Baġit tal-UE — Sistema ta’ Identifikazzjoni Bikrija u Esklużjoni (EDES)

 

SOMMARJU TAD-DOKUMENT:

Regolament (UE, Euratom) 2015/1929 — sistema ta’ identifikazzjoni bikrija u esklużjoni sabiex tiġi żgurata ġestjoni finanzjarja soda

X’INHU L-GĦAN TAR-REGOLAMENT?

Dan jemenda r-regoli finanzjarji bażiċi tal-UE u jistabbilixxi sistema ta’ identifikazzjoni bikrija u esklużjoni mħaddma mill-Kummissjoni Ewropea, sabiex jitħarsu l-interessi finanzjarji tal-UE kontra operaturi ekonomiċi mhux affidabbli (jiġifieri negozji, kumpaniji u organizzazzjonijiet mhux kummerċjali).

PUNTI EWLENIN

• Is-sistema għandha l-għan li tiżgura:
  • l-identifikazzjoni bikrija ta’ riskji li jheddu l-interessi finanzjarji tal-UE;
  • l-esklużjoni ta’ operatur ekonomiku milli jirċievi fondi tal-UE;
  • l-impożizzjoni ta’ penali finanzjarji fuq l-operaturi ekonomiċi li jiksru r-regoli tal-UE.
• Il-Kummissjoni jew awtorità kontraenti oħra għandhom jeskludu operaturi ekonomiċi milli jakkwistaw fondi tal-UE permezz ta’, pereżempju, proċeduri ta' akkwist jew ta' għotjiet tal-UE għal:
  • meta jfallu, soġġetti għal proċeduri ta’ insolvenza jew jekk l-attivitajiet kummerċjali tagħhom jiġu sospiżi;
  • nuqqas ta’ ħlas tat-taxxi jew tal-kontribuzzjonijiet tas-sigurtà soċjali;
  • mġiba professjonali ħażina serja, bħal ksur tad-drittijiet tal-proprjetà individwali jew id-dħul fi ftehim ma’ operaturi oħrajn bil-għan li tiġi kkawżata distorsjoni tal-kompetizzjoni;
  • frodi, korruzzjoni, parteċipazzjoni f’organizzazzjoni kriminali, ħasil tal-flus, reati relatati mat-terroriżmu, impjieg tat-tfal jew traffikar tal-bnedmin;
  • ksur serju ta’ kuntratt jew irregolarità.
• Sabiex jiġi żgurat it-tħaddim koerenti tas-sistema, id-deċiżjonijiet dwar esklużjonijiet u penali finanzjarji jittieħdu abbażi ta’ rakkomandazzjoni minn bord indipendenti. Dan il-bord jipprovdi klassifikazzjoni preliminari fil-liġi fin-nuqqas ta’ sentenza finali jew deċiżjoni amministrattiva finali u f’każijiet relatati mal-ksur serju tal-kuntratt.
• Deċiżjonijiet dwar jekk jiġux esklużi operaturi ekonomiċi jew jiġux imposti penali huma bbażati fuq:
  • fatti mill-verifiki jew investigazzjonijiet imwettqa mill-Qorti Ewropea tal-Awdituri, l-uffiċċju kontra l-frodi tal-UE jew verifiki u kontrolli interni;
  • sentenzi finali u mhux finali u deċiżjonijiet amministrattivi;
  • deċiżjonijiet tal-Bank Ċentrali Ewropew, tal-Bank Ewropew tal-Investiment, tal-Fond Ewropew tal-Investiment jew ta’ organizzazzjonijiet internazzjonali;
  • Deċiżjonijiet tal-Kummissjoni dwar ir-regoli ta’ kompetizzjoni tal-UE.
• Kwalunkwe deċiżjoni dwar is-sanzjoni hija bbażata fuq:
  • il-prinċipju tal-proporzjonalità ;
  • is-serjetà tas-sitwazzjoni;
  • l-impatt fuq il-finanzi u l-immaġini tal-UE;
  • il-perjodu mill-aġir rilevanti, it-tul u r-rikorrenza tiegħu;
  • l-intenzjoni jew il-grad ta' negliġenza;
  • ċirkostanzi attenwanti, bħal kemm l-operatur ekonomiku jkun ikkollabora.
• L-operaturi ekonomiċi jistgħu ma jiġux esklużi milli jipparteċipaw fi proċedura ta’ akkwist jekk:
  • ikunu ħadu l-miżuri korrettivi, jiġifieri jkunu wrew li jistgħu jiġu fdati;
  • huwa meħtieġ li tiġi żgurata l-kontinwità tas-servizz għal perjodu limitat;
  • l-esklużjoni tkun sproporzjonata.
• Il-penali finanzjarji jistgħu jkunu bejn 2 % u 10 % tal-valur totali tal-kuntratt u t-tul ta’ żmien tal-esklużjoni jista’ jkun bejn 3 u 5 snin.
• L-informazzjoni li tirrelata mas-sistema ta’ identifikazzjoni bikrija u esklużjoni hija mdaħħla f’database ċentralizzata tal-Kummissjoni.
• Il-Kummissjoni, jew l-awtorità kontraenti rilevanti, jiddeċiedu jekk jimponux jew le penali finanzjarji għal kwalunkwe frodi jew imġiba ħażina.

META JAPPLIKA R-REGOLAMENT?

Dan japplika mill-1 ta’ Jannar 2016.

SFOND

Is-Sistema ta' Identifikazzjoni Bikrija u Esklużjoni (EDES) hija mfassla biex tipproteġi l-interessi finanzjarji tal-UE u biex tiżgura ġestjoni finanzjarja soda. Din issostitwiet is-Sistema preċedenti ta’ Twissija Bikrija u d-Database Ċentrali ta’ Esklużjoni mill-1 ta’ Jannar 2016.

Din ġiet stabbilita mir-Regolament (UE, Euratom) 2015/1929 li emenda r-Regolament Finanzjarju tal-UE.

Għal aktar tagħrif, ara:

• “Il-protezzjoni tal-interessi tal-UE” fuq is-sit web tal-Kummissjoni Ewropea

DOKUMENT EWLIENI

Regolament (UE, Euratom) 2015/1929 tal-Parlament Ewropew u tal-Kunsill tat-28 ta’ Ottubru 2015 li jemenda r-Regolament tal-Kunsill (UE, Euratom) Nru 966/2012 dwar ir-regoli finanzjarji applikabbli għall-baġit ġenerali tal-Unjoni (ĠU L 286, 30.10.2015, pp. 1-29)

l-aħħar aġġornament 05.10.2016