This document is an excerpt from the EUR-Lex website
Document 31990R1360
Council Regulation (EEC) No 1360/90 of 7 May 1990 establishing a European Training Foundation
Ir-Regolament tal-Kunsill (KEE) Nru 1360/90 tas-7 ta' Mejju 1990 li jistabbilixxi Fondazzjoni Ewropea għat-Taħriġ
Ir-Regolament tal-Kunsill (KEE) Nru 1360/90 tas-7 ta' Mejju 1990 li jistabbilixxi Fondazzjoni Ewropea għat-Taħriġ
ĠU L 131, 23.5.1990, p. 1–5
(ES, DA, DE, EL, EN, FR, IT, NL, PT) Dan id-dokument ġie ppubblikat f’edizzjoni(jiet) speċjali
(FI, SV, CS, ET, LV, LT, HU, MT, PL, SK, SL, BG, RO)
No longer in force, Date of end of validity: 01/01/2009; Imħassar b' 32008R1339
Official Journal L 131 , 23/05/1990 P. 0001 - 0005
Finnish special edition: Chapter 16 Volume 2 P. 0003
Swedish special edition: Chapter 16 Volume 2 P. 0003
Ir-Regolament tal-Kunsill (KEE) Nru 1360/90 tas-7 ta' Mejju 1990 li jistabbilixxi Fondazzjoni Ewropea għat-Taħriġ IL-KUNSILL TAL-KOMUNITAJIET EWROPEJ, Wara li kkunsidra t-Trattat li jistabbilixxi l-Komunità Ekonomika Ewropea, u b'mod partikolari Artikolu 235 tiegħu, Wara li kkunsidra il-proposta mill-Kummissjoni [1], Wara li kkunsidra l-opinjoni tal-Parlament Ewropew [2], Wara li kkunsidra l-opinjoni tal-Kumitat Ekonomiku u Soċjali [3], Billi l-Kunsill Ewropew li ltaqa’ fi Strasburgu fit-8 u d-9 ta' Diċembru 1989 talab lill-Kunsill sabiex jadotta, fil-bidu ta' l-1990, id-deċiżjonijiet neċessarji għall-istabbiliment ta' Fondazzjoni Ewropea għat-Taħriġ għall-Ewropa Ċentrali u tal-Lvant, billi jaġixxi fuq proposta mill-Kummissjoni; Billi fit-18 ta' Diċembru 1989 il-Kunsill adotta r-Regolament (KEE) Nru 3906/89 [4] dwar għajnuna ekonomika lir-Repubblika ta' l-Ungerija u lir-Repubblika tal-Poplu Pollakk li jipprovdi għal għajnuna f'oqsma li jinkludu t-taħriġ sabiex jissaħħaħ il-proċess ta' riforma ekonomika u soċjali fl-Ungerija u l-Polonja; Billi l-Kunsill jista’ sussegwentement jestendi din l-għajnuna lil pajjiżi oħra fl-Ewropa Ċentrali u tal-Lvant taħt att legali rilevanti; Billi l-proċess ta' riforma ekonomika u soċjali jikkontribwixxi għall-iżvilupp ta' relazzjonijiet ekonomiċi u kummerċjali bejn il-pajjiżi ta' l-Ewropa Ċentrali u tal-Lvant u l-Komunità li jkunu ta' benefiċċju għaż-żewġ naħat; billi dawn ir-relazzjonijiet intensifikati jikkontribwixxu wkoll għall-iżvilupp armonjuż ta' attivitajiet ekonomiċi fil-Komunità; Billi l-Fondazzjoni Ewropea għat-Taħriġ tista’ tagħti kontribuzzjoni importanti għall-għoti effettiv ta' assistenza fit-taħriġ lill-pajjiżi ta' l-Ewropa Ċentrali u tal-Lvant eliġibbli għal għajnuna ekonomika sabiex jissaħħaħ il-proċess ta' riforma; Billi, għall-kontribuzzjoni tagħha, il-Fondazzjoni Ewropea għat-Taħriġ ikollha bżonn tirrikorri għall-esperjenza li akkwistat fil-Komunità fil-qasam tat-taħriġ vokazzjonali fl-implimentazzjoni ta' politika komuni għat-taħriġ vokazzjonali u għall-istituzjonijiet tagħha li joperaw fil-qasam tat-taħriġ; Billi fil-Komunità u f'pajjiżi terzi, inklużi l-pajjiżi ta' l-Ewropa Ċentrali u tal-Lvant, jeżistu faċilitajiet reġjonali u/jew nazzjonali, pubbliċi