EUR-Lex Aċċess għal-liġi tal-Unjoni Ewropea
Dan id-dokument hu mislut mis-sit web tal-EUR-Lex
Dokument 62007CJ0285
Judgment of the Court (First Chamber) of 11 December 2008.#A.T. v Finanzamt Stuttgart-Körperschaften.#Reference for a preliminary ruling: Bundesfinanzhof - Germany.#Directive 90/434/EEC - Cross-border exchange of shares - Fiscal neutrality - Conditions - Articles 43 EC and 56 EC - Legislation of a Member State making the continued use of the book value of the shares transferred in exchange for the new shares received, and therefore the fiscal neutrality of the transfer, conditional on the carryover of that value in the tax balance sheet of the acquiring foreign company - Compatibility.#Case C-285/07.
Sentenza tal-Qorti tal-Ġustizzja (l-Ewwel Awla) tal-11 ta' Diċembru 2008.
A.T. vs Finanzamt Stuttgart-Körperschaften.
Talba għal deċiżjoni preliminari: Bundesfinanzhof - il-Ġermanja.
Direttiva 90/434/KEE - Skambju ta’ ishma transkonfinali - Newtralità fiskali - Kundizzjonijiet - Artikoli 43 u 56 KE - Leġiżlazzjoni ta’ Stat Membru li tissuġġetta ż-żamma tal-valur kontabbli tal-ishma miġjuba għall-ishma ġodda rċevuti, u għaldaqstant in-newtralità fiskali tat-trasferiment, għad-differiment ta’ dan il-valur fil-bilanċ fiskali tal-kumpannija li tikseb [akkwirenti] barranija - Kompatibbiltà.
Kawża C-285/07.
Sentenza tal-Qorti tal-Ġustizzja (l-Ewwel Awla) tal-11 ta' Diċembru 2008.
A.T. vs Finanzamt Stuttgart-Körperschaften.
Talba għal deċiżjoni preliminari: Bundesfinanzhof - il-Ġermanja.
Direttiva 90/434/KEE - Skambju ta’ ishma transkonfinali - Newtralità fiskali - Kundizzjonijiet - Artikoli 43 u 56 KE - Leġiżlazzjoni ta’ Stat Membru li tissuġġetta ż-żamma tal-valur kontabbli tal-ishma miġjuba għall-ishma ġodda rċevuti, u għaldaqstant in-newtralità fiskali tat-trasferiment, għad-differiment ta’ dan il-valur fil-bilanċ fiskali tal-kumpannija li tikseb [akkwirenti] barranija - Kompatibbiltà.
Kawża C-285/07.
Ġabra tal-Ġurisprudenza 2008 I-09329
IdentifikaturECLI: ECLI:EU:C:2008:705
SENTENZA TAL-QORTI TAL-ĠUSTIZZJA (L-Ewwel Awla)
11 ta’ Diċembru 2008 ( *1 )
“Direttiva 90/434/KEE — Skambju ta’ azzjonijiet transkonfinali — Newtralità fiskali — Kundizzjonijiet — Artikoli 43 u 56 KE — Leġiżlazzjoni ta’ Stat Membru li tissuġġetta ż-żamma tal-valur kontabbli tal-ishma ttrasferiti għall-ishma l-ġodda rċevuti, u għaldaqstant in-newtralità fiskali tat-trasferiment, għad-dħul ta’ dan il-valur fil-bilanċ fiskali tal-kumpannija akkwirenti barranija — Kompatibbiltà”
Fil-Kawża C-285/07,
li għandha bħala suġġett talba għal deċiżjoni preliminari skont l-Artikolu 234 KE, imressqa mill-Bundesfinanzhof (il-Ġermanja), permezz ta’ deċiżjoni tas-7 ta’ Marzu 2007, li waslet fil-Qorti tal-Ġustizzja fl-14 ta’ Ġunju 2007, fil-proċedura
A.T.
vs
Finanzamt Stuttgart-Körperschaften,
fil-preżenza ta’:
Bundesministerium der Finanzen,
IL-QORTI TAL-ĠUSTIZZJA (L-Ewwel Awla),
komposta minn P. Jann (Relatur), President tal-Awla, A. Tizzano, A. Borg Barthet, E. Levits u J. J. Kasel, Imħallfin,
Avukat Ġenerali: E. Sharpston,
Reġistratur: B. Fülöp, Amministratur,
wara li rat il-proċedura bil-miktub u wara s-seduta tas-17 ta’ April 2008,
wara li kkunsidrat l-osservazzjonijiet ippreżentati:
— |
għal A.T., minn M. Schaden u H. Winkler, Rechtsanwälte, kif ukoll W. Schön, professeur, |
— |
għall-Gvern Ġermaniż, minn M. Lumma u C. Blaschke, bħala aġenti, |
— |
għall-Kummissjoni tal-Komunitajiet Ewropej, minn R. Lyal u W. Mölls, bħala aġenti, |
wara li semgħet il-konklużjonijiet tal-Avukat Ġenerali, ippreżentati fis-seduta tas-6 ta’ Novembru 2008,
tagħti l-preżenti
Sentenza
1 |
It-talba għal deċiżjoni preliminari tirrigwarda l-interpretazzjoni tal-Artikolu 8(1) u (2) tad-Direttiva tal-Kunsill 90/434/KEE, tat-23 ta’ Lulju 1990, dwar is-sistema komuni tat-tassazzjoni li tapplika għall-inkorporazzjonijiet, id-diviżjonijiet, it-trasferimenti tal-attivi u l-iskambji tal-ishma [azzjonijiet] li jirrigwardaw il-kumpanniji ta’ Stati Membri differenti (ĠU L 225, p. 1) kif ukoll tal-Artikoli 43 KE u 56 KE. |
2 |
Din it-talba ġiet ippreżentata fil-kuntest ta’ kawża bejn A.T. u Finanzamt Stuttgart-Körperschaften (awtorità fiskali li għandha s-sede tagħha fi Stuttgart u li hija kompetenti għall-kumpanniji, iktar ’il quddiem, il-“Finanzamt”) dwar id-deċiżjoni ta’ din tal-aħħar li tintaxxa, fil-kuntest ta’ skambju ta’ azzjonijiet transkonfinali, qligħ ta’ trasferiment. |
Il-kuntest ġuridiku
Il-leġiżlazzjoni Komunitarja
3 |
Id-Direttiva 90/434 hija intiża, skont l-ewwel premessa tagħha, sabiex tiggarantixxi li l-operazzjonijiet ta’ ristrutturazzjoni ta’ kumpanniji ta’ diversi Stati Membri, bħall-inkorporazzjonijiet, id-diviżjonijiet, it-trasferimenti tal-attivi u l-iskambji ta’ azzjonijiet, ma jkunux ostakolati b’restrizzjonijiet, żvantaġġi u distorsjonijiet li jinħolqu b’mod partikolari mid-dispożizzjonijiet fiskali fl-Istati Membri. |
4 |
Għal dan il-għan, din id-direttiva tistabbilixxi skema li biha l-imsemmija operazzjonijiet ma jistgħux, fihom infishom, jiġu ntaxxati. Il-qligħ eventwali minn dawn l-operazzjonijiet jista’, fil-prinċipju, jiġi ntaxxat, iżda biss fil-mument meta dawn effettivament jitwettqu. |
5 |
L-ewwel erba’ premessi kif ukoll id-disa’ premessa tad-Direttiva 90/434 jipprovdu kif ġej: “Billi l-inkorporazzjonijiet, id-diviżjonijiet, it-trasferimenti ta’ l-attivi u l-iskambji ta’ ishma [azzjonijiet] li jirrigwardaw kumpanniji fi Stati Membri differenti jistgħu jkunu meħtieġa sabiex joħolqu ġewwa l-Komunità l-kondizzjonijiet analogi għal dawk tas-suq intern u sabiex b’hekk jiżguraw li jiġi stabbilit u jiffunzjona b’mod effettiv is-suq komuni; billi dawn il-ħidmiet ma għandhomx jiġu mfixkla b’restrizzjonijiet, żvantaġġi u tagħwiġ li jinħolqu b’mod partikolari mid-dispożizzjonijiet tat-taxxi fl-Istati Membri; billi għal dan l-iskop huwa meħtieġ li jiddaħħlu rigward dawn il-ħidmiet regoli tat-taxxa li jkunu newtri mill-lat tal-kompetizzjoni, sabiex iħallu lill-intrapriżi jadattaw lilhom infushom skond il-ħtiġi[ji]et tas-suq komuni, biex iżidu l-produttività tagħhom u jtejbu s-saħħa tagħhom tal-kompetittività fil-livell internazzjonali Billi d-dispożizzjonijiet tat-taxxa jiżvantaġġaw dawn il-ħidmiet, meta mqabbla ma’ dawk li jirrigwardaw il-kumpanniji fl-istess Stat Membru; billi huwa meħtieġ li jitneħħew dawn l-iżvantaġġi; Billi mhux possibbli li jinkiseb dan il-għan bl-estensjoni fil-livell Komunitarju tas-sistemi bħalissa fis-seħħ fl-Istati Membri, ġaladarba d-differenzi bejn dawn is-sistemi x’aktarx li jwasslu għal tagħwiġ; billi sistema komuni tat-taxxa biss hija kapaċi tipprovdi soluzzjoni sodisfaċenti f'dan ir-rigward; Billi s-sistema komuni tat-taxxi għandha tevita l-impożizzjoni tat-taxxi rigward l-inkorporazzjonijiet, id-diviżjonijiet, it-trasferimenti ta’ l-attivi jew l-iskambji ta’ l-ishma, filwaqt li fl-istess ħin tissalvagwarda l-interessi finanzjarji ta’ l-Istat tal-kumpannija trasferitur [trasferenti] jew ta’ dik miksuba; […] Billi huwa meħtieġ li l-Istati Membri jitħallew il-possibbilità li jirrifjutaw li japplikaw din id-Direttiva meta l-inkorporazzjoni, d-diviżjonijiet, it-trasferiment ta’ l-attiv jew l-iskambji ta’ l-ishma, il-ħidma għandha bħala l-għan tagħha l-evażjoni mit-taxxi […].” |
6 |
L-Artikolu 2(d) tad-Direttiva 90/434 jiddefinixxi l-i“skambju ta’ ishma [azzjonijiet]” bħala “ħidma li biha kumpannija tikseb sehem [azzjoni]/ishma fil-kapital ta’ kumpannija oħra hekk li tikseb il-maġġoranza tad-drittijiet tal-voti f'din il-kumpannija bi skambju għall-ħruġ lil dawk li jkollhom l-ishma [azzjonijiet] fil-kumpannija ta’ l-aħħar, bi skambju tat-titoli tagħhom, titoli li jirrappreżentaw il-kapital tal-kumpannija ta’ qabel, u, jekk japplika, il-ħlas fi flus korrenti li ma jaqbiżx il-10 % tal-valur nominali jew, fin-nuqqas ta’ valur nominali, il-valur par tal-kontijiet tat-titoli maħruġa bi skambju.” |
7 |
Skont l-Artikolu 2(g) u (h) ta’ din id-direttiva, “kumpannija miksuba” għandha tfisser “il-kumpannija li fiha jiġi miksub sehem minn kumpannija oħra permezz ta’ skambju tat-titoli”, u minn “kumpannija li tikseb [kumpannija akkwirenti]”“il-kumpannija li takkwista sehem permezz ta’ l-iskambju tat-titoli”. |
8 |
L-Artikolu 8(1) tad-Direttiva 90/434, li jidher taħt it-Titolu II ta’ din tal-aħħar dwar regoli li japplikaw għall-inkorporazzjonijiet, id-diviżjonijiet u l-iskambji ta’ l-ishma [azzjonijiet], jipprevedi: “1. Mal-waqt ta’ inkorporazzjoni, diviżjoni jew skambju ta’ l-ishma [azzjonijiet], l-allokazzjoni tat-titoli li jirrapreżentaw il-kapital tal-kumpannija riċevitur [li tirċievi] jew ta’ dik tal-kisba lil azzjonist tal-kumpannija trasferitur [trasferenti] jew ta’ dik li tikseb bi skambju għat-titoli li jirrappreżentaw il-kapital tal-kumpannija ta’ l-aħħar ma għandhom, minnhom infushom, joħolqu l-ebda tassazzjoni fuq id-dħul, il-profitti jew il-profitti kapitali ta’ dan l-azzjonist. 2. L-Istati Membri għandhom japplikaw il-paragrafu 1 bil-kondizzjoni li l-azzjonist ma jagħtix lit-titoli rċevuti valur ogħla għall-għanijiet tat-taxxa milli kellhom it-titoli skambjati immedjatament qabel l-inkorporazzjoni, id-diviżjoni jew l-iskambju. L-applikazzjoni tal-paragrafu 1 ma għandhiex tipprevjieni lill-Istati Membri milli jintaxxaw il-qligħ li jinħoloq mit-trasferiment sossegwanti tat-titoli rċevuti bl-istess mod bħall-qligħ li jiġi mit-trasferiment tat-titoli li kienu jeżistu qabel il-kisba. F’dan il-paragrafu, l-espressjoni ‘valur għall-għanijiet tat-taxxa’ ifisser l-ammont li fuq il-bażi tiegħu kull qligħ jew telf jiġu kkomputati għall-għanijiet tat-taxxa fuq id-dħul, il-qligħ jew il-profitt kapitali [profitt fuq il-kapital] ta’ azzjonist tal-kumpannija.” |
