16.12.2017   

MT

Il-Ġurnal Uffiċjali tal-Unjoni Ewropea

L 336/31

(1)

L-esperjenza miksuba mill-applikazzjoni tad-Deċiżjoni ta' Implimentazzjoni tal-Kummissjoni (UE) 2015/789 (2), b'mod partikolari mill-aħħar emenda tagħha bid-Deċiżjoni ta' Implimentazzjoni (UE) 2016/764 (3), uriet li hemm bżonn li jittieħdu bosta miżuri ulterjuri u li jenħtieġ li ċerti dispożizzjonijiet ta' dik id-Deċiżjoni jiġu adattati biex jiġi żgurat approċċ aktar effettiv kontra l-introduzzjoni u t-tixrid aktar mifrux fi ħdan l-Unjoni tal-Xylella fastidiosa (Wells et al.) (minn hawn 'il quddiem: “l-organiżmu speċifikat”).

(2)

Minkejja n-neċessità li jitwettqu stħarriġiet abbażi tal-livell tar-riskju evalwat fil-livell tal-Istati Membri, l-esperjenza wriet li jenħtieġ li l-istħarriġiet jitwettqu b'mod aktar bir-reqqa u armonizzat sabiex jiġi żgurat li l-Istati Membri kollha jilħqu l-istess livell ta' prekawzjoni kontra l-organiżmu speċifikat. Għal dik ir-raġuni, jenħtieġ li meta jitwettqu l-istħarriġiet, l-Istati Membri jqisu l-linji ta' gwida tekniċi rilevanti maħruġa mill-Kummissjoni.

(3)

Kif imsemmi fl-istandards internazzjonali, l-identifikazzjoni tal-organiżmu speċifikat tkun ippruvata bħala l-aktar affidabbli meta tkun ibbażata fuq tal-inqas żewġ testijiet differenti, abbażi ta' prinċipji bijoloġiċi differenti jew li jimmiraw partijiet differenti tal-ġenomu. Jenħtieġ li l-lista ta' dawk it-testijiet tkun disponibbli f'bażi tad-dejta tal-Kummissjoni li trid tkun pubblika biex tkun żgurata t-trasparenza. Billi l-identifikazzjoni tal-organiżmu speċifikat barra miż-żoni demarkati tirrikjedi livell differenti ta' sensittività tat-testijiet, jenħtieġ li jkun hemm testijiet speċifiċi għaż-żoni demarkati kif ukoll għaż-żoni għajr iż-żoni demarkati.

(4)

Għal raġunijiet ta' trasparenza, jenħtieġ li l-Istati Membri jippubblikaw il-pjanijiet ta' kontinġenza nazzjonali tagħhom fuq l-internet.

(5)

L-evidenza xjentifika msemmija mill-Awtorità Ewropea dwar is-Sigurtà fl-Ikel (EFSA), fl-Opinjoni Xjentifika ta' Jannar 2015 (4) tindika l-possibbiltà ta' rikombinazzjoni ġenetika bejn is-subspeċijiet differenti tal-organiżmu speċifikat misjub f'postijiet oħra tad-dinja, li taffettwa speċijiet ta' pjanti ġodda li qatt qabel ma nstabu infettati mis-subspeċijiet ikkonċernati. Għalhekk, sabiex jiġi żgurat approċċ aktar prekawzjonarju, u minħabba l-fatt li dan l-aħħar ġew irrappurtati subspeċijiet differenti fl-Unjoni, huwa importanti li jiġi ċċarat li fejn jinsabu aktar minn subspeċi waħda ta' organiżmu speċifikat f'żona, jenħtieġ li dik iż-żona tiġi demarkata fir-rigward tal-organiżmu speċifikat u tas-subspeċijiet possibbli kollha tiegħu. Barra minn hekk, meta l-identifikazzjoni tal-preżenza ta' subspeċi tkun għadha pendenti, jenħtieġ li l-Istat Membru kkonċernat, fuq bażi prekawzjonarja, jiddemarka wkoll dik iż-żona fir-rigward tal-organiżmu speċifikat u tas-subspeċijiet possibbli kollha tiegħu.

(6)

L-esperjenza wriet li, meta jitwettqu l-istħarriġiet fi ħdan iż-żoni ta' lqugħ, l-allokazzjoni tar-riżorsi għandha tingħata prijorità skont il-livell ta' riskju fitosanitarju. Għalhekk, fiż-żoni ta' lqugħ, ikun proporzjonat li jiġi stabbilit l-istħarriġ rispettiv ikun ibbażat fuq grilja maqsuma fi kwadri ta' 100 m × 100 m f'żona tal-wisa' ta' mill-inqas 1 km madwar iż-żona infettata, u grilja maqsuma fi kwadri ta' 1 km × 1 km fi ħdan il-bqija taż-żona ta' lqugħ.

(7)

Abbażi tal-esperjenzi attwali, u f'konformità mal-evidenza xjentifika irrappurtata mill-EFSA, it-tneħħija minnufih tal-pjanti ospitanti kollha, irrispettivament mill-istatus tas-saħħa tagħhom, li jinsabu f'raġġ ta' 100 m madwar il-pjanti infettati, iżżid il-prospetti ta' suċċess għall-qerda tal-organiżmu speċifikat. Meta mqabbla mal-miżuri ta' trażżin, meta t-tneħħija ta' pjanti tkun limitata biss għal dawk li nstabu li huma infettati u dan jekk jinsabu biss f'xi partijiet taż-żona demarkata, it-tneħħija tal-pjanti ospitanti kollha tipprovdi livell ogħla ta' garanzija vis-à-vis l-infezzjonijiet asintomatiċi u għalhekk l-istatus tal-organiżmu speċifikat fiż-żona. Għalhekk, huwa proporzjonat li jitnaqqas il-wisa' taż-żona ta' lqugħ madwar iż-żona infestata minn 10 km għal 5 km fil-każijiet kollha fejn iż-żona demarkata ġiet stabbilita bl-iskop tal-qerda. Madankollu, jenħtieġ li dak il-wisa' jibqa' 10 km fil-każ taż-żoni demarkati stabbiliti bl-iskop tat-trażżin, minħabba l-ħtieġa dovuta għall-preżenza aktar estiża tal-organiżmu speċifikat f'dawk iż-żoni demarkati, li jiġi adottat approċċ aktar prekawzjonarju.

(8)

Huwa wkoll proporzjonat li titnaqqas dik iż-żona ta' lqugħ sa 1 km, b'ċerti kundizzjonijiet li jiggarantixxu li ma jseħħx aktar tixrid tal-organiżmu speċifikat, kif ukoll it-tneħħija immedjata tal-pjanti infettati u l-monitoraġġ xieraq tas-sitwazzjoni. Bl-istess mod, huwa proporzjonat li tiġi awtorizzata t-tneħħija taż-żona demarkata, wara 12-il xahar mill-istabbiliment inizjali tagħha, fil-każ li tiġi adottata skema intensiva ta' teħid ta' kampjuni sabiex l-assenza minn dik iż-żona tal-organiżmu speċifikat tkun żgurata.

(9)

Bil-għan li jiżdiedu t-trasparenza u l-informazzjoni pubblika dwar il-miżuri meħuda kontra l-organiżmu speċifikat, jenħtieġ li l-Istati Membri jippubblikaw u jaġġornaw il-lista taż-żoni demarkati fit-territorju tagħhom, u li l-Kummissjoni tippubblika u taġġorna l-lista tagħha ta' dawk iż-żoni kif notifikati mill-Istati Membri.

(10)

L-esperjenza wriet li huwa proporzjonat li ż-żona demarkata ma tkunx stabbilita fejn instab l-organiżmu speċifikat f'sit bi protezzjoni fiżika ppruvata kontra l-vetturi ta' dak l-organiżmu. Dan l-approċċ huwa proporzjonat minħabba r-riskju baxx tat-tixrid tal-organiżmu speċifikat u minħabba l-possibbiltà ogħla li dak l-organiżmu jiġi eliminat minnufih bħala riżultat tal-ambjent ikkontrollat fejn tfaċċa.

