Pubblikazzjoni ta’ komunikazzjoni ta’ approvazzjoni ta’ emenda standard għal speċifikazzjoni ta’ prodott għal isem fis-settur tal-inbid kif imsemmi fl-Artikolu 17(2) u (3) tar-Regolament Delegat tal-Kummissjoni (UE) 2019/33

(2020/C 349/13)

Din il-komunikazzjoni hija ppubblikata f’konformità mal-Artikolu 17(5) tar-Regolament Delegat tal-Kummissjoni (UE) 2019/33 (1)

KOMUNIKAZZJONI TA’ EMENDA STANDARD LI TIMMODIFIKA D-DOKUMENT UNIKU

“UHLEN BLAUFÜSSER LAY / UHLEN BLAUFÜßER LAY”

DOP-DE-02081-AM01

Data tal-komunikazzjoni: 6.7.2020

DESKRIZZJONI TAL-EMENDA APPROVATA U RAĠUNIJIET GĦALIHA

1.   Karatteristiċi analitiċi u/jew organolettiċi

Il-karatteristiċi analitiċi jridu jikkorrispondu mar-rekwiżiti legali fil-Ġermanja.

Żball fl-abbozzar.

DOKUMENT UNIKU

1.   Isem il-prodott

Uhlen Blaufüsser Lay

Uhlen Blaufüßer Lay

2.   Tip ta’ indikazzjoni ġeografika

DOP – Denominazzjoni ta’ Oriġini Protetta

3.   Kategoriji tal-prodotti tad-dwieli

1.

Inbid

5.	Inbid spumanti ta’ kwalità

4.   Deskrizzjoni tal-inbid/inbejjed

Inbid ta’ kwalità

L-inbejjed bojod Riesling jiġu mmaturati fil-pjantaġġuni tal-Uhlen Blaufüsser Lay. Hemm tliet tipi ta’ prodotti tad-dwieli, u kull tip għandu karatteristiċi kemxejn differenti: inbid ta’ kwalità, inbid b’attributi speċjali (Prädikatswein) u Sekt b.A. (inbid spumanti ta’ kwalità minn reġjuni definiti).

L-inbejjed Uhlen Blaufüsser Lay li jkunu għadhom ma mmaturawx għandhom lewn isfar ċar, u kultant ħadrani, li jsir aktar intens hekk kif il-prodott jimmatura, qabel ma jsir lewn dehbi sublimi u rikk ladarba l-inbid ikun immatura kompletament. L-aromi tal-inbejjed huma definiti mill-interazzjoni ta’ noti ta’ frott u ta’ ħjiliet ta’ minerali tipiċi tal-lavanja. Is-sediment aktar tafli tal-istrati aktar profondi tal-oċean jagħtu lill-Uhlen Blaufüsser Lay (Uhlen Blaufüßer Lay) togħma li ta’ spiss tista’ tiġi deskritta bħala “xi ftit jew wisq aktar friska”. Ħafna drabi, l-istruttura u l-minerali mikrokristallini u pikkanti tant jinħassu sottili u ħfief fuq l-ilsien li jistgħu jfakkru fiż-żiffiet aromatiċi tal-baħar. F’xi snin, kien possibbli wkoll li wieħed itiegħem il-jodju mielaħ tal-baħar.

Għall-karatteristiċi analitiċi fejn ma tingħata l-ebda ċifra, tapplika l-leġiżlazzjoni rilevanti.

Karatteristiċi analitiċi ġenerali
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)
Aċidità totali minima:
Aċidità volatili massima (f’milliekwivalenti għal kull litru):
Total massimu ta’ diossidu tal-kubrit (f’milligrammi għal kull litru):

Inbid b’attributi speċjali (Prädikatswein), issupplimentat minn: inbid Auslese

L-inbejjed bojod Riesling jiġu mmaturati fil-pjantaġġuni tal-Uhlen Blaufüsser Lay. Hemm tliet tipi ta’ prodotti tad-dwieli, u kull tip għandu karatteristiċi kemxejn differenti: inbid ta’ kwalità, inbid b’attributi speċjali (Prädikatswein) u Sekt b.A. (inbid spumanti ta’ kwalità minn reġjuni definiti).

