(1)

Id-Direttiva tal-Kummissjoni 2008/44/KE (2) inkludiet il-bentjavalikarb bħala sustanza attiva fl-Anness I tad-Direttiva tal-Kunsill 91/414/KEE (3).

(2)

Is-sustanzi attivi inklużi fl-Anness I tad-Direttiva 91/414/KEE huma meqjusa li ġew approvati skont ir-Regolament (KE) Nru 1107/2009 u jinsabu elenkati fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (4).

(3)

L-approvazzjoni tas-sustanza attiva bentjavalikarb, kif stabbilita fil-Parti A tal-Anness tar-Regolament ta’ Implimentazzjoni (UE) Nru 540/2011, tiskadi fil-15 ta’ Novembru 2024.

(4)

F’konformità mal-Artikolu 1 tar-Regolament ta’ Implimentazzjoni tal-Kummissjoni (UE) Nru 844/2012 (5) u fil-perjodu ta’ żmien previst f’dak l-Artikolu, ġiet sottomessa applikazzjoni għat-tiġdid tal-approvazzjoni tas-sustanza attiva bentjavalikarb lill-Polonja, l-Istat Membru relatur, u lil Franza, l-Istat Membru korelatur.

(5)

L-applikant issottometta l-fajls supplimentari lill-Istat Membru relatur, lill-Istat Membru korelatur, lill-Kummissjoni u lill-Awtorità Ewropea dwar is-Sigurtà fl-Ikel (“l-Awtorità”) f’konformità mal-Artikolu 6 tar-Regolament ta’ Implimentazzjoni (UE) Nru 844/2012. L-Istat Membru relatur sab li l-applikazzjoni kienet ammissibbli.

(6)

L-Istat Membru relatur ħejja r-rapport ta’ valutazzjoni tat-tiġdid b’konsultazzjoni mal-Istat Membru korelatur, u bagħtu lill-Awtorità u lill-Kummissjoni fil-31 ta’ Ottubru 2017.

(7)

L-Awtorità għamlet il-fajl sommarju supplimentari disponibbli għall-pubbliku. L-Awtorità ċċirkolat ukoll ir-rapport ta’ valutazzjoni tat-tiġdid lill-applikant u lill-Istati Membri għall-kummenti u nediet konsultazzjoni pubblika dwaru. L-Awtorità għaddiet il-kummenti li rċeviet lill-Kummissjoni.

(8)

Fit-23 ta’ Awwissu 2021, l-Awtorità kkomunikat lill-Kummissjoni l-konklużjoni tagħha (6) (“il-konklużjonijiet tal-Awtorità”) dwar jekk jistax ikun mistenni li l-bentjavalikarb jissodisfa l-kriterji tal-approvazzjoni previsti fl-Artikolu 4 tar-Regolament (KE) Nru 1107/2009.

(9)

F’dik il-konklużjoni, l-Awtorità identifikat ċertu tħassib speċifiku. B’mod partikolari, ġie konkluż li l-bentjavalikarb għandu potenzjal karċinoġeniku, li huwa konsistenti mal-proposta tal-Aġenzija Ewropea għas-Sustanzi Kimiċi li tikklassifikah bħala karċinoġenu tal-kategorija 1B (7). L-Awtorità qieset ukoll li l-bentjavalikarb juri proprjetajiet li jfixklu s-sistema endokrinali li jista’ jkollhom effetti negattivi fil-bnedmin, kif stabbilit fil-punt 3.6.5 tal-Anness II tar-Regolament (KE) Nru 1107/2009. Skont l-Awtorità, ir-residwi tal-bentjavalikarb huma mistennija li jkunu ogħla mill-valur stabbilit fil-punt 3.6.5 tal-Anness II tar-Regolament (KE) Nru 1107/2009, u għalhekk, dan ir-rekwiżit mhuwiex issodisfat.

