29.10.2009

MT

Il-Ġurnal Uffiċjali tal-Unjoni Ewropea

CE 259/94

---

L-Istandards Internazzjonali ta' Rappurtaġġ Finanzjarju u t-tmexxija tal-Bord tal-Istandards Internazzjonali ta' Kontabilità

P6_TA(2008)0183

Riżoluzzjoni tal-Parlament Ewropew tal-24 ta' April 2008 dwar l-Istandards Internazzjonali ta' Rappurtaġġ Finanzjarju (IFRS) u t-tmexxija tal-Bord tal-Istandards Internazzjonali ta' Kontabilità (IASB) (2006/2248 (INI))

(2009/C 259 E/17)

Il-Parlament Ewropew,

—	wara li kkunsidra r-Regolament (KE) Nru 1606/2002 tal-Parlament Ewropew u tal-Kunsill tad-19 ta' Lulju 2002 dwar l-applikazzjoni ta' standards internazzjonali tal-kontabiltà (1),

—	wara li kkunsidra r-riżoluzzjoni tiegħu tal-4 ta' Lulju 2006 dwar l-iżviluppi riċenti u l-prospetti fir-rigward tal-liġi tal-kumpanniji (2),

—	wara li kkunsidra l-ewwel rapport tal-Kummissjoni lill-Kumitat tas-Sigurtajiet Ewropej (ESC) u lill-Parlament Ewropew dwar il-konverġenza bejn l-istandards internazzjonali ta' rappurtaġġ finanzjarju u l-Prinċipji ta' Kontabilità Ġeneralment Aċċettati (GAAPs) f'pajjiżi terzi,

—	wara li kkunsidra l-karta ta' ħidma ta' Lulju 2007 tal-Kummissjoni għas-servizzi rigward tmexxija u żviluppi għall-finanzjamenti fl-IASB(Bord tal-Istandards Internazzjonali ta' Kontabiltà) u l-IASCF (Fondazzjoni tal-Kumitat tal-Istandards Internazzjonali ta' Kontabiltà),

—	wara li kkunsidra l-konklużjoniet tal-Kunsill tal-10 ta' Lulju 2007 dwar it-tmexxija u l-finanzjament tal-IASB u dawk tal-11 ta' Lulju 2006 dwar il-finanzjament tal-Bord tal-Istandards Internazzjonali ta' Kontabiltà,

—	wara li kkunsidra r-Rapport tad-19 ta' Diċembru 2006 tal-BĊE bit-titolu “L-evalwazzjoni tal-istandards tal-kontabilità mill-perspettiva tal-istabilità finanzjarja”,

—	wara li kkunsidra l-ittra tal-Grupp Konsultattiv Ewropew għar-Rappurtaġġ Finanzjarju (EFRAG) lill-IASB dwar l-espożizzjoni tal-abbozz tal-istandard ta' rappurtaġġ finanzjarju internazzjonali għal intrapriżi żgħar u ta' daqs medju (IFRS għall-SMEs),

—

wara li kkunsidra l-ittri tat-3 ta' Ottubru 2007 taċ-chairperson tal-Kumitat għall-Affarijiet Ekonomiċi u Monetarji lill-Kummissjoni Ewropea bħala tweġiba għall-konsultazzjoni mal-Kummissjoni għat-Titoli u l-Kambju tal-Istati Uniti (SEC) u liċ-chairpersons tal-Kumitati korrispondenti tal-Kungress tal-Istati Uniti,

—	wara li kkunsidra l-istqarrija tas-7 ta' Novembru 2007 tal-Kummissjoni, l-Aġenzija għas-Servizzi Finanzjarji tal-Ġappun, l-Organizzazzjoni Internazzjonali tal-Kummissjonijiet tat-Titoli (IOSCO) u s-SEC dwar ħidma għal titjib fit-tmexxija tal-IASCF,

—	wara li kkunsidra d-deċiżjoni SEC tal-21 ta' Diċembru 2007 dwar l-IFRS għall-emittenti barranin;

—

wara li kkunsidra r-Raba' Direttiva tal-Kunsill 78/660/KEE tal-25 ta' Lulju 1978 ibbażata fuq l-Artikolu 54(3)(g) tat-Trattat dwar il-kontijiet annwali ta' ċerti tipi ta' kumpaniji (3) u s-Seba' Direttiva tal-Kunsill 83/349/KEE tat-13 ta' Ġunju 1983 bbażata fuq l-Artikolu 54(3)(g) tat-Trattat dwar kontijiet konsolidati (4) (ir-Raba' u s-Seba' Direttivi għal-Liġi tal-Kumpaniji),

—	wara li kkunsidra l-Artikolu 45 tar-Regoli ta' Proċedura tiegħu,

—	wara li kkunsidra r-rapport tal-Kumitat għall-Affarijiet Ekonomiċi u Monetarji u l-opinjoni tal-Kumitat għall-Affarijiet Legali (A6-0032/2008),

A.	billi l-kunċett IFRS kien stabbilit bl-għan li jintlaħqu standards reali ta' rappurtaġġ finanzjarji globali għall-kumpaniji fis-swieq pubbliċi,

B.	billi minn Jannar 2005 kumpaniji fis-swieq pubbliċi fl-Unjoni Ewropea kienu obbligati jużaw standards ta' kontabilita internazzjonali għad-dikjarazzjonijiet finanzjarji konsolidati tagħhom,

