This document is an excerpt from the EUR-Lex website
Document 52022PC0164
Proposal for a COUNCIL DECISION on the position to be taken on behalf of the European Union in the Association Council set up by the Euro-Mediterranean Agreement establishing an association between the European Communities and their Member States, of the one part, and the Hashemite Kingdom of Jordan, of the other part, with regard to the adoption of EU-Jordan Partnership Priorities
Proposta għal DEĊIŻJONI TAL-KUNSILL dwar il-pożizzjoni li għandha tittieħed f'isem l-Unjoni Ewropea fil-Kunsill ta’ Assoċjazzjoni mwaqqaf mill-Ftehim Ewro-Mediterranju li jistabbilixxi Assoċjazzjoni bejn il-Komunitajiet Ewropej u l-Istati Membri tagħhom, fuq in-naħa l-waħda, u r-Renju Ħaxemita tal-Ġordan, fuq in-naħa l-oħra, fir-rigward tal-adozzjoni tal-Prijoritajiet ta’ Sħubija bejn l-UE u l-Ġordan
Proposta għal DEĊIŻJONI TAL-KUNSILL dwar il-pożizzjoni li għandha tittieħed f'isem l-Unjoni Ewropea fil-Kunsill ta’ Assoċjazzjoni mwaqqaf mill-Ftehim Ewro-Mediterranju li jistabbilixxi Assoċjazzjoni bejn il-Komunitajiet Ewropej u l-Istati Membri tagħhom, fuq in-naħa l-waħda, u r-Renju Ħaxemita tal-Ġordan, fuq in-naħa l-oħra, fir-rigward tal-adozzjoni tal-Prijoritajiet ta’ Sħubija bejn l-UE u l-Ġordan
COM/2022/164 final
IL-KUMMISSJONI EWROPEA
Brussell, 6.4.2022
COM(2022) 164 final
2022/0107(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f'isem l-Unjoni Ewropea fil-Kunsill ta’ Assoċjazzjoni mwaqqaf mill-Ftehim Ewro-Mediterranju li jistabbilixxi Assoċjazzjoni bejn il-Komunitajiet Ewropej u l-Istati Membri tagħhom, fuq in-naħa l-waħda, u r-Renju Ħaxemita tal-Ġordan, fuq in-naħa l-oħra, fir-rigward tal-adozzjoni tal-Prijoritajiet ta’ Sħubija bejn l-UE u l-Ġordan
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni li tistabbilixxi l-pożizzjoni li għandha tittieħed f’isem l-Unjoni fil-Kunsill ta’ Assoċjazzjoni bejn l-UE u l-Ġordan b’rabta mal-adozzjoni prevista tal-Prijoritajiet tas-Sħubija bejn l-UE u l-Ġordan għall-perjodu 2021-2027.
2.Kuntest tal-proposta
2.1.Il-Ftehim Ewro-Mediterranju
Il-Ftehim Ewro-Mediterranju (il-Ftehim ta’ Assoċjazzjoni) ġie ffirmat fi Brussell fl-24 ta’ Novembru 1997 u daħal fis-seħħ fl-1 ta’ Mejju 2002 (“il-Ftehim”). Dan huwa l-bażi ġuridika għar-relazzjonijiet bilaterali bejn l-UE u l-Ġordan.
Il-Ftehim għandu l-għan li
–jipprovdi qafas xieraq għad-djalogu politiku, li jippermetti l-iżvilupp ta’ relazzjonijiet politiċi mill-qrib bejn il-Partijiet,
–jistabbilixxi l-kundizzjonijiet għal-liberalizzazzjoni progressiva tal-kummerċ ta’ oġġetti, servizzi u kapital,
–irawwem l-iżvilupp ta’ relazzjonijiet ekonomiċi u soċjali bbilanċjati bejn il-Partijiet permezz tad-djalogu u l-kooperazzjoni,
–itejjeb il-kundizzjonijiet ta’ għajxien u ta’ xogħol, u jtejjeb il-produttività u l-istabbiltà finanzjarja,
–jinkoraġġixxi l-kooperazzjoni reġjonali sabiex tiġi kkonsolidata koeżistenza paċifika u l-istabbiltà ekonomika u politika,
–jippromwovi l-kooperazzjoni f’oqsma oħrajn li huma ta’ interess reċiproku.
2.2.Il-Kunsill ta’ Assoċjazzjoni bejn l-UE u l-Ġordan
Il-Kunsill ta’ Assoċjazzjoni bejn l-UE u l-Ġordan inħoloq fil-qafas tal-Ftehim Ewro-Mediterranju (l-Artiklu 89) li jistabbilixxi l-assoċjazzjoni bejn il-Komunitajiet Ewropej u l-Istati Membri tagħhom, fuq in-naħa l-waħda, u r-Renju Ħaxemita tal-Ġordan, fuq in-naħa l-oħra li ġie ffirmat fl-24 ta’ Novembru 1997 u daħal fis-seħħ fl-1 ta’ Mejju 2002 1 .
Il-Kunsill ta’ Assoċjazzjoni għandu s-setgħa li jieħu deċiżjonijiet għall-finijiet tal-ilħuq tal-objettivi tal-Ftehim fil-każijiet li jkunu previsti fih. Id-deċiżjonijiet huma vinkolanti fuq il-Partijiet. Skont ir-Regoli ta’ Proċedura tiegħu, il-presidenza tal-Kunsill ta’ Assoċjazzjoni tkun għal perjodu ta’ 12-il xahar u talterna bejn l-UE u l-Ġordan . Il-Kunsill ta’ Assoċjazzjoni jiltaqa’ regolarment fil-livell ministerjali darba fis-sena.
2.3.L-att previst tal-Kunsill ta’ Assoċjazzjoni bejn l-UE u l-Ġordan
Matul l-XIV-il laqgħa, il-Kunsill ta’ Assoċjazzjoni bejn l-UE u l-Ġordan għandu jadotta deċiżjoni rigward il-Prijoritajiet tas-Sħubija bejn l-UE u l-Ġordan għall-perjodu 2021-2027 (“l-att previst”).
L-għan tal-att previst huwa li jiggwida u jinforma s-sħubija bejn l-UE u l-Ġordan matul il-perjodu 2021-2027.
Il-Politika Ewropea tal-Viċinat riveduta 2 adottata f’Novembru 2015 tistabbilixxi qafas biex jiddefinixxi r-relazzjonijiet bilaterali mas-sħab. Dawn jenħtieġ li jinġabru f’dokument politiku definit bħala “Prijoritajiet ta’ Sħubija”, li huma punt ta’ referenza ewlieni għall-pajjiżi sħab biex jiftiehmu dwar sett limitat ta’ prijoritajiet fil-mira għas-snin li ġejjin. L-UE u l-Ġordan għandhom sħubija b’saħħitha. Il-Ġordan huwa sieħeb ewlieni tal-UE, u l-UE tapprezza ħafna r-rwol importanti ta’ moderazzjoni li għandu l-Ġordan fir-reġjun. Bil-ħsieb li tissaħħaħ aktar ir-relazzjoni solida u multidimensjonali bejn iż-żewġ sħab, ġew identifikati prijoritajiet ta’ Sħubija biex jappoġġaw l-implimentazzjoni tal-Ftehim ta’ Assoċjazzjoni bejn l-UE u l-Ġordan.
Il-“Prijoritajiet ta' Sħubija” jirriflettu l-interessi komuni u jiffokaw fuq oqsma fejn il-kooperazzjoni bejn l-UE u l-Ġordan hija ta’ benefiċċju għat-tnejn li huma. Il-prijoritajiet politiċi ewlenin identifikati fir-relazzjonijiet bejn l-UE u l-Ġordan għall-perjodu 2021-2027 huma: (i) it-tisħiħ tal-kooperazzjoni fl-istabbiltà reġjonali u fis-sigurtà, inkluż fil-ġlieda kontra t-terroriżmu; (ii) il-promozzjoni tal-irkupru ekonomiku u l-istabbiltà, tkabbir ekoloġiku, diġitali, inklużiv u bbażat fuq l-għarfien, il-kwalità tal-edukazzjoni u l-ħolqien ta’ impjiegi deċenti, anki għaż-żgħażagħ; (iii) it-tisħiħ tal-governanza tajba, l-istat tad-dritt, ir-riforma demokratika u d-drittijiet tal-bniedem, inklużi d-drittijiet soċjali u tax-xogħol. Huwa f’dan id-dawl li l-UE u l-Ġordan huma impenjati li jkomplu jsaħħu l-kooperazzjoni fi kwistjonijiet trażversali li jvarjaw mill-istabbilizzazzjoni u s-sigurtà għall-istat tad-dritt u d-drittijiet tal-bniedem, l-ugwaljanza bejn il-ġeneri u l-emanċipazzjoni tan-nisa, id-djalogu mas-soċjetà ċivili, il-migrazzjoni u l-mobilità u l-indirizzar tal-estremiżmu vjolenti. Il-progress fl-implimentazzjoni effettiva tal-komponenti differenti tas-Sħubija għall-Mobilità huwa prijorità trażversali.
3.Pożizzjoni li għandha tittieħed f’isem l-Unjoni
Il-pożizzjoni li għandha tittieħed f’isem l-Unjoni jenħtieġ li tkun li tapprova l-abbozz tal-Prijoritajiet tas-Sħubija bejn l-UE u l-Ġordan kif anness ma’ din il-proposta.
Il-prijoritajiet tas-Sħubija bejn l-UE u l-Ġordan jinkorporaw l-għanijiet kondiviżi tal-Politika Ewropea tal-Viċinat bħala żona komuni ta’ paċi, prosperità u stabbiltà. Jinkorporaw il-karatteristiċi ewlenin tagħha, differenzazzjoni u sjieda konġunta, iżda anki flessibbiltà li tippermetti l-adattament għaċ-ċirkustanzi li jevolvu kif miftiehem bejn l-UE u l-Ġordan. Barra minn hekk, jaqblu mal-aspirazzjoni ddikjarata fil-konklużjonijiet tal-Kunsill Ewropew tal-10-11 ta’ Diċembru 2020 3 għal Viċinat tan-Nofsinhar demokratiku aktar stabbli, aktar ekoloġiku u aktar prosperu bħala prijorità strateġika għall-UE.
Il-Prijoritajiet tas-Sħubija jinkorporaw ukoll l-objettivi tal-Aġenda ġdida għall-Mediterran, ambizzjuża u innovattiva, stabbilita fil-Komunikazzjoni Konġunta tal-Kummissjoni u r-Rappreżentant Għoli dwar il-Viċinat tan-Nofsinhar tad-9 ta’ Frar 2021 4 , u fil-konklużjonijiet sussegwenti tal-Kunsill dwar Sħubija mġedda mal-Viċinat tan-Nofsinhar tas-16 ta’ April 2021 5 , li għandha l-għan li tniedi mill-ġdid il-kooperazzjoni u twettaq il-potenzjal mhux sfruttat tar-relazzjoni. Tappoġġa wkoll l-implimentazzjoni effiċjenti u f’waqtha ta’ inizjattivi ewlenin tal-Pjan Ekonomiku u ta’ Investiment għall-Viċinat tan-Nofsinhar 6 maqbula b’mod reċiproku li se ssaħħaħ is-sħubija tal-UE mal-Ġordan u tgħin fil-protezzjoni tal-beni komuni tagħna fil-Mediterran.
L-aġenda l-ġdida għall-Mediterran toffri opportunitajiet għal sħubijiet ġodda dwar prijoritajiet strateġiċi ta’ tranżizzjonijiet ekoloġiċi u diġitali li se jikkontribwixxu għas-sostenibbiltà, il-prosperità u r-reżiljenza. F’dawn l-isforzi, l-UE u l-Ġordan se jibnu fuq is-sħubija mal-Ġordan u l-implimentazzjoni kontinwa tal-aġenda ta’ riforma tal-Ġordan. L-UE u l-Ġordan se jkomplu jaħdmu flimkien b’mod kostruttiv bħala kopresidenzi tal-Unjoni għall-Mediterran biex irawmu sħubija b’saħħitha madwar il-Mediterran.
L-UE u l-Ġordan ikkonfermaw objettivi kondiviżi u interessi komuni fit-tfittix ta’ proċess ta’ paċi kif ukoll ritorn għall-istabbiltà u l-paċi fis-Sirja. Dan eventwalment jippermetti r-ritorn volontarju, sikur u dinjituż tar-refuġjati. Sadanittant, huwa importanti li jiġu sostnuti l-livelli ta’ assistenza u l-aċċess għall-protezzjoni, l-edukazzjoni, l-għajxien u s-servizzi għar-refuġjati Sirjani fil-Ġordan.
F’konformità mal-Aġenda l-ġdida għall-Mediterran, is-sħubija bejn l-UE u l-Ġordan se tkompli tkun ibbażata fuq valuri u djalogu komuni, u se tagħmel progress fuq aġenda soċjoekonomika u politika kondiviża, anki dwar ir-riformi u l-implimentazzjoni tagħhom f’oqsma bħall-governanza tajba, l-istat tad-dritt, id-drittijiet tal-bniedem, il-koeżjoni soċjali u l-opportunitajiet indaqs għal kulħadd, in-nondiskriminazzjoni, il-protezzjoni ambjentali u tal-klima, l-istabbiltà makroekonomika u l-ambjent tan-negozju. Dan se jkollu l-għan ta’ rkupru ekoloġiku, diġitali, reżiljenti u ġust wara l-COVID-19, f’konformità mal-Aġenda 2030 għall-Iżvilupp Sostenibbli, il-Ftehim ta’ Pariġi u l-Patt Ekoloġiku Ewropew.
It-tħeġġiġ tal-irkupru soċjoekonomiku sostenibbli fit-tul u l-ħolqien tal-impjiegi fil-Viċinat tan-Nofsinhar huwa prijorità komuni ewlenija u s-sisien innovattiv tal-Aġenda l-ġdida għall-Mediterran. Id-dokument ta’ ħidma konġunt tal-persunal dwar pjan ekonomiku u ta’ investiment għall-Viċinat tan-Nofsinhar anness mal-Komunikazzjoni Konġunta, li fih il-Ġordan jidher b’mod prominenti, huwa sforz determinat biex jagħti sustanza lil din is-sħubija u jiffoka fuq proġetti ewlenin li jsaħħu s-sħubija tal-UE mal-Ġordan. L-implimentazzjoni tal-inizjattivi ewlenin tal-Pjan Ekonomiku u ta’ Investiment tal-Aġenda l-Ġdida għall-Mediterran se tikkontribwixxi għat-twettiq tal-Prijoritajiet tas-Sħubija u tikkostitwixxi parti importanti tal-kooperazzjoni tal-UE mal-Ġordan.
Is-sħubija u l-oqsma ta’ prijorità ta’ kooperazzjoni sejrin ikomplu jiġu sostnuti permezz ta’ laqgħat politiċi regolari ta’ livell għoli; l-ekonomija, l-impjiegi u l-affarijiet soċjali, il-kummerċ, il-ġustizzja, id-drittijiet tal-bniedem, il-proċessi demokratiċi, id-djalogi dwar il-klima u l-ambjent; is-Sħubija għall-Mobilità bejn l-UE u l-Ġordan; il-Ftehim dwar ix-Xjenza u t-Teknoloġija bejn l-UE u l-Ġordan u oqsma oħra eżistenti ta’ koperazzjoni; l-impenn tal-UE u l-Ġordan li jsaħħu d-djalogu u l-kooperazzjoni dwar is-sigurtà inkluża l-ġlieda kontra l-estremiżmu vjolenti u t-terroriżmu u ċ-ċibersigurtà; kif ukoll il-kooperazzjoni bilaterali kontinwa b’appoġġ għall-Ġordan.
Id-dokument tal-Prijoritajiet tas-Sħubija jikkunsidra, fost oħrajn, il-promozzjoni tad-drittijiet tal-bniedem u l-governanza tajba, id-dimensjoni esterna tal-politiki tal-UE dwar il-migrazzjoni, aktar attenzjoni fuq il-kooperazzjoni internazzjonali fil-ġlieda kontra t-terroriżmu u l-estremiżmu vjolenti u l-potenzjal tal-kummerċ li jiġġenera tkabbir ġust u impjiegi deċenti.
Il-Prijoritajiet tas-Sħubija bejn l-UE u l-Ġordan kienu abbozzati wara konsultazzjoni mill-qrib mas-servizzi relevanti tal-Kummissjoni u mar-rappreżentanti tal-Istati Membri tal-UE fil-Grupp ta’ Ħidma tal-Kunsill dwar il-Magreb u l-Maxreq, kif ukoll wara diskussjonijiet mal-kontropartijiet tal-Ġordan. Saru konsultazzjonijiet ma’ firxa wiesgħa ta’ partijiet ikkonċernati tas-soċjetà ċivili permezz tad-Delegazzjoni tal-UE għall-Ġordan, inklużi dawk li jaħdmu fuq kwistjonijiet soċjali, ekonomiċi, tad-drittijiet tal-bniedem u tad-demokratizzazzjoni, kif ukoll is-settur tan-negozju.
4.Bażi ġuridika
4.1.Bażi ġuridika proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
Il-kunċett ta’ “atti li jkollhom effetti legali” jinkludi l-atti li għandhom effetti legali bis-saħħa ta’ regoli tad-dritt internazzjonali li jirregolaw il-korp inkwistjoni. Dan jinkludi wkoll strumenti li ma għandhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatura tal-Unjoni” 7 .
4.1.2.Applikazzjoni għal dan il-każ
Il-Kunsill ta’ Assoċjazzjoni bejn l-UE u l-Ġordan huwa korp imwaqqaf bi ftehim, jiġifieri l-Ftehim Ewro-Mediterranju li jistabbilixxi l-Assoċjazzjoni bejn il-Komunitajiet Ewropej u l-Istati Membri tagħhom, fuq in-naħa l-waħda, u r-Renju Ħaxemita tal-Ġordan, fuq in-naħa l-oħra, li ġie ffirmat fl-24 ta’ Novembru 1997 u daħal fis-seħħ fl-1 ta’ Mejju 2002.
L-att li l-Kunsill ta’ Assoċjazzjoni bejn l-UE u l-Ġordan huwa mitlub jadotta huwa att b’effetti legali. L-att previst kapaċi jinfluwenza b’mod deċiżiv il-kontenut tal-leġiżlazzjoni tal-UE, jiġifieri: il-politika tagħha ta’ kooperazzjoni għall-iżvilupp fir-rigward tal-Ġordan. Dan għaliex il-Prijoritajiet tas-Sħubija bejn l-UE u l-Ġordan se jiggwidaw u jinfurmaw ir-relazzjonijiet futuri bejn l-UE u l-Ġordan, inkluż l-ipprogrammar tal-għajnuna fil-kuntest tal-kooperazzjoni għall-iżvilupp taħt l-Istrument il-ġdid ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali (NDICI), matul il-perjodu 2021-2027. L-att previst la jissupplimenta u lanqas jemenda l-qafas istituzzjonali tal-Ftehim.
