32000L0025

Id-Direttiva 2000/25/KE tal-Parlament Ewropew u l-Kunsill

tat-22 ta' Mejju 2000

dwar l-azzjoni li għandha tittieħed kontra l-emissjonijiet ta' inkwinanti ta' gass u partikolati minn magni għat-tmexxija ta' tratturi għall-agrikoltura jew għall-forestrija u li temenda d-Direttiva tal-Kunsill 74/150/KEE

IL-PARLAMENT EWROPEW U L-KUNSILL TA' L-UNJONI EWROPEA,

Wara li kkunsidraw it-Trattat li jistabbilixxi l-Komunità Ewropea, u b'mod partikolari l-Artikolu 95 tiegħu,

Wara li kkunsidraw il-proposta mill-Kummissjoni [1],

Wara li kkunsidraw l-opinjoni tal-Kumitat Ekonomiku u Soċjali [2],

Filwaqt li jaġixxu skond il-proċedura stabbilità fl-Artikolu 251 tat-Trattat [3],

Billi:

(1) Biex ikun assigurat il-funzjonament kif suppost tas-suq intern, id-Direttiva tal-Kunsill 74/150/KEE ta' l-4 ta' Marzu 1974 dwar l-approssimazzjoni tal-liġijiet ta' l-Istati Membri li jirrigwardaw l-approvazzjoni tat-tip ta' tratturi bir-roti għall-agrikoltura jew għall-forestrija [4] u t-22 Direttivi speċifiċi adottati bejn l-1974 u l-1989 li armonizzaw l-ispeċifikazzjonijiet tekniċi f'dan il-qasam;

(2) Billi biex ikun salvagwardat aktar l-ambjent, huwa meħtieġ li l-miżuri diġa adottati jkunu supplimentati bid-Direttiva tal-Kunsill 77/537/KEE tat-28 ta' Ġunju 1977 dwar l-approssimazzjoni tal-liġijiet ta' l-Istati Membri li jirrigwardaw il-miżuri li għandhom jittieħdu kontra l-emissjonijiet ta' inkwinanti minn magni diesel għall-użu fi tratturi bir-roti, għall-agrikoltura jew għall-forestrija [5], (opaċità ta' gass ta' l-exhaust) ma' miżuri oħra li jirrigwardaw, b'mod partikolari, mal-emissjonijiet fiżjokimiċi. B'referenza għad-disposizzjonijiet tad-Direttiva 97/68/KE tal-Parlament Ewropew u tal-Kunsill tas-16 ta' Diċembru 1997 dwar l-approssimazzjoni tal-liġijiet ta' l-Istati Membri fir-rigward tal-miżuri kontra l-emissjonijiet ta' inkwinanti ta' gass u partikolati minn magni bil-kombustjoni interna li għandhom ikunu stallati f'makkinarju mobbli mhux għas-sewqan fit-triq [6], din id-Direttiva tipprovdi l-limiti tal-valuri għall-emissjonijiet ta' inkwinanti ta' gass u partikolati li għandhom jiġu applikati fi stadji suċċessivi, u l-proċedura tat-test tal-magni bil-kombustjoni interna intiżi biex imexxu tratturi għall-agrikoltura u għall-forestrija. Konformità mad-disposizzjonijiet tad-Direttiva tal-Kunsill 88/77/KEE tat-3 ta' Diċembru 1987 dwar l-approssimazzjoni tal-liġijiet ta' l-Istati Membri li jirrigwardaw il-miżuri li għandhom jittieħdu kontra l-emissjoni ta' inkwinanti fil-forma ta' gass minn magni diesel f'vetturi [7], tista' tkun aċċettata bħala konformità mal-ħtiġiet ta' din id-Direttiva.

(3) Biex ikun iffaċilitat l-aċċess għal swieq ta' pajjiżi terzi, huwa meħtieġ li tkun stabbilita ekwivalenza bejn il-ħtiġiet ta' din id-Direttiva għall-ewwel stadju l-ħtiġiet stabbiliti fir-Regolament Nru 96 tal-Kummissjoni Ekonomika tan-Nazzjonijiet Uniti għall-Ewropa (UN/KEE) dwar l-approvazzjoni tat-tip tal-komponenti ta' magni bil-compression ignition intiża biex tkun immuntata fuq tratturi għall-agrikoltura u għall-forestrija skond l-emissjonijiet tagħhom ta' inkwinanti.

(4) Biex ikunu massimizzati l-benefiċċji għall-ambjent Ewropew u, fl-istess waqt biex tkun assigurata l-unità fis-suq, huwa meħtieġ li jiġu adottati standards mandatorji stretti f'intervalli regolari. Kull tnaqqis ieħor fil-limiti tal-valuri u kull tibdiliet fil-proċedura tat-test jistgħu jiġu adottati biss fuq il-bażi ta' studji u riċerka li għandhom ikunu mwettqa fil-potenzjal teknoloġiku eżistenti prevedibbli u fl-effettività skond in-nefqa tiegħu, biex tkun permissibbli l-produzzjoni fuq skala industrijali ta' tratturi għall-agrikoltura u għall-forestrija li jistgħu jkunu konformi ma' dawn il-limiti aktar ibsin.

(5) Il-progress tekniku jeħtieġ adattabilità rapida għall-ħtiġiet tekniċi stabbiliti fl-Annessi li jinsabu ma' din id-Direttiva. Il-Kummissjoni hija mpenjata li tallinja mingħajr dewmien il-limiti tal-valuri u dati f'din id-Direttiva għall-bidliet fil-futur fid-Direttiva 97/68/KE. F'kull każ meta l-Parlament Ewropew u l-Kunsill jagħtu s-setgħa lill-Kummissjoni li timplimenta r-regoli imħejjija għat-tratturi għall-agrikoltura u għall-forestrija, proċedura ta' konsultazzjoni bil-quddiem li tinvolvi l-Kummissjoni u l-Istati Membri li jiltaqg]u f'kumitat għandha tkun introdotta.

(6) Il-ħtiġiet ta' din id-Direttiva jissupplimentaw dawk tad-Direttiva 77/537/KEE, li għaliha hemm referenza fid-Dettall 2.8.1 ta' l-Anness II li jinsab mad-Direttiva 74/150/KEE; id-Direttiva 74/150/KEE għalhekk għandha l-ħtieġa li tkun emendata biex iżżid Dettall ġdid 2.8.2 fl-Anness II li jkopri s-suġġett trattat minn din id-Direttiva flimkien mar-referenza SD (Direttiva Speċifika).

(7) L-għan tat-tnaqqis tal-livell ta' emissjonijiet ta' inkwinanti minn tratturi għall-agrikoltura u għall-forestrija u l-iffunzjonar xieraq tas-suq intern għal dawk il-vetturi ma jistax jinkiseb suffiċjentement mill-Istati Membri individwali u jista' għalhekk jinkiseb aħjar bl-approssimazzjoni tal-liġijiet ta' l-Istati Membri li jirrigwardjaw il-miżuri li għandhom jittieħdu kontra l-inkwinanti ta' l-arja minn dawk il-vetturi. Il-miżuri li jinsabu f'din id-Direttiva ma jmorrux 'l hinn minn dak li huwa meħtieġ biex jinkisbu l-għanijiet tat-Trattat,

ADOTTAW DIN ID-DIRETTIVA:

Artikolu 1

Definizzjonijiet

Għall-għanijiet ta' din il-Direttiva:

- "trattur għall-agrikoltura jew għall-forestrija" (hawnhekk iżjed 'il quddiem imsemmi bħala "trattur") tfisser kull vettura kif definita fl-Artikolu 1(1) tad-Direttiva 74/150/KEE,

- "magna" tfisser kull magna b'kombustjoni interna intiża biex tħaddem it-tratturi kif definiti fl-Anness I,

- "approvazzjoni tat-tip ta' tip jew familja ta' magna bħala unità teknika separata dwar l-emissjonijiet ta' inkwinanti" tfisser l-istrument li bih Stat Membru jiċċertifika li tip jew familja ta' magni intiżi biex iħaddmu tratturi jkunu konformi mal-ħtiġiet tekniċi ta' din id-Direttiva,

- "approvazzjoni tat-tip ta' tip ta' trattur fir-rigward ta' l-emissjonijiet ta' inkwinanti" tfisser l-istrument li bih Stat Membru jiċċertifika li tip ta' trattur mgħammar b'magna jkun konformi mal-ħtiġiet tekniċi ta' din id-Direttiva,

- "familja ta' magni" tfisser żewġ tipi jew aktar ta' magni li huma simili fid-disinn u li, għalhekk, ikollhom karatteristiċi li huma komparabbli f'termini ta' emissjonijiet ta' inkwinanti.

Artikolu 2

Proċedura ta' l-approvazzjoni tat-tip

Il-proċedura għall-għoti ta' l-approvazzjoni tat-tip għal tip jew familja ta' magna dwar emissjonijiet ta' inkwinanti, il-proċedura għall-għoti ta' l-approvazzjoni tat-tip għal tratturi dwar l-emissjonijiet ta' l-inkwinanti, u l-kundizzjonijiet tat-tqegħid mhux ristrett fis-suq ta' dawk il-magni u tratturi, huma kif stabbiliti fid-Direttiva 74/150/KEE.

