This document is an excerpt from the EUR-Lex website
Document 32023R1717
Commission Delegated Regulation (EU) 2023/1717 of 27 June 2023 amending Directive 2014/53/EU of the European Parliament and of the Council as regards the technical specifications for the charging receptacle and charging communication protocol for all the categories or classes of radio equipment capable of being recharged by means of wired charging (Text with EEA relevance)
Regolament Delegat tal-Kummissjoni (UE) 2023/1717 tas-27 ta’ Ġunju 2023 li jemenda d-Direttiva 2014/53/UE tal-Parlament Ewropew u tal-Kunsill fir-rigward tal-ispeċifikazzjonijiet tekniċi għar-reċipjent tal-iċċarġjar u l-protokoll tal-komunikazzjoni tal-iċċarġjar għall-kategoriji jew għall-klassijiet kollha ta’ tagħmir tar-radju li jista’ jiġi ċċarġjat mill-ġdid permezz ta’ ċċarġjar bil-fili (Test b’rilevanza għaż-ŻEE)
Regolament Delegat tal-Kummissjoni (UE) 2023/1717 tas-27 ta’ Ġunju 2023 li jemenda d-Direttiva 2014/53/UE tal-Parlament Ewropew u tal-Kunsill fir-rigward tal-ispeċifikazzjonijiet tekniċi għar-reċipjent tal-iċċarġjar u l-protokoll tal-komunikazzjoni tal-iċċarġjar għall-kategoriji jew għall-klassijiet kollha ta’ tagħmir tar-radju li jista’ jiġi ċċarġjat mill-ġdid permezz ta’ ċċarġjar bil-fili (Test b’rilevanza għaż-ŻEE)
C/2023/4032
ĠU L 223, 11.9.2023, p. 1–3
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
11.9.2023 |
MT |
Il-Ġurnal Uffiċjali tal-Unjoni Ewropea |
L 223/1 |
REGOLAMENT DELEGAT TAL-KUMMISSJONI (UE) 2023/1717
tas-27 ta’ Ġunju 2023
li jemenda d-Direttiva 2014/53/UE tal-Parlament Ewropew u tal-Kunsill fir-rigward tal-ispeċifikazzjonijiet tekniċi għar-reċipjent tal-iċċarġjar u l-protokoll tal-komunikazzjoni tal-iċċarġjar għall-kategoriji jew għall-klassijiet kollha ta’ tagħmir tar-radju li jista’ jiġi ċċarġjat mill-ġdid permezz ta’ ċċarġjar bil-fili
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2014/53/UE tal-Parlament Ewropew u tal-Kunsill tas-16 ta’ April 2014 dwar l-armonizzazzjoni tal-liġijiet tal-Istati Membri marbuta mat-tqegħid fis-suq ta’ tagħmir tar-radju u li tħassar id-Direttiva 1999/5/KE (1) u b’mod partikolari l-Artikolu 3(4) tagħha,
Billi:
(1) |
Wieħed mill-objettivi tad-Direttiva 2014/53/UE huwa li jiġi żgurat il-funzjonament tajjeb tas-suq intern għat-tagħmir tar-radju. |
(2) |
Sabiex jiġu armonizzati l-interfaċċi tal-iċċarġjar u l-protokolli tal-komunikazzjoni tal-iċċarġjar għal kategoriji jew klassijiet speċifiċi ta’ tagħmir tar-radju, u sabiex jiġu speċifikati r-rekwiżiti dwar il-bejgħ ikkombinat tat-tagħmir tar-radju u ċ-ċarġers tiegħu u fir-rigward tal-informazzjoni li għandha tiġi pprovduta lill-konsumaturi u lil utenti finali oħra, id-Direttiva 2014/53/UE ġiet emendata bid-Direttiva (UE) 2022/2380 tal-Parlament Ewropew u tal-Kunsill (2). |
(3) |
Wara l-emendi tad-Direttiva (UE) 2022/2380, id-Direttiva 2014/53/UE tipprovdi wkoll il-bażi għall-adattament ta’ dawn ir-rekwiżiti għal kwalunkwe progress xjentifiku u teknoloġiku jew żvilupp tas-suq fil-futur sabiex tiġi żgurata interoperabbiltà komuni minima bejn it-tagħmir tar-radju u l-apparati tal-iċċarġjar tiegħu, kif ukoll biex tittejjeb il-konvenjenza għall-konsumaturi, jitnaqqas l-iskart ambjentali u tiġi evitata l-frammentazzjoni tas-suq. |
(4) |
Fir-rigward tal-armonizzazzjoni tal-interfaċċi tal-iċċarġjar u tal-protokolli tal-komunikazzjoni tal-iċċarġjar għall-iċċarġjar bil-fili, l-Artikolu 3(4), l-ewwel subparagrafu, tad-Direttiva 2014/53/UE jirrikjedi li t-tagħmir tar-radju fil-kategoriji jew fil-klassijiet tat-tagħmir tar-radju speċifikati fil-Parti I tal-Anness Ia ta’ dik id-Direttiva jinbena b’tali mod li jikkonforma mal-ispeċifikazzjonijiet relatati mal-kapaċitajiet tal-iċċarġjar stabbiliti f’dak l-Anness. |
(5) |
L-ispeċifikazzjonijiet stabbiliti fil-Parti I tal-Anness Ia tad-Direttiva 2014/53/UE jipprevedu li l-kategoriji jew il-klassijiet ta’ tagħmir tar-radju li huma elenkati f’dak l-Anness u li jistgħu jiġu ċċarġjati mill-ġdid permezz ta’ ċċarġjar bil-fili għandhom ikunu mgħammra bir-reċipjent tal-USB tat-Tip-C kif deskritt fl-istandard EN IEC 62680-1-3:2021 “Interfaċċi tal-universal serial bus għad-data u l-elettriku – Parti 1-3: Komponenti komuni – Speċifikazzjoni tal-Kejbil u tal-Konnettur tal-USB tat-Tip-C®”. Barra minn hekk, l-ispeċifikazzjonijiet stabbiliti fil-Parti I tal-Anness Ia tad-Direttiva 2014/53/UE jipprevedu li l-kategoriji jew il-klassijiet ta’ tagħmir tar-radju li huma elenkati f’dak l-Anness u li jistgħu jiġu ċċarġjati mill-ġdid permezz ta’ ċċarġjar bil-fili b’vultaġġi ogħla minn 5 volts, kurrenti ogħla minn 3 amperes jew potenzi ogħla minn 15 watt għandhom jinkorporaw it-Twassil tal-Enerġija USB kif deskritt fl-istandard EN IEC 62680-1-2:2021 “Interfaċċi tal-universal serial bus għad-data u l-elettriku – Parti 1-2: Komponenti komuni – Speċifikazzjoni tat-Twassil tal-Enerġija bil-USB”. |
(6) |
Fil-5 ta’ Settembru 2022, il-Kummissjoni Elettroteknika Internazzjonali (IEC) ippubblikat l-istandard IEC 62680-1-2:2022 “Interfaċċi tal-universal serial bus għad-data u l-elettriku – Parti 1-2: Komponenti komuni – Speċifikazzjoni tat-Twassil tal-Enerġija bil-USB” u l-istandard IEC 62680-1-3:2022 “Interfaċċi tal-universal serial bus għad-data u l-elettriku – Parti 1-3: Komponenti komuni – Speċifikazzjoni tal-Kejbil u tal-Konnettur tal-USB tat-Tip-C®”. Dawk iż-żewġ standards fihom speċifikazzjonijiet aġġornati. |
(7) |
Fl-14 ta’ Ottubru 2022, il-Kumitat Ewropew għall-Istandardizzazzjoni Elettroteknika (Cenelec) adotta, bħala standards Ewropej (EN), dawk iż-żewġ standards internazzjonali tal-IEC ippubblikati fil-5 ta’ Settembru 2022, permezz ta’ EN IEC 62680-1-2:2022 “Interfaċċi tal-universal serial bus għad-data u l-elettriku – Parti 1-2: Komponenti komuni – Speċifikazzjoni tat-Twassil tal-Enerġija bil-USB” u EN IEC 62680-1-3:2022 “Interfaċċi tal-universal serial bus għad-data u l-elettriku – Parti 1-3: Komponenti komuni – Speċifikazzjoni tal-Kejbil u tal-Konnettur tal-USB tat-Tip-C®”. |
(8) |
Sabiex ikun hemm adattament għall-progress tekniku, jeħtieġ li jiġu mmodifikati, fil-Parti I, il-Punt 2, tal-Anness Ia tad-Direttiva 2014/53/UE, ir-referenzi tal-istandard relatat mar-reċipjent tal-iċċarġjar u l-kejbils għall-iċċarġjar bil-fili f’konformità mal-istandard EN IEC 62680-1-3:2022. |
(9) |
Jeħtieġ ukoll li jiġu mmodifikati, fil-Parti I, il-Punt 3, tal-Anness Ia tad-Direttiva 2014/53/UE, ir-referenzi tal-istandard relatat mal-protokoll tal-komunikazzjoni tal-iċċarġjar dwar l-iċċarġjar bil-fili b’vultaġġ ogħla minn 5 Volts, kurrenti ogħla minn 3 Amperes jew potenzi ogħla minn 15 Watt, f’konformità mal-istandard EN IEC 62680-1-2:2022. |
(10) |
Għalhekk, jenħtieġ li d-Direttiva 2014/53/UE tiġi emendata skont dan, |
ADOTTAT DAN IR-REGOLAMENT:
Artikolu 1
Il-Parti I tal-Anness Ia tad-Direttiva 2014/53/UE hija emendata kif ġej:
(1) |
fil-punt 2.1, ir-referenza għall-istandard “EN IEC 62680-1-3:2021” hija sostitwita b’“EN IEC 62680-1-3:2022”; |
(2) |
fil-punt 2.2, ir-referenza għall-istandard “EN IEC 62680-1-3:2021” hija sostitwita b’“EN IEC 62680-1-3:2022”; |
(3) |
fil-punt 3.1, ir-referenza għall-istandard “EN IEC 62680-1-2:2021” hija sostitwita b’“EN IEC 62680-1-2:2022”. |
Artikolu 2
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, is-27 ta’ Ġunju 2023.
Għall-Kummissjoni
Il-President
Ursula VON DER LEYEN
(1) ĠU L 153, 22.5.2014, p. 62.
(2) Id-Direttiva (UE) 2022/2380 tal-Parlament Ewropew u tal-Kunsill tat-23 ta’ Novembru 2022 li temenda d-Direttiva 2014/53/UE dwar l-armonizzazzjoni tal-liġijiet tal-Istati Membri marbuta mat-tqegħid fis-suq ta’ tagħmir tar-radju (ĠU L 315, 7.12.2022, p. 30).