(10)

Fl-evalwazzjoni tagħha dwar jekk il-bentjavalikarb huwiex meħtieġ għall-kontroll ta’ periklu serju għas-saħħa tal-pjanti li ma jistax jitrażżan b’mezzi disponibbli oħra inklużi metodi mhux kimiċi f’konformità mal-Artikolu 4(7) tar-Regolament (KE) Nru 1107/2009, l-Awtorità kkonkludiet li, minkejja l-fatt li jista’ jkun hemm għadd insuffiċjenti ta’ alternattivi kimiċi disponibbli għal xi użi tal-bentjavalikarb u f’xi Stati Membri, hemm xi metodi mhux kimiċi li huma disponibbli wkoll, u li tista’ tkun possibbli taħlita ta’ metodi kimiċi u mhux kimiċi biex jiġu kkontrollati l-pesti f’xi għelejjel. Barra minn hekk, il-Kummissjoni tqis li ma ġie identifikat l-ebda periklu serju għas-saħħa tal-pjanti. Għalhekk, il-Kummissjoni tqis li l-kundizzjonijiet għall-applikazzjoni tad-deroga fl-Artikolu 4(7) tar-Regolament (KE) Nru 1107/2009 mhumiex issodisfati.

(11)

Fl-24 ta’ Mejju 2023 u fil-11 ta’ Lulju 2023, rispettivament, il-Kummissjoni ppreżentat l-abbozz tar-rapport tat-tiġdid tagħha dwar il-bentjavalikarb u abbozz ta’ dan ir-Regolament lill-Kumitat Permanenti dwar il-Pjanti, l-Annimali, l-Ikel u l-Għalf.

(12)

Il-Kummissjoni stiednet lill-applikant iressaq il-kummenti tiegħu dwar il-konklużjoni tal-Awtorità u dwar l-abbozz tar-rapport tat-tiġdid. L-applikant ressaq il-kummenti tiegħu, u dawn ġew eżaminati bir-reqqa.

(13)

Minkejja l-kummenti li ressaq l-applikant, it-tħassib li tqajjem fil-valutazzjoni tar-riskju tal-bentjavalikarb ma setax jiġi eliminat.

(14)

B’konsegwenza ta’ dan, fir-rigward ta’ użu rappreżentattiv wieħed jew aktar ta’ mill-inqas prodott wieħed għall-protezzjoni tal-pjanti li fih il-bentjavalikarb, ma ġiex stabbilit li l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 huma ssodisfati. Għalhekk, jixraq li l-approvazzjoni tas-sustanza attiva bentjavalikarb ma tiġġeddidx.

(15)

Għalhekk, jenħtieġ li r-Regolament ta’ Implimentazzjoni (UE) Nru 540/2011 jiġi emendat skont dan.

(16)

Jenħtieġ li l-Istati Membri jingħataw żmien biżżejjed biex jirtiraw l-awtorizzazzjonijiet tal-prodotti għall-protezzjoni tal-pjanti li fihom il-bentjavalikarb.

(17)

Fir-rigward tal-prodotti għall-protezzjoni tal-pjanti li fihom il-bentjavalikarb, meta l-Istati Membri jagħtu perjodu ta’ grazzja f’konformità mal-Artikolu 46 tar-Regolament (KE) Nru 1107/2009, dak il-perjodu ma għandux jaqbeż it-12-il xahar mid-data tad-dħul fis-seħħ ta’ dan ir-Regolament.

(18)

Ir-Regolament ta’ Implimentazzjoni tal-Kummissjoni (UE) 2023/918 (8) estenda l-perjodu ta’ approvazzjoni tal-bentjavalikarb sal-15 ta’ Novembru 2024 sabiex il-proċess tat-tiġdid ikun jista’ jitlesta qabel ma jiskadi l-perjodu tal-approvazzjoni ta’ dik is-sustanza. Madankollu, peress li tista’ ttieħdet deċiżjoni dwar in-nuqqas ta’ tiġdid tal-approvazzjoni qabel id-data ta’ skadenza, jenħtieġ li dan ir-Regolament japplika qabel dik id-data.

(19)

Dan ir-Regolament ma jipprekludix is-sottomissjoni ta’ applikazzjoni oħra għall-approvazzjoni tal-bentjavalikarb skont l-Artikolu 7 tar-Regolament (KE) Nru 1107/2009.

(20)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,