u/jew privati li jistgħu jintalbu jikkolaboraw fl-għoti effettiv ta' għajnuna fil-qasam tat-taħriġ; Billi l-istat u l-istruttura tal-Fondazzjoni Ewropea għat-Taħriġ għandha tiffaċilita rispons flessibbli għar-rekwiżiti speċifiċi u varjati tal-pajjiżi individwali li għandhom ikunu assistiti, u jippermettulha li taqdi l-funzjonijiet tagħha f'kooperazzjoni mill-qrib mal-faċilitajiet nazzjonali u internazzjonali eżistenti; Billi l-Fondazzjoni Ewropea għat-Taħriġ għandu jkollha personalità legali, u fl-istess waqt iżżomm fil-kompożizzjoni tagħha relazzjoni mill-qrib mal-Kummissjoni u tirrispetta r-responsabbilitajiet politiċi ġenerali tal-Komunità u ta' l-istituzzjonijiet tagħha. Billi l-Fondazzjoni Ewropea għat-Taħriġ għandu jkollha rabtiet mill-qrib maċ-Ċentru Ewropew għall-Iżvilupp ta' Taħriġ Vokazzjonali, ma’ l-Iskema ta' Mobilità Transewropea għall-Istudji Universitarji (Tempus) u kwalunkwe skema oħra istitwita mill-Kunsill sabiex tipprovdi għajnuna fil-qasam tat-taħriġ lil pajjiżi ta' Ewropa Ċentrali u tal-Lvant; Billi l-Fondazzjoni Ewropea għat-Taħriġ għandha tkun miftuħa għall-parteċipazzjoni ta' pajjiżi li ma humiex membri tal-Komunità u li jħaddnu l-impenn tal-Komunità u ta' l-Istati Membri għall-għoti ta' għajnuna lill-Ewropa Ċentrali u tal-Lvant fil-qasam tat-taħriġ taħt arranġamenti li għandhom isiru fi ftehim bejn il-Komunità u dawn l-istess pajjiżi; Billi t-Trattat ma jipprovdix, għall-azzjoni kkonċernata, poteri barra minn dawk f'Artikolu 235, ADOTTA DAN IR-REGOLAMENT: Artikolu 1 Għanijiet Dan ir-Regolament jistabbilixxi hawnhekk il-Fondazzjoni Ewropea għat-Taħriġ (minn hawnhekk ‘il quddiem imsejħa l-Fondazzjoni) li l-għanijiet tagħha għandhom ikunu li tikkontribwixxi għall-iżvilupp tas-sistemi ta' taħriġ vokazzjonali tal-pajjiżi ta' l-Ewropa Ċentrali u tal-Lvant li kienu nominati bħala eliġibbli għal għajnuna ekonomika mill-Kunsill fir-Regolament (KEE) Nru 3906/89 jew fi kwalunkwe att legali sussegwenti rilevanti. Dawn il-pajjiżi huma minn hawnhekk il quddiem imsejħa "il-pajjiżi eliġibbli". Il-Fondazzjoni għandha b'mod partikolari: - tfittex li tippromwovi kooperazzjoni effettiva bejn il-Komunità u l-pajjiżi eliġibbli fil-qasam tat-taħriġ vokazzjonali, - tikkontribwixxi għall-koordinazzjoni ta' assistenza pprovduta mill-Komunità, l-Istati Membri tagħha u l-pajjiżi terzi msemmija fl-Artikolu 16. Artikolu 2 Skop Il-Fondazzjoni għandha taħdem fil-qasam tat-taħriġ, u tkopri sew taħriġ vokazzjonali inizjali u kontinwu kif ukoll taħriġ mill-ġdid għal żgħażagħ u adulti, inkluż b'mod partikolari taħriġ fit-tmexxija. Artikolu 3 Funzjonijiet Bil-għan li jintlaħqu l-għanijiet imniżżla f'Artikolu 1, il-Fondazzjoni għandha: (a) tipprovdi assistenza fid-definizzjoni ta' ħtiġiet ta' taħriġ u prioritajiet permezz ta' l-implimentazzjoni ta' miżuri ta' assistenza teknika fil-qasam tat-taħriġ, u permezz ta' kooperazzjoni mal-korpi maħtura addattati fil-pajjiżi eliġibbli; (b) taġixxi bħala kwartieri ċentrali sabiex tipprovdi lill-Komunità, l-Istati Membri tagħha u l-pajjiżi terzi msemmija fl-Artikolu 16, flimkien mal-pajjiżi eliġibbli u l-partijiet l-oħra kollha interessati, b'informazzjoni fuq inizjattivi kurrenti u ħtiġiet futuri fil-qasam tat-taħriġ, u tipprovdi qafas li minnu jistgħu ikunu mgħoddija offerti għal assistenza; (ċ) fuq il-bażi ta' (a) u (b): teżamina l-iskop għal proġetti komuni ta' assistenza fit-taħriġ inklużi proġetti pilota, għat-twaqqif ta' timijiet multinazzjonali speċjalizzati għal proġetti speċifiċi u sabiex jiġu identifikati ħidmiet li jkunu jistgħu jiġu kofinanzjati, u tipprovdi fondi għad-disinn u l-preparazzjoni ta' dawn il-proġetti, li l-implimentazzjoni tagħhom tista’ tkun iffinanzjata minn kontribuzzjonijiet minn pajjiż wieħed jew bosta pajjiżi, flimkien mal-Fondazzjoni, jew, f'każijiet eċċezzjonali, mill-Fondazzjoni weħidha; (d) għal attivitajiet u proġetti li jkunu ffinanzjati mill-Fondazzjoni: tagħmel arranġamenti għall-korpi pubbliċi u/jew privati xierqa li jkollhom rekord tajjeb fit-taħriġ u l-ħila meħtieġa sabiex ifasslu, jippreparaw, jimplimentaw u/jew immexxu proġetti fuq bażi flessibbli u deċentralizzata; (e) għal proġetti ffinanzjati jew koiffinanzjati mill-Fondazzjoni, proċeduri għat-tfigħ ta' offerti għandhom jiġu stabbiliti mill-bord li jirregola msemmi f'Artikolu 5, u għandu jingħata kull każ tal-proċeduri stabbiliti fil-kuntest tar-Regolament (KEE) Nru 3906/89 u, b'mod partikolari, Artikolu 7 tiegħu; jew fi kwalunkwe att legali sussegwenti rilevanti; (f) f'kollaborazzjoni mal-Kummissjoni, tassisti fil-kontroll u l-evalwazzjoni tal-effettività ġenerali ta' assistenza fit-taħriġ lill-pajjiżi eliġibbli; (ġ) ixxerred informazzjoni u tinkoraġġixxi skambju ta' esperjenza, permezz ta' pubblikazzjonijiet, laqgħat, u mezzi oħra addattati; (ħ) fil-qafas ġenerali ta' dan ir-Regolament, tagħmel xogħolijiet oħra skond kif ikun miftiehem bejn il-bord li jirregola u l-Kummissjoni. Artikolu 4 Dispożizzjonijiet ġenerali 1. Il-Fondazzjoni għandu jkollha personalità legali. Hija għandha tgawdi f' kull wieħed mill-Istati Membri il-kapaċità legali l-aktar estensiva li tista' tingħata lill-persuni legali taħt il-liġijiet tagħhom; tista', b'mod partikolari, takkwista jew tiddisponi minn proprjeta mobbli u immobbli u tista' tkun parti fi proċedimenti legali. Hija ma għandhiex taħdem għall-profitt. Il-Fondazzjoni għandha tfittex il-kooperazzjoni ta' korpi oħra tal-Komunità, b'mod partikolari iċ-Cedefop. 2. Rappreżentanti tal-partijiet soċjali fuq livell Ewropew li huma diġà attivi fix-xogħol tal-istituzzjonijiet tal-Komunità, u organizzazzjonijiet internazzjonali attivi fil-qasam tat-taħriġ, jistgħu ikunu assoċjati max-xogħol tal-Fondazzjoni, b'mod partikolari kif provdut f'Artikoli 5(8) u 6 (1) u (2). Artikolu 5 Il-bord li jirregola 1. Il-Fondazzjoni għandu jkollha bord li jirregola li jkun jikkonsisti f'rappreżentant wieħed minn kull Stat Membru u żewġ rappreżentanti tal-Kummissjoni. Membru alternattiv jista’ jirrapreżenta jew jakkompanja lil kull membru tal-bord li jirregola; meta jkun qed jakkompanja membru, il-membru alternattiv għandu jattendi mingħajr ma jkollu d-dritt li jivvota. 2. Ir-rappreżentanti ta' l-Istati Membri għandhom jiġu maħtura mill-Istati Membri konċernati. Il-Kummissjoni għandha taħtar il-membri li għandhom jirrapreżentawha. 3. Il-mandat tar-rappreżentanti għandu jkun ta' tliet snin. Dan għandu jkun jista’ jiġi mġedded. 4. Il-bord li jirregola għandu jkun ippresedut minn wieħed mir-rappreżentanti tal-Kummissjoni. Il-president ma għandux jivvota. Il-bord li jirregola għandu jadotta r-regoli ta' proċedura tiegħu. Kull membru tal-bord li jirregola għandu jkollu vot wieħed. Deċiżjonijiet tal-bord li jirregola għandhom ikollhom maġġoranza ta' żewġ terzi tal-membri tal-bord, barra fil-każ imsemmi fil-paragrafu 5. 5. Il-bord li jirregola għandu jistabilixxi, b'deċiżjoni unanima tal-membri tiegħu, ir-regoli li jirregolaw il-lingwi tal-Fondazzjoni, jieħu kont tal-bżonn li jiġi żgurat l-aċċess, u l-parteċipazzjoni, mill-partijiet kollha interessati fix-xogħol tal-Fondazzjoni. 6. Il-President għandu jlaqqa’ il-bord li jirregola mill-inqas darbtejn fis-sena u fuq talba ta' mill-inqas maġġoranza sempliċi tal-membri tal-bord. Il-President għandu jkun responsabbli sabiex jinforma lill-bord b'attivitajiet oħra tal-Komunità rilevanti għax-xogħol tagħhom u bl-aspettattivi mill-Fondazzjoni fis-sena li tkun ġejja. 7. Fuq il-bażi ta' abbozz ippreżentat mid-direttur tal-Fondazzjoni, u skond il-qafas imfassal fi pjan ta' tliet snin, il-bord li jirregola għandu jadotta, sa mhux aktar tard mit-30 ta' Novembru ta' kull sena, il-programm annwali ta' xogħol tal-Fondazzjoni għas-sena ta' wara f'konsultazzjoni mal-Kummissjoni. Il-proġetti fil-programm annwali ta' xogħol għandu jkun akkumpanjat bi stima tal-ispiża neċessarja. 8. Il-bord li jirregola għandu japprova, kif ikun neċessarju u fuq bażi ta' każ b'każ, it-twaqqif ta' kumitati ta' xogħol ad hoc skond is-settur li jkunu jinvolvu il-pajjiżi jew organizzazzjonijiet kollha li jikkontribwixxu għall-finanzi tal-proġetti differenti konċernati kif ukoll partijiet oħra interessati, inklużi fejn ikun xieraq rappreżentanti ta' sieħba soċjali. 9. Il-bord li jirregola għandu, sa mhux aktar tard mill-31 ta' Marzu ta' kull sena, jippreżenta abbozz ta' rapport annwali dwar l-attivitajiet tal-Fondazzjoni għas-sena ta' qabel u l-iffinanzjar tagħhom lill-Kummissjoni. Il-Kummissjoni għandha tapprova r-rapport annwali u tippreżentah lill-Parlament Ewropew, lill-Kunsill, lill-Kumitat Ekonomiku u Soċjali u lill-Istati Membri. Il-Kummissjoni għandha wkoll tgħaddi dan ir-rapport, għall-informazzjoni, lill-pajjiżi eliġibbli. Artikolu 6 Forum ta' konsulenza 1. Il-Fondazzjoni għandu jkollha forum ta' konsulenza maħtur mill-bord li jirregola. Il-membri tal-forum għandhom jiġu magħżula minn esperti fil-qasam tat-taħriġ u f'oqsma oħra li jkollhom x'jaqsmu max-xogħol tal-Fondazzjoni, u għandu jingħata każ tal-bżonn li tiġi żgurata l-preżenza ta' rappreżentanti tas-sieħba soċjali, ta' dawk l-organizzazzjonijiet internazzjonali li jkunu attivi fl-għoti ta' assistenza fit-taħriġ, u tal-pajjiżi eliġibbli. Għandhom ikunu maħtura żewġ esperti minn kull wieħed mill-Istati Membri, minn kull wieħed mill-pajjiżi eliġibbli u mis-sieħba soċjali fuq livell Ewropew. 2. Il-bord li jirregola għandu jfittex nomini għall-kariga minn: - kull wieħed mill-Istati Membri, - kull wieħed mill-pajjiżi eliġibbli, - is-sieħba soċjali fuq livell Ewropew li jkunu diġà attivi fix-xogħol ta' l-istituzzjonijiet tal-Komunità, u - organizzazzjonijiet internazzjonali rilevanti. 3. Il-mandat tal-forum ta' konsulenza għandu normalment ikun ta' tliet snin, u jkun soġġetta għal reviżjoni regolari mill-bord li jirregola. 4. Ix-xogħol tal-forum ta' konsulenza għandu jkun li jagħti opinjonijiet lill-bord li jirregola fuq talba tal-bord jew fuq inizjattiva tiegħu stess fir-rigward tal-programm annwali ta' xogħol tal-Fondazzjoni msemmi f'Artikolu 5(7). L-opinjonijiet kollha għandhom jiġu kkomunikati lill-bord li jirregola. 5. Id-direttur tal-Fondazzjoni għandu jkun il-president tal-forum ta' konsulenza. Il-forum ta' konsulenza għandu jagħmel ir-regoli ta' proċedura tiegħu, li jkunu soġġetti għall-approvazzjoni tal-bord li jirregola. 6. Il-forum ta' konsulenza għandu jissejjaħ mill-president darba fis-sena. Artikolu 7 Id-direttur 1. Id-direttur tal-Fondazzjoni għandu jiġi maħtur mill-bord li jirregola, fuq proposta mill-Kummissjoni, għal mandat ta' ħames snin, li għandu jkun jista’ jiġi mġedded. Id-direttur għandu jkun responsabbli: - mill-preparazzjoni u l-organizzazzjoni tax-xogħol tal-bord li jirregola, ta' xi kumitati ta' xogħol ad hoc imsejħa mill-bord ta'tmexxija u, b'mod partikolari, mill-preparazzjoni ta' l-abbozz tal-programm annwali ta' xogħol tal-Fondazzjoni, - mill-amministrazzjoni ta' kuljum tal-Fondazzjoni, - mill-preparazzjoni ta' prospett ta' dħul u nfiq u l-esekuzzjoni tal-budget tal-Fondazzjoni, - mill-preparazzjoni u l-pubblikazzjoni ta' rapporti speċifikati taħt dan ir-Regolament, - mill-affarijiet kollha tal-persunal, - milli jwettaq ix-xogħolijiet imsemmija f'Artikolu 3. 2. Id-direttur għandu jkun responsabbli lejn il-bord li jirregola għall-attivitajiet tiegħu u għandu jattendi l-laqgħat tiegħu. 3. Id-direttur għandu jkun ir-rappreżentant legali tal-Fondazzjoni. Artikolu 8 Rabtiet ma’ azzjonijiet oħra tal-Komunità Il-Kummissjoni, f'kooperazzjoni mal-bord li jirregola u, fejn ikun addattat, skond il-proċedura imniżżla f'Artikolu 9 tar-Regolament (KEE) Nru 3906/89, għandha tiżgura konsistenza u, fejn ikun meħtieġ, komplimentarjetà bejn ix-xogħol tal-Fondazzjoni u azzjonijiet oħra fil-livell tal-Komunità, sew ġewwa l-Komunità kif ukoll f'assistenza lill-pajjiżi eliġibbli, b'riferenza partikolari għal azzjonijiet taħt l-iskema Tempus. Artikolu 9 Kontenut tal-budget 1. Għandha tiġi mħejjija stima tad-dħul u l-infiq kollu tal-Fondazzjoni għal kull sena finanzjarja u għandha tiġi murija fil-budget tal-Fondazzjoni, li għandu jinkludi pjan ta' stabbiliment, u kull sena finanzjarja għandha tikkorrispondi mas-sena kalendarja. 2. Id-dħul u nfiq muri fil-budget tal-Fondazzjoni għandu jkun fil-bilanċ. 3. Id-dħul tal-Fondazzjoni għandu jinkludi, mingħajr preġudizzju għal tipi oħra ta' dħul, sussidju mill-budget ġenerali tal-Komunitajiet Ewropej, pagamenti magħmula bħala remunerazzjoni għal servizzi mwettqa kif ukoll finanzjament minn sorsi oħra. 4. Il-budget għandu jinkludi wkoll dettalji ta' fondi li jkunu tpoġġew għad-dispożizzjoni mill-pajjiżi eliġibbli nfushom għal proġetti li jgawdu minn assistenza finanzjarja mill-Fondazzjoni. Artikolu 10 Proċedura tal-budget 1. Id-direttur għandu jistabilixxi kull sena proposta għal abbozz tal-budget għall-Fondazzjoni li tkun tkopri spejjeż kurrenti u l-programm ta' ħidmiet propost għas-sena finanzjarja ta' wara u għandu jippreżentah lill-bord li jirregola. 2. Fuq din il-bażi, il-bord li jirregola għandu, sa mhux aktar tard mill-15 ta' Frar, jadotta abbozz tal-budget għall-Fondazzjoni u jippreżentah lill-Kummissjoni. 3. Il-Kummissjoni għandha tevalwa l-abbozz tal-budget tal-Fondazzjoni waqt li tikkunsidra l-prijoritajiet ta' taħriġ vokazzjonali fil-pajjiżi eliġibbli u l-orjentamenti finanzjarji kumplessivi dwar għajnuna ekonomika lil dawn il-pajjiżi. Għandha tistabbilixxi fuq din il-bażi, u fil-limiti proposti ta' l-ammont kumplessiv li għandu jitpoġġa għad-dispożizzjoni għal għajnuna ekonomika lill-pajjiżi ta' l-Ewropa Ċentrali u tal-Lvant, il-kontribuzzjoni annwali għall-budget tal-Fondazzjoni li għandha tkun inkluża fl-abbozz preliminari tal-budget ġenerali tal-Komunitajiet Ewropej. 4. Il-bord li jirregola, wara li jirċievi il-parir tal-Kummissjoni, għandu jadotta l-budget tal-Fondazzjoni fil-bidu ta' kull sena finanzjarja, u jaġġustah skond il-bosta kontribuzzjonijiet mogħtija lill-Fondazzjoni u lir-riżorsi l-oħra tagħha. Artikolu 11 Implimentazzjoni u kontroll tal-budget 1. Id-direttur għandu jimplimenta l-budget tal-Fondazzjoni. 2. Il-kontroll tar-rabta u ħlas ta' l-infiq kollu u l-annotazzjoni u l-irkupru tad-dħul kollu tal-Fondazzjoni għandu jsir mill-kontrollur finanzjarju maħtur mill-bord li jirregola fuq proposta mill-Kummissjoni. 3. Sa mhux aktar tard mill-31 ta' Marzu ta' kull sena, id-direttur għandu jippreżenta lill-Kummissjoni, lill-bord li jirregola u l-Qorti tal-Awdituri l-kontijiet fid-dettall tad-dħul u l-infiq kollu fis-sena finanzjarja preċedenti. Il-Qorti ta' l-Awdituri għandha teżamina dawn il-kontijiet skond Artikolu 206a tat-Trattat. 4. Il-bord li jirregola għandu jillibera lid-direttur fir-rigward tal-implimentazzjoni tal-budget. Artikolu 12 Regoli finanzjarji Il-bord li jirregola għandu jistabbilixxi, wara konsultazzjoni mill-Kummissjoni u l-Qorti tal-Awdituri, regoli finanzjarji ddettaljati li jispeċifikaw b'mod partikolari l-proċedura għall-istabbiliment u implimentazzjoni tal-budget tal-Fondazzjoni. Artikolu 13 Privileġġi u immunitajiet Il-Protokoll dwar il-privileġġi u immunitajiet tal-Kommunitajiet Ewropej għandu jgħodd għall-Fondazzjoni. Artikolu 14 Regoli tal-persunal Ir-regoli u r-regolamenti li jirregolaw il-persunal statutorju tal-Fondazzjoni, inkluż id-direttur, għandhom ikunu analogi għal dawk imniżżla fir-Regolament tal-Kunsill (KEFA, KEE, Euratom) Nru 1859/76 tad-29 ta' Ġunju 1976 li jipprovdi il-kondizzjonijiet ta' l-impieg ta' persunal taċ-Ċentru Ewropew għall-Iżvilupp ta' Taħriġ Vokazzjonali [5], u għandhom ikunu imniżżla fir-Regolament separat li għandu jkun adottat mill-Kunsill fuq proposta tal-Kummissjoni. Artikolu 15 Responsabbiltà legali 1. Ir-responsabiltà kontrattwali tal-Fondazzjoni għandha tiġi irregolata mill-liġi applikabbli għall-kuntratt imsemmi. 2. Fil-każ ta' responsabiltà mhux kontrattwali, il-Fondazzjoni għandha, skond il-prinċipji ġenerali komuni għall-liġijiet ta' l-Istati Membri, tagħmel tajjeb għal kwalunkwe dannu kkawżat mill-Fondazzjoni jew mill-impjegati tagħha fil-qadi ta' dmirijiethom. Il-Qorti tal-Ġustizzja għandha jkollha ġurisdizzjoni fi kwistjonijiet li jkollhom x'jaqsmu ma’ kumpens għal kwalunkwe dannu ta' dan it-tip. 3. Ir-responsabiltà personali ta' l-impjegati lejn il-Fondazzjoni għandha tkun irregolata mill-provvedimenti rilevanti li japplikaw għall-persunal tal-Fondazzjoni. Artikolu 16 Parteċipazzjoni ta' pajjiżi terzi 1. Il-Fondazzjoni għandha tkun miftuħa għall-parteċipazzjoni ta' pajjiżi li ma jkunux membri tal-Komunità Ewropea, u li jħaddnu l-impenn tal-Komunità u l-Istati Membri għall-għoti ta' għajnuna lill-Ewropa Ċentrali u tal-Lvant fil-qasam tat-taħriġ, taħt arranġamenti li għandhom isiru bi ftehim bejn il-Komunità u dawn l-istess pajjiżi, skond il-proċedura imniżżla fl-Artikolu 228 tat-Trattat. Il-ftehim għandu, inter alia, jispeċifika n-natura u l-firxa ta' u r-regoli fid-dettall tal-parteċipazzjoni minn dawn il-pajjiżi fix-xogħol tal-Fondazzjoni inklużi provvedimenti dwar kontribuzzjonijiet finanzjarji u persunal. 2. Il-parteċipazzjoni ta' dawn il-pajjiżi fil-kumitati ta' xogħol ad hoc imsemmija fl-Artikolu 5(8) tista' tkun deċiża bħala meħtieġa mill-bord li jirregola mingħajr il-ħtieġa ta' ftehim. Artikolu 17 Proċedura ta' kontroll u evalwazzjoni Il-Kummissjoni għandha, f'konsultazzjoni mal-bord li jirregola, tistabbilixxi proċedura ta' kontroll u evalwazzjoni ta' l-esperjenza miksuba fix-xogħol tal-Fondazzjoni. Hija għandha tippreżenta l-ewwel riżultati ta' din il-proċedura f'rapport li għandu jiġi ppreżentat lill-Parlament Ewropew, lill-Kunsill u lill-Kumitat Ekonomiku u Soċjali qabel il-31 ta' Diċembru 1992. Artikolu 18 Reviżjoni Dan ir-Regolament għandu jiġi rivedut mill-Kunsill fuq proposta mill-Kummissjoni fi żmien ħames snin minn mindu jidħol fis-seħħ. Artikolu 19 Dan ir-Regolament għandu jidħol fis-seħħ fil-jum ta' wara dak meta l-awtoritajiet kompetenti ikunu iddeċidew dwar is-sede tal-Fondazzjoni [6]. Dan ir-Regolament għandu jorbot fl-intier tiegħu u hu applikabbli direttament fl-Istati Membri kollha. Magħmul fi Brussel, fis-7 ta' Mejju 1990. Għall-Kunsill Il-President G. Collins [1] ĠU Ċ 86, ta' l-4.4.1990, p. 12. [2] ĠU Ċ 113, tas-7.5.1990. [3] Opinjoni mogħtija fil-25 ta'April 1990 (għadha mhix ippubblikata fil-Ġurnal Uffiċjali). [4] ĠU L 375, tat-23.12.1989, p. 11. [5] ĠU L 214, tas-6.8.1976, p. 1. [6] Id-data tad-dħul fis-seħħ tar-Regolament għandha tiġi ppubblikata fil-Ġurnal Uffiċjali. --------------------------------------------------