32010D0481

EUR-Lex

Access to European Union law

This document is an excerpt from the EUR-Lex website

EUROPA
EUR-Lex home
Deċiżjoni - 2010/481 - EN - EUR-Lex

Help

Search tips

Need more search options? Use the Advanced search

Document 32010D0481

2010/481/UE, Euratom: Deċiżjoni tal-Kummissjoni tad- 29 ta’ Lulju 2010 li temenda d-Deċiżjoni 2004/277/KE, Euratom rigward ir-regoli għall-implimentazzjoni tad-Deċiżjoni tal-Kunsill 2007/779/KE, Euratom li tistabbilixxi mekkaniżmu Komunitarju ta’ protezzjoni ċivili (notifikata bid-dokument numru C(2010) 5090) Test b’relevanza għaż-ŻEE

ĠU L 236, 7.9.2010, p. 5–17 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

(HR)
⏵Dan id-dokument ġie ppubblikat f’edizzjoni(jiet) speċjali (HR)
Edizzjoni speċjali bil-Kroat: Kapitolu 15 Volum 023 P. 73 - 85

Legal status of the document No longer in force, Date of end of validity: 16/10/2014; Impliċitament imħassar minn 32014D0762

ELI: http://data.europa.eu/eli/dec/2010/481/oj

HTML

PDF

Official Journal

7.9.2010

Il-Ġurnal Uffiċjali tal-Unjoni Ewropea

L 236/5

DEĊIŻJONI TAL-KUMMISSJONI

tad-29 ta’ Lulju 2010

li temenda d-Deċiżjoni 2004/277/KE, Euratom rigward ir-regoli għall-implimentazzjoni tad-Deċiżjoni tal-Kunsill 2007/779/KE, Euratom li tistabbilixxi mekkaniżmu Komunitarju ta’ protezzjoni ċivili

(notifikata bid-dokument numru C(2010) 5090)

(Test b’relevanza għaż-ŻEE)

(2010/481/UE, Euratom)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat it-Trattat li jistabbilixxi l-Komunità Ewropea għall-Enerġija Atomika,

Wara li kkunsidrat id-Deċiżjoni tal-Kunsill 2007/779/KE, Euratom tat-8 ta’ Novembru 2007 li tistabbilixxi Mekkaniżmu Komunitarju ta’ Protezzjoni Ċivili (1), u partikolarment l-Artikolu 12 tagħha,

Billi:

(1)

Id-Deċiżjoni tal-Kummissjoni 2004/277/KE, Euratom tad-29 ta’ Diċembru 2003 li tistabbilixxi r-regoli għall-implimentazzjoni tad-Deċiżjoni tal-Kunsill 2001/792/KE, Euratom li tistabbilixxi mekkaniżmu Komunitarju li jiffaċilita l-kooperazzjoni msaħħa fl-interventi ta’ assistenza fil-protezzjoni ċivili (2) ġiet emendata mid-Deċiżjoni tal-Kummissjoni 2008/73/KE, Euratom (3) biex tinkorpora regoli ta’ implimentazzjoni dwar il-protezzjoni ċivili Ewropea. Dawn ir-regoli jkopru l-karatteristiċi ewlenin tal-moduli tal-protezzjoni ċivili bħall-ħidmiet, il-kapaċitajiet u il-komponenti tagħhom, u l-ħin biex jiġu operattivi, u jiddefenixxu l-livell xieraq tal-awtosuffiċjenza u l-interoperabbiltà tagħhom.

(2)

Il-moduli tal-protezzjoni ċivili magħmula minn riżorsi nazzjonali minn Stat Membru wieħed jew aktar, fuq bażi volontarja, jikkostitwixxu kontribut għall-kapaċità ta’ rispons rapidu tal-protezzjoni ċivili mitlub mill-Kunsill Ewropew fil-Konklużjonijiet tal-laqgħa tiegħu tas-16 u 17 ta’ Ġunju 2005 u mill-Parlament Ewropew fir-Riżoluzzjoni tiegħu tat-13 ta’ Jannar 2005 dwar id-diżastru tat-tsunami. Biex il-moduli tal-protezzjoni ċivili jkunu f’pożizzjoni jikkontribwixxu għar-rispons għal emerġenzi ewlenin, il-karatteristiċi ewlenin tagħhom għandhom jissodisfaw ċerti rekwiżiti ġenerali.

(3)

Il-moduli tal-protezzjoni ċivili għandhom ikunu kapaċi jiffunzjonaw b’mod awtosuffiċjenti għal perjodu partikolari ta’ żmien. Għalhekk huwa neċessarju li jiġu ddefiniti r-rekwiżiti ġenerali għall-awtosuffiċjenza u, fejn xieraq, ir-rekwiżiti speċifiċi li jistgħu jvarjaw fil-funzjoni skont it-tip ta’ intervent jew it-tip ta’ modulu kkonċernat. Għandha tiġi kkunsidrata l-prassi komuni tal-Istati Membri u l-organizzazzjonijiet internazzjonali bħal perjodi estiżi ta’ awtosuffiċjenza għal moduli ta’ tiftix u salvataġġ urban jew għall-qsim ta’ kompiti bejn il-pajjiż li qed joffri u dak li qed jitlob l-appoġġ fl-operazzjoni ta’ moduli li għandhom element tal-ajru.

(4)	Huma meħtieġa miżuri fil-livell tal-Unjoni u tal-istati parteċipanti sabiex tittejjeb l-interoperabbiltà tal-moduli tal-protezzjoni ċivili, notevolment fir-rigward tat-taħriġ u l-eżerċizzji.

(5)

Operazzjonijiet u eżerċizzji bi tnedija ta’ moduli riċenti tal-protezzjoni ċivili wrew il-bżonn li jinbidlu parzjalment il-kundizzjonijiet ġenerali taż-żewġ moduli elenkati fl-Anness II tad-Deċiżjoni 2008/73/KE, Euratom, jiġifieri il-moduli “Tifi tan-nar fil-foresti mill-ajru bl-użu ta’ ajruplani” u “Sptar fuq il-post”.

(6)

L-operazzjonijiet riċenti tal-protezzjoni ċivili taw prova tal-bżonn li jiżdiedu u jiġu implimentati erba’ tipi ta’ moduli ġodda tal-protezzjoni ċivili biex tiġi rinfurzata l-kapaċità ta’ rispons rapidu tal-protezzjoni ċivili, jiġifieri l-moduli “Tifi tan-nar mill-art fil-foresti”, “Tifi tan-nar fil-foresti mill-art bl-użu tal-vetturi”, “Kontroll tal-għargħar” u “Salvataġġ mill-għargħar bl-użu tad-dgħajjes”.

(7)	Id-Deċiżjoni 2004/277/KE, Euratom għandha għalhekk tiġi emendata skont dan.

(8)	L-emendi u ż-żieda ta’ dawk il-moduli provduti fl-Anness għal din id-Deċiżjoni huma skont il-fehma tal-Kumitat tal-Protezzjoni Ċivili,

ADOTTAT DIN ID-DEĊIŻJONI:

Artikolu 1

L-Anness II għad-Deċiżjoni 2004/277/KE, Euratom hija mibdula bl-Anness għal din id-Deċiżjoni.

Artikolu 2

Din id-Deċiżjoni hija indirizzata lill-Istati Membri.

Magħmul fi Brussell, id-29 ta’ Lulju 2010.

Għall-Kummissjoni

Kristalina GEORGIEVA

Membru tal-Kummissjoni

(1) ĠU L 314, 1.12.2007, p. 9.

(2) ĠU L 87, 25.3.2004, p. 20.

(3) ĠU L 20, 24.1.2008, p. 23.

ANNESS

“ANNESS II

Kundizzjonijiet ġenerali għall-moduli Ewropej tal-protezzjoni ċivili (1)

1. Ippumpjar b’kapaċità qawwija

Kompiti

—

Forniment ta’ ppumpjar:

—	f’żoni mgħarrqa,

—	biex jiġi assistit it-tifi tan-nar bit-twassil tal-ilma.

Kapaċitajiet

—

Forniment ta’ ppumpjar b’mezz mobbli u pompi b’kapaċità qawwija:

—	b’kapaċità totali tal-anqas 1 000 m3/siegħa u;

—	b’kapaċità mnaqqsa ta’ ppumpjar għal differenza ta’ 40 metru fl-għoli.

—

Ħila biex:

—	jiffunzjona f’żoni u art li mhumiex faċilment aċċessibbli,

—	jippompja ilma bit-tajn, li fih mhux aktar minn 5 fil-mija ta’ elementi solidi li l-qies tal-biċċiet taghom ikun sa 40 mm,

—	jippompja ilma sa 40 grad °C għal operazzjonijiet itwal,

—	iwassal l-ilma fuq distanza ta’ 1 000 metru.

Elementi prinċipali

—	Pompi b’kapaċità medja u qawwija.

—	Manek u rbit tal-pajpijiet kompatibbli ma’ standards differenti, inkluż l-istandard Storz.

—	Biżżejjed persunal biex jaqdi l-kompitu, fejn meħtieġ, fuq bażi kontinwa.

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq f’massimu ta’ 12-il siegħa wara l-aċċettazzjoni tal-offerta.

—	Ħila li jintuża għal perjodu ta’ 21 jum.

2. Purifikazzjoni tal-ilma

Kompiti

—	Forniment ta’ ilma għax-xorb, minn sorsi ta’ ilma tal-wiċċ, skont l-istandards applikabbli u tal-anqas skont il-livell tal-istandards tal-WHO.

