Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 62016CN0326

Kawża C-326/16 P: Appell ippreżentat fid-9 ta’ Lulju 2016 minn LL mis-sentenza mogħtija mill-Qorti Ġenerali (Is-Seba’ Awla) fid-19 ta’ April 2016 fil-Kawża T-615/15, LL vs Il-Parlament Ewropew

ĠU C 343, 19.9.2016, p. 25–27 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

19.9.2016   

MT

Il-Ġurnal Uffiċjali tal-Unjoni Ewropea

C 343/25

Appell ippreżentat fid-9 ta’ Lulju 2016 minn LL mis-sentenza mogħtija mill-Qorti Ġenerali (Is-Seba’ Awla) fid-19 ta’ April 2016 fil-Kawża T-615/15, LL vs Il-Parlament Ewropew

(Kawża C-326/16 P)

(2016/C 343/38)

Lingwa tal-kawża: il-Litwan

Partijiet

Appellant: LL (rappreżentant: J. Petrulionis, avukat)

Parti oħra fil-proċedura: Il-Parlament Ewropew

Talbiet

—

tannulla d-digriet tal-Qorti Ġenerali tal-Unjoni Ewropea (Is-Seba’ Awla), tad-19 ta’ April 2016 fil-Kawża T-615/15, li permezz tiegħu l-Qorti Ġenerali ċaħdet ir-rikors għall-annullament tar-rikorrent, l-ewwel nett, tad-Deċiżjoni D(2014) 15503 tas-Segretarju Ġenerali tal-Parlament Ewropew, tas-17 ta’ April 2014, li permezz tagħha ntalab iħallas lura l-allowance għall-assistenza parlamentari mħallsa lilu indebitament, u t-tieni nett, tan-Nota ta’ Debitu Nru 2014-575, tal-5 ta’ Mejju 2014;

—

tibgħat il-kawża lura għal eżami mill-ġdid.

Aggravji u argumenti prinċipali

Insostenn tal-appell tiegħu, l-appellant jinvoka ħames aggravji.

1.

Meta ħarġet id-digriet, il-Qorti Ġenerali tal-Unjoni Ewropea ma eżaminatx u ma evalwatx fil-fond, b’mod korrett, b’mod komprensiv u b’mod oġġettiv l-evidenza bil-miktub kollha ppreżentata flimkien mar-rikors li kienet ta’ rilevanza sabiex b’mod xieraq u korrett jiġi stabbilit it-terminu għal preżentata ta’ rikors, u għaldaqstant insiltu konklużjonijiet kuntrarji għall-materjal fil-proċess u għad-dispożizzjonijiet legali speċifikati fl-appell, inter alia, li “[l]-azzjoni tressqet iktar minn 17-il xahar wara dik l-aħħar ġurnata”, “[…] ir-rikorrent ma stabbilixxiex u lanqas biss għamel riferiment għall-eżistenza ta’ […] ċirkustanzi li jippermettu deroga mit-terminu inkwistjoni abbażi tat-tieni paragrafu tal-Artikolu 45 tal-Istatut tal-Qorti tal-Ġustizzja tal-Unjoni Ewropea […]” u “[…] l-azzjoni għandha tkun miċħuda bħala manifestament inammissibbli minħabba t-tardività tagħha […]”.

2.

Fid-digriet, il-Qorti Ġenerali ma applikatx l-Artikolu 263 tat-Trattat dwar il-Funzjonament tal-Unjoni Ewropea kif xieraq, u minbarra dan kisret l-Artikolu 72 tal-Miżuri ta’ implimentazzjoni tal-Istatut tal-Membri tal-Parlament Ewropew u evalwat b’mod inkorrett il-possibbiltajiet li jiġi applikat l-Artikolu 45 tal-Istatut tal-Qorti tal-Ġustizzja tal-Unjoni Ewropea:

—

peress li l-appellant, bħala ex Membru tal-Parlament Ewropew, ma qabilx mad-deċiżjoni tas-Segretarju Ġenerali tal-Parlament Ewropew (u man-nota ta’ debitu adottata abbażi tagħha) u kkunsidra li kienet infondata, huwa eżerċita d-dritt tiegħu u ssodisfa r-rekwiżiti stabbiliti fl-Artikolu 72 tal-Miżuri ta’ implimentazzjoni tal-Istatut tal-Membri tal-Parlament Ewropew, billi ssottometta lment dwar id-deċiżjoni, l-ewwel lill-Kwesturi u sussegwentement lill-Bureau u lill-President tal-Parlament Ewropew;

