—

tannulla d-deċiżjoni tat-22 ta’ Ottubru 2019 li permezz tagħha l-Awtorita tal-Ħatra rrifjutat ir-reklutaġġ tar-rikorrent bħala assistent parlamentari akkreditat (l-ewwel deċiżjoni kkontestata) fil-Parlament Ewropew;

—

tannulla d-deċiżjoni tas-Segretarju Ġenerali tal-Parlament Ewropew tal-14 ta’ Mejju 2020 (it-tieni deċiżjoni kkontestata) li tiċħad l-ilment imressaq mir-rikorrent skont l-Artikolu 90(2) tar-Regolamenti tal-Persunal, fir-rigward tal-ewwel deċiżjoni kkontestata;

—

tikkundanna lill-konvenut għall-ispejjeż.

—

Ksur tal-Artikolu 128(2)(c) tal-Kondizzjonijiet tal-impjieg applikabbli għall-aġenti l-oħra tal-Unjoni Ewropea peress li l-Parlament Ewropew jinterpreta dan l-artikolu b’mod żbaljat meta jsostni li l-pussess ta’ fedina penali nadifa huwa rekwiżit. Fil-fatt dan l-artikolu jikkonċerna garanziji relatati mal-funzjoni, li permezz tagħhom nota f’estratt minn fedina penali hija rilevanti biss meta tkun tali li tippreġudika l-karatteristika relatata mal-funzjoni jew hija tali li jkollha impatt fuq l-eżerċizzju konkret ta’ professjoni. Il-motivazzjoni tad-deċiżjonijiet ikkontestati tmur kontra l-imsemmi artikolu sa fejn il-konvenut jikkonferma fit-tieni deċiżjoni kkontestata li ma hemm ebda theddida attwali, effettiva u suffiċjentement serja għall-eżerċizzju regolari tal-funzjoni sa fejn hemm sempliċement “dubji” dwar l-integrità morali tar-rikorrent.

—

Ksur tal-Artikolu 41(1) u (2) tal-Karta tad-Drittijiet Fundamentali kif ukoll tal-prinċipju ta’ premura stabbilit fiha, peress li l-Parlament Ewropew ma ħax inkunsiderazzjoni l-elementi rilevanti kollha fl-evalwazzjoni tiegħu fil-kuntest tar-reklutaġġ tar-rikorrent. Ma kien hemm ebda teħid inkunsiderazzjoni tar-relazzjoni ta’ fiduċja mal-membru tal-Parlament Ewropew ikkonċernat u tal-fatt li r-rikorrent huwa diġà assistent parlamentari fil-parlament ta’ wieħed mill-Istati Membri tal-Belġju. Fl-istess waqt, il-Parlament Ewropew ma jiħux inkunsiderazzjoni r-rikonoxximent ta’ ħtija fl-ilment tar-rikorrent meta jistabbilixxi li dan tal-aħħar jonqos milli jeżerċita r-responsabbiltà tiegħu billi jirrelativizza r-reat imniżżel fl-estratt mill-fedina penali. Id-deċiżjonijiet ikkontestati huma għaldaqstant ivvizzjat b’nuqqas ta’ motivazzjoni.