Aċċess għal internet miftuħ u komunikazzjoni intra-UE

 

SOMMARJU TA’:

Ir-Regolament (UE) 2015/2120 li jistabbilixxi miżuri dwar aċċess għal internet miftuħ

X’INHU L-GĦAN TAR-REGOLAMENT?

• Huwa jintroduċi regoli biex jissalvagwardjaw it-trattament ugwali u nondiskriminatorju tat-traffiku tal-internet (newtralità tal-internet) bejn l-Istati Membri tal- Unjoni Ewropea(UE).
• Huwa jistabbilixxi wkoll regoli komuni biex jassigura li l-konsumaturi ma jiġux iċċarġjati prezzijiet eċċessivi biex jagħmlu komunikazzjonijiet interpersonali bbażati fuq in-numri* mill-fornitur domestiku tal-Istati Membru tagħhom għal kwalunkwe numru fiss jew tal-mowbajl fi Stat Membru ieħor, u jistabbilixxi t-tariffi tal-imnut għal komunikazzjonijiet regolati intra-UE*.
• Huwa emenda wkoll:
  • Id-Direttiva 2002/22/KE dwar servizz universali u drittijiet tal-utenti relatati man-networks tal-komunikazzjonijiet u servizzi elettroniċi (minn dak iż-żmien imħassar mid-Direttiva (UE) 2018/1972 li tistabbilixxi Kodiċi Ewropew għall-Komunikazzjonijiet Elettroniċi); u
  • Ir-Regolament (UE) Nru 531/2012 dwar roaming fuq networks pubbliċi ta’ komunikazzjonijiet fi ħdan l-UE (minn dak iż-żmien imħassar minn Regolament (UE) 2022/612 dwar tariffi tar-roaming).

PUNTI EWLENIN

Aċċess għal internet miftuħ

Il-fornituri tal-internet għandhom jittrattaw it-traffiku kollu b’mod ugwali meta jipprovdu servizzi ta’ aċċess għall-internet:

• mingħajr diskriminazzjoni, restrizzjoni jew interferenza; u
• irrispettivament mill-:
  • ispeditur u r-riċevitur;
  • il-kontenut aċċessat jew distribwit; jew
  • l-applikazzjonijiet jew is-servizzi użati.

Il-fornituri jistgħu jużaw miżuri ta’ ġestjoni tat-traffiku raġonevoli, iżda dawn iridu jkunu trasparenti, mhux diskriminatorji, proporzjonati u mhux ibbażati fuq konsiderazzjonijiet kummerċjali.

Il-miżuri ta’ ġestjoni tat-traffiku ma jridux jimmonitorjaw kontenut speċifiku u ma jridux jitħallew fis-seħħ aktar milli hu neċessarju. Il-miżuri li jmorru lil hinn minn tali ġestjoni tat-traffiku raġonevoli (pereżempju, imblukkar jew throttling) huma pprojbiti, ħlief għal għadd limitat ta’ każijiet definiti fir-Regolament.

Ftehimiet dwar servizzi li jirrikjedu livell speċifiku ta’ kwalità huma permessi, dejjem jekk ma jkunux sostituti għall-aċċess għall-internet u ma jnaqqsux id-disponibbiltà jew il-kwalità tas-servizzi ta’ aċċess għall-internet. Fornituri tas-servizz tal-aċċess tal-internet għandhom jinfurmaw il-konsumaturi dwar:

• kif il-prassi ta’ ġestjoni tat-traffiku u servizzi oħrajn jistgħu jaffettwaw il-kwalità tal-aċċess għall-internet;
• Il-veloċità tal-internet normalment disponibbli u l-proċeduri ta’ lment disponibbli għal utenti f’’każ ta’ nuqqas ta’ konformità.

Tariffi bl-imnut għal komunikazzjonijiet regolati intra-UE

• Mill-15 ta’ Mejju 2019, kwalunkwe prezz bl-imnut (eskluża l-VAT) li jiġi ċċarġjat lill-konsumaturi għal komunikazzjonijiet intra-UE huwa limitat għal €0.19 kull minuta għal sejħiet u €0.06 għal messaġġ ta’ SMS.
• Minkejja dan, il-fornituri tal-komunikazzjonijiet jistgħu wkoll joffru, u l-konsumaturi huma liberi li jagħżlu, tariffa alternattiva għal komunikazzjonijiet internazzjonali, inklużi komunikazzjonijiet regolati intra-UE, fejn il-konsumaturi jiġu ċċarġjati tariffa għal komunikazzjonijiet regolati intra-UE differenti milli kieku ma kellhomx din l-għażla. Eżempju ta’ tali pakkett tista’ tkun tariffa li tinkludi ċarġ ta’ €0.30/minuta, kemm għal sejħiet intra-UE kif ukoll għal sejħiet li jsiru lejn pajjiżi li mhumiex fiż-Żona Ekonomika Ewropea. Il-fornitur jeħtieġ li jinforma l-konsumaturi dwar il-vantaġġi li jintilfu qabel ma jagħżlu t-tariffa alternattiva.

MINN META JAPPLIKA R-REGOLAMENT?

Dan ilu japplika mit-30 ta’ April 2016.

SFOND

Għal aktar informazzjoni, ara:

• Sejħiet Intra-UE: tariffi iktar baxxi u limitati meta ċċempel pajjiżi oħra tal-UE (Il-Kummissjoni Ewropea)
• Dak kollu li għandek tkun taf dwar ir-regoli tal-Internet Miftuħ fl-UE (Il-Korp ta’ Regolaturi Ewropej tal-Komunikazzjonijiet Elettroniċi - BEREC)
• Roaming: imqabbad kullimkien fl-UE mingħajr ħlas addizzjonali (Il-Kummissjoni Ewropea)
• Linji Gwida dwar l-Implimentazzjoni tar-Regolament dwar l-Internet Miftuħ (BEREC).

TERMINI EWLENIN

DOKUMENT PRINĊIPALI

Ir-Regolament (UE) 2015/2120 tal-Parlament Ewropew u tal-Kunsill tal-25 ta’ Novembru 2015 li jistabbilixxi miżuri dwar aċċess għal internet miftuħ u li jemenda d-Direttiva 2002/22/KE dwar servizz universali u d-drittijiet tal-utenti li jirrelataw ma’ networks u servizzi ta’ komunikazzjonijiet elettroniċi u r-Regolament (UE) Nru 531/2012 dwar roaming fuq networks pubbliċi ta’ komunikazzjoni mobbli fi ħdan l-Unjoni (ĠU L 310, 26.11.2015, pp. 1-18).

L-emendi suċċessivi għar-Regolament (UE) 2015/2120 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament (UE) 2018/1971 tal-Parlament Ewropew u tal-Kunsill tal-11 ta’ Diċembru 2018 li jistabbilixxi l-Korp ta’ Regolaturi Ewropej tal-Komunikazzjonijiet Elettroniċi (BEREC) u l-Aġenzija għall-Appoġġ tal-BEREC (l-Uffiċċju tal-BEREC), li jemenda r-Regolament (UE) 2015/2120 u li jħassar ir-Regolament (KE) Nru 1211/2009 (ĠU L 321, 17.12.2018, pp. 1-35).

Id-Direttiva (UE) 2018/1972 tal-Parlament Ewropew u tal-Kunsill tal-11 ta’ Diċembru 2018 li tistabbilixxi l-Kodiċi Ewropew għall-Komunikazzjonijiet Elettroniċi (Riformulazzjoni) (ĠU L 321, 17.12.2018, pp. 36-214).

Ara l-verżjoni konsolidata.

Ir-Regolament ta’ Implimentazzjoni tal-Kummissjoni (UE) 2016/2286 tal-15 ta’ Diċembru 2016 li jistabbilixxi regoli dettaljati dwar l-applikazzjoni ta’ politika tal-użu ġust u dwar il-metodoloġija għall-valutazzjoni tas-sostenibbiltà tat-tneħħija tal-ħlasijiet supplimentari tar-roaming bl-imnut u dwar l-applikazzjoni li għandu jressaq fornitur tar-roaming għall-finijiet ta’ dik il-valutazzjoni (ĠU L 344, 17.12.2016, pp. 46-62).

Ara l-verżjoni konsolidata.

l-aħħar aġġornament 21.06.2022