—

kien biss wara, meta fl-10 ta’ Settembru 2015 l-appellant irċieva posta elettronika minn rappreżentant tal-Parlament Ewropew u flimkien magħha, fost dokumenti oħra, ittra finali Nru 311354, tas-26 ta’ Ġunju 2015, mingħand il-President tal-Parlament Ewropew skont l-Artikolu 72(3) tal-Miżuri ta’ implimentazzjoni tal-Istatut tal-Membri tal-Parlament Ewropew, li tnissel id-dritt tal-appellant sabiex iressaq azzjoni quddiem il-Qorti Ġenerali għall-annullament tad-deċiżjoni tas-Segretarju Ġenerali tal-Parlament Ewropew u tan-nota ta’ debitu adottata abbażi tagħha;

—

kien speċifikament fil-jum li fih ġiet riċevuta l-ittra finali Nru 311354, tas-26 ta’ Ġunju 2015 mill-President tal-Parlament Ewropew skont l-Artrikolu 72(3) tal-Miżuri ta’ implimentazzjoni tal-Istatut tal-Membri tal-Parlament Ewropew, jiġifieri fl-10 ta’ Settembru 2015, li, skont is-sitt paragrafu tal-Artikolu 263 TFUE, beda jiddekorri l-perijodu ta’ xahrejn fejn l-appellant seta’ jibda proċeduri quddiem il-Qorti Ġenerali għall-annullament tad-deċiżjoni tas-Segretarju Ġenerali tal-Parlament Ewropew u tan-nota ta’ debitu adottata abbażi tagħha;

—

fid-dawl ta’ dan u skont is-sitt paragrafu tal-Artikolu 263 TFUE, il-perijodu sabiex jinbdew proċeduri quddiem il-Qorti Ġenerali ġie fi tmiemu fl-10 ta’ Diċembru 2015. Ir-rikors wasal għand ir-Reġistru tal-Qorti Ġenerali fl-4 ta’ Novembru 2015. Dan ifisser li l-perijodu ta’ xahrejn sabiex jinbdew proċeduri, stabbilit fis-sitt paragrafu tal-Artikolu 263 TFUE ma nkisirx u tali azzjoni ma tressqitx “tard”;

—

fid-digriet, il-Qorti Ġenerali bl-ebda mod ma evalwat id-dokumenti u ċ-ċirkustanzi li sar riferiment għalihom, jew id-dispożizzjonijiet tal-Artikolu 72 tal-Miżuri ta’ implimentazzjoni tal-Istatut tal-Membri tal-Parlament Ewropew, dispożizzjonijiet li l-appellant osserva u li abbażi tagħhom huwa ressaq ilment kontra d-deċiżjoni tas-Segretarju Ġenerali tal-Parlament Ewropew u kontra n-nota ta’ debitu taħt proċedura prekontenzjuża;

—

permezz tad-digriet, il-Qorti Ġenerali mhux biss kisret id-drittijiet u l-interessi tal-appellant, iżda wkoll applikat l-Artikolu 263 TFUE b’mod inkorrett, u barra minn hekk kisret l-Artikolu 72 tal-Miżuri ta’ implimentazzjoni tal-Istatut tal-Membri tal-Parlament Ewropew;

—

barra minn hekk, fid-digriet il-Qorti Ġenerali b’mod inkorrett u infondat ikkonkludiet li ma kien hemm ebda possibbiltà sabiex l-Artikolu 45 tal-Istatut tal-Qorti tal-Ġustizzja jiġi applikat. L-implementazzjoni tal-proċedura għal eżami prekontenzjuż tat-tilwima, il-kondotta attiva, bir-reqqa, attentiva u b’sens ta’ kuxjenza tal-appellant, iż-żmien li fih id-dokumenti ġew riċevuti u ċirkustanzi oħra jikkonfermaw li fil-każ ineżami, anki kieku kellu jiġi deċiż li l-perijodu sabiex jinbdew il-proċeduri kien inqabeż, il-perijodu jkollu jiġġedded, għaliex ikun inqabeż għal raġunijiet importanti, oġġettivi u ġustifikabbli, jiġifieri osservanza tal-proċedura stabbilita fl-Artikolu 72 tal-Miżuri ta’ implimentazzjoni tal-Istatut tal-Membri tal-Parlament Ewropew (l-ewwel paragrafu tal-Artikolu 45 tal-Istatut tal-Qorti tal-Ġustizzja). L-appellant ma setax ikun jaf li osservanza tal-proċedura obbligatorja stabbilita fl-Artikolu 72 tal-Miżuri ta’ implimentazzjoni tal-Istatut tal-Membri tal-Parlament Ewropew tista’ tfisser li dan jitlef id-dritt tiegħu li jibda proċeduri quddiem il-Qorti Ġenerali (it-tieni paragrafu tal-Artikolu 45 tal-Istatut tal-Qorti tal-Ġustizzja). Għandu jiġi osservat li fir-rikors, l-appellant iktar tard qajjem il-kwistjoni ta’ jekk id-deċiżjonijiet tal-Kwesturi u tal-Bureau tal-Parlament Ewropew adottati skont l-Artikolu 72 tal-Miżuri ta’ implimentazzjoni tal-Istatut tal-Membri tal-Parlament Ewropew kinux fondati u legali.

3.

Fid-digriet, il-Qorti Ġenerali b’mod żbaljat applikat l-Artikolu 126 tar-Regoli tal-Proċedura tal-Qorti Ġenerali u fuq dik il-bażi, permezz tad-digriet iddeċidiet li ma tiħux passi ulterjuri fil-proċeduri u li tiċħad ir-rikors;

—

fid-digriet, il-Qorti Ġenerali bbażat l-applikazzjoni tal-Artikolu 126 tar-Regoli tal-Proċedura tagħha fuq is-sempliċi fatt u raġuni li l-proċeduri nbdew tard, jiġifieri wara li l-perijodu stabbilit fis-sitt paragrafu tal-Artikolu 263 TFUE skada;

—

fir-rikors intwera li l-perijodu stabbilit fis-sitt paragrafu tal-Artikolu 263 TFUE sabiex jinbdew proċeduri ma kienx skada, u għaldaqstant permezz tad-digriet il-Qorti Ġenerali b’mod żbaljat u illegali ċaħdet ir-rikors abbażi tal-Artikolu 126 tar-Regoli tal-Proċedura tagħha;

—

fil-każ ineżami, il-bażi u l-kundizzjonijiet għall-applikazzjoni tal-Artikolu 126 tar-Regoli tal-Proċedura tal-Qorti Ġenerali huma nieqsa. Ir-rikors ġie ppreżentat qabel ma l-perijodu stabbilit fis-sitt paragrafu tal-Artikolu 263 TFUE skada u għaldaqstant ma jistax jitqies manifestament inammissibbli. Fil-każ ineżami, il-Qorti Ġenerali kisret l-Artikolu 126 tar-Regoli tal-Proċedura tagħha billi applikatu b’mod żbaljat u illegali.

4.

Id-digriet tal-Qorti Ġenerali kiser id-dritt tal-appellant għal rimedju effettiv u għal smigħ xieraq, stabbilit fl-ewwel u fit-tieni subparagrafi tal-Artikolu 47 tal-Karta tad-Drittijiet Fundamnentali tal-Unjoni Ewropea, għaliex permezz tad-digriet il-Qorti Ġenerali b’mod illegali u żbaljat ċaħdet ir-rikors abbażi tal-Artikolu 126 tar-Regoli tal-Proċedura tagħha bħala manifestament inammissibbli għar-raġuni li dan allegatament tressaq tard u ma eżaminatx ir-rikors, u l-argumenti u l-pretensjonijiet imniżżla fih, fuq il-mertu.

5.

Permezz tad-digriet, il-Qorti Ġenerali b’mod żbaljat iddeċidiet li l-appellant kellu jbati l-ispejjeż tiegħu stess quddiem il-Qorti Ġenerali (Artikolu 133 u Artikolu 134(1) tar-Regoli tal-Proċedura tal-Qorti Ġenerali):

Permezz tad-digriet, il-Qorti Ġenerali bi żball ċaħdet ir-rikors abbażi tal-Artikolu 126 tar-Regoli tal-Proċedura tagħha, u għaldaqstant b’mod żbaljat ukoll hija ddeċidiet li l-appellant kellu jbati l-ispejjeż tiegħu stess quddiem il-Qorti Ġenerali. Wara li d-digriet tal-Qorti Ġenerali jiġi annullat u l-kawża mibgħuta lura lill-qorti tal-ewwel istanza għal eżami mill-ġdid, il-kwistjoni tat-tqassim tal-ispejjeż għandha tiġi ddeterminata mill-ġdid permezz tad-deċiżjoni finali tal-Qorti Ġenerali, u, jekk ir-rikors jintlaqa’, il-konvenut, jiġifieri l-Parlament Ewropew, ikollu jiġi ordnat iħallas lill-appellant l-ispejjeż kollha sostnuti minnu (Artikolu 133 u Artikolu 134(1) tar-Regoli tal-Proċedura tal-Qorti Ġenerali).
Top