This document is an excerpt from the EUR-Lex website
Document 52026PC0063
Proposal for a COUNCIL DECISION authorising the Member States to accept, in the interest of the European Union, the accession of Cabo Verde to the 1980 Hague Convention on the Civil Aspects of International Child Abduction
Proposta għal DEĊIŻJONI TAL-KUNSILL li tawtorizza lill-Istati Membri jaċċettaw, fl-interess tal-Unjoni Ewropea, l-adeżjoni ta’ Cabo Verde mal-Konvenzjoni ta’ The Hague tal-1980 dwar l-Aspetti Ċivili tal-Ħtif Internazzjonali ta’ Minuri
Proposta għal DEĊIŻJONI TAL-KUNSILL li tawtorizza lill-Istati Membri jaċċettaw, fl-interess tal-Unjoni Ewropea, l-adeżjoni ta’ Cabo Verde mal-Konvenzjoni ta’ The Hague tal-1980 dwar l-Aspetti Ċivili tal-Ħtif Internazzjonali ta’ Minuri
COM/2026/63 final
IL-KUMMISSJONI EWROPEA
Brussell, 9.2.2026
COM(2026) 63 final
2026/0041(NLE)
Proposta għal
DEĊIŻJONI TAL-KUNSILL
li tawtorizza lill-Istati Membri jaċċettaw, fl-interess tal-Unjoni Ewropea, l-adeżjoni ta’ Cabo Verde mal-Konvenzjoni ta’ The Hague tal-1980 dwar l-Aspetti Ċivili tal-Ħtif Internazzjonali ta’ Minuri
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
L-għan tal-Konvenzjoni ta’ The Hague tal-25 ta’ Ottubru 1980 dwar l-Aspetti Ċivili tal-Ħtif Internazzjonali ta’ Minuri (minn hawn ’il quddiem: “il-Konvenzjoni tal-1980”), sa issa rratifikata minn 103 pajjiżi, inklużi l-Istati Membri kollha tal-UE, huwa li jerġa’ jkun hemm l-istatus quo permezz tar-ritorn fil-pront ta’ minuri li jitneħħew jew jinżammu b’mod illeċitu permezz ta’ sistema ta’ kooperazzjoni bejn l-awtoritajiet ċentrali maħtura mill-Partijiet Kontraenti tagħha.
Minħabba li l-prevenzjoni tal-ħtif ta’ minuri hija parti essenzjali mill-politika tal-UE biex tippromwovi d-drittijiet tat-tfal, l-Unjoni Ewropea hija attiva fil-livell internazzjonali biex ittejjeb l-applikazzjoni tal-Konvenzjoni tal-1980 u tinkoraġġixxi Stati terzi biex jaderixxu magħha.
Cabo Verde ddepożita l-istrument ta’ adeżjoni mal-Konvenzjoni ta’ The Hague tal-1980 fl-4 ta’ Ottubru 2022. Il-Konvenzjoni daħlet fis-seħħ f’Cabo Verde fl-1 ta’ Jannar 2023.
L-Artikolu 38(4) tal-Konvenzjoni tal-1980 jistipula li l-Konvenzjoni tapplika bejn il-pajjiż aderenti u dawk l-Istati Kontraenti li jkunu ddikjaraw li aċċettaw l-adeżjoni.
Fl-Opinjoni 1/13 1(1), il-Qorti tal-Ġustizzja tal-Unjoni Ewropea ddeċidiet li l-kompetenza esklużiva tal-Unjoni Ewropea tkopri l-aċċettazzjoni tal-adeżjoni ta’ Stat terz mal-Konvenzjoni ta’ The Hague tal-1980 dwar l-Aspetti Ċivili tal-Ħtif Internazzjonali ta’ Minuri.
Il-Qorti insistiet fuq il-ħtieġa għall-uniformità dwar il-kwistjoni fil-livell tal-UE, biex tiġi evitata ġeometrija varjabbli fost l-Istati Membri.
Minħabba li l-kwistjoni tal-ħtif internazzjonali ta’ minuri taqa’ fil-kompetenza esterna esklużiva tal-Unjoni Ewropea, id-deċiżjoni dwar jekk tiġix aċċettata l-adeżjoni ta’ Cabo Verde għandha tittieħed fil-livell tal-UE permezz ta’ Deċiżjoni tal-Kunsill. B’hekk, l-Istati Membri tal-Unjoni Ewropea għandhom jiddepożitaw id-dikjarazzjoni ta’ aċċettazzjoni dwar l-adeżjoni ta’ Cabo Verde fl-interess tal-Unjoni Ewropea.
L-aċċettazzjoni tal-Istati Membri tal-Unjoni Ewropea tagħmel il-Konvenzjoni ta’ The Hague tal-1980 applikabbli bejn Cabo Verde u l-Istati Membri tal-UE minbarra d-Danimarka.
•Konsistenza mad-dispożizzjonijiet ta’ politika eżistenti fil-qasam ta’ politika
F’dak li jirrigwarda l-ħtif ta’ minuri mill-ġenituri, il-Konvenzjoni ta’ The Hague tal-1980 hija l-kontroparti internazzjonali tar-Regolament tal-Kunsill Nru 2019/1111 (magħruf bħala r-Regolament Brussell IIb) 2(2), li huwa l-pedament tal-kooperazzjoni ġudizzjarja tal-UE fi kwistjonijiet matrimonjali u kwistjonijiet ta’ responsabbiltà tal-ġenituri.
Wieħed mill-objettivi ewlenin tar-Regolament huwa li jiskoraġġixxi l-ħtif ta’ minuri minn Stat Membru għall-ieħor billi jistabbilixxi proċeduri biex jiġi żgurat ir-ritorn fil-pront tal-minuri lejn l-Istat Membru tar-residenza abitwali tagħhom. Għal dan l-għan, ir-Regolament Brussell IIb jinkludi fil-Kapitolu III l-proċedura stabbilita fil-Konvenzjoni ta’ The Hague tal-1980 u jikkumplementaha billi jiċċara xi aspetti tagħha, b’mod partikolari s-smigħ tal-minuri, il-perjodu ta’ żmien biex tittieħed deċiżjoni wara li tiġi ppreżentata applikazzjoni għar-ritorn, u r-raġunijiet li ma jsirx ir-ritorn tal-minuri.
Fil-livell internazzjonali, l-Unjoni Ewropea tappoġġa l-adeżjoni ta’ Stati terzi mal-Konvenzjoni tal-1980 sabiex l-Istati Membri tagħha jibbażaw ruħhom fuq qafas legali komuni biex jittrattaw il-ħtif internazzjonali ta’ minuri.
Bejn Ġunju 2015 u Diċembru 2022 diġà ġew adottati 22 Deċiżjoni tal-Kunsill sabiex tiġi aċċettata l-adeżjoni mal-Konvenzjoni ta’ The Hague tal-1980 dwar il-Ħtif Internazzjonali ta’ Minuri ta’ 30 pajjiż terz (il-Marokk, Singapore, il-Federazzjoni Russa, l-Albanija, Andorra, is-Seychelles, l-Armenja, ir-Repubblika tal-Korea, il-Każakistan, il-Perù, il-Georgia, l-Afrika t’Isfel, iċ-Ċilì, l-Iżlanda, il-Bahamas, il-Panama, l-Urugwaj, il-Kolombja, El Salvador u San Marino, ir-Repubblika Dominicana, il-Belarussja, l-Użbekistan, il-Honduras, l-Ekwador u l-Ukrajna, il-Ġamajka, il-Bolivja, il-Filippini u t-Tuneżija) 3(3).
•Konsistenza ma’ politiki oħra tal-Unjoni
Din il-proposta hija marbuta b’mod ċar mal-objettiv ġenerali minqux fl-Artikolu 3 tat-Trattat dwar l-Unjoni Ewropea, li jiġu protetti d-drittijiet tat-tfal. Is-sistema tal-Konvenzjoni ta’ The Hague tal-1980 hija mfassla biex tipproteġi lill-minuri mill-effetti ta’ ħsara ta’ ħtif mill-ġenituri u biex tiżgura li l-minuri jkunu jistgħu jżommu kuntatt maż-żewġ ġenituri, pereżempju billi tiżgura l-eżerċizzju effettiv tad-drittijiet ta’ aċċess. Tajjeb li tissemma’ wkoll ir-rabta mal-promozzjoni tal-użu tal-medjazzjoni fis-soluzzjoni ta’ tilwim familjari transfruntier.
Id-Direttiva dwar ċerti aspetti ta’ medjazzjoni f’materji ċivili u kummerċjali 4(4) tapplika wkoll għal-liġi tal-familja fl-ispazju ġudizzjarju Ewropew komuni. Il-Konvenzjoni ta’ The Hague tal-1980 tinkoraġġixxi r-riżoluzzjoni amikevoli ta’ tilwim familjari. Waħda mill-Gwidi għall-Prattika Tajba skont il-Konvenzjoni ta’ The Hague tal-1980, ippubblikata mill-Konferenza ta’ The Hague dwar id-Dritt Internazzjonali Privat, hija ddedikata għall-użu tal-medjazzjoni għar-riżoluzzjoni tat-tilwim familjari internazzjonali li jikkonċerna lill-minuri, li taqa’ fil-kamp ta’ applikazzjoni tal-Konvenzjoni. Fuq inizjattiva tal-Kummissjoni Ewropea, minbarra fl-Ingliż u fil-Franċiż, din il-Gwida ġiet tradotta fil-lingwi kollha tal-UE, u anki fl-Għarbi biex jiġi sostnut id-djalogu ma’ Stati li għadhom ma rratifikawx/aderewx mal-Konvenzjoni u tingħata għajnuna biex jinstabu mezzi konkreti kif jiġu indirizzati l-problemi maħluqa mill-ħtif internazzjonali ta’ minuri. 5(5)
2.BAŻI LEGALI, SUSSIDJARJETÀ U PROPORZJONALITÀ
•Bażi legali
F’konformità mal-Artikolu 38 tal-Konvenzjoni ta’ The Hague tal-1980, id-dikjarazzjoni ta’ aċċettazzjoni tal-adeżjoni hija parti kostitwenti minn ftehim internazzjonali konkluż mal-Istat aderenti.
Il-bażi legali sostantiva għal deċiżjoni skont l-Artikolu 218(6) TFUE tiddependi primarjament fuq l-objettiv u l-kontenut ta’ ftehim internazzjonali li għandu jiġi konkluż. Minħabba l-fatt li l-objettiv u l-kontenut ewlenin tal-Konvenzjoni ta’ The Hague tal-1980 huma li jiskoraġġixxu l-ħtif ta’ minuri mill-ġenituri, u għalhekk is-suġġett huwa l-liġi tal-familja, il-bażi legali sostantiva hija l-Artikolu 81(3) TFUE. L-Artikolu 81(3) TFUE jipprevedi li l-miżuri li jikkonċernaw il-liġi tal-familja b’implikazzjonijiet transfruntiera għandhom jiġu stabbiliti mill-Kunsill, li jaġixxi f’konformità mal-proċedura leġiżlattiva speċjali. Il-Kunsill għandu jaġixxi b’mod unanimu wara li jikkonsulta mal-Parlament Ewropew.
Peress li l-Artikolu 81 TFUE huwa l-bażi legali sostantiva, il-Kunsill għandu jadotta d-deċiżjoni li tawtorizza lill-Istati Membri jaċċettaw, fl-interess tal-Unjoni, l-adeżjoni ta’ pajjiż terz mal-Konvenzjoni tal-1980 wara li jikkonsulta lill-Parlament Ewropew, f’konformità mal-Artikolu 218(6), il-punt (b), TFUE.
Skont l-Artikolu 218(8), it-tieni subparagrafu, TFUE, il-Kunsill jaġixxi b’unanimità meta l-ftehim ikopri qasam li għalih tkun meħtieġa l-unanimità għall-adozzjoni ta’ att tal-Unjoni.
Għalhekk, il-bażi legali proċedurali għad-deċiżjoni proposta hija l-Artikolu 218(6), it-tieni subparagrafu, il-punt (b), u l-Artikolu 218(8), it-tieni subparagrafu, TFUE.
L-Irlanda hija marbuta bir-Regolament (UE) 2019/1111 (ir-Regolament Brussell IIb) u għalhekk qed tieħu sehem fl-adozzjoni u l-applikazzjoni ta’ din id-Deċiżjoni.
F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka mhijiex qed tieħu sehem fl-adozzjoni ta’ din id-Deċiżjoni u mhijiex marbuta biha jew soġġetta għall-applikazzjoni tagħha.
•Sussidjarjetà (għall-kompetenza mhux esklużiva)
Mhux Applikabbli
•Proporzjonalità
Din il-proposta hija mfassla fuq il-mudell tad-Deċiżjonijiet tal-Kunsill li diġà ġew adottati dwar l-istess suġġett u ma tmurx lil hinn minn dak li huwa meħtieġ biex jintlaħaq l-objettiv ta’ azzjoni koerenti tal-UE fil-kwistjoni tal-ħtif internazzjonali ta’ minuri billi tiżgura li l-Istati Membri tal-Unjoni Ewropea jaċċettaw l-adeżjoni ta’ Cabo Verde mal-Konvenzjoni ta’ The Hague tal-1980 f’perjodu ta’ żmien stabbilit.
•Għażla tal-istrument
Din il-proposta għal Deċiżjoni tal-Kunsill hija ppreżentata f’konformità tal-Artikolu 218(6) TFUE, li jipprevedi l-adozzjoni mill-Kunsill ta’ deċiżjoni li tikkonkludi l-ftehim. Ma jeżisti ebda strument legali ieħor li jista’ jintuża sabiex jintlaħaq l-objettiv espress minn din il-proposta.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Mhux applikabbli
•Konsultazzjonijiet mal-partijiet ikkonċernati
L-Istati Membri kollha tal-Unjoni Ewropea, ikkonsultati mill-Kummissjoni fil-qafas tal-Grupp ta’ Ħidma tal-Kunsill dwar Materji ta’ Dritt Ċivili dwar ir-rieda tagħhom li jaċċettaw l-adeżjoni ta’ Cabo Verde mal-Konvenzjoni ta’ The Hague tal-1980, taw opinjoni favorevoli.
•Ġbir u użu ta’ għarfien espert
Il-Kummissjoni ġabret informazzjoni rilevanti dwar l-implimentazzjoni tal-Konvenzjoni mill-Konferenza ta’ The Hague dwar id-Dritt Internazzjonali Privat, id-Delegazzjoni tal-UE f’Cabo Verde u l-Uffiċċju tal-Prosekutur Ġenerali, u d-Dipartiment Ċentrali tal-Kooperazzjoni u l-Liġi Komparattiva maħtur bħala Awtorità Ċentrali skont il-Konvenzjoni ta’ The Hague tal-1980.
•Valutazzjoni tal-impatt
Rigward it-22 Deċiżjoni tal-Kunsill, li diġà ġew adottati bejn l-2015 u l-2022, li jikkonċernaw l-aċċettazzjoni tal-adeżjoni ta’ diversi Stati terzi mal-Konvenzjoni ta’ The Hague tal-1980, ma twettqet l-ebda valutazzjoni tal-impatt speċifika.
Madankollu, il-livell ta’ implimentazzjoni tal-Konvenzjoni ġie eżaminat permezz tat-tweġibiet mogħtija minn Cabo Verde għall-kwestjonarju tal-UE u t-tlestija tal-kwestjonarju għall-pajjiżi aderenti ġodda żviluppat mill-Konferenza ta’ The Hague dwar id-Dritt Internazzjonali Privat.
Matul id-diskussjonijiet fil-Grupp ta’ Ħidma dwar Materji ta’ Dritt Ċivili, irriżulta li l-esperjenzi ta’ xi Stati Membri (pereżempju l-Portugall) mas-sistema legali ta’ Cabo Verde huma pożittivi. Fil-fatt, id-dipendenza fuq ir-relazzjonijiet konvenzjonali mal-Istati Membri tal-UE hija meqjusa importanti ħafna mill-awtoritajiet f’Cabo Verde. Qafas legali komuni mal-Istati Membri kollha tal-UE, li huwa rrappreżentat mill-Konvenzjoni ta’ The Hague tal-1980, jgħin fit-trattament u r-riżoluzzjoni ta’ każijiet transfruntiera ta’ ħtif.
L-azzjonijiet ta’ taħriġ huma ppjanati f’kooperazzjoni mal-pajjiżi li jitkellmu bil-Portugiż, Partijiet għall-Konvenzjoni (il-Portugall u l-Brażil). L-UNICEF se tkun involuta wkoll fl-implimentazzjoni tal-Konvenzjonijiet ta’ The Hague dwar it-Tfal.
Dan l-aħħar Cabo Verde aderixxa wkoll mal-Konvenzjoni tal-1996 dwar il-Protezzjoni tat-Tfal u mal-Konvenzjoni tal-2007 dwar l-Appoġġ għat-Tfal u s-sistema legali tiegħu, ir-rispett tal-istat tad-dritt u d-drittijiet fundamentali ġew eżaminati fil-kuntest tal-proċeduri ta’ ebda oġġezzjoni li jittrattaw l-adeżjonijiet ma’ dawn il-Konvenzjonijiet. Il-valutazzjoni wasslet għall-konklużjoni li ma għandha titqajjem ebda oġġezzjoni kontra l-adeżjoni ta’ Cabo Verde mal-Konvenzjoni tal-1996 dwar il-Protezzjoni tat-Tfal u mal-Konvenzjoni tal-2007 dwar l-Appoġġ għat-Tfal.
•Idoneità regolatorja u simplifikazzjoni
Mhux applikabbli
•Drittijiet fundamentali
Il-ħtif mill-ġenituri jmur direttament kontra d-drittijiet tat-tfal, b’mod partikolari d-dritt li jkunu protetti u d-dritt li jżommu kuntatt maż-żewġ ġenituri. Bl-istabbiliment ta’ qafas legali li jipprova jiskoraġġixxi l-ħtif ta’ minuri mill-ġenituri u jagħti lill-minuri l-opportunità li jinstemgħu, il-Konvenzjoni tal-1980 irrispettat id-drittijiet tat-tfal, li huma drittijiet fundamentali tal-bniedem rikonoxxuti mill-Konvenzjoni tan-Nazzjonijiet Uniti dwar id-Drittijiet tat-Tfal (UNCRC, United Nations Convention on the Rights of the Child). Din il-proposta għandha l-għan li tistabbilixxi dan il-qafas legali bejn Cabo Verde u l-Istati Membri tal-UE.
4.IMPLIKAZZJONIJIET BAĠITARJI
Id-Deċiżjoni tal-Kunsill proposta ma għandha ebda implikazzjoni baġitarja.
5.ELEMENTI OĦRAJN
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar
Mhux applikabbli
•Spjegazzjoni fid-dettall tad-dispożizzjonijiet speċifiċi tal-proposta
Mhux applikabbli
2026/0041 (NLE)
Proposta għal
DEĊIŻJONI TAL-KUNSILL
li tawtorizza lill-Istati Membri jaċċettaw, fl-interess tal-Unjoni Ewropea, l-adeżjoni ta’ Cabo Verde mal-Konvenzjoni ta’ The Hague tal-1980 dwar l-Aspetti Ċivili tal-Ħtif Internazzjonali ta’ Minuri
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 81(3), flimkien mal-Artikolu 218(6), it-tieni subparagrafu, il-punt (b), u l-Artikolu 218(8), it-tieni subparagrafu, tiegħu,
Wara li kkunsidra l-proposta tal-Kummissjoni Ewropea,
Wara li kkunsidra l-opinjoni tal-Parlament Ewropew 6(1),
Billi:
(1)L-Unjoni stabbiliet bħala wieħed mill-għanijiet tagħha l-promozzjoni tal-protezzjoni tad-drittijiet tat-tfal, kif iddikjarat fl-Artikolu 3 tat-Trattat dwar l-Unjoni Ewropea. Il-miżuri għall-protezzjoni ta’ minuri kontra t-tneħħija jew iż-żamma b’mod illeċitu huma parti essenzjali minn dik il-politika.
(2)Ir-Regolament tal-Kunsill (UE) 2019/1111 7 (2) għandu l-għan li jipproteġi lill-minuri mill-effetti ta’ ħsara tat-tneħħija jew iż-żamma b’mod illeċitu u li jistabbilixxi proċeduri biex jiżgura r-ritorn fil-pront tagħhom lejn l-Istat tar-residenza abitwali tagħhom, kif ukoll li jiżgura l-protezzjoni tad-drittijiet ta’ aċċess u tad-drittijiet ta’ kustodja.
(3) Ir-Regolament (UE) 2019/1111 jikkomplementa u jirrinforza lill-Konvenzjoni ta’ The Hague tal-25 ta’ Ottubru 1980 dwar l-Aspetti Ċivili tal-Ħtif Internazzjonali ta’ Minuri (“il-Konvenzjoni ta’ The Hague tal-1980”) li tistabbilixxi, fil-livell internazzjonali, sistema ta’ obbligi u kooperazzjoni fost l-Istati Kontraenti u bejn l-awtoritajiet ċentrali u għandha l-għan li tiżgura r-ritorn fil-pront ta’ minuri mneħħija jew miżmuma b’mod illeċitu.
(4)L-Istati Membri kollha huma parti għall-Konvenzjoni ta’ The Hague tal-1980.
(5)L-Unjoni tinkoraġġixxi lil stati terzi jaderixxu mal-Konvenzjoni ta’ The Hague tal-1980 u tappoġġa l-implimentazzjoni korretta tal-Konvenzjoni ta’ The Hague tal-1980 billi tieħu sehem, flimkien mal-Istati Membri, fost oħrajn, fil-kummissjonijiet speċjali organizzati fuq bażi regolari mill-Konferenza ta’ The Hague dwar id-Dritt Internazzjonali Privat.
(6)Qafas legali komuni applikabbli bejn l-Istati Membri u stati terzi jista’ jkun l-aħjar soluzzjoni għal każijiet sensittivi ta’ ħtif internazzjonali ta’ minuri.
