Pjan għal industrija tal-azzar kompetittiva u sostenibbli fl-Ewropa

Dan huwa pjan tal-Kumissjoni Ewropea mfassal sabiex jgħin lill-industrija Ewropea tal-azzar tistabbilixxi l-pedamenti għall-kompetittività futura billi jinkoraġġixxi l-innovazzjoni u l-ħolqien tat-tkabbir u tal-impjiegi.

ATT

Komunikazzjoni mill-Kummissjoni lill-Parlament, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni - Pjan ta' Azzjoni għal industrija tal-azzar kompetittiva u sostenibbli fl-Ewropa (COM(2013) 407 final tal-11.6.2013 - mhux ippubblikat fil-Ġurnal Uffiċjali).

SOMMARJU

Il-pjan huwa r-rispons tal-Kummissjoni għall-kriżi fis-settur tal-azzar u jistipula azzjonijiet illi jgħinu biex jiżguraw li l-industrija tal-azzar Ewropea tibqa’ kompetittiva u sostenibbli. Huwa jfittex ukoll li jiżgura li l-industrija Ewropea tal-azzar tkun tista’ tikkompeti b’mod globali u tiżviluppa l-ġenerazzjoni li jmiss ta’ prodotti tal-azzar li huma essenzjali għal industriji ewlenin oħrajn Ewropej bħall-industriji tal-karozzi, tal-kostruzzjoni, tal-elettronika, tal-inġinerija mekkanika u elettrika.

Settur tal-azzar b’saħħtu u kompetittiv huwa għalhekk importanti għall-bażi industrijali tal-Ewropa. L-UE hija t-tieni l-akbar produttur tal-azzar fid-dinja, b’output ta’ aktar minn 177 miljun tunnellata ta’ azzar fis-sena, li jammonta għal 11 % tal-output globali. Hemm madwar 500 sit ta’ produzzjoni maqsumin bejn 24 pajjiż tal-UE, li jagħmilha industrija verament Ewropea.

Tnaqqis ekonomiku

Illum, is-settur tal-azzar Ewropew jinsab f’sitwazzjoni diffiċli ħafna. Il-kriżi ekonomika li għaddejja wasslet għal tnaqqis sostanzjali fl-attività tal-manifattura u talba għall-azzar assoċjata magħha. B’riżultat ta' dan, diversi siti ta’ produzzjoni kellhom jagħlqu jew inaqqsu l-output b’telf korrispondenti ta’ impjiegi.

Il-pjan ikopri numru kbir ta’ oqsma tekniċi. Dan is-sommarju jagħti togħma tal-oqsma koperti.

Aċċess għas-suq

Fost affarijiet oħrajn, il-pjan tal-Kummissjoni jipproponi l-appoġġ għal talba għal azzar prodott fl-UE kemm hawnhekk kif ukoll barra billi jaġixxi sabiex jassigura li l-produtturi tal-azzar fl-UE jkollhom aċċess għas-swieq tal-pajjiżi mhux tal-UE permezz ta’ prattiċi ta’ negozju ġust.

Impjiegi u ħiliet

Fir-rigward tal-impjiegi, il-Kummissjoni qiegħda tfittex li tippromwovi miżuri għall-iżvilupp tal-ħiliet u miżuri li jimmiraw l-impjiegi taż-żgħażagħ fis-settur sabiex isaħħu l-kompetittività tas-settur. Idea oħra hija li tiġi esplorata l-possibilità li jintużaw fondi relevanti tal-UE sabiex jgħinu lill-ħaddiema sabiex isibu impjiegi alternattivi f’każijiet ta’ għeluq tas-siti tal-produzzjoni. Il-Kummissjoni sejra tinkoraġġixxi wkoll il-ħolqien ta’ Kunsill tal-Ħiliet Ewropew għall-industrija tal-azzar sabiex ilaqqa’ flimkien organizzazzjonijiet nazzjonali eżisenti li jaħdmu fl-iżvilupp tal-ħiliet u l-impjiegi tas-settur tal-azzar.

Koordinazzjoni

Barra minn hekk, il-Kummissjoni tipproponi li tistabbilixxi grupp ta’ livell għoli dwar l-azzar b’laqgħa annwali għal diskussjonijiet li huma ddiżinjati sabiex jappoġġjaw l-isforzi tas-settur Ewropew tal-azzar illi jżomm u jtejjeb il-kapaċità illi jikkompeti fis-suq dinji.

L-aħħar aġġornament: 15.05.2014