L-inbejjed Uhlen Blaufüsser Lay li jkunu għadhom ma mmaturawx għandhom lewn isfar ċar, u kultant ħadrani, li jsir aktar intens hekk kif il-prodott jimmatura, qabel ma jsir lewn dehbi sublimi u rikk ladarba l-inbid ikun immatura kompletament. L-aromi tal-inbejjed huma definiti mill-interazzjoni ta’ noti ta’ frott u ta’ ħjiliet ta’ minerali tipiċi tal-lavanja. Is-sediment aktar tafli tal-istrati aktar profondi tal-oċean jagħtu lill-Uhlen Blaufüsser Lay (Uhlen Blaufüßer Lay) togħma li ta’ spiss tista’ tiġi deskritta bħala “xi ftit jew wisq aktar friska”. Ħafna drabi, l-istruttura u l-minerali mikrokristallini u pikkanti tant jinħassu sottili u ħfief fuq l-ilsien li jistgħu jfakkru fiż-żiffiet aromatiċi tal-baħar. F’xi snin, kien possibbli wkoll li wieħed itiegħem il-jodju mielaħ tal-baħar. Il-firxa ta’ aromi u togħmiet deskritta hawn fuq għandha ħlewwa li hija delikata fil-każ tal-inbejjed Auslese.

Għall-karatteristiċi analitiċi fejn ma tingħata l-ebda ċifra, tapplika l-leġiżlazzjoni rilevanti.

Karatteristiċi analitiċi ġenerali
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)
Aċidità totali minima:
Aċidità volatili massima (f’milliekwivalenti għal kull litru):
Total massimu ta’ diossidu tal-kubrit (f’milligrammi għal kull litru):

Inbid b’attributi speċjali (Prädikatswein), issupplimentat minn: Beerenauslese, Trockenbeerenauslese, u Eiswein

L-inbejjed bojod Riesling jiġu mmaturati fil-pjantaġġuni tal-Uhlen Blaufüsser Lay. Hemm tliet tipi ta’ prodotti tad-dwieli, u kull tip għandu karatteristiċi kemxejn differenti: inbid ta’ kwalità, inbid b’attributi speċjali (Prädikatswein) u Sekt b.A. (inbid spumanti ta’ kwalità minn reġjuni definiti).

L-inbejjed Uhlen Blaufüsser Lay li jkunu għadhom ma mmaturawx għandhom lewn isfar ċar, u kultant ħadrani, li jsir aktar intens hekk kif il-prodott jimmatura, qabel ma jsir lewn dehbi sublimi u rikk ladarba l-inbid ikun immatura kompletament. L-aromi tal-inbejjed huma definiti mill-interazzjoni ta’ noti ta’ frott u ta’ ħjiliet ta’ minerali tipiċi tal-lavanja. Is-sediment aktar tafli tal-istrati aktar profondi tal-oċean jagħtu lill-Uhlen Blaufüsser Lay (Uhlen Blaufüßer Lay) togħma li ta’ spiss tista’ tiġi deskritta bħala “xi ftit jew wisq aktar friska”. Ħafna drabi, l-istruttura u l-minerali mikrokristallini u pikkanti tant jinħassu sottili u ħfief fuq l-ilsien li jistgħu jfakkru fiż-żiffiet aromatiċi tal-baħar. F’xi snin, kien possibbli wkoll li wieħed itiegħem il-jodju mielaħ tal-baħar. Il-firxa ta’ aromi u togħmiet deskritta hawn fuq għandha ħlewwa sottostanti li hija delikata fil-każ tal-inbejjed Auslese, u aktar kremuża fl-inbejjed Beerenauslese, u jista’ jkollha wkoll noti ta’ għasel. Dawn l-aspetti tat-togħmiet tal-inbejjed huma aktar evidenti fl-inbejjed Trockenbeerenauslese. Fil-każ tal-inbejjed Eiswein, il-firxa ta’ aromi u togħmiet deskritta hawn fuq tinkludi aċidità pikkanti.

Għall-karatteristiċi analitiċi fejn ma tingħata l-ebda ċifra, tapplika l-leġiżlazzjoni rilevanti.

Karatteristiċi analitiċi ġenerali
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)
Aċidità totali minima:
Aċidità volatili massima (f’milliekwivalenti għal kull litru):
Total massimu ta’ diossidu tal-kubrit (f’milligrammi għal kull litru):

Sekt b.A. (inbid spumanti ta’ kwalità minn reġjuni ddefiniti)

L-inbejjed bojod Riesling jiġu mmaturati fil-pjantaġġuni tal-Uhlen Blaufüsser Lay. Hemm tliet tipi ta’ prodotti tad-dwieli, u kull tip għandu karatteristiċi kemxejn differenti: inbid ta’ kwalità, inbid b’attributi speċjali (Prädikatswein) u Sekt b.A. (inbid spumanti ta’ kwalità minn reġjuni definiti).