Għalhekk, il-bażi ġuridika proċedurali għad-deċiżjoni proposta hija l-Artikolu 218(9) TFUE.
4.2.Bażi ġuridika sostantiva
4.2.1.Prinċipji
Il-bażi ġuridika sostantiva għal deċiżjoni skont l-Artikolu 218(9) TFUE tiddependi primarjament mill-objettiv u mill-kontenut tal-att previst li dwaru tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawn l-għanijiet jew komponenti jkun jista’ jiġi identifikat bħala dak ewlieni, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) TFUE trid tkun imsejsa fuq bażi ġuridika sostantiva waħda, jiġifieri dik li jeżiġi l-għan jew il-komponent ewlieni jew predominanti.
4.2.2.Applikazzjoni għal dan il-każ
L-objettiv ewlieni u l-kontenut tal-att previst jirrigwardaw kooperazzjoni ma’ pajjiż terz fil-qafas ta’ ftehim ta’ assoċjazzjoni u tal-Politika Ewropea tal-Viċinat. Il-miżuri li l-adozzjoni tagħhom kienet prevista jikkonċernaw, b’mod ġenerali, l-oqsma kollha koperti mill-Ftehim ta’ Assoċjazzjoni u għandhom l-għan li jimplimentaw u japprofondixxu aktar l-assoċjazzjoni bejn il-Partijiet. Minn dan isegwi li l-qasam li taqa’ taħtu d-deċiżjoni kkontestata għandu jiġi ddeterminat fid-dawl tal-Ftehim ta’ Assoċjazzjoni fl-intier tiegħu. Għalhekk, il-bażi ġuridika sostantiva tad-deċiżjoni proposta hija l-Artikolu 217 TFUE.
4.3.Konklużjoni
Il-bażi ġuridika tad-deċiżjoni proposta jenħtieġ li tkun l-Artikolu 217, flimkien mal-Artikolu 218(9) tat-TFUE.
5.Pubblikazzjoni tal-att previst
Peress li l-att tal-Kunsill ta’ Assoċjazzjoni se jieħu post il-Prijoritajiet ta’ Sħubija preċedenti bejn l-UE u l-Ġordan adottati bid-Deċiżjoni N 1/2016 tal-Kunsill ta’ Assoċjazzjoni bejn l-UE u l-Ġordan tad-19 ta’ Diċembru 2016, huwa xieraq li dan jiġi ppubblikat f’Il-Ġurnal Uffiċjali tal-Unjoni Ewropea wara l-adozzjoni tiegħu.
2022/0107 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f'isem l-Unjoni Ewropea fil-Kunsill ta’ Assoċjazzjoni mwaqqaf mill-Ftehim Ewro-Mediterranju li jistabbilixxi Assoċjazzjoni bejn il-Komunitajiet Ewropej u l-Istati Membri tagħhom, fuq in-naħa l-waħda, u r-Renju Ħaxemita tal-Ġordan, fuq in-naħa l-oħra, fir-rigward tal-adozzjoni tal-Prijoritajiet ta’ Sħubija bejn l-UE u l-Ġordan
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 217 flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Ftehim Ewro-Mediterranju li jistabbilixxi Assoċjazzjoni bejn il-Komunitajiet Ewropej u l-Istati Membri tagħhom fuq in-naħa l-waħda, u r-Renju Ħaxemita tal-Ġordan, fuq in-naħa l-oħra (il-‘Ftehim’) ġie ffirmat fl-24 ta’ Novembru 1997 8 u daħal fis-seħħ fl-1 ta’ Mejju 2002.
(2)Skont l-Artikolu 91(1) tal-Ftehim Ewro-Mediterranju, il-Kunsill ta’ Assoċjazzjoni jista’ jieħu deċiżjonijiet għall-finijiet tal-ilħuq tal-objettivi tal-Ftehim. Il-Kunsill ta’ Assoċjazzjoni bejn l-UE u l-Ġordan, matul l-XIV-il laqgħa tiegħu, għandu jadotta l-Prijoritajiet tas-Sħubija bejn l-UE u l-Ġordan.
(3)Ikun xieraq li tiġi stabbilita l-pożizzjoni li għandha tiġi adottata f’isem l-Unjoni fil-Kunsill ta’ Assoċjazzjoni bejn l-UE u l-Ġordan, billi d-deċiżjoni se tkun vinkolanti fuq l-Unjoni.
(4)L-għan tal-att previst huwa li jiggwida u jinforma s-sħubija bejn l-UE u l-Ġordan matul il-perjodu 2021-2027. L-UE u l-Ġordan għandhom sħubija b’saħħitha. Il-Ġordan huwa sieħeb ewlieni tal-UE, u l-UE tapprezza ħafna r-rwol importanti ta’ moderazzjoni li għandu l-Ġordan fir-reġjun. Bil-ħsieb li tissaħħaħ aktar ir-relazzjoni solida u multidimensjonali bejn iż-żewġ sħab, ġew identifikati prijoritajiet ta’ Sħubija biex jappoġġaw l-implimentazzjoni tal-Ftehim ta’ Assoċjazzjoni bejn l-UE u l-Ġordan, li se jigwidaw is-sħubija għall-perjodu 2021-2027.
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fl-XIV-il laqgħa tal-Kunsill ta’ Assoċjazzjoni bejn l-UE u l-Ġordan għandha tkun ibbażata fuq l-abbozz ta’ deċiżjoni tal-Kunsill ta’ Assoċjazzjoni bejn l-UE u l-Ġordan li tadotta l-Prijoritajiet tas-Sħubija UE-Ġordan mehmuża ma’ din id-Deċiżjoni.
Artikolu 2
Din id-Deċiżjoni hija indirizzata lill-Kummissjoni u lir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 6.4.2022
COM(2022) 164 final
ANNESS
tal-
Proposta għal DEĊIŻJONI TAL-KUNSILL
dwar il-pożizzjoni li għandha tittieħed f'isem l-Unjoni Ewropea fil-Kunsill ta’ Assoċjazzjoni mwaqqaf mill-Ftehim Ewro-Mediterranju li jistabbilixxi Assoċjazzjoni bejn il-Komunitajiet Ewropej u l-Istati Membri tagħhom, fuq in-naħa l-waħda, u r-Renju Ħaxemita tal-Ġordan, fuq in-naħa l-oħra, fir-rigward tal-adozzjoni tal-Prijoritajiet ta’ Sħubija bejn l-UE u l-Ġordan
ANNESS
DEĊIŻJONI Nru … TAL-14-IL KUNSILL TA’ ASSOĊJAZZJONI BEJN L-UE U L-ĠORDAN
ta’ JJ/XX/2022 dwar qbil fuq il-Prijoritajiet tas-Sħubija bejn l-UE u l-Ġordan
IL-KUNSILL TA’ ASSOĊJAZZJONI BEJN L-UE U L-ĠORDAN,
Wara li kkunsidra l-Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom fuq in-naħa l-waħda u l-Ġordan fuq in-naħa l-oħra,
Billi:
(1)Il-Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom, fuq in-naħa l-waħda, u l-Ġordan, fuq in-naħa l-oħra, ġie ffirmat fl-24 ta’ Novembru 1997 u daħal fis-seħħ fl-1 ta’ Mejju 2002;
(2)L-Artikolu 91 tal-Ftehim Ewro-Mediterranju jagħti s-setgħa lill-Kunsill ta’ Assoċjazzjoni li jieħu d-deċiżjonijiet xierqa, għall-finijiet li jintlaħqu l-objettivi tal-Ftehim;
(3)Skont l-Artikolu 101 tal-Ftehim Ewro-Mediterranju, il-Partijiet għandhom jieħdu kull miżura ġenerali jew speċifika meħtieġa sabiex jissodisfaw l-obbligi tagħhom skont il-Ftehim u għandhom jaraw li jintlaħqu l-objettivi stipulati fil-Ftehim.
(4)Ir-rieżami tal-Politika Ewropea tal-Viċinat ippropona fażi ġdida ta’ involviment mas-sħab, li tippermetti sens akbar ta’ sjieda miż-żewġ naħat;
(5)L-UE u l-Ġordan qablu li jikkonsolidaw is-sħubija tagħhom billi qablu fuq sett ta’ prijoritajiet għall-perjodu bejn l-2021 u l-2027 bil-għan li jappoġġaw u jsaħħu r-reżiljenza u l-istabbiltà tal-Ġordan filwaqt li jfittxu li jindirizzaw ukoll l-impatt tal-kunflitt fis-Sirja li issa ilu għaddej żmien twil.
(6)Il-Partijiet għall-Ftehim Ewro-Mediterranju qablu fuq it-test tal-Prijoritajiet tas-Sħubija bejn l-UE u l-Ġordan, li se jappoġġa l-implimentazzjoni tal-Ftehim Ewro-Mediterranju, b’enfasi fuq il-kooperazzjoni f’interessi identifikati b’mod komuni bejniethom.
IDDEĊIEDA KIF ĠEJ:
Artikolu 1
Il-Kunsill ta’ Assoċjazzjoni jirrakkomanda li l-Partijiet jimplimentaw il-Prijoritajiet tas-Sħubija bejn l-UE u l-Ġordan kif stipulati fl-Anness.
Artikolu 2
Il-Kunsill ta’ Assoċjazzjoni jiddeċiedi li l-Prijoritajiet ta’ Sħubija bejn l-UE u l-Ġordan kif imsemmija fl-Artikolu 1 jissostitwixxu l-Prijoritajiet ta’ Sħubija preċedenti bejn l-UE u l-Ġordan adottati bid-Deċiżjoni N 1/2016 tal-Kunsill ta’ Assoċjazzjoni bejn l-UE u l-Ġordan tad-19 ta’ Diċembru 2016.
Artikolu 3
Din id-Deċiżjoni għandha tidħol fis-seħħ fil-jum tal-adozzjoni tagħha.
Magħmul fi xx, jum xahar sena.
Għall-Kunsill ta’ Assoċjazzjoni
Il-President
***
Prijoritajiet tas-Sħubija bejn l-UE u l-Ġordan 2021-2027
Introduzzjoni
L-UE u l-Ġordan għandhom sħubija b’saħħitha. Il-Ġordan huwa sieħeb ewlieni tal-UE, u l-UE tapprezza ħafna r-rwol importanti ta’ moderazzjoni li għandu l-Ġordan fir-reġjun. Bil-għan li tissaħħaħ ulterjorment ir-relazzjoni soda u b’ħafna aspetti bejn iż-żewġ sħab, ġew identifikati prijoritajiet sabiex jappoġġaw l-implimentazzjoni tal-Ftehim ta’ Assoċjazzjoni bejn l-UE u l-Ġordan, li se jservi bħala gwida għas-sħubija għall-perjodu bejn l-2021 u l-2027.
Il-Prijoritajiet tas-Sħubija bejn l-UE u l-Ġordan jinkorporaw l-għanijiet kondiviżi tal-Politika Ewropea tal-Viċinat ta’ żona komuni ta’ paċi, prosperità u stabbiltà. Jinkorporaw il-karatteristiċi ewlenin tagħha, id-differenzazzjoni u s-sjieda konġunta, iżda anke flessibbiltà li tippermetti l-adattament għaċ-ċirkostanzi li jevolvu kif miftiehem bejn l-UE u l-Ġordan. Barra minn hekk, jaqblu mal-aspirazzjoni ddikjarata fil-konklużjonijiet tal-Kunsill Ewropew tal-10 u tal-11 ta’ Diċembru 2020 1 għal Viċinat tan-Nofsinhar demokratiku, aktar stabbli, aktar ekoloġiku u aktar prosperu bħala prijorità strateġika għall-UE.
Il-Prijoritajiet tas-Sħubija jinkorporaw ukoll l-objettivi tal-Aġenda l-ġdida, ambizzjuża u innovattiva għall-Mediterran, stabbiliti fil-Komunikazzjoni tal-Kummissjoni Konġunta u tar-Rappreżentant Għoli dwar il-Viċinat tan-Nofsinhar tad-9 ta’ Frar 2021 2 , u fil-konklużjonijiet sussegwenti tal-Kunsill dwar Sħubija mġedda mal-Viċinat tan-Nofsinhar tas-16 ta’ April 2021 3 , li għandha l-għan li tniedi mill-ġdid il-kooperazzjoni u li tirrealizza l-potenzjal mhux sfruttat tar-relazzjoni. Din tappoġġa l-implimentazzjoni effiċjenti u f’waqtha tal-inizjattivi ewlenin miftiehma b’mod reċiproku tal-Pjan Ekonomiku u ta’ Investiment għall-Viċinat tan-Nofsinhar 4 li se jsaħħu s-sħubija tal-UE mal-Ġordan u se jgħinu biex ikunu protetti l-beni komuni tagħna fil-Mediterran. L-Aġenda l-ġdida toffri opportunitajiet għal sħubijiet ġodda dwar il-prijoritajiet strateġiċi ta’ tranżizzjonijiet ekoloġiċi u diġitali li se jikkontribwixxu għas-sostenibbiltà, il-prosperità u r-reżiljenza. F’dawn l-isforzi, l-UE u l-Ġordan se jibnu fuq is-sħubija mal-Ġordan u l-implimentazzjoni kontinwa tal-aġenda ta’ riforma tal-Ġordan. L-UE u l-Ġordan se jkomplu jaħdmu b’mod kostruttiv flimkien bħala l-kopresidenzi tal-Unjoni għall-Mediterran sabiex irawmu sħubija b’saħħitha madwar il-Mediterran.
F’konformità mal-Aġenda l-ġdida, is-sħubija UE-Ġordan se tkompli tkun ibbażata fuq valuri u djalogu komuni, u se tagħmel progress fuq aġenda soċjoekonomika u politika kondiviża, anki dwar ir-riformi u l-implimentazzjoni tagħhom f’oqsma bħall-governanza tajba, l-istat tad-dritt, id-drittijiet tal-bniedem, il-koeżjoni soċjali u l-opportunitajiet indaqs għal kulħadd, in-nondiskriminazzjoni, il-protezzjoni ambjentali u klimatika, l-istabbiltà makroekonomika u l-ambjent tan-negozju. Se timmira għal irkupru ekoloġiku, diġitali, reżiljenti u ġust wara l-pandemija tal-COVID-19, f’konformità mal-Aġenda 2030 għall-Iżvilupp Sostenibbli, mal-Ftehim ta’ Pariġi u mal-Patt Ekoloġiku Ewropew.
It-tħeġġiġ tal-irkupru soċjoekonomiku sostenibbli fit-tul u l-ħolqien tal-impjiegi fil-Viċinat tan-Nofsinhar huwa prijorità komuni ewlenija u l-pedament innovattiv tal-Aġenda l-ġdida għall-Mediterran. Id-Dokument ta’ Ħidma Konġunt tal-Persunal dwar Pjan Ekonomiku u ta’ Investiment għall-Viċinat tan-Nofsinhar anness mal-Komunikazzjoni, li fih il-Ġordan jidher b’mod prominenti, huwa sforz determinat sabiex jagħti sustanza lil din is-sħubija u jiffoka fuq proġetti ewlenin li jsaħħu s-sħubija tal-UE mal-Ġordan. L-implimentazzjoni tal-inizjattivi ewlenin tal-Pjan Ekonomiku u ta’ Investiment tal-Aġenda l-Ġdida għall-Mediterran se tikkontribwixxi għat-twettiq tal-Prijoritajiet ta’ Sħubija u tikkostitwixxi parti importanti mill-kooperazzjoni tal-UE mal-Ġordan.
Filwaqt li tibbaża fuq il-Komunikazzjoni Konġunta u l-Pjan Ekonomiku u ta’ Investiment tagħha, kif ukoll fuq il-konklużjonijiet tal-Kunsill, l-UE se taħdem ukoll sabiex tgħaqqad l-isforzi tagħha ma’ dawk tal-Istati Membri tagħha sabiex tippromwovi inizjattivi tat-Tim Ewropa f’oqsma ewlenin ta’ interess reċiproku, filwaqt li tibni fuq ir-rispons ta’ suċċess tat-Tim Ewropa għall-kriżi tal-COVID-19 kemm globalment kif ukoll fil-Ġordan.
Il-Prijoritajiet tas-Sħubija jikkostitwixxu dokument ħaj u jimplikaw it-twettiq ta’ impenji reċiproċi.
Is-sħubija u l-oqsma ta’ prijorità ta’ kooperazzjoni se jkomplu jiġu sostnuti billi regolarment isiru laqgħat politiċi ta’ livell għoli, djalogi dwar affarijiet ekonomiċi, soċjali u tal-impjieg, il-kummerċ, il-ġustizzja, id-drittijiet tal-bniedem, il-proċessi demokratiċi, il-klima u l-ambjent, is-Sħubija UE-Ġordan dwar il-Mobilità, il-Ftehim UE-Ġordan dwar ix-Xjenza u t-Teknoloġija u oqsma eżistenti oħrajn ta’ kooperazzjoni, l-impenn UE-Ġordan sabiex jissaħħu d-djalogu u l-kooperazzjoni dwar is-sigurtà, anki dwar il-ġlieda kontra l-estremiżmu vjolenti u t-terroriżmu u ċ-ċibersigurtà, kif ukoll il-kooperazzjoni bilaterali kurrenti b’appoġġ għall-Ġordan.
Il-Prijoritajiet tas-Sħubija jikkonfermaw ir-rabtiet bejn l-UE u l-Ġordan, u jiddefinixxu l-ambitu sabiex jiżdied l-impenn reċiproku.
Il-kuntest kurrenti huwa partikolarment favorevoli għall-konsolidazzjoni tar-relazzjoni bejn l-UE u l-Ġordan, abbażi ta’ objettivi, valuri u interessi kondiviżi fl-indirizzar ta’ sfidi komuni.
Il-pandemija tal-COVID-19 poġġiet aktar pressjoni fuq is-setturi tas-saħħa, tal-edukazzjoni u tal-ekonomija u toħloq sfidi soċjoekonomiċi sinifikanti. L-UE u l-Ġordan se jibnu mill-ġdid u aħjar wara l-kriżi, permezz, fost l-oħrajn, ta’ trasformazzjoni ekoloġika u diġitali tal-ekonomiji tagħhom, żieda fir-reżiljenza u l-kisba ta’ prosperità u ta’ opportunitajiet ta’ xogħol deċenti b’mod inklużiv għall-komunitajiet tagħhom. L-UE u s-sħab tagħha se jżidu l-impenn tagħhom fil-ġlieda kontra d-diskriminazzjoni fil-forom kollha tagħha, anki abbażi tar-reliġjon jew it-twemmin, u jippromwovu l-ugwaljanza bejn il-ġeneri fl-oqsma kollha ta’ politika bħala parti mill-isforz għal irkupru inklużiv mill-pandemija tal-COVID-19.
Il-kriżi tas-Sirja ilha mill-2011 tħalli impatt qawwi fuq il-Ġordan, fuq ir-reġjun kif ukoll fuq l-UE. L-UE u l-Ġordan ikkonfermaw objettivi kondiviżi u interessi komuni fit-tfittix ta’ proċess ta’ paċi kif ukoll ritorn għall-istabbiltà u l-paċi fis-Sirja. Dan eventwalment jippermetti r-ritorn volontarju, sikur u dinjituż tar-refuġjati. Sadanittant, huwa importanti li jiġu sostnuti l-livelli ta’ assistenza u aċċess għall-protezzjoni, għall-edukazzjoni, għall-għajxien u għas-servizzi għar-refuġjati Sirjani fil-Ġordan.
L-UE tirrikonoxxi r-rwol ewlieni li l-Ġordan qiegħed jaqdi fl-areni nazzjonali, reġjonali u internazzjonali u tappoġġa l-impenn tal-Ġordan fis-sistema multilaterali. L-UE tfaħħar l-impenn ġeneruż u kontinwu tal-Ġordan li jilqa’ u jipproteġi numri kbar ta’ refuġjati li jinkludu Sirjani, Palestinjani, Iraqini, Libjani u Jemeniti, li jkunu qegħdin ifittxu post ta’ kenn sikur fil-Ġordan, u li jipprovdilhom servizzi ta’ edukazzjoni, saħħa, għajxien u protezzjoni soċjali. L-UE se tkompli tassisti lill-Ġordan fl-għoti ta’ appoġġ lir-refuġjati li jkunu qegħdin ifittxu protezzjoni fil-Ġordan u fit-tisħiħ tar-reżiljenza tal-Ġordan, inkluż impenn kontinwu sabiex jittaffew l-effetti tal-pandemija tal-COVID-19. Bħal qabel, l-appoġġ tal-UE lill-Ġordan għar-rispons għar-refuġjati huwa addizzjonali mal-programmi ta’ appoġġ bilaterali. Huwa kruċjali li jiġu miġġielda l-faqar, id-diskriminazzjoni u l-inugwaljanzi bejn il-ġeneri, li jiġi pprovdut appoġġ adegwat għall-introjtu, aċċess mhux diskriminatorju għall-protezzjoni soċjali f’konformità mal-oqfsa nazzjonali bħall-Istrateġija Nazzjonali għall-Protezzjoni Soċjali tal-Ġordan, li jitrawmu l-iżvilupp sostenibbli, it-tkabbir, li jiġu protetti d-drittijiet tal-bniedem, u li jiġi żgurat aċċess ekwu għal servizzi ta’ kwalità. Barra minn hekk, il-Ġordan kompla juża sforzi eżemplari u għandu rwol prominenti u bbilanċjat fil-promozzjoni tal-paċi u s-sigurtà fil-Lvant Nofsani, b’mod partikolari fil-Proċess ta’ Paċi fil-Lvant Nofsani. Barra minn hekk, ir-rwol tal-Ġordan fil-prevenzjoni u fil-ġlieda kontra r-radikalizzazzjoni u t-terroriżmu u l-estremiżmu vjolenti wera li huwa ta’ valur kbir. Il-Kopresidenza tal-Ġordan, b’mod konġunt mal-UE, tal-Unjoni għall-Mediterran (UgħM), li permezz tagħha jisħaq favur soluzzjonijiet politiċi għal kriżijiet varji fir-reġjun, u l-integrazzjoni u l-iżvilupp reġjonali, ekonomiji sostenibbli, ekoloġiċi, b’livell baxx ta’ emissjonijiet tal-gassijiet serra u ċirkolari b’użu effiċjenti tar-riżorsi, hija eżempju ieħor tar-rwol ewlieni ta’ stabbilizzazzjoni tal-Ġordan.
Il-Ġordan u l-UE se jissoktaw bl-impenn tagħhom fuq l-aspetti kollha tal-migrazzjoni fi sħubija komprensiva, ta’ benefiċċju reċiproku u mfassla apposta, u fil-qafas tas-Sħubija dwar il-Mobilità, li tipprovdi qafas koerenti għal azzjonijiet fil-qasam tal-migrazzjoni, tal-mobilità u tas-sigurtà, tindirizza kwistjonijiet relatati mal-ġestjoni tal-fruntieri, tipprevjeni l-migrazzjoni irregolari u l-protezzjoni internazzjonali 5 .
Il-Prijoritajiet tas-Sħubija jibnu fuq kisbiet konġunti f’oqsma ta’ interess reċiproku, inkluż l-għan li tiġi promossa l-implimentazzjoni kontinwa tar-riformi, u b’hekk jikkontribwixxu għall-istabbiltà makroekonomika tal-Ġordan, f’konformità mal-prijoritajiet tal-programm rivedut tal-FMI, u b’kont meħud tal-effetti tal-pandemija tal-COVID-19. Jibnu wkoll fuq il-Konferenza ta’ Londra tal-2016 “Supporting Syria and the Region” kif ukoll fuq l-impenji tal-Patt Internazzjonali fformulati mill-Ġordan u mill-koospitanti ta’ dik il-Konferenza, li kellhom l-għan li jsostnu l-kisbiet fl-iżvilupp tal-Ġordan fl-isfond ta’ assistenza umanitarja kontinwata u appoġġ adegwat għall-komunità ospitanti. Il-ħames Konferenzi ta’ Brussell sussegwenti dwar “Supporting the future of Syria and the Region” (L-appoġġ għall-futur tas-Sirja u tar-Reġjun) ġeddew u saħħew l-impenn politiku, umanitarju u finanzjarju tal-komunità internazzjonali li tappoġġa lill-poplu Sirjan, lill-pajjiżi tal-viċinat u lill-komunitajiet ospitanti l-aktar affettwati mill-kunflitt, u rrieżaminaw il-progress li sar mill-gvernijiet, mid-donaturi u min-Nazzjonijiet Uniti (NU) fit-twettiq tal-impenji u l-wegħdiet li saru fihom. Fi sfond ta’ vulnerabbiltà estrema kontinwa tar-refuġjati Sirjani u tal-komunitajiet ospitanti vulnerabbli, aggravat ulterjorment mill-pandemija tal-COVID-19, l-UE u l-Ġordan jaffermaw mill-ġdid l-impenn tagħhom li jipprovdu assistenza u protezzjoni effettiva lir-refuġjati kollha fil-Ġordan. Huwa importanti li jittejjeb aktar l-aċċess tagħhom għas-servizzi, li jiġi żgurat ir-rispett għad-drittijiet tal-bniedem tagħhom, u li titkompla l-ħidma sabiex jittejjeb il-potenzjal tagħhom għall-awtodipendenza, u jinħolqu opportunitajiet għalihom sabiex jikkontribwixxu għall-iżvilupp ekonomiku tal-Ġordan. Fl-appoġġ għar-refuġjati, inkluż mis-Sirja, l-UE u l-Ġordan se jadottaw approċċ ibbażat fuq il-vulnerabbiltà li jagħti l-attenzjoni xierqa lis-sitwazzjoni tal-komunitajiet ospitanti vulnerabbli.
L-UE tibqa’ impenjata li tipprovdi assistenza u protezzjoni kontinwi lir-refuġjati Palestinjani anki fil-Ġordan. F’dan ir-rigward, l-UE u l-Ġordan enfasizzaw ir-rwol kruċjali tal-Aġenzija ta’ Fondi u tax-Xogħol tan-Nazzjonijiet Uniti għar-Refuġjati tal-Palestina fil-Lvant Qarib (‘United Nations Relief and Works Agency for Palestine Refugees in the Near East’ - UNRWA) għas-sigurtà u l-istabbiltà fir-reġjun, f’konformità mal-mandat tagħha tan-NU stipulat fir-riżoluzzjonijiet rilevanti tan-NU, u esprimew l-impenn tagħhom li jkomplu jappoġġaw lill-Aġenzija politikament u finanzjarjament. Huma jirrikonoxxu r-rwol importanti li għandha l-UNRWA u jimpenjaw ruħhom li jappoġġaw lill-aġenzija fl-implimentazzjoni tal-mandat tagħha fl-oqsma tal-operazzjonijiet tagħha, kif ukoll fir-riformi tal-ġestjoni u tal-governanza għal aktar trasparenza, akkontabilità u ġestjoni finanzjarja tajba li l-aġenzija bdiet, u jisħqu mal-komunità ta’ donaturi għal finanzjament pluriennali aktar sostenibbli u prevedibbli u għal kondiviżjoni ġusta tal-piżijiet.