C.	billi skond ir-Regolament (KE) Nru 1606/2002, l-IASCF/IASB kien fil-fatt ingħata status ta' leġiżlatur,

D.	billi jtenni l-pożizzjoni tiegħu kif dikjarata fil-paragrafi 37 sa 39 fir-riżoluzzjoni msemmija hawn fuq tal-4 ta' Lulju 2006 dwar l-iżviluppi riċenti u l-prospetti fir-rigward tal-liġi tal-kumpaniji,

E.

billi minn mindu inkarigat ruħa mill-IFRS, l-Unjoni Ewropea akkwistat intwizzjoni u kompetenzi li jridu jintużaw meta jiġi diskuss l-iżvilupp ulterjuri tal-IASCF/IASB; billi ġurisdizzjonijiet li ma abbandunawx l-istandards tagħhom ta' kontabilità imma sempliċement bdew proċessi ta' konverġenza jistgħu ma jkollhomx l-istess kompetenzi jew esperjenza;

F.	billi s-17-il xahar li għaddew sakemm inħatar iċ-chairperson il-ġdid tal-IASCF iwasslu biex wieħed jiddubita dwar l-effikaċità tal-proċess attwali għall-għażla u l-ħatra tal-membri ta' dan il-korp,

G.	billi l-Unjoni Ewropea għandha tersaq minn attitudni reattiva għal attitudni proattiva fir-relazzjonijiet tagħha mal-IASCF/IASB,

H.	billi l-kriżi tal-krediti “subprime” tas-sajf 2007 enfasizzat l-importanza tal-istandards ta' kontabilità, u b'mod partikulari tal-kunċetti ta' “valur ġust” u tal-kunċett “market-to- market” fir-rigward tal-istabilità finanzjarja,

Organizazzjonijiet internazzjonali trasparenti u demokratiċi

1.   Huwa sod fil-konvinzjoni tiegħu li għandhom jiġu żviluppati standards ta' kontabilità globali għoljin u ta' kwalità kbira;

2.   Jinnota li l-IASC huwa korp privat awtoregolatorju li ngħata l-irwol ta' leġiżlatur bid-deċiżjoni tal-Unjoni Ewropea (KE) Nru 1606/2002; jirrikonoxxi xi tħassib dwar il-fatt li l-IASCF/IASB jistgħu jkunu neqsin mit-trasparenza u mir-responsabilizzazzjoni u b'konsegwenza talli m'humiex taħt il-kontroll ta' xi gvern elett demokratikament, u mingħajr ma ġew stabbilliti mill-istituzzjonijiet tal-UE l-proċeduri u l-prattiki għall-konsultazzjoni u t-teħid demokratiku ta' deċiżjonijiet li jakkumpanjawhom u li soltu jintużaw fil-proċeduri leġiżlattivi tagħhom stess; jagħraf, madankollu, il-fatt li l-IASCF u l-IASB ppruvaw itejbu dawn in-nuqqasijiet permezz, pereżempju, ta' laqgħat ta' darbtejn fis-sena li fihom l-IASCF tevalwa l-ħidma tal-IASB permezz ta' evalwazzjoni tal-impatt ta' standards ġodda, u bl-introduzzjoni ta' stqarrijiet formalizzati dwar rispons minn kummenti li jkunu nġabru waqt konsultazzjonijiet pubbliċi;

3.   Iqis li. fin-nuqqas ta' soluzzjoni sodisfaċenti biex tiġi stabbilita u moniterjata l-IASCF/IASB. għandu jitnieda dibattitu dwar il-kundizzjonijiet tal-integrazzjoni tal-IASCF/IASB fis-sistema ta' governanza internazzjonali, pereżempju, il-Fond Monetarju Internazzjonali, l-Organizzazzjoni għall-Koperazzjoni u Żvilupp Ekonomku, il-Bank Dinji;

4.   Jenfasizza l-ħtieġa ta' iżjed rappreżentanti bi sfond Ewropew fil-korpi li jiffissaw l-istandards internazzjonali sabiex niġġustifikaw approċċ tassew internazzjonali u biex nissodisfaw il-bżonn ta' kunsiderazzjoni bilanċjata tal-piż tal-Unjoni Ewropea li tikkostitwixxi tabilħaqq l-akbar żona ekonomika u ż-żona bl-ikbar numru ta' entitajiet li jagħlu użu mill-IFRS; jemmen li membri tal-bord/trustess kollha tal-IASB għandhom jiġu minn pajjiżi li adottaw jew li biħsiebhom jadottaw l-IFRS; jappoġġja l-inkorporazzjoni ta' dispożizzjoni għal bilanċ ġeografiku minimu fil-kostituzzjoni tal-IASCF, kif huwa propost mit-trustees;

5.   Jinnota d-dimensjoni dejjem aktar teoretika li qiegħda tikber fil-proġetti tal-IASB li l-kumplessità u n-natura teoretika tagħhom huma tali li l-SMEs, b'mod partikulari, mhux dejjem ikunu jistgħu jsegwuhom;

6.   Jinnota li xi aspetti kummerċjali prattiċi m'humiex riflessi b'mod xieraq mill-IASB; iqis li mill-perspettiva tal-utent, huwa importanti li l-preżentazzjoni tad-dikjarazzjoni finanzjarja għall-kontabilità tkun utli għal skopijiet oħrajn, pereżempju, għall-iskopijiet ta' għoti ta' informazzjoni lill-investituri, monitoraġġ tal-prestazzjoni u mmaniġġjar finanzjarju;

