1.

Permezz ta’ dan l-appell, Larko Geniki Metalleftiki kai Metallourgiki AE (iktar ’il quddiem “Larko” jew l-“appellanti”) titlob l-annullament tas-sentenza tal-Qorti Ġenerali tal-Unjoni Ewropea tal‑1 ta’ Frar 2018, Larko vs Il‑Kummissjoni ( 2 ) (iktar ’il quddiem “is-sentenza appellata”), li permezz tagħha hija ċaħdet ir-rikors tagħha intiż għall-annullament tad-Deċiżjoni tal-Kummissjoni Ewropea 2014/539/UE tas‑27 ta’ Marzu 2014 dwar l-Għajnuna mill-Istat SA.34572 (13/C) (ex 13/NN) implimentata mill-Ġreċja għal Larco General Mining & Metallurgical Company S.A ( 3 ) (iktar ’il quddiem id-“deċiżjoni kontenzjuża”).

2.

Skont it-talba tal-Qorti tal-Ġustizzja, dawn il-konklużjonijiet ser jiġu limitati għall-analiżi tal-ewwel parti tat-tieni aggravju bbażata, prinċipalment, fuq interpretazzjoni żbaljata tal-kunċett ta’ “vantaġġ ekonomiku” fis-sens tal-Artikolu 107(1) TFUE u tar-raba’ aggravju, ibbażat, prinċipalment, fuq ksur tal-Artikolu 14(1) tar-Regolament tal-Kunsill (KE) Nru 659/1999 tat‑22 ta’ Marzu 1999 li jistabbilixxi regoli dettaljati għall-applikazzjoni ta’ l-Artikolu [108 TFUE] ( 4 ), dwar l-irkupru tal-għajnuna.

3.

Fl-aħħar tal-analiżi tiegħi, ser nipproponi lill-Qorti tal-Ġustizzja tiċħad l-ewwel parti tat-tieni aggravju u r-raba’ aggravju bħala infondati.

4.

L-Artikolu 14 tar-Regolament Nru 659/1999, intitolat “Rkupru ta’ għajnuna”, jipprovdi fil-paragrafu 1 tiegħu:

“Fejn jittieħdu deċiżjonijiet negattivi f’każijiet ta’ għajnuna llegali, il-Kummissjoni għandha tiddeċiedi li l-Istat Membru kkonċernat għandu jieħu l-miżuri kollha meħtieġa sabiex jirkupra l-għajnuna mill-benefiċjarju […].”

5.

It-Taqsima 2.1, intitolata “Kunċett ta’ ‘impriża f’diffikultà’” [traduzzjoni mhux uffiċjali], tal-Linji Gwida Komunitarji dwar l-għajnuna mill-Istat għas-salvataġġ u għar-ristrutturazzjoni ta’ impriżi f’diffikultà (iktar ’il quddiem il-“Linji Gwida dwar is-salvataġġ u r-ristrutturazzjoni”) ( 5 ) tipprovdi fil-punti 9 sa 11 tagħha:

6.

L-Avviż tal-Kummissjoni tal‑20 ta’ Ġunju 2008 dwar l-applikazzjoni ta’ l-Artikoli [107] u [108 TFUE] għall-għajnuna mill-Istat fil-forma ta’ garanziji (iktar ’il quddiem il-“Komunikazzjoni dwar il-Garanziji”) ( 6 ) jipprovdi fit-tielet paragrafu tal-punt 2.1 tiegħu, relattiv għall-Artikolu 107 TFUE u intitolat “Rimarki ġenerali”:

“Sabiex jiġi evitat kwalunkwe dubju, il-kunċett ta’ riżorsi ta’ l-Istat għandu għalhekk jiġi ċċarat fir-rigward tal-garanziji mill-Istat. Il-benefiċċju ta’ garanzija mill-Istat huwa li r-riskju assoċjat mal-garanzija jittieħed mill-Istat. It-teħid ta’ dan ir-riskju mill-Istat għandu normalment jiġi remunerat bi premium xieraq. Fejn l-Istat iċedi l-premium kollu jew parti minnu, ikun hemm kemm benefiċċju għall-impriża kif ukoll tnaqqis tar-riżorsi ta’ l-Istat. Għalhekk, anke jekk jirriżulta li qatt ma jsir pagament mill-Istat taħt garanzija, xorta waħda jista’ jkun hemm għajnuna mill-Istat taħt l-Artikolu 87(1) tat-Trattat. L-għajnuna tingħata fil-mument li ssir il-garanzija, mhux meta l-garanzija tiġi invokata u lanqas meta l-pagamenti jsiru skond it-termini tal-garanzija. Jekk garanzija tikkostitwixxix jew le għajnuna mill-Istat, u, jekk iva, x’jista’ jkun l-ammont ta’ dik l-għajnuna mill-Istat, għandu jiġi evalwat fil-mument meta tingħata l-garanzija”.

7.

Il-punt 3.2 ta’ din il-komunikazzjoni, intitolat “Garanziji individwali” jipprovdi:

“Fir-rigward ta’ garanzija individwali mill-Istat, il-Kummissjoni tikkunsidra li biex tiġi eskluża l-preżenza ta’ għajnuna mill-Istat ikun biżżejjed li jkunu ssodisfati l-kundizzjonijiet li ġejjin:

Sabiex tittieħed deċiżjoni dwar jekk min jissellef ikunx ikkunsidrat f’diffikultà finanzjarja, għandha ssir referenza għad-definizzjoni stabbilita fil-linji gwida Komunitarji dwar l-għajnuna għas-salvataġġ u r-ristrutturar […]

[…]

Kif indikat taħt il-punt 2.1, normalment it-teħid ta’ riskju għandu jitħallas permezz ta’ premium xieraq fuq l-ammont tal-garanzija jew il-kontragaranzija. Meta l-prezz imħallas għall-garanzija jkun mill-anqas għoli daqs il-limitu ta’ premium ta’ garanzija korrispondenti li jkun hemm fis-swieq finanzjarji, il-garanzija ma tkunx tinkludi għajnuna.

Jekk fis-swieq finanzjarji ma jinstab l-ebda limitu tal-premium tal-garanzija li jikkorrispondi, l-ispiża finanzjarja totali tas-self garantit, inkluż ir-rata ta’ imgħax tas-self u tal-premium tal-garanzija, għandha tiġi mqabbla mal-prezz tas-suq ta’ self simili li m’huwiex garantit.

[…]”

8.

Il-punt 4.1 tal-imsemmija komunikazzjoni li jirrigwarda l-aspetti ġenerali tal-garanziji li jinkludu element ta’ għajnuna jindika:

“Fejn garanzija individwali jew skema ta’ garanzija ma tkunx konformi mal-prinċipju ta’ l-investitur f’ekonomija tas-suq, din tkun meqjusa li tinvolvi l-għajnuna mill-Istat. Għalhekk l-element ta’ għajnuna mill-Istat jeħtieġ li jiġi kkwantifikat sabiex jiġi mistħarreġ jekk l-għajnuna tistax tinstab kompatibbli taħt xi eżenzjoni speċifika ta’ l-għajnuna mill-Istat. Bħala punt ta’ prinċipju, l-element ta’ l-għajnuna mill-Istat jiġi meqjus li jkun id-differenza bejn il-prezz xieraq tas-suq tal-garanzija pprovduta individwalment jew permezz ta’ skema u l-prezz attwalment imħallas għal dik il-miżura.