(11)

Jenħtieġ li l-Istati Membri jkollhom l-għażla li jawtorizzaw it-tħawwil tal-pjanti ospitanti kollha jew xi wħud minnhom fi ħdan iż-żoni infettati taħt trażżin 'il barra miż-żona ta' 20 km maġenb iż-żona ta' lqugħ, bil-kundizzjonijiet rilevanti, sabiex tiġi ggarantita aktar flessibbiltà għall-Istat Membru rispettiv. Meta jagħmlu dan, jenħtieġ li jagħtu preferenza lil pjanti li jappartjenu għal varjetajiet ivvalutati bħala tolleranti jew reżistenti għall-organiżmu speċifikat, bil-għan li jitnaqqas il-livell ta' inokolu batteriku fiż-żoni rispettivi.

(12)

Sabiex jiġu rispettati t-tradizzjoni u l-istorja ta' lokalità partikolari, jenħtieġ li l-Istati Membri jkollhom l-għażla li jiddeċiedu li ma hemmx il-ħtieġa li jitneħħew il-pjanti ospitanti uffiċjalment ikklassifikati bħala pjanti ta' valur storiku jekk ma jkunux infettati mill-organiżmu speċifikat, anki jekk ikunu jinsabu fi ħdan raġġ ta' 100 m madwar il-pjanti li ġew ittestjati u nstab li huma infettati mill-organiżmu speċifikat. Madankollu, u sabiex jiġu evitati l-infezzjoni potenzjali tagħhom u t-tixrid tal-organiżmu speċifikat, jenħtieġ li dawn ikunu soġġetti għal kundizzjonijiet partikolari.

(13)

Sabiex jiġi żgurat li l-monitoraġġ tal-preżenza tal-organiżmu speċifikat f'żoni demarkati jseħħ fi żmien xieraq kif ukoll għall-iskop taċ-ċertezza legali, jenħtieġ li jiġi speċifikat li tali monitoraġġ u l-ispezzjonijiet tekniċi rispettivi jqisu l-linji gwida maħruġa mill-Kummissjoni.

(14)

Għal raġunijiet ta' ċarezza u ta' ċertezza legali, huwa xieraq li ż-żoni infettati fejn il-miżuri ta' trażżin jistgħu jiġu applikati jkunu limitati għal dawk iż-żoni elenkati fl-Anness tad-Deċiżjoni ta' Implimentazzjoni (UE) 2015/789.

(15)

Filwaqt li jitqiesu l-iżviluppi tal-organiżmu speċifikat fl-Unjoni u r-rikonoxximent ta' żoni ta' trażżin ukoll f'partijiet oħra tal-Unjoni, jenħtieġ li t-tneħħija tal-pjanti tapplika għaż-żona ta' trażżin kollha kemm hi fejn l-organiżmu speċifikat ikun instab li kien preżenti abbażi ta' stħarriġiet uffiċjali. Madankollu, sabiex ikun protett il-bqija tat-territorju tal-Unjoni, jenħtieġ li dawk l-istħarriġiet uffiċjali jsiru tal-inqas fil-prossimità ta' siti ta' produzzjoni awtorizzati għall-moviment tal-pjanti speċifikati 'l barra miż-żoni demarkati, qrib is-siti ta' pjanti b'valur kulturali, soċjali u xjentifiku, u f'żoni fi ħdan iż-żona infettata li tinsab 20 km 'il bogħod mill-konfini ta' dik iż-żona infettata. Madankollu, jenħtieġ li dan ir-rekwiżit ma japplikax fil-każ ta' gżejjer li jkunu kkostitwiti kompletament minn żoni ta' trażżin u li jinsabu aktar minn 10 km lejn l-eqreb l-art fit-territorju tal-Unjoni, minħabba li dawn il-gżejjer huma fi kwalunkwe każ iżolati fiżikament.

