This document is an excerpt from the EUR-Lex website
Document 32020R1214
Commission Implementing Regulation (EU) 2020/1214 of 21 August 2020 amending Implementing Regulation (EU) 2018/2019 as regards wood of Ulmus L. and certain plants for planting of Albizia julibrissin Durazzini and Robinia pseudoacacia L. originating in Israel
Regolament ta’ Implimentazzjoni tal-Kummissjoni (UE) 2020/1214 tal-21 ta’ Awwissu 2020 li jemenda r-Regolament ta’ Implimentazzjoni (UE) 2018/2019 fir-rigward tal-injam tal-Ulmus L. u ċerti pjanti għat-tħawwil tal-Albizia julibrissin Durazzini u tar-Robinia pseudoacacia L. li joriġinaw mill-Iżrael
Regolament ta’ Implimentazzjoni tal-Kummissjoni (UE) 2020/1214 tal-21 ta’ Awwissu 2020 li jemenda r-Regolament ta’ Implimentazzjoni (UE) 2018/2019 fir-rigward tal-injam tal-Ulmus L. u ċerti pjanti għat-tħawwil tal-Albizia julibrissin Durazzini u tar-Robinia pseudoacacia L. li joriġinaw mill-Iżrael
C/2020/5694
ĠU L 275, 24.8.2020, p. 12–15
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
24.8.2020 |
MT |
Il-Ġurnal Uffiċjali tal-Unjoni Ewropea |
L 275/12 |
REGOLAMENT TA’ IMPLIMENTAZZJONI TAL-KUMMISSJONI (UE) 2020/1214
tal-21 ta’ Awwissu 2020
li jemenda r-Regolament ta’ Implimentazzjoni (UE) 2018/2019 fir-rigward tal-injam tal-Ulmus L. u ċerti pjanti għat-tħawwil tal-Albizia julibrissin Durazzini u tar-Robinia pseudoacacia L. li joriġinaw mill-Iżrael
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2016/2031 tal-Parlament Ewropew u tal-Kunsill tas-26 ta’ Ottubru 2016 dwar il-miżuri protettivi kontra pesti tal-pjanti, li jemenda r-Regolamenti (UE) Nru 228/2013, (UE) Nru 652/2014 u (UE) Nru 1143/2014 tal-Parlament Ewropew u tal-Kunsill u li jħassar id-Direttivi tal-Kunsill 69/464/KEE, 74/647/KEE, 93/85/KEE, 98/57/KE, 2000/29/KE, 2006/91/KE u 2007/33/KE (1), u b’mod partikolari l-ewwel u t-tielet subparagrafi tal-Artikolu 42(4) tiegħu,
Billi:
(1) |
Ir-Regolament ta’ Implimentazzjoni tal-Kummissjoni (UE) 2018/2019 (2), abbażi ta’ valutazzjoni preliminari tar-riskju, jistabbilixxi lista ta’ pjanti, prodotti mill-pjanti u oġġetti oħra ta’ riskju għoli. |
(2) |
Ir-Regolament ta’ Implimentazzjoni tal-Kummissjoni (UE) 2018/2018 (3) jistabbilixxi regoli speċifiċi dwar il-proċedura li għandha tiġi segwita sabiex titwettaq il-valutazzjoni tar-riskju msemmija fl-Artikolu 42(4) tar-Regolament (UE) 2016/2031 għal dawk il-pjanti, il-prodotti mill-pjanti u oġġetti oħra ta’ riskju għoli. |
(3) |
Wara valutazzjoni preliminari tar-riskju, 35 pjanta għat-tħawwil li joriġinaw mill-pajjiżi terzi kollha kienu inklużi fl-Anness tar-Regolament ta’ Implimentazzjoni (UE) 2018/2019 bħala pjanti b’riskju għoli, fosthom tal-Albizia Durazz u Robinia L. |
(4) |
Fl-24 ta’ Jannar 2019, l-Iżrael bagħat talba lill-Kummissjoni għall-esportazzjoni lejn l-Unjoni ta’ pjanti mlaqqma bl-għeruq mikxufin inattivi għat-tħawwil, b’dijametru massimu ta’ 2,5 cm li jappartjeni għall-Albizia julibrissin Durazzini u pjanti mlaqqma b’għeruq mikxufin inattivi għat-tħawwil, b’dijametru massimu ta’ 2,5 cm għar-Robinia pseudoacacia L. Dik it-talba ġiet appoġġata mid-dossiers tekniċi rispettivi. |
(5) |
Fit-13 ta’ Jannar 2020, l-Awtorità Ewropea dwar is-Sigurtà fl-Ikel (“l-Awtorità”) ippubblikat opinjoni xjentifika dwar il-valutazzjoni tar-riskju tal-pjanti tal-Albizia julibrissin mill-Iżrael (4). L-Awtorità identifikat l-Aonidiella orientalis, kumpless ta’ speċijiet li jinkludi l-Euwallacea fornicatus sensu stricto, Euwallacea fornicatior, l-Euwallacea whitforiodendrus u l-Euwallacea Kuroshio (“Euwallacea fornicatus sensu lato”) u l-Fusarium euwallaceae bħala pesti relevanti għall-opinjoni, ivvalutat il-miżuri ta’ mitigazzjoni tar-riskji deskritti fid-dossier ta’ dawk il-pesti u stmat il-probabbiltà tal-libertà tal-pest għal kull pest relatat ta’ dik il-komodità. |
