ANNESS

DIKJARAZZJONI KONĠUNTA MILL-PARLAMENT EWROPEW, MILL-KUNSILL U MILL-KUMMISSJONI EWROPEA DWAR IL-“PANEL INTERISTITUZZJONALI GALILEO (GIP)”

1.   Minħabba l-importanza, il-karatteristika unika u l-kumplessità tal-programmi Ewropej GNSS, is-sjieda tal-Komunità tas-sistemi li jirriżultaw mill-programmi, u l-finanzjament sħiħ tal-baġit tal-Komunità tal-programmi għall-perjodu 2008-2013, il-Parlament Ewropew, il-Kunsill u l-Kummissjoni Ewropea jirrikonoxxu l-bżonn ta' koperazzjoni mill-qrib tat-tliet istituzzjonijiet.

2.   Il-Panel Interistituzzjonali Galileo (GIP) se jilħaq l-objettiv li jiffaċilita kull istituzzjoni tal-Komunità fit-twettiq tar-responsabilità rispettiva tagħha. Għal dan il-għan, il-GIP se jitwaqqaf sabiex isegwi mill-qrib:

(a)	il-progress dwar l-implimentazzjoni tal-programmi Ewropej GNSS, b'mod partikulari fir-rigward tal-implimentazzjoni tal-ftehimiet ta' akkwisti u ta' kuntratti, b'mod partikulari fir-rigward tal-ESA;

(b)	il-Ftehimiet Internazzjonali ma' pajjiżi terzi mingħajr ħsara għad-dispożizzjonijiet tal-Artikolu 300 tat-Trattat;

(c)	it-tħejjija tas-swieq tan-navigazzjoni bis-satellita;

(d)	l-effettività tal-arranġamenti ta' governanza; u

(e)	ir-reviżjoni annwali tal-programm ta' ħidma.

3.   Skond ir-regoli eżistenti, il-GIP se jirrispetta l-ħtieġa ta' diskrezzjoni b'mod partikulari fid-dawl tal-kunfidenzjalità fin-negozju u n-natura sensittiva ta' ċerta data.

4.   Il-Kummissjoni se tagħti kont tal-fehmiet espressi mill-GIP.

5.   Il-GIP se jkun magħmul minn seba' rappreżentanti, li minnhom:

—	3 jkunu mill-Kunsill

—

3 mill-PE

—	1 mill-Kummissjoni,

u se jiltaqa' fuq bażi regolari (fil-prinċipju 4 darbiet kull sena).

Il-GIP ma jaffettwax ir-responsabbiltajiet jew ir-relazzjonijiet interistituzzjonali stabbiliti.

Dikjarazzjoni tal-Kummissjoni Ewropea rigward l-involviment tal-GIP fi ftehimiet internazzjonali

Dwar il-ftehimiet internazzjonali, il-Kummissjoni se tinforma lill-GIP sabiex dan ikun jista' jsegwi mill-qrib il-ftehimiet internazzjonali ma' pajjiżi terzi f'konformità mal-Ftehim ta' Qafas dwar ir-relazzjonijiet bejn il-Kummissjoni u l-Parlament Ewropew tas-26 ta' Mejju 2005 u Ftehimiet futuri relatati u mingħajr ħsara għad-dispożizzjonijiet tal-Artikolu 300 tat-Trattat.

Dikjarazzjoni tal-Kummissjoni Ewropea dwar it-tnedija ta' studji dwar l-isfruttar tas-sistema Galileo

Fid-dawl tal-istedina mill-Kunsill sabiex fl-2010, tiġi pprovduta l-proposta prevista fl-Artikolu 4 paragrafu 3, tar-Regolament dwar il-fażi ta' sfruttar tal-programmi, b'mod partikulari fir-rigward tal-finanzjament, il-politika ta' pprezzar u l-mekkaniżmu għall-kondiviżjoni tad-dħul, il-Kummissjoni għandha tniedi l-istudji preliminari meħtieġa mill-2008 u tul l-2009, b'konformità mal-konklużjonijiet tal-Kunsill tat-Trasport tad-29 u t-30 ta' Novembru 2007.

B'mod partikulari, dawn l-istudji għandhom iwettqu analiżi tal-possibilitajiet għall-involviment tas-settur privat fil-ġestjoni tal-fażi ta' sfruttar tal-programmi lil hinn mill-2013, kif ukoll il-modalitajiet għal dan l-involviment potenzjali, b'mod partikulari dawk ta' Sħubija bejn is-settur Pubbliku u dak Privat.

Dikjarazzjoni tal-Kummissjoni Ewropea dwar il-ħolqien ta' grupp ta' esperti ta' sigurtà (“Il-Bord tas-Sigurtà GNSS”)

Sabiex ikunu implimentati d-dispożizzjonijiet tal-Artikolu 10a paragrafu 1 tar-Regolament u sabiex jiġu eżaminati l-kwistjonijiet relatati mas-sigurtà tas-sistemi, il-Kummissjoni bi ħsiebha toħloq grupp ta' esperti magħmul minn rappreżentanti mill-Istati Membri.

Il-Kummissjoni se tiżgura li dan il-grupp ta' esperti għandu:

—	ikun magħmul minn rappreżentant wieħed ta' kull Stat Membru u rappreżentant wieħed mill-Kummissjoni;

—	ikun taht il-presidenza tar-rappreżentant tal-Kummissjoni;

—	jadotta r-regoli ta' proċeduri tiegħu li jipprevedu, inter alia, l-adozzjoni tal-opinjonijiet permezz ta' kunsens u dispożizzjoni għall-esperti sabiex iqajmu kwalunkwe kwistjoni rilevanti relatata mas-sigurtà tas-sistemi;

Fl-eżerċizzju tar-responsabilitajiet tagħha, il-Kummissjoni għandha tagħti kont sħiħ tal-opinjonijiet tal-grupp ta' esperti u timpenja ruħha li tikkonsultah, inter alia, qabel tiddefinixxi r-rekwiżiti ewlenin għas-sigurtà tas-sistemi kif stipulat fl-Artikolu 10a tar-Regolament.

Barra minn hekk, il-Kummissjoni tqis li:

—	ir-rappreżentanti tal-Awtorità ta' Sorveljanza tal-GNSS, l-Aġenzija Spazjali Ewropea, u kif ukoll l-SG/HR għandhom ikunu involuti bħala osservaturi fil-ħidma tal-grupp ta' esperti skond il-kundizzjonijiet imniżżla fir-regoli ta' proċedura tiegħu;

—	ftehimiet konklużi mill-Komunità Ewropea jistgħu jipprevedu għall-parteċipazzjoni ta' rappreżentanti ta' pajjiżi terzi fil-ħidma tal-grupp ta' esperti skond il-kundizzjonijiet stipulati fir-regoli ta' proċedura tiegħu.

Dikjarazzjoni tal-Kummissjoni Ewropea dwar il-ħatra ta' tim indipendenti ta' esperti

Sabiex id-dispożizzjonijiet tal-Artikolu 10 paragrafu 3 tar-Regolament jiġu applikati sew, il-Kummisjoni bi ħsiebha li:

—	taħtar tim ta' esperti indipendenti għall-ġestjoni tal-proġetti;

—	bħala parti mill-ħidmiet tiegħu, iqabbad lit-tim biex jirrevedi l-implimentazzjoni tal-programmi bil-għan li jagħmel rakkomandazzjonijiet xierqa b'mod partikulari fir-rigward tal-ġestjoni tar-riskju;

—	tikkomunika dawn ir-rakkomandazzjonijiet fuq bażi regolari lill-Kumitat stabbilit fir-Regolament.

Dikjarazzjoni tal-Kummissjoni Ewropea dwar l-inetrpretazzjoni tal-Artikolu 12a paragrafu 3c

L-Artikolu 12a paragrafu 3c jistabbilixxi l-prinċipju li mill-inqas 40 % tal-valur aggregat tal-attivitajiet għandu jiġi sottokuntrattat permezz ta' sejħiet għal offerti kompetittivi fuq diversi livelli lil kumpaniji minbarra lil dawk il-kumpaniji li jappartjenu għal gruppi li l-entitajiet tagħhom se jkunu kuntratturi ewlenin ta' kwalunkwe pakkett ta' ħidma ewlenija.

Il-Kummissjoni, matul il-proċess sħiħ ta' sejħa għall-offerti, se żżomm dan taħt skrutinju u reviżjoni stretta, u se tinforma lill-GIP u lill-Kumitat tal-GNSS dwar l-issodisfar ta' dan ir-rekwiżit u dwar l-impatt globali tagħha fuq il-programm.

Jekk, f'dan il-proċess, il-projezzjonijiet juru li l-limitu minimu ta' 40 % ma jistax jintlaħaq, il-Kummissjoni għandha tieħu l-miżuri xierqa skond il-proċedura msemmija fl-Artikolu 12a paragrafu 3c.