Prijoritajiet
Il-Prijoritajiet tas-Sħubija jirriflettu l-interessi kondiviżi u jiffokaw fuq oqsma fejn il-kooperazzjoni bejn l-UE u l-Ġordan hija ta’ benefiċċju reċiproku. F’konformità mal-Komunikazzjoni Konġunta u mal-konklużjonijiet tal-Kunsill, l-UE u l-Ġordan huma impenjati li jżidu l-kooperazzjoni fuq firxa ta’ azzjonijiet fl-oqsma ta’ politika ewlenin li ġejjin: it-tisħiħ tar-reżiljenza u l-interkonnessjoni/il-parteċipazzjoni fl-ekonomija dinjija, il-bini tal-prosperità u l-isfruttar tal-opportunitajiet tat-tranżizzjoni doppja ekoloġika u diġitali; l-iżvilupp uman, il-governanza tajba, l-istat tad-dritt u d-drittijiet tal-bniedem; il-paċi u s-sigurtà; il-migrazzjoni u l-mobilità; l-azzjoni klimatika, l-enerġija u l-ambjent.
Abbażi ta’ dan ta’ hawn fuq, ġew identifikati tliet prijoritajiet għall-perjodu bejn l-2021 u l-2027:
L-UE u l-Ġordan se jimmiraw li jsaħħu l-kooperazzjoni fuq l-istabbiltà u s-sigurtà reġjonali, inkluża l-ġlieda kontra t-terroriżmu. L-UE u l-Ġordan huma sħab sodi fil-politika barranija u tas-sigurtà. Il-kooperazzjoni strateġika u operazzjonali se tiġi segwita b’mod bilaterali, f’fora multilaterali, kif ukoll fuq livell reġjonali, anki permezz tal-Kopresidenzi tal-UE u tal-Ġordan tal-UgħM, u billi jittieħed vantaġġ mil-laqgħat annwali proposti bejn il-Ministri għall-Affarijiet Barranin tal-UE u l-Viċinat tan-Nofsinhar, kif ukoll mil-laqgħat ministerjali settorjali possibbli. Huwa fl-interess reċiproku tal-UE u tal-Ġordan li jippromwovu l-paċi u l-istabbiltà fir-reġjun u globalment, billi jaħdmu flimkien fuq il-Proċess ta’ Paċi fil-Lvant Nofsani, f’konformità mad-dritt internazzjonali u r-riżoluzzjonijiet rilevanti tal-Kunsill tas-Sigurtà tan-Nazzjonijiet Uniti (KSNU), kif ukoll b’appoġġ għal tranżizzjoni politika u għat-trawwim tal-paċi fis-Sirja, abbażi tar-Riżoluzzjoni 2254 tal-KSNU, fost l-oħrajn. Kemm l-UE kif ukoll il-Ġordan jaspiraw li jkunu mudelli ta’ soċjetajiet tolleranti, raġuni oħra għaliex iridu jsaħħu l-kooperazzjoni fil-qasam tal-politika barranija.
Is-sħubija tiffoka fuq il-promozzjoni tal-irkupru u l-istabbiltà tal-ekonomija, tkabbir ekoloġiku, diġitali, inklużiv u bbażat fuq l-għarfien, il-kwalità tal-edukazzjoni u l-ħolqien ta’ impjiegi deċenti, anki għaż-żgħażagħ, f’konformità mal-prijoritajiet tal-Gvern, il-Programm ta’ Żvilupp indikattiv Eżekuttiv, “Ġordan 2025 – Viżjoni u Strateġija nazzjonali” u l-politiki u l-istrateġiji settorjali. L-appoġġ għandu l-għan li jtejjeb ir-reżiljenza tal-Ġordan fl-indirizzar tal-impatt tal-kriżi Sirjana u l-instabbiltà reġjonali, kif ukoll il-konsegwenzi ekonomiċi u soċjali tal-pandemija tal-COVID-19, filwaqt li jieħu vantaġġ mill-opportunitajiet ta’ bini mill-ġdid u aħjar wara l-kriżi.
L-UE u l-Ġordan se jtejbu l-kollaborazzjoni fl-indirizzar tat-tibdil fil-klima u tad-degradazzjoni ambjentali billi jgħaqqdu l-isforzi sabiex irawmu t-tkabbir ekoloġiku u t-tranżizzjoni tal-enerġija lejn in-newtralità klimatika allinjati mal-istrateġija tas-settur tal-enerġija tal-Ġordan (2020-2030) u f’konformità mal-Kontribut Stabbilit fil-Livell Nazzjonali (NDC) tal-Ġordan u mal-Pjan ta’ Adattament Nazzjonali. Ekonomija tal-Ġordan b’saħħitha, inklużiva, ekoloġika u konnessa appoġġata miż-żona ta’ kummerċ ħieles stabbilita skont il-Ftehim ta’ Assoċjazzjoni bejn il-Ġordan u l-UE, l-iskema simplifikata tar-regoli tal-oriġini, u klima ta’ investiment imsaħħa (permezz ta’ riformi ambjentali tan-negozju) u aċċess għall-finanzjament għall-imprendituri u b’mod partikolari għall-intrapriżi żgħar u ta’ daqs medju (SMEs), anki permezz tat-trawwim ta’ djalogu pubbliku-privat u permezz ta’ ħidma aktar diretta mas-settur privat, se jaġixxu bħala inċentivi qawwija għall-ħolqien ta’ impjiegi deċenti. Il-modernizzazzjoni, l-ekoloġizzazzjoni u d-diversifikazzjoni tal-ekonomija se jkomplu jissaħħu b’appoġġ għat-tkabbir xprunat mill-innovazzjoni u mill-kondiviżjoni tal-għarfien. Il-kooperazzjoni għal konnettività tat-trasport sostenibbli, intelliġenti u reżiljenti (inkluż il-Ftehim bejn l-UE u l-Ġordan dwar l-Avjazzjoni) u l-implimentazzjoni tal-Istrateġija Nazzjonali għat-Trasport fit-tul mill-2015 sal-2030 se jikkontribwixxu wkoll għall-integrazzjoni reġjonali u ekonomika.
Se tingħata attenzjoni speċifika sabiex jiżdiedu l-impjegabbiltà u l-parteċipazzjoni taż-żgħażagħ u tan-nisa fl-ekonomija. Se tingħata attenzjoni bħal din ukoll sabiex jiġu ġġenerati opportunitajiet ekonomiċi sostenibbli u ugwali, anki abbażi ta’ edukazzjoni ta’ kwalità għolja u taħriġ vokazzjonali u l-forniment ta’ servizzi tat-trasport pubbliku xierqa, u sabiex titrawwem kultura ta’ intraprenditorija u innovazzjoni u tranżizzjoni għal ekonomija ċirkolari u diġitali ekoloġika. Jenħtieġ li jiġu kkunsidrati inizjattivi fis-settur kulturali, inklużi dawk immirati lejn l-iżvilupp ta’ industrija kulturali u kreattiva, fid-dawl tal-kontribut sinifikanti tiegħu għall-promozzjoni tad-djalogu interkulturali u l-iżvilupp soċjoekonomiku.
L-infurzar sħiħ tal-Ftehim ta’ Assoċjazzjoni u l-kontinwazzjoni tal-ħidma konġunta sabiex tissaħħaħ ir-relazzjoni ta’ kummerċ u ta’ investiment eżistenti se jsaħħu wkoll l-integrazzjoni tal-Ġordan fis-suq tal-UE u se joħolqu opportunitajiet ġodda għall-kummerċ, l-investiment u l-iżvilupp. F’konformità mal-Komunikazzjoni dwar ir-Rieżami tal-Politika Kummerċjali 6 , l-UE se tipproponi inizjattiva ġdida ta’ investiment sostenibbli lis-sħab interessati fil-Viċinat tan-Nofsinhar u fl-Afrika.
Is-sħubija tiffoka fuq li tappoġġa l-isforzi u l-impenn tal-Ġordan favur it-tisħiħ tal-governanza tajba, ir-riforma demokratika tal-istat tad-dritt u d-drittijiet tal-bniedem, inklużi d-drittijiet soċjali u tax-xogħol. Id-drittijiet tal-bniedem u l-libertajiet fundamentali, kif imnaqqxin fil-liġijiet internazzjonali, reġjonali u nazzjonali, jikkostitwixxu valuri kondiviżi. Ir-rispett għall-prinċipji demokratiċi u tad-drittijiet tal-bniedem jikkostitwixxi element essenzjali tar-relazzjonijiet bejn l-UE u l-Ġordan, u tal-iżvilupp soċjoekonomiku sostenibbli u tal-istabbiltà fil-Ġordan.
Fil-qasam tal-migrazzjoni u l-mobilità, filwaqt li titqies il-Komunikazzjoni tal-Kummissjoni Ewropea dwar il-Patt dwar il-Migrazzjoni u l-Ażil 7 , u l-leġiżlazzjoni tal-Ġordan, il-progress dwar l-implimentazzjoni effettiva tal-komponenti differenti tas-Sħubija dwar il-Mobilità huwa prijorità trasversali, li se tikkontribwixxi wkoll għall-iżgurar li l-persuni jkunu jistgħu jiċċaqilqu b’mod regolari u aktar faċli bejn il-Ġordan u l-UE, fost l-oħrajn bil-għan li jittejjeb it-turiżmu, jiġi ffaċilitat l-iskambju għal finijiet edukattivi u jkun hemm interazzjoni mal-komunitajiet ta’ persuni mill-Ġordan li jgħixu barra mill-pajjiż tal-Ġordan. Approċċ komprensiv u sostenibbli għall-migrazzjoni u l-ażil, inkluża l-kooperazzjoni għar-ritorn f’konformità mal-kompetenzi nazzjonali tal-UE u tal-Istati Membri tagħha, jista’ jkun ta’ benefiċċju reċiproku għall-UE u għall-Ġordan.
