This document is an excerpt from the EUR-Lex website
Document 52022PC0464
Recommendation for a COUNCIL DECISION amending Decision (EU) 2021/1345 as regards the opening of negotiations with Colombia and Mexico with a view to concluding agreements on trade in organic products
Rakkomandazzjoni għal DEĊIŻJONI TAL-KUNSILL li temenda d-Deċiżjoni (UE) 2021/1345 fir-rigward tal-ftuħ ta’ negozjati mal-Kolombja u mal-Messiku bil-ħsieb li jiġu konklużi ftehimiet dwar il-kummerċ ta’ prodotti organiċi
Rakkomandazzjoni għal DEĊIŻJONI TAL-KUNSILL li temenda d-Deċiżjoni (UE) 2021/1345 fir-rigward tal-ftuħ ta’ negozjati mal-Kolombja u mal-Messiku bil-ħsieb li jiġu konklużi ftehimiet dwar il-kummerċ ta’ prodotti organiċi
COM/2022/464 final
IL-KUMMISSJONI EWROPEA
Brussell, 15.9.2022
COM(2022) 464 final
Rakkomandazzjoni għal
DEĊIŻJONI TAL-KUNSILL
li temenda d-Deċiżjoni (UE) 2021/1345 fir-rigward tal-ftuħ ta’ negozjati mal-Kolombja u mal-Messiku bil-ħsieb li jiġu konklużi ftehimiet dwar il-kummerċ ta’ prodotti organiċi
MEMORANDUM TA’ SPJEGAZZJONI
1.KUNTEST TAR-RAKKOMANDAZZJONI
•Raġunijiet u objettivi tar-rakkomandazzjoni
Ir-Regolament (UE) 2018/848 tal-Parlament Ewropew u tal-Kunsill ta’ 30 ta’ Mejju 2018 dwar il-produzzjoni organika u t-tikkettar ta’ prodotti organiċi u li jħassar ir-Regolament tal-Kunsill (KE) Nru 834/2007 1 jistabbilixxi l-possibbiltà li jingħata aċċess għas-suq tal-Unjoni għall-prodotti organiċi minn pajjiżi terzi li s-sistema tal-produzzjoni tagħhom tkun ġiet rikonoxxuta fi ftehim kummerċjali li tissodisfa l-istess objettivi u prinċipji billi japplikaw regoli li jiżguraw l-istess livell ta’ assigurazzjoni tal-konformità bħal ta’ dawk tal-Unjoni.
F’konformità mar-Regolament (UE) 2018/848, ir-rikonoxximent ta’ pajjiżi terzi għall-fini tal-ekwivalenza tal-pajjiżi terzi abbażi tal-Artikolu 33(2) tar-Regolament (KE) Nru 834/2007 2 se jiskadi fil-31 ta’ Diċembru 2026. Għalhekk ir-rikonoxximenti mogħtija lill-Arġentina, lill-Awstralja, lill-Kanada, lill-Costa Rica, lill-Indja, lil Iżrael, lill-Ġappun, lil New Zealand, lill-Korea t’Isfel, lit-Tuneżija u lill-Istati Uniti tal-Amerka se jiskadu fid-data msemmija hawn fuq. Sabiex tkun żgurata l-kontinwità tal-flussi tal-kummerċ tal-prodotti organiċi ma’ dawk is-sħab wara l-2026, il-Kunsill awtorizza lill-Kummissjoni biex tniedi n-negozjati meħtieġa biex jiġu żgurati rikonoxximenti tal-ekwivalenza ġodda fil-forma ta’ ftehimiet kummerċjali ma’ dawn il-pajjiżi. Din l-awtorizzazzjoni għan-negozjar ġiet artikolata fid-Deċiżjoni tal-Kunsill (UE) 2021/1345 tat-28 ta’ Ġunju 2021 3 .
L-għan ta’ din ir-rakkomandazzjoni huwa li l-Kolombja u l-Messiku jiġu inklużi fil-kamp ta’ applikazzjoni tad-Deċiżjoni tal-Kunsill (UE) 2021/1345.
Il-Kummissjoni nediet uffiċjalment in-negozjati fl-2016. Dawn in-negozjati kienu bbażati fuq id-Deċiżjoni tal-Kunsill tas-16 ta’ Ġunju 2014, li rreferiet għal perjodu ta’ validità ta’ 3 snin.
In-negozjati mal-Kolombja u mal-Messiku ma setgħux jitlestew fi żmien il-perjodu ta’ 3 snin. Għalhekk ġie propost li tintalab awtorizzazzjoni mġedda billi jitwessa’ il-kamp ta’ applikazzjoni tad-Deċiżjoni tal-Kunsill (UE) 2021/1345. Dan se jippermetti wkoll id-determinazzjoni tal-ekwivalenza possibbli tal-leġiżlazzjoni dwar il-produzzjoni organika li tapplika fil-Kolombja u fil-Messiku permezz ta’ att leġiżlattiv ġdid tal-Unjoni dwar il-produzzjoni organika, jiġifieri r-Regolament (UE) 2018/848 u l-atti delegati u ta’ implimentazzjoni bbażati fuq dak ir-Regolament. Fid-dawl ta’ dan ta’ hawn fuq, ir-rakkomandazzjoni tipproponi li d-Deċiżjoni tal-Kunsill (UE) 2021/1345 tiġi emendata biss sa fejn ikun meħtieġ, mingħajr ma tiġi introdotta l-ebda bidla fid-direttivi tan-negozjati.
Fid-dawl tal-kuntest, ir-rakkomandazzjoni ġiet aċċettata mis-SECGEN bħala Mhux Politikament Sensittiva/Importanti.
•Konsistenza mad-dispożizzjonijiet ta’ politika eżistenti fil-qasam ta’ politika
Billi trawwem il-kummerċ ta’ prodotti organiċi permezz ta’ ftehimiet bilaterali, ir-rakkomandazzjoni se tikkontribwixxi għall-objettiv ġenerali ta’ “Ewropa aktar b’saħħitha fid-dinja” 4 . Barra minn hekk, l-Unjoni diġà għandha ftehimiet kummerċjali eżistenti mal-Kolombja u mal-Messiku.
•Konsistenza ma’ politiki oħra tal-Unjoni
Billi tinkoraġġixxi l-kummerċ ta’ prodotti organiċi, ir-rakkomandazzjoni se tikkontribwixxi wkoll għall-objettiv tal-Patt Ekoloġiku li taħdem mas-sħab internazzjonali biex ittejjeb l-istandards ambjentali globali. Barra minn hekk, ir-rakkomandazzjoni se tiżgura l-kontinwità ma’ deċiżjonijiet preċedenti tal-Unjoni pereżempju li tidħol f’negozjati dwar prodotti organiċi mal-Kolombja u mal-Messiku.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
L-Artikoli 218(3) u (4) tat-Trattat dwar il-Funzjonament tal-Unjoni Ewropea (TFUE).
•Sussidjarjetà (għall-kompetenza mhux esklużiva)
Skont l-Artikolu 5(3) tat-TUE, il-prinċipju tas-sussidjarjetà ma japplikax fl-oqsma fejn il-kompetenza hija esklużivament tal-Unjoni.
•Proporzjonalità
Ir-rakkomandazzjoni tal-Kummissjoni hija bi qbil mal-prinċipju tal-proporzjonalità.
•Għażla tal-istrument
L-uniku strument disponibbli biex jintlaħaq dan l-objettiv huwa ftehim internazzjonali. Għalhekk hija meħtieġa awtorizzazzjoni biex jinfetħu n-negozjati dwar ftehim internazzjonali. Kif ġie spjegat, dan il-każ partikolari ma jeħtieġx strument legali ġdid, iżda sempliċiment emenda tad-Deċiżjoni tal-Kunsill (UE) 2021/1345.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Mhux applikabbli.
•Konsultazzjonijiet mal-partijiet ikkonċernati
Saru għadd ta’ konsultazzjonijiet mal-partijiet ikkonċernati fil-kuntest tar-riforma tal-att leġiżlattiv dwar il-produzzjoni organika u t-tikkettar ta’ prodotti organiċi. F’dak l-istess żmien ġew organizzati diversi laqgħat u laqgħat ta’ Djalogu tas-Soċjetà Ċivili.
Barra minn hekk, fit-22 ta’ Novembru 2021, il-Kummissjoni ddiskutiet mal-Istati Membri fil-Kumitat Speċjali dwar l-Agrikoltura (KSA) il-possibbiltà li l-Kolombja u l-Messiku jiddaħħlu fil-kamp ta’ applikazzjoni tad-Deċiżjoni tal-Kunsill (UE) 2021/1345. Wara d-diskussjonijiet, il-KSA indika li fil-futur qrib il-Kummissjoni kienet mistennija tressaq proposta għal aġġornament tad-Deċiżjoni tal-Kunsill 1345/2021.
•Ġbir u użu tal-għarfien espert
Mhux rilevanti.
•Valutazzjoni tal-impatt
Ir-rakkomandazzjoni hija bbażata fuq l-Artikolu 218(3) u (4) tat-TFUE. Għalhekk, mhijiex meħtieġa valutazzjoni tal-impatt.
•Idoneità regolatorja u simplifikazzjoni
Mhux applikabbli.
•Drittijiet fundamentali
Ir-rakkomandazzjoni hija konsistenti mat-Trattati tal-UE u mal-Karta tad-Drittijiet Fundamentali tal-Unjoni Ewropea.
4.IMPLIKAZZJONIJIET BAĠITARJI
Mhux rilevanti.
5.ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar
Mhux applikabbli.
•Dokumenti ta’ spjegazzjoni (għad-direttivi)
Mhux applikabbli.
•Spjegazzjoni fid-dettall tad-dispożizzjonijiet speċifiċi tar-rakkomandazzjoni
Ir-rakkomandazzjoni tipproponi li l-Kummissjoni tiġi awtorizzata tinnegozja ftehimiet dwar il-kummerċ ta’ prodotti organiċi mal-Kolombja u mal-Messiku f’isem l-Unjoni. Għalhekk, dawn iż-żewġ pajjiżi jiżdiedu mal-lista li diġà ġiet inkluża fid-Deċiżjoni tal-Kunsill (UE) 2021/1345: L-Arġentina, l-Awstralja, il-Kanada, il-Costa Rica, l-Indja, Iżrael, il-Ġappun, New Zealand, il-Korea t’Isfel, it-Tuneżija u l-Istati Uniti tal-Amerka. Ir-rakkomandazzjoni tipproponi li fl-anness jinżammu l-istess direttivi għan-negozjar li għandhom jiġu segwiti mill-Kummissjoni u mill-kumitat speċjali li għandu jiġi kkonsultat matul in-negozjati.
Rakkomandazzjoni għal
DEĊIŻJONI TAL-KUNSILL
li temenda d-Deċiżjoni (UE) 2021/1345 fir-rigward tal-ftuħ ta’ negozjati mal-Kolombja u mal-Messiku bil-ħsieb li jiġu konklużi ftehimiet dwar il-kummerċ ta’ prodotti organiċi
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 218(3) u (4) tiegħu,
Wara li kkunsidra r-rakkomandazzjoni tal-Kummissjoni Ewropea,
Billi:
(1)Ir-Regolament (UE) 2018/848 tal-Parlament Ewropew u tal-Kunsill 5 jistabbilixxi l-possibbiltà li jingħata aċċess għas-suq tal-Unjoni lil prodotti organiċi minn pajjiżi terzi li jkunu ġew rikonoxxuti li għandhom sistema ta’ produzzjoni li tissodisfa l-istess objettivi u prinċipji billi jiġu applikati regoli li jiżguraw l-istess livell ta’ assigurazzjoni tal-konformità bħal dawk tal-Unjoni, fi ftehim kummerċjali.
(2)Id-Deċiżjoni tal-Kunsill (UE) 2021/1345 6 awtorizzat il-ftuħ ta’ negozjati rigward ftehimiet dwar il-kummerċ ta’ prodotti organiċi bejn l-Unjoni Ewropea u l-Arġentina, l-Awstralja, il-Kanada, il-Costa Rica, l-Indja, Iżrael, il-Ġappun, New Zealand, il-Korea t’Isfel, it-Tuneżija u l-Istati Uniti.
(3)Il-Kummissjoni bdiet in-negozjati mal-Kolombja u mal-Messiku skont awtorizzazzjoni preċedenti għan-negozjar. Din l-awtorizzazzjoni kienet tinkludi limitazzjoni tat-tul tan-negozjati, li ma setgħux jiġu konklużi qabel ma n-negozjati jilħqu t-terminu. Għalhekk huwa xieraq li tiġi emendata d-Deċiżjoni (UE) 2021/1345 sabiex tinkludi lill-Kolombja u lill-Messiku fil-kamp ta’ applikazzjoni tagħha.
(4)Id-direttivi għan-negozjar inklużi fl-addendum għad-Deċiżjoni (UE) 2021/1345 jenħtieġ li jiġu emendati sabiex jinkludu referenzi għall-Kolombja u għall-Messiku.
(5)Għalhekk jenħtieġ li d-Deċiżjoni (UE) 2021/1345 tiġi emendata skont dan,
ADOTTA DIN ID-DEĊIŻJONI:
Artikolu 1
Id-Deċiżjoni (UE) 2021/1345 hija emendata kif ġej:
(1)it-titolu huwa sostitwit b’dan li ġej:
“Deċiżjoni tal-Kunsill (UE) 2021/1345 tat-28 ta’ Ġunju 2021 li tawtorizza l-ftuħ ta’ negozjati mal-Arġentina, mal-Awstralja, mal-Kanada, mal-Kolombja, mal-Costa Rica, mal-Indja, ma’ Iżrael, mal-Ġappun, mal-Messiku, ma’ New Zealand, mal-Korea t’Isfel, mat-Tuneżija u mal-Istati Uniti bil-ħsieb li jiġu konklużi ftehimiet dwar il-kummerċ ta’ prodotti organiċi”;
(2)L-Artikolu 1(1) huwa sostitwit b’dan li ġej:
“B’dan, il-Kummissjoni hija awtorizzata li tiftaħ negozjati mal-Arġentina, mal-Awstralja, mal-Kanada, mal-Kolombja, mal-Costa Rica, mal-Indja, ma’ Iżrael, mal-Ġappun, mal-Messiku, ma’ New Zealand, mal-Korea t’Isfel, mat-Tuneżija u mal-Istati Uniti bil-ħsieb li jiġu konklużi ftehimiet dwar il-kummerċ ta’ prodotti organiċi.”;
(3)l-addendum huwa sostitwit bit-test stabbilit fl-Anness ta’ din id-Deċiżjoni.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 15.9.2022
COM(2022) 464 final
ANNESS
ta' [...]
Rakkomandazzjoni għal DEĊIŻJONI TAL-KUNSILL
li temenda d-Deċiżjoni (UE) 2021/1345 fir-rigward tal-ftuħ ta' negozjati mal-Kolombja u mal-Messiku bil-ħsieb li jiġu konklużi ftehimiet dwar il-kummerċ ta' prodotti organiċi
ANNESS
“ADDENDUM
DIRETTIVI GĦAN-NEGOZJAR TA’ FTEHIMIET DWAR IL-KUMMERĊ TA’ PRODOTTI ORGANIĊI BEJN L-UNJONI EWROPEA U L-ARĠENTINA, L-AWSTRALJA, IL-KANADA, IL-KOLOMBJA, IL-COSTA RICA, L-INDJA, IŻRAEL, IL-ĠAPPUN, IL-MESSIKU, NEW ZEALAND, IL-KOREA T’ISFEL, IT-TUNEŻIJA U L-ISTATI UNITI
1. Il-Kummissjoni tista’ tidħol f’negozjati mal-Arġentina, mal-Awstralja, mal-Kanada, mal-Kolombja, mal-Costa Rica, mal-Indja, ma’ Iżrael, mal-Ġappun, mal-Messiku, ma’ New Zealand, mal-Korea t’Isfel, mat-Tuneżija u mal-Istati Uniti bil-ħsieb li tikseb ftehimiet bilanċjati dwar l-ekwivalenza tas-sistemi ta’ standards u kontroll ta’ prodotti organiċi.
2. In-negozjati għandhom ikunu mmirati biex jiffaċilitaw il-kummerċ ta’ prodotti organiċi b’mod reċiproku u ta’ benefiċċju għaż-żewġ partijiet.
3. In-negozjati għandhom jikkonċernaw prodotti imsemmija fl-Artikolu 2(1) tar-Regolament (UE) 2018/848 li jinkisbu jew jiġu prodotti fit-territorju tal-Unjoni u fit-territorju tal-pajjiż terz rilevanti.
4. Il-Kummissjoni għandha tfittex li tikseb livell għoli ta’ rispett tal-objettivi u tal-prinċipji tal-produzzjoni organika u livell għoli ta’ garanziji tas-sistema tal-kontrolli, li tinkludi s-sorveljanza, kif stipulat fir-Regolament (UE) 2018/848.
5. Il-Kummissjoni għandu jkollha l-għan li tikseb il-protezzjoni tat-termini, tad-derivattivi jew id-diminuttivi tagħhom u tal-logo tal-Unjoni, li jirreferu għall-produzzjoni organika sabiex tirriżerva l-użu tagħhom għat-tikkettar tal-prodotti f’konformità mar-Regolament (UE) 2018/848.
6. Il-Kummissjoni għandha tqis il-prinċipji u r-regoli tal-produzzjoni tal-linji gwida CAC/GL 32 tal-Codex alimentarius.
7. Dment li ma jkunx previst mod ieħor fid-direttivi għan-negozjar ta’ Ftehim ta’ Kummerċ Ħieles mal-pajjiż terz ikkonċernat, il-Kummissjoni għandha tapplika d-direttivi għan-negozjar attwali għad-dispożizzjonijiet marbutin mal-kummerċ ta’ prodotti organiċi meta tkun qed tqis kif tindirizza kwistjonijiet ta’ kummerċ ta’ prodotti organiċi fin-negozjati attwali jew futuri ta’ Ftehim ta’ Kummerċ Ħieles bejn l-Unjoni u pajjiżi terzi.
8. Meta tkun qed tmexxi n-negozjati abbażi ta’ dawn id-direttivi għan-negozjar, il-Kummissjoni għandha b’mod partikolari tqis il-prinċipji u l-mekkaniżmi tat-Trattat dwar il-Funzjonament tal-Unjoni Ewropea u l-obbligi li jirriżultaw mir-regoli tal-Organizzazzjoni Dinjija tal-Kummerċ.
9. Il-ftehim għandu jipprevedi li l-partijiet kontraenti jieħdu l-miżuri x-xierqa f’każ li jkun hemm nuqqas ta’ kooperazzjoni jew ġestjoni amministrattiva.
Qabel ma tagħti bidu għan-negozjati mal-pajjiżi terzi kkonċernati, il-Kummissjoni għandha tinforma lill-Kumitat Speċjali dwar l-Agrikoltura tal-Kunsill tal-Unjoni Ewropea, u taġġornah regolarment dwar il-progress tagħhom.”
