—

tannulla r-Regolament ta’ Implimentazzjoni tal-Kummissjoni (UE) 2023/265 tad-9 ta’ Frar 2023 li jimponi dazju anti-dumping definittiv fuq l-importazzjonijiet tal-madum taċ-ċeramika li joriġina fl-Indja u fit-Turkija (1) (iktar ’il quddiem ir-“regolament ikkontestat”) sa fejn huma kkonċernati r-rikorrenti;

—

tordna lill-Kummissjoni tbati l-ispejjeż tal-proċeduri.

—

L-ewwel motiv ibbażat fuq il-fatt li r-regolament ikkontestat kiser l-Artikolu 3 tar-Regolament (UE) 2016/1036 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Unjoni Ewropea (2) (iktar ’il quddiem ir-“regolament bażiku”) sa fejn il-Kummissjoni wettqet żball manifest ta’ evalwazzjoni meta kkonkludiet li l-industrija tal-Unjoni kienet sofriet dannu materjali.

—

It-tieni motiv ibbażat fuq il-fatt li r-regolament ikkontestat kiser l-Artikolu 3(6) tar-regolament bażiku sa fejn il-Kummissjoni wettqet żball manifest ta’ evalwazzjoni meta kkonkludiet li l-importazzjonijiet mill-pajjiżi kkonċernati kkawżaw dannu lill-industrija tal-Unjoni dominanti.

—

It-tielet motiv ibbażat fuq il-fatt li r-regolament ikkontestat kiser l-Artikolu 4(1) tar-regolament bażiku sa fejn il-Kummissjoni wettqet evalwazzjoni tad-dannu mhux ibbażata fuq il-proporzjoni maġġuri tal-produzzjoni totali tal-Unjoni fis-sens tal-Artikolu 4(1) tar-regolament bażiku, moqri fid-dawl tal-Artikolu 4(1) tal-Ftehim Antidumping tal-WTO.

—

Ir-raba’ motiv ibbażat fuq il-fatt li r-regolament ikkontestat kiser l-Artikolu 2(9) u 2(10) tar-regolament bażiku sa fejn (i) il-Kummissjoni b’mod żbaljat naqqset il-bejgħ, l-ispejjeż ġenerali u amministrattivi u l-qliegħ tan-negozjant relatat ma’ Bien & Qua mill-prezz tal-esportazzjoni, u alternattivament (ii) il-Kummissjoni, billi ma applikatx l-istess tnaqqis fuq il-valur normali, naqset milli twettaq paragun ġust.