn l-irġiel u n-nisa li
jeżerċitaw attività li fiha jaħdmu għal rashom u li
tħassar id-Direttiva tal-Kunsill 86/613/KEE. [4] Id-Direttiva tal-Kunsill 2010/18/UE tat-8 ta' Marzu 2010
li timplimenta l-Ftehim Qafas rivedut dwar il-leave tal-ġenituri
konkluż minn BUSINESSEUROPE, UEAPME, CEEP u ETUC u li jħassar
id-Direttiva 96/34/KE. [5] Komunikazzjoni lill-Kummissjoni dwar strateġija
dwar l-opportunitajiet indaqs għall-perjodu 2010-2014, SEC(2010) 1554/3. [6] Fl-1995, is-sehem tan-nisa fl-ogħla karigi ta' maniġment kien
ta' 4% u 10,7% f’karigi ta' maniġment tan-nofs. [7] Rakkomandazzjoni tal-Kunsill 84/635/KEE tat-13 ta'
Diċembru 1984 dwar il-promozzjoni ta' azzjoni pożittiva
għan-nisa. [8] Ir-Rakkomandazzjoni tal-Kunsill 96/694/KE tat-2 ta'
Diċembru 1996 dwar is-sehem bilanċjat tan-nisa u l-irġiel fil-proċess
tat-teħid tad-deċiżjonijiet. [9] COM(2010) 078 finali. [10] COM(2010) 491 finali. [11] http://ec.europa.eu/commission_2010-2014/reding/womenpledge/index_en.htm. [12] 2010/2115 (INI). [13] Riżoluzzjonijiet tal-Parlament Ewropew 2010/2115(INI)
tas-6 ta' Lulju 2011 u 2011/2244(INI) tat-13 ta'
Marzu 2012. [14] Il-Kummissjoni
Ewropea (2012), "In-nisa fit-teħid tad-deċiżjonijiet
ekonomiċi fl-UE: Rapport
ta' progress, disponibbli fuq http://ec.europa.eu/justice/gender-equality/gender-decision-making/index_en.htm. [15] Proposta għal Direttiva tal-Parlament Ewropew u
tal-Kunsill dwar it-titjib tal-bilanċ bejn is-sessi fost diretturi mhux
eżekuttivi ta' kumpaniji elenkati f'borża u miżuri relatati COM
(2012) XXX. [16] http://ec.europa.eu/justice/gender-equality/gender-decision-making/database/business-finance/quoted-companies/index_en.htm.
[17] Biex tittratta din il-kwistjoni, il-Kummissjoni
ppromwoviet Kodiċi tal-Aqwa Prassi għan-Nisa fl-ICT (2010). [18] OECD (2012) - L-inizjattiva dwar is-sessi: l-ugwaljanza
bejn is-sessi fl-edukazzjoni, fl-impjiegi u fl-intraprenditorija. [19] ESTAT, ISCO-08, livell ta' tliet figuri. [20] ESTAT, NACE Rev 2, livell ta' żewġ
figuri. [21] ESTAT (2011) UE-LFS. [22] Stħarriġ fil-livell
tal-kumpaniji mill-Forum Ekonomiku Dinji, ikkwotat fl-OECD (2012). [23] L-għanijiet – definiti mill-Kunsill Ewropew ta'
Barċellona fl-2002 – jimmiraw li jiżguraw provvediment xieraq
għall-indukrar tat-tfal mill-Istati Membri tal-UE. [24] ESTAT (2010) UE-SILC. [25] Singh et al. (2008), "Newly appointed directors in the boardroom:
How do women and men differ?", European Management Journal, 26(1). [26] L-Istitut Norveġiż għar-Riċerka
Soċjali. [27] http://www.edhec.com/html/Communication/doc-womenboard/BoardReadyWomen.pdf.
[28] Liff u Ward (2001) "Distorted Views through the Glass
Ceiling: the Construction of Women’s Understandings of Promotion and Senior
Management Positions". [29] Ewrobarometru Speċjali 376 (2011), In-nisa
fit-teħid tad-deċiżjonijiet. [30] Catalyst u l-Bord tal-Konferenzi għall-Ewropa (2002),
Women in Leadership: A European Business Imperative. [31] http://ec.europa.eu/justice/newsroom/gender-equality/opinion/120528_en.htm. [32] Il-Kummissjoni Ewropea (2012), "In-nisa
fit-teħid tad-deċiżjonijiet ekonomiċi fl-UE: Rapport
tal-progress". [33] Idem. [34] L-aktar reċentement: Credit Suisse, Research
Institute (Awwissu 2012), "Gender diversity and corporate
performance"; studji importanti oħra: Catalyst (2004), "The
Bottom Line: Connecting Corporate Performance and Gender Diversity";
McKinsey (rapporti tal-2007, l-2008 u l-2010), "Women Matter";
Deutsche Bank Research (2010), "Towards gender-balanced leadership";
Ernst & Young (2012), "Mixed leadership". [35] Fi ħdan it-tifsira tal-Artikolu 4(1) punt (14)
tad-Direttiva 2004/39/KE. [36] Il-Kummissjoni qed tikkunsidra wkoll miżuri
ġenerali li għandhom bħala l-għan tagħhom li
jżidu d-diversità fil-bordijiet tal-kumpaniji permezz ta' trasparenza
mtejba sabiex jiffaċilitaw is-sorveljanza effettiva tal-maniġment u
governanza robusta tal-kumpaniji. [37] Fil-laqgħa tal-Kunsill Ewropew f'Barċellona
fl-2002, il-Kapijiet ta' Stat u Gvern qablu li l-Istati Membri għandhom
jipprovdu faċilitajiet tal-kura tat-tfal sal-2010 lil mill-anqas 90%
tat-tfal bejn l-età ta' tliet snin u l-età mandatorja tal-iskola u lil
mill-anqas 33% tat-tfal taħt l-età ta' tliet snin. In-nuqqas ta'
faċilitajiet tat-tfal huwa indirizzat fl-Istrateġija Ewropa 2020.
Fis-semestru Ewropew 2012, disgħa Stati Membri (AT, CZ, DE, HU, IT, MT,
PL, SK u UK) irċevew rakkomandazzjoni speċifika
għall-pajjiż dwar dik il-materja.