This document is an excerpt from the EUR-Lex website
Document 52023PC0509
Recommendation for a COUNCIL DECISION authorising the opening of negotiations for an agreement between the European Union and the Swiss Confederation on the transfer of Passenger Name Record data from the EU to the Swiss Confederation for the prevention, detection, investigation and prosecution of terrorist offences and serious crime
Rakkomandazzjoni għal DEĊIŻJONI TAL-KUNSILL li tawtorizza l-ftuħ ta’ negozjati għal ftehim bejn l-Unjoni Ewropea u l-Konfederazzjoni Żvizzera dwar it-trasferiment ta’ data tar-Reġistru tal-Ismijiet tal-Passiġġieri mill-UE lill-Konfederazzjoni Żvizzera għall-prevenzjoni, l-iskoperta, l-investigazzjoni u l-prosekuzzjoni ta’ reati terroristiċi u kriminalità serja
Rakkomandazzjoni għal DEĊIŻJONI TAL-KUNSILL li tawtorizza l-ftuħ ta’ negozjati għal ftehim bejn l-Unjoni Ewropea u l-Konfederazzjoni Żvizzera dwar it-trasferiment ta’ data tar-Reġistru tal-Ismijiet tal-Passiġġieri mill-UE lill-Konfederazzjoni Żvizzera għall-prevenzjoni, l-iskoperta, l-investigazzjoni u l-prosekuzzjoni ta’ reati terroristiċi u kriminalità serja
COM/2023/509 final
IL-KUMMISSJONI EWROPEA
Brussell, 6.9.2023
COM(2023) 509 final
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati għal ftehim bejn l-Unjoni Ewropea u l-Konfederazzjoni Żvizzera dwar it-trasferiment ta’ data tar-Reġistru tal-Ismijiet tal-Passiġġieri mill-UE lill-Konfederazzjoni Żvizzera għall-prevenzjoni, l-iskoperta, l-investigazzjoni u l-prosekuzzjoni ta’ reati terroristiċi u kriminalità serja
MEMORANDUM TA’ SPJEGAZZJONI
IL-KUNTEST TAR-RAKKOMANDAZZJONI
1 2 It-tisħiħ tal-kooperazzjoni internazzjonali dwar l-infurzar tal-liġi, inkluż dwar il-kondiviżjoni tal-informazzjoni, huwa essenzjali biex jiġu indirizzati t-theddid mit-terroriżmu u r-reati tranżnazzjonali serji. L-aħħar rapport tal-Valutazzjoni tat-Theddid mill-Kriminalità Serja u Organizzata (Serious Organised Crime Threat Assessment, SOCTA) ippubblikat mill-Europol juri d-dimensjoni internazzjonali tal-attivitajiet tal-organizzazzjonijiet tal-kriminalità l-aktar serji. Barra minn hekk, l-aħħar Rapport tiegħu dwar is-Sitwazzjoni u t-Tendenzi tat-Terroriżmu (terrorism situation and trend report, TE-SAT) jenfasizza mhux biss ir-rabtiet diretti bejn l-ivvjaġġar tranżnazzjonali u l-organizzazzjoni ta’ attivitajiet terroristiċi u l-kriminalità serja, iżda wkoll l-importanza li jiġu identifikati, investigati u mħarrka b’mod effettiv reati kriminali serji oħra għall-prevenzjoni u l-iskoperta ta’ reati terroristiċi.
Id-data tar-reġistru tal-ismijiet tal-passiġġieri (Passenger name record, PNR) hija informazzjoni pprovduta mill-passiġġieri, u miġbura minn u miżmuma fis-sistemi ta’ prenotazzjoni u ta’ kontroll tat-tluq tat-trasportaturi tal-ajru għall-finijiet kummerċjali tagħhom stess. Il-kontenut tad-data tal-PNR ivarja skont l-informazzjoni mogħtija matul il-proċess tal-prenotazzjoni u taċ-check-in u jista’ jinkludi, pereżempju, id-dati tal-ivvjaġġar u l-itinerarju sħiħ tal-ivvjaġġar tal-passiġġier jew tal-grupp ta’ passiġġieri li jivvjaġġaw flimkien, id-dettalji ta’ kuntatt bħall-indirizz u n-numru tat-telefown, l-informazzjoni dwar il-ħlas, in-numru tas-sit u l-informazzjoni dwar il-bagalji.
Il-ġbir u l-analiżi tad-data tal-PNR jistgħu jipprovdu lill-awtoritajiet b’elementi importanti li jippermettulhom jiskopru xejriet ta’ vvjaġġar suspettużi u jidentifikaw l-assoċjati tal-kriminali u tat-terroristi, b’mod partikolari dawk li qabel ma kinux magħrufa mill-awtoritajiet tal-infurzar tal-liġi. Għaldaqstant, l-ipproċessar tad-data tal-PNR sar għodda tal-infurzar tal-liġi użat b’mod wiesa’, fl-UE u lil hinn minnha, biex jinkixfu t-terroriżmu u forom oħra ta’ kriminalità serja, bħal reati relatati mad-droga, it-traffikar tal-bnedmin u l-isfruttament sesswali tat-tfal, u biex jiġi evitat it-twettiq ta’ tali kriminalità. Wera wkoll li jikkostitwixxi sors importanti ta’ informazzjoni biex jappoġġa l-investigazzjoni u l-prosekuzzjoni ta’ każijiet fejn ikunu twettqu tali attivitajiet illegali 3 .
Filwaqt li kruċjali għall-ġlieda kontra t-terroriżmu u l-kriminalità serja, it-trasferiment tad-data tal-PNR lil pajjiżi terzi kif ukoll l-ipproċessar mill-awtoritajiet tagħhom jikkostitwixxi interferenza fil-protezzjoni tad-drittijiet tal-individwi fir-rigward tad-data personali tagħhom. Għal din ir-raġuni, dan jirrikjedi bażi legali skont id-dritt tal-UE u jrid ikun neċessarju, proporzjonat u soġġett għal limitazzjonijiet stretti u għal salvagwardji effettivi, kif iggarantit mill-Karta tad-Drittijiet Fundamentali tal-UE, b’mod partikolari fl-Artikoli 6, 7, 8, 21, 47 u 52 tagħha. Sabiex jintlaħqu dawn l-għanijiet importanti jrid jinstab bilanċ ġust bejn l-għan leġittimu li tinżamm is-sigurtà pubblika u d-dritt ta’ kull persuna għat-tgawdija tal-protezzjoni tad-data personali u l-ħajja privata.
Huwa f’dan il-kuntest li l-Kummissjoni l-ewwel tistabbilixxi l-linji ġenerali tal-politika esterna tal-UE dwar il-PNR f’Komunikazzjoni tal-2003 4 dwar l-approċċ tal-UE lejn it-trasferimenti tad-data tal-PNR mill-UE lil pajjiżi terzi, li ġew riveduti f’Komunikazzjoni adottata fl-2010 5 . Bħalissa hemm tliet ftehimiet internazzjonali fis-seħħ bejn l-UE u pajjiżi terzi, jiġifieri l-Awstralja 6 , l-Istati Uniti (2012) 7 u r-Renju Unit (2020) 8 li jkopru t-trasferiment u l-ipproċessar tad-data tal-PNR mill-UE. Wara l-Opinjoni tal-Qorti tal-2017 dwar il-Ftehim previst bejn l-UE u l-Kanada 9 , bħalissa għaddejjin negozjati dwar il-PNR b’mod partikolari mal-Kanada 10 .
Sadanittant, fl-2016, il-Parlament Ewropew u l-Kunsill tal-Unjoni Ewropea adottaw id-Direttiva (UE) 2016/681 dwar l-użu tad-data tal-PNR għall-prevenzjoni, l-iskoperta, l-investigazzjoni u l-prosekuzzjoni ta’ reati terroristiċi u kriminalità serja (“id-Direttiva dwar il-PNR”) 11 . Din id-Direttiva tirregola t-trasferiment u l-ipproċessar tad-data tal-PNR fl-Unjoni Ewropea u tistabbilixxi salvagwardji importanti għall-protezzjoni tad-drittijiet fundamentali, b’mod partikolari d-drittijiet għall-privatezza u l-protezzjoni tad-data personali. F’Ġunju 2022, il-Qorti tal-Ġustizzja tal-UE fis-sentenza tagħha fil-Kawża C-817/19, ikkonfermat il-validità u l-konformità ta’ din id-Direttiva mal-Karta tad-Drittijiet Fundamentali tal-UE u mat-Trattati tal-Unjoni 12 .
Fil-livell internazzjonali, għadd dejjem jikber ta’ pajjiżi terzi bdew jiżviluppaw il-kapaċitajiet tagħhom biex jiġbru d-data tal-PNR mit-trasportaturi tal-ajru. Din ix-xejra hija xprunata aktar minn Riżoluzzjonijiet adottati mill-Kunsill tas-Sigurtà tan-Nazzjonijiet Uniti (fl-2017 u fl-2019), li jirrikjedu li l-Istati kollha jiżviluppaw il-kapaċità li jiġbru u jużaw id-data tal-PNR 13 , li abbażi tagħha ġew adottati Standards u Prattiki Rakkomandati dwar il-PNR (SARPs) mill-Organizzazzjoni tal-Avjazzjoni Ċivili Internazzjonali (ICAO) fl-2020, permezz tal-Emenda 28 tal-Anness 9 tal-Konvenzjoni ta’ Chicago li saret applikabbli fi Frar 2021 14 .
Il-pożizzjoni tal-Unjoni, kif stabbilita bid-Deċiżjoni tal-Kunsill (UE) 2021/121, tilqa’ l-SARPs tal-ICAO tal-PNR bħala li jistabbilixxu salvagwardji ambizzjużi dwar il-protezzjoni tad-data u b’hekk jippermettu li jsir progress sinifikanti fil-livell internazzjonali. Fl-istess ħin, din id-Deċiżjoni tal-Kunsill qieset, billi talbet lill-Istati Membri jirreġistraw differenza, li r-rekwiżiti li jirriżultaw mid-dritt tal-Unjoni (inkluża l-ġurisprudenza rilevanti), huma aktar eżiġenti minn ċerti Standards tal-ICAO, u li t-trasferimenti mill-UE lil pajjiżi terzi jirrikjedu bażi legali li tistabbilixxi regoli u salvagwardji ċari u preċiżi fir-rigward tal-użu tad-data tal-PNR mill-awtoritajiet kompetenti ta’ pajjiż terz 15 .
F’dan il-kuntest, filwaqt li din ir-Rakkomandazzjoni tikkonċerna speċifikament in-negozjati mal-Iżvizzera, hija tikkostitwixxi parti minn sforz usa’ tal-Kummissjoni biex issegwi approċċ konsistenti u effettiv rigward it-trasferiment tad-data tal-PNR lil pajjiżi terzi, kif imħabbar fl-Istrateġija tal-Unjoni tas-Sigurtà 2020-2025 16 , filwaqt li tibni fuq is-SARPs tal-ICAO tal-PNR, u f’konformità mal-liġi u l-ġurisprudenza tal-Unjoni. Approċċ bħal dan intalab ukoll mill-Kunsill fil-Konklużjonijiet tiegħu ta’ Ġunju 2021 17 . B’dan, il-Kummissjoni tfittex ukoll li twieġeb għal sejħiet minn trasportaturi tal-ajru biex tiżgura aktar ċarezza legali u prevedibbiltà dwar it-trasferimenti tal-PNR lil pajjiżi terzi 18 .
Għal dan il-għan, il-Kummissjoni tqis li t-turija ta’ konformità mal-Istandards tal-PNR tal-ICAO hija element importanti li għandu jitqies meta wieħed jidħol fi djalogu dwar il-PNR ma’ kwalunkwe pajjiż terz. Dan id-djalogu sussegwenti dwar il-PNR imbagħad ikollu l-għan li jistabbilixxi bażi legali li tippermetti lit-trasportaturi tal-ajru jittrasferixxu d-data tal-PNR mill-UE lill-awtorità kompetenti rilevanti ta’ dak il-pajjiż u li tiżgura li l-użu tad-data tal-PNR li tkun waslet mill-UE jkun soġġett għal salvagwardji xierqa kif meħtieġ mid-dritt tal-Unjoni.
OBJETTIVI TAR-RAKKOMANDAZZJONI
L-Iżvizzera u l-Istati Membri tal-UE li huma Partijiet Kontraenti għall-Konvenzjoni ta’ Schengen għandhom responsabbiltà kondiviża li jiżguraw is-sigurtà interna f’żona komuni mingħajr kontrolli fil-fruntieri interni, inkluż permezz tal-iskambju ta’ informazzjoni rilevanti.
L-ipproċessar tad-data tal-PNR wera l-potenzjal li jtejjeb is-sigurtà taż-żona Schengen, billi jtejjeb il-prevenzjoni u l-iskoperta ta’ kriminalità serja u terroriżmu fil-fruntieri esterni u billi jipprovdi approċċ ibbażat fuq ir-riskju mmexxi mid-data għall-użu tal-Istati Membri fiż-żona Schengen bħala miżura ta’ kumpens għan-nuqqas ta’ kontrolli fil-fruntieri interni 19 .
Fl-2016, permezz tad-Direttiva dwar il-PNR, ġiet stabbilita sistema mifruxa mal-UE kollha fost l-Istati Membri bħala għodda importanti biex tgħin fit-titjib tas-sigurtà interna tal-UE. L-Iżvizzera mhijiex marbuta b’din id-Direttiva, peress li mhijiex żvilupp fl-acquis ta’ Schengen.
Abbażi ta’ skambji preliminari fil-livell tekniku, l-Iżvizzera għarrfet il-pjanijiet tagħha li tibda topera sistema tal-PNR ladarba l-leġiżlazzjoni nazzjonali rilevanti tkun daħlet fis-seħħ. Sa dak iż-żmien, l-Iżvizzera, jkollha l-kapaċità li tiġbor u tipproċessa data tal-PNR dwar titjiriet li jinżlu jew jitilqu mill-ajruporti tagħha.
Skont id-dritt tal-Unjoni, it-trasferiment ta’ kwalunkwe data personali mill-Unjoni lil pajjiż terz jista’ jseħħ biss jekk dak il-pajjiż jiżgura livell ta’ protezzjoni tad-data personali li jkun essenzjalment ekwivalenti għal dak garantit għal dik id-data personali fl-Unjoni. Jenħtieġ li jiġi nnotat li, filwaqt li tittrasponi r-regoli tagħha fl-ordni domestika tagħha stess dwar kwistjonijiet relatati mal-implimentazzjoni tal-acquis ta’ Schengen, l-Iżvizzera mhix marbuta bid-Direttiva (UE) 2016/680 20 peress li mhix Stat Membru tal-UE.
F’dawn iċ-ċirkostanzi, jiġifieri fin-nuqqas ta’ salvagwardji xierqa fir-rigward tal-ipproċessar speċifiku tad-data tal-PNR, li għandhom jiġu stabbiliti permezz ta’ bażi legali valida kif meħtieġ mid-dritt tal-UE, l-Iżvizzera ma tistax tirċievi u tipproċessa legalment data tal-PNR dwar titjiriet operati minn trasportaturi tal-ajru bejn l-Unjoni u l-Iżvizzera. Għalhekk, hija meħtieġa soluzzjoni biex jitnaqqas dan id-distakk fis-sigurtà eżistenti fiż-żona Schengen, u biex ikun jista’ jsir it-trasferiment tad-data tal-PNR mill-Unjoni lill-Iżvizzera b’rikonoxximent tal-ħtieġa li tintuża d-data tal-PNR bħala għodda essenzjali fil-ġlieda kontra t-terroriżmu u forom oħra ta’ kriminalità serja.
B’kont meħud ta’ dan, l-għan tal-konklużjoni ta’ ftehim dwar il-PNR huwa li l-Iżvizzera tkun tista’ tirċievi legalment data tal-PNR mill-Unjoni u li jippermetti lill-awtorità kompetenti maħtura biex tagħmel użu minn tali data b’mod li jiżgura, fl-istess ħin, is-sigurtà tal-individwi li jiċċaqalqu f’żona komuni mingħajr kontrolli fil-fruntieri interni kif ukoll il-protezzjoni tad-data personali li tikkonċerna lil dawk l-individwi.
F’dawn l-aħħar snin, l-Iżvizzera esprimiet l-interess tagħha li tirċievi data tal-PNR dwar titjiriet mill-Unjoni u li tibda negozjati bl-għan li tikkonkludi Ftehim dwar il-PNR mal-Unjoni. F’dan il-kuntest, l-Iżvizzera qasmet informazzjoni rilevanti fir-rigward tal-proċess tal-adozzjoni tal-liġi domestika tagħha dwar il-PNR, b’mod partikolari dwar l-aderenza ppjanata tagħha mal-Istandards tal-ICAO dwar il-PNR.
Għal dawn ir-raġunijiet, il-Kummissjoni tqis bħala prijorità il-ftuħ ta’ negozjati mal-Iżvizzera b’mod parallel man-Norveġja u l-Iżlanda, għal ftehim bilaterali li jippermetti lill-awtorità kompetenti Żvizzera maħtura biex tirċievi u tipproċessa d-data tal-PNR mill-Unjoni, soġġett għal salvagwardji xierqa. Barra minn hekk, tali ftehim ikun mezz biex titrawwem il-kooperazzjoni fl-infurzar tal-liġi permezz tat-tisħiħ tal-possibiltajiet għall-iskambju tad-data tal-PNR bejn l-awtoritajiet kompetenti tal-Iżvizzera u tal-Istati Membri tal-UE għall-fini tal-prevenzjoni, l-iskoperta, l-investigazzjoni u l-prosekuzzjoni tat-terroriżmu u l-kriminalità serja.
L-ASPETTI LEGALI TAL-PROPOSTA
Din ir-Rakkomandazzjoni hija bbażata fuq il-paragrafi 3 u 4 tal-Artikolu 218 tat-Trattat dwar il-Funzjonament tal-UE. Id-direttivi tan-negozjati annessi ma’ din ir-Rakkomandazzjoni biex jinfetħu negozjati mal-Iżvizzera dwar Ftehim dwar il-PNR iqisu l-qafas legali applikabbli tal-UE dwar il-protezzjoni tad-data (jiġifieri r-Regolament (UE) 2016/679 21 u d-Direttiva (UE) 2016/680 22 ) u dwar it-trasferiment u l-ipproċessar ta’ data tal-PNR (jiġifieri d-Direttiva (UE) 2016/681), kif interpretat mill-Qorti tal-Ġustizzja tal-Unjoni Ewropea fil-ġurisprudenza rilevanti, b’mod partikolari l-Opinjoni 1/15 tas-26 ta’ Lulju 2017 23 u s-Sentenza fil-Kawża C-817/2019 tal-21 ta’ Ġunju 2022 24 , kif ukoll il-qafas legali tat-Trattati u l-Karta tad-Drittijiet Fundamentali tal-Unjoni Ewropea.
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati għal ftehim bejn l-Unjoni Ewropea u l-Konfederazzjoni Żvizzera dwar it-trasferiment ta’ data tar-Reġistru tal-Ismijiet tal-Passiġġieri mill-UE lill-Konfederazzjoni Żvizzera għall-prevenzjoni, l-iskoperta, l-investigazzjoni u l-prosekuzzjoni ta’ reati terroristiċi u kriminalità serja
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 218(3) u (4) tiegħu,
Wara li kkunsidra r-rakkomandazzjoni mill-Kummissjoni Ewropea,
Billi:
(1) Jenħtieġ li n-negozjati jinfetħu bil-ħsieb li jiġi konkluż Ftehim bejn l-Unjoni u l-Konfederazzjoni Żvizzera għat-trasferiment ta’ data tar-Reġistru tal-Ismijiet tal-Passiġġieri (PNR) mill-Unjoni lill-Konfederazzjoni Żvizzera għall-prevenzjoni, l-iskoperta, l-investigazzjoni u l-prosekuzzjoni ta’ reati terroristiċi u kriminalità serja.
(2) Jenħtieġ li l-Ftehim jirrispetta d-drittijiet fundamentali u josserva l-prinċipji rikonoxxuti b’mod partikolari mill-Karta tad-Drittijiet Fundamentali tal-Unjoni Ewropea, kif interpretat mill-Qorti tal-Ġustizzja tal-Unjoni Ewropea, b’mod partikolari, id-dritt għall-ħajja privata u familjari, rikonoxxut fl-Artikolu 7 tal-Karta, id-dritt għall-protezzjoni tad-data personali rikonoxxut fl-Artikolu 8 tal-Karta u d-dritt għal rimedju effettiv u għal proċess ġust rikonoxxut fl-Artikolu 47 tal-Karta. Jenħtieġ li l-Ftehim jiġi applikat f’konformità ma’ dawk id-drittijiet u l-prinċipji u filwaqt li jqis b’mod xieraq, il-prinċipju tal-proporzjonalità f’konformità mal-Artikolu 52(1) tal-Karta.
(3) Jenħtieġ li d-dispożizzjonijiet tal-Ftehim iżidu mal-Istandards internazzjonali applikabbli dwar il-PNR, kif jinsabu fil-Konvenzjoni dwar l-Avjazzjoni Ċivili Internazzjonali, jiġifieri fl-Anness 9 tagħha (Faċilitazzjoni), il-Kapitolu 9 (Sistema ta’ Skambju ta’ Data dwar il-Passiġġieri), it-Taqsima D (Data tar-Reġistru tal-Ismijiet tal-Passiġġieri (PNR)) 25 .
ADOTTA DIN ID-DEĊIŻJONI:
Artikolu 1
Il-Kummissjoni Ewropea hija b’dan awtorizzata tiftaħ negozjati, f’isem l-Unjoni, għal Ftehim bejn l-Unjoni u l-Konfederazzjoni Żvizzera dwar it-trasferiment ta’ data tar-Reġistru tal-Ismijiet tal-Passiġġieri (PNR) mill-Unjoni lill-Konfederazzjoni Żvizzera għall-prevenzjoni, l-iskoperta, l-investigazzjoni u l-prosekuzzjoni ta’ reati terroristiċi u kriminalità serja.
Artikolu 2
Id-direttivi tan-negozjati huma stabbiliti fl-Anness.
Artikolu 3
In-negozjati għandhom isiru b’konsultazzjoni ma’ [isem il-kumitat speċjali li għandu jiddaħħal mill-Kunsill].
Artikolu 4
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
Il-Komunikazzjoni tal-Kummissjoni lill-Parlament Ewropew u lill-Kunsill, “Strateġija lejn żona Schengen reżiljenti u li tiffunzjona bis-sħiħ”, COM(2021)277 final, (02.06.2021), paġna 13.
IL-KUMMISSJONI EWROPEA
Brussell, 6.9.2023
COM(2023) 509 final
ANNESS
tar-
Rakkomandazzjoni għal DEĊIŻJONI TAL-KUNSILL
li tawtorizza l-ftuħ ta’ negozjati għal ftehim bejn l-Unjoni Ewropea u l-Konfederazzjoni Żvizzera dwar it-trasferiment ta' data tar-Reġistru tal-Ismijiet tal-Passiġġieri mill-UE lill-Konfederazzjoni Żvizzera għall-prevenzjoni, l-iskoperta, l-investigazzjoni u l-prosekuzzjoni ta' reati terroristiċi u kriminalità serja
ANNESS
Direttivi għan-negozjati għal ftehim bejn l-Unjoni Ewropea u l-Konfederazzjoni Żvizzera dwar it-trasferiment ta’ data tar-Reġistru tal-Ismijiet tal-Passiġġieri mill-UE lill-Konfederazzjoni Żvizzera għall-prevenzjoni, l-iskoperta, l-investigazzjoni u l-prosekuzzjoni ta’ reati terroristiċi u kriminalità serja
Jenħtieġ li n-negozjati jkollhom l-għan li jiksbu l-objettivi ġenerali li ġejjin:
(1)Il-Ftehim jirrifletti l-ħtieġa u l-importanza tal-ipproċessar tad-data tar-Reġistru tal-Ismijiet tal-Passiġġieri (PNR) fil-ġlieda kontra l-kriminalità serja u t-terroriżmu billi jippermetti t-trasferiment legali tad-data tal-PNR mill-Unjoni lill-Iżvizzera.
(2)Sabiex jikkonforma mar-rekwiżiti rilevanti tad-dritt tal-UE, inkluż il-Karta tad-Drittijiet Fundamentali tal-Unjoni Ewropea u l-ġurisprudenza rilevanti tal-Qorti tal-Ġustizzja tal-Unjoni Ewropea, il-Ftehim jipprovdi bażi legali, kundizzjonijiet u salvagwardji għat-trasferiment lill-Iżvizzera u l-ipproċessar tad-data tal-PNR minnha, u jiżgura li jiġi pprovdut livell adegwat ta’ protezzjoni tad-data personali.
(3)Il-Ftehim jinkoraġġixxi u jiffaċilita l-kooperazzjoni bejn l-Istati Membri tal-Unjoni u l-Iżvizzera billi jistabbilixxi arranġamenti għal skambji f’waqthom, effettivi u effiċjenti tad-data tal-PNR u tar-riżultati tal-ipproċessar tad-data tal-PNR.
Jenħtieġ li n-negozjati jkollhom l-għan li jiksbu dan li ġej dwar is-sustanza:
(4)Il-Ftehim jidentifika l-awtorità maħtura kompetenti Żvizzera responsabbli biex skont il-Ftehim tirċievi u tkompli tipproċessa d-data tal-PNR mingħand it-trasportaturi tal-ajru.
(5)Il-Ftehim jispeċifika b’mod eżawrjenti u ċar l-elementi tad-data tal-PNR li għandhom jiġu ttrasferiti, f’konformità mal-istandards internazzjonali kif ukoll mal-Anness I tad-Direttiva 2016/681. It-trasferimenti tad-data jinżammu għall-minimu meħtieġ u huma proporzjonati għall-iskop speċifikat fil-Ftehim.
(6)Il-Ftehim jiżgura li d-data tal-PNR hija ttrasferita esklussivament fuq il-bażi ta’ sistema li toħloq domanda. Il-frekwenza u t-twaqqit ta’ tali trasferimenti ma joħolqux piż mhux raġonevoli fuq it-trasportaturi tal-ajru u huma limitati għal dak li huwa strettament meħtieġ, pereżempju permezz tal-użu effiċjenti ta’ soluzzjonijiet tekniċi komuni fejn xieraq.
(7)Il-Ftehim jiżgura li t-trasportaturi tal-ajru ma jkunux meħtieġa jiġbru u jittrasferixxu kwalunkwe data addizzjonali meta mqabbla ma’ dik li diġà jiġbru bħala parti min-negozju tagħhom.
(8)Il-Ftehim jinkludi regoli dwar is-sigurtà tad-data, b’mod partikolari dwar il-possibbiltà li għadd limitat biss ta’ individwi b’awtorizzazzjoni speċjali mill-awtorità maħtura kompetenti Żvizzera jkollhom aċċess dirett għad-data tal-PNR, u dwar notifiki ta’ ksur tas-sigurtà tad-data lill-awtoritajiet superviżorji Ewropej responsabbli għall-protezzjoni tad-data.
(9)Il-Ftehim jistabbilixxi l-iskopijiet tal-ipproċessar tad-data tal-PNR b’mod eżawrjenti, b’mod partikolari billi jistabbilixxi li d-data tal-PNR tiġi ttrasferita u pproċessata biss għall-prevenzjoni, l-iskoperta, l-investigazzjoni u l-prosekuzzjoni ta’ reati terroristiċi u kriminalità serja, abbażi tad-definizzjonijiet stabbiliti fl-istrumenti rilevanti tad-dritt tal-UE.
(10)Il-Ftehim jipprevedi li data sensittiva fis-sens tad-dritt tal-Unjoni, inkluża data personali li tiżvela l-oriġini razzjali jew etnika, opinjonijiet politiċi, twemmin reliġjuż jew filosofiku, sħubija fi trade-union jew li tikkonċerna s-saħħa jew il-ħajja jew l-orjentazzjoni sesswali ta’ persuna, ma jiġux pproċessati skont il-Ftehim.
(11)Il-Ftehim jistabbilixxi l-modalitajiet speċifiċi għall-ipproċessar tad-data tal-PNR riċevuta skont il-Ftehim mill-awtorità maħtura kompetenti Żvizzera. Jinkludi salvagwardji għall-ipproċessar awtomatizzat tad-data tal-PNR biex jiġi żgurat li jkun ibbażat fuq kriterji stabbiliti minn qabel li huma nondiskriminatorji, speċifiċi, oġġettivi u affidabbli u li tali pproċessar awtomatizzat ma jintużax bħala bażi unika għal kwalunkwe deċiżjoni b’effetti legali negattivi jew li taffettwa serjament individwu. Jiżgura wkoll li l-bażijiet tad-data li jitqabblu mad-data tal-PNR huma biss dawk rilevanti għall-finijiet koperti mill-Ftehim u huma affidabbli u aġġornati.
(12)Il-Ftehim jipprevedi li d-data tal-PNR riċevuta skont il-Ftehim hija soġġetta għal perjodi ta’ żamma li huma ristretti u mhux itwal minn dak li huwa meħtieġ u proporzjonat għall-objettiv imfittex, jiġifieri, għall-finijiet tal-prevenzjoni, l-iskoperta, l-investigazzjoni u l-prosekuzzjoni ta’ kriminalità serja u reati terroristiċi. Dawn il-perjodi ta’ żamma jiżguraw li, f’konformità mal-ġurisprudenza rilevanti tal-Qorti tal-Ġustizzja tal-Unjoni Ewropea, id-data tal-PNR tista’ tinżamm skont il-Ftehim biss jekk tiġi stabbilita konnessjoni oġġettiva bejn id-data tal-PNR li għandha tinżamm u l-objettiv imfittex. Il-Ftehim jirrikjedi li d-data tal-PNR titħassar hekk kif jiskadu l-perjodi taż-żamma rilevanti jew issir anonima b’tali mod li l-individwu kkonċernat ma jibqax identifikabbli. Il-Ftehim jieħu kont debitu tal-moviment liberu tal-persuni bejn l-Iżvizzera u l-Unjoni.
(13)Il-Ftehim jiżgura li l-iżvelar tad-data tal-PNR mill-awtorità maħtura kompetenti Żvizzera lil awtoritajiet kompetenti oħra tal-Iżvizzera li jinsabu fuq lista jew lill-awtoritajiet kompetenti ta’ Stati oħra, inklużi l-Istati Membri tal-Unjoni jew Pajjiżi oħra Assoċjati ma’ Schengen, jista’ jseħħ biss fuq bażi ta’ każ b’każ u taħt ċerti kundizzjonijiet u salvagwardji. B’mod partikolari, tali żvelar jista’ jseħħ biss jekk l-awtorità riċeventi teżerċita l-funzjonijiet relatati mal-ġlieda kontra t-terroriżmu jew il-kriminalità serja u tiżgura l-istess protezzjonijiet bħal dawk stabbiliti fil-Ftehim. It-trasferimenti ulterjuri lil awtoritajiet kompetenti ta’ pajjiżi terzi oħra huma limitati għal dawk il-pajjiżi li magħhom l-UE għandha Ftehim PNR ekwivalenti jew li għalihom l-Unjoni adottat deċiżjoni ta’ adegwatezza skont il-liġi tagħha dwar il-protezzjoni tad-data li tkopri l-awtoritajiet rilevanti li lilhom huwa maħsub li tiġi ttrasferita d-data tal-PNR.
(14)Il-Ftehim jiżgura sistema ta’ sorveljanza minn awtorità pubblika indipendenti responsabbli għall-protezzjoni tad-data personali b’setgħat effettivi ta’ investigazzjoni, ta’ intervent u ta’ infurzar sabiex tiġi eżerċitata sorveljanza fuq l-awtoritajiet kompetenti maħtura u awtoritajiet kompetenti oħra li jipproċessaw id-data tal-PNR skont il-Ftehim. Dik l-awtorità pubblika indipendenti għandha setgħat sabiex tisma’ lmenti minn individwi, b’mod partikolari dwar l-ipproċessar tad-data tal-PNR li tikkonċernahom.
(15)Il-Ftehim jiżgura d-drittijiet ta’ rimedju amministrattiv u ġudizzjarju effettiv fuq bażi mhux diskriminatorja, irrispettivament min-nazzjonalità jew mill-post ta’ residenza għal kwalunkwe persuna li fir-rigward tagħha tiġi pproċessata d-data tal-PNR skont il-Ftehim, f’konformità mal-Artikolu 47 tal-Karta tad-Drittijiet Fundamentali tal-UE.
(16)Il-Ftehim fih dispożizzjonijiet biex tiġi żgurata informazzjoni adegwata u trasparenti lill-passiġġieri tal-ajru fir-rigward tat-trasferiment u l-ipproċessar ulterjuri tad-data tal-PNR relatata magħhom, kif ukoll id-dritt ta’ notifika individwali f’każ ta’ żvelar ta’ tali data tal-PNR, u, fejn xieraq, ir-rettifika u t-tħassir, sakemm tali notifika ma tipperikolax kwalunkwe investigazzjoni li tkun għaddejja mwettqa mill-awtoritajiet kompetenti bl-użu tad-data tal-PNR.
(17)Il-Ftehim irawwem il-kooperazzjoni mill-pulizija u ġudizzjarja permezz tal-iskambju tad-data tal-PNR, jew tar-riżultati tal-ipproċessar tad-data tal-PNR, bejn l-awtorità kompetenti Żvizzera maħtura u l-awtoritajiet tal-pulizija u ġudizzjarji kompetenti tal-Istati Membri tal-Unjoni, kif ukoll bejn l-awtorità kompetenti Żvizzera maħtura, minn naħa waħda, u l-Europol jew l-Eurojust fil-kompetenzi rispettivi tagħhom, min-naħa l-oħra.
(18)Il-Ftehim jinkludi dispożizzjonijiet għal rieżami konġunt regolari dwar l-aspetti kollha tal-implimentazzjoni tal-Ftehim. Huwa għal perjodu ta’ żmien stabbilit u jinkludi dispożizzjoni li permezz tagħha l-Ftehim jiġġedded għal perjodi simili sakemm Parti ma tinnotifikax id-deċiżjoni tagħha li titterminah. Il-Ftehim jipprevedi mekkaniżmu għas-soluzzjoni tat-tilwim fir-rigward tal-interpretazzjoni, l-applikazzjoni u l-implimentazzjoni tiegħu.
(19)Il-Ftehim huwa awtentiku b’mod ugwali bl-ilsien Bulgaru, Kroat, Ċek, Daniż, Olandiż, Ingliż, Estonjan, Finlandiż, Franċiż, Ġermaniż, Grieg, Ungeriż, Irlandiż, Taljan, Latvjan, Litwan, Malti, Pollakk, Portugiż, Rumen, Slovakk, Sloven, Spanjol u Żvediż u se jinkludi klawsola lingwistika f’dan is-sens.