—	Jitwettaq kontroll tal-kwalità tal-ilma mill-punt tas-sors tat-tagħmir tal-purifikazzjoni.

Kapaċitajiet

—	Purifikazzjoni ta’ 225 000 litru ilma kuljum.

—	Kapaċità ta’ ħżin ekwivalenti għall-produzzjoni ta’nofs jum.

Elementi prinċipali

—	Faċilità mobbli tal-purifikazzjoni tal-ilma.

—	Faċilità mobbli tal-ħżin tal-ilma.

—	Laboratorju mobbli tal-post.

—	Irbit tal-pajpijiet kompatibbli ma’ standards differenti, inkluż l-istandard Storz.

—	Biżżejjed persunal biex iwettaq il-kompitu, fejn meħtieġ, fuq bażi kontinwa.

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq f’massimu ta’ 12-il siegħa wara l-aċċettazzjoni tal-offerta.

—	Ħila li jintuża għal perjodu ta’ 12-il ġimgħa.

3. Tiftix u salvataġġ medji urbani

Kompiti

—	Tiftix, lokalizzar u salvataġġ tal-vittmi (2) lokalizzati taħt it-terrapien (bħal bini mġarraf u inċidenti tat-trasport).

—	Forniment tal-ewwel għajnuna ta’ salvataġġ tal-ħajja, sakemm isir it-trasferiment għal aktar kura.

Kapaċitajiet

—

Il-modulu għandu jkollu l-ħila jwettaq li ġej, filwaqt li jqis il-linji gwida rikonoxxuti internazzjonali, bħal-linji gwida tal-Grupp Internazzjonali għall-Pariri dwar it-Tiftix u s-Salvataġġ (INSARAG):

—	tiftix bil-klieb tat-tiftix u/jew tagħmir tekniku tat-tfittix,

—	salvataġġ, inkluż irfigħ,

—	qtugħ ta’ konkos,

—	irbit tekniku bil-ħbula,

—	irfid bażiku,

—	detezzjoni u iżolament ta’ hazmat (3),

—	għajnuna avvanzata ta’ salvataġġ tal-ħajja (4).

—	Ħila li jiffunzjona fuq sit wieħed 24 siegħa kull jum għal 7 ijiem.

Elementi prinċipali

—	Ġestjoni (kmand, kooperazzjoni/koordinazzjoni, ippjanar, midja/rappurtaġġ, valutazzjoni/analiżi, sikurezza/sigurtà).

—	Tiftix (tiftix tekniku u/jew tiftix bil-klieb, detezzjoni ta’ hazmat, iżolament ta’ hazmat).

—	Salvataġġ (tkissir u ksur, qtugħ, irfigħ u ċaqliq, irfid, irbit tekniku bil-ħbula).

—	Mediku, inkluż kura tal-pazjienti u tal-persunal tal-iskwadra u l-klieb tat-tfittxija.

Awtosuffiċjenza

—	Tal-anqas 7 ijiem ta’ operazzjonijiet.

—	Japplikaw l-elementi (a) sa (i) tal-Artikolu 3b(1).

Użu

—	Operattiv fi żmien 32 siegħa fil-pajjiż milqut.

4. Tiftix u salvataġġ urban intensiv

Kompiti

—	Tiftix, lokalizzar u salvataġġ tal-vittmi (5) lokalizzati taħt it-terrapien (bħal bini mġarraf u inċidenti tat-trasport).

—	Forniment tal-ewwel għajnuna ta’ salvataġġ tal-ħajja, sakemm isir it-trasferiment għal aktar kura.

Kapaċitajiet

—

Il-modulu għandu jkollu l-ħila jwettaq li ġej, filwaqt li jqis il-linji gwida rikonoxxuti internazzjonali, bħal-linji gwida INSARAG:

—	tiftix bil-klieb tat-tiftix u tagħmir tekniku tat-tfittix,

—	salvataġġ, inkluż irfigħ tqil,

—	qtugħ tal-konkos rinfurzat u strutturi tal-ħadid,

—	irbit tekniku bil-ħbula,

—	irfid avvanzat,

—	detezzjoni u iżolament ta’ hazmat (6),

—	għajnuna avvanzata ta’ salvataġġ tal-ħajja (7).

—	Ħila li jiffunzjona fuq aktar minn sit wieħed 24 siegħa kuljum għal 10 ijiem.

Elementi prinċipali

—	Ġestjoni (kmand, kooperazzjoni/koordinazzjoni, ippjanar, midja/rappurtaġġ, valutazzjoni/analiżi, sikurezza/sigurtà).

—	Tiftix (tiftix tekniku, tiftix bil-klieb, detezzjoni ta’ hazmat, iżolament ta’ hazmat).