(6) |
Fit-2 ta’ Marzu 2020, l-Awtorità ppubblikat opinjoni xjentifika dwar il-valutazzjoni tar-riskju tal-komodità tal-pjanti tar-Robinia pseudoacaciamill-Iżrael (5). Identifikat l-Euwallacea fornicatus sensu lato u l-Fusarium euwallaceae bħala pesti rilevanti għall-opinjoni, evalwat il-miżuri ta’ mitigazzjoni tar-riskji deskritti fid-dossier għal dawk il-pesti u stmat il-probabbiltà ta’ ħelsien minn pesti għal kull pest relatat ma’ dik il-komodità. |
(7) |
Abbażi ta’ dawn l-opinjonijiet, ir-riskju fitosanitarju mill-introduzzjoni fl-Unjoni ta’ pjanti mlaqqma bl-għeruq mikxufin inattivi għat-tħawwil b’dijametru massimu ta’ 2,5 cm tal-Albizia julibrissin Durazzini u r-Robinia pseudoacacia L. li joriġinaw mill-Iżrael huwa kkunsidrat li jitnaqqas għal livell aċċettabbli, sakemm jiġu applikati miżuri ta’ mitigazzjoni xierqa biex jiġi indirizzat ir-riskju ta’ pesti relatati ma’ dawk il-pjanti għat-tħawwil. Peress li tali miżuri xierqa huma previsti fir-Regolament ta’ Implimentazzjoni tal-Kummissjoni (UE) 2020/1213 (6), jenħtieġ li dawk il-pjanti għat-tħawwil ma jibqgħux jitqiesu bħala impjanti ta’ riskju għoli, u jenħtieġ li jitneħħew mill-Anness tar-Regolament ta’ Implimentazzjoni (UE) 2018/2019. |
(8) |
Wara valutazzjoni preliminari tar-riskju, l-injam tal-Ulmus L. iddaħħal fil-lista ta’ pjanti, prodotti mill-pjanti u oġġetti oħra b’riskju għoli bħala mod potenzjali għall-introduzzjoni u l-istabbiliment fl-Unjoni tal-pest Saperda tridentata Olivier, pest li mhux elenkat bħala pest ta’ kwarantina fl-Unjoni. Wara li l-injam tal-Ulmus L. iddaħħal fil-lista ta’ pjanti, prodotti mill-pjanti u oġġetti oħra ta’ riskju għoli, il-Kummissjoni talbet lill-Awtorità twettaq valutazzjoni tar-riskju fitosanitarju tas-Saperda tridentata Olivier, li tindirizza l-modi tal-introduzzjoni, il-firxa, l-istabbiliment u t-tnaqqis tar-riskju b’attenzjoni partikolari fil-każ tal-injam tal-Ulmus L. |
(9) |
Fl-10 ta’ Jannar 2020, l-Awtorità ppubblikat opinjoni xjentifika dwar il-kategorizzazzjoni tal-pest Saperda tridentata Olivier (7). Ikkonkludiet li s-Saperda tridentata Olivier jissodisfa l-kriterju għal pest ta’ kwarantina fir-rigward tad-dħul fit-territorju tal-Unjoni. Madankollu, minħabba data insuffiċjenti ma kienx possibbli li jiġi konkluż li s-Saperda tridentata Olivier jissodisfa l-kriterji ta’ stabbiliment, ta’ firxa u ta’ impatt potenzjali fl-Unjoni. F’dan ir-rigward, mhuwiex ġustifikat li l-pest Saperda tridentata Olivier jiddaħħal fil-lista tal-pesti ta’ kwarantina fl-Unjoni. Konsegwentement, meta jitqies ir-riskju valutat ta’ dan il-pest fir-rigward tal-injam tal-Ulmus L., jenħtieġ li l-injam tal-Ulmus L. ma jibqax jitqies bħala prodott tal-pjanti ta’ riskju għoli u għalhekk jenħtieġ li jitneħħa mill-Anness tar-Regolament ta’ Implimentazzjoni (UE) 2018/2019. |
(10) |
Sabiex ikun hemm konformità mal-obbligi tal-Unjoni li jirriżultaw mill-ftehim tal-Organizzazzjoni Dinjija tal-Kummerċ dwar l-applikazzjoni ta’ miżuri sanitarji u fitosanitarji (8), l-importazzjoni ta’ dawk il-komoditajiet għandha tkompli fl-iqsar żmien possibbli. Għalhekk, jenħtieġ li dan ir-Regolament jidħol fis-seħħ fit-tielet jum wara l-pubblikazzjoni tiegħu. |
(11) |
Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DAN IR-REGOLAMENT:
Artikolu 1
Emenda tar-Regolament ta’ Implimentazzjoni (UE) 2018/2019
L-Anness I tar-Regolament ta’ Implimentazzjoni (UE) 2018/2019 huwa emendat f’konformità mal-Anness ta’ dan ir-Regolament.