L-inbejjed Uhlen Blaufüsser Lay li jkunu għadhom ma mmaturawx għandhom lewn isfar ċar, u kultant ħadrani, li jsir aktar intens hekk kif il-prodott jimmatura, qabel ma jsir lewn dehbi sublimi u rikk ladarba l-inbid ikun immatura kompletament.

L-aromi tal-inbejjed huma definiti mill-interazzjoni ta’ noti ta’ frott u ta’ ħjiliet ta’ minerali tipiċi tal-lavanja. Is-sediment aktar tafli tal-istrati aktar profondi tal-oċean jagħtu lill-Uhlen Blaufüsser Lay (Uhlen Blaufüßer Lay) togħma li ta’ spiss tista’ tiġi deskritta bħala “xi ftit jew wisq aktar friska”. Ħafna drabi, l-istruttura u l-minerali mikrokristallini u pikkanti tant jinħassu sottili u ħfief fuq l-ilsien li jistgħu jfakkru fiż-żiffiet aromatiċi tal-baħar. F’xi snin, kien possibbli wkoll li wieħed itiegħem il-jodju mielaħ tal-baħar. Fil-każ tal-inbejjed Sekt b.A., il-firxa ta’ aromi u togħmiet deskritta hawn fuq għall-inbejjed Prädikatswein hija qawwija u intensifikata bid-diossidu tal-karbonju użat fil-produzzjoni tal-inbid spumanti.

Għall-karatteristiċi analitiċi fejn ma tingħata l-ebda ċifra, tapplika l-leġiżlazzjoni rilevanti.

Karatteristiċi analitiċi ġenerali
Qawwa alkoħolika totali massima (f’% tal-volum)	13,5
Qawwa alkoħolika proprja minima (f’% tal-volum)	11,5
Aċidità totali minima:
Aċidità volatili massima (f’milliekwivalenti għal kull litru):
Total massimu ta’ diossidu tal-kubrit (f’milligrammi għal kull litru):

5.   Prattiki tal-produzzjoni tal-inbid

a.   Prattiki enoloġiċi speċifiċi

Restrizzjonijiet rilevanti fuq il-produzzjoni tal-inbejjed

Dawn li ġejjin mhumiex permessi: sorbat tal-potassju, liżożima, dikarbonat tad-dimetil, elettrodijaliżi, dealkoħolizzazzjoni, skambjaturi ta’ katoni, konċentrazzjoni (krijokonċentrazzjoni, osmosi, kolonna ċentrifuga konika), dolċifikazzjoni, laqx tal-ballut jew preparati.

Inbid ta’ kwalità

Prattika enoloġika speċifika

tal-anqas 88 ° Oechsle jew kontenut massimu ta’ aċidità (espress bħala aċidu tartariku) = 7,5 g/l

Sa 100 ° Oechsle u nbejjed imqawwija: kontenut massimu ta’ zokkor residwu = “nofsu misjur” skont il-liġi tal-inbid.

Aktar minn 100 ° Oechsle: kontenut massimu ta’ zokkor residwu = piż tal-most/3

Inbid b’attributi speċjali (Prädikatswein)

Prattika enoloġika speċifika

Inbid Auslese: tal-anqas 105 ° Oechsle; kontenut minimu ta’ zokkor residwu = 90 g/l

Beerenauslese: tal-anqas 130 ° Oechsle; kontenut minimu ta’ zokkor residwu = 150 g/l

Trockenbeerenauslese: tal-anqas 180 ° Oechsle; kontenut minimu ta’ zokkor residwu = 180 g/l

Eiswein: tal-anqas 130 ° Oechsle; kontenut minimu ta’ zokkor residwu = 150 g/l

Sekt b.A. (inbid spumanti ta’ kwalità minn reġjuni ddefiniti)

Prattika enoloġika speċifika

Fermentazzjoni tradizzjonali fil-flixkun

b.   Rendimenti massimi

70 ettolitru għal kull ettaru

6.   Żona ġeografika demarkata

L-Uhlen Blaufüsser Lay huwa parti mid-denominazzjoni ta’ oriġini protetta “Mosel” (DOP-DE-A1270).

