31.3.2009

MT

Il-Ġurnal Uffiċjali tal-Unjoni Ewropea

L 84/33

---

DEĊIŻJONI TAL-KUNSILL

tal-21 ta' Mejju 2008

dwar l-iffirmar u l-applikazzjoni proviżorja tal-Ftehim bejn il-Komunità Ewropea u r-Repubblika Iżlamika tal-Pakistan dwar ċerti aspetti tas-servizzi tal-ajru

(2009/302/KE)

IL-KUNSILL TAL-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b’mod partikolari l-Artikolu 80(2), flimkien mal-ewwel sentenza tal-ewwel subparagrafu tal-Artikolu 300(2) tiegħu,

Wara li kkunsidra l-proposta tal-Kummissjoni,

Billi:

(1)	Fil-5 ta’ Ġunju 2003, il-Kunsill awtorizza lill-Kummissjoni sabiex tiftaħ negozjati ma’ pajjiżi terzi dwar it-tibdil ta’ ċerti dispożizzjonijiet fi strumenti ta’ ftehim bilaterali eżistenti bi ftehim Komunitarju.

(2)

Il-Kummissjoni nnegozjat, f’isem il-Komunità, Ftehim mal-Pakistan dwar ċerti aspetti tas-servizzi tal-ajru konformement mal-mekkaniżmi u d-direttivi fl-Anness mad-Deċiżjoni tal-Kunsill tal-5 ta’ Ġunju 2003 li tawtorizza lill-Kummissjoni sabiex tiftaħ negozjati ma’ pajjiżi terzi dwar it-tibdil ta’ ċerti dispożizzjonijiet fi strumenti ta’ ftehim bilaterali eżistenti bi ftehim Komunitarju.

(3)	Suġġett għall-konklużjoni possibbli tiegħu f’data aktar ‘il quddiem, il-Ftehim negozjat mill-Kummissjoni għandu jiġi ffirmat u applikat proviżorjament,

IDDEĊIEDA KIF ĠEJ:

Artikolu 1

L-iffirmar tal-Ftehim bejn il-Komunità Ewropea u r-Repubblika Iżlamika tal-Pakistan dwar ċerti aspetti tas-servizzi tal-ajru huwa b’dan approvat f’isem il-Komunità suġġett għad-Deċiżjoni tal-Kunsill dwar il-konklużjoni tal-imsemmi Ftehim.

It-test tal-Ftehim huwa mehmuż ma’ din id-Deċiżjoni.

Artikolu 2

Il-President tal-Kunsill huwa b’dan awtorizzat jinnomina l-persuna jew persuni li jkollhom is-setgħa li jiffirmaw il-Ftehim f’isem il-Komunità suġġett għall-konklużjoni tiegħu.

Artikolu 3

Sa meta jidħol fis-seħħ, il-Ftehim għandu jiġi applikat proviżorjament mill-ewwel jum tal-ewwel xahar wara d-data li fiha l-Partijiet ikunu nnotifikaw lil xulxin bit-tlestija tal-proċeduri kollha meħtieġa għal dan il-għan.

Artikolu 4

Il-President tal-Kunsill huwa b’dan awtorizzat jagħmel in-notifika prevista fl-Artikolu 8(2) tal-Ftehim.

---

31.3.2009

MT

Il-Ġurnal Uffiċjali tal-Unjoni Ewropea

L 84/34

---

FTEHIM

bejn il-Komunità Ewropea u r-Repubblika Iżlamika tal-Pakistan dwar ċerti aspetti tas-servizzi tal-ajru

IL-KOMUNITÀ EWROPEA

minn naħa waħda, u

R-REPUBBLIKA IŻLAMIKA TAL-PAKISTAN (minn hawn ‘il quddiem “il-Pakistan”)

min-naħa l-oħra

(minn hawn ‘il quddiem “il-Partijiet”)

FILWAQT LI JINNUTAW li ċerti dispożizzjonijiet fi strumenti ta’ ftehim bilaterali dwar is-servizzi tal-ajru bejn bosta Stati Membri tal-Komunità Ewropea u r-Repubblika Iżlamika tal-Pakistan jeħtiġilhom jinġiebu konformi mal-leġiżlazzjoni tal-Komunità,

FILWAQT LI JINNUTAW li l-Komunità Ewropea għandha l-kompetenza esklussiva fir-rigward ta’ bosta aspetti li jistgħu jiġu inklużi fi ftehim bilaterali dwar is-servizzi tal-ajru bejn l-Istati Membri tal-Komunità Ewropea u pajjiżi terzi,

FILWAQT LI JINNUTAW li t-trasportaturi tal-ajru Komunitarji stabbiliti f’xi wieħed mill-Istati Membri ingħataw id-dritt, mill-Komunità Ewropea skont il-leġiżlazzjoni tal-Komunità, għal aċċess mhux diskriminatorju għar-rotot tal-ajru bejn dak l-Istat Membru u pajjiżi terzi,

FILWAQT LI JIKKUNSIDRAW l-istrumenti ta’ ftehim bejn il-Komunità Ewropea u l-erba’ pajjiżi Ewropej elenkati fl-Anness III li jipprovdu dwar il-possibbiltà għaċ-ċittadini ta’ dawn il-pajjiżi li jiksbu dritt ta’ sjieda fi trasportaturi tal-ajru mogħtija liċenzja f’konformità mal-leġiżlazzjoni tal-Komunità Ewropea,

FILWAQT LI JAGĦRFU li l-aspetti kollha relatati ma’ strumenti ta’ ftehim bilaterali dwar is-servizzi tal-ajru bejn l-Istati Membri tal-Komunità Ewropea u r-Repubblika Iżlamika tal-Pakistan jeħtiġilhom ikunu konformi mal-liġijiet tal-partijiet sabiex tiġi stabbilita bażi ġuridika soda għas-servizzi tal-ajru bejn il-Komunità Ewropea u r-Repubblika Iżlamika tal-Pakistan u sabiex tinżamm il-kontinwità ta’ servizzi tal-ajru bħal dawn,

FILWAQT LI JINNUTAW li d-dispożizzjonijiet ta’ strumenti ta’ ftehim bilaterali dwar is-servizzi tal-ajru bejn l-Istati Membri tal-Komunità Ewropea u r-Repubblika Iżlamika tal-Pakistan, li ma jmorrux kontra l-leġiżlazzjoni tal-Komunità Ewropea u dik tal-Pakistan, ma għandhomx bżonn jiġu milquta minn dan il-Ftehim,

FILWAQT LI JAGĦRFU li d-dispożizzjonijiet fi strumenti ta’ ftehim bilaterali dwar is-servizzi tal-ajru konklużi bejn l-Istati Membri tal-Komunità Ewropea u r-Repubblika Iżlamika tal-Pakistan li i) jirrikjedu jew jiffavorixxu l-adozzjoni ta’ ftehim bejn impriżi, deċiżjonijiet minn assoċjazzjonijiet ta’ impriżi jew prattiki kkonċertati li jipprevjenu, jgħawġu jew jirrestrinġu l-kompetizzjoni bejn it-trasportaturi tal-ajru fuq ir-rotot rilevanti; jew (ii) isaħħu l-effetti ta’ kwalunkwe ftehim, deċiżjoni jew prattika kkonċertata ta’ dan it-tip; jew iii) jiddelegaw lit-trasportaturi tal-ajru jew lil operaturi ekonomiċi privati oħrajn ir-responsabbiltà għat-teħid ta’ miżuri li jipprevjenu, jgħawġu jew jirrestrinġu l-kompetizzjoni bejn it-trasportaturi tal-ajru fuq ir-rotot rilevanti, jistgħu jrendu mhux effettivi r-regoli tal-kompetizzjoni applikabbli għall-impriżi,

FILWAQT LI JINNUTAW li, f’dan il-Ftehim, mhuwiex għan tal-Komunità Ewropea u tar-Repubblika Iżlamika tal-Pakistan li jiżdied il-volum totali tat-traffiku tal-ajru bejn il-Komunità Ewropea u r-Repubblika Iżlamika tal-Pakistan, li jiġi milqut il-bilanċ bejn it-trasportaturi tal-ajru tal-Komunità u t-trasportaturi tal-ajru tar-Repubblika Iżlamika tal-Pakistan, jew li jiġu emendati d-dispożizzjonijiet ta’ strumenti ta’ ftehim bilaterali eżistenti dwar is-servizzi tal-ajru rigward id-drittijiet tat-traffiku,

FTIEHMU KIF ĠEJ:

Artikolu 1

Dispożizzjonijiet ġenerali

1.   Għall-finijiet ta’ dan il-Ftehim, “Stati Membri” tfisser l-Istati Membri tal-Komunità Ewropea.

2.   Ir-referenzi f’kull ftehim elenkat fl-Anness I għaċ-ċittadini tal-Istat Membru li huwa parti fil-ftehim għandhom jinftiehmu bħala referenzi għaċ-ċittadini tal-Istati Membri tal-Komunità Ewropea.

3.   Ir-referenzi f’kull ftehim elenkat fl-Anness I għat-trasportaturi tal-ajru jew linji tal-ajru tal-Istat Membru li huwa parti fil-ftehim għandhom jinftiehmu bħala referenzi għat-trasportaturi tal-ajru jew linji tal-ajru nominati minn dak l-Istat Membru.