Artikolu 2
Dħul fis-seħħ
Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, il-21 ta’ Awwissu 2020.
Għall-Kummissjoni
Il-President
Ursula VON DER LEYEN
(1) ĠU L 317, 23.11.2016, p. 4.
(2) Ir-Regolament ta’ Implimentazzjoni tal-Kummissjoni (UE) 2018/2019 tat-18 ta’ Diċembru 2018 li jistabbilixxi lista proviżorja ta’ pjanti, prodotti tal-pjanti jew oġġetti oħra ta’ riskju għoli, fis-sens tal-Artikolu 42 tar-Regolament (UE) 2016/2031 u lista ta’ pjanti li ma jeħtiġux ċertifikati fitosanitarji għall-introduzzjoni tagħhom fl-Unjoni, fis-sens tal-Artikolu 73 ta’ dak ir-Regolament (ĠU L 323, 19.12.2018, p. 10).
(3) Ir-Regolament ta’ Implimentazzjoni tal-Kummissjoni (UE) 2018/2018 tat-18 ta’ Diċembru 2018 li jistabbilixxi regoli speċifiċi rigward il-proċedura li trid tiġi segwita sabiex issir il-valutazzjoni tar-riskju ta’ pjanti b’riskju għoli, il-prodotti tal-pjanti u oġġetti oħra fit-tifsira tal-Artikolu 42(1) tar-Regolament (UE) 2016/2031 tal-Parlament Ewropew u tal-Kunsill (ĠU L 323, 19.12.2018, p. 7).
(4) Il-Bord tal-EFSA dwar is-Saħħa tal-Pjanti, 2020. Scientific Opinion on the commodity risk assessment of Albizia julibrissin plants from Israel. EFSA Journal 2020;18(1):5941. https://doi.org/10.2903/j.efsa.2020.5941.
(5) Il-Bord tal-EFSA dwar is-Saħħa tal-Pjanti, 2020. Scientific Opinion on the commodity risk assessment of Robinia pseudoacacia plants from Israel. EFSA Journal 2020;18(3):6039. https://doi.org/10.2903/j.efsa.2020.6039.
(6) Ir-Regolament ta’ Implimentazzjoni tal-Kummissjoni (UE) 2020/1213 tal-21 ta’ Awwissu 2020 dwar il-miżuri fitosanitarji għall-introduzzjoni fl-Unjoni ta’ ċerti pjanti, prodotti mill-pjanti u oġġetti oħra li tneħħew mill-Anness tar-Regolament ta’ Implimentazzjoni tal-Kummissjoni (UE) 2018/2019 (ara paġna 5 ta’ dan il-Ġurnal Uffiċjali).
(7) Il-Bord tal-EFSA PLH (il-Bord tal-EFSA dwar is-Saħħa tal-Pjanti), EFSA Journal 2020; 18(1):5940.https://doi.org/10.2903/j.efsa.2020.5940.
(8) Il-Ftehim tal-Organizzazzjoni Dinjija tal-Kummerċ dwar l-Applikazzjoni ta’ Miżuri Sanitarji u Fitosanitarji (il-Ftehim SPS), https://www.wto.org/english/tratop_e/sps_e/spsagr_e.htm.
ANNESS
L-Anness I tar-Regolament ta’ Implimentazzjoni tal-Kummissjoni (UE) 2018/2019 huwa emendat kif ġej:
(1) |
It-titlu jiġi sostitwit b’“ANNESS”; |
(2) |
Fil-punt 1, it-tieni kolonna “Deskrizzjoni” hija emendata kif ġej:
|
(3) |
Jitħassar il-punt 4. |