9 |
L-Artikolu 11(1)(a) tad-Direttiva 90/434 jipprovdi b’mod partikolari li Stat Membru jista’ jirrifjuta li japplika jew li jirtira l-benefiċċju tad-dispożizzjonijiet kollha jew f’parti tat-Titoli II ta’ din id-direttiva meta jidher li l-iskambju ta’ azzjonijiet jkollu bħala l-għan prinċipali tiegħu jew bħala wieħed mill-għanijiet prinċipali tiegħu l-frodi jew l-evażjoni tat-taxxa. |
Il-leġiżlazzjoni Ġermaniża
10 |
L-Artikolu 23(4) tal-Liġi dwar tassazzjoni ta’ ristrutturazzjonijiet ta’ impriżi (Umwandlungssteuergesetz), tat-28 ta’ Ottubru 1994 (BGBl. 1994 I, p. 3267, iktar ’il quddiem l-“UmwStG”), kif emendata, jirregola t-trasferiment ta’ ishma miżmuma f’kumpannija li għandha kapital azzjonarju tal-Unjoni Ewropea kif iddefinita fl-Artikolu 3 tad-Direttiva 90/434 fir-rigward tal-elementi karatteristiċi tagħha, lil kumpannija oħra li għandha kapital azzjonarju tal-Unjoni. |
11 |
Jekk jista’ jintwera li, wara trasferiment tali, il-kumpannija b’kapital azzjonarju li tibbenefika minn dan it-trasferiment tiddisponi direttament, bis-saħħa tas-sehem tagħha, ikkalkolat billi jittieħdu inkunsiderazzjoni l-ishma ttrasferiti, mill-maġġoranza tad-drittijiet ta’ vot fil-kumpannija li tagħha hija rċeviet l-ishma, kif jirriżulta mit-tieni sentenza tal-Artikolu 20(1) tal-UmwStG, il-valutazzjoni tal-ishma li tirċievi l-kumpannija b’kapital azzjonarju li tibbenefika mit-trasferiment hija suġġetta għas-sentenzi 1 sa 4 u 6 tal-Artikolu 20(2) tal-UmwStG, u l-valutazzjoni tal-ishma ġodda li t-trasferent jirċievi mill-kumpannija benefiċjarja tat-trasferiment huwa rregolat permezz tal-ewwel sentenza tal-Artikolu 20(4) tal-UmwStG. |
12 |
Skont l-ewwel sentenza tal-Artikolu 20(2) tal-UmwStG, il-kumpannija b’kapital azzjonarju tista’ tivvaluta l-assi tan-negozju ttrasferit għall-valur kontabbli tagħha jew għall-valur ogħla minn dan tal-aħħar. Skont it-tieni sentenza ta’ dan l-artikolu, il-valutazzjoni għall-valur kontabbli huwa wkoll legali meta l-assi tan-negozju ttrasferit għandhom, skont regoli tad-dritt kummerċjali, jiġu rreġistrati għall-bilanċ kontabbli fuq livell ogħla. |
13 |
L-ewwel sentenza tal-Artikolu 20(4) tal-UmwStG tipprovdi li l-valur li bih il-kumpannija b’kapital azzjonarju tivvaluta l-assi tan-negozju ttrasferit jitqies li jikkostitwixxi, għat-trasferent, il-prezz ta’ trrasferiment u l-ispejjeż ta’ akkwist tal-ishma tal-kumpannija. B’din l-aħħar regola, l-UmwStG jimponi t-tressiq ’il quddiem doppju tal-valuri kontabbli, regola li biha t-trasferent ma jistax iżomm il-valur kontabbli tal-ishma li huma s-suġġett tat-trasferiment ħlief jekk il-kumpannija b’kapital azzjonarju li tibbenefika minn dan it-trasferiment tivvaluta hija nfisha l-imsemmija ishma fil-valur kontabbli tagħhom. L-UmwStG ma jagħmel fuq dan il-punt ebda distinzjoni bejn it-trasferimenti mwettqa fil-Ġermanja u t-trasferimenti mwettqa barra mill-Ġermanja, billi dawn iż-żewġ każijiet huma ttrattati b’mod identiku. |
Il-kawża prinċipali u d-domandi preliminari
14 |
A.T., kumpannija anonima Ġermaniża, inkludiet, fil-grupp tagħha ta’ impriżi, C-GmbH, kumpannija b’responsabbiltà limitata Ġermaniża, li tagħha hija kellha 89.5 % tal-ishma. |
15 |