Artikolu 2

Nomina minn Stat Membru

1.   Id-dispożizzjonijiet fil-paragrafi 2 u 3 ta’ dan l-Artikolu għandhom jirbħu fuq id-dispożizzjonijiet li jikkorrispondu magħhom fl-artikoli elenkati fl-Anness II(a) u (b) rispettivament, f’dak li għandu x’jaqsam man-nomina tat-trasportatur tal-ajru mill-Istat Membru kkonċernat, l-awtorizzazzjonijiet u l-permessi tiegħu mogħtija mir-Repubblika Iżlamika tal-Pakistan, u r-rifjut, ir-revoka, is-sospensjoni jew il-limitazzjoni tal-awtorizzazzjonijiet jew il-permessi tat-trasportatur tal-ajru, rispettivament.

2.   Malli tirċievi nomina mingħand Stat Membru tal-Komunità Ewropea, ir-Repubblika Iżlamika tal-Pakistan għandha tagħti l-awtorizzazzjonijiet u l-permessi meħtieġa bl-anqas dewmien proċedurali, sakemm:

(i)	it-trasportatur tal-ajru jkun stabbilit fit-territorju tal-Istat Membru li jinnomina skont it-Trattat li jistabbilixxi l-Komunità Ewropea u li għandu Liċenzja Operattiva valida maħruġa minn Stat Membru f’konformità mal-leġiżlazzjoni tal-Komunità Ewropea; kif ukoll

(ii)	jiġi eżerċitat u jinżamm kontroll regolatorju effettiv tat-trasportatur tal-ajru mill-Istat Membru responsabbli għall-ħruġ taċ-Ċertifikat ta’ Operatur tal-Ajru tiegħu u l-awtorità ajrunawtika rilevanti tkun identifikata b’mod ċar fin-nomina; kif ukoll

(iii)

it-trasportatur tal-ajru jkun proprjetà, direttament jew permezz tal-akbar sehem azzjonarju, ta’, u jkun kontrollat effettivament minn, l-Istati Membri u/jew miċ-ċittadini tal-Istati Membri, u/jew mill-Istati l-oħra elenkati fl-Anness III u/jew miċ-ċittadini ta’ dawn l-Istati l-oħra; kif ukoll

(iv)	it-trasportatur tal-ajru ikollu l-post prinċipali tan-negozju tiegħu fit-territorju tal-Istat Membru li jkun ħariġlu l-Liċenzja Operattiva valida tiegħu.

3.   Ir-Repubblika Iżlamika tal-Pakistan tista’ tirrifjuta, tirrevoka, tissospendi jew tillimita l-awtorizzazzjonijiet jew il-permessi ta’ trasportatur tal-ajru nnominat minn Stat Membru fejn:

(i)	it-trasportatur tal-ajru ma jkunx stabbilit fit-territorju tal-Istat Membru li nnominah skont it-Trattat li jistabbilixxi l-Komunità Ewropea jew ma għandux Liċenzja Operattiva valida minn Stat Membru f’konformità mal-liġi tal-Komunità Ewropea; jew

(ii)	ma jitħaddimx jew ma jinżammx kontroll regolatorju effettiv tat-trasportatur tal-ajru mill-Istat Membru responsabbli għall-ħruġ taċ-Ċertifikat tiegħu tal-Operatur tal-Ajru, jew l-awtorità ajrunawtika rilevanti ma tkunx identifikata biċ-ċar fin-nomina; jew

(iii)

it-trasportatur tal-ajru ma jkunx proprjetà, direttament jew permezz tal-akbar sehem azzjonarju, ta’, jew ma jkunx kontrollat effettivament mill-Istati Membri u/jew miċ-ċittadini tal-Istati Membri, u/jew mill-Istati l-oħra elenkati fl-Anness III u/jew miċ-ċittadini ta’ dawn l-Istati l-oħra; jew

(iv)	it-trasportatur tal-ajru ma jkollux il-post prinċipali tan-negozju tiegħu fit-territorju tal-Istat Membru li jkun ħariġlu l-Liċenzja Operattiva valida tiegħu. jew

(v)

it-trasportatur tal-ajru jkun diġà awtorizzat li jopera fl-ambitu ta’ ftehim bilaterali bejn ir-Repubblika Iżlamika tal-Pakistan u xi Stat Membru ieħor u, billi jeżerċita d-drittijiet tat-traffiku fl-ambitu ta’ dan il-Ftehim fuq rotta li tinkludi punt f’dak l-Istat Membru l-ieħor, dan ikun qed jevita r-restrizzjonijiet fuq id-drittijiet tat-traffiku imposti minn dak il-ftehim l-ieħor; jew

(vi)

it-trasportatur tal-ajru nnominat ikun fil-pussess ta’ Ċertifikat tal-Operaturi tal-Ajru u Liċenzja Operattiva maħruġin minn Stat Membru li miegħu r-Repubblika Iżlamika tal-Pakistan ma għandhiex ftehim bilaterali dwar is-servizzi tal-ajru, u dak l-Istat Membru jkun ċaħad lil trasportatur tal-ajru b’liċenzja maħruġa mir-Repubblika Iżlamika tal-Pakistan id-drittijiet tat-traffiku jew l-opportunitajiet kummerċjali relatati.

4.   Hija u tħaddem id-dritt tagħha skont il-paragrafu 3, ir-Repubblika Iżlamika tal-Pakistan ma għandhiex tiddiskrimina bejn trasportaturi tal-ajru tal-Komunità abbażi tan-nazzjonalità, bil-kundizzjoni li jissodisfaw ir-rekwiżiti ta’ hawn fuq.

Artikolu 3

Is-sikurezza

1.   Id-dispożizzjonijiet fil-paragrafu 2 ta’ dan l-Artikolu għandhom jikkomplementaw id-dispożizzjonijiet korrispondenti fl-artikoli elenkati fl-Anness II(c).

2.   Fejn Stat Membru jkun innomina trasportatur tal-ajru li l-kontroll regolatorju tiegħu huwa mħaddem u miżmum minn Stat Membru ieħor, id-drittijiet tar-Repubblika Iżlamika tal-Pakistan skont id-dispożizzjonijiet ta’ sikurezza tal-ftehim bejn l-Istat Membru li nnomina t-trasportatur tal-ajru u r-Repubblika Iżlamika tal-Pakistan għandhom japplikaw b’mod ugwali fir-rigward tal-adozzjoni, it-tħaddim jew iż-żamma tal-istandards tas-sikurezza minn dak l-Istat Membru l-ieħor u fir-rigward tal-awtorizzazzjoni għall-operat ta’ dak it-trasportatur tal-ajru.

Artikolu 4

It-tariffi għall-ġarr fi ħdan il-Komunità Ewropea

1.   Id-dispożizzjonijiet fil-paragrafu 2 ta’ dan l-Artikolu għandhom jikkomplementaw id-dispożizzjonijiet li jikkorrispondu magħhom fl-artikoli elenkati fl-Anness II(d).

2.   It-tariffi li għandhom jinżammu mit-trasportatur/i tal-ajru nnominat/i mir-Repubblika Iżlamika tal-Pakistan permezz ta’ ftehim elenkat fl-Anness I li fih dispożizzjoni elenkata fl-Anness II(d) għal ġarr li jseħħ kollu kemm hu fi ħdan il-Komunità Ewropea għandhom ikunu suġġetti għal-leġiżlazzjoni tal-Komunità Ewropea. Il-leġiżlazzjoni tal-Komunità Ewropea hija applikata fuq bażi mhux diskriminatorja.

Artikolu 5

Kompatibbiltà mar-regoli tal-kompetizzjoni

1.   Minkejja kull dispożizzjoni oħra għall-kuntrarju, xejn f’kull wieħed mill-ftehim elenkati fl-Anness I ma għandu (i) jiffavorixxi l-adozzjoni ta’ akkordji bejn impriżi, deċiżjonijiet minn assoċjazzjonijiet ta’ impriżi jew prattiki kkonċertati li jipprevjenu, jgħawġu jew jirrestrinġu l-kompetizzjoni; (ii) isaħħaħ l-effetti ta’ kwalunkwe akkordju, deċiżjoni jew prattika kkonċertata ta’ dan it-tip; jew (iii) jiddelega lill-operaturi ekonomiċi privati r-responsabbiltà għat-teħid ta’ miżuri li jipprevjenu, jgħawġu jew jirrestrinġu l-kompetizzjoni.

2.   Id-dispożizzjonijiet fil-ftehim elenkati fl-Anness I li mhumiex kompatibbli mal-paragrafu 1 ta’ dan l-Artikolu ma għandhomx jiġu applikati.

Artikolu 6

Annessi ma’ dan il-Ftehim

L-Annessi ma’ dan il-Ftehim għandhom jiffurmaw parti integrali minnu.

Artikolu 7

Reviżjoni jew emendament

Il-Partijiet jistgħu, f’kull ħin, jirrivedu jew jemendaw dan il-Ftehim b’kunsens reċiproku. Kull waħda mill-Partijiet tista’, fi kwalunkwe waqt, titlob konsultazzjonijiet bil-għan li jiġi rivedut jew emendat dan il-Ftehim b’kunsens reċiproku, u l-parti l-oħra għandha twieġeb għal din it-talba sa mhux aktar tard minn 60 (sittin) jum wara li tkun saret it-talba għall-konsultazzjoni.

Artikolu 8

Dħul fis-seħħ u applikazzjoni provviżorja

1.   Dan il-Ftehim għandu jidħol fis-seħħ meta l-Partijiet ikunu nnotifikaw lil xulxin bil-miktub li l-proċeduri interni rispettivi meħtieġa għad-dħul fis-seħħ tiegħu jkunu tlestew.

2.   Minkejja l-paragrafu 1, il-Partijiet jaqblu li japplikaw dan il-Ftehim provviżorjament mill-ewwel jum tax-xahar wara d-data li fiha l-Partijiet ikunu nnotifikaw lil xulxin li l-proċeduri kollha meħtieġa għal dan il-għan ikunu tlestew.

3.   Jinsabu elenkati fl-Anness I(b) dawk l-istrumenti ta’ ftehim u arranġamenti oħra bejn l-Istati Membri u r-Repubblika Iżlamika tal-Pakistan li, fid-data tal-iffirmar ta’ dan il-Ftehim, għadhom ma daħlux fis-seħħ u m’humiex qed jiġu applikati provviżorjament. Dan il-Ftehim għandu japplika għal dawn l-istrumenti ta’ ftehim u arranġamenti kollha mad-dħul fis-seħħ jew mal-applikazzjoni provviżorja tagħhom.

Artikolu 9

Terminazzjoni

1.   Fil-każ li ftehim elenkat fl-Anness I jiġi tterminat, id-dispożizzjonijiet kollha ta’ dan il-Ftehim li għandhom x’jaqsmu mal-ftehim elenkat fl-Anness I ikkonċernat għandhom jiġu tterminati fl-istess ħin.

2.   Fil-każ li l-istrumenti ta’ ftehim kollha elenkati fl-Anness I jiġu tterminati, dan il-Ftehim jiġi tterminat fl-istess ħin.

---

ANNESS I

Lista provviżorja ta’ strumenti ta’ ftehim imsemmija fl-Artikolu 1 ta’ dan il-Ftehim

(a)

Ftehim dwar is-servizzi tal-ajru bejn ir-Repubblika Iżlamika tal-Pakistan u l-Istati Membri tal-Komunità Ewropea li, fid-data tal-iffirmar ta’ dan il-Ftehim, kienu ġew konklużi, iffirmati u/jew qed jiġu applikati provviżorjament — Il-Ftehim bejn il-Gvern Federali tal-Awstrija u l-Gvern tar-Repubblika Iżlamika tal-Pakistan dwar is-servizzi tal-ajru magħmul f’Rawalpindi fit-28 ta’ Mejju 1971, minn hawn ‘il quddiem “il-Ftehim Pakistan-Awstrija” fl-Anness II; Emendat l-aħħar bil-Memorandum ta’ Qbil magħmul f’Iżlamabad fis-27 ta’ Settembru 2006, minn hawn ‘il quddiem “il-Memorandum ta’ Qbil Pakistan-Awstrija” fl-Anness II; — Il-Ftehim bejn il-Gvern tar-Repubblika tal-Poplu tal-Bulgarija u l-Gvern tar-Repubblika Iżlamika tal-Pakistan dwar is-servizzi tal-ajru magħmul f’Iżlamabad fit-22 ta’ Ottubru 1969, minn hawn ‘il quddiem “il-Ftehim Pakistan-Bulgarija” fl-Anness II; — Il-Ftehim bejn il-Gvern tar-Repubblika Soċjalista taċ-Ċekoslovakkja u l-Gvern tar-Repubblika Iżlamika tal-Pakistan dwar is-servizzi tal-ajru magħmul fi Praga fit-2 ta’ Settembru 1969, minn hawn ‘il quddiem “il-Ftehim Pakistan-Repubblika Ċeka” fl-Anness II; — Il-Ftehim bejn il-Gvern tar-Renju tad-Danimarka u l-Gvern tar-Repubblika Iżlamika tal-Pakistan dwar is-servizzi tal-ajru magħmul f’Oslo fit-23 ta’ Marzu 1999, minn hawn ‘il quddiem “l-Abbozz ta' Ftehim Pakistan-Danimarka” fl-Anness II; Supplimentat bil-Memorandum ta’ Qbil bejn il-pajjiżi Skandinavi u l-Pakistan magħmul f’Oslo fit-23 ta’ Marzu 1999; — Il-Ftehim bejn il-Gvern tar-Repubblika Franċiża u l-Gvern tal-Pakistan dwar is-servizzi tal-ajru magħmul f’Karachi fil-31 ta’ Lulju 1950, minn hawn ‘il quddiem “il-Ftehim Pakistan-Franza” fl-Anness II; Emendat bi skambju ta’ noti fid-29 ta’ Awwissu u fl-20 u l-31 ta’ Ottubru 1960; Emendat bi skambju ta’ noti fit-2 u d-9 ta’ Lulju 1974; — Il-Ftehim bejn ir-Repubblika Federali tal-Ġermanja u l-Pakistan dwar it-trasport tal-ajru magħmul f’Bonn fl-20 ta’ Lulju 1960, minn hawn ‘il quddiem “il-Ftehim Pakistan-Ġermanja” fl-Anness II; Għandu jinqara flimkien mal-Minuti Miftiehma magħmula f’Bonn fit-12 ta’ Novembru 1998; — Il-Ftehim bejn il-Gvern tar-Repubblika Ellenika u l-Gvern tar-Repubblika Iżlamika tal-Pakistan dwar is-servizzi tal-ajru magħmul f’Ateni fil-15 ta’ Novembru 2005, minn hawn ‘il quddiem “il-Ftehim Pakistan-Greċja” fl-Anness II; — Il-Ftehim bejn il-Gvern tar-Repubblika tal-Poplu tal-Ungerija u l-Gvern tar-Repubblika Iżlamika tal-Pakistan dwar is-servizzi tal-ajru magħmul f’Budapest fil-11 ta’ Mejju 1977, minn hawn ‘il quddiem “il-Ftehim Pakistan-Ungerija” fl-Anness II; — Il-Ftehim bejn il-Gvern tar-Repubblika Taljana u l-Gvern tar-Repubblika Iżlamika tal-Pakistan dwar is-servizzi tal-ajru magħmul f’Ruma fil-5 ta’ Ottubru 1957, minn hawn ‘il quddiem “il-Ftehim Pakistan-Italja” fl-Anness II; Emendat bil-Memorandum ta’ Qbil magħmul f’Ruma fis-16 ta’ Jannar 1974; Emendat l-aħħar bil-Memorandum ta’ Qbil magħmul f’Ruma fl-24 ta’ Marzu 2004; — Il-Ftehim bejn il-Gvern tar-Repubblika ta’ Malta u l-Gvern tar-Repubblika Iżlamika tal-Pakistan dwar is-servizzi tal-ajru magħmul fil-Belt Valletta fil-25 ta’ April 1975, minn hawn ‘il quddiem “il-Ftehim Pakistan-Malta” fl-Anness II; — Il-Ftehim bejn il-Gvern tar-Renju Olandiż u l-Gvern tal-Pakistan dwar is-servizzi tal-ajru magħmul f’Karachi fis-17 ta’ Lulju 1952; minn hawn ‘il quddiem “il-Ftehim Pakistan-Olanda” fl-Anness II; Emendat bil-Minuti Miftiehma magħmula fl-Aja fis-27 ta’ April 1995; Emendat bil-Minuti Miftiehma magħmula fl-Aja fit-28 ta’ Ġunju 1995; Emendat bil-Memorandum ta’ Qbil magħmul f’Bhurban fis-16 ta’ Novembru 1995; — L-Abbozz ta’ Ftehim dwar is-servizzi tal-ajru bejn il-Gvern tar-Renju tal-Olanda u l-Gvern tal-Pakistan magħmul f’Bhurban fis-16 ta’ Novembru 1995, minn hawn ‘il quddiem “l-Abbozz ta' Ftehim Pakistan-Olanda” fl-Anness II; Emendat bil-Minuti Miftiehma magħmula fl-Aja fil-25 ta’ Marzu 1997; Emendat l-aħħar bil-Memorandum Kunfidenzjali ta’ Qbil magħmul f’Karachi fit-28 ta’ Novembru 1998; — Il-Ftehim bejn il-Gvern tar-Repubblika tal-Poplu tal-Polonja u l-Gvern tar-Repubblika Iżlamika tal-Pakistan dwar is-servizzi tal-ajru magħmul f’Rawalpindi fit-30 ta’ Ottubru 1970, minn hawn ‘il quddiem “il-Ftehim Pakistan-Polonja” fl-Anness II; — Il-Ftehim bejn il-Gvern tar-Repubblika Iżlamika tal-Pakistan u l-Gvern tal-Portugall dwar is-servizzi tal-ajru magħmul f’Karachi fis-7 ta’ Ġunju 1958, minn hawn ‘il quddiem “il-Ftehim Pakistan-Portugall” fl-Anness II; — Il-Ftehim bejn il-Gvern tar-Repubblika Iżlamika tal-Pakistan u l-Gvern tar-Renju ta’ Spanja dwar it-trasport tal-ajru magħmul f’Madrid fid-19 ta’ Ġunju 1979, minn hawn ‘il quddiem “il-Ftehim Pakistan-Spanja” fl-Anness II; Emendat bi skambju ta’ noti fl-20 u d-29 ta’ Lulju 1988; — Il-Ftehim bejn il-Gvern tar-Repubblika Soċjalista tar-Rumanija u l-Gvern tar-Repubblika Iżlamika tal-Pakistan dwar is-servizzi tal-ajru magħmul f’Rawalpindi fid-9 ta’ Jannar 1973, minn hawn ‘il quddiem “il-Ftehim Pakistan-Rumanija” fl-Anness II; — Il-Ftehim bejn il-Gvern tar-Renju tal-Iżvezja u l-Gvern tar-Repubblika Iżlamika tal-Pakistan dwar is-servizzi tal-ajru magħmul f’Oslo fit-23 ta’ Marzu 1999, minn hawn ‘il quddiem “il-Ftehim Pakistan-Żvezja” fl-Anness II; Supplimentat bil-Memorandum ta’ Qbil bejn il-pajjiżi Skandinavi u l-Pakistan magħmul f’Oslo fit-23 ta’ Marzu 1999. — Il-Ftehim bejn il-Gvern tar-Renju Unit tal-Gran Brittanja u l-Irlanda ta’ Fuq u l-Gvern tar-Repubblika Iżlamika tal-Pakistan dwar is-servizzi tal-ajru, magħmul f’Karachi fl-14 ta’ Settembru 1999, minn hawn ‘il quddiem “Ftehim Pakistan-Renju Unit” fl-Anness II; Emendat bil-Memorandum ta’ Qbil magħmul f’Londra fid-9 ta’ Frar 2000.

(b)

Ftehim dwar is-servizzi tal-ajru u arranġamenti oħra inizjalati jew iffirmati bejn ir-Repubblika Iżlamika tal-Pakistan u Stati Membri tal-Komunità Ewropea li, fid-data tal-iffirmar ta’ dan il-Ftehim, kienu għadhom ma daħlux fis-seħħ u mhux qed jiġu applikati provviżorjament: — Il-Ftehim bejn il-Gvern tar-Repubblika Iżlamika tal-Pakistan u l-Gvern tal-Gran Dukat tal-Lussemburgu dwar is-servizzi tal-ajru inizjalat f’Karachi fl-14 ta’ Ottubru 1997, minn hawn ‘il quddiem “il-Ftehim Pakistan-Lussemburgu” fl-Anness II; Supplimentat bil-Memorandum ta’ Qbil iffirmat f’Karachi fl-14 ta’ Ottubru 1997.

---

ANNESS II

Lista proviżorja ta’ Artikoli fil-ftehim elenkati fl-Anness I u msemmija fl-Artikoli 2 sa 4 ta’ dan il-Ftehim

(a)

Nomina minn Stat Membru: — L-Artikoli 3 tal-Ftehim Pakistan-Awstrija u 2a tal-Memorandum ta’ Qbil Pakistan-Awstrija magħmul f’Iżlamabad fis-27 ta’ Settembru 2006; — L-Artikolu III tal-Ftehim Pakistan-Bulgarija; — L-Artikolu III tal-Ftehim Pakistan-Repubblika Ċeka; — L-Artikolu 3 tal-Abbozz ta' Ftehim Pakistan-Danimarka; — L-Artikolu 2 tal-Ftehim Pakistan-Franza; — L-Artikolu 3 tal-Ftehim Pakistan-Ġermanja; — L-Artikolu 3 tal-Ftehim Pakistan-Greċja; — L-Artikolu 3 tal-Ftehim Pakistan-Ungerija; — L-Artikolu II tal-Ftehim Pakistan-Italja; — L-Artikolu 3 tal-Ftehim Pakistan-Malta; — L-Artikolu III tal-Ftehim Pakistan-Polonja; — L-Artikolu II tal-Ftehim Pakistan-Portugall; — L-Artikolu III tal-Ftehim Pakistan-Rumanija; — L-Artikolu 3 tal-Ftehim Pakistan-Spanja; — L-Artikolu 3 tal-Abbozz ta' Ftehim Pakistan-Żvezja; — L-Artikolu 4 tal-Ftehim Pakistan-Renju Unit.

(b)

Rifjut, revoka, sospensjoni jew limitazzjoni ta’ awtorizzazzjonijiet jew permessi: — L-Artikoli 4 tal-Ftehim Pakistan-Awstrija u 2b tal-Memorandum ta’ Qbil Pakistan-Awstrija; — L-Artikolu IV tal-Ftehim Pakistan-Bulgarija; — L-Artikolu IV tal-Ftehim Pakistan-Repubblika Ċeka; — L-Artikolu 4 tal-Abbozz ta' Ftehim Pakistan-Danimarka; — L-Artikolu 2 tal-Ftehim Pakistan-Franza; — L-Artikolu 4 tal-Ftehim Pakistan-Ġermanja; — L-Artikolu 4 tal-Ftehim Pakistan-Greċja; — L-Artikolu 4 tal-Ftehim Pakistan-Ungerija; — L-Artikolu VIII tal-Ftehim Pakistan-Italja; — L-Artikolu 4 tal-Ftehim Pakistan-Lussemburgu; — L-Artikolu 4 tal-Ftehim Pakistan-Malta; — L-Artikolu VIII tal-Ftehim Pakistan-Olanda; — L-Artikolu IV tal-Ftehim Pakistan-Polonja; — L-Artikolu VIII tal-Ftehim Pakistan-Portugall; — L-Artikolu IV tal-Ftehim Pakistan-Rumanija; — L-Artikolu 4 tal-Ftehim Pakistan-Spanja; — L-Artikolu 4 tal-Abbozz tal-Ftehim Pakistan-Żvezja; — L-Artikolu 5 tal-Ftehim Pakistan-Renju Unit.

(c)

Sikurezza: — L-hemża D għall-Memorandum ta’ Qbil Pakistan-Awstrija; — L-Artikolu V tal-Ftehim Pakistan-Bulgarija; — L-Artikolu V tal-Ftehim Pakistan-Repubblika Ċeka; — L-Artikolu 16 tal-Abbozz tal-Ftehim Pakistan-Danimarka; — L-Artikolu 8 tal-Ftehim Pakistan-Greċja; — L-Artikolu 5 tal-Ftehim Pakistan-Ungerija; — L-Artikolu II tal-Ftehim Pakistan-Italja; — L-Artikolu 6 tal-Ftehim Pakistan-Ġermanja; — L-Artikolu 5 tal-Ftehim Pakistan-Malta; — L-Appendiċi II għall-Minuti Miftiehma Pakistan-Olanda tal-25 ta’ Marzu 1997; — L-Artikolu V tal-Ftehim Pakistan-Rumanija; — L-Artikolu 5 tal-Ftehim Pakistan-Spanja; — L-Artikolu 16 tal-Abbozz tal-Ftehim Pakistan-Żvezja.

(d)

Tariffi għall-Ġarr fi ħdan il-Komunità Ewropea: — L-Artikolu 9 tal-Ftehim Pakistan-Awstrija; — L-Artikolu VIII tal-Ftehim Pakistan-Bulgarija; — L-Artikolu VIII tal-Ftehim Pakistan-Repubblika Ċeka; — L-Artikolu 11 talAbbozz tal-Ftehim Pakistan-Danimarka; — L-Artikolu 6 tal-Ftehim Pakistan-Franza; — L-Anness 4 għall-Minuti Miftiehma magħmula f’Bonn fit-12 ta’ Novembru 1998-kif applikati provviżorjament fil-qafas tal-Ftehim Pakistan-Ġermanja; — L-Artikolu 13 tal-Ftehim Pakistan-Greċja; — L-Artikolu 9 tal-Ftehim Pakistan-Ungerija; — L-Artikolu VI tal-Ftehim Pakistan-Italja; — L-Artikolu 10 tal-Ftehim Pakistan-Lussemburgu; — L-Artikolu 9 tal-Ftehim Pakistan-Malta; — L-Artikolu VI tal-Ftehim Pakistan-Olanda; — L-Artikolu VIII tal-Ftehim Pakistan-Polonja; — L-Artikolu VI tal-Ftehim Pakistan-Portugall; — L-Artikolu IX tal-Ftehim Pakistan-Rumanija; — L-Artikolu 9 tal-Ftehim Pakistan-Spanja; — L-Artikolu 11 talAbbozz tal-Ftehim Pakistan-Żvezja; — L-Artikolu 7 tal-Ftehim Pakistan-Renju Unit.

---

ANNESS III

Lista ta’ Stati oħra msemmija fl-Artikolu 2 ta’ dan il-Ftehim

(a)	Ir-Repubblika tal-Iżlanda (skont il-Ftehim dwar iż-Żona Ekonomika Ewropea);

(b)	Il-Prinċipat tal-Liechtenstein (skont il-Ftehim dwar iż-Żona Ekonomika Ewropea);

(c)	Ir-Renju Norveġiż (skont il-Ftehim dwar iż-Żona Ekonomika Ewropea);

(d)	Il-Konfederazzjoni Żvizzera (skont il-Ftehim bejn il-Komunità Ewropea u l-Konfederazzjoni Żvizzera dwar it-Trasport tal-Ajru).