7.   Jappoġġja dibattitu miftuħ u li jibqa' għaddej dwar l-istandards tal-kontabilità; għal dan il-għan, jemmen li l-IASB għandu jsaħħaħ il-proċeduri tiegħu fir-rigward tal-parteċipanti konċernati sabiex jitqiesu l-fehmiet tal-utenti kollha tal-IFRS u tal-investituri;

8.   Huwa tal-fehma, madankollu, li t-tmexxija u l-kontabilità jridu jittejbu permezz ta' dawn il-miżuri:

(a)

jiġi stabbilit korp ta' sorveljanza li jinvolvi l-parteċipanti konċernati kollha tal-IASCF/IASB, inklużi b'mod partikulari leġiżlaturi u kontrolluri; u jiġi stabbilit korp li permezz tiegħu parteċipanti tas-swieq rappreżentattivi, inklużi min jipprepara u min juża f'ġurisdizzjonijiet fejn l-IFRS huma mandatorju, jippreżentaw rapport annwali lill-korpi regolatorji tal-IASCF/IASB dwar il-funżjonament tal-istandard internazzjonali ta' kontabilità;

(b)

korp ta' sorveljanza bħal dan ikun responsabbli għall-għażla u l-ħatra ta' trustees bi proċedura trasparenti li tiżgura l-kompetenzi tal-kandidati kif ukoll ir-rappreżentanza ġeografika bilanċjata tal-parteċipanti kollha konċernati; dan jgħin biex il-proċedura tal-ħatra tkun aktar trasparenti u tiżdied il-leġitimità tat-trustees b'mod sinifikanti;

(c)

tingħata garanzija li l-kompożizzjoni tal-IASB, tal-Kunsill Konsultattiv dwar l-Istandards (SAC) u tal-Kumitat tal-Interpretazzjoni tar-Rappurtar Finanzjarju Internazzjonali titjib u li t-trustees jiżguraw li l-proċedura tal-ħatra tkun trasparenti u jitqiesu kif xieraq l-interessi ta' gruppi varji konċernati;

(d)	parteċipazzjoni akbar tat-trustees fis-sorveljanza tal-ħidma tal-IASB u tal-pjan ta' ħidma tiegħu, b'mod partikulari dwar il-mod ta' kif inhu mfassal il-pjan ta' ħidma u l-mandati lill-IASB;

(e)	garanzija, fl-Istatut tal-IASCF, li l-IASB tiżviluppa soluzzjonijiet li ma jkunux biss teknikament korretti, iżda li jirriflettu wkoll dak li huwa meħtieġ u possibbli mill-perspettiva tal-utenti (investituri u kontrolluri) u tal-partijiet involuti fit-tħejjija; u

(f)	evalwazzjoni tal-impatt għall-proġetti kollha sabiex jiġu verifikati l-ispejjeż u l-benefiċċji (inklużi għall-kumpaniji operattivi) tat-testi ta' abbozz u, b'mod partikulari, sabiex jiġu enfasizzati l-implikazzjonijiet għall-istabilità finanzjarja;

9.   Jinnota li fid-dikjarazzjoni msemmija hawn fuq tas-7 ta' Novembru 2007, il-Kummissjoni għandha l-għan — kif kien il-każ meta laħqet ftehim dwar pjan ta' azzjoni mal-awtoritajiet tal-Istati Uniti f'April 2006 — li tevita minn qabel soluzzjonijiet fejn, fl-interess tal-effettività u l-leġittimità, ikun meqjus li jkun aħjar li jkun hemm proċess ta' konsultazzjoni u dibattiti miftuħin li għalihom tista' tikkontribwixxi din ir-risoluzzjoni;

10.   Iħeġġeġ li titjib fir-responsabilizzazzjoni u t-tmexxija tal-IASCF/IASB ma joħloqx burokrazija żejda u li jiġi żgurat li kwistjonijiet ta' natura teknika ma jiġux politiċizzati bla bżonn;

11.   Iqis li l-IASB, qabel ma jimpenja ruħu għall-iżvilupp ta' standard, għandu jqis il-bżonnijiet attwali u l-informazzjoni relevanti li l-utenti (awdituri, investituri, superviżuri) jqisu li għandhom bżonn;

12.   Iħeġġeġ lill-IASB biex qabel l-adozzjoni ta' standard ġdid, jagħmel studji tal-impatt fuq il-partijiet interessati kollha billi jikkunsidra d-diversità ġeografika u l-istrutturi tas-swieq; jilqa' b'sodisfazzjon l-aħbar tat-trustees tal-IASCF li huma se jirreferu għall-analiżi u għall-feedback wara l-implimentazzjoni fir-rapport annwali għall-2007 tagħhom;

13.   Jitlob li jitfasslu standards ta' kontabilità jew u li dawn jiġu modifikat biss meta tiġi stabbilita ħtiega ċara u benefiċċjarja u wara li jkun sar proċess ta' konsultazzjoni preliminari bir-reqqa;

14.   Iqis li f'dan il-qasam mad-dritt ta' inizjattiva tal-Kummissjoni għandu jkun hemm proċess xieraq ta' konsultazzjoni minn qabel;

15.   Jaqbel mal-Kunsill li l-miżuri magħżula sabiex itejbu l-istruttura tat-tmexxija tal-IASB għandhom jiġi implimentati b'konformità ma' pjan ta' ħidma xieraq; hu wkoll tal-opinjoni li dan japplika għall-miżuri proposti mill-Parlament;

16.   Iqis li l-Parlament għandu jkun ikkonsultat serjament fi żmien xieraq fl-abbozzar tal-pjan ta' ħidma u fl-iffissar ta' prijoritajiet u tad-direzzjoni ta' proġetti ġodda li jistabbilixxu l-istandards; jitlob f'dan ir-rigward li jkun hemm fażi bikrija ta' konsultazzjoni tal-Parlament;

17.   Huwa tal-fehma li l-istruttura ta' finanzjament tal-IASCF/IASB, li bħalissa hija bbażata esklussivament fuq kontribuzzjonijiet volontarji, inter alia minn kumpaniji jew minn soċjetajiet ta' verifika, tqajjem xi mistoqsijiet; jitlob lill-IASC/IASB biex jeżaminaw b'mod partikulari kif is-sistema ta' finanzjament tista' tiġi modifikata sabiex jiġi żgurat, l-ewwelnett li l-gruppi kollha tal-utenti jkunu involuti b'mod adegwat fil-finanzjament, it-tieni, li ma jkunx hemm lok għal konflitti ta' interess bejn partijiet li jiffinanzjaw u utenti, u t-tielet, li jkun hemm aċċess universali għall-istandards ta' kontabilità; jitlob lill-Kummissjoni sabiex teżamina jekk u taħt liema kundizzjonijiet tkun tista' tikkunsidra l-possibilità li tikkontribwixxi għal dan il-finanzjament;

18.   Huwa tal-fehma li l-finanzjament trasparenti u stabbli tal-IASCF/IASB huwa ta' importanza kbira; jitlob lill-Kummissjoni sabiex tikkunsidra jekk u kif jista' jinbena metodu uniformi ta' finanzjargħall-UE;

L-implimentazzjoni tal-IFRS fl-Unjoni Ewropea

19.   Iqis li huwa essenzjali li l-Komunità tesprimi ruħa b'mod aktar koerenti sabiex tiżgura l-influwenza massima tagħha fl-istadji kollha tal-process ta' abbozzar, l-interpretazzjoni u l-implimentazzjoni ta' standards ta' kontabilità;

20.   Jinnota l-kontribut li taw l-IFRS billi assiguraw dikjarazzjonijiet finanzjarji li jitqabblu faċilment bejn il-pajjiżi, bejn il-kompetituri fl-istess settur industrijali u bejn settur industrijali u ieħor;

21.   Jinnota li l-merti ta' IFRS li ma jikkonċernawx biss aspetti tekniċi ta' kontabilità iżda huma ta' benefiċċju wkoll għas-swieq kapitali u għall-Unjoni Ewropea bħala mexxejja dinjija;

22.   Jinnota li r-Roundtable għall-applikazzjoni konsistenti tal-IFRS fl-Unjoni Ewropea (5) mnedija mill-Kummissjoni fl-2004 fil-bidu tal-leġiżlatura ma ssodisfatx l-aspettativi rigward kemm tista' tagħti espressjoni ċara tal-fehmiet u l-interessi tal-UE;

23.   Jenfasizza li l-konsistenza fl-adozzjoni u fl-applikazzjoni hija essenzjali għas-suċċess tal-IFRS, iżda jfakkar li dawn huma standards ibbażati fuq prinċipji u li, għalhekk, ma għandhiex tkun imfittxija l-konsistenza bi ħsara għall-ġudizzju professjonali;

24.   Jaqbel mal-Kummissjoni dwar il-punt li l-konklużjonijiet tar-Roundtable imsemmija hawn fuq iridu jiġu kkunsidrati ħafna aktar fix-xogħol fuq standards tal-IASB;

25.   Jinnota li numru kbir ta' parteċipanti qed jieħdu sehem fil-proċedura Ewropea ta' adozzjoni; b'mod partikulari, jiġbed l-attenzjoni għall-fatt li l-Kummissjoni tirċievi kontribuzzjonijiet minn għadd ta' partijiet li jidher ċar li għandhom l-istess kompetenzi; jirrimarka li dan id-duplikar ta' kompetenzi joffri potenzjal biex tisseddaq l-effiċjenza u t-trasparenza;

26.   Iqis li l-fora li fihom il-Komunità tista' issemma' leħinha (Il-Kumitat Regolatorju ta' Kontabilità jew l-EFRAG) ma jippermettulhiex li tittratta b'mod ugwali ma' stati li huma msejsa fuq strutturi ċentralizzati ta' regolaturi u ta' superviżuri (bħall-Bord Finanzjarju ta' Standards ta' Kontabilità u l-SEC fl-Istati Uniti, jew il-Bord ta' Standards ta' Kontabilità u l-Aġenzija għas-Servizzi Finanzjarji fil-Ġappun);

27.   Huwa tal-fehma li meta jitqiesu l-istrutturi nazzjonali għal kwistjonijiet ta' kontabilità, l-istabbiliment ta' struttura Ewropea aktar uniformi tista' tiffaċilita, u b'hekk issaħħaħ, l-irwol li l-Unjoni Ewropea għandu jkollha fil-livell globali, speċjalment jekk jiġu aboliti fejn ikun xieraq xi korpi eżistenti; jitlob lill-Kummissjoni sabiex tiżviluppa u tressaq proposta b'konsultazzjoni mal-Parlament Ewropew, mal-Istati Membri u mal-Kumitat tar-Regolaturi tat-Titoli Ewropej sabiex titwaqqaf struttura tal-UE li tkun tikkostitwixxi punt ta' riferenza leġittima fil-livell internazzjonali u li tiggarantixxi interpretazzjoni u applikazzjoni uniformi tal-istandards;

28.   Jilqa' b'sodisfazzjon il-mod kif il-Parlament eżerċita l-poteri tiegħu f'dan il-qasam u jindika li l-bidla fl-ambitu tal-proċedura riveduta tal-komitoloġija tfisser li l-Parlament Ewropew se jkun aktar involut fl-iżvilupp u l-awtorizzazzjoni tal-IFRS; madankollu, jinnota li l-Parlament mhux se jkun formalment involut ħlief fl-aħħar fażi tal-proċedura ta' adozzjoni; bħala miżura sabiex ma jinħeliex żmien, jitlob li jkun hemm garanzija li l-Parlament ikun diġà kkonsultat serjament fil-proċedura meta titfassal il-ħidma tal-IASB u meta jiġi kkunsidrat abbozz ta' standard ġdid, sabiex tiġi evitata l-introduzzjoni ta' li jsir varjant speċifiku tal-UE tal-IFRS jew il-ħtieġa li jsiru bidliet wara;

29.   Jemmen li jkun ta' ħsara għall-kumpanji tal-EU negozjati pubblikament jekk jintużaw varjanti tal-IFRS, sakemm dan ma jsirx bħala l-aħħar alternattiva;

30.   Huwa tal-fehma li għandha tingħata attenzjoni partikolari għallinqas għal dan li ġej:

(a)

il-qafas tal-IASB (il-bażi konċettwali tax-xogħol tal-IASB): jindika li d-dikjarazzjonijiet finanzjarji jitfasslu mhux biss għall-investituri tas-suq tal-kapital, iżda wkoll għal għadd ta' partijiet konċernati oħra bħalma huma, inter alia, il-kredituri, l-impjegati, l-awtoritajiet, is-sidien u l-klijenti, eċċ;

(b)	il-marka uffiċjali IAS/IFRS (preżentazzjoni ta' dikjarazzjonijiet finanzjarji): jindika l-fatt li l-IASB għandha tikseb soluzzjonijiet li jqisu l-ħtiġijiet tal-ġurisdizzjonijiet differenti li wasslu biex l-IFRS isiru obligatorji;

(c)

IAS 32 u IAS 39: jistieden lill-IASB biex tinkorpora fl-IAS 32 definizzjoni ta' “kapital proprju” li tippermetti t-tipi kollha ta' kumpaniji, inklużi b'mod partikulari soċjetajiet koperattivi u sħubijiet, li jiddikjaraw kapital ipprovdut minn azzjonisti bħala kapital proprju fid-dikjarazzjoni tal-bilanċ u sabiex tadotta soluzzjoni għall-’hedge accounting’ ibbażat fuq il-prattiki attwali tal-immaniġġjar tar-riskju ta' organizzazzjonijiet bankarji;

(d)	għaqdiet bejn intrapriżi (kontabilità għall-akkwist ta' negozju ieħor): jenfasizza li l-IASB għandha telabora soluzzjonijiet rigward il-firxa tal-applikazzjoni tal-prinċipju tal-valur ġust;

(e)	kejl tal-valur ġust: huwa tal-fehma li l-IASB għandha tiddeċiedi skond l-informazzjoni li tirriżulta mill-konsultazzjonijiet u, minħabba l-impatt apparenti ta' proċess bħal dan, għandha tillimita l-ambitu tal-prinċipju tal-valur ġust,

(f)

konċessjonijiet ta' servizz (arranġamenti li taħthom entità — l-operatur tal-konċessjoni — permezz ta' kuntratt mal-parti li tipprovdi l-konċessjoni, li hija — normalment gvern — tirċievi d-dritt u tobbliga ruħha u li tipprovdi servizzi pubbliċi): jenfasizza li għandhom jinsabu soluzzjonijiet bilanċjati; kif ukoll:

(g)	ir-rappurtaġġ tar-rendiment (turija u preżentazzjoni ta' bidliet rikonoxxuti fl-assi u fil-kapitali passivi minn transazzjonijiet jew atttivitajiet oħrajn, minbarra dawk relatati ma' transazzjonijiet ma' sidien); jenfasizza li għandhom jinsabu soluzzjonijiet bilanċati;

31.   Huwa tal-fehma li l-applikazzjoni tal-prinċipju tal-valur ġust tista' tiswa ħafna flus u tista' jwassal għal valutazzjonijiet mhux realistiċi, pereżempju, fin-nuqqas ta' valutazzjoni minn swieq attwali, l-applikazzjoni tal-prinċipju tal-valur ġust jista' ma jkunx indikattiv tal-valur proprju tal-kumpaniji; jemmen ukoll li jeħtieġ jitqies il-fatt li l-applikazzjoni tal-prinċipju tal-valur ġust għall-kapital attiv u l-kapital passiv mhux dejjem twassal għal evalwazzjonijiet realistiċi;

32.   Iqis li minħabba r-rabtiet potenzjali bejn l-IFRS u t-tassazzjoni, l-abbozzar, l-implimentazzjoni u l-interpretazzjoni ta' dawn l-istandards jista' jkollhom impatt enormi fuq l-Istati Membri;

33.   Jilqa' b'sodisfazzjon il-prattika, żviluppata sa mill-bidu ta' dal-perjodu ta' leġiżlatura mill-Kumitat għall-Affarijiet Ekonomiċi u Monetarji tiegħu, li tiġi organizzata laqgħa darba fis-sena maċ-chairperson tal-IASB kif ukoll intervisti informali mal-membri tal-IASCF, u jitlob li fil-futur iċ-chairpersons tal-IASB u tal-IASCF iħejju rapport annwali għall-Parlament dwar il-kwistjonijiet kollha li jikkonċernaw lill-Parlament (inklużi l-programm ta' ħidma, id-deċiżjonijiet dwar l-istaff, il-finanzjament u l-istandards kontroversjali);

34.   Filwaqt li jappoġġja l-intenzjoni tal-IASB li ttejjeb l-istandards eżistenti, jesprimi t-tħassib tiegħu dwar il-fatt li aġġustamenti kontinwi, u anke dwar bidliet żgħar li jistgħu jiswew ħafna flus u jirriżultaw f'bidliet għaljin għall-kumpaniji kbar; jemmen li kwalunkwe bidla għandha ssir biss meta titqies meħtieġa u wara li tkun saret analiżi tal-benefiċċju mil-lat tal-ispejjeż;

L-IFRS għall-SMEs

35.   Jinnota li l-IASB qed jagħmel konsultazzjonijiet wiesgħa u testijiet fil-prattika fir-rigward tal-abbozz espożittiv tiegħu ta' IFRS għall-SMEs; jitlob li, fil-futur, tingħata aktar attenzjoni serja għar-riżultati miksuba minn konsultazzjonijiet u testitijiet bħal dawn milli ngħatat rigward l-abbozz espożittiv ta' IFRS għall-SMEs; jenfasizza li dan huwa meħtieġ jekk l-Unjoni Ewropea xi darba qatt tibda tikkunsidra IFRS għall-SMEs, jew l-adozzjoni ta' standards tal-EU għall-SMEs, bl-iskop li jkun hemm konvergenza ta' dawn mal-IFRS għall-SMEs;

36.   Jikkunsidra li l-fehma mifruxa sew fost l-SMEs hi li l-IFRS għall-SMEs proposti mill-IASB huma kumplikati wisq għalihom u, barra minn hekk, jirreferu bosta drabi għall-IFRS sħiħ; huwa tal-fehma li l-obbligi rigward l-annessi huma komprensivi wisq u li l-piż fir-rigward tal-obbligu li tingħata l-informazzjoni m'huwiex proporzjonat ma' kwalunkwe benefiċċju li tirriżulta minnu; huwa mħasseb li l-abbozz tfassal għal SMEs relattivament kbar (iżjed minn ħamsin impjegat) u jistqarr li l-biċċa l-kbira tal-SMEs huma żgħar; jinnota li l-SMEs huma inkwetati wkoll minħabba li l-IASB għandha l-intenzjoni li tibdel l-istandards tagħha kull sentejn; madankollu, jinnota li din tista' tkun tranżizzjoni fakultattiva utli għall-SMEs ikbar u li qed jespandu imma jenfasizza li dan m'għandux iservi bħala spunt għal armonizzazzjoni sfurzata;

37.   Hu tal-fehma li l-promozzjoni (jew l-inkoraġġġiment) tal-użu volontarju tal-IFRS mhux bla riskji; jemmen li jekk ikun hemm xi ftit Stati Membri li jiddeċiedu li japplikaw l-IFRS finali għall-SMEs fil-forma stabbilita mill-IASB, dan jista' jwassal għall-frammentazzjoni tas-suq intern u jista' wkoll jippreġudika l-kontabilità għall-SMEs madwar l-Unjoni Ewropea kollha;

38.   Jenfasizza li ma ngħata l-ebda mandat lill-IASB biex tiżviluppa l-IFRS għall-SMEs; jinnota li l-proċedura ta' adozzjoni mhix valida ħlief għall-istandards internazzjonali ta' kontabilità u għall-interpretazzjonijiet li għandhom jintużaw mill-impriżi elenkati; madankollu josserva li l-proċedura ta' adozzjoni ma tistax tintuża għar-rikonoxximent tal-IFRS għall-SMEs;

39.   Jipproponi li l-ewwel għandu jiġu evalwat jekk l-SMEs fl-Unjoni Ewropea humiex se jibbenefikaw b'xi mod minn standard żviluppat mill-IASB; jinnota li l-IASB normalment jikkunsidra ruħu bħala entità li toħloq standards fl-interessi tal-investituri fis-suq kapitali; jagħraf li l-IASB fil-“basis for conclusions” tiegħu, jikkonferma li l-eżiġenzi tal-SMEs u dawk tal-investituri fis-suq kapitali mhumiex l-istess; jixtieq jaf jekk il-bilanċ fir-rigward tal-SMEs huwiex attwalment suffiċjent fl-IASB; jirrikonoxxi, madankollu, li minn partijiet oħra tad-dinja jista' hemm talba biex jiġi żviluppat standard għall-SMEs u jipproponi li ssir evalwazzjoni iktar preċiża ta' din it-talba; jenfasizza li dan għandu jkun bla ħsara għall-aċċettazzjoni tal-UE ta' standard eventwali;

40.   Jinnota li r-Raba' u s-Seba' Direttiva dwar il-Liġi tal-Kumpaniji jipprovdu l-qafas legali għall-bilanċi tal-aħħar tas-sena tal-SMEs fl-Unjoni Ewropea u li għadha trid tiġi ċċarata il-kwistjoni dwar ir-relazzjoni bejn l-IFRS għall-SMEs, kif propost mill-IASB; jikkunsidra li r-Raba' u s-Seba' Direttiva dwar il-Liġi tal-Kumpaniji għandha tkun il-bażi għar-rekwiżiti ta' kontabilità għall-SMEs tal-UE, inklużi s-sħubijiet;