—	Salvataġġ (tkissir u ksur, qtugħ, irfigħ u ċaqliq, irfid, irbit tekniku bil-ħbula).

—	Mediku, inkluż kura tal-pazjienti u tal-persunal tal-iskwadra u l-klieb tat-tfittxija. (8).

Awtosuffiċjenza

—	Tal-anqas 10 ijiem ta’ operazzjoni.

—	Japplikaw l-elementi (a) sa (i) tal-Artikolu 3b(1).

Użu

—	Operattiv fi żmien 48 siegħa fil-pajjiż milqut.

5. Modulu tat-tifi tan-nar fil-foresti mill-ajru bl-użu ta’ ħelikopters

Kompiti

—	Jgħin fit-tifi ta’ nirien kbar f’foresti jew veġetazzjonijiet permezz ta’ tifi tan-nar mill-ajru.

Kapaċitajiet

—	Tliet ħelikopters b’kapaċità ta’ 1 000 litru kull wieħed.

—	Ħila biex jitwettqu operazzjonijiet kontinwi.

Elementi prinċipali

—	Tliet ħelikopters bl-ekwipaġġ, biex jiġi ggarantit li tal-anqas żewġ ħelikopters huma operattivi fi kwalunkwe ħin.

—	Persunal tekniku.

—	4 bramel tal-ilma jew 3 kits tar-rilaxx.

—	Sett tal-manutenzjoni.

—	Sett ta’ spare parts.

—	Żewġ winċijiet għas-salvataġġ.

—	Tagħmir tal-komunikazzjoni:

Awtosuffiċjenza

—	Japplikaw l-elementi (f) u (g) tal-Artikolu 3b(1).

Użu

—	Disponibbiltà għat-tluq f’massimu ta’ 3 sigħat wara l-aċċettazzjoni tal-offerta.

6. Modulu tat-tifi tan-nar fil-foresti mill-ajru bl-użu tal-ajruplani

Kompiti

—	Jgħin fit-tifi ta’ nirien kbar f’foresti jew veġetazzjonijiet permezz ta’ tifi tan-nar mill-ajru.

Kapaċitajiet

—	Żewġ ajruplani b’kapaċità ta’ 3 000 litru kull wieħed.

—	Ħila biex jitwettqu operazzjonijiet kontinwi.

Elementi prinċipali

—	Żewġ ajruplani.

—	Minimu ta’ erba’ gruppi ta’ persunal.

—	Persunal tekniku.

—	Apparat għall-manutenzjoni fuq il-post.

—	Tagħmir tal-komunikazzjoni.

Awtosuffiċjenza

—	Japplikaw l-elementi (f) u (g) tal-Artikolu 3b(1).

Użu

—	Disponibbiltà għat-tluq f’massimu ta’ 3 sigħat wara l-aċċettazzjoni tal-offerta.

7. Kariga medika avvanzata

Kompiti

—	Jagħmel il-profil (bil-livell tal-gravità tal-ġrieħi) tal-pazjenti fuq is-sit tad-diżastru.

—	Jistabbilizza l-kundizzjoni tal-pazjent u jħejjih għat-trasport lejn l-aktar faċilità tas-saħħa adegwata għat-trattament aħħari.

Kapaċitajiet

—	Iwettaq analiżi tal-gravità tal-ġrieħi għal tal-anqas 20 pazjent fis-siegħa.

—	Skwadra medika kapaċi tistabbilizza 50 pazjent kull 24 siegħa ta’ attività, li topera fuq żewġ xiftijiet.

—	Disponibbiltà ta’ provvisti għat-trattament ta’ 100 pazjent bi ġrieħi minuri kull 24 siegħa.

Elementi prinċipali

—

Skwadra medika kull xift ta’ 12-il siegħa:

—	analiżi tal-gravità tal-ġrieħi: infermier u/jew tabib,

—	kura intensiva: tabib u infermier,

—	ġrieħi gravi, imma mhux periklu tal-mewt: tabib u 2 infermiera,

—	evakwazzjoni: infermier,

—	persunal speċjalizzat ta’ appoġġ: 4.

—

Tined:

—	tinda/tined b’żoni interkonnessi għall-analiżi tal-gravità tal-ġrieħi, il-kura medika u l-evakwazzjoni,

—	tinda/tined għall-persunal.

—	Post ta’ kontroll.

—	Depożitu ta’ provvista loġistika u medika.

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq f’massimu ta’ 12-il siegħa wara l-aċċettazzjoni tal-offerta.

—	Operattiv siegħa wara l-wasla fuq il-post.

8. Kariga medika avvanzata bil-kirurġija

Kompiti

—	Jagħmel il-profil (bil-livell tal-gravità tal-ġrieħi) tal-pazjenti fuq is-sit tad-diżastru.

—	Iwettaq kirurġija biex jikkontrolla d-dannu.

—	Jistabbilizza l-kundizzjoni tal-pazjenti u jħejjihom għat-trasport lejn l-aktar faċilità tas-saħħa adegwata għat-trattament aħħari.

Kapaċitajiet

—	Iwettaq analiżi tal-gravità tal-ġrieħi għal tal-anqas 20 pazjent fis-siegħa.

—	Skwadra medika kapaċi tistabbilizza 50 pazjent kull 24 siegħa ta’ attività, li topera fuq żewġ xiftijiet.

—	Skwadra kirurġika kapaċi twettaq kirurġija għall-kontroll tal-ħsara fuq 12-il pazjent kull 24 siegħa ta’ attività, li topera fuq żewġ xiftijiet.

—	Disponibbiltà ta’ provvisti għat-trattament ta’ 100 pazjent bi ġrieħi minuri kull 24 siegħa.

Elementi prinċipali

—

Skwadra medika kull xift ta’ 12-il siegħa:

—	analiżi tal-gravità tal-ġrieħi: infermier u/jew tabib,

—	kura intensiva: tabib u infermier,

—	kirurġija: 3 kirurgi, 2 infermiera għall-operazzjonijiet, anestetista, infermier anestetista,

—	ġrieħi gravi, imma mhux periklu tal-mewt: tabib u 2 infermiera,

—	evakwazzjoni: infermier,

—	persunal speċjalizzat ta’ appoġġ: 4.

—

Tined:

—	tinda/tined b’żoni interkonnessi għall-analiżi tal-gravità tal-ġrieħi, il-kura medika u l-evakwazzjoni,

—	tinda/tined għall-persunal,

—	tinda/tined għall-persunal.

—	Post ta’ kontroll.

—	Depożitu ta’ provvista loġistika u medika.

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq f’massimu fi 12-il siegħa wara l-aċċettazzjoni tal-offerta.

—	Operattiv siegħa wara l-wasla fuq il-post.

9. Sptar fil-post

Kompiti

—	Forniment ta’ kura, inizjali u/jew ta’ segwiment, medika u għat-trawma, filwaqt li jitqiesu l-linji gwida internazzjonali rikonoxxuti għall-użu ta’ sptar fil-post, bħal-linji gwida tal-Organizzazzjoni Dinjija tas-Saħħa jew tar-Red Cross.

Kapaċitajiet

—	10 sodod għall-pazjenti bi trawma qawwija, bil-possibbiltà li titkabbar il-kapaċità.

Elementi prinċipali

—

Skwadra medika għal:

—	analiżi tal-gravità tal-ġrieħi,

—	kura intensiva,

—	kirurġija,

—	ġrieħi gravi, imma mhux fil-periklu tal-mewt,

—	evakwazzjoni,

—	persunal speċjalizzat ta’ appoġġ,

—	u tal-anqas tkopri li ġej: ġeneralista, tobba tal-emerġenza, ortopedista, pedjatra, anestetista, spiżjar, ostetriku, uffiċjal tas-saħħa, tekniku tal-laboratorju, tekniku tar-raġġi X.

—

Tined:

—	tined xierqa għall-attivitajiet mediċi,

—	tined għall-persunal.

—	Post ta’ kontroll.

—	Depożitu ta’ provvista loġistika u medika.

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq f’massimu ta’ 7 ijiem wara t-talba.

—	Operattiv fuq is-sit 12-il siegħa mill-wasla fis-sit.

—	Operattiv tal-anqas għal 15-il jum.

10. Evakwazzjoni medika mill-ajru tal-vittmi tad-diżastru

Kompiti

—	Trasport tal-vittmi tad-diżastru lejn faċilitajiet tas-saħħa għall-kura medika.

Kapaċitajiet

—	Kapaċità ta’ trasport ta’ 50 pazjent kull 24 siegħa.

—	Kapaċità ta’ titjiriet lejl u nhar.

Elementi prinċipali

—	Ħelikopters/ajruplani bi streċers.

Awtosuffiċjenza

—	Japplikaw l-elementi (f) u (g) tal-Artikolu 3b(1).

Użu

—	Disponibbiltà għat-tluq f’massimu fi 12-il siegħa wara l-aċċettazzjoni tal-offerta.

11. Kenn temporanju ta’ emerġenza

Kompiti

—

Forniment ta’ kenn temporanju ta’ emerġenza, inkluż is-servizzi essenzjali, prinċipalment fil-fażijiet inizjali ta’ diżastru b’koordinazzjoni mal-istrutturi eżistenti, l-awtoritajiet lokali u organizzazzjonijiet internazzjonali, sakemm l-inkarigu jiġi ttrasferit lill-awtoritajiet lokali jew organizzazzjonijiet umanitarji, fejn il-kapaċità tibqa’ tkun neċessarja għal perjodi itwal.

—	Meta jsir it-trasferiment, jitħarreġ il-persunal rilevanti (lokali u/jew internazzjonali) qabel ma jitlaq dan il-modulu.

Kapaċitajiet

—	Kamp tat-tinda mgħammar għal 250 persuna.

Elementi prinċipali

—

Jitqiesu l-linji gwida internazzjonali rikonoxxuti, bħal-linji gwida SPHERE:

—	tined bit-tisħin (għall-kundizzjonijiet xitwin) u sodod tal-kampjiet b’borża tal-irqad u/jew kutra,

—	ġeneraturi tal-enerġija u tagħmir għat-tidwil,

—	faċilitajiet sanitarji u ta’ iġjene,

—	distribuzzjoni tal-ilma tax-xorb, skont l-istandards tal-WHO,

—	kenn għal attivitajiet soċjali bażiċi (posibbiltà ta’ armar).

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq f’massimu fi 12-il siegħa wara l-aċċettazzjoni tal-offerta.

—	Ġeneralment, il-missjoni għandha ddum l-aktar 4 ġimgħat, jew meta meħtieġ ikun inbeda proċess ta’ trasferiment tal-inkarigu.

12. Detezzjoni u kampjunar kimiku, bijoloġiku, radjoloġiku u nukleari (CBRN)

Kompiti

—

Twettiq/konferma tal-valutazzjoni inizjali, inkluż:

—	id-deskrizzjoni tal-perikli jew ir-riskji,

—	id-determinazzjoni taż-żona kontaminata,

—	il-valutazzjoni jew konferma tal-miżuri protettivi diġà meħuda.

—	Twettiq ta’ kampjunar kwalifikat.

—	Immarkar taż-żona kontaminata.

—	Previżjoni tas-sitwazzjoni, monitoraġġ, valutazzjoni dinamika tar-riskji, inkluż rakkomandazzjonijiet għal twissija u miżuri oħra.

—	Forniment ta’ appoġġ għal tnaqqis immedjat tar-riskju.

Kapaċitajiet

—

L-identifikazzjoni u detezzjoni ta’ perikli kimiċi u radjoloġiċi permezz ta’ kombinazzjoni ta’ tagħmir li jinżamm fl-idejn, mobbli jew ibbażat fil-laboratorji:

—	kapaċità ta’ detezzjoni ta’ radjazzjoni alfa, beta u gamma u ta’ identifikazzjoni ta’ iżotopi komuni,

—	kapaċità ta’ identifikazzjoni, u fejn possibbli, ta’ twettiq ta’ analiżi semikwantitattiva ta’ kimiċi komuni industrijali tossiċi u aġenti rikonoxxuti użati għall-gwerer.

—	Kapaċità tal-ġbir, ipproċessar u tħejjija ta’ kampjuni bijoloġiċi, kimiċi u radjoloġiċi għal aktar analiżi fi bnadi oħra (9).

—	Kapaċità li jiġu applikati mudelli xjentifiċi xierqa għall-previżjoni tal-perikli u li jiġu kkonfermati mudelli permezz ta’ monitoraġġ kontinwu.

—

Forniment ta’ appoġġ għal tnaqqis immedjat tar-riskju:

—	limitar tal-periklu,

—	newtralizzar tal-periklu,

—	forniment ta’ appoġġ tekniku lil skwadri jew moduli oħra.

Elementi prinċipali

—	Laboratorju kimiku u radjoloġiku, mobbli fuq il-post.

—	Tagħmir ta’ detezzjoni li jinżamm fl-idejn jew mobbli.

—	Tagħmir għall-kampjunar fuq il-post.

—	Sistemi ta’ mmudellar għat-tifrix.

—	Stazzjon mobbli meteoroloġiku.

—	Materjal għall-immarkar.

—	Dokumentazzjoni ta’ referenza u aċċess għal sorsi desinjati ta’ għarfien espert xjentifiku.

—	Trażżin sikur għall-kampjuni u l-iskart.

—	Faċilitajiet ta’ dikontaminazzjoni għall-persunal.

—	Persunal u tagħmir protettiv adegwat għas-sostenn ta’ operazzjoni f’ambjent kontaminat u/jew nieqes mill-ossiġenu, inkluż tuti xierqa li jissiġillaw kontra l-gass.

—	Provvista ta’ tagħmir tekniku għat-trażżin u n-newtralizzazzjoni ta’ periklu.

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq massimu fi 12-il siegħa wara l-aċċettazzjoni tal-offerta.

13. Tiftix u salvataġġ f’kundizzjonijiet CBRN

Kompiti

—	Tiftix u salvataġġ speċjali bl-użu ta’ ilbies protettiv.

Kapaċitajiet

—	Tiftix u salvataġġ speċjali bl-użu ta’ tuti protettivi, skont ir-rekwiżiti tal-moduli ta’ tiftix u salvataġġ urban medju u qawwi kif xieraq.

—	Tliet persuni li jaħdmu simultanjament f’żona ta’ periklu.

—	Intervent kontinwu għal 24 siegħa.

Elementi prinċipali

—	Materjal għall-immarkar.

—	Trażżin sigur u sikur għall-iskart.

—	Faċilitajiet ta’ dekontaminazzjoni għall-persunal u għall-vittmi salvati.

—	Persunal u tagħmir protettiv adegwat għas-sostenn ta’ operazzjoni ta’ tiftix u salvataġġ f’ambjent ikkontaminat, skont ir-rekwiżiti tal-moduli ta’ tiftix u salvataġġ urban medju u qawwi kif xieraq.

—	Provvista ta’ tagħmir tekniku għat-trażżin u n-newtralizzazzjoni ta’ periklu.

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq massimu fi 12-il siegħa wara l-aċċettazzjoni tal-offerta.

14. Tifi tan-nar fil-foresti mill-art

Kompiti

—	Jikkontribwixxi fit-tifi ta’ nirien kbar f’foresti jew veġetazzjonijiet permezz ta’ mezzi mill-art.

Kapaċitajiet

—	Riżorsi umani suffiċjenti għal operazzjoni kontinwa matul 7 ijiem.

—	Kapaċità li jopera f’żoni b’aċċess ristrett.

—	Kapaċità li jintramaw linji twal ta’ pajpijiet bil-pompi, minimu 2 km, u/jew jagħmlu linji ta’ difiża kontinwament.

Elementi prinċipali

—	Persunal tat-tifi tan-nar imħarreġ biex iwettaq il-ħidmiet imsemmija hawn fuq u b’taħriġ addizzjonali fis-sigurtà u s-sikurezza li jieħu kont tat-tipi differenti ta’ nirien li l-modulu jista’ jissejjaħ għalih.

—	Għodda manwali biex isiru l-linji ta’ difiża.

—	Pajpijiet, tankijiet portabbli u pompi biex tiġi stabbilita l-linja.

—	Adaptors biex jiġu mqabbda l-pajpijiet inkluż l-istandard Storz.

—	Tankijiet tal-ilma li jinġarru fuq id-dahar.

—	Tagħmir li jista’ jintrabat jew jiġi mniżżel minn ħelikopter.

—	Proċeduri ta’ evakwazzjoni għall-persunal tat-tifi tan-nar iridu jiġu miftiehma mal-istat li jirċevihom.

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq massimu f’6 sigħat wara l-aċċettazzjoni tal-offerta.

—	Kapaċità li jaħdmu kontinwament matul 7 ijiem.

15. Tifi tan-nar fil-foresti mill-art bl-użu tal-vetturi

Kompiti

—	Jikkontribwixxi fit-tifi ta’ nirien kbar f’foresti jew veġetazzjonijiet permezz ta’ vetturi.

Kapaċitajiet

—	Riżorsi umani u vetturi suffiċjenti għal operazzjonijiet kontinwi b’minimu ta’ 20 persunal tat-tifi tan-nar f’kull ħin.

Elementi prinċipali

—	Persunal tat-tifi tan-nar imħarreġ fil-ħidmiet imsemmija hawn fuq.

—	4 vetturi b’kapaċità ta’ off-road.

—	Tankijiet ta’ kull vettura li jesgħu mill-anqas 2 000 litru.

—	Adaptors biex jiġu mqabbda l-pajpijiet inkluż l-istandard Storz.

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq massimu f’6 sigħat wara l-aċċettazzjoni tal-offerta.

—	Kapaċità li jaħdmu kontinwament matul 7 ijiem.

—	Jitwasslu bl-art jew bil-baħar. Jistgħu jitwasslu biss bl-ajru jekk il-każ ikun ġustifikat.

16. Trażżin ta’ għargħar

Kompiti

—	Rinfurzar ta’ strutturi eżistenti u bini ta’ barrieri ġodda biex jiġi evitat aktar għargħar mix-xmajjar, baċiri u kanali b’livell tal-ilma li jkun qed jiżdied.

Kapaċitajiet

—

Kapaċità li l-ilma jitwaqqaf permezz ta’ barrieri b’għoli minimu ta’ 0.8 metru bl-użu ta’:

—	materjali li jippermettu l-bini ta’ barriera twila 1 000 metru,

—	aktar materjali jsiru disponibbli fis-sit.

—	Kapaċità ta’ rinfurzar ta’ barrieri eżistenti.

—	Kapaċità li jopera f’minimu ta’ 3 postijiet fl-istess ħin f’żona aċċessibbli mit-trakkijiet.

—	Operattiv 24/7.

—	Superviżjoni u manutenzjoni ta’ barrieri u digi.

—	Kapaċità li jaħdem mal-persunal lokali.

Elementi prinċipali

—	Materjal biex jinbnew barrieri li minnhom ma jgħaddix l-ilma għal distanza totali ta’ 1 000 metru (ir-ramel għandu jsir disponibbli mill-awtoritajiet lokali).

—	Biċċiet tal-fojl/plastik (jekk meħtieġa sabiex l-ilma ma jgħaddix minn barriera eżistenti, jiddependi mill-kostruzzjoni tal-barriera).

—	Magna li timla l-ixkejjer tar-ramel.

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq massimu fi 12 il-siegħa wara l-aċċettazzjoni tal-offerta.

—	Jitwasslu bl-art jew bil-baħar. Jistgħu jitwasslu biss bl-ajru jekk il-każ ikun ġustifikat.

—	Kapaċità li jkun operattiv tal-anqas għal 10 ijiem.

17. Salvataġġ mill-għargħar bl-użu tad-dgħajjes

Kompiti

—	Tiftix u salvataġġ mill-ilma u assistenza lil persuni maqbuda fl-għargħar bl-użu ta’ dgħajjes.

—	Għoti tal-ewwel għajnuna u twassil tal-ewwel neċessitajiet kif meħtieġ.

Kapaċitajiet

—	Kapaċità ta’ tiftix ta’ persuni f’żoni urbani u rurali.

—	Kapaċità ta’ salvataġġ ta’ persuni f’żoni mgħarrqa inkluża kura medika fil-livell tal-ewwel rispons.

—	Kapaċità li jaħdmu flimkien f’tiftix mill-ajru (ħelikopters u ajruplani).

—

Kapaċità li jwasslu l-ewwel neċessitajiet tal-ħajja f’żoni mgħarrqa:

—	trasport ta’ tobba, mediċini eċċ.,

—	ikel u ilma.

—	Il-modulu jrid ikollu mill-anqas 5 dgħajjes u l-kapaċità li jġorr 50 persuna b’total, eskluż il-persunal tal-Modulu.

—	Id-dgħajjes iridu jkunu mfassla għall-użu f’kundizzjonijiet ta’ klima kiesħa u jridu jkunu kapaċi jimxu kontra l-kurrent bi fluss ta’ mill-anqas 10 knots.

—	Operattiv 24/7.

Elementi prinċipali

—

Id-dgħajjes iridu jkunu mfassla għal:

—	kundizzjonijiet ta’ ilma baxx (> 0,5 m),

—	użu f’kundizzjonijiet ta’ riħ qawwi,

—	użu bi nhar u bil-lejl,

—	għandhom ikunu mgħammra skont l-istandards ta’ sigurtà internazzjonali inklużi ġkieket tas-salvataġġ għall-passiġġieri.

—	Persunal imħarreġ għal salvataġġ mgħaġġel mill-ilma. (M’hemmx bżonn ta’ għaddasa, salvataġġ mill-wiċċ biss).

Awtosuffiċjenza

—	Japplikaw l-elementi (a) sa (i) tal-Artikolu 3b(1).

Użu

—	Disponibbiltà għat-tluq massimu fi 12-il siegħa wara l-aċċettazzjoni tal-offerta.

—	Jitwasslu bl-art jew bil-baħar. Jistgħu biss jitwasslu bl-ajru jekk il-każ ikun ġustifikat.

—	Kapaċità li jkun operattiv tal-anqas għal 10 ijiem.”

(1) Il-lista ta’ moduli ta’ protezzjoni ċivili u r-rekwiżiti relatati stabbiliti f’din id-Deċiżjoni jistgħu jiġu emendati biex jinkludu tipi oħra ta’ moduli ta’ protezzjoni ċivili li jikkunsidraw l-esperjenza miksuba mill-Mekkaniżmu.

(2) Vittmi ħajjin.

(3) Kapaċità bażika, kapaċitajiet aktar estensivi inklużu fil-modulu ‘tad-detezzjoni u kampjunar kimiku, bijoloġiku, radjoloġiku u nukleari’.

(4) Kura tal-pazjenti (l-ewwel għajnuna u stabbilizzazzjoni medika) mid-dħul sat-trasferiment tal-vittma.

(5) Vittmi ħajjin.

(6) Kapaċità bażika, kapaċitajiet aktar estensivi inklużu fil-modulu ‘tad-detezzjoni u kampjunar kimiku, bijoloġiku, radjoloġiku u nukleari’.

(7) Kura tal-pazjenti (l-ewwel għajnuna u stabbilizzazzjoni medika) mid-dħul sat-trasferiment tal-vittma.

(8) Suġġett għat-termini ta’ liċenzja medika u veterinarja.

(9) Dan il-proċess għandu, fejn possibli, iqis ir-rekwiżiti evidenzjarji tal-istat li jagħmel it-talba.

Top

Choose the experimental features you want to try