L-ekwivalenti f’għotjiet fi flus annwali li jirriżultaw għandhom jiġu mnaqqsa għall-valur preżenti tagħhom bl-użu tar-rata ta’ referenza, u mbagħad magħduda sabiex toħroġ l-ekwivalenti f’għotja totali.

Fil-kalkolu ta’ l-element ta’ l-għajnuna f’garanzija, il-Kummissjoni ser tiddedika attenzjoni speċjali lill-elementi li ġejjin:

Il-Kummissjoni tinnota li għal kumpanniji f’diffikultà, garanti tas-suq, jekk ikun hemm, jitlob fiż-żmien meta ssir il-garanzija ħlas ta’ premium għoli meta wieħed iqis ir-rata mistennija ta’ inadempjenza. Jekk il-probabilità li min jissellef ma jkunx kapaċi jħallas lura s-self issir partikolarment kbira, huwa possibbli li din ir-rata tas-suq ma tkunx teżisti u f’ċirkostanzi eċċezzjonali l-element ta’ l-għajnuna tal-garanzija jista’ jirriżulta li jkun għoli daqs l-ammont effettivament kopert minn dik il-garanzija;

[…]”

9.

Il-fatti li wasslu għall-kawża ġew indikati fid-dettall fis-sentenza appellata, li għaliha jsir riferiment f’dan ir-rigward ( 7 ). Il-fatti essenzjali u neċessarji sabiex jinftiehmu dawn il-konklużjonijiet jistgħu jinġabru fil-qosor kif ġej.

10.

Larko hija impriża speċjalizzata fl-estrazzjoni u fl-ipproċessar tal-minerali tal-laterit, fl-estrazzjoni tal-linjite u fil-produzzjoni ta’ ferronikil u ta’ prodotti sekondarji.

11.

Hija nħolqot fl‑1989, fil-forma ta’ impriża ġdida, wara l-istralċ ta’ Hellenic Mining and Metallurgical SA. Fiż-żmien tal-fatti sottostanti għat-tilwima prinċipali, hija kellha tliet azzjonisti: l-Istat Grieg, li kellu 55.2 % tal-azzjonijiet permezz tal-Hellenic Republic Asset Development Fund, istituzzjoni finanzjarja privata, National Bank of Greece SA li kellha 33.4 % tal-azzjonijiet, u l-Public Power Corporation (il-produttur prinċipali tal-elettriku fil-Greċja, li l-Istat huwa l-azzjonist maġġoritarju tiegħu), li kellha 11.4 % tal-azzjonijiet.

12.

F’Marzu 2012, il-Hellenic Republic Asset Development Fund informa lill-Kummissjoni bi programm ta’ privatizzazzjoni ta’ Larko.

13.

F’April 2012, il-Kummissjoni bdiet, ex officio, eżami preliminari fuq l-imsemmija privatizzazzjoni, skont ir-regoli tal-għajnuna mill-Istat.

14.

L-eżami kellu bħala għan sitt miżuri, li minnhom it-tieni, ir-raba’ u s-sitt miżura riprodotti iktar ’l isfel biss huma rilevanti għall-finijiet ta’ dawn il-konklużjonijiet peress li dawn it-tliet miżuri biss huma s-suġġett tal-ewwel parti tat-tieni aggravju u tar-raba’ aggravju:

15.

Matul dan l-eżami, il-Kummissjoni talbet lill-awtoritajiet Griegi informazzjoni addizzjonali, li ġiet ipprovduta lilha fl‑2012 u fl‑2013. Inżammu wkoll laqgħat bejn is-servizzi tal-Kummissjoni u r-rappreżentanti tal-awtoritajiet Griegi.

16.

Permezz ta’ deċiżjoni tas‑6 ta’ Marzu 2013 ( 8 ) (iktar ’il quddiem “id-deċiżjoni tal-ftuħ”) il-Kummissjoni fetħet il-proċedura ta’ investigazzjoni formali prevista fl-Artikolu 108(2) TFUE.

17.

Matul l-imsemmija proċedura, il-Kummissjoni stiednet lill-awtoritajiet Griegi u lit-terzi interessati sabiex jippreżentaw l-osservazzjonijiet tagħhom dwar il-miżuri msemmija fil-punt 14 ta’ dawn il-konklużjonijiet. Il-Kummissjoni rċeviet osservazzjonijiet min-naħa tal-awtoritajiet Griegi fit‑30 ta’ April 2013; hija ma rċeviet l-ebda osservazzjoni min-naħa ta’ Larko.

18.

Fis-27 ta’ Marzu 2014, il-Kummissjoni adottat id-deċiżjoni kontenzjuża. Permezz ta’ din id-deċiżjoni u għal dak li jirrigwarda l-miżuri Nri 2, 4 u 6, li l-analiżi tagħhom biss hija rilevanti għal dawn il-konklużjonijiet, il-Kummissjoni qieset li, fiż-żmien li fih kienu ngħataw dawn it-tliet miżuri, Larko kienet impriża f’diffikultà fis-sens tal-Linji Gwida dwar is-salvataġġ u r-ristrutturazzjoni ( 9 ).

19.

Barra minn hekk, il-Kummissjoni qieset li dawn il-miżuri kienu jikkostitwixxu għajnuna mill-Istat fis-sens tal-Artikolu 107(1) TFUE, li dawn il-miżuri kienu ngħataw bi ksur tal-obbligi ta’ notifika u ta’ projbizzjoni ta’ implimentazzjoni stabbiliti fl-Artikolu 108(3) TFUE u li l-imsemmija miżuri kienu jikkostitwixxu għajnuna inkompatibbli mas-suq intern u suġġetti għal irkupru fis-sens tal-Artikolu 14(1) tar-Regolament Nru 659/1999. Fl-aħħar nett, il-Kummissjoni ffissat is-somom li għandhom jiġu rkuprati fir-rigward ta’ din l-għajnuna sal-ammont kollu kopert mill-garanziji ( 10 ).

20.

Permezz ta’ rikors ippreżentat fir-Reġistru tal-Qorti Ġenerali fis‑6 ta’ Ġunju 2014, Larko ppreżentat rikors intiż għall-annullament tad-deċiżjoni kontenzjuża kif ukoll għar-rimbors, flimkien mal-interessi, ta’ kwalunkwe somma oħra li setgħet ġiet irkuprata, direttament jew indirettament, mingħandha b’-eżekuzzjoni ta’ din id-deċiżjoni.

21.

Permezz tas-sentenza appellata, il-Qorti Ġenerali ċaħdet ir-rikors fl-intier tiegħu u kkundannat lil Larko għall-ispejjeż.

22.

Permezz ta’ rikors ippreżentat fir-Reġistru tal-Qorti tal-Ġustizzja fl‑4 ta’ April 2018, Larko titlob lill-Qorti tal-Ġustizzja tannulla s-sentenza appellata, tibgħat lura l-kawża lill-Qorti Ġenerali u tirriżerva l-ispejjeż.

23.

Il-Kummissjoni titlob lill-Qorti tal-Ġustizzja tiċħad l-appell u tikkundanna lil Larko għall-ispejjeż.

24.

L-ewwel parti tat-tieni aggravju tqajjem il-kwistjoni tal-klassifikazzjoni tal-miżura Nru 2 bħala għajnuna mill-Istat fis-sens tal-Artikolu 107(1) TFUE, u b’mod iktar speċifiku, tal-evalwazzjoni ta’ din il-miżura bħala li tagħti “vantaġġ ekonomiku” lil Larko.

25.