(7)Il-Konvenzjoni ta’ The Hague tal-1980 tistipula li hija tapplika bejn l-Istat aderenti u dawk l-Istati Kontraenti li jkunu ddikjaraw li aċċettaw l-adeżjoni.
(8)Il-Konvenzjoni ta’ The Hague tal-1980 ma tippermettix li organizzazzjonijiet reġjonali għall-integrazzjoni ekonomika bħall-Unjoni jsiru partijiet għaliha. Għalhekk, l-Unjoni la tista’ taderixxi mal-Konvenzjoni ta’ The Hague tal-1980, u lanqas ma tista’ tiddepożita dikjarazzjoni ta’ aċċettazzjoni ta’ Stat aderenti.
(9)Skont l-Opinjoni 1/13 tal-Qorti tal-Ġustizzja tal-Unjoni Ewropea 8 (3), id-dikjarazzjonijiet ta’ aċċettazzjoni skont il-Konvenzjoni ta’ The Hague tal-1980 jaqgħu fil-kompetenza esterna esklużiva tal-Unjoni.
(10)Cabo Verde ddepożita l-istrument tiegħu ta’ adeżjoni mal-Konvenzjoni ta’ The Hague tal-1980 fl-4 ta’ Ottubru 2022. Il-Konvenzjoni ta’ The Hague tal-1980 daħlet fis-seħħ għal Cabo Verde fl-1 ta’ Jannar 2023.
(11)Valutazzjoni tas-sitwazzjoni f’Cabo Verde wasslet għall-konklużjoni li l-Istati Membri jinsabu f’pożizzjoni li jaċċettaw, fl-interess tal-Unjoni, l-adeżjoni ta’ Cabo Verde skont it-termini tal-Konvenzjoni ta’ The Hague tal-1980.
(12)Għalhekk, jenħtieġ li l-Istati Membri jkunu awtorizzati jiddepożitaw id-dikjarazzjonijiet tagħhom ta’ aċċettazzjoni tal-adeżjoni ta’ Cabo Verde fl-interess tal-Unjoni f’konformità mat-termini stabbiliti f’din id-Deċiżjoni.
(13)L-Irlanda hija marbuta bir-Regolament (UE) 2019/1111 u għalhekk qed tieħu sehem fl-adozzjoni u l-applikazzjoni ta’ din id-Deċiżjoni.
(14)F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka mhijiex qed tieħu sehem fl-adozzjoni ta’ din id-Deċiżjoni u mhijiex marbuta biha jew soġġetta għall-applikazzjoni tagħha,
ADOTTA DIN ID-DEĊIŻJONI:
Artikolu 1
1.L-Istati Membri huma b’dan awtorizzati jaċċettaw l-adeżjoni ta’ Cabo Verde mal-Konvenzjoni ta’ The Hague tal-1980 fl-interess tal-Unjoni.
2. L-Istati Membri għandhom, mhux aktar tard minn … [tnax-il xahar wara d-data tal-adozzjoni ta’ din id-Deċiżjoni] jiddepożitaw dikjarazzjoni ta’ aċċettazzjoni tal-adeżjoni ta’ Cabo Verde mal-Konvenzjoni ta’ The Hague tal-1980 fl-interess tal-Unjoni, li għandha tiġi fformulata kif ġej: “[L-isem sħiħ tal-ISTAT MEMBRU] jiddikjara/tiddikjara li jaċċetta/taċċetta l-adeżjoni ta’ Cabo Verde mal-Konvenzjoni ta’ The Hague tal-25 ta’ Ottubru 1980 dwar l-Aspetti Ċivili tal-Ħtif Internazzjonali ta’ Minuri, f’konformità mad-Deċiżjoni tal-Kunsill (UE)...
3.L-Istati Membri għandhom jinfurmaw lill-Kunsill u lill-Kummissjoni bid-depożitu tad-dikjarazzjonijiet tagħhom ta’ aċċettazzjoni tal-adeżjoni ta’ Cabo Verde u għandhom jikkomunikaw lill-Kummissjoni t-test ta’ dawk id-dikjarazzjonijiet fi żmien xahrejn minn meta jiddepożitawhom.
Artikolu 2
Din id-Deċiżjoni għandha tidħol fis-seħħ fil-jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Brussell,
Għall-Kunsill
Il-President
[...]
DIKJARAZZJONI FINANZJARJA U DIĠITALI LEĠIŻLATTIVA
(1)QAFAS TAL-PROPOSTA/TAL-INIZJATTIVA
Titolu tal-proposta/tal-inizjattiva
Proposta għal Deċiżjoni tal-Kunsill li tawtorizza lill-Istati Membri jaċċettaw, fl-interess tal-Unjoni Ewropea, l-adeżjoni ta’ Cabo Verde mal-Konvenzjoni ta’ The Hague tal-1980 dwar l-Aspetti Ċivili tal-Ħtif Internazzjonali ta’ Minuri
Qasam/Oqsma ta’ politika kkonċernat(i)
Ġustizzja
Objettiv(i)
Objettiv(i) ġenerali
Din il-proposta għandha l-objettiv li tawtorizza lill-Istati Membri jaċċettaw, fl-interess tal-Unjoni Ewropea, l-adeżjoni ta’ Cabo Verde mal-Konvenzjoni ta’ The Hague tal-1980 dwar l-Aspetti Ċivili tal-Ħtif Internazzjonali ta’ Minuri, f’konformità mal-Opinjoni 1/13 tal-QĠUE biex jiġu żgurati ċ-ċertezza legali u l-prevedibbiltà fil-livell internazzjonali u dak Ewropew.
Objettiv(i) speċifiku/speċifiċi
L-awtorizzazzjoni lill-Istati Membri tal-UE biex jaċċettaw l-adeżjoni ta’ Cabo Verde mal-Konvenzjoni ta’ The Hague tal-1980 dwar il-Ħtif Internazzjonali ta’ Minuri.
Riżultat(i) u impatt mistennija
Speċifika l-effetti li l-proposta/l-inizjattiva għandu jkollha fuq il-benefiċjarji/il-gruppi fil-mira.
Il-Konvenzjoni ta’ The Hague tal-1980 dwar il-Ħtif Internazzjonali ta’ Minuri tkun applikabbli bejn l-Istati Membri kollha (bl-eċċezzjoni tad-Danimarka) u Cabo Verde.
Indikaturi tal-prestazzjoni
Speċifika l-indikaturi għall-monitoraġġ tal-progress u tal-kisbiet.
M/A
Il-proposta/L-inizjattiva hija relatata ma’:
☑ azzjoni ġdida
☐ azzjoni ġdida b’segwitu għal proġett pilota/azzjoni preparatorja 9(1)
☐ l-estensjoni ta’ azzjoni eżistenti
☐ fużjoni jew ridirezzjonar ta’ azzjoni waħda jew aktar lejn azzjoni oħra/ġdida
Raġunijiet għall-proposta/għall-inizjattiva
Rekwiżit(i) li jrid(u) jiġi/u ssodisfat(i) fuq terminu qasir jew twil inkluża kronoloġija dettaljata għat-tnedija tal-implimentazzjoni tal-inizjattiva
M/A
Valur miżjud tal-involviment tal-UE (dan jista’ jirriżulta minn fatturi differenti, pereż. gwadanji mill-koordinazzjoni, ċertezza legali, aktar effettività jew komplementarjetajiet). Għall-finijiet ta’ din it-taqsima, “valur miżjud tal-involviment tal-UE” huwa l-valur li jirriżulta mill-azzjoni tal-UE, li huwa addizzjonali għall-valur illi kieku kien jinħoloq mill-Istati Membri waħedhom.
Raġunijiet għall-azzjoni fil-livell tal-UE (ex ante)
L-awtorizzazzjoni lill-Istat Membru tal-UE tikkonforma ma’ inizjattivi preċedenti tal-istess tip b’segwitu għall-Opinjoni 1/13 tal-Qorti tal-Ġustizzja tal-Unjoni Ewropea. Din taqa’ fil-kompetenza esterna esklużiva tal-UE skont l-Artikolu 3(2) TFUE. L-awtorizzazzjoni tista’ tingħata biss mill-Kunsill fuq proposta mill-Kummissjoni u b’hekk hija kompetenza esklużiva min-natura tagħha, li mhijiex soġġetta għall-prinċipju tas-sussidjarjetà.
Valur miżjud tal-UE li mistenni jiġi ġġenerat (ex post)
Ir-rispett għat-Trattati tal-UE u l-ġurisprudenza tal-Qorti tal-Ġustizzja tal-Unjoni Ewropea jiġi żgurat.
Tagħlimiet meħuda minn esperjenzi simili fl-imgħoddi
Din hija t-23 proposta tal-istess tip.
Kompatibbiltà mal-Qafas Finanzjarju Pluriennali u sinerġiji possibbli ma’ strumenti xierqa oħra
Din il-proposta ma għandhiex implikazzjonijiet baġitarji.
Valutazzjoni tal-għażliet differenti ta’ finanzjament disponibbli, inkluż l-ambitu għar-riallokazzjoni
Din il-proposta ma għandhiex implikazzjonijiet baġitarji.
Durata tal-proposta/tal-inizjattiva u tal-impatt finanzjarju tagħha
☐ durata limitata
☐ fis-seħħ minn [JJ/XX]SSSS sa [JJ/XX]SSSS
☐ impatt finanzjarju minn SSSS sa SSSS għall-approprjazzjonijiet ta’ impenn u minn SSSS sa SSSS għall-approprjazzjonijiet ta’ pagament.
☐ durata mhux limitata
Implimentazzjoni b’perjodu ta’ tnedija minn SSSS sa SSSS,
segwita minn operazzjoni fuq skala sħiħa.
Metodu/i ta’ implimentazzjoni tal-baġit ippjanat(i) 10(2)
☐ Ġestjoni diretta mill-Kummissjoni
☐ mid-dipartimenti tagħha, inkluż mill-persunal tagħha fid-delegazzjonijiet tal-Unjoni;
☐ mill-aġenziji eżekuttivi
☐ Ġestjoni kondiviża mal-Istati Membri
☐ Ġestjoni indiretta billi jiġu fdati kompiti ta’ implimentazzjoni tal-baġit:
☐ lill-pajjiżi terzi jew lill-korpi nnominati minnhom;
☐ lill-organizzazzjonijiet internazzjonali u lill-aġenziji tagħhom (iridu jiġu speċifikati);
☐ lill-Bank Ewropew tal-Investiment u lill-Fond Ewropew tal-Investiment;
☐ lill-korpi msemmija fl-Artikoli 70 u 71 tar-Regolament Finanzjarju;
☐ lill-korpi tad-dritt pubbliku;
☐ lill-korpi rregolati mid-dritt privat b’missjoni ta’ servizz pubbliku sakemm dawn ikollhom garanziji finanzjarji adegwati;
☐ lill-korpi rregolati mid-dritt privat ta’ Stat Membru li jkunu fdati bl-implimentazzjoni ta’ sħubija pubblika-privata u li jkollhom garanziji finanzjarji adegwati;
☐ lill-korpi jew lill-persuni fdati bl-implimentazzjoni ta’ azzjonijiet speċifiċi fil-Politika Estera u ta’ Sigurtà Komuni skont it-Titolu V tat-Trattat dwar l-Unjoni Ewropea, u identifikati fl-att bażiku rilevanti
☐ lill-korpi stabbiliti fi Stat Membru, irregolati mid-dritt privat ta’ Stat Membru jew mid-dritt tal-Unjoni u eliġibbli biex jiġu fdati, f’konformità mar-regoli speċifiċi għas-settur, bl-implimentazzjoni ta’ fondi tal-Unjoni jew ta’ garanziji baġitarji, sa fejn tali korpi jkunu kkontrollati minn korpi tad-dritt pubbliku jew minn korpi rregolati mid-dritt privat b’missjoni ta’ servizz pubbliku, u jkunu pprovduti b’garanziji finanzjarji adegwati fil-forma ta’ responsabbiltà in solidum mill-korpi kontrollanti jew b’garanziji finanzjarji ekwivalenti, li jistgħu, għal kull azzjoni, ikunu limitati għall-ammont massimu tal-appoġġ tal-Unjoni.
Kummenti
[...]
MIŻURI TA’ ĠESTJONI
Regoli ta’ monitoraġġ u ta’ rapportar
M/A
Sistema/i ta’ ġestjoni u ta’ kontroll
Ġustifikazzjoni tal-metodu/i tal-implimentazzjoni tal-baġit, tal-mekkaniżmu/i għall-implimentazzjoni tal-finanzjament, tal-modalitajiet ta’ pagament u tal-istrateġija ta’ kontroll proposta
M/A
Informazzjoni dwar ir-riskji identifikati u s-sistema/i ta’ kontroll intern stabbilita/i għall-mitigazzjoni tagħhom
M/A
Stima u ġustifikazzjoni tal-kosteffettività tal-kontrolli (proporzjon bejn il-kostijiet tal-kontroll u l-valur tal-fondi relatati ġestiti) u valutazzjoni tal-livelli mistennija tar-riskju ta’ errur (mal-ħlas u fl-għeluq)
Miżuri għall-prevenzjoni ta’ frodi u ta’ irregolaritajiet
[...]
