1.

JENFASIZZA l-kunċett tal-iżvilupp sostenibbli bħala mod kif jinkisbu l-iżvilupp ekonomiku u soċjali u l-protezzjoni ambjentali filwaqt li jiġu rrispettati d-drittijiet tal-bniedem;

2.

IQIS li x-xerrejja pubbliċi għandhom ikunu jistgħu jużaw ir-riżorsi tagħhom b’mod strateġiku biex jappoġġaw bl-aħjar mod possibbli t-tranżizzjoni lejn ekonomija ekoloġika, innovattiva, ċirkolari u soċjalment responsabbli, b’mod partikolari billi jinvestu f’infrastruttura sostenibbli, prodotti sostenibbli u/jew tal-ekonomija ċirkolari, u billi jużaw proċessi u teknoloġiji li jkunu huma stess ambizzjużi fir-rigward tal-għanijiet ta’ żvilupp sostenibbli segwiti, filwaqt li jfittxu l-aħjar valur possibbli għall-flus, u jippromwovu kompetizzjoni wiesgħa fil-proċeduri tal-akkwist pubbliku;

3.

JAPPELLA lill-Kummissjoni biex tikkunsidra, f’konformità mal-impenn tagħha fil-Pjan ta’ Investiment għal Ewropa Sostenibbli (8) u fil-Pjan ta’ Azzjoni għal Ekonomija Ċirkolari, fil-kuntest ta’ proposti leġiżlattivi futuri, inkluż dawk li jemendaw il-leġiżlazzjoni eżistenti tal-UE relatata mad-diversi setturi ta’ attività, il-possibbiltà li jiġu introdotti kunsiderazzjonijiet ta’ żvilupp sostenibbli fil-proċeduri ta’ akkwist pubbliku għal oġġetti jew servizzi settorjali; JISSOTTOLINJA li, skont is-settur, dawn il-kunsiderazzjonijiet jistgħu jvarjaw minn għanijiet ta’ żvilupp sostenibbli, kapaċitajiet professjonali jew speċifikazzjonijiet tekniċi marbuta mal-iżvilupp sostenibbli fil-kuntratti għal kriterji ta’ sostenibbiltà, b’mod partikolari għall-eżekuzzjoni jew l-għoti ta’ kuntratti; JENFASIZZA l-importanza li x-xerrejja pubbliċi jitħallew jiddeterminaw l-aktar mod xieraq biex jinkludu tali kunsiderazzjonijiet fil-proċeduri tagħhom; JIEĦU NOTA tal-ħidma li diġà daħlu għaliha l-istituzzjonijiet tal-UE u l-Istati Membri f’dan ir-rigward, u JISSOTTOLINJA l-ħtieġa li din tiġi aċċellerata u intensifikata;

4.

IĦEĠĠEĠ lill-Kummissjoni u lill-Istati Membri jaħdmu flimkien biex jidentifikaw, fir-rigward tal-akkwist pubbliku, is-setturi rilevanti f’termini tas-sensittività tagħhom għal kunsiderazzjonijiet ta’ żvilupp sostenibbli u jivvalutaw il-maturità tagħhom, filwaqt li jqisu, pereżempju, il-kapaċità tal-operaturi ekonomiċi li jindirizzaw dawn il-kunsiderazzjonijiet il-ġodda;

5.

JENFASIZZA l-ħidma li tlestiet, li għadha għaddejja u li kważi waslet fil-livell tal-Istati Membri biex tiġi stabbilita n-natura prijoritarja ta’ ċerti setturi; JENFASIZZA l-ħtieġa li din il-ħidma tiġi kkoordinata fil-livell tal-UE;

6.

JENFASIZZA l-importanza tar-rwol li l-gruppi ta’ esperti tal-Kummissjoni jista’ jkollhom f’dan ir-rigward billi jinvolvu u jistiednu lid-diversi partijiet ikkonċernati sabiex jiddeterminaw jekk id-diversi setturi identifikati għandhomx jingħataw prijorità jew le; IQIS li l-Kunsill jenħtieġ li jkun involut ukoll f’din il-ħidma;

7.

JENFASIZZA l-importanza li tiġi definita metodoloġija ġenerali li tippermetti lil dawn il-korpi jiddeterminaw jekk kull settur ta’ attività għandux jitqies bħala prijorità jew le permezz ta’ analiżi fil-fond tal-maturità tiegħu;

8.

IQIS li ħidma koerenti ser tagħmilha possibbli li jiġu identifikati kemm it-testi settorjali tal-UE li jistgħu jiġu emendati fis-snin li ġejjin kif ukoll il-firxa tal-emendi li jeħtieġ li jsiru fir-rigward tad-dispożizzjonijiet tagħhom dwar l-akkwist pubbliku sabiex jgħinu fil-kisba tal-objettivi ambjentali u klimatiċi stabbiliti fil-livell tal-UE;

9.

JEMMEN li huwa meħtieġ li jintlaħqu dawn l-objettivi skont l-iskadenzi tal-2030 u tal-2050, imsemmija hawn fuq, u JENFASIZZA l-importanza ta’ approċċ gradwali u armonizzat; IQIS, għalhekk, li t-testi li jkopru s-setturi kollha identifikati bħala setturi ta’ prijorità għandhom jiġu riveduti sa mhux aktar tard mill-2030; IQIS, barra minn hekk, li jeħtieġ li jiġu emendati t-testi relatati mas-setturi li fadal sa mhux aktar tard mill-2050, li hija s-sena ta’ referenza stabbilita biex tinkiseb in-newtralità klimatika tal-UE;

10.

IQIS li huwa essenzjali li din il-ħidma tiġi integrata fi ħdan approċċ komprensiv; IQIS, sa fejn hu xieraq u fattibbli, li l-Kummissjoni u l-Istati Membri għandhom, għalhekk, jikkunsidraw qafas ġenerali, maħsub biex jintroduċi l-kunsiderazzjoni ta’ kunsiderazzjonijiet ta’ żvilupp sostenibbli u reżiljenti fl-akkwist pubbliku, irrispettivament mis-settur ikkonċernat;

11.

JENFASIZZA l-importanza, meta jittieħdu miżuri, li ma jiġix impost piż amministrattiv eċċessiv fuq ix-xerrejja pubbliċi, u speċjalment fuq il-korpi sottoċentrali għall-akkwisti;

12.

JISTIEDEN lill-Kummissjoni u lill-Istati Membri biex jibdew din il-ħidma kollha mingħajr dewmien.