Pagi minimi fl-UE

 

SOMMARJU TA’:

Id-Direttiva (UE) 2022/2041 dwar pagi minimi adegwati fl-Unjoni Ewropea

X’INHU L-GĦAN TAD-DIRETTIVA?

Din għandha l-għan li ttejjeb il-kundizzjonijiet tax-xogħol u tal-ħajja fl-Unjoni Ewropea (UE) billi tistabbilixxi qafas għal:

• adegwatezza tal-pagi minimi statutorji*;
• promozzjoni ta’ negozjar kollettiv* fuq l-iffissar tal-pagi;
• titjib tal-aċċess effettiv tal-ħaddiema għad-drittijiet tagħhom għall-protezzjoni tal-paga minima* fejn ikun ipprovdut taħt il-leġiżlazzjoni nazzjonali u/jew ftehimiet kollettivi.

PUNTI EWLENIN

Kamp ta’ applikazzjoni

Id-Direttiva tapplika għall-ħaddiema fl-UE li għandhom kuntratt ta’ impjieg jew relazzjoni kif definit mil-liġi, ftehim kollettiv jew prattika fis-seħħ f’kull Stat Membru, tal-UE, b’kunsiderazzjoni tal-ġurisprudenza tal-Qorti tal-Ġustizzja.

Sabiex jiżdied in-negozjar kollettiv fuq l-istabbiliment tal-pagi, l-Istati Membri, inklużi l-imsieħba soċjali, għandhom:

• jippromwovu l-bini u t-tisħiħ tal-kapaċità tal-imsieħba soċjali biex jinvolvu ruħhom fin-negozjar kollettiv, speċjalment fil-livell tas-settur u transindustrijali;
• jinkoraġġixxu negozjati kostruttivi, sinifikanti u infurmati dwar il-pagi bejn l-imsieħba soċjali;
• jaġixxu biex jiggarantixxu d-dritt għal negozjar kollettiv u jipprevjenu lill-ħaddiema u r-rappreżentanti tat-trade unions li qed isofru kwalunkwe diskriminazzjoni fl-impjieg;
• jieħdu miżuri biex jipproteġu lill-ħaddiema u r-rappreżentanti tat-trade unions, flimkien mat-trade unions u l-organizzazzjonijiet ta’ min iħaddem, minn kwalunkwe interferenza minn xulxin jew mill-aġenti ta’ xulxin jew minn membri fl-istabbiliment, fil-funzjonament jew fl-amministrazzjoni tagħhom;
• fejn ir-rata ta’ negozjar kollettiv hija taħt il-limitu ta’ 80 %, jipprovdu kundizzjonijiet abilitanti, jew bil-liġi jew wara li jikkonsultaw mal-imsieħba soċjali, u jistabbilixxu pjan ta’ azzjoni biex iżidu dik il-kopertura.

L-Istati Membri b’pagi minimi statutorji għandhom ipoġġu ċerti proċeduri fis-seħħ sabiex jiżguraw li jkunu adegwati, bil-għan li:

• jiksbu standard ta’ għajxien deċenti;
• inaqqsu l-faqar fost dawk li jaħdmu;
• jippromwovu l-koeżjoni soċjali u l-konverġenza soċjali ’l fuq;
• inaqqsu d-differenza bejn il-pagi tal-irġiel u n-nisa.

Huma għandhom:

• jużaw kriterji li jridu jinkludu tal-anqas dawn li ġejjin:
  • is-setgħa tax-xiri tal-pagi minimi statutorji, filwaqt li jittieħed kont tal-ispiża tal-għajxien,
  • il-livell ġenerali tal-pagi, ir-rata tat-tkabbir tagħhom u d-distribuzzjoni tagħhom,
  • il-livelli u x-xejriet nazzjonali tal-produttività fit-tul;
• japplikaw valuri ta’ referenza indikattivi biex jevalwaw jekk il-pagi minimi statutorji jkunux adegwati — l-Istati Membri jistgħu jużaw aġġustamenti tal-indiċijar awtomatiku sakemm dan ma jwassalx għat-tnaqqis tal-paga minima statutorja;
• jaġġornaw il-pagi minimi statutorji mill-inqas kull sentejn jew, għall-Istati Membri li jużaw mekkaniżmu ta’ indiċijar awtomatiku, mill-inqas kull erba’ snin;
• jaħtru korp konsultattiv wieħed jew aktar biex jipprovdi pariri;
• jinvolvu sħab soċjali fl-istabbiliment u l-aġġornament ta’ pagi minimi statutorji;
• jiżguraw, bl-involviment tal-imsieħba soċjali, li l-ħaddiema jkollhom aċċess effettiv għall-protezzjoni tal-pagi minimi statutorji eżistenti billi jipprovdu:
  • kontrolli effettivi, proporzjonati u mhux diskriminatorji u spezzjonijiet fuq il-post;
  • biżżejjed riżorsi, taħriġ u gwida għall-awtoritajiet tal-infurzar biex jimmiraw u jsegwu lil min iħaddem meta ma jkunx konformi.

Regoli addizzjonali jeħtieġu li l-Istati Membri:

• jiġbru data preċiża biex jimmonitorjaw il-protezzjoni minima tal-pagi;
• jagħmlu pubblikament disponibbli l-informazzjoni rilevanti kollha dwar pagi minimi statutorji u jagħmlu lill-ħaddiema u lil min iħaddem konxju tal-miżuri;
• jiżguraw li l-ħaddiema jkollhom aċċess għal soluzzjoni tat-tilwim effettiva, f’waqtha u imparzjali u għal dritt ta’ rimedju;
• jipproteġu lill-ħaddiema u r-rappreżentanti tagħhom minn kwalunkwe trattament avvers minn min iħaddem;
• japplikaw penali għal ksur tal-obbligu skont id-direttiva.

Id-Direttiva ma:

• tiksirx l-awtonomija tal-imsieħba soċjali jew id-dritt tagħhom li jinnegozjaw u jikkonkludu ftehimiet kollettivi;
• tobbligax lill-Istati Membri biex:
  • jintroduċu paga minima statutorji,
  • jagħmlu kwalunkwe ftehim kollettiv universaliment applikabbli;
• taffettwax id-dritt tal-Istati Membri biex:
  • jiddeċiedu dwar l-iffissar ta’ pagi minimi statutorji, il-livell tagħhom u l-aċċess għal dik il-protezzjoni,
  • jintroduċu miżuri aktar favorevoli jew ftehimiet kollettivi għall-ħaddiema;
• tipprovdix raġunijiet biex inaqqsu, billi jbaxxu jew jabolixxu l-pagi minimi, il-livell ġenerali ta’ protezzjoni li l-ħaddiema diġà jgawdu.

MINN META JAPPLIKAW IR-REGOLI?

Id-Direttiva għandha tiġi trasposta fil-liġi nazzjonali sal-15 ta’ Novembru 2024. Dawn ir-regoli għandhom japplikaw mill-15 ta’ Novembru 2024.

SFOND

Il-pagi minimi jvarjaw ħafna madwar l-UE, u jħallu ħafna ħaddiema mhux protetti. Dan huwaa qasam ta’ ġurisdizzjoni nazzjonali fejn l-UE għandha rwol ta’ appoġġ u kumplimentari. Id-Direttiva ma għandhiex l-għan li tarmonizza l-livell ta’ pagi minimi madwar l-UE, u lanqas ma tistabbilixxi metodu uniformi għall-istabbiliment tagħhom.

Id-Direttiva hija bbażata fuq l-Artikolu 153(1)(b) tat-Trattat dwar il-Funzjonament tal-Unjoni Ewropea bir-referenza speċifika tagħha għall-kundizzjonijiet tax-xogħol.

Għal aktar informazzjoni, ara:

• Pagi minimi adegwati fl-UE (il-Kummissjoni Ewropea)
• Pagi minimi adegwati fl-UE (il-Kunsill tal-Unjoni Ewropea).

TERMINI EWLENIN

DOKUMENT PRINĊIPALI

Id-Direttiva (UE) 2022/2041 tal-Parlament Ewropew u tal-Kunsill tad-19 ta’ Ottubru 2022 dwar pagi minimi adegwati fl-Unjoni Ewropea (ĠU L 275, 25.10.2022, pp. 33–47).

DOKUMENTI RELATATI

Verżjoni kkonsolidata tat-Trattat dwar il-Funzjonament tal-Unjoni Ewropea — It-Tielet Parti — Politiki u azzjonijiet interni tal-Unjoni — Titolu X — Il-Politika Soċjali — l-Artikolu 153 (ex Artikolu 137 TEC) (ĠU C 202, 7.6.2016, pp. 114–116).

l-aħħar aġġornament 06.02.2023