—

wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 114 tiegħu,

—

wara li kkunsidra r-Regolament (UE) 2018/302 tat-28 ta’ Frar 2018 dwar l-indirizzar tal-imblukkar ġeografiku mhux ġustifikat u forom oħrajn ta’ diskriminazzjoni abbażi tan-nazzjonalità, tal-post tar-residenza jew tal-post tal-istabbiliment tal-klijenti fi ħdan is-suq intern (1) (ir-Regolament dwar l-Imblukkar Ġeografiku),

—

wara li kkunsidra d-Direttiva 2006/123/KE tat-12 ta’ Diċembru 2006 dwar is-servizzi fis-suq intern (2) (Direttiva dwar is-Servizzi),

—

wara li kkunsidra d-Direttiva 2009/22/KE tat-23 ta’ April 2009 dwar inġunzjonijiet għall-protezzjoni tal-interessi tal-konsumaturi (3),

—

wara li kkunsidra d-Direttiva 2010/13/UE tal-10 ta’ Marzu 2010 dwar il-koordinazzjoni ta’ ċerti dispożizzjonijiet stabbiliti bil-liġi, b’regolament jew b’azzjoni amministrattiva fi Stati Membri dwar il-forniment ta’ servizzi tal-media awdjoviżiva (4) (Direttiva dwar is-Servizzi tal-Media awdjoviżiva),

—

wara li kkunsidra d-Direttiva (UE) 2019/789 tas-17 ta’ April 2019 li tistabbilixxi regoli dwar l-eżerċizzju tad-dritt tal-awtur u ta’ drittijiet relatati li japplikaw għal ċerti trażmissjonijiet online tal-organizzazzjonijiet tax-xandir u għal trażmissjonijiet mill-ġdid tal-programmi tat-televiżjoni u tar-radju (5),

—

wara li kkunsidra r-Regolament (UE) 2017/1128 tal-14 ta’ Ġunju 2017 dwar l-iżgurar tal-portabbiltà transkonfinali tas-servizzi tal-kontenut online fis-suq intern (6) (Regolament dwar il-Portabbiltà),

—

wara li kkunsidra r-Regolament (UE) 2017/2394 tat-12 ta’ Diċembru 2017 dwar il-kooperazzjoni bejn l-awtoritajiet nazzjonali responsabbli għall-infurzar tal-liġijiet tal-protezzjoni tal-konsumaturi (7) (Regolament dwar Kooperazzjoni fil-Protezzjoni tal-Konsumaturi),

—

wara li kkunsidra r-Regolament (UE) 2021/782 tad-29 ta’ April 2021 dwar id-drittijiet u l-obbligi tal-passiġġieri tal-ferroviji (8),

—

wara li kkunsidra r-rapport tal-Kummissjoni tat-30 ta’ Novembru 2020 bit-titolu “L-ewwel reviżjoni ta’ terminu qasir tar-Regolament dwar l-Imblukkar Ġeografiku” (COM(2020)0766) u d-dokument ta’ ħidma tal-persunal li jakkumpanjah (SWD(2020)0294),

—

wara li kkunsidra l-istudju tal-Kummissjoni tal-2020 bit-titolu “The impacts of the extension of the scope of the geo-blocking regulation to audiovisual and non-audiovisual services giving access to copyright protected content” (L-impatti tal-estensjoni tal-kamp ta’ applikazzjoni tar-regolament dwar l-imblukkar ġeografiku għal servizzi awdjoviżivi u mhux awdjoviżivi biex jingħata aċċess għal kontenut protett mid-drittijiet tal-awtur),

—

wara li kkunsidra l-istudju tal-Kummissjoni ta’ Mejju 2016 bit-titolu “Mystery shopping survey on territorial restrictions and geo-blocking in the European Digital Single Market” (Stħarriġ ta’ xiri bil-moħbi dwar ir-restrizzjonijiet territorjali u l-imblukkar ġeografiku fis-Suq Uniku Diġitali Ewropew),

—

wara li kkunsidra l-istudju tal-Kummissjoni tal-2019 bit-titolu “Flash Eurobarometer 477 on Accessing Content Online and Cross-border Portability of Online Content Services, Cross-border Access to Content Online, and Intra-EU Calls” (Flash Eurobarometer 477 dwar l-Aċċess għall-Kontenut Online u l-Portabbiltà Transfruntiera tas-Servizzi tal-Kontenut Online, Aċċess Transfruntier għall-Kontenut Online u Sejħiet Intra-UE),

—

wara li kkunsidra l-istudju tal-Kummissjoni ta’ Ġunju 2020 bit-titolu “Mystery Shopping Survey on territorial restrictions and geo-blocking in the European Digital Single Market” (Stħarriġ ta’ Xiri bil-Moħbi dwar ir-Restrizzjonijiet Territorjali u l-Imblukkar Ġeografiku fis-Suq Uniku Diġitali Ewropew),

—

wara li kkunsidra l-Artikolu 54 tar-Regoli ta’ Proċedura tiegħu, kif ukoll l-Artikolu 1(1)(e) tad-Deċiżjoni tal-Konferenza tal-Presidenti tat-12 ta’ Diċembru 2002 dwar il-proċedura ta’ awtorizzazzjoni għat-tħejjija ta’ rapporti fuq inizjattiva proprja u l-Anness 3 tagħha,

—

wara li kkunsidra l-opinjonijiet tal-Kumitat għall-Kultura u l-Edukazzjoni u tal-Kumitat għall-Affarijiet Legali,

—

wara li kkunsidra r-rapport tal-Kumitat għas-Suq Intern u l-Ħarsien tal-Konsumatur (A9-0335/2023),

A.

billi r-Regolament dwar l-Imblukkar Ġeografiku għandu l-għan li jtejjeb l-aċċess għal prodotti u servizzi għall-klijenti u li jipprevjeni diskriminazzjoni mhux ġustifikata kontra l-klijenti fis-suq uniku billi jsegwi l-erba’ objettivi ewlenin, jiġifieri t-titjib fit-trasparenza għall-klijenti billi jiġi permess l-aċċess għal siti web jew applikazzjonijiet kullimkien fis-suq uniku, jiġu pprevenuti differenzi mhux ġustifikati fit-trattament f’termini tal-aċċess għal prodotti u servizzi għall-klijenti fis-suq uniku kollu, it-titjib fl-infurzar pubbliku b’rabta ma’ mblukkar ġeografiku mhux ġustifikat u kwalunkwe diskriminazzjoni oħra abbażi tal-post ta’ residenza, stabbiliment jew nazzjonalità tal-klijenti, filwaqt li tiżdied ukoll iċ-ċertezza legali għal negozji li jwettqu tranżazzjonijiet transfruntiera;

B.

billi l-għan ġenerali tar-Regolament dwar l-Imblukkar Ġeografiku huwa li jiżgura li l-atturi ekonomiċi jittrattaw lill-klijenti tal-UE (inklużi konsumaturi u utenti aħħarin oħrajn) bl-istess mod, irrispettivament mill-post ġeografiku, in-nazzjonalità jew il-post ta’ residenza tagħhom;

C.

billi l-Parlament talab li l-Kummissjoni tivvaluta b’attenzjoni l-inklużjoni possibbli ta’ servizzi mogħtija elettronikament li l-karatteristika ewlenija tagħhom hija l-għoti ta’ aċċess għal xogħlijiet protetti bid-drittijiet tal-awtur u l-użu tagħhom jew kwistjonijiet oħrajn protetti fil-kamp ta’ applikazzjoni tar-Regolament dwar l-Imblukkar Ġeografiku; billi skont l-Artikolu 9 tar-Regolament dwar l-Imblukkar Ġeografiku, il-Kummissjoni kienet marbuta twettaq din l-evalwazzjoni sat-23 ta’ Marzu 2020; billi r-rapport tal-Kummissjoni dwar l-ewwel rieżami fuq terminu qasir tar-Regolament dwar l-Imblukkar Ġeografiku ddikjara li, fir-rigward tal-kontenut awdjoviżiv, konsumatur Ewropew għandu bħala medja, aċċess għal 14 % biss tal-films disponibbli online fl-EU-27 (9), ifakkar li l-aċċess ivarja ħafna bejn l-Istati Membri, peress li l-konsumaturi fil-Greċja għandhom aċċess biss għal 1,3 % tat-titoli kollha disponibbli fl-Istati Membri kollha tal-UE, filwaqt li l-konsumaturi fil-Ġermanja għandhom aċċess għal 43,1 % tat-titoli kollha tal-films disponibbli fl-Istati Membri kollha;

D.

billi f’Marzu 2021 il-Parlament kellu dibattitu plenarju dwar l-evalwazzjoni tar-Regolament dwar l-Imblukkar Ġeografiku li matulu l-Kummissjoni ġiet mistiedna tadotta proposta leġiżlattiva biex tinkludi s-servizzi awdjoviżivi fil-kamp ta’ applikazzjoni tar-Regolament dwar l-Imblukkar Ġeografiku; billi matul dan id-dibattitu, il-Kummissjoni ħabbret li qed tippjana li tinvolvi ruħha fi djalogu mal-partijiet ikkonċernati biex tidentifika kif għandha trawwem ċirkolazzjoni aħjar tal-kontenut awdjoviżiv madwar l-UE u ħadet rendikont tal-progress li nkiseb sa tmiem l-2022 u mbagħad se tiddeċiedi dwar il-passi li jmiss u tqis diversi għażliet, inklużi interventi leġiżlattivi;

E.

billi l-għadd ta’ konsumaturi li jippruvaw jaċċessaw kontenut awdjoviżiv offrut fl-Istati Membri qed jiżdied b’mod kostanti; billi, għalhekk, il-Kummissjoni beħsiebha tidħol fi djalogu mal-partijiet ikkonċernati bil-għan li trawwem iċ-ċirkolazzjoni ta’ kontenut ta’ kwalità madwar l-UE; billi dan id-djalogu huwa inkluż bħala Azzjoni 7 fil-Pjan ta’ Azzjoni Medjatiku u Awdjoviżiv (10); billi d-djalogu mal-partijiet ikkonċernati enfasizza ċ-ċentralità tal-funzjonament territorjali tas-settur awdjoviżiv, settur li huwa kruċjali għall-UE kemm f’termini ekonomiċi kif ukoll kulturali u huwa vitali biex jiġu ssalvagwardjati d-diversità kulturali u lingwistika u l-pluraliżmu tal-media tal-UE;

F.

billi ċ-ċittadini li jgħixu f’reġjuni tal-fruntiera jew li jappartjenu għal minoranzi lingwistiċi xi kultant ma jitħallewx jaċċessaw kontenut bil-lingwi nattivi tagħhom minħabba l-imblukkar ġeografiku, u dan jista’ jillimita l-aċċess tagħhom għall-kontenut kulturali; billi t-tkabbir tal-kontenut fuq talba u x-xejriet ta’ konsum li qed jinbidlu tal-kontenut awdjoviżiv jistgħu jniedu riflessjoni mill-ġdid tal-approċċ tal-UE għal-liċenzjar tal-kontenut;

G.

billi l-Istati Membri ffaċċjaw sfidi u dewmien fit-traspożizzjoni tar-Regolament dwar l-Imblukkar Ġeografiku;

H.

billi r-Regolament dwar l-Imblukkar Ġeografiku jrid jitqies fil-kuntest tal-pakkett ġenerali ta’ miżuri dwar il-kummerċ elettroniku u fid-dawl ta’ leġiżlazzjoni oħra relatata, b’mod partikolari rigward is-servizzi transfruntiera ta’ konsenja ta’ pakketti, ir-Regolament dwar Kooperazzjoni fil-Protezzjoni tal-Konsumaturi u d-Direttiva dwar is-Servizzi tal-Media Awdjoviżiva, filwaqt li jitqies il-potenzjal tiegħu biex jagħti spinta lill-kummerċ elettroniku transfruntier fl-Ewropa, li huwa prerekwiżit għall-funzjonament sħiħ tas-suq uniku diġitali;

I.

billi ż-żamma tal-imblukkar ġeografiku għal xogħlijiet protetti bid-drittijiet tal-awtur u materjal protett hija waħda mill-għodod ewlenin biex tiġi ggarantita d-diversità kulturali;