Dawn jistabbilixxu l-organizzazzjoni interna u l-ħidma tal-unika istituzzjoni pan-Ewropea tal-UE li hija eletta direttament. Skont l-Artikolu 232 tat-Trattat dwar il-Funzjonament tal-Unjoni Ewropea, il-Parlament Ewropew għandu s-setgħa jadotta r-Regoli ta’ Proċedura proprji tiegħu.
Id-dokument ikopri l-aspetti proċedurali kollha tax-xogħlijiet parlamentari.

PUNTI EWLENIN

Ir-regoli jkopru l-aspetti li ġejjin tal-ħajja parlamentari:

Il-Membri tal-Parlament Ewropew (MPE):

iridu jwettqu l-mandat tagħhom b’mod indipendenti;
igawdu ċerti privileġġi u immunitajiet;
iridu josservaw l-istatut tal-MPE u diversi obbligi legali oħrajn, inklużi regoli dwar it-trasparenza tal-interessi finanzjarji tagħhom.

Uffiċjali tal-Parlament

Il-MPE jeleġġu l-President, 14-il Viċi-President u 5 Kwesturi b’vot sigriet għal terminu ta’ 2.5 snin.

Il-President:
- huwa responsabbli għad-direzzjoni globali tal-Parlament u d-diversi operazzjonijiet tiegħu;
- jirrappreżenta l-Parlament;
- jiżgura l-osservanza tar-regoli u jżomm l-ordni;
- jiftaħ, jissospendi u jagħlaq is-seduti, imexxi d-dibattiti u jissorvelja l-votazzjonijiet;
- jieħu deċiżjonijiet rigward l-ammissibilità ta’ emendi, ta’ testi oħra mressqa għall-vot u ta’ mistoqsijiet parlamentari; u
- jirreferi l-kwistjonijiet lill-kumitati parlamentari li jikkonċernaw lilhom.
Il-Viċi-Presidenti għandhom responsabbiltajiet speċifiċi u jissostitwxxu lill-President meta jkun meħtieġ.
Il-Kwesturi huma responsabbli għal kwistjonijiet amministrattivi u finanzjarji li jikkonċernaw lill-MPE direttament.
Il-Bureau jikkonsisti mill-President u 14-il Viċi President. Dan jiddeċiedi fuq kwistjonijiet finanzjarji, organizzazzjonali u amministrattivi li jaffettwaw lill-Parlament.
Il-Konferenza tal-Presidenti tikkonsisti mill-President tal-Parlament u l-Presidenti tal-gruppi politiċi (ara hawn taħt). Din torganizza l-ħidma politika tal-Parlament u tiddeċiedi dwar l-ippjanar leġiżlattiv.
Il-Konferenza tal-Presidenti tal-Kumitati hija magħmula mill-presidenti tal-kumitati permanenti u l-kumitati parlamentari speċjali kollha. Din tista’ tagħmel rakkomandazzjonijiet dwar il-ħidma tal-kumitat u l-aġendi tas-sessjoni plenarja.
Il-Konferenza tal-Presidenti tad-Delegazzjonijiet tikkonsisti mill-presidenti tad-delegazzjonijiet kollha tal-Parlament għal parlamenti xi mkien ieħor fid-dinja. Din tista’ tagħmel rakkomandazzjonijeit dwar il-ħidma tad-delegazzjonijiet.
Il-gruppi politiċi huma magħmula mill-MPE abbażi tal-affinitajiet politiċi tagħhom. Huwa meħtieġ minimu ta’ 23 MPE, eletti f’mill-inqas kwart tal-Istati Membri tal-UE, biex jiġi ffurmat grupp. Dawn jirċievu appoġġ finanzjarju u amministrattiv skont id-daqs tagħhom.
- Xi MPE ma jappartjenux għal grupp politiku. Dawn jirċievu appoġġ għall-attivitajiet parlamentari tagħhom.
- Il-MPE individwali minn gruppi politiċi differenti jistgħu jiffurmaw intergrupp bejn il-partiti dwar kwistjonijiet speċifiċi bħall-benessri tal-annimali jew is-saħħa pubblika.

Proċeduri leġiżlattivi

proċeduri leġiżlattivi ordinarji (l-ewwel, it-tieni u t-tielet qari), fejn il-Parlament jaġixxi bħala koleġiżlatur flimkien mal-Kunsill;
proċeduri ta’ konsultazzjoni, fejn il-Parlament jibgħat opinjoni dwar abbozz ta’ att legali;
proċeduri ta’ approvazzjoni, fejn huwa neċessarju l-qbil tal-Parlament qabel l-adozzjoni ta’ att legali.

Matul dawk il-proċeduri leġiżlattivi, il-Parlament jagħti attenzjoni speċifika lil kwistjonijiet bħar-rispett għad-drittijiet fundamentali, il-bażi legali, id-delegazzjoni ta’ setgħat leġiżlattivi, il-kompatibbiltà finanzjarja u r-rispett għas-sussidjarjetà.

Proċeduri fuq inizjattiva proprja

Fil-każ ta’ rapporti leġiżattivi fuq inizjattiva proprja, il-Parlament jitlob lill-Kummissjoni Ewropea tissottometti proposti (ir-Regola 47) jew tissottometti proposti fil-każijiet ipprovduti mit-Trattati (ir-Regola 46).

Rapporti mhux leġislattivi

Il-Parlament jista’ jħejji wkoll rapporti mhux leġiżlattivi fuq inizjattiva proprja dwar kwistjonijiet speċifiċi:

Affarijiet kostituzzjonali, fejn ir-regoli jkopru r-rwol tal-Parlament meta jiġu emendati t-trattati tal-UE, jissieħeb pajjiż ġdid mal-UE jew Stat Membru tal-UE jiddeċiedi li jitlaq mill-UE.
Proċeduri baġitarji, fejn ir-regoli jkopru kemm il-kunsiderazzjoni tal-baġit annwali tal-UE u l-qafas finanzjarju pluriennali tagħha.
Ftehimiet internazzjonali, fejn hija meħtieġa l-approvazzjoni jew l-opinjoni tal-Parlament għal ftehimiet internazzjonali. Dan jista’ jiġi kkonsultat dwar aspetti tal-politika barranija u tas-sigurtà komuni tal-UE.

Relazzjonijiet ma’ istituzzjonijiet u korpi oħrajn tal-UE

Il-Parlament:

jeleġġi lill-President tal-Kummissjoni u lill-Kummissjoni kollha kemm hi;
jista’ jadotta mozzjoni ta’ ċensura kontra l-Kummissjoni;
huwa involut f’ħatriet f’istituzzjonijiet bħall-Bank Ċentrali Ewropew u l-Qorti tal-Awdituri.

Mistoqsijiet parlamentari

Il-MPE jistgħu jressqu mistoqsijiet bil-miktub lil:

il-Kunsill;
il-Kummissjoni; jew
il-Viċi-President tal-Kummissjoni/ir-Rappreżentant Għoli tal-Unjoni għall-Affarijiet Barranin u l-Politika tas-Sigurtà.

Huma jistgħu jressqu wkoll mistoqsijiet orali, li huma segwiti minn dibattitu, lill-Kunsill jew lill-Kummissjoni.

Relazzjonijiet mal-parlamenti nazzjonali

Il-Parlament iżomm parlamenti nazzjonali infurmati b’mod regolari dwar l-attivitajiet tiegħu. Il-MPE u l-Membri Parlamentari nazzjonali jiltaqgħu okkażjonalment fil-Konferenza tal-Kumitati Parlamentari għall-Affarijiet Ewropej.

Sessjonijiet tal-Parlament

Il-Parlament ikollu sessjonijiet parzjali plenari ta’ erbat ijiem 12-il darba fis-sena fi Strasburgu u sessjonijiet parzjali addizzjonali fi Brussell.
Ir-regoli dettaljati jkopru kwistjonijiet bħal:
- ħin għad-diskorsi;
- użu tal-lingwi;
- tqassim tad-dokumenti;
- votazzjoni.

Kumitati

Il-kumitati permanenti jħejju d-deċiżjonijiet tal-Parlament fil-livell plenarju billi jippreżentaw rapporti u dokumenti oħrajn fil-qasam tal-kompetenza speċifika tagħhom.
Il-kumitati speċjali jistgħu jiġu stabbiliti għal terminu speċifiku u għal suġġett speċifiku.
Kumitati ta’ inkjesta jistgħu jiġu stabbiliti biex jinvestigaw allegati kontravenzjonijiet tad-dritt tal-UE jew amministrazzjoni ħażina possibbli.

Delegazzjonijiet interparlamentari

Il-Parlament jistabbilixxi kumitati konġunti mal-parlamenti nazzjonali madwar id-dinja u jikkoopera mal-Assemblea Parlamentari tal-Kunsill tal-Ewropa.

Petizzjonijiet

Kwalunkwe ċittadin tal-UE jista’ jindirizza petizzjoni lill-Parlament dwar kwistjoni li taqa’ fl-oqsma tal-attività tal-UE u li taffettwa lill-petizzjonant direttament.

DATA TAD-DĦUL FIS-SEĦĦ

Dawn daħlu fis-seħħ fit-2 ta’ Lulju 2019.

SFOND

Għall-aħħar iterazzjoni tar-regoli ta’ proċedura, ara: