Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32020O1514

Linja gwida (UE) 2020/1514 tal-Bank Ċentrali Ewropew tat-8 ta’ Ottubru 2020 li temenda l-Linja Gwida BĊE/2008/5 dwar l-immaniġġjar tal-assi barranin ta’ riżerva tal-Bank Ċentrali Ewropew mill-banek ċentrali nazzjonali u d-dokumentazzjoni legali għall-operazzjonijiet li jinvolvu dawn l-assi (BĊE/2020/49)

ĠU L 344, 19.10.2020, p. 32–34 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

ELI: http://data.europa.eu/eli/guideline/2020/1514/oj

19.10.2020   

MT

Il-Ġurnal Uffiċjali tal-Unjoni Ewropea

L 344/32

LINJA GWIDA (UE) 2020/1514 TAL-BANK ĊENTRALI EWROPEW

tat-8 ta’ Ottubru 2020

li temenda l-Linja Gwida BĊE/2008/5 dwar l-immaniġġjar tal-assi barranin ta’ riżerva tal-Bank Ċentrali Ewropew mill-banek ċentrali nazzjonali u d-dokumentazzjoni legali għall-operazzjonijiet li jinvolvu dawn l-assi (BĊE/2020/49)

IL-KUNSILL GOVERNATTIV TAL-BANK ĊENTRALI EWROPEW,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari t-tielet inċiż tal-Artikolu 127(2) tiegħu,

Wara li kkunsidra l-Istatut tas-Sistema Ewropea tal-Banek Ċentrali u tal-Bank Ċentrali Ewropew, b’mod partikolari l-ewwel inċiż tal-Artikolu 3.1 u l-Artikoli 12.1 sa 30.6 tiegħu,

Billi:

(1)

Skont l-Artikolu 30.1 tal-Istatut tas-Sistema Ewropea tal-Banek Ċentrali u tal-Bank Ċentrali Ewropew (minn hawn ’il quddiem “l-Istatut tas-SEBĊ”), il-Bank Ċentrali Ewropew (BĊE) jiġi pprovdut bl-assi barranin ta’ riżerva mill-banek ċentrali nazzjonali (BĊNi) tal-Istati Membri li l-munita tagħhom hija l-euro (minn hawn ’il quddiem il-“BĊNi taż-żona tal-euro”) u għandu d-dritt sħiħ li jżomm u jimmaniġġja r-riżervi barranin li jiġu ttrasferiti lilu.

(2)

Skont l-Artikoli 9.2 u 12.1 tal-Istatut tas-SEBĊ, il-BĊE jista’ jimmaniġġja wħud mill-attivitajiet tiegħu permezz tal-BĊNi taż-żona tal-euro u jirrikorri għand il-BĊNi taż-żona tal-euro sabiex iwettaq uħud mill-operazzjonijiet tiegħu. Bl-istess mod, il-BĊE iqis li l-BĊNi taż-żona tal-euro għandhom jimmaniġġjaw ir-riżervi barranin ittrasferiti lilu bħala l-aġenti tiegħu.

(3)

L-involviment tal-BĊNi taż-żona tal-euro fil-ġestjoni tal-assi ta’ riżervi barranin ttrasferiti lill-BĊE u t-tranżazzjonijiet relatati ma’ dik il-ġestjoni jeħtieġ dokumentazzjoni speċifika għal operazzjonijiet li jinvolvu r-riżervi barranin tal-BĊE.

(4)

Bosta ftehimiet standard li huma relevanti għall-ġestjoni ta’ riżervi barranin użati mill-BĊE ġew aġġornati u verżjonijiet jew edizzjonijiet ġodda tagħhom huma disponibbli, bħall-International Swaps and Derivatives Association Master Agreement (ISDA, verżjoni tal-2002) u l-ICMA/SIFMA Global Master Repurchase Agreement (GMRA, verżjoni tal-2011). Għalhekk, għandu jiġi ddikjarat b’mod espliċitu li jistgħu jintużaw edizzjonijiet jew verżjonijiet sussegwenti ta’ ftehimiet standard, bl-approvazzjoni tal-BĊE.