1.Tisħiħ tal-Kooperazzjoni b’rabta mal-Istabbiltà Reġjonali, is-Sigurtà inkluża l-Ġlieda kontra t-Terroriżmu
L-UE tagħraf l-isforzi rilevanti kollha li għamel il-Ġordan. L-UE u l-Ġordan jenħtieġ li jkomplu jikkooperaw mill-qrib sabiex jindirizzaw l-instabbiltà reġjonali inkluża t-theddida għas-sigurtà minn Dae’sh u gruppi terroristiċi oħrajn. F’dan ir-rigward, l-UE hija impenjata li tassisti lill-Ġordan fl-isforzi tiegħu sabiex jistabbilizza u jiżgura s-sigurtà tal-fruntieri esterni tiegħu. Kemm l-UE kif ukoll il-Ġordan jappoġġaw il-ħtieġa għal soluzzjonijiet dejjiema u sostenibbli għall-kriżi tas-Sirja f’konformità mar-Riżoluzzjoni 2254 tal-Kunsill tas-Sigurtà tan-NU (2015). Il-ħidma sabiex tissolva l-kriżi tas-Sirja jenħtieġ li tkompli fil-fora internazzjonali x-xierqa, u jenħtieġ li titkompla wkoll il-kooperazzjoni fil-kuntest tal-Pjan Direzzjonali tal-UE u l-Ġordan għas-Sigurtà Msaħħa/għall-Ġlieda kontra t-Terroriżmu b’enfasi speċjali fuq proġetti konġunti u l-kondiviżjoni tal-informazzjoni.
L-UE u l-Ġordan jenħtieġ ukoll li jintensifikaw il-“bini ta’ relazzjonijiet” f’kuntesti oħrajn ta’ kunflitt, inkluż il-Proċess ta’ Paċi fil-Lvant Nofsani. L-UE tirrikonoxxi r-rwol indispensabbli u kostruttiv tal-Ġordan fl-istabbiltà tar-reġjun u ttenni l-importanza li jinżamm l-istatus quo storiku tas-siti mqaddsa f’Ġerusalemm, anki fir-rigward tal-Kustodja Ħaxemita. L-UE u l-Ġordan se jkomplu jinteraġixxu mill-qrib sabiex ifittxu riżoluzzjoni ġusta u komprensiva tal-kunflitt bejn l-Iżrael u l-Palestina abbażi tas-soluzzjoni ta’ żewġ Stati, il-parametri maqbula internazzjonalment u d-dritt internazzjonali. Lil hinn mid-dimensjoni immedjata tal-kunflitt, fil-kuntest tal-Mekkaniżmu tal-Unjoni għall-Protezzjoni Ċivili, se jsaħħu l-kooperazzjoni u r-reżiljenza fil-ġestjoni tar-riskju ta’ diżastri u l-protezzjoni ċivili, itejbu l-ħidma fuq ir-reżiljenza u l-adattament għat-tibdil fil-klima, u jinvestu f’miżuri preventivi.
L-UE u l-Ġordan huma sħab fil-promozzjoni u fit-trawwim tad-djalogi bejn reliġjonijiet u bejn kulturi, f’livelli globali u reġjonali fejn il-Ġordan qiegħed jaqdi rwol ewlieni. L-UE u l-Ġordan se jikkooperaw u se jidentifikaw modi kif jipproteġu u jippreservaw il-wirt kulturali bħala mezz importanti għall-paċi, id-demokrazija u l-iżvilupp sostenibbli u bħala mezz sabiex jiġu ġġenerati djalogu u inklużjoni pożittivi, u se jipproponu azzjonijiet għal dan il-għan.
L-aċċess għar-riżorsi naturali, b’mod partikolari għall-ilma tax-xorb sikur, se jkun aspett ewlieni ieħor għall-istabbiltà fit-tul. Il-Ġordan u l-UE se jkomplu jikkooperaw sabiex itejbu ulterjorment l-effiċjenza u s-sostenibbiltà tal-ġestjoni tar-riżorsi tal-ilma.
Il-prevenzjoni tat-terroriżmu u l-estremiżmu vjolenti u l-ġlieda kontrihom u r-radikalizzazzjoni jridu jibqgħu fuq nett tal-aġenda. Fid-dawl ta’ dan u bħala suppliment għall-politika regolari u d-djalogu tematiku, l-UE u l-Ġordan se jsaħħu l-kooperazzjoni konkreta u l-kondiviżjoni tal-informazzjoni sabiex jindirizzaw dawn l-isfidi fl-istat tad-dritt u b’rispett sħiħ għad-drittijiet tal-bniedem u l-libertajiet fundamentali. L-UE u l-Ġordan se jaħdmu flimkien fil-ġlieda kontra l-kawżi ewlenin tar-radikalizzazzjoni, tat-terroriżmu u tal-estremiżmu vjolenti filwaqt li jqisu l-koeżjoni soċjali, ir-rwol importanti tan-nisa u taż-żgħażagħ u tal-edukazzjoni, anki permezz ta’ programmi edukattivi miftiehma b’mod reċiproku u l-involviment ta’ ambitu wiesa’ għas-soċjetà ċivili tal-Ġordan.
L-UE u l-Ġordan stabbilew ukoll qafas għall-parteċipazzjoni tal-Ġordan fl-operazzjonijiet tal-UE tal-ġestjoni tal-kriżijiet, eżempju ieħor tal-kooperazzjoni mill-qrib dwar kwistjonijiet ta’ sigurtà li jistgħu jibnu fuqhom.
2.Promozzjoni tal-Istabbiltà Ekonomika Sostenibbli, Tkabbir Ekoloġiku, Diġitali, Inklużiv u Bbażat fuq l-Għarfien, il-Kwalità tal-Edukazzjoni u l-Ħolqien ta’ Impjiegi Deċenti
Il-kriżi tas-Sirja u l-preżenza fit-tul tar-rifuġjati li l-kriżi kkaġunat ħallew impatt qawwi fuq is-sitwazzjoni ekonomika tal-Ġordan, ir-riżorsi naturali skarsi tiegħu u l-forniment ta’ servizzi bażiċi u komplew jgħarrqu sitwazzjoni ekonomika li diġà kienet diffiċli. Il-pandemija tal-COVID-19 aggravat b’mod sinifikanti l-isfidi soċjoekonomiċi, il-vulnerabbiltajiet u l-inugwaljanzi. Għalhekk, id-djalogu ekonomiku, ir-riformi u l-kooperazzjoni dwar kwistjonijiet makroekonomiċi se jiġu żviluppati ulterjorment u implimentati bil-ħsieb li jiġu promossi politiki makroekonomiċi u strutturali sodi li jrawmu potenzjal ta’ tkabbir sostenibbli u inklużiv, tiżdied ir-reżiljenza tal-ekonomija tal-Ġordan għax-xokkijiet ekonomiċi u tittejjeb is-sostenibbiltà tal-finanzi pubbliċi f’koordinazzjoni ma’ donaturi multilaterali u bilaterali. L-isforzi sabiex tiġi ppreservata l-istabbiltà makroekonomika jenħtieġ li jitkomplew fil-kuntest tal-programm rivedut tal-Fond Monetarju Internazzjonali (FMI) u l-impenji tal-Ġordan mal-komunità internazzjonali wara l-Konferenza ta’ Londra fl-2019 u l-Matriċi ta’ Riforma tal-Ġordan. L-UE qiegħda ssostni dawn l-isforzi permezz tal-assistenza tagħha ta’ kooperazzjoni, kif ukoll permezz ta’ programmi sostanzjali ta’ assistenza makrofinanzjarja.
Apparti l-ġestjoni fiskali u baġitarja tajba, il-kooperazzjoni se titkompla wkoll fir-riformi tas-settur pubbliku tal-Ġordan sabiex tittejjeb il-ġestjoni tal-finanzi pubbliċi, iżda anke l-effiċjenza kumplessiva u l-kapaċitajiet tiegħu ta’ forniment ta’ servizzi.
Sfida soċjoekonomika ewlenija għall-Ġordan, fost l-oħrajn bħala riżultat ta’ kriżijiet reġjonali fit-tul, hija l-aċċess mhux ugwali għall-impjiegi, inkluż għan-nisa u ż-żgħażagħ, it-tkabbir ekonomiku baxx, il-qgħad għoli, u d-dejn dejjem jiżdied. Dan għandu jingħeleb billi jinħoloq xogħol deċenti, jiġu appoġġati l-intraprenditorija u l-innovazzjoni - b’mod partikolari fl-ekonomija ekoloġika, diġitali u soċjali - billi jiġu żviluppati l-ħiliet u l-kwalifiki - billi jitrawmu t-taħriġ immirat, l-edukazzjoni u r-riċerka - u billi tiġi żviluppata sistema ta’ protezzjoni soċjali mmirata u komprensiva. Il-Prijoritajiet tas-Sħubija għandhom l-għan li jindirizzaw dan kollu billi japplikaw għodod varji ta’ politika: il-kummerċ; l-iżvilupp tan-negozju; l-edukazzjoni, it-taħriġ u l-apprendiment tul il-ħajja; mobilità akbar. L-għan ta’ dawn l-istrumenti kollha huwa wkoll l-emanċipazzjoni ekonomika u l-parteċipazzjoni tas-segmenti kollha tas-soċjetà.