Fit-28 ta’ April 2000, A.T. ittrasferiet dan is-sehem lil kumpannija anonima Franċiża, G-SA, bħala korrispettiv tal-għoti ta’ azzjonijiet ġodda ta’ din il-kumpannija, azzjonijiet li jirrappreżentaw 1.47 % tal-kapital azzjonarju u li jirriżulta minn żieda ta’ kapital. Dawn l-azzjonijiet, li l-prezz tas-suq tagħhom sussegwentement waqa’ b’mod sostanzjali, kellhom sussegwentement jiġu ttrasferiti matul ħames snin, skont id-dispożizzjonijiet li jirregolaw is-sorveljanza tas-swieq finanzjarji. |
16 |
Billi l-ishma miżmuma f’C-GmbH minn A.T., il-kumpannija prinċipali tagħha, ġew, wara t-trasferiment tagħhom, ivvalutati skont il-karta tal-bilanċ u fiskali ta’ G-SA u mhux skont il-valur kontabbli tagħhom kif sar sa’ dak iż-żmien fil-bilanċ fiskali ta’ A.T., iżda skont il-valur tas-suq tagħhom, kif stabbilit fil-kuntratt ta’ trasferiment, il-Finanzamt, fuq il-bażi tal-ewwel sentenza tal-Artikolu 23(4) u l-ewwel sentenza tal-Artikolu 20(4) tal-UmwStG, kif ukoll fuq istruzzjoni relatata tal-Bundesministerium der Finanzen (BMF — Ministru federali tal-finanzi), irrifjutat lil A.T., fil-kuntest tal-intaxxar għas-sena 2000, iż-żamma, għall-azzjonijiet li hija kisbet bħala korrispettiv fil-kapital ta’ G-SA, tal-valuri kontabbli storiċi tal-ishma ttrasferiti f’C-GmbH. Għaldaqstant, il-Finanzamt ikkunsidrat l-operazzjoni ta’ trasferiment taxxabbli u ntaxxat profitt fuq il-kapital minn trasferiment li jikkorrispondi għad-differenza bejn l-ispejjeż inizjali ta’ akkwist tal-ishma f’C-GmbH u l-valur tas-suq tagħhom. |
17 |
Il-kawża ppreżentata minn A.T. kontra d-deċiżjonijiet fiskali meħuda bis-saħħa ta’ dawn id-dispożizzjonijiet ntlaqgħet fl-ewwel istanza. Il-Finanzamt għalhekk appellat quddiem il-qorti tar-rinviju. Fil-fatt, skont l-UmwStG, l-ishma kkontrollati minn C-GmbH kellhom jiġu vvalutati skont il-valur kontabbli tagħhom fil-bilanċ ta’ G-SA, li, barra minn dan, kien possibbli skont id-dritt Franċiż. |
18 |
Peress li l-Bundesfinanzhof kellha dubju fir-rigward tal-kompatibbiltà mad-dritt Komunitarju tar-rekwiżit tad-dħul doppju tal-valuri kontabbli fil-każ ta’ trasferimenti transkonfinali, din il-Qorti ddeċidiet li tissospendi l-proċeduri u li tagħmel lill-Qorti tal-Ġustizzja d-domandi preliminari li ġejja:
|
Fuq id-domandi preliminari
19 |
Permezz tal-ewwel domanda tagħha, il-qorti tar-rinviju tistaqsi, sostanzjalment, jekk l-Artikolu 8(1) u (2) tad-Direttiva 90/434 jipprekludix leġiżlazzjoni ta’ Stat Membru li biha skambju ta’ azzjonijiet jagħti lok għall-intaxxar, fir-rigward tal-azzjonisti tal-kumpannija miksuba, ta’ profitt fuq il-kapital ta’ trasferiment li jikkorrispondi għad-differenza bejn l-ispejjeż inizjali ta’ akkwist tal-ishma ttrasferiti u l-valur tas-suq tagħhom, sakemm il-kumpannija akkwirenti ma ddaħħalx il-valur kontabbli storiku tal-ishma ttrasferiti fil-bilanċ tagħha tat-taxxa. |
20 |
Mill-bidu nett, għandu jiġi mfakkar li, skont l-Artikolu 8(1) tad-Direttiva 90/434, l-għoti, fl-okkażjoni ta’ skambju ta’ azzjonijiet, ta’ titoli rappreżentattivi tal-kapital azzjonarju tal-kumpannija akkwirenti għal azzjonist fil-kumpannija miksuba, bi skambju tat-titoli rappreżentattivi tal-kapital azzjonarju ta’ din l-aħħar kumpannija, m’għandux, fih innfsu, jwassal għal ebda ntaxxar fuq il-qligħ, il-profitti jew il-profitt fuq il-kapital ta’ dan l-azzjonist. |
21 |
Permezz ta’ dan l-imperattiv ta’ newtralità fiskali fir-rigward tal-azzjonisti tal-kumpannija miksuba, id-Direttiva għandha l-għan, kif jirriżulta mill-ewwel u r-raba’ premessi, li tiżgura li skambju ta’ azzjonijiet li jinteressa kumpanniji ta’ diversi Stati Membri ma jkunx ostakolat b’restrizzjonijiet, żvantaġġi u distorsjonijiet li jinħolqu b’mod partikolari mid-dispożizzjonijiet fiskali fl-Istati Membri. |
22 |
Madankollu, dan l-imperattiv ta’ newtralità fiskali mhuwiex inkundizzjonali. Fil-fatt, skont l-Artikolu 8(2) tad-Direttiva 90/434, l-Istati Membri għandhom japplikaw il-paragrafu 1 bil-kundizzjoni li l-azzjonist ma jagħtix lit-titoli rċevuti valur ogħla għal skopijiet ta’ taxxa milli kien ikollhom it-titoli skambjati immedjatament qabel l-iskambju ta’ azzjonijiet. |
23 |
Madankollu, kif jirriżulta mid-deċiżjoni tar-rinviju u b’mod partikolari mill-ewwel domanda preliminari, skont il-leġiżlazzjoni Ġermaniża fil-kawża prinċipali, l-azzjonist tal-kumpannija miksuba ma jistax iżomm it-titoli rċevuti fi skambju tal-valur kontabbli tal-ishma ttrasferiti ħlief jekk il-kumpannija akkwirenti tivvaluta wkoll l-imsemmija ishma skont il-valur kontabbli storiku tagħhom. |
24 |
Il-Gvern Ġermaniż isostni f’dan ir-rigward li rekwiżit tali ta’ dħul doppju tal-valuri kontabbli huwa kompatibbli mad-Direttiva 90/434, inkwantu din tal-aħħar tħalli, bis-silenzju tagħha fir-rigward tal-irkupru tal-ishma ttrasferiti fil-bilanċ tal-kumpannija akkwirenti, marġni ta’ traspożizzjoni lill-Istati Membri. |
25 |
Interpretazzjoni tali tal-imsemmija Direttiva ma tistax tiġi aċċettata. |
26 |
L-ewwel nett, għandu jiġi kkonstatat li l-formulazzjoni imperattiva u ċara tal-Artikolu 8(1) u (2) tad-Direttiva 90/434 ma turi b’ebda mod ir-rieda tal-leġiżlatur Komunitarju li jħalli lill-Istati Membri marġni ta’ traspożizzjoni li jippermetti lil dawn tal-aħħar jissuġġettaw in-newtralità fiskali prevista favur azzjonisti tal-kumpannija miksuba għal kundizzjonijiet addizzjonali. |
27 |
Barra minn dan, il-fatt li l-Istati Membri jingħataw marġni ta’ traspożizzjoni jmur kontra l-iskop stess ta’ din id-direttiva li, kif jirriżulta diġà mit-titolu tagħha u, b’mod partikolari, mit-tielet premessa ta’ din tal-aħħar, jikkonsisti f’li tistabbilixxi sistema ta’ tassazzjoni komuni minflok li testendi fuq livell Komunitarju s-sistemi nazzjonali fis-seħħ fl-Istati Membri, billi d-differenzi bejn dawn is-sistemi jistgħu jikkawżaw distorsjonijiet. |
28 |
Mill-bidu nett, li in-newtralità fiskali tiġi suġġetta għal skambju ta’ azzjonijiet li jinteressaw il-kumpanniji ta’ diversi Stati Membri, kif previst fl-Artikolu 8(1) u (2) tad-Direttiva 90/434, bil-kundizzjoni addizzjonali li l-kumpannija akkwirenti ddaħħal il-valur kontabbli storiku tal-ishma ttrasferiti fil-bilanċ fiskali tagħha tmur kontra l-għan ta’ din id-direttiva, li huwa dak li jiġu eliminati l-ostakoli fiskali għar-ristrutturazzjonijiet ta’ kumpanniji bejn il-fruntieri, billi jiġi żgurat li żidiet eventwali fil-valur tal-ishma ma jiġux intaxxati qabel ma jseħħu effettivament (ara, f’dan ir-rigward, is-sentenza tal-5 ta’ Lulju 2007, Kofoed, C-321/05, Ġabra p. I-5795, punt 32). |
29 |
Il-Gvern Ġermaniż isostni madankollu li l-leġiżlazzjoni Ġermaniża inkwistjoni fil-kawża prinċipali tikkontribwixxi għall-għan tad-Direttiva 90/434, li jikkonsisti fid-dħul tat-taxxa u mhux fl-eżenzjoni definittiva. Ir-rekwiżit tad-dħul doppju tal-valuri kontabbli fil-każ ta’ skambju bejn il-fruntieri ta’ ishma għandu preċiżament l-għan li jimpedixxi li l-intaxxar — biss — ma jiġix evitat permezz tat-trasferiment ta’ ishma barra mill-fruntieri, b’tali mod li jwassal b’hekk għal nuqqas totali ta’ intaxxar tat-trasferiment ta’ ishma, kemm fir-rigward tal-kumpannija akkwirenti barranija u kif ukoll tal-kumpannija trasferenti nazzjonali. |
30 |
Safejn il-Gvern bi ħsiebu b’hekk isostni li l-leġiżlazzjoni Ġermaniża inkwistjoni fil-kawża prinċipali hija neċessarja sabiex jiġi prekluż li ntaxxar, anki fi stadju sussegwenti għall-iskambju ta’ ishma, ikun, definittivament, evitat, għandu jiġi mfakkar li l-Qorti tal-Ġustizzja diġà kellha l-opportunità tikkonstata li l-Istati Membri għandhom jagħtu l-vantaġġji fiskali previsti mid-Direttiva 90/434 għall-operazzjonijiet ta’ skambju ta’ azzjonijiet imsemmija fl-Artikolu 2(d), sakemm dawn l-operazzjonijiet ma jkollhomx bħala għan prinċipali jew bħala wieħed mill-għanijiet prinċipali tagħhom il-frodi jew l-evażjoni mit-taxxa fis-sens tal-Artikolu 11(1)(a) tagħha (sentenza tas-17 ta’ Lulju 1997, Leur-Bloem, C-28/95, Ġabra p. I-4161, punt 40). |
31 |
Huwa biss eċċezzjonalment u f’każijiet partikolari li l-Istati Membri jistgħu, bis-saħħa tal-Artikolu 11(1)(a) tad-Direttiva 90/434, jirrifjutaw li japplikaw totalment jew parzjalment id-dispożizzjonijiet ta’ din id-direttiva jew jirtiraw il-benefiċċju (sentenza Kofoed, iċċitata iktar ’il fuq, punt 37). Sabiex jiġi vverifikat jekk l-operazzjoni kkunsidrata kellhie għan tali, l-awtoritajiet nazzjonali kompetenti ma jistgħux sempliċement japplikaw kriterji ġenerali ddeterminati minn qabel, iżda għandhom jipproċedu, każ b’każ, għal eżami globali tagħha (sentenza Leur-Bloem, iċċitata iktar ’il fuq, punt 41). |
32 |
Għaldaqstant, għandu jiġi kkonstatat li leġiżlazzjoni fiskali ta’ Stat Membru li, bħal dik inkwistjoni fil-kawża prinċipali, tirrifjuta b’mod ġenerali li tagħti l-benefiċċji fiskali previsti mid-Direttiva 90/434 għall-operazzjonijiet ta’ skambju ta’ azzjonijiet koperti minn din tal-aħħar, għar-raġuni biss li l-kumpannija akkwirenti ma vvalutatx, fil-bilanċ tat-taxxa tagħha, l-ishma ttrasferiti għal valur kontabbli storiku tagħhom, ma tistax tiġi ġġustifikata bl-Artikolu 11(1)(a) tad-Direttiva 90/434 u, għalhekk, ma tistax titqies li hija kompatibbli ma’ din id-direttiva. |
33 |
F’dan il-kuntest, għandu barra minn hekk jiġi rrilevat li, mingħajr ma ġiet kkontradetta fuq dan il-punt mill-Gvern Ġermaniż, A.T. issostni, fl-osservazzjonijiet tagħha, li l-operazzjoni ta’ skambju ta’ azzjonijiet fil-kawża prinċipali kellha lok biss sabiex tissodisfa r-regoli tas-swieq Amerikani u li G-SA żammet sadanittant l-ishma ta’ C-GmbH li hija akkwistat. |
34 |
Safejn il-leġiżlazzjoni inkwistjoni fil-kawża prinċipali għandha l-għan, kif isostni l-Gvern Ġermaniż matul is-seduta, mhux biss li tevita l-abbużi, iżda wkoll sabiex tippermetti ntaxxar f’sitwazzjonijiet fejn jirriżulta li teżisti lakuna fis-sistema ta’ tassazzjoni, għandu jiġi kkonstatat li l-fatt li Stat Membru jitħalla jimla b’mod unilaterali lakuni tali, bil-presuppost li dawn il-lakuni jeżistu, iqeigħed f’riskju li jiġi ostakolat it-twettiq tal-iskop tad-Direttiva 90/434 li, kif ġie mfakkar fil-punt 27, jikkonsisti f’li jistabbilixxi sistema ta’ tassazzjoni komuni. |
35 |
F’dan ir-rigward, għandu jiġi mfakkar li d-Direttiva 90/434 hija stess għandha l-għan, skont ir-raba’ premessa tagħha, li tissalvagwardja l-interessi finanzjarji tal-Istat tal-kumpannija miksuba. B’hekk, it-tieni subparagrafu tal-Artikolu 8(2) tad-Direttiva 90/434 jipprovdi li l-applikazzjoni tal-paragrafu 1 tal-imsemmi artikolu ma għandux jipprevjieni lill-Istati Membri milli jintaxxaw il-qligħ li jinħoloq mit-trasferiment sussegwenti tat-titoli rċevuti bl-istess mod bħall-qligħ li jiġi mit-trasferiment tat-titoli li kienu jeżistu qabel il-kisba. |
36 |
Madankollu, kif tosserva l-Kummissjoni, il-fatt li, fil-kawża prinċipali, id-dritt tas-suq iwassal lil A.T. sabiex tipproċedi għal trasferiment sussegwenti tal-ishma rċevuti u li l-prezz tas-suq tal-azzjonijiet ta’ G-SA waqa’ sostanzjalment ma jiġġustifikax li jittieħed l-uniku skambju ta’ ishma jittieħed bħala fatt li jiġġenera taxxa, billi r-riżervi moħbija baqgħu mhux realizzati f’din id-data. |
37 |
Barra minn dan, għandu jiġi nnotat li, kif jammetti l-Gvern Ġermaniż, mhijiex l-awtorità Ġermaniża li ser tibbenefika, għall-finijiet ta’ ntaxxar fil-każ ta’ trrasferiment sussegwenti tal-ishma ttrasferiti, mid-dħul, fir-rigward tal-kumpannija akkwirenti, mill-valur kontabbli storiku ta’ dawn l-ishma, iżda, l-iktar, l-awtorità Franċiża, li turi interess anqas minn naħa tal-leġiżlazzjoni Ġermaniża li timponi tali rekwiżit. |
38 |
Huwa, mill-bidu nett, diffiċli iktar li jiġi osservat interess reali f’dan ir-rekwiżit tad-dħul doppju tal-valur kontabbli storiku tal-ishma ttrasferiti, li, kif irrilevaw A.T. u l-Kummissjoni fl-osservazzjonijiet bil-miktub rispettivi tagħhom u kif ikkonferma l-Gvern Ġermaniż matul is-seduta, sadanittant l-UmwStG ġiet emendata fis-sens li dan ir-rekwiżit ma japplikax iktar, mis-sena 2007, għall-iskambji ta’ azzjonijiet li jinteressaw il-kumpanniji ta’ diversi Stati Membri. |
39 |
Fid-dawl tal-kunsiderazzjonijiet kollha li jippreċedu, l-ewwel domanda jeħtieġ li tingħatalha risposta fis-sens li l-Artikolu 8(1) u (2) tad-Direttiva 90/434 jipprekludi leġiżlazzjoni ta’ Stat Membru li biha skambju ta’ azzjonijiet jagħti lok għall-intaxxar, fir-rigward tal-azzjonisti tal-kumpannija miksuba, ta’ profitt fuq il-kapital ta’ trasferiment li jikkorrispondi għad-differenza bejn l-ispejjeż inizjali ta’ akkwist tal-ishma ttrasferiti u l-valur tas-suq tagħhom, sakemm il-kumpannija akkwirenti ma ddaħħalx il-valur kontabbli storiku tal-ishma ttrasferiti fil-bilanċ tagħha tat-taxxa. |
40 |
Fid-dawl tar-risposta għall-ewwel domanda preliminari, mhemmx lok li tingħata risposta għat-tieni domanda. |
Fuq l-ispejjeż
41 |
Peress li l-proċedura għandha, fir-rigward tal-partijiet fil-kawżi prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura. |
Għal dawn il-motivi, Il-Qorti tal-Ġustizzja (L-Ewwel Awla) taqta’ u tiddeċiedi li: |
L-Artikolu 8(1) u (2) tad-Direttiva tal-Kunsill 90/434/KEE tat-23 ta’ Lulju 1990 dwar is-sistema komuni tat-tassazzjoni li tapplika għall-inkorporazzjonijiet, id-diviżjonijiet, it-trasferimenti tal-attivi u l-iskambji tal-ishma [azzjonijiet] li jirrigwardaw il-kumpanniji ta’ Stati Membri differenti jipprekludi leġiżlazzjoni ta’ Stat Membru li biha skambju ta’ azzjonijiet jagħti lok għall-intaxxar, fir-rigward tal-azzjonisti tal-kumpannija miksuba, ta’ profitt fuq il-kapital ta’ trasferiment li jikkorrispondi għad-differenza bejn l-ispejjeż inizjali ta’ akkwist tal-ishma ttrasferiti u l-valur tas-suq tagħhom, sakemm il-kumpannija akkwirenti ma ddaħħalx il-valur kontabbli storiku tal-ishma ttrasferiti fil-bilanċ tagħha tat-taxxa. |
Firem |
( *1 ) Lingwa tal-kawża: il-Ġermaniż.