(5)

Hija prattika standard li dokumentazzjoni legali relatata ma’ operazzjonijiet li jinvolvu assi ta’ riżervi barranin jiġu abbozzati bl-Ingliż u l-Ingliż għandu jsir il-lingwa standard għal ftehimiet prinċipali ta’ netting għall-kontropartijiet kollha, għall-ftehimiet ġodda ta’ netting kollha ffirmati wara d-data tad-dħul fis-seħħ ta’ din il-Linja Gwida. Ftehimiet mhux abbozzati bl-Ingliż f’dik id-data ser ikomplu jkunu validi u jistgħu jiġu ssostitwiti f’ħin xieraq wara.

(6)

Għalhekk, il-Linja Gwida BĊE/2008/5 (1) għandha tiġi emendata f’dan is-sens,

ADOTTA DIN IL-LINJA GWIDA:

Artikolu 1

Emendi

Il-Linja Gwida BĊE/2008/5 hija emendata kif ġej:

1.

l-Artikolu 3 huwa emendat kif ġej:

(a)

il-paragrafu 2 huwa mibdul b’dan li ġej:

“2.   L-operazzjonijiet ta’ riakkwist u ta’ riakkwist bil-maqlub, ta’ xiri/bejgħ lura u bejgħ/xiri lura li jinvolvu l-assi ta’ riżervi barranin tal-BĊE għandhom jiġu ddokumentati bl-użu tal-ftehimiet standard li ġejjin fl-edizzjoni jew verżjoni indikata, jew kwalunkwe edizzjoni jew verżjoni sussegwenti approvata mill-BĊE:

(a)

L-FBE Master Agreement for Financial Transactions (Edizzjoni tal-2004) għandu jintuża għal operazzjonijiet ma’ kontropartijiet organizzati jew inkorporati skont il-liġijiet ta’ kwalunkwe ġurisdizzjoni Ewropea u taħt il-liġijiet tal-Irlanda ta’ Fuq u l-Iskozja;

(b)

il-Bond Market Association Master Repurchase Agreement (verżjoni ta’ Settembru 1996) għandu jintuża għal operazzjonijiet ma’ kontropartijiet organizzati jew inkorporati skont il-liġijiet federali jew statali tal-Istati Uniti; u

(c)

it-TBMA/ISMA Global Master Repurchase Agreement (verżjoni tal-2000) għandu jintuża għal operazzjonijiet ma’ kontropartijiet organizzati jew inkorporati skont il-liġijiet ta’ kwalunkwe ġurisdizzjoni minbarra dawk elenkati fil-punti (a) jew (b).”;

(b)

il-paragrafu 3 huwa sostitwit b’dan li ġej:

“3.   Operazzjonijiet ta’ derivattivi barra mill-borża li jinvolvu l-assi ta’ riżervi barranin tal-BĊE għandhom jiġu ddokumentati bl-użu tal-ftehimiet standard li ġejjin fl-edizzjoni jew verżjoni indikata, jew kwalunkwe edizzjoni jew verżjoni sussegwenti approvata mill-BĊE:

(a)

l-FBE Master Agreement for Financial Transactions (Edizzjoni tal-2004) għandu jintuża għal operazzjonijiet ma’ kontropartijiet organizzati jew inkorporati skont il-liġijiet ta’ kwalunkwe ġurisdizzjoni Ewropea;

(b)

l-International Swaps and Derivatives Association Master Agreement tal-1992 (verżjoni b’diversi valuti, transkonfinali, skont il-liġi ta’ New York) għandu jintuża għal operazzjonijiet ma’ kontropartijiet organizzati jew inkorporati skont il-liġijiet federali jew statali tal-Istati Uniti; u

(c)

l-International Swaps and Derivatives Association Master Agreement tal-1992 (verżjoni b’diversi valuti, transkonfinali, skont il-liġi Ingliża) għandu jintuża għal operazzjonijiet ma’ kontropartijiet organizzati jew inkorporati skont il-liġijiet ta’ kwalunkwe ġurisdizzjoni minbarra dawk elenkati fil-punti (a) jew (b).”;

(c)

il-paragrafu 5 huwa ssostitwit b’dan li ġej:

“5.   Id-depożiti li jinvolvu assi ta’ riżervi barranin ma’ kontropartijiet li: (i) huma eliġibbli għall-operazzjonijiet imsemmija fil-paragrafi 2 u/jew 3 hawn fuq, u (ii) huma organizzati jew inkorporati taħt il-liġijiet ta’ kwalunkwe ġurisdizzjoni Ewropea, ħlief għall-Irlanda, għandhom jiġu ddokumentati bl-użu tal-FBE Master Agreement for Financial Transactions (Edizzjoni tal-2004 jew kwalunkwe edizzjoni sussegwenti tiegħu). F’każijiet li ma jaqgħux taħt il-punti (i) u (ii) hawn fuq, depożiti li jinvolvu l-assi ta’ riżervi barranin tal-BĊE għandhom jiġu ddokumentati bl-użu tal-ftehim prinċipali ta’ netting kif speċifikat fil-paragrafu 7.”;

(d)

il-paragrafu 7 huwa ssostitwit b’dan li ġej:

“7.   Għandu jiġi konkluż ftehim prinċipali ta’ netting mal-kontropartijiet kollha, ħlief għal kontropartijiet: (i) il magħhom il-BĊE jkun iffirma FBE Master Agreement for Financial Transactions (Edizzjoni tal-2004 jew kwalunkwe edizzjoni sussegwenti tiegħu); u (ii) li huma organizzati jew inkorporati taħt il-liġijiet ta’ kwalunkwe ġurisdizzjoni Ewropea, ħlief għall-Irlanda, skont kif ġej:

(a)

ftehim prinċipali ta’ netting irregolat bil-liġi Ingliża u abbozzat bl-Ingliż għandu jiġi konkluż mal-kontropartijiet kollha, bl-eċċezzjoni tal-kontropartijiet speċifikati fil-punti (b), (c) u (d);

(b)

ftehim prinċipali ta’ netting irregolat bil-liġi Franċiża u abbozzat bl-Ingliż għandu jiġi konkluż ma’ kontropartijiet inkorporati fi Franza; madankollu, dawn il-ftehimiet diġà fis-seħħ li huma abbozzati bil-Franċiż għandhom ikomplu jkunu validi u jistgħu jiġu ssostitwiti bi ftehim abbozzat bl-Ingliż f’data xierqa aktar tard;

(c)

ftehim prinċipali ta’ netting irregolat bil-liġi Ġermaniża u abbozzat bil-Ġermaniż għandu jiġi konkluż ma’ kontropartijiet inkorporati fil-Ġermanja; madankollu, dawn il-ftehimiet diġà fis-seħħ li huma abbozzati bil-Ġermaniż għandhom ikomplu jkunu validi u jistgħu jiġu ssostitwiti bi ftehim abbozzat bl-Ingliż f’data xierqa aktar tard; u

(d)

ftehim prinċipali ta’ netting irregolat bil-liġi ta’ New York u abbozzat bl-Ingliż għandu jiġi konkluż mal-kontropartijiet inkorporati fl-Istati Uniti.”;

2.

L-Annessi IIa, IIb, IIc u IId huma mħassra.

Artikolu 2

Dħul fis-seħħ

Din il-Linja Gwida tidħol fis-seħħ fil-jum tan-notifika tagħha lill-BĊNi taż-żona tal-euro.

Artikolu 3

Destinatarji

Din il-Linja Gwida hija indirizzata lill-BĊNi taż-żona tal-euro.

Magħmul fi Frankfurt am Main, it-8 ta’ Ottubru 2020.

Għall-Kunsill Governattiv tal-BĊE

Il-President tal-BĊE

Christine LAGARDE

(1)  Linja Gwida BĊE/2008/5 tal-20 ta’ Ġunju 2008 dwar l-immaniġġjar tal-assi barranin ta’ riżerva [assi barranin ta’ riżerva] tal-Bank Ċentrali Ewropew mill-banek ċentrali nazzjonali u d-dokumentazzjoni legali għall-operazzjonijiet li jinvolvu dawn l-assi (ĠU L 192, 19.7.2008, p. 63).

Top