(a)In-Negozju għall-Iżvilupp jikkostitwixxi element ewlieni tal-Prijoritajiet tas-Sħubija. Il-ħolqien tal-impjiegi, appoġġat miż-żieda fl-esportazzjonijiet lejn l-UE skont l-iskema ssimplifikata tar-regoli tal-oriġini u l-miżuri li jakkumpanjawha, se jkun ta’ benefiċċju għall-Ġordan. L-UE u l-Ġordan se jidentifikaw b’mod konġunt approċċi xierqa sabiex itejbu l-modernizzazzjoni tar-relazzjonijiet bilaterali ta’ kummerċ u investiment. Barra minn hekk, l-UE u l-Ġordan se jaħdmu flimkien fuq l-SMEs, l-iżvilupp, it-teknoloġija u l-għarfien sabiex isaħħu r-rabtiet bilaterali u ekonomiċi.
(b)B’mod parallel, l-UE u l-Ġordan se jkomplu d-djalogu tagħhom, sabiex jinkoraġġixxu l-armonizzazzjoni f’oqsma bħall-Miżuri Sanitarji u Fitosanitarji (MSF), l-Ostakli Tekniċi għall-Kummerċ (OTK) u s-servizzi bil-għan li jiffaċilitaw il-kummerċ u jsaħħu l-attraenza tal-Ġordan għall-investiment. Barra minn hekk, sabiex jiġu protetti aħjar is-saħħa u s-sikurezza tal-konsumaturi, u sabiex jiġi ffaċilitat il-kummerċ, l-UE se taħdem mal-Ġordan sabiex tappoġġa l-iżvilupp ta’ oqfsa effettivi għas-sikurezza tal-prodotti, f’konformità mal-istandards internazzjonali, filwaqt li jiġu evitati ostakli mhux tariffarji.
(c)L-UE u l-Ġordan se jipprijoritizzaw u jimmultiplikaw l-isforzi tagħhom sabiex: it-titjib tal-klima tan-negozju u l-attirar ta’ investimenti, b’mod partikolari dawk li jappoġġaw it-tranżizzjoni lejn ekonomija b’emissjonijiet baxxi, reżiljenti u ċirkolari; l-appoġġ għall-produttività u l-kompetittività tas-settur privat u l-promozzjoni tal-intraprenditorija (anki permezz ta’ riforma legali, regolatorja u amministrattiva inkluż il-politiki tal-kompetizzjoni u r-regoli dwar il-kontroll tas-sussidji, is-self lill-kumpaniji u l-aħjar użu mit-trasformazzjoni diġitali u t-tranżizzjoni ekoloġika); il-ħolqien tas-sett ix-xieraq ta’ għarfien u ħiliet meħtieġa fis-suq tax-xogħol tal-Ġordan u għall-ekonomija ekoloġika, diġitali u soċjali. Inizjattiva ġdida ta’ investiment sostenibbli, kif imsemmi hawn fuq, tista’ tgħin sabiex jintlaħqu dawn l-objettivi. Barra minn hekk, l-UE u l-Ġordan se jaħdmu flimkien sabiex isaħħu s-setturi bbażati fuq l-għarfien, li hija ħaġa importanti għall-ħolqien ta’ impjiegi deċenti, b’mod partikolari fost iż-żgħażagħ u n-nisa kif ukoll sabiex jiġu appoġġati u tingħata s-setgħa lill-kumpaniji, speċjalment fis-setturi ekonomiċi l-aktar affettwati mill-pandemija tal-COVID-19.
(d)L-edukazzjoni hija strument b’saħħtu ieħor għat-tisħiħ tal-iżvilupp soċjali u ekonomiku. Se tkun ċentrali għall-Ġordan, filwaqt li taħdem f’kooperazzjoni mal-UE, sabiex tikseb riżultati fir-rigward ta’ din il-prijorità ħalli tkun ta’ benefiċċju għal dawk kollha li jgħixu fil-Ġordan u jingħelbu l-isfidi assoċjati mal-COVID-19 u jitnaqqsu d-diskrepanzi fl-apprendiment. L-aċċess għal edukazzjoni pubblika sikura u ta’ kwalità għat-tfal, għaż-żgħażagħ u għall-adulti żgħażagħ kollha fil-livelli kollha se jiggwida l-kooperazzjoni bejn l-UE u l-Ġordan sabiex jiġi żgurat li kulħadd ikollu opportunità li jistudja, jibni l-futur tiegħu stess u jikkontribwixxi għat-tkabbir ekonomiku u għall-iżvilupp tal-pajjiż. It-taħriġ vokazzjonali u l-edukazzjoni li jirrispondu għas-suq tax-xogħol jistħoqqilhom attenzjoni partikolari, bħalma jistħoqqilhom ukoll l-edukazzjoni għolja u l-apprendiment tul il-ħajja.
L-UE u l-Ġordan se jikkooperaw ukoll, b’mod bilaterali u fil-kuntest tal-Unjoni għall-Mediterran, fl-oqsma tax-xjenza, tat-teknoloġija u tal-istrateġija tal-innovazzjoni, inkluż billi jimplimentaw pjanijiet direzzjonali sabiex jindirizzaw prijoritajiet konġunti bħat-Tibdil fil-Klima, is-Saħħa u l-Enerġija Rinnovabbli.
L-UE u l-Ġordan se jrawmu riċerka innovattiva u soluzzjonijiet ibbażati fuq l-għarfien u kooperazzjoni dwar l-enerġija rinnovabbli, l-effiċjenza enerġetika allinjata mal-Istrateġija għas-Settur tal-Enerġija tal-Ġordan (2020-2030), u l-ġestjoni sostenibbli tar-riżorsi naturali, anki għal prattiki agrikoli sostenibbli u l-ġestjoni sostenibbli tal-ilma u tal-iskart, inkluż ilma tax-xorb sikur. Il-kooperazzjoni tagħhom se tkun konformi mal-Aġenda 2030 u mal-Ftehim ta’ Pariġi, inkluż fil-kuntest tal-Patt Ekoloġiku Ewropew, b’azzjoni msaħħa sabiex tiġi promossa t-tranżizzjoni lejn ekonomija newtrali għall-klima, reżiljenti u ċirkolari. Il-kooperazzjoni fir-riċerka u l-innovazzjoni se tkompli permezz ta’ Orizzont Ewropa, il-programm tas-Sħubija għar-Riċerka u l-Innovazzjoni fiż-Żona tal-Mediterran (PRIMA) u l-Pjattaforma Reġjonali tal-UgħM dwar ir-Riċerka u l-Innovazzjoni.
L-UE u l-Ġordan se jistabbilixxu forum għall-identifikazzjoni u t-tħejjija ta’ proġetti futuri ta’ investiment, f’konformità mal-prijoritajiet nazzjonali tal-Ġordan u f’koordinazzjoni ma’ donaturi bilaterali u multilaterali. L-UE se timmira, fost l-oħrajn, li tappoġġa lill-Ġordan, f’koordinazzjoni ma’ donaturi oħrajn, fil-pjanijiet tiegħu li jimplimenta l-proġett ta’ Aqaba Amman tad-Desalinizzazzjoni u t-Twassil tal-Ilma (AAWDC) bħala proġett nazzjonali strateġiku li għandu l-għan li jnaqqas id-defiċit fir-riżorsi kruċjali tal-ilma tal-pajjiż.
L-UE u l-Ġordan se jaħdmu flimkien sabiex jiżguraw il-koerenza bejn il-prijoritajiet tal-Enerġija, tal-ilma, tal-Ikel, tas-Saħħa u tat-Tibdil fil-Klima, jippromwovu l-implimentazzjoni tagħhom u jiżguraw proċessi parteċipattivi fil-livelli reġjonali u internazzjonali.
3.Tisħiħ tal-Governanza Tajba, l-Istat tad-dritt, ir-Riforma Demokratika u r-rispett għad-Drittijiet tal-Bniedem
F’konformità mal-impenn qawwi tal-Ġordan għal proċess ta’ riforma kontinwu mrawwem mill-Kumitat Rjali għall-Modernizzazzjoni tas-Sistema Politika, l-UE u l-Ġordan se jkomplu jaħdmu flimkien bil-għan li jkomplu jsaħħu s-sistema demokratika u ġudizzjarja fil-Ġordan, l-istat tad-dritt, l-ugwaljanza bejn il-ġeneri u l-protezzjoni tad-drittijiet tal-bniedem u tal-libertajiet fundamentali. L-UE u l-Ġordan se jappoġġaw passi sabiex jiġu miġġielda l-forom kollha ta’ diskriminazzjoni, l-aspetti kollha relatati ma’ soċjetà ċivili effettiva u stabbilita sew, anki billi jistabbilixxu ambjent tax-xogħol legali u spazju operazzjonali li huma favorevoli għall-iżvilupp ta’ soċjetà ċivili ħajja.
Il-kooperazzjoni se tiffoka fuq l-implimentazzjoni tar-riformi komprensivi u inklużivi, filwaqt li tkompli ssaħħaħ l-effettività, l-effiċjenza u l-indipendenza tal-ġudikatura, kif ukoll l-aċċess ugwali għall-ġustizzja għal kulħadd, f’konformità mal-istandards aċċettati internazzjonalment. Se tinkludi l-kooperazzjoni ġudizzjarja fi kwistjonijiet ċivili u kriminali, billi tippromwovi l-adeżjoni mal-konvenzjonijiet internazