This document is an excerpt from the EUR-Lex website
Document 52023PC0773
Proposal for a COUNCIL DECISION on the signing, on behalf of the European Union, of the Protocol amending the Agreement between the European Union and Japan for an Economic Partnership regarding free flow of data
Proposta għal DEĊIŻJONI TAL-KUNSILL dwar l-iffirmar, f’isem l-Unjoni Ewropea, tal-Protokoll li jemenda l-Ftehim bejn l-Unjoni Ewropea u l-Ġappun għal Sħubija Ekonomika rigward il-fluss liberu ta’ data
Proposta għal DEĊIŻJONI TAL-KUNSILL dwar l-iffirmar, f’isem l-Unjoni Ewropea, tal-Protokoll li jemenda l-Ftehim bejn l-Unjoni Ewropea u l-Ġappun għal Sħubija Ekonomika rigward il-fluss liberu ta’ data
COM/2023/773 final
IL-KUMMISSJONI EWROPEA
Brussell, 1.12.2023
COM(2023) 773 final
2023/0451(NLE)
Proposta għal
DEĊIŻJONI TAL-KUNSILL
dwar l-iffirmar, f’isem l-Unjoni Ewropea, tal-Protokoll li jemenda l-Ftehim bejn l-Unjoni Ewropea u l-Ġappun għal Sħubija Ekonomika rigward il-fluss liberu ta’ data
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
Bid-Deċiżjoni tat-12 ta’ Lulju 2023, il-Kunsill approva direttivi ta’ negozjati għall-Kummissjoni biex tinnegozja l-inklużjoni ta’ dispożizzjonijiet dwar il-flussi transfruntiera tad-data fil-Ftehim bejn l-Unjoni Ewropea u l-Ġappun għal Sħubija Ekonomika 1 .
Fl-24 ta’ Ottubru 2022, l-UE u l-Ġappun nedew in-negozjati dwar il-flussi transfruntiera tad-data. In-negozjati ġew konklużi fil-prinċipju fit-28 ta’ Ottubru 2023.
L-UE u l-Ġappun huma fost l-akbar ekonomiji diġitali fid-dinja. L-UE tfittex li taċċellera u tisfrutta l-benefiċċji ta’ aktar diġitalizzazzjoni tal-ekonomija u s-soċjetà globali. Il-governanza tad-data u l-flussi transfruntiera tad-data huma kruċjali għal dan l-iżvilupp.
Id-data hija vitali ta’ ħafna negozji u komponent kritiku tal-mudelli tan-negozju u l-ktajjen tal-provvista f’ħafna setturi ekonomiċi. Dan il-ftehim iġib iċ-ċertezza legali tant meħtieġa li l-flussi tad-data bejn l-UE u l-Ġappun mhux se jiġu mxekkla minn miżuri ta’ lokalizzazzjoni tad-data mhux ġustifikati, u jiżgura l-benefiċċju mill-fluss liberu tad-data b’fiduċja f’konformità sħiħa mar-regoli rispettivi tagħna dwar il-protezzjoni tad-data u l-ekonomija diġitali.
L-eżitu tan-negozjati jikkonferma l-impenn kontinwu tal-UE u tal-Ġappun għas-sistema kummerċjali internazzjonali bbażata fuq ir-regoli u d-determinazzjoni konġunta li jsawru r-regoli globali dwar il-fluss tad-data li jirrispettaw il-valuri kondiviżi u l-approċċi regolatorji rispettivi.
•Konsistenza mad-dispożizzjonijiet ta’ politika eżistenti fil-qasam ta’ politika
Billi taqbel dwar regoli li jindirizzaw ostakli mhux ġustifikati għall-flussi tad-data filwaqt li tippreserva l-awtonomija regolatorja fil-qasam tal-protezzjoni tad-data u l-privatezza, il-proposta tikkontribwixxi għall-objettivi kif stabbiliti fil-Komunikazzjoni tat-18 ta’ Frar 2021 mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni 2 .
•Konsistenza ma’ politiki oħrajn tal-Unjoni
Ir-regoli nnegozjati dwar il-flussi transfruntiera tad-data mal-Ġappun jikkomplementaw l-arranġament ta’ adegwatezza reċiproka eżistenti bejn l-UE u l-Ġappun għad-data personali 3 , u huma konformi mal-proposta konsolidata għal dispożizzjonijiet dwar il-flussi transfruntiera tad-data u l-protezzjoni tad-data personali u l-privatezza fil-ftehimiet kummerċjali 4 il-proposta ssegwi l-istrateġija tal-Kummissjoni stabbilita fir-Rieżami tal-Politika Kummerċjali, l-Istrateġija tal-UE dwar id-Data, il-Komunikazzjoni Konġunta dwar l-Istrateġija tal-UE għall-Kooperazzjoni fl-Indo-Paċifiku 5 u fid-Dikjarazzjoni Konġunta dwar il-privatezza u l-protezzjoni tad-data personali ffirmata b’mod konġunt mill-UE u l-Ġappun 6 .
Fir-rieżami tal-Politika Kummerċjali, il-Kummissjoni impenjat ruħha li “tkompli tindirizza l-ostakli mhux ġustifikati għall-flussi tad-data filwaqt li tippreserva l-awtonomija regolatorja tagħha fil-qasam tal-protezzjoni tad-data u l-privatezza”. L-istrateġija tal-UE dwar id-Data 7 tiddikjara: “L-UE se tibqa’ tindirizza dawn l-ostakli mhux ġustifikati għall-flussi tad-data waqt id-diskussjonijiet bilaterali u fil-fora internazzjonali – inkluż mal-Organizzazzjoni Dinjija tal-Kummerċ – filwaqt li se tippromwovi u tipproteġi r-regoli u l-istandards Ewropej tal-ipproċessar tad-data, bi qbil sħiħ mal-leġiżlazzjoni tal-UE”. Il-flussi tad-data huma identifikati wkoll bħala element importanti tal-Komunikazzjoni Konġunta dwar l-Istrateġija tal-UE għall-Kooperazzjoni fl-Indo-Paċifiku 8 .
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Il-bażi ġuridika sostantiva hija pprovduta mill-Artikolu 207 tat-TFUE.
Il-Protokoll għall-Emenda se jiġi ffirmat mill-Unjoni wara deċiżjoni tal-Kunsill abbażi tal-Artikolu 218(5) tat-TFUE u se jiġi konkluż mill-Unjoni wara deċiżjoni tal-Kunsill abbażi tal-Artikolu 218(6) tat-TFUE, wara li jinkiseb il-kunsens tal-Parlament Ewropew.
•Is-sussidjarjetà (għal kompetenza mhux esklużiva)
Il-Protokoll għall-Emenda kif ippreżentat lill-Kunsill ma jkopri l-ebda kwistjoni li taqa’ barra mill-kompetenza esklużiva tal-UE.
•Proporzjonalità
Il-ftehimiet kummerċjali huma l-mezzi xierqa biex jirregolaw l-aċċess għas-suq u l-oqsma relatati ta’ relazzjonijiet ekonomiċi komprensivi ma’ pajjiż terz barra mill-UE. Ma teżisti l-ebda alternattiva biex tali impenji u sforzi ta’ liberalizzazzjoni jsiru legalment vinkolanti.
Din l-inizjattiva ssegwi direttament l-objettiv tal-Unjoni fl-azzjoni esterna u tikkontribwixxi għall-prijorità politika tal-“UE bħala attur globali aktar b’saħħtu”. Hija f’konformità mal-orjentazzjonijiet tal-Istrateġija Globali tal-UE biex tikkoopera ma’ atturi oħra u biex tagħti spinta lis-sħubijiet esterni tagħha b’mod responsabbli, sabiex jinkisbu l-prijoritajiet esterni tal-UE. Dan jikkontribwixxi għall-objettivi tal-UE dwar il-kummerċ u l-iżvilupp.
•Għażla tal-istrument
Din il-proposta hija konformi mal-Artikolu 218(5) tat-TFUE, li jipprevedi l-adozzjoni mill-Kunsill ta’ deċiżjonijiet dwar l-iffirmar ta’ ftehimiet internazzjonali. Ma jeżisti l-ebda strument legali ieħor li jista' jintuża sabiex jintlaħaq l-objettiv espress f'din il-proposta.
3.IR-RIŻULTATI TAL-EVALWAZZJONIJIET EX-POST, IL-KONSULTAZZJONIJIET MAL-PARTIJIET IKKONĊERNATI U L-VALUTAZZJONIJIET TAL-IMPATT
•Evalwazzjonijiet ex-post/kontrolli tal-idoneità tal-leġiżlazzjoni eżistenti
Mhux applikabbli
•Konsultazzjonijiet mal-partijiet ikkonċernati
Mhux applikabbli
•Ġbir u użu tal-għarfien espert
Mhux rilevanti
•Valutazzjoni tal-impatt
Mhux rilevanti
•L-idoneità regolatorja u s-simplifikazzjoni
Mhux applikabbli
•Drittijiet fundamentali
Ir-rakkomandazzjoni hija konsistenti mat-Trattati tal-UE u mal-Karta tad-Drittijiet Fundamentali tal-Unjoni Ewropea. B’mod partikolari, billi tressaq il-proposta konsolidata għal dispożizzjonijiet dwar il-flussi transfruntiera tad-data u l-protezzjoni tad-data personali u l-privatezza fil-ftehimiet kummerċjali, il-Kummissjoni tfittex li tippreserva l-awtonomija regolatorja tal-Unjoni fil-qasam tal-protezzjoni tad-data u l-privatezza.
4.IMPLIKAZZJONIJIET GĦALL-BAĠIT
Mhux rilevanti
5.ELEMENTI OĦRA
•Il-pjanijiet għall-implimentazzjoni u l-arranġamenti ta’ monitoraġġ, ta’ evalwazzjoni u ta’ rappurtar
Mhux applikabbli
•Dokumenti ta’ spjegazzjoni (għad-direttivi)
Mhux applikabbli
•Spjegazzjoni ddettaljata tad-dispożizzjonijiet speċifiċi tal-proposta
Il-proposta tikkonsisti minn 7 artikolu.
L-Artikolu 1 jikkonċerna l-emenda tal-werrej.
L-Artikolu 2 jikkonċerna prinċipalment iż-żieda tad-definizzjoni ta’ “persuna koperta” li tiddefinixxi l-kamp ta’ applikazzjoni tad-dispożizzjonijiet ikkonċernati.
L-Artikolu 3 jikkonċerna r-regoli għat-trasferiment transfruntier ta’ informazzjoni b’mezzi elettroniċi bbażati fuq lista magħluqa ta’ miżuri pprojbiti li jirrestrinġu l-fluss transfruntier ta’ informazzjoni u eċċezzjonijiet rilevanti.
L-Artikolu 4 jikkonċerna l-protezzjoni tad-data personali. F’konformità mal-prattika tal-UE u mal-proposta konsolidata għal dispożizzjonijiet dwar il-flussi transfruntiera tad-data u l-protezzjoni tad-data personali u l-privatezza fil-ftehimiet kummerċjali, hija tirrikonoxxi d-dritt ta’ kull Parti li tiddetermina l-livell xieraq ta’ privatezza u protezzjoni tad-data personali.
L-Artikolu 5 jipprevedi t-tħassir tad-dispożizzjoni dwar id-data finanzjarja.
L-Artikolu 6 jikkonċerna d-dħul fis-seħħ.
L-Artikolu 7 jikkonċerna l-lingwi awtentiċi li bihom huwa mfassal il-Protokoll.
2023/0451 (NLE)
Proposta għal
DEĊIŻJONI TAL-KUNSILL
dwar l-iffirmar, f’isem l-Unjoni Ewropea, tal-Protokoll li jemenda l-Ftehim bejn l-Unjoni Ewropea u l-Ġappun għal Sħubija Ekonomika rigward il-fluss liberu ta’ data
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4), l-ewwel subparagrafu, flimkien mal-Artikolu 218(5) tiegħu,
Wara li kkunsidraw il-proposta mill-Kummissjoni Ewropea,
Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 u ta l-opinjoni tiegħu fi [data tal-opinjoni],
Billi:
(1)Fit-12 ta’ Lulju 2023, il-Kunsill awtorizza lill-Kummissjoni biex tinnegozja l-inklużjoni ta’ dispożizzjonijiet dwar il-flussi transfruntiera tad-data fil-Ftehim bejn l-Unjoni Ewropea u l-Ġappun għal Sħubija Ekonomika (‘il-Ftehim’).
(2)Fit-28 ta’ Ottubru 2023, ġew konklużi n-negozjati tad-dispożizzjonijiet dwar il-flussi transfruntiera tad-data li għandhom jiġu inklużi fil-Ftehim.
(3)Għalhekk, il-Protokoll li jemenda l-Ftehim jeħtieġ li jiġi ffirmat f’isem l-Unjoni, soġġett għall-konklużjoni tiegħu f’data iktar tard,
ADOTTAT DIN ID-DEĊIŻJONI:
Artikolu 1
L-iffirmar tal-Protokoll li jemenda l-Ftehim bejn l-Unjoni Ewropea u l-Ġappun għal Sħubija Ekonomika rigward il-fluss liberu ta’ data (“il-Protokoll”) huwa b’dan approvat f’isem l-Unjoni, soġġett għall-konklużjoni tal-Protokoll.
It-test tal-Protokoll huwa mehmuż ma’ din id-Deċiżjoni.
Artikolu 2
Is-Segretarjat Ġenerali tal-Kunsill għandu jistabbilixxi l-istrument ta’ setgħat sħaħ għall-persuna(i) indikata min-negozjatur tal-Ftehim biex jiffirmaw il-Ftehim f’isem l-Unjoni, soġġett għan-negozjar tal-Protokoll.
Artikolu 3
Din id-Deċiżjoni għandha tidħol fis-seħħ fil-jum tal-adozzjoni tagħha.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 1.12.2023
COM(2023) 773 final
ANNESS
għal
Proposta għal Deċiżjoni tal-Kunsill
dwar l-iffirmar, f’isem l-Unjoni Ewropea, tal-Protokoll li jemenda l-Ftehim bejn l-Unjoni Ewropea u l-Ġappun għal Sħubija Ekonomika rigward il-fluss liberu ta’ data
ANNESS
PROTOKOLL
LI JEMENDA L-FTEHIM
BEJN L-UNJONI EWROPEA
U L-ĠAPPUN
GĦAL SĦUBIJA EKONOMIKA
L-UNJONI EWROPEA u l-ĠAPPUN, (minn hawn ’il quddiem imsejħa “il-Partijiet”),
WARA li reġa’ vvaluta l-ħtieġa għall-inklużjoni ta’ dispożizzjonijiet dwar il-fluss liberu tad-data fil-Ftehim bejn l-Unjoni Ewropea u l-Ġappun għal Sħubija Ekonomika, iffirmat f’Tokyo fis-17 ta’ Lulju 2018 (minn hawn ’il quddiem imsejjaħ “il-Ftehim”), f’konformità mal-Artikolu 8.81 tal-Ftehim,
FTIEHMU KIF ĠEJ:
ARTIKOLU 1
Il-werrej tal-Ftehim għandu jiġi emendat billi jitħassru l-kliem “Artikoli 8.70 sa 8.81” u jinbidlu bil-kliem “Artikoli 8.70 sa 8.72”.
ARTIKOLU 2
L-Artikolu 8.71 tal-Ftehim għandu jiġi emendat billi titħassar il-kelma “u” tas-subparagrafu (a), billi jitħassar il-perjodu tas-subparagrafu (b) (ii) u jiġi sostitwit b’punt u virgola, u billi jiddaħħlu s-subparagrafi li ġejjin immedjatament wara s-subparagrafu (b) (ii):
“(c) “persuna koperta” tfisser:
(i) intrapriża koperti;
(ii) intraprenditur ta’ Parti; u
(iii) fornitur ta’ servizz ta’ Parti; u
(d) “data personali” tfisser kwalunkwe informazzjoni relatata ma’ persuna fiżika identifikata jew identifikabbli.”
ARTIKOLU 3
L-Artikolu 8.81 tal-Ftehim għandu jiġi sostitwit b'dan li ġej:
“ARTIKOLU 8.81
Trasferiment transfruntier ta’ informazzjoni b’mezzi elettroniċi
1. Il-partijiet huma impenjati li jiżguraw it-trasferiment transfruntier ta’ informazzjoni b’mezzi elettroniċi meta din l-attività tkun għat-twettiq tan-negozju ta’ persuna koperta.
2. Għal dak l-għan, Parti ma għandhiex tadotta jew iżżomm miżuri li jipprojbixxu jew jirrestrinġu t-trasferiment transfruntier ta’ informazzjoni stabbilit fil-paragrafu 1 billi:
(a) teħtieġ l-użu ta’ faċilitajiet tal-kompjuter jew ta’ elementi tan-network fit-territorju tal-Parti għall-ipproċessar tal-informazzjoni, inkluż bir-rekwiżit tal-użu ta’ faċilitajiet tal-kompjuter jew ta’ elementi tan-network li huma ċċertifikati jew approvati fit-territorju tal-Parti;
(b) teħtieġ il-lokalizzazzjoni tal-informazzjoni fit-territorju tal-Parti għall-ħżin jew l-ipproċessar;
(c) il-projbizzjoni tal-ħżin jew tal-ipproċessar tal-informazzjoni fit-territorju tal-Parti l-oħra;
(d) tagħmel it-trasferiment transfruntier tal-informazzjoni dipendenti fuq l-użu ta’ faċilitajiet tal-kompjuter jew ta’ elementi tan-network fit-territorju tal-Parti jew fuq rekwiżiti ta’ lokalizzazzjoni fit-territorju tal-Parti;
(e) il-projbizzjoni tat-trasferiment tal-informazzjoni fit-territorju tal-Parti; jew
(f) ir-rekwiżit tal-approvazzjoni tal-Parti qabel it-trasferiment tal-informazzjoni lejn it-territorju tal-Parti l-oħra.1
3. Xejn f’dan l-Artikolu ma għandu jipprevjeni lil Parti milli tadotta jew iżżomm miżuri inkonsistenti mal-paragrafi 1 u 2 sabiex tikseb objettiv leġittimu ta’ politika pubblika2, sakemm il-miżura:
(a) ma jiġix applikat b’mod li jikkostitwixxi mezz ta’ diskriminazzjoni arbitrarja jew mhux ġustifikabbli bejn pajjiżi fejn jipprevalu kundizzjonijiet simili, jew restrizzjoni moħbija fuq il-kummerċ; u
(b) ma jimponix restrizzjonijiet fuq it-trasferimenti tal-informazzjoni li huma ikbar minn dak li hemm bżonn biex jintlaħaq l-objettiv.3
4. Xejn f’dan l-Artikolu ma għandu jżomm Parti milli tadotta jew iżżomm miżuri dwar il-protezzjoni tad-data personali u l-privatezza, inkluż fir-rigward ta’ trasferimenti transfruntieri tal-informazzjoni, dment li l-liġi tal-Parti tipprevedi strumenti li jippermettu trasferimenti skont kundizzjonijiet ta’ applikazzjoni ġenerali4 għall-protezzjoni tad-data trasferita.
5. Dan l-Artikolu ma japplikax għat-trasferiment transfruntier ta’ informazzjoni miżmuma jew ipproċessata minn Parti jew f’isimha.
6. Parti tista’ fi kwalunkwe ħin tipproponi lill-Parti l-oħra biex tirrieżamina l-miżuri elenkati fil-paragrafu 2.
_________________
1Għal ċertezza akbar, is-subparagrafu 2 (f) ma jipprevjenix lil Parti milli:
(a)jissoġġettaw l-użu ta’ strument speċifiku ta’ trasferiment jew trasferiment transfruntier partikolari ta’ informazzjoni għal approvazzjoni għal raġunijiet relatati mal-protezzjoni tad-data personali u l-privatezza, f’konformità mal-paragrafu 4;
(b)jirrikjedu ċ-ċertifikazzjoni jew il-valutazzjoni tal-konformità ta’ prodotti, servizzi u proċessi tal-ICT, inkluża l-Intelliġenza Artifiċjali, qabel il-kummerċjalizzazzjoni jew l-użu tagħhom fit-territorju tiegħu, biex tiġi żgurata l-konformità mal-liġijiet u r-regolamenti konsistenti ma’ dan il-Ftehim jew għal finijiet ta’ ċibersigurtà, f’konformità mal-paragrafi 3 u 4, u l-Artikoli 1.5, 8.3 u 8.65; jew
(c)jeħtieġu li l-utenti mill-ġdid ta’ informazzjoni protetta bid-drittijiet tal-proprjetà intellettwali jew l-obbligi ta’ kunfidenzjalità li jirriżultaw minn liġijiet u regolamenti domestiċi konsistenti ma’ dan il-Ftehim, jirrispettaw tali drittijiet jew obbligi meta jittrasferixxu l-informazzjoni bejn il-fruntieri, inkluż fir-rigward ta’ talbiet għal aċċess mill-qrati u l-awtoritajiet ta’ pajjiżi terzi, f’konformità mal-Artikolu 8.3.
2Għall-fini ta’ dan l-Artikolu, “objettiv leġittimu ta’ politika pubblika” għandha tiġi interpretata b’mod oġġettiv u għandha tippermetti li jintlaħqu objettivi bħall-protezzjoni tas-sigurtà pubblika, il-morali pubblika, jew il-ħajja jew is-saħħa tal-bniedem, tal-annimali jew tal-pjanti, jew iż-żamma tal-ordni pubbliku jew objettivi simili oħra ta’ interess pubbliku, filwaqt li titqies in-natura li qed tevolvi tat-teknoloġiji diġitali.
3Għal aktar ċertezza, din id-dispożizzjoni ma taffettwax l-interpretazzjoni ta’ eċċezzjonijiet oħra f’dan il-Ftehim u l-applikazzjoni tagħhom għal dan l-Artikolu u d-dritt ta’ Parti li tinvoka kwalunkwe waħda minnhom.
4Għal aktar ċertezza, f’konformità man-natura orizzontali tal-protezzjoni tad-data personali u l-privatezza, “kundizzjonijiet ta’ applikazzjoni ġenerali” jirreferu għal kundizzjonijiet ifformulati f’termini oġġettivi li japplikaw orizzontalment għal għadd mhux identifikat ta’ operaturi ekonomiċi u b’hekk ikopru firxa ta’ sitwazzjonijiet u każijiet.”
ARTIKOLU 4
L-Artikolu li ġej għandu jiddaħħal wara l-Artikolu 8.81 tal-Ftehim:
“ARTIKOLU 8.82
Protezzjoni tad-Data Personali
1. Il-partijiet jirrikonoxxu li l-individwi għandhom dritt għall-protezzjoni tad-data personali u tal-privatezza tagħhom kif previst fil-liġijiet u r-regolamenti ta’ kull Parti u li standards għoljin f’dan ir-rigward jikkontribwixxu għall-fiduċja fl-ekonomija diġitali u għall-iżvilupp tal-kummerċ. Kull Parti tirrikonoxxi d-dritt tal-Parti l-oħra li tiddetermina l-livell xieraq ta’ protezzjoni tad-data personali u tal-privatezza, li għandu jiġi previst mill-miżuri rispettivi tagħhom.
2. Kull Parti għandha tagħmel ħilitha biex tadotta miżuri li jipproteġu lill-individwi, mingħajr diskriminazzjoni bbażata fuq raġunijiet bħan-nazzjonalità jew ir-residenza, minn ksur tal-protezzjoni tad-data personali li jseħħ fil-ġurisdizzjoni tagħha.
3. Kull Parti għandha tadotta jew iżżomm qafas legali li jipprevedi l-protezzjoni ta’ data personali relatata mal-kummerċ elettroniku. Fl-iżvilupp tal-qafas legali tagħha għall-protezzjoni tad-data personali u l-privatezza, kull Parti għandha tqis il-prinċipji u l-linji gwida tal-korpi internazzjonali rilevanti. Il-partijiet jirrikonoxxu wkoll li standards għoljin ta’ privatezza u protezzjoni tad-data fir-rigward tal-aċċess tal-gvern għal data miżmuma privatament, bħal dawk deskritti fil-Prinċipji tal-OECD għall-Aċċess tal-Gvern għal Data Personali miżmuma minn Entitajiet tas-Settur Privat, jikkontribwixxu għall-fiduċja fl-ekonomija diġitali.
4. Kull Parti għandha tippubblika informazzjoni dwar il-protezzjoni tad-data personali u tal-privatezza li tipprovdi lill-utenti tal-kummerċ elettroniku, inkluż:
(a) kif l-individwi jistgħu jfittxu rimedji għal ksur tal-protezzjoni tad-data personali jew tal-privatezza li jirriżulta mill-kummerċ diġitali; u
(b) gwida u informazzjoni oħra dwar il-konformità tan-negozji mar-rekwiżiti legali applikabbli li jipproteġu d-data personali u l-privatezza.”
ARTIKOLU 5
L-Artikolu 8.63 tal-Ftehim għandu jitħassar.
ARTIKOLU 6
Dan il-Protokoll għandu jidħol fis-seħħ skont il-paragrafi 1 u 2 tal-Artikolu 23.2 tal-Ftehim.
ARTIKOLU 7
1. Dan il-Protokoll, f'konformità mal-Artikolu 23.8 tal-Ftehim, hu mfassal f'żewġ kopji bil-lingwa Bulgara, Kroata, Ċeka, Daniża, Estona, Finlandiża, Franċiża, Ġermaniża, Griega, Ingliża, Latvjana, Litwana, Maltija, Olandiża, Pollakka, Portugiża, Rumena, Slovakka, Slovena, Spanjola, Taljana, Ungeriża u Svediża, u kull wieħed minn dawn it-testi jkun ugwalment awtentiku.
2. Fil-każ ta' kwalunkwe diverġenza fl-interpretazzjoni, għandu jipprevali t-test tal-lingwa li biha ġie nnegozjat ta' dan il-Protokoll.
B’XHIEDA TA’ DAN, is-sottoskritti, debitament awtorizzati għal dan l-għan, iffirmaw dan il-Ftehim.
MAGĦMUL fi XXX, fil-XX jum ta’ [XAHAR], fis-sena XXXX.
Għall-Unjoni Ewropea
Għall-Ġappun