41.   Iqis li l-Unjoni Ewropea għandha tevalwa sew il-benefiċċji rispettivi li tikkommetti ruħha għall-IFRS għall-SMEs jew jekk għandhiex tiżviluppa standard proprju indipendenti u komprensiv għall-SMEs; jikkunsidra wkoll li standard Ewropew ta' dan it-tip għandu jiġi integrat fil-qafas konċettwali tal-IFRS mingħajr ma jeħtieġ lill-SMEs li jużaw l-IRFS kollha;

42.   Jemmen li kwalunkwe rekwiżit ta' kontabilità għall-SMEs fl-Unjoni Ewropea għandu jkun imfassal skond il-ħtiġijiet tal-utenti; f'dan ir-rigward huwa tal-parir li ssir mill-ġdid analiżi dettaljata tal-ħtiġijiet tal-utenti;

43.   Fid-dawl ta' dan kollu, jinkoraġġixxi lill-Kummissjoni biex tkompli l-attivitajiet tagħha fir-rigward tas-simplifikazzjoni tal-liġi tal-kumpaniji, tal-kontabilità u tal-verifika għall-SMEs permezz tal-atti leġiżlattivi rilevanti, b'mod partikulari tar-Raba' u s-Seba' Direttiva dwar il-Liġi tal-Kumpaniji;

44.   Jinnota li r-regolamenti dwar il-kontabilità għandhom influwenza kbira fuq il-qasam kollu tal-liġi kummerċjali u li l-IFRS ġdid għall-SMEs jkollu effett wiesa' fuq l-SMEs u li, b'mod partikolari, ikollu impatt qawwi fil-prattika fuq il-leġiżlazzjoni nazzjonali tat-tassazzjoni tal-kumpaniji; jinnota li IFRS għall-SMEs ibbażat fuq il-prinċipju ta' valur ġust imur kontra l-prinċipju tal-manteniment tal-kapital li hu predominanti f'ġurisdizzjonijiet oħrajn, u mhux dejjem hu fl-aħjar interessi (fiskali) tal-SMEs;

45.   Jemmen li IFRS għall-SMEs għandu jqis il-fatt li jeżistu diversi tipi ta' impriżi (pereżempju sħubijiet u koperattivi) fl-Unjoni Ewropea; u għalhekk huwa tal-fehma li IFRS għandu jinkludi definizzjoni ċara ta' “fondi proprji” li tikkunsidra l-ħtiġijiet partikulari tal-SMEs;

46.   Jiddispjaċih li l-abbozz tal-IFRS għall-SMEs ma jqisx b'mod adegwat il-fatt li d-destinatarji tal-kontijiet tal-SMEs huma prinċipalment azzjonisti personali, kredituri, imsieħba fin-negozju u impjegati, iżjed milli investituri anonimi bħal fil-każ tal-kumpaniji privati, u li dawk id-destinatarji tal-kontitjiet tal-SMEs ikunu iżjed interessati f'relazzjoni ta' negozju fit-tul milli f'investiment għal medda ta' żmien qasir;

47.   Jitlob lill-Kummissjoni sabiex tiffissa proċedura ta' konsultazzjoni bir-reqqa għal qafas ta' kontabilità għall-SMEs fl-Unjoni Ewropea skond il-proposti leġiżlattivi ordinarji, u biex tirtira l-impenn tagħha li timplimenta u tadotta IFRS għall-SMEs, biex b'hekk ma tippermettix applikazzjoni parallela ta' standards fl-Unjoni Ewropea sakemm il-proċess intern ma jiġix konkluż; jinkuraġġixxi lill-Kummissjoni sabiex tqis l-opportunità għal tnaqqis tal-piżijiet amministrattivi għall-SMEs fil-qasam tal-kontabilità u tal-verifka;

48.   Jirrikonoxxi, madankollu, li hemm ħtieġa ġenerali biex jiġu simplifikati l-kontabilità u l-miżuri tal-verifika għall-SMEs, filwaqt li jfakkar li l-SMEs joħolqu l-impjiegi u huma mutur tat-tkabbir ekonomiku;

Pjan għall-konverġenza u l-ekwivalenza

49.   Ifakkar li l-iskop aħħari ta' kulmin huwa konċernat għandha tkun l-adozzjoni tal-IFRS; jirrikonoxxi li hemm tensjoni bejn l-intenzjoni li tinkiseb konverġenza massima u x-xewqa li tinżamm il-kompetenza sħiħa tal-Unjoni Ewropea, li tmur lilhinn mill-kunsens li jista' jinkiseb globalment; jenfasizza li d-devjazzjonijiet mill-istandards globali għandhom ikunu ristretti għall-minimu meħtieġ, kemm fl-Unjoni Ewropea, kif ukoll f'partijiet oħra tad-dinja; hu tal-fehma li pajjiżi terzi għandhom ikunu jistgħu jittrattaw l-istandards tal-Unjoni Ewropea bħala entita' waħda u mhux jittrattaw is-27 Stat Membru individwali b'mod differenti, u li l-proċess ta' konverġenza li għadu għaddej ma' sistemi eżistenti, jista' jiġi aċċettat biss bħala stadju intermedjarju;