(16)

Minħabba r-riskju fitosanitarju baxx kif ivvalutat mill-EFSA f'Marzu 2016 (5), huwa xieraq li jkun awtorizzat il-moviment ta' pjanti speċifikati li jappartjenu għal varjetajiet ippruvati li mhumiex suxxettibbli għal subspeċi waħda jew aktar tal-organiżmu speċifikat, 'il barra miż-żoni demarkati mingħajr passaporti tal-pjanti mħejjija u maħruġa skont id-Direttiva tal-Kummissjoni 92/105/KEE (6).

(17)

Abbażi tal-kapaċità tat-tixrid tal-insetti vetturi, huwa xieraq u iktar proporzjonat li jiġi awtorizzat il-moviment ta' pjanti speċifikati mis-siti tal-produzzjoni mdawra minn żona b'wisa' ta' 100 metru li tkun ġiet soġġetta għal spezzjonijiet darbtejn fis-sena u fejn il-pjanti kollha li nstabu li għandhom is-sintomi, jew li kienu infettati mill-organiżmu speċifikat, tneħħew immedjatament. Għal raġunijiet ta' konsistenza, jenħtieġ li tapplika regola simili għas-siti tal-produzzjoni f'pajjiżi terzi fejn hija magħrufa l-preżenza tal-organiżmu speċifikat.

(18)

L-esperjenza wriet li s-siti tal-produzzjoni fejn jitkabbru l-pjanti ospitanti 'l barra miż-żoni demarkati, huma soġġetti għal spezzjonijiet annwali, u, fil-każ ta' sintomi, soġġetti għat-teħid ta' kampjuni u għall-ittestjar sabiex ikun żgurat livell għoli ta' fiduċja rigward l-assenza tal-organiżmu speċifikat. Għalhekk, u biex jiġi żgurat livell armonizzat ta' protezzjoni fl-Unjoni, jenħtieġ li jiġu adottati r-rekwiżiti rispettivi għal dawn is-siti.

(19)

Ġie ppruvat li l-ispeċijiet Coffea, Lavandula dentata L., Nerium oleander L., Olea europaea L., Polygala myrtifolia L., u Prunus dulcis (Mill.) D.A. Webb jiġu infettatti b'rata rikorrenti mill-organiżmu speċifikat u jagħtu lok b'mod faċli għat-tixrid tal-marda fl-Unjoni. Għalkemm l-attivitajiet tat-“trace-back” għadhom għaddejjin sabiex jikkonfermaw fuq il-bażi prekawzjonarja, is-sors tal-pjanti infettati misjuba fl-Unjoni, jenħtieġ li dawk il-pjanti speċifikati jitkabbru biss f'siti li huma soġġetti għal spezzjoni uffiċjali annwali, għat-teħid ta' kampjuni u għall-ittestjar sabiex l-assenza tal-organiżmu speċifikat tkun ikkonfermata. Minħabba li dawk il-pjanti huma aktar suxxettibbli mill-organiżmu speċifikat, jenħtieġ li l-preżenza ta' dak l-organiżmu tiġi identifikata fuq il-bażi ta' mill-inqas żewġ testijiet pożittivi, li minnhom mill-inqas wieħed jeħtieġ ikun test molekulari, kif elenkat fil-bażi tad-dejta rispettiva tal-Kummissjoni.

(20)

Jenħtieġ li japplika rekwiżit simili għall-pajjiżi terzi fejn l-organiżmu speċifikat għad mhuwiex magħruf li tfaċċa. Barra minn hekk, jenħtieġ li meta jiċċaqalqu dawk il-pjanti fl-Unjoni, l-operaturi professjonisti jżommu rekords għal mill-anqas tliet snin sabiex tkun żgurata t-traċċabbiltà u s-segwitu tal-ispezzjonijiet kif xieraq.

(21)

Id-Deċiżjoni ta' Implimentazzjoni (UE) 2015/789 tistabbilixxi dispożizzjonijiet stretti dwar il-moviment ta' ċerti speċijiet ta' pjanti (“pjanti ospitanti”) fl-Unjoni misjuba bħala infettati mill-iżolati Ewropej tal-organiżmu speċifikat. Dawk il-pjanti ospitanti huma soġġetti għal kundizzjonijiet stretti, anki jekk huma qatt ma tkabbru f'żona demarkata.

(22)

Fl-istess ħin, bid-Deċiżjoni ta' Implimentazzjoni tal-Kummissjoni (UE) 2017/167 (7), ingħatat awtorizzazzjoni temporanja lill-Belġju, lir-Repubblika Ċeka, lil Franza u lil Spanja, li tippermetti ċ-ċertifikazzjoni ta' pjanti omm prebażiċi u ta' materjal prebażiku ta' speċijiet speċifiċi ta' pjanti tal-frott imsemmija fl-Anness I tad-Direttiva tal-Kunsill 2008/90/KE (8), u li jkunu prodotti f'għalqa f'kundizzjonijiet fejn ma jkunux protetti mill-insetti. Bosta minn dawk is-speċijiet, partikolarment Juglans regia L., Olea europaea L., Prunus amygdalus Batsch, P. amygdalus × P. persica, P. armeniaca L., P. avium (L.) L., P. cerasus L., P. domestica L., P. domestica × P. salicina, P. dulcis (Mill.) D.A. Webb, P. persica (L.) Batsch, u P. salicina Lindley huma magħrufin li huma suxxettibbli għall-iżolati Ewropej u mhux Ewropej tal-organiżmu speċifikat elenkati bħala “pjanti speċifikati” fl-Anness I tad-Deċiżjoni ta' Implimentazzjoni (UE) 2015/789.

(23)

Minħabba t-theddid emerġenti mill-organiżmu speċifikat għat-territorju tal-Unjoni, l-awtorizzazzjoni għaċ-ċertifikazzjoni ta' dawk il-pjanti omm prebażiċi u l-materjal prebażiku, li jidderoga mill-kundizzjoni tat-tkabbir fejn ma jkunx protett mill-insetti, jenħtieġ li tiġi kkomplementata minn garanziji fitosanitarji alternattivi, anki jekk il-pjanti ma jinsabux f'żona demarkata skont id-Deċiżjoni ta' Implimentazzjoni (UE) 2015/789.

(24)

Għalhekk, jenħtieġ li dawk il-pjanti omm prebażiċi u l-materjal prebażiku li huma soġġetti għad-Deċiżjoni ta' Implimentazzjoni (UE) 2017/167 jiċċaqalqu biss fit-territorju tal-Unjoni jekk ikunu akkumpanjati minn passaport tal-pjanti. L-għan hu li jiġi ggarantit li dawk il-pjanti omm prebażiċi u l-materjal prebażiku, kif ukoll il-materjal ta' propagazzjoni u l-pjanti tal-frott prodotti, ikunu ħielsa mill-organiżmu speċifikat. Barra minn hekk, jenħtieġ li l-pjanti omm prebażiċi u l-materjal prebażiku kkonċernati jkunu soġġetti għal spezzjoni viżwali, għat-teħid ta' kampjuni u għall-ittestjar molekulari sabiex tiġi żgurata l-assenza tal-organiżmu speċifikat, filwaqt li jiġi ppreservat l-istatus tas-saħħa ta' dawk il-pjanti u dak il-materjal matul il-proċess ta' propagazzjoni.

(25)

Fl-aħħar nett, jenħtieġ li l-ispeċijiet kollha tal-pjanti li mill-aħħar emenda tad-Deċiżjoni ta' Implimentazzjoni (UE) 2015/789 ġew identifikati mill-Kummissjoni bħala pjanti speċifikati, jiġu inklużi fl-Anness I ta' dik id-Deċiżjoni.

(26)

Għalhekk, jenħtieġ li d-Deċiżjoni ta' Implimentazzjoni (UE) 2015/789 tiġi emendata skont dan.

(27)

Sabiex l-operaturi professjonisti u l-korpi uffiċjali responsabbli jkunu jistgħu jadattaw għar-rekwiżiti dwar il-moviment tal-pjanti għat-tħawwil, għajr iż-żrieragħ, tal-ispeċijiet Coffea, Lavandula dentata L., Nerium oleander L., Olea europaea L., Polygala myrtifolia L., u Prunus dulcis (Mill.) D.A. Webb, jenħtieġ li d-dispożizzjoni rispettiva tapplika mill-1 ta' Marzu 2018.

(28)

Il-miżuri previsti f'din id-Deċiżjoni huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

L-Artikolu 3 huwa sostitwit b'dan li ġej:

“Artikolu 3

Stħarriġiet dwar l-organiżmu speċifikat fit-territorji tal-Istati Membri u l-identifikazzjoni

1.   L-Istati Membri għandhom iwettqu stħarriġiet annwali għall-preżenza tal-organiżmu speċifikat fit-territorju tagħhom fuq il-pjanti speċifikati.

Dawk l-istħarriġiet għandhom jitwettqu mill-korp uffiċjali responsabbli, jew taħt is-superviżjoni uffiċjali tal-korp uffiċjali responsabbli. Għandhom jikkonsistu minn eżamijiet viżivi u, fil-każ ta' xi suspett ta' infezzjoni mill-organiżmu speċifikat, minn ġbir ta' kampjuni u ttestjar. Dawk l-istħarriġiet għandhom ikunu bbażati fuq prinċipji xjentifiċi u tekniċi tajbin, u għandhom jitwettqu fi żminijiet xierqa matul is-sena fir-rigward tal-possibbiltà li jinstab l-organiżmu speċifikat permezz ta' spezzjoni viżwali, ta' teħid ta' kampjuni u ta' ttestjar. Dawk l-istħarriġiet għandhom iqisu l-evidenza xjentifika u teknika disponibbli, il-bijoloġija tal-organiżmu speċifikat u tal-vetturi tiegħu, il-preżenza u l-bijoloġija tal-pjanti speċifikati, u kwalunkwe tagħrif ieħor xieraq, dwar il-preżenza tal-organiżmu speċifikat. Huma għandhom iqisu wkoll il-linji gwida tekniċi għall-istħarriġ tal-Xylella fastidiosa pprovduta fuq is-sit web tal-Kummissjoni (*1).

2.   Il-preżenza tal-organiżmu speċifikat f'żoni għajr iż-żoni demarkati, għandha tiġi skrinjata permezz ta' test molekulari wieħed, u fil-każ ta' riżultati pożittivi, il-preżenza tiegħu għandha tiġi identifikata billi jitwettaq, f'konformità mal-istandards internazzjonali, mill-inqas test molekulari pożittiv ieħor. Dawk it-testijiet għandhom jiġu elenkati fil-bażi tad-dejta tal-Kummissjoni ta' testijiet għall-identifikazzjoni tal-organiżmu speċifikat u s-subspeċijiet tiegħu u għandhom jimmiraw il-partijiet differenti tal-ġenomu.

Il-preżenza tal-organiżmu speċifikat f'żoni demarkati, għandha tiġi skrinjata permezz ta' test molekulari wieħed, u fil-każ ta' riżultati pożittivi, il-preżenza tiegħu għandha tiġi identifikata billi jitwettaq, f'konformità mal-istandards internazzjonali, mill-inqas test molekulari pożittiv wieħed. Dawk it-testijiet għandhom jiġu elenkati fil-bażi tad-dejta tal-Kummissjoni ta' testijiet għall-identifikazzjoni tal-organiżmu speċifikat u s-subspeċijiet tiegħu.

3.   Il-Kummissjoni għandha tmexxi u taġġorna l-bażi tad-dejta msemmija fil-paragrafu 2 u għandha tipprovdi l-aċċess pubbliku għalih.

It-testijiet elenkati f'dik il-bażi tad-dejta għandhom jinqasmu f'żewġ kategoriji, skont l-adegwatezza tagħhom għall-identifikazzjoni tal-organiżmu speċifikat u s-subspeċijiet tiegħu fiż-żoni demarkati u f'żoni għajr iż-żoni demarkati.

(*1)  “Guidelines for the survey of Xylella fastidiosa (Wells et al.) in the Union territory” http://ec.europa.eu/food/sites/food/files/plant/docs/ph_biosec_legis_guidelines_xylella-survey.pdf”"

(2)

Fl-Artikolu 3a, il-paragrafu 4 huwa sostitwit b'dan li ġej:

“4.   Wara talba, l-Istati Membri għandhom jikkomunikaw il-pjanijiet ta' kontinġenza tagħhom lill-Kummissjoni u għandhom jgħarrfu lill-operaturi professjonisti rilevanti kollha billi jippubblikawhom fuq l-internet.”

(3)

L-Artikolu 4 huwa emendat kif ġej:

(4)

Fl-Artikolu 5 il-paragrafu 2 huwa sostitwit b'dan li ġej:

“2.   B'deroga mill-paragrafu 1, l-Istati Membri kkonċernati jistgħu jagħtu l-awtorizzazzjonijiet għat-tħawwil tal-pjanti ospitanti fi ħdan iż-żoni infettati elenkati fl-Anness II fejn il-miżuri ta' trażżin skont l-Artikolu 7 jiġu applikati, ħlief fiż-żona ta' 20 km msemmija fl-Artikolu 7(7)(c). Meta jingħataw dawk l-awtorizzazzjonijiet, l-Istat Membru kkonċernat għandu jagħti preferenza lill-pjanti ospitanti li jappartjenu għall-varjetajiet ivvalutati bħala reżistenti jew tolleranti għall-organiżmu speċifikat.”

(5)

L-Artikolu 6 huwa emendat kif ġej:

(6)

L-Artikolu 7 huwa emendat kif ġej:

(7)

L-Artikolu 9 huwa emendat kif ġej:

(8)

L-Artikolu 10 huwa emendat kif ġej:

(9)

Fl-Artikolu 16, jiżdied it-tieni subparagrafu li ġej:

“Il-pjanti għat-tħawwil, għajr iż-żrieragħ, tal-ispeċijiet Coffea, Lavandula dentata L., Nerium oleander L., Olea europaea L., Polygala myrtifolia L., u Prunus dulcis (Mill.) D.A. Webb għandhom jiddaħħlu fl-Unjoni biss jekk ikunu tkabbru f'sit li huwa soġġett għal spezzjoni uffiċjali annwali, bit-teħid ta' kampjuni u l-ittestjar li jitwettqu fiż-żminijiet xierqa fuq dawk il-pjanti għall-preżenza tal-organiżmu speċifikat u f'konformità mal-istandards internazzjonali, li jikkonfermaw l-assenza tal-organiżmu speċifikat, bl-użu ta' skema ta' teħid ta' kampjuni li tista' tidentifika b'affidabbiltà ta' 99 %, il-livell ta' preżenza ta' pjanti infettati ta' 5 %, u li timmira l-pjanti sintomatiċi, kif ukoll il-pjanti asintomatiċi fil-prossimità ta' dawk sintomatiċi.”

(10)

Fl-Artikolu 17(4), il-punti (c), (d) u (e) huma sostitwiti b'dan li ġej:

(11)

L-Anness I huwa emendat skont l-Anness I ta' din id-Deċiżjoni.

(12)

L-Anness II huwa sostitwit bit-test stabbilit fl-Anness II ta' din id-Deċiżjoni.

(13)

Jiżdied l-Anness III, li t-test tiegħu jinsab fl-Anness III ta' din id-Deċiżjoni.