(1)

F’konformità mal-Artikolu 25(2) tad-Deċiżjoni 2008/615/ĠAI, il-forniment ta’ data personali previst taħt dik id-Deċiżjoni ma jistax isir sakemm id-dispożizzjonijiet ġenerali dwar il-protezzjoni tad-data stipulati fil-Kapitolu 6 ta’ dik id-Deċiżjoni ma jkunux ġew implimentati fil-liġi nazzjonali tat-territorji tal-Istati Membri involuti f’tali forniment.

(2)

L-Artikolu 20 tad-Deċiżjoni tal-Kunsill 2008/616/ĠAI (3) jipprevedi li l-verifika li l-kondizzjoni msemmija fil-premessa 1 tkun ġiet issodisfata fir-rigward tal-iskambju awtomatizzat ta’ data f’konformità mal-Kapitolu 2 tad-Deċiżjoni 2008/615/ĠAI għandha ssir abbażi ta’ rapport ta’ evalwazzjoni bbażat fuq kwestjonarju, żjara ta’ evalwazzjoni u prova pilota.

(3)

F’konformità mal-Kapitolu 4, punt 1.1, tal-Anness għad-Deċiżjoni 2008/616/ĠAI, il-kwestjonarju mfassal mill-Grupp ta’ Ħidma rilevanti tal-Kunsill jikkonċerna kull wieħed mill-iskambji awtomatizzati ta’ data u għandu jitwieġeb minn Stat Membru hekk kif huwa jemmen li huwa jissodisfa l-prerekwiżiti għall-kondiviżjoni tad-data fil-kategorija rilevanti ta’ data.

(4)

Il-Greċja lestiet il-kwestjonarju dwar il-protezzjoni tad-data u l-kwestjonarju dwar l-iskambju tad-data tar-reġistrazzjoni tal-vetturi (VRD).

(5)

Il-Greċja wettqet b’suċċess prova pilota man-Netherlands.

(6)

Saret żjara ta’ evalwazzjoni fil-Greċja u t-tim ta’ evalwazzjoni Netherlandiż u Ċiprijott ħejja rapport dwar iż-żjara ta’ evalwazzjoni li ntbagħat lill-Grupp ta’ Ħidma rilevanti tal-Kunsill.

(7)

Ġie ppreżentat lill-Kunsill rapport ta’ evalwazzjoni ġenerali, li jiġbor fil-qosor ir-riżultati tal-kwestjonarju, taż-żjara ta’ evalwazzjoni u tal-prova pilota fir-rigward tal-iskambju ta’ data tar-reġistrazzjoni tal-vetturi.

(8)

Fid-9 ta’ Diċembru 2021, il-Kunsill, wara li ħa nota tal-qbil tal-Istati Membri kollha marbutin bid-Deċiżjoni 2008/615/ĠAI, ikkonkluda li l-Greċja implimentat għalkollox id-dispożizzjonijiet ġenerali dwar il-protezzjoni tad-data stipulati fil-Kapitolu 6 tad-Deċiżjoni 2008/615/ĠAI.

(9)

Għalhekk, għall-finijiet ta’ tiftix awtomatizzat tal-VRD, jenħtieġ li l-Greċja tkun intitolata li tirċievi u tforni data personali skont l-Artikolu 12 tad-Deċiżjoni 2008/615/ĠAI.

(10)

L-Artikolu 33 tad-Deċiżjoni 2008/615/ĠAI jagħti setgħat ta’ implimentazzjoni lill-Kunsill bil-ħsieb tal-adozzjoni tal-miżuri neċessarji għall-implementazzjoni ta’ dik id-Deċiżjoni, b’mod partikolari fir-rigward tar-riċezzjoni u l-forniment ta’ data personali previsti taħt dik id-Deċiżjoni.

(11)

Peress li l-kondizzjonijiet biex jingħata bidu għall-eżerċizzju ta’ tali setgħat ta’ implimentazzjoni ġew issodisfati u l-proċedura f’dan ir-rigward ġiet segwita, jenħtieġ li tiġi adottata Deċiżjoni ta’ Implimentazzjoni dwar it-tnedija fil-Greċja tal-iskambju awtomatizzat ta’ data fir-rigward tal-VRD sabiex dak l-Istat Membru jkun jista’ jirċievi u jforni data personali skont l-Artikolu 12 tad-Deċiżjoni 2008/615/ĠAI.

(12)

Id-Danimarka u l-Irlanda huma marbutin bid-Deċiżjoni 2008/615/ĠAI u għalhekk qed jieħdu sehem fl-adozzjoni u l-applikazzjoni ta’ din id-Deċiżjoni li timplimenta d-Deċiżjoni 2008/615/ĠAI,