50.   Jinnota l-importanza u x-xewqa li jiġu stabbiliti standards u konvergenza globali u jirrikonoxxi li l-konverġenza globali tal-istandards ta' kontabilità għaddejja b'pass dejjem aktar mgħaġġel;

51.   Jappoġġja l-kunċett tal-konverġenza u tal-ekwivalenza; jenfasizza, madankollu, li l-konverġenza ma' ċerti standards ta' pajjiżi terzi trid tkun ibbażata fuq evalwazzjonijiet minn qabel tal-merti u tal-impatt ta' bidla bħal din fuq min jipprepara u juża d-dikjarazzjonijiet finanzjarji u, b'mod speċjali, fuq l-SMEs, u jitlob lill-IASB biex iżomm dan f'moħħu meta jipproċedi;

52.   Jinnota li x-xogħol rigward konverġenza qed javvanza u tantiċipa l-periklu li jara hu li l-aktar li x'aktarx jkunu kkunsidrati huma l-qafas ekonomiku u l-qafas liġi tal-kumpaniji ta' pajjiżi terzi kbar, filwaqt li l-istrutturi Ewropej ikollhom irwol iżgħar;

53.   Jinnota li, fl-20 ta' Ġunju 2007, is-SEC ressqet proposta li tgħid li għandhom jiġu approvati l-bilanċi ppreżentati minn emittenti barranin mingħajr il-ħtieġa ta' rikonċiljazzjoni sakemm dawn ikunu ġew stabbiliti fuq il-bażi tal-verżjoni Ingliża tal-IFRS, kif adottata mill-IASB; jenfasizza li l-objettiv huwa li l-istandards tal-IFRS inkorporati mill-UE fil-liġi fis-seħħ attwalment, jiġu rikonoxxuti mill-SEC;

54.   Jilqa' b'sodisfazzjon il-progress magħmul fil-Pjan Direzzjonali ta' Kontabilità bejn l-UE u l-Istati Uniti u l-avviżi riċenti mill-SEC biex jippermettu li emittenti privati barranin jissottomettu dikjarazzjonijiet finanzjarji skond l-IFRS mingħajr ma jirrikonċiljaw mal-US GAAP; jappoġġja l-approċċ kif spjegat mill-Kummissjoni fl-ittra tagħha tas-26 ta' Settembru 2007 lill-SEC;

55.   Ifakkar li d-determinazzjoni tal-Unjoni Ewropea li tesiġi li dawn l-intrapriżi bbażati fuq is-suq kapitali sabiex jużaw l-IFRS fid-dikjarazzjonijiet finanzjarji konsolidati tagħhom mill-bidu tal-2005 kienet element kruċjali fiż-żieda fl-interess globali fl-IFRS;

56.   Ifakkar li fit-30 ta' April 2007, il-Presidenti tal-Istati Uniti tal-Amerika, il-President tal-Kunsill Ewropew u l-President tal-Kummissjoni Ewropea wara s-samit annwali tagħhom iffirmaw Dikjarazzjoni Konġunta bejn l-Istati Uniti u l-UE li tiddikjara dan li ġej dwar ir-rappurtaġġ finanzjarju: “Is-swieq finanzjarji: Miżuri għall-ħolqien u l-promozzjoni tal-kundizzjonijiet għal rikonoxximent sa l-2009, jew possibilment qabel, tal-Prinċipji ta' Kontabilità Aċċettati b'Mod Ġenerali u tal-Istandards ta' Rappurtaġġ Finanzjarju tal-Istati Uniti tal-Amerika fiż-żewġ oqsma ekonomiċi mingħajr il-ħtieġa ta' rikonċiljazzjoni”.

57.   Ifakkar fil-kwistjoni li għadha pendenti dwar il-kompetenza tal-ġurisdizzjonijiet differenti li japplikaw l- IFRS għall-istabbiliment tal-interpretazzjoni definittiva tagħhom, li timplika r-riskju li jirriżulta kunflitt ta' interpretazzjoni; jirrimarka li huma biss l-awtoritajiet u l-qrati Ewropej li huma kompetenti biex jagħtu interpretazzjoni definittiva tal-IFRS speċifiku għall-UE u jitlob lill-Kummissjoni biex tiżgura li dan ma jinbidilx; jikkunsidra li l-Kummissjoni, flimkien mal-Istati Membri u l-Parlament, jeħtieġ li tiżviluppa sistema li tiggarantixxi li l-IFRS jiġu interpretati u applikati b'mod uniformi fl-Unjoni Ewropea;

*

* *

58.   Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni, lill-Kumitat tar-Regolaturi tat-Titoli Ewropej, lill-Fondazzjoni tal-Kumitat ta' Standards ta' Kontabilita' Ewropej u l-Bord ta' Standards ta' Kontabilita' Internazzjonali.

---

(1)  ĠU L 243, 11.9.2002, p. 1.

(2)  ĠU C 303 E, 13.12.2006, p. 114.

(3)  ĠU L 222, 14.8.1978, p. 11.

(4)  ĠU L 193, 18.7.1983, p. 1.

(5)  Ir-Roundtable tinkludi rappreżentanti tal-IASB, tal-Kumitat ta' Regolaturi ta' Titli Ewropej, tal-EFRAG, tal-Fédération des Experts Comptables Européens (FEE), tal-Businesseurope, tal-kumpaniji ta' verifika u tal-Kummissjoni; dan hu forum għad-diskussjoni ta' kwistjonijiet kruċjali mingħajr ma' jingħataw b'xi mod interpretazzjonijiet tal-istandards eżistenti.

---