Il-Kummissjoni bbażat il-klassifikazzjoni tal-imsemmija miżura bħala għajnuna mill-Istat fid-deċiżjoni kontenzjuża fuq il-punt 3.2(a) u (d) tal-Komunikazzjoni tagħha dwar il-Garanziji. Peress li Larko targumenta, essenzjalment, li l-Kummissjoni wettqet żball ta’ liġi billi applikat dan il-punt għall-għajnuna mogħtija, inqis li jkun utli li, qabel xejn, isiru xi osservazzjonijiet preliminari rigward din il-komunikazzjoni (Taqsima 1), qabel nipproċedi bl-analiżi tal-ewwel parti tat-tieni aggravju (Taqsima 2).

26.

Il-Komunikazzjoni dwar il-Garanziji tippreżenta l-approċċ adottat mill-Kummissjoni fir-rigward tal-għajnuna mill-Istat mogħtija fil-forma ta’ garanziji u l-prinċipji li fuqhom il-Kummissjoni għandha l-intenzjoni tibbaża l-interpretazzjoni tagħha tal-Artikoli 107 u 108 TFUE kif ukoll l-applikazzjoni ta’ dawn l-artikoli għall-garanziji pubbliċi.

27.

Sabiex tiddetermina jekk garanzija tagħtix vantaġġ fis-sens tal-Artikolu 107(1) TFUE, il-Kummissjoni għandha, skont il-punt 3.1 ta’ din il-komunikazzjoni, tibbaża l-evalwazzjoni tagħha fuq il-prinċipju ta’ investitur li jopera f’ekonomija tas-suq. Għalhekk għandhom jitqiesu l-possibbiltajiet effettivi għal impriża benefiċjarja li tikseb riżorsi finanzjarji ekwivalenti billi tirrikorri għas-suq kapitali ( 11 ).

28.

Sabiex ikun jista’ jiġi evalwat aħjar jekk garanzija partikolari tosservax l-imsemmi prinċipju, il-Kummissjoni teħtieġ, fil-punt 3.2 tal-imsemmija komunikazzjoni, it-twettiq ta’ ċertu numru ta’ kundizzjonijiet sabiex tiġi eskluża l-presenza ta’ għajnuna mill-Istat, fosthom, għal dak li jirrigwarda l-garanziji individwali, minn naħa, il-kundizzjoni li min jissellef ma jkunx f’diffikultà finanzjarja (punt 3.2(a)), u min-naħa l-oħra, il-kundizzjoni li l-garanzija tagħti lok għall-ħlas ta’ prezz orjentat għas-suq (punt 3.2(d)) ( 12 ).

29.

Skont il-ġurisprudenza tal-Qorti tal-Ġustizzja, għall-finijiet tal-applikazzjoni ta’ dawn iż-żewġ kundizzjonijiet, għandu jittieħed inkunsiderazzjoni l-kuntest taż-żmien li fih ġew adottati l-miżuri ta’ appoġġ, fatt li jimplika li ma għandha ssir ebda evalwazzjoni oħra bbażata fuq sitwazzjoni sussegwenti (iktar ’il quddiem “il-kriterju ratione temporis”) ( 13 ).

30.

Sabiex jiġi ddeterminat jekk il-garanzija tinkludix għajnuna, l-ewwel paragrafu tal-punt 3.2(d) tal-Komunikazzjoni dwar il-Garanziji jistabbilixxi bħala kriterju li t-teħid ta’ riskju għandu jiġi rremunerat permezz ta’ primjum xieraq fuq l-ammont tal-garanzija jew tal-kontrogaranzija (iktar ’il quddiem “il-kriterju ta’ remunerazzjoni”). Fil-fatt, meta l-prezz imħallas għall-garanzija jkun mill-inqas għoli daqs il-primjum ta’ garanzija ta’ riferiment korrispondenti offrut fis-swieq finanzjarji, il-garanzija ma tkunx tinkludi għajnuna. Barra minn hekk, il-punt 3.2 jifformula żewġ metodi sabiex jiġi ddeterminat jekk garanzija partikolari tissodisfax dan il-kriterju: għandu jew jitqabbel il-prezz imħallas għall-garanzija mal-primjum ta’ garanzija ta’ riferiment offrut fis-swieq finanzjarji, jew titqabbel l-ispiża finanzjarja totali tas-self iggarantit, inkluża r-rata tal-imgħax u l-primjum imħallas mal-prezz tas-suq ta’ self simili mhux iggarantit.

31.

Larko ssostni li l-Qorti Ġenerali wettqet żbalji ta’ liġi meta hija qieset li l-miżura Nru 2 kienet tagħti lil Larko vantaġġ fis-sens tal-Artikolu 107(1) TFUE. Il-Qorti Ġenerali applikat b’mod żbaljat, minn naħa, il-kriterju ratione temporis billi kklassifikat lil Larko bħala “impriża f’diffikultà” waqt l-għoti tal-miżura Nru 2 (Taqsima a), u min-naħa l-oħra, il-kriterju ta’ remunerazzjoni billi ddeċidiet li l-primjum ta’ 1 % ma kienx jirrifletti r-riskju ta’ inadempjenza għas-self iggarantit kif previst fil-punt 3.2(d) tal-Komunikazzjoni dwar il-Garanziji (Taqsima b).

32.

L-ilment li jirrigwarda l-kriterju ratione temporis huwa indirizzat kontra l-punti 77 sa 80 tas-sentenza appellata u huwa bbażat fuq ksur tal-Artikolu 107(1) TFUE.

33.

Preliminarjament nosserva li sabiex, fil-punt 90 tas-sentenza appellata, tikkonkludi li l-Kummissjoni ma wettqitx żball ta’ liġi meta kklassifikat lil Larko bħala “impriża f’diffikultà” waqt l-għoti tal-miżura Nru 2, il-Qorti Ġenerali tipproċedi f’żewġ stadji. L-ewwel nett, fil-punti 74 sa 82 tas-sentenza appellata, il-Qorti Ġenerali tistabbilixxi li, abbażi tal-fatti li kellha l-Kummissjoni, din tal-aħħar setgħet ġustament tikkonkludi li Larko kienet impriża f’diffikultà. Sussegwentement, fil-punti 83 sa 89 tas-sentenza appellata, il-Qorti Ġenerali tqis li l-Kummissjoni ma wettqitx żbalji ta’ liġi billi qieset li, fil-mument tal-għoti tal-garanzija tal‑2008, l-Istat Grieg, bħala azzjonist ta’ Larko, kellu jkun jaf bis-sitwazzjoni ta’ diffikultà tagħha.

34.

Larko tallega li l-evalwazzjoni tal-Qorti Ġenerali fil-punti 77 sa 80 tas-sentenza appellata hija żbaljata peress li l-fatti li fuqhom hija bbażata din l-evalwazzjoni huma sussegwenti għall-għoti tal-garanzija li seħħ fit‑22 ta’ Diċembru 2008, għall-kuntrarju ta’ dak li teħtieġ il-ġurisprudenza tal-Qorti tal-Ġustizzja ( 14 ). F’dan ir-rigward, Larko tibbaża ruħha fuq it-tliet argumenti li ġejjin.

35.

L-ewwel nett, ir-riżultati finanzjarji invokati fl-imsemmija punti jestendu sas-sena 2012 u, fi kwalunkwe każ, sar-riżultati negattivi tas-sena 2009. It-tieni nett, ir-riżultati finanzjarji tas-sena 2008 kienu wkoll sussegwenti għall-għoti tal-garanzija tal‑2008 peress li s-sena finanzjarja kienet għadha mhux magħluqa, ir-rapporti finanzjarji lanqas ma kienu għadhom ġew redatti u għalhekk l-Istat Grieg ma kienx jaf bihom waqt l-għoti ta’ din il-garanzija. Għalhekk, il-Qorti Ġenerali naqset milli tqiegħed lilha nnifisha fil-kuntest taż-żmien inkwistjoni, hekk kif teħtieġ il-ġurisprudenza tal-Qorti tal-Ġustizzja. It-tielet nett, fi kwalunkwe każ, anki jekk jiġi preżunt li l-informazzjoni tal‑2008 ma kinitx sussegwenti għall-għoti tal-garanzija tal‑2018, f’dan l-istadju din kienet informazzjoni fuq perijodu qasir. F’dan ir-rigward, Larko tallega li mill-punti 9 sa 11 tal-Linji Gwida dwar is-salvataġġ u r-ristrutturazzjoni jirriżulta li l-analiżi tas-sitwazzjoni partimonjali tal-impriża għandha tkun ibbażata fuq informazzjoni ta’ perijodu ta’ żmien suffiċjenti, u mhux fuq l-immaġini ta’ mument.

36.

Il-Kummissjoni tqis li dan l-aggravju għandu jiġi miċħud.

37.

Fl-ewwel lok, nirrileva li, peress li l-garanzija kkonċernata kienet ingħatat fit‑22 ta’ Diċembru 2008, skont il-ġurisprudenza tal-Qorti tal-Ġustizzja, għandhom jittieħdu inkunsiderazzjoni l-fatti li seħħew sa din id-data sabiex jiġi evalwat jekk Larko kinitx impriża f’diffikultà waqt l-għoti tal-garanzija.

38.

F’dan ir-rigward, fir-rigward tal-ewwel argument ta’ Larko, nirrileva li l-fatt li l-Qorti Ġenerali ssemmi, fil-punt 77 tas-sentenza appellata, ir-riżultati finanzjarji li jestendu sas-sena 2012 ma jfissirx, fih innifsu, li l-Qorti Ġenerali bbażat ruħha fuq dawn ir-riżultati sussegwenti għall-evalwazzjoni tas-sitwazzjoni finanzjarja ta’ Larko fil-mument li fih ingħatat il-garanzija tal‑2008.

39.

Fil-fatt, il-fatt li dawn ir-riżultati finanzjarji jissemmew mill-Qorti Ġenerali għandu jinqara fid-dawl tal-fatt li l-Kummissjoni wettqet, fid-deċiżjoni kontenzjuża, evalwazzjoni tas-sitwazzjoni finanzjarja ta’ Larko għall-perijodu li matulu ttieħdu l-miżuri kollha kkontestati, jiġifieri s-sitwazzjoni finanzjarja tagħha mis-sena 2007 sas-sena 2012. Għalhekk, qabel ma tfakkar dawn ir-riżultati finanzjarji fil-punt 77 tas-sentenza appellata, il-Qorti Ġenerali tirreferi għad-deċiżjoni tal-Kummissjoni li tipprovdi li “[f]’dan il-każ, fil-premessi 56 sa 66 tad-deċiżjoni [kontenzjuża], il-Kummissjoni kklassifikat lil Larko bħala ‘impriża f’diffikultà’ waqt l-għoti tal-miżuri [Nri 2, 4 u 6], inklużi l-garanzija tal-2008” ( 15 ).

40.

Għalhekk, nikkonstata li, għall-finijiet tal-evalwazzjoni tas-sitwazzjoni finanzjarja ta’ Larko fil-punti 78 sa 80 tas-sentenza appellata, il-Qorti Ġenerali bbażat ruħha fuq fatti li seħħew fl‑2008, jiġifieri fuq il-fondi proprji negattivi ta’ Larko, it-tnaqqis kunsiderevoli tad-dħul mill-bejgħ u t-telf sostanzjali akkumulat minn din tal-aħħar fl‑2008 ( 16 ).

41.

Minn dan jirriżulta li l-ewwel argument ta’ Larko għandu jiġi miċħud.

42.

Fir-rigward tat-tieni argument imressaq minn Larko, dan jinkludi, fil-fehma tiegħi, żewġ elementi: minn naħa l-allegazzjoni li r-riżultati finanzjarji tas‑sena 2008 kienu sussegwenti għall-għoti tal-garanzija tal‑2008 peress li s-sena finanzjarja kienet għadha mhux magħluqa, u min-naħa l-oħra, il-fatt li l-Istat Grieg ma kienx jaf bl-informazzjoni inkluża fir-riżultati finanzjarji tas-sena 2008.

43.

Għal dak li jirrigwarda l-ewwel element, għandu jiġi kkonstatat li, hekk kif targumenta l-Kummissjoni, ir-rapporti finanzjarji tal‑2008 jiddeskrivu d-data finanzjarja ta’ Larko għall-perijodu ta’ bejn l‑1 ta’ Jannar 2008 u l‑31 ta’ Diċembru 2008, li fil-parti l-kbira hija preċedenti għall-għoti tal-garanzija fit‑22 ta’ Diċembru 2008. F’dan ir-rigward, nenfasizza li l-fatti li seħħew matul perijodu partikolari jistgħu, b’mod ġenerali, jiġu pprovati wkoll permezz ta’ dokumenti ulterjuri bbażati fuq dawn il-fatti preċedenti ( 17 ). Għal din ir-raġuni, l-informazzjoni inkluża fir-riżultati finanzjarji tas-sena 2008 ma tistax titqies bħala sussegwenti għall-għoti tal-garanzija tal‑2008.

44.

Fir-rigward tat-tielet element, il-Qorti Ġenerali kkonstatat, fil-punt 85 tas-sentenza appellata, “[m]a hemm l-ebda element fil-proċess tal-kawża li juri b’mod ċert li l-Istat Membru kien jaf bis-sitwazzjoni ta’ diffikultà ta’ Larko fil-mument tal-għoti tal-garanzija tal-2008” u li “[g]ħaldaqstant, tqum il-kwistjoni dwar jekk il-Kummissjoni ssodisfatx l-oneru tal-prova billi bbażat ruħha, essenzjalment, fuq il-preżunzjoni li l-Istat Grieg kellu jkun jaf bis-sitwazzjoni ta’ diffikultà ta’ Larko fi tmiem l-2008, waqt l-għoti tal-garanzija”.

45.

Filwaqt li l-formulazzjoni użata f’dan il-punt tista’ tagħti l-impressjoni li l-Kummissjoni bbażat ruħha, prinċipalment, fuq in-nuqqas tal-awtoritajiet Griegi li jinformaw ruħhom dwar is-sitwazzjoni finanzjarja ta’ Larko, fil-fehma tiegħi, huwa ċar li l-Qorti Ġenerali riedet tindika li l-Kummissjoni bbażat ruħha fuq il-preżunzjoni li l-Istat Grieg kellu, mill-inqas, ikun jaf bis-sitwazzjoni ta’ diffikultà ta’ Larko waqt l-għoti tal-garanzija.

46.

Fil-fatt, tali qari huwa impost fid-dawl tal-punt 89 tas-sentenza appellata fejn il-Qorti Ġenerali tikkonkludi li kien raġonevoli min-naħa tal-Kummissjoni li tqis li azzjonist prudenti kien, mill-inqas, informa ruħu dwar is-sitwazzjoni ekonomika u finanzjarja attwali tal-impriża qabel ma jagħtiha garanzija bħal dik tal‑2008 ( 18 ).

47.

Wara din il-preċiżazzjoni, infakkar li sa fejn Larko, permezz tat-tieni element tat-tieni argument tagħha, tikkontesta l-konoxxenza mill-awtoritajiet Griegi tas-sitwazzjoni finanzjarja ta’ Larko fl‑2008, fatt li jirrigwarda l-fatti tal-kawża ( 19 ), il-Qorti Ġenerali biss għandha ġurisdizzjoni sabiex tikkonstata u tevalwa l-fatti.

48.

Il-Qorti tal-Ġustizzja madankollu għandha ġurisdizzjoni sabiex tevalwa jekk il-Qorti Ġenerali żnaturatx il-portata ta’ deċiżjoni kontenzjuża. Għandu jitfakkar li tali żnaturament għandu jirriżulta b’mod ċar mill-atti tal-proċess, mingħajr ma jkun meħtieġ li ssir evalwazzjoni ġdida tal-fatti u tal-provi ( 20 ).

49.

F’dan il-każ, minkejja li l-kwistjoni tal-konoxxenza (jew le) mill-awtoritajiet Griegi tas-sitwazzjoni finanzjarja ta’ Larko fl‑2008 tirrigwarda l-istabbiliment tal-fatti li jaqa’ fil-ġurisdizzjoni tal-Qorti Ġenerali biss, il-Qorti tal-Ġustizzja tista’ madankollu tistħarreġ jekk il-Qorti Ġenerali żnaturatx il-portata tad-deċiżjoni kontenzjuża dwar dan il-punt.

50.

Għalkemm din l-aħħar kwistjoni tista’ titqajjem meta prima facie ebda element fid-deċiżjoni kontenzjuża ma jippermetti li jitqies li l-Kummissjoni wkoll adottat l-istess raġunament bħal dak żviluppat mill-Qorti Ġenerali dwar dan il-punt ( 21 ), madankollu nikkonstata li tali żnaturament ma ġiex invokat minn Larko u li, fi kwalunkwe każ, fil-fehma tiegħi, il-kontenut tad-deċiżjoni kontenzjuża ma ġiex żnaturat mill-Qorti Ġenerali fis-sentenza appellata.

51.

Fil-fatt huwa paċifiku li l-konoxxenza mill-awtoritajiet Griegi tas-sitwazzjoni finanzjar ta’ Larko fl‑2008 ma kinitx ikkontestata waqt il-proċedura amministrattiva mill-Istat Grieg innifsu ( 22 ), hekk kif tindika wkoll il-Qorti Ġenerali fil-punt 88 tas-sentenza appellata ( 23 ) u li jispjega għaliex probabbilment il-Kummissjoni ma ddeċidietx dwar din il-kwistjoni fid-deċiżjoni kontenzjuża ( 24 ).

52.

Għalhekk, huwa fid-dawl ta’ dawn il-kunsiderazzjonijiet li l-Qorti Ġenerali ddeċidiet, essenzjalment, li fiċ-ċirkustanzi tal-każ, sabiex jiġi evalwat jekk Larko kinitx f’diffikultà finanzjarja fis-sens tal-punt 3.2(a) tal-Komunikazzjoni dwar il-Garanziji, il-Kummissjoni setgħet, ġustament, tibbaża ruħha fuq il-premessa li l-Istat Grieg, bħala azzjonist maġġoritarju ta’ Larko, kien jaf bis-sitwazzjoni finanzjarja ta’ din tal-aħħar, jew tal-inqas kien imissu kien jaf biha waqt l-għoti tal-garanzija tal‑2008.

53.

Barra minn hekk, din l-evalwazzjoni mwettqa mill-Qorti Ġenerali jidhirli li hija kompletament loġika. Fil-fatt, hekk kif indikat il-Qorti Ġenerali, essenzjalment, fil-punti 86 sa 89 tas-sentenza appellata, investitur privat prudenti ( 25 ) li ta garanzija bħal dik inkwistjoni kien evidentement jinforma ruħu dwar is-sitwazzjoni finanzjarja ta’ Larko fil-mument tal-għoti ta’ din il-garanzija. Għalhekk, sabiex jaġixxu bħal investitur privat prudenti, l-awtoritajiet Griegi kellhom, fi kwalunkwe każ, isiru jafu bis-sitwazzjoni finanzjarja tal-impriża. Dwar dan il-punt, infakkar li, skont ġurisprudenza stabbilita tal-Qorti tal-Ġustizzja, huwa l-Istat Membru nnifsu li għandu jistabbilixxi li aġixxa bħala investitur privat prudenti ( 26 ).

54.

Fid-dawl tal-kunsiderazzjonijiet preċedenti, it-tieni argument ta’ Larko għandu jiġi miċħud.

55.

Bl-istess mod, hemm lok li jiġi miċħud it-tielet argument imressaq mill-appellanti, li l-informazzjoni tal‑2008 kienet tirrigwarda perijodu qasir. Fil-fatt, huwa paċifiku li l-aggravazzjoni tas-sitwazzjoni finanzjarja ta’ Larko bdiet tidher lejn nofs is-sena 2008 ( 27 ) u ebda element ma jippermetti li jiġi indikat li l-Qorti Ġenerali bbażat l-evalwazzjoni tagħha fuq l-immaġini ta’ mument, hekk kif invokat minn Larko.

56.

Minn dan jirriżulta li l-ilment li jirrigwarda l-kriterju ratione temporis fil-kuntest tal-kunċett ta’ “impriża f’diffikultà” għandu jiġi miċħud.

57.

L-ilment relattiv għall-kriterju tar-remunerazzjoni huwa indirizzat kontra l-punti 94 sa 98 tas-sentenza appellata u huwa bbażat fuq ksur tal-Artikolu 107(1) TFUE u tal-Artikolu 296(2) TFUE.

58.

Fil-punti fuq imsemmija, il-Qorti Ġenerali ddeċidiet li l-Kummissjoni setgħet, ġustament, tikkonkludi li l-primjum ta’ garanzija annwali ta’ 1 % ma setax jitqies bħala li jirrifletti r-riskju ta’ inadempjenza għas-self iggarantit u li għalhekk il-kundizzjoni stabbilita fil-punt 3.2(d) tal-Komunikazzjoni dwar il-Garanziji ma kinitx issodisfatta.

59.

Larko tallega li l-Qorti Ġenerali applikat din il-kundizzjoni b’mod żbaljat sa fejn il-Qorti Ġenerali kkonstatat hija stess, fil-punt 95 tas-sentenza appellata, li l-Kummissjoni ma użat ebda wieħed miż-żewġ metodi stabbiliti mill-imsemmija kundizzjoni, jiġifieri jew il-paragun mal-primjum ta’ garanzija ta’ riferiment offrut fis-swieq finanzjarji, jew il-paragun tal-ispiża finanzjarja totali tas-self iggarantit mal-prezz tas-suq ta’ self simili mhux iggarantit.

60.

Għalhekk, meta l-Qorti Ġenerali ddeċidiet madankollu li d-deċiżjoni kontenzjuża ma kinitx ivvizzjata bi żball manifest ta’ evalwazzjoni, minħabba s-sitwazzjoni ta’ diffikultà ekonomika u finanzjarja ta’ Larko u n-nuqqas ta’ produzzjoni ta’ provi matul il-proċedura amministrattiva, hija warrbet l-applikazzjoni tal-punt 3.2(d) tal-Komunikazzjoni dwar il-Garanziji u fl-istess waqt imponiet fuq Larko u l-Istat Grieg l-oneru tal-prova tal-ammont xieraq ta’ dan il-primjum, u b’hekk eżentat lill-Kummissjoni mill-obbligu tagħha li teżamina hija stess l-ammont xieraq tal-primjum. Barra minn hekk, il-Qorti Ġenerali kisret ukoll l-Artikolu 296(2) TFUE, inkwantu ma annullatx id-deċiżjoni kontenzjuża minkejja li din kienet nieqsa minn motivazzjoni.

61.

Il-Kummissjoni tqis li dan l-ilment għandu jiġi miċħud. Jiena naqbel ma’ din il-pożizzjoni għar-raġunijiet segwenti.

62.

L-ewwel nett, hekk kif ġustament tqis il-Kummissjoni, il-Qorti Ġenerali ma tbegħditx mill-punt 3.2(d) tal-Komunikazzjoni dwar il-Garanziji u ma imponietx fuq Larko l-oneru tal-prova f’dan ir-rigward. Fil-fatt, dan il-punt jeżiġi biss il-kriterju li l-garanzija tagħti lok għall-ħlas ta’ primjum konformi mal-prezz tas-suq. Hekk kif indikat fil-punti 96 sa 98 tas-sentenza appellata, fid-dawl tas-sitwazzjoni ta’ diffikultà ekonomika ta’ Larko u tal-fatt li la l-appellanti u lanqas l-awtoritajiet Griegi ma pproduċew, matul il-proċedura ta’ investigazzjoni formali, provi ta’ natura li juru li l-primjum inkwistjoni kien jikkorrispondi għal primjum li kien offrut fis-swieq finanzjarji jew għall-prezz tas-suq ta’ self simili mhux iggarantit, ma kienx neċessarju li l-Kummissjoni tapplika wieħed minn dawn iż-żewġ metodi intiżi sabiex jistabbilixxu l-ammont preċiż ta’ tali primjum sabiex jiġi stabbilit jekk il-garanzija kinitx tissodisfa dan il-kriterju.

63.

It-tieni nett, għal dak li jirrigwarda l-Artikolu 296(2) TFUE, għandu jitfakkar li l-obbligu ta’ motivazzjoni ta’ att li jikkawża preġudizzju għandu l-għan, minn naħa, li jipprovdi lill-persuna kkonċernata indikazzjoni suffiċjenti dwar jekk l-att huwiex fondat jew jekk dan huwiex eventwalment ivvizzjat b’xi difett li jippermetti l-kontestazzjoni tal-validità tiegħu quddiem il-qorti tal-Unjoni u min-naħa l-oħra, li jippermetti lil din tal-aħħar teżerċita l-istħarriġ tagħha tal-legalità ta’ dan l-att ( 28 ). F’dan ir-rigward, l-obbligu ta’ motivazzjoni għandu jiġi distint mill-kwistjoni tal-fondatezza tal-motivi ( 29 ).

64.

F’dan il-każ, hekk kif targumenta l-Kummissjoni, għandu jiġi kkonstatat li d-deċiżjoni kontenzjuża kienet motivata b’mod sħiħ. Barra minn hekk, nikkonstata li, billi talbet l-annullament ta’ din id-deċiżjoni, Larko kienet totalment f’pożizzjoni li tikkontesta l-fondatezza tal-motivi li fuqhom ibbażat ruħha l-Kummissjoni fid-deċiżjoni kontenzjuża. Għalhekk, il-Qorti Ġenerali ma injoratx l-obbligu li l-Kummissjoni għandha skont l-Artikolu 296(2) TFUE.

65.

Mill-kunsiderazzjonijiet preċedenti jirriżulta li l-ilment li jirrigwarda l-kriterju ta’ remunerazzjoni, u għalhekk, l-ewwel parti tat-tieni aggravju relattiva għall-miżura Nru 2 għandhom jiġu miċħuda bħala infondati.

66.

Ir-raba’ aggravju huwa indirizzat kontra l-punti 180 sa 195 tas-sentenza appellata u jirrigwarda l-kwantifikazzjoni tal-għajnuna mill-Istat allokata fir-rigward tal-miżuri Nri 2, 4 u 6; dan jirrigwarda b’mod iktar speċifiku l-evalwazzjoni tal-Qorti Ġenerali li l-Kummissjoni setgħet, ġustament, tikkonkludi, skont il-punt 4.1 tal-Komunikazzjoni dwar il-Garanziji, li l-ammont ta’ din l-għajnuna mill-Istat kien ugwali għall-ammont kollu tas-self iggarantit.

67.

Preliminarjament, nosserva li, fir-rigward tal-kwantifikazzjoni tal-għajnuna, l-ewwel paragrafu ta’ dan il-punt 4.1 jistabbilixxi li “[b]ħala punt ta’ prinċipju, l-element ta’ l-għajnuna mill-Istat jiġi meqjus li jkun id-differenza bejn il-prezz xieraq tas-suq tal-garanzija pprovduta […] u l-prezz attwalment imħallas għal dik il-miżura”.

68.

Mill-punt (a) tat-tielet paragrafu tal-imsemmi punt 4.1 jirriżulta li, sabiex jiġi kkalkolat l-element ta’ għajnuna ta’ garanzija, il-Kummissjoni għandha tiddetermina b’mod partikolari jekk min jissellef huwiex f’diffikultà finanzjarja. F’dan ir-rigward, għall-impriżi f’diffikultà, garanti tas-suq, jekk ikun hemm, ikun jeżiġi primjum għoli fil-mument tal-għoti tal-garanzija, fid-dawl tar-rata mistennija ta’ inadempjenza. Jekk il-probabbiltà li min jissellef ma jkunx jista’ jirrimborsa s-self issir partikolarment kbira, huwa possibbli li din ir-rata tas-suq ma tkunx teżisti u li, f’ċirkustanzi eċċezzjonali, l-element ta’ għajnuna tal-garanzija jista’ jirriżulta li jkun għoli daqs l-ammont effettivament kopert minn dik il-garanzija ( 30 ).

69.

Essenzjalment, Larko targumenta li, billi qieset li l-kwantifikazzjoni fid-deċiżjoni kontenzjuża tal-ammont tal-għajnuna li għandu jiġi rkuprat kienet konformi mal-Artikolu 14(1) tar-Regolament Nru 659/1999 u mal-punt (a) tat-tielet paragrafu tal-punt 4.1 tal-Komunikazzjoni dwar il-Garanziji, il-Qorti Ġenerali kisret l-imsemmi Artikolu 14(1), kif ukoll l-Artikolu 108(2) TFUE u l-Artikolu 296(2) TFUE.

70.

Insostenn ta’ dan l-aggravju, Larko tressaq diversi argumenti, li fil-fehma tiegħi, ma tantx jidhru stutturati u ċari. Kif nifhimhom jiena, dawn l-argumenti jirrigwardaw essenzjalment żewġ elementi: minn naħa, l-evalwazzjoni tal-kwistjoni tal-eżistenza ta’ “ċirkostanzi eċċezzjonali” fis-sens tal-punt 4.1 tal-Komunikazzjoni dwar il-Garanziji u, min-naħa l-oħra, l-evalwazzjoni li tipprovdi li l-element ta’ għajnuna tal-garanziji kien ugwali għall-ammont kopert minn dawn il-garanziji, minkejja l-fatt li l-Istat Grieg ma kellux jagħmel ħlasijiet fir-rigward ta’ dawn il-garanziji.