Artikolu 3

Obbligazzjonijiet

1. Bla ħsara għall-Artikolu 5, kull tip jew familja ta' magna għandha tkun konformi mal-ħtiġiet ta' l-Anness I.

2. Kull tip ta' trattur għandu jkun konformi mal-ħtiġiet ta' l-Anness II. F'dan ir-rigward l-approvazzjonijiet tat-tip ta' tip jew familji ta' magna li jkunu ġew approvati skond l-Anness I jew id-disposizzjonijiet imsemmija fl-Anness III għandhom jiġu rikonnoxuti.

Artikolu 4

Programm

1. L-Istati Membri m'għandhomx wara t-30 ta' Settembru 2000:

- jiċħdu li jagħtu l-approvazzjoni tat-tip KE jew l-approvazzjoni tat-tip nazzjonali dwar xi tip jew familja ta' magna, jew

- jipprojbixxu l-bejgħ, it-tqegħid fis-servizz jew l-użu ta' xi magna ġdida, jew

- jiċħdu li jagħtu l-approvazzjoni tat-tip KE jew l-approvazzjoni tat-tip nazzjonali ta' tratturi, jew,

- jipprojbixxi l-użu, l-bejgħ jew dħul inizjali fis-servizz ta' tipi ta' tratturi,

fuq il-bażi li tirrigwarda l-inkwinanti ta' l-arja jekk l-inkwinanti li joħorġu minn dawk il-magni jew il-magni immuntati ma' dawk it-tratturi jkunu konformi mal-ħtiġiet ta' din id-Direttiva.

2. L-Istati Membri jistgħu ma jagħtux aktar approvazzjoni tat-tip KE jew approvazzjoni tat-tip nazzjonali għal tip jew familja ta' magni jew tip ta' trattur meta l-inkwinanti li joħroġ mill-magna ma jkunx konformi mal-ħtiġiet ta' din id-Direttiva:

(a) fl-istadju I

- wara l-31 ta' Diċembru 2000 għall-magni tal-kategoriji B u Ċ (firxa ta' saħħa kif definita fl-Artikolu 9(2) tad-Direttiva 97/68/KE);

(b) fl-istadju II

- wara l-31 ta' Diċembru 2000 għall-magni tal-kategoriji D u E (firxa ta' saħħa kif definita fl-Artikolu 9(3) tad-Direttiva 97/68/KE);

- wara l-31 ta' Diċembru 2001 għall-magni tal-kategorija F (firxa ta' saħħa kif definita fl-Artikolu 9(3) tad-Direttiva 97/68/KE);

- wara l-31 ta' Diċembru 2002 għall-magni tal-kategorija G (firxa ta' saħħa kif definita fl-Artikolu 9(3) tad-Direttiva 97/68/KE);

3. L-Istati Membri għandhom jipprojbixxu d-dħul fis-servizz ta' magni u tratturi meta l-inkwinanti li joħorġu mill-magni ma jkunux konformi mal-ħtiġiet ta' din id-Direttiva:

- wara t-30 ta' Ġunju 2001 għall-magni fil-kategoriji A, B u Ċ,

- wara l-31 ta' Diċembru 2001 għall-magni fil-kategoriji D u E,

- wara l-31 ta' Diċembru 2002 għall-magni fil-kategorija F,

- wara l-31 ta' Diċembru 2002 għall-magni fil-kategorija G,

B'dana kollu, għal tratturi mgħammra b'magni tal-kategorija E jew F, id-dati ta' hawn fuq għandhom jiġu posposti b'sitt xhur.

4. Il-ħtiġiet tal-paragrafu 3 ma japplikawx għall-magni ntiżi biex ikunu stallati f'tipi ta' tratturi għall-esportazzjoni lejn pajjiżi terzi u għall-bdil ta' magni għall-tratturi fis-servizz.

5. L-Istati Membri għandhom jipposponu d-dati msemmija fil-paragrafu 3 għal sentejn dwar magni b'data ta' produzzjoni qabel l-imsemmija data. Jistgħu jagħtu eċċezzjonijiet oħra permezz tal-kundizzjonijiet stabbiliti fl-Artikolu 10 tad-Direttiva 97/68/KE.

Artikolu 5

Rikonoxximent ta' ekwivalenza u konformità

L-awtoritajiet ta' l-Istati Membri li jagħtu l-approvazzjoni tat-tip KE għal tip jew familja ta' magni għandhom jagħrfu l-approvazzjoni tat-tip mogħtija skond id-disposizzjonijiet ta' l-Anness III u l-marki ta' l-approvazzjoni korrispondenti bħala li jkunu f'konformità ma' din id-Direttiva.

Artikolu 6

Aktar tnaqqis fil-limiti tal-valuri ta' l-emissjoni

Malli d-disposizzjonijiet imsemmijin fl-Artikolu 19 tad-Direttiva 97/68/KE jkunu adottati mill-Parlament Ewropew u mill-Kunsill, il-Kummissjoni għandha skond il-proċedura stabbilita fl-Artikolu 13 tad-Direttiva 74/150/KEE, mingħajr dewmien tallinja l-limiti tal-valuri u d-dati li jinsabu f'din id-Direttiva ma' dawk adottati wara d-deċiżjonijiet meħuda skond l-Artikolu 19 imsemmi hawn fuq.

Artikolu 7

Adatazzjonijiet tekniċi

Kull emendi meħtieġa biex jiġu adattati l-ħtiġiet ta' l-Annessi għall-progress tekniku għandhom jiġu adottati skond il-proċedura stabbilita fl-Artikolu 13 tad-Direttiva 74/150/KEE.

Artikolu 8

Emenda tad-Direttiva 74/150/KEE

Fl-Anness II li jinsab mad-Direttiva 74/150/KEE id-Dettall 2.8.2 li ġej għandu jiddaħħal: "2.8.2 Emissjonijiet ta' inkwinanti ta' gass u partikolati minn magni: SD":

Artikolu 9

Trasposizzjoni fil-liġi nazzjonali

L-Istati Membri għandhom idaħħlu fis-seħħ il-liġijiet, ir-regolamenti u d-disposizzjonijiet amministrattivi meħtieġa biex ikunu konformi ma' din id-Direttiva qabel id-29 ta' Settembru 2000. Għandhom jinfurmaw minnufih lill-Kummissjoni b'dan.

Għandhom japplikaw dawn id-disposizzjonijiet mill-31 ta' Diċembru 2000.

Meta l-Istati Membri jadottaw dawn il-miżuri, dawn għandhom ikun fihom referenza għal din id-Direttiva, jew ikunu akkumpanjati b'dik ir-referenza fl-okkażjoni tal-pubblikazzjoni uffiċjali tagħhom. Il-metodi ta' kif issir ir-referenza għandhom ikunu stabbiliti mill-Istati Membri.

Artikolu 10

Dħul fis-seħħ

Dan ir-Regolament għandu jidħol fis-seħħ fil-jum tal-pubblikazzjoni tiegħu fil-Ġurnal Uffiċjali tal-Komunitajiet Ewropej.

Artikolu 11

Lil min hu indirizzata

Din id-Direttiva hija indirizzata lill-Istati Membri kollha.

Magħmul fi Brussel, fit-22 ta' Mejju 2000.

Għall-Parlament Ewropew

Il-President

N. Fontaine

Għall-Kunsill

Il-President

J. Gama

[1] ĠU C 303, tat-2.10.98, p. 9.

[2] ĠU C 101, tat-12.04.99, p. 13.

[3] L-Opinjoni tal-Parlament Ewropew tal-5 ta' Mejju 1999 (ĠU C 279, ta' l-1.10.1999, p. 209), il-Posizzjoni komuni tal-Kunsill tat-22 ta' Novembru 1999 (ĠU C 17, ta' l-20.1.2000, p. 13) u d-Deċiżjoni tal-Parlament Ewropew tat-12 ta' April 2000 (għadha mhix ippubblikata fil-Ġurnal Uffiċjali).

[4] ĠU L 84, tat-28.03.1974, p. 10. Id-Direttiva kif l-aħħar emendata bid-Direttiva 97/54/KE (ĠU L 277, ta' l-10.10.97, p. 24).

[5] ĠU L 220, tad-29.08.1977, p. 38. Id-Direttiva kif l-aħħar emendata bid-Direttiva 97/54/KE.

[6] ĠU L 59, tas-27.02.98, p. 1.

[7] ĠU L 36, tad-9.02.88, p. 33. Id-Direttiva kif l-aħħar emendata bid-Direttiva 96/1/KE (ĠU L 40, tas-17.2.1996, p. 1).

--------------------------------------------------

LISTA TA' L-ANNESSI

Appendiċi 1: | Dokument ta' l-informazzjoni li jikkonċerna l-approvazzjoni tat-tip KE ta' tip ta' magna bħala kampjun għall-użu fi trattur bħala unità teknika separata, skond l-inkwinanti li jirrilaxxa |

Appendiċi 2: | Approvazzjoni tat-tip KE għall-unità teknika separata |

Appendiċi 3: | L-immarkar tal-magni |

Appendiċi 4: | Numerazzjoni |

Appendiċi 5: | Marka ta' l-approvazzjoni tat-tip KE |

|

Appendiċi 1: | Dokument ta' linformazzjoni |

Appendiċi 2: | Ċertifikat ta' lapprovazzjoni tattip KE |

|

ANNESS III | Rikonoxximent ta' l-approvazzjonijiet ta' tip alternattiv |

--------------------------------------------------