Il-vinji tal-Uhlen Blaufüsser Lay jinsabu fiż-żona ta’ Winningen tad-distrett rurali ta’ Mayen-Koblenz fir-Rheinland-Pfalz. L-isem “Blaufüßer Lay” huwa rreġistrat fir-reġistru tal-artijiet bħala diviżjoni fil-miftuħ. Għal aktar minn għaxar snin, ismu deher fuq it-tikkettar bħala indikazzjoni tal-formazzjoni tax-shale. It-terminu “Blumslay” (minn Blaufüßer Lay – Blauslay – Blooslay – Blumslay), kelma bid-djalett li sabet ruħha fil-Ġermaniż uffiċjali, jirreferi għal punt ta’ osservazzjoni ’il fuq mill-vinji. Iż-żona tibda bir-roqgħa art 2219/1 u tispiċċa fid-direzzjoni tax-xmara bl-irqajja' 2179, 2181/1, 2186, 2190, 2189/2.

Il-prodotti bid-DOP “Uhlen Blaufüsser Lay” jistgħu jiġu prodotti fiż-żona rreġistrata tad-DOP “Mosel” (Nru tar-reġistrazzjoni DOP-DE-A1270). Iż-żona demarkata tinsab fid-DOP Mosel.

Il-pjantaġġuni tal-Uhlen Blaufüßer Lay jkopru żona ta’ 1,96 ha.

7.   Varjetà/varjetajiet ewlenin tal-għeneb tal-inbid

Weisser Riesling - Riesling, Riesling renano, Rheinriesling, u Klingelberger

8.   Deskrizzjoni tar-rabta/rabtiet

Il-vinji tal-Uhlen Blaufüsser Lay jinsabu fil-pajsaġġ imtarraġ tal-Mosel tan-naħa t’isfel. L-istrutturi mtarrġa tal-Uhlen Blaufüsser Lay huma nqassma f’konfigurazzjoni tradizzjonali b’orjentazzjoni lejn il-Lbiċ u jinsabu f’altitudni ta’ bejn madwar 75 m u 210 m ’il fuq mil-livell tal-baħar. It-temperatura medja ta’ 11,6 °C tul dawn l-aħħar ħames snin kienet relattivament għolja, kif mistenni f’altitudni baxxa bħal din. Il-livelli baxxi ta’ preċipitazzjoni (madwar 620 mm) u l-għadd kbir ta’ sigħat ta’ dawl tax-xemx (1 922) joħolqu mikroklima li hija pjuttost differenti miż-żoni l-oħra tad-DOP “Mosel” u b’mod partikolari hija responsabbli għall-maturità partikolari tal-għeneb (qawwa alkoħolika potenzjali għolja b’aċidità baxxa u fenoli maturi). Jingħad li l-inbejjed huma espressivi ħafna u għandhom togħma mimlija ħafna. Il-kundizzjonijiet ġeografiċi partikolari tar-reġjun tal-Uhlen Blaufüsser Lay jgħinu biex l-għeneb jikseb il-maturità fiżjoloġika u jsawru t-togħma individwali tal-inbejjed li jiġu prodotti hemmhekk.

Fl-iskeda taż-żmien ġeoloġika, l-Uhlen Blaufüßer Lay jaqa’ taħt is-serje Devonjana Inferjuri tas-sistema Devonjana. B’mod aktar speċifiku, iż-żona tikkonsisti f’sedimenti mis-sublivelli ta’ Oberems/Laubach u f’sedimenti aktar qodma mil-livelli ta’ Laubach. Il-fond dejjem jiżdied tal-baħar jidher mill-pakketti magħqudin ta’ ħama u lavanja skuri. Il-ħamrija mimlija blat esposta għall-kundizzjonijiet tat-temp li tirriżulta minn dawn is-sedimenti tagħmel parti minn regosol ta’ tipi differenti ta’ shale tafli ħafna u bi preżenza ta’ ħama. Il-kontenut ogħla ta’ tafal tal-ħamrija joħloq kapaċità ogħla ta’ ritenzjoni tal-ilma fil-ħamrija u temperatura medja tal-ħamrija aktar baxxa fl-istrati aktar baxxi, meta mqabbel ma’ DOP ġirien. B’riżultat ta’ dan, hemm differenzi organolettiċi konsiderevoli meta mqabbla ma’ DOP ġirien. L-Uhlen Blaufüsser Lay għandu sehem iżgħar ta’ komponenti ta’ frott fir-riħa ġeneralment mhux qawwija tiegħu. L-impressjoni minerali u olfattiva li tirriżulta, tkompli fil-palat b’sensazzjoni li ħafna drabi hija deskritta bħala “fina, friska, u ċara”.

L-influwenza tal-bniedem hija bbażata fuq tradizzjoni ta’ produzzjoni tal-inbid li tmur lura eluf ta’ snin. L-arti tat-tħawwil tal-vinji fi strutturi mtarrġin appoġġati minn ħitan tal-ġebel niexef tmur lura għal żmien ir-Rumani. Fis-sena 380 AD, il-poeta Ruman, Ausonius, iddeskriva lil dawn il-binjiet bħala “anfiteatri”. Is-sejba ta’ flus Rumani fl-istrutturi mtarrġin li probabbilment kienu maħsuba bħala offerti, hija prova oħra ta’ din il-prattika. L-inbid ilu jiġi prodott fiż-żona minn dak iż-żmien. Tul is-sekli, il-kwalità tal-produzzjoni kompliet tiġi mtejba permezz tal-iżvilupp ta’ varjetajiet ġodda tal-għeneb (il-varjetà Riesling mill-bidu tas-seklu 19) u modi ġodda ta’ kultivazzjoni (f’arbuxelli, mal-lasti jew mal-ħbula). F’dawn l-aħħar għexieren ta’ snin, iż-żieda fis-sensibilizzazzjoni ambjentali wasslet għal użu dejjem anqas ta’ fertilizzanti minerali solubbli ħafna. B’riżultat ta’ dan, il-popolazzjonijiet ta’ mikroflora u mikrofawna naturali reġgħu lura fil-ħamrija, u dan wassal biex isir aktar assorbiment ta’ nutrijenti, kif ukoll biex isiru aktar proċessi ta’ skambju ta’ katonji bħala riżultat tal-inkorporazzjoni ta’ molekuli kumplessi li jinteraġixxu b’mod simbjotiku mal-mikrobi li jinsabu fix-xniexel. Dawn il-mikrobi jistgħu jintużaw bħala trażmettituri bejn is-sustanzi organiċi u l-minerali speċifiċi li jinsabu fil-ħamrija, u b’hekk jagħmlu t-togħma tal-inbid saħansitra aktar unika.

Ir-relazzjoni deskritta hawn fuq tapplika bl-istess mod għall-inbid spumanti ta’ kwalità minn reġjuni definiti.

9.   Kundizzjonijiet oħra essenzjali (ippakkjar, tikkettar, rekwiżiti oħra)

Qafas legali:

Leġiżlazzjoni nazzjonali

Tip ta’ kundizzjoni oħra:

Rekwiżiti addizzjonali tat-tikkettar

Deskrizzjoni tal-kundizzjoni:

L-informazzjoni li għandha tingħata dwar it-tikketti u l-ippakkjar hija ddefinita mil-liġijiet u r-regolamenti fis-seħħ fl-Unjoni Ewropea, fir-Repubblika Federali tal-Ġermanja u fl-Istat Federali tar-Rheinland-Pfalz. Qabel ma t-termini tradizzjonali assoċjati ma’ din id-denominazzjoni ta’ oriġini jkunu jistgħu jintużaw fuq it-tikketta tiegħu, l-inbid irid ikun għadda minn spezzjoni uffiċjali. L-inbejjed li ssodisfaw ir-rekwiżiti speċifiċi ta’ dik l-ispezzjoni uffiċjali biss jingħataw numru uffiċjali tal-ispezzjoni magħmul minn diversi ċifri li jindikaw l-awtorità tal-ispezzjoni, in-numru tal-azjenda, l-għadd ta’ nbejjed imressqa għall-ispezzjoni u s-sena meta tressqu jew meta nħareġ in-numru tal-ispezzjoni. In-numru tal-ispezzjoni għandu jiġi indikat fuq it-tikketta. It-termini tradizzjonali “Qualitätswein”, “Prädikatswein” u “Sekt b.A.” huma assoċjati mad-denominazzjoni ta’ oriġini u jistgħu jissostitwixxu d-denominazzjoni “DOP”.

link għall-ispeċifikazzjoni tal-prodott

www.ble.de/eu-qualitaetskennzeichen-wein

---

(1)  ĠU L 9, 11.1.2019, p. 2.