71.

Fir-rigward tal-ewwel element, Larko tallega li l-Qorti Ġenerali wettqet diversi żbalji ta’ liġi billi qieset, fil-punt 193 tas-sentenza appellata, li l-Kummissjoni kienet tinsab fil-presenza ta’ “ċirkostanzi eċċezzjonali” fis-sens tal-punt 4.1 tal-Komunikazzjoni dwar il-Garanziji ( 31 ).

72.

Minn naħa, il-Qorti Ġenerali ssostitwixxiet il-motivazzjoni tad-deċiżjoni kontenzjuża, li fiha nnifisha kienet ineżistenti jew tal-inqas insuffiċjenti, liema nuqqas kien ġie rrilevat mill-Qorti Ġenerali kemm fil-punt 189 kif ukoll fil-punti 192 u 194 tas-sentenza appellata. Il-motivazzjoni tal-Qorti Ġenerali f’dan ir-rigward hija wkoll kontradittorja u insuffiċjenti, u l-Qorti Ġenerali kisret l-Artikolu 296(2) TFUE billi ma annullatx id-deċiżjoni kontenzjuża minkejja l-fatt li kienet żbaljata fid-dritt u nieqsa minn motivazzjoni ( 32 ).

73.

Min-naħa l-oħra, il-Qorti Ġenerali imponiet fuq Larko l-oneru tal-prova fir-rigward tal-kwistjoni tal-eżistenza ta’ “ċirkostanzi eċċezzjonali”. L-evalwazzjoni tal-eżistenza ta’ tali ċirkustanzi għandha tkun motivata b’mod sħiħ u speċjali mill-Kummissjoni, li għandha l-oneru tal-prova, u ma tistax tkun ibbażata fuq id-“dubji” tal-Kummissjoni dwar jekk il-benefiċjarju tal-għajnuna setax, mingħajr il-garanziji, jikseb finanzjament fis-suq. Għalhekk, billi fil-punti 186 sa 188 tas-sentenza appellata qieset li l-motivazzjoni tal-Kummissjoni ċċitata iktar ’il fuq kienet suffiċjenti, il-Qorti Ġenerali wettqet żball ta’ liġi fir-rigward tal-livell ta’ prova meħtieġ ( 33 ).

74.

Fir-rigward tal-ammissibbiltà ta’ dawn l-argumenti, għall-kuntrarju ta’ dak li essenzjalment targumenta l-Kummissjoni, jiena ma nqisx li dawn għandhom jiġu miċħuda bħal inammissibbli. Fil-fatt, fil-fehma tiegħi, dawn ma jirrigwardawx l-istabbiliment tal-fatti ( 34 ) iżda jqajmu kwistjonijiet ta’ liġi li dwarhom il-Qorti tal-Ġustizzja għandha ġurisdizzjoni tiddeċiedi.

75.

Madankollu, fil-fehma tiegħi l-imsemmija argumenti għandhom jiġu miċħuda bħala infondati, hekk kif tipproponi wkoll il-Kummissjoni.

76.

Fil-fehma tiegħi, fil-punt 193 tas-sentenza appellata ( 35 ), il-Qorti Ġenerali la żiedet u lanqas issostitwixxiet elementi li ma jirriżultawx mid-deċiżjoni kontenzjuża stess. Fil-fatt, fl-imsemmi punt, il-Qorti Ġenerali ġustament wettqet qari globali ta’ din id-deċiżjoni billi ddeċidiet, essenzjalment, li minkejja formulazzjoni li tista’ tiġi kkritikata ta’ ċerti premessi tal-imsemmija deċiżjoni, minn din id-deċiżjoni kollha u b’mod partikolari mill-premessi 56 sa 66 jirriżulta li, fiż-żmien meta ngħataw il-miżuri kontenzjużi, Larko kienet tinsab f’qagħda estremament delikata. F’dawn iċ-ċirkustanzi l-Kummissjoni ma tistax tiġi kkritikata li wettqet żball meta kkonkludiet li jeżistu “ċirkostanzi eċċezzjonali” riflessi minn impossibbiltà għal Larko li tirrimborsa s-self kollu bil-mezzi tagħha stess.

77.

F’dan ir-rigward u kif jindika wkoll, essenzjalment, il-punt 191 tas-sentenza appellata, infakkar li l-eżistenza ta’ ċirkustanzi eċċezzjonali fis-sens tal-punt 4.1 tal-Komunikazzjoni dwar il-Garanziji hija riflessa preċiżament mill-impossibbiltà għal min jissellef li jirrimborsa s-self kopert mill-garanzija bil-mezzi tiegħu stess.

78.

Fir-rigward tal-allegati “dubji” tal-Kummissjoni dwar il-possibbiltà ta’ Larko li ssib finanzjament fis-suq fl-assenza ta’ garanziji, il-Qorti Ġenerali, ġustament, ċaħdet dan l-argument tal-appellanti u fil-punti 187 u 188 tas-sentenza appellata qieset li, skont qari tad-deċiżjoni kontenzjuża kollha, jirriżulta b’mod suffiċjentement ċar li l-Kummissjoni kienet tqis li kien, għall-inqas, ftit probabbli li Larko setgħet tikseb self fis-suq mingħajr l-intervent tal-Istat Grieg.

79.

Hekk kif il-Kummissjoni rrepetiet quddiem il-Qorti tal-Ġustizzja, qari tad-deċiżjoni kontenzjuża kollha juri din il-pożizzjoni tal-Kummissjoni. Fir-rigward tal-miżura Nru 2, il-frażi immedjatament wara dik li tinkludi l-kelma “dubjuż” (“doubtful”) tispeċifika li “[f]i kliem ieħor” (“in other words”), il-Kummissjoni tqis li Larko rċeviet vantaġġ ugwali għall-ammont tas-self iggarantit peress li, mingħajr il-garanzija tal-Istat, hija ma kinitx f’pożizzjoni li tirċievi ebda garanzija oħra min-naħa tas-suq. Fir-rigward tal-miżura Nru 6, il-frażi li tinkludi l-kelma “dubjuż” tirreferi għall-istess raġunament adottat għall-miżura Nru 2.

80.

Barra minn hekk, hekk kif tindika l-Qorti Ġenerali fil-punt 193 tas-sentenza appellata, għandu jiġi enfasizzat li l-evalwazzjoni tal-Kummissjoni li tirrigwarda l-eżistenza ta’ ċirkustanzi eċċezzjonali qatt ma kienet ikkontestata la mill-awtoritajiet Griegi u lanqas mill-appellanti, matul il-proċedura amministrattiva.

81.

Fil-fehma tiegħi, għar-raġunijiet indikati iktar ’il fuq, huwa ċar li l-Qorti Ġenerali la ssostitwixxiet il-motivazzjoni tal-Kummissjoni u lanqas imponiet fuq l-appellanti l-oneru tal-prova fir-rigward tal-eżistenza ta’ “ċirkostanzi eċċezzjonali”. Barra minn hekk, il-motivazzjoni tal-Qorti Ġenerali dwar dan il-punt ma hijiex kontradittorja. Fil-fatt, il-fatt li l-Qorti Ġenerali tinvoka ċerti formulazzjonijiet li ma jistgħux jiġu kkritikati u lanqas huma lakuniċi fil-motivazzjoni tal-Kummissjoni ma huwiex f’kontradizzjoni mal-konklużjoni tal-Qorti Ġenerali li l-imsemmija motivazzjoni ma kinitx ivvizzjata bi żbalji ta’ liġi, u dan minkejja tali formulazzjonijiet.

82.

Fir-rigward tal-Artikolu 296(2) TFUE, għandu jiġi kkonstatat li d-deċiżjoni kontenzjuża kienet motivata b’mod sħiħ ( 36 ). Bl-istess mod, fir-rigward tal-motivazzjoni tal-Qorti Ġenerali fis-sentenza appellata, għandu jiġi kkonstatat li din tal-aħħar kienet motivata b’mod sħiħ, fatt li barra minn hekk jirriżulta b’mod ċar mid-diversi argumenti mressqa minn Larko fir-rigward tal-fondatezza tal-motivazzjoni tal-Qorti Ġenerali. Dwar dan il-punt, il-fatt li fuq il-mertu, il-Qorti Ġenerali wasslet għal konklużjoni differenti minn dik tal-appellanti ma jistax fih innifsu jivvizzja s-sentenza appellata b’nuqqas ta’ motivazzjoni ( 37 ).

83.

Għal dak li jirrigwarda t-tieni element, Larko tressaq essenzjalment, tliet argumenti li jirrigwardaw is-sentenza appellata ( 38 ).

84.

L-ewwel nett, filwaqt li fil-mument tal-adozzjoni tad-deċiżjoni kontenzjuża kien ċar li ebda waħda minn dawn il-garanziji ma kienet ġiet mobilizzata, il-Qorti Ġenerali kienet ikkonfermat l-approċċ tal-Kummissjoni li, mingħajr ma indirizzat lill-awtoritajiet Griegi, ikkonstatat biss li hija ma kellhiex provi li jindikaw li l-imsemmija garanziji kienu ġew mobilizzati ( 39 ). Għalhekk il-Kummissjoni kisret l-obbligu tagħha li twettaq eżami diliġenti u imparzjali ta’ fajl fil-kuntest tal-Artikolu 108(2) TFUE.

85.

Għall-kuntrarju ta’ dak li tqis il-Kummissjoni, jiena ma nqisx li dan l-argument huwa inammissibbli. Ċertament, dan huwa bbażat fuq l-istabbiliment tal-fatti, li dwarhom il-Qorti Ġenerali biss għandha ġurisdizzjoni tiddeċiedi ( 40 ). Madankollu, il-kwistjoni dwar jekk il-Qorti Ġenerali kellhiex tieħu inkunsiderazzjoni tali informazzjoni hija kwistjoni ta’ liġi.

86.

Għalhekk, inqis, bħall-Kummissjoni, li dan l-argument għandu jiġi miċħud bħala infondat.

87.

Fil-fatt, l-użu (jew le) tal-garanziji u r-rimbors (jew le) tas-self jirrigwardaw fatti li seħħew wara l-għoti tal-miżuri kontenzjużi u għalhekk ma jistgħux jittieħdu inkunsiderazzjoni, la sabiex il-miżuri jiġu kklassifikai bħala għajnuna u lanqas sabiex jiġi kkwantifikat l-element ta’ għajnuna mogħti minnhom. Il-Qorti Ġenerali wasslet b’mod korrett għal din il-konklużjoni billi fakkret il-ġurisprudenza rilevanti fil-punti 181 u 182 tas-sentenza appellata.

88.

Barra minn hekk, nikkonstata li l-provi invokati mir-rikorrenti li jirrigwardaw ir-rimbors tas-self u l-assenza ta’ użu tal-garanziji ma kinux ġew prodotti lill-Kummissjoni waqt il-proċedura amministrattiva. F’dan ir-rigward, infakkar li l-legalità ta’ deċiżjoni tal-Kummissjoni għandha tiġi evalwata skont elementi ta’ informazzjoni li din tal-aħħar kellha għad-dispożizzjoni tagħha fil-mument li fih hija adottat id-deċiżjoni kontenzjuża ( 41 ).

89.

It-tieni nett, is-sentenza appellata hija vvizzjata b’nuqqas ta’ motivazzjoni, peress li l-Qorti Ġenerali naqset milli teżamina l-osservazzjonijiet tal-appellanti relattivi, minn naħa, għan-natura totalment vinkolanti tad-deċiżjoni kontenzjuża għal dak li jirrigwarda l-ammont li għandu jiġi rkuprat abbażi tas-sentenza Mediaset ( 42 ), u min-naħa l-oħra, għall-fatt li l-Kummissjoni stess ammettiet l-eżistenza ta’ żbalji f’dan ir-rigward fid-deċiżjoni tagħha.

90.

Fir-rigward ta’ dan il-punt, nirrileva li minkejja li, fil-kuntest tal-appell, l-istħarriġ tal-Qorti tal-Ġustizzja għandu l-għan, b’mod partikolari, li jivverifika jekk il-Qorti Ġenerali rrispondietx b’mod suffiċjenti fil-liġi għall-argumenti kollha mressqa mill-appellanti, l-obbligu tal-Qorti Ġenerali li timmotiva d-deċiżjonijiet tagħha ma jistax jiġi interpretat bħala li jimplika li hija għandha twieġeb fid-dettall għal kull argument imressaq minn parti ( 43 ), li, fil-fehma tiegħi, huwa l-każ fil-każ inkwistjoni.

91.

It-tielet nett, il-konsegwenzi li jirriżultaw mill-iffissar tal-ammont tal-għajnuna bħala korrispondenti għall-valur kollu tas-self iggarantit meta ma sarx użu mill-garanziji huma kontradittorji mal-ġurisprudenza tal-Qorti tal-Ġustizzja li abbażi tagħha d-deċiżjonijiet tal-Kummissjoni li jordnaw l-irkupru ta’ għajnuna mill-Istat huma intiżi sabiex jistabbilixxu mill-ġdid is-sitwazzjoni preċedenti u ma jistgħux jikkostitwixxu sanzjoni li tmur lil hinn mill-vantaġġ effettivament riċevut ( 44 ).

92.

Barra minn hekk, dwar dan il-punt nirrileva li, minbarra l-argumenti li diġà indikajt fil-punti 87 u 88 ta’ dawn il-konklużjonijiet u li huma suffiċjenti sabiex it-tielet argument imressaq minn Larko jiġi miċħud, jidhirli li l-allegazzjoni tal-appellanti li hija għandha, biex ngħidu hekk, tħallas l-għajnuna darbtejn hija żbaljata. Fil-fatt, hekk kif tinvoka l-Kummissjoni, jidher li Larko tħawwad żewġ obbligi ta’ ħlas differenti imposti fuq impriża li rċeviet għajnuna fil-forma ta’ garanzija mill-Istat. Minn naħa, l-impriża benefiċjarja għandha tirrimborsa lill-Istat l-ammont tal-għajnuna li hija rċeviet. Min-naħa l-oħra, jibqa’ naturalment l-obbligu li din l-impriża tirrimborsa lill-bank is-self li hija kisbet grazzi għal din il-garanzija tal-Istat.

93.

Minn dawn il-kunsiderazzjonijiet kollha jirriżulta li r-raba’ aggravju għandu jiġi miċħud bħala infondat.

94.

Fid-dawl tal-kunsiderazzjonijiet preċedenti, u mingħajr ma tittieħed deċiżjoni minn qabel fir-rigward tal-fondatezza tal-aggravji l-oħra, nipproponi lill-Qorti tal-Ġustizzja tiċħad l-ewwel parti tat-tieni aggravju kif ukoll ir-raba’ aggravju bħala infondati. L-ispejjeż huma rriżervati.