1.5.2013   

MT

Il-Ġurnal Uffiċjali tal-Unjoni Ewropea

L 120/4

(1)

L-esperjenza li nkisbet mill-monitoraġġ tal-emissjonijiet tas-CO2 mill-karozzi l-ġodda tal-passiġġieri fl-2010 u fl-2011 uriet li l-kalkoku preċiż tal-emissjonijiet speċifiċi medji u tal-miri tal-emissjonijiet speċifiċi jista’ jsir biss abbażi tad-dejta ddettaljata msemmija fl-Artikolu 8(1) tar-Regolament (KE) Nru 443/2009. Għalhekk huwa xieraq li d-dejta aggregata speċifikata fl-ewwel tabella mogħtija fil-Parti C tal-Anness II tar-Regolament (KE) Nru 443/2009 tiġi aġġustata biex tkun tinkludi biss dik id-dejta li hija strettament meħtieġa għall-implimentazzjoni ta’ dak ir-Regolament.

(2)

Madankollu, sabiex jittejbu l-kwalità u l-preċiżjoni tal-monitoraġġ tal-emissjonijiet tas-CO2 mill-karozzi tal-passiġġieri, jeħtieġ li jiġu speċifikati iktar uħud mill-parametri tad-dejta meħtieġa u li jiżdiedu parametri oħrajn li s’issa kienu qed jiġu mmonitorjati fuq bażi volontarja.

(3)

L-inklużjoni tan-numru tal-approvazzjoni tat-tip bħala parametru tad-dejta li għandu jiġi mmonitorjat u rrappurtat jista’ jtejjeb il-mod kif il-manifatturi jivverifikaw il-kalkoli provviżorji tal-emissjonijiet speċifiċi medji tagħhom u tal-miri tal-emissjonijiet speċifiċi tagħhom u, b’hekk, jiżgura iktar preċiżjoni fis-sett tad-dejta finali.

(4)

Il-karozzi tal-passiġġieri li għandhom approvazzjoni tat-tip nazzjonali ta’ serje żgħira skont l-Artikolu 23 tad-Direttiva 2007/46/KE tal-Parlament Ewropew u tal-Kunsill tal-5 ta’ Settembru 2007 li tistabbilixxi kwadru għall-approvazzjoni ta’ vetturi bil-mutur u l-karrijiet tagħhom, u ta’ sistemi, komponenti u unitajiet tekniċi separati maħsuba għal tali vetturi (Direttiva Kwadru) (2) jew il-karozzi li għandhom approvazzjoni individwali skont l-Artikolu 24 tal-istess Direttiva ma jitqisux għall-kalkolu tal-emissjonijiet speċifiċi medji ta’ manifattur. Madankollu, huwa importanti li l-għadd ta’ dawk il-vetturi jiġi mmonitorjat b’mod konsistenti sabiex jiġi vvalutat kwalunkwe impatt potenzjali li jista’ jkun hemm fuq il-proċess tal-monitoraġġ u fuq il-kisba tal-mira tal-Unjoni Ewropea għall-emissjonijiet medji tas-CO2. Għalhekk, kull sena għandu jingħata l-għadd totali ta’ dawk ir-reġistrazzjonijiet.

(5)

Għandu jiġi żgurat ukoll li l-monitoraġġ tal-emissjonijiet tas-CO2 mill-karozzi tal-passiġġieri jiġi allinjat mal-monitoraġġ għall-karozzi kummerċjali ħfief skont ir-Regolament (UE) Nru 510/2011 tal-Parlament Ewropew u tal-Kunsill tal-11 ta’ Mejju 2011 li jistabbilixxi standards ta’ rendiment fir-rigward tal-emissjonijiet tal-vetturi kummerċjali ħfief ġodda bħala parti mill-approċċ integrat tal-Unjoni biex jitnaqqsu l-emissjonijiet tas-CO2 minn vetturi ħfief (3), billi l-kapaċità tal-magna u l-konsum tal-enerġija elettrika jiġu inklużi bħala parametri obbligatorji tal-monitoraġġ, minbarra n-numru tal-approvazzjoni tat-tip. Barra minn hekk, meta ċ-ċertifikat tal-konformità ma jintużax bħala s-sors tad-dejta primarja, u d-dejta tittieħed, fost l-oħrajn, mid-dokumenti tal-approvazzjoni tat-tip, għandu jiġi ċċarat il-fatt li, f’dawk il-każijiet, id-dejta trid tkun konsistenti mad-dejta mogħtija fiċ-ċertifikati tal-konformità.

(6)

Sabiex ikun żgurat li dawk l-emendi jkunu jistgħu jitqiesu għall-monitoraġġ tad-dejta fl-2013, huwa xieraq li d-dħul fis-seħħ ta’ dan l-att jiġi previst għal jum li ma jkunx iktar tard mis-seba’ jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

(7)

Għalhekk, ir-Regolament (KE) Nru 443/2009 għandu jiġi emendat kif xieraq.

(8)

Il-miżuri previsti f’dan ir-Regolament huma skont l-opinjoni tal-Kumitat dwar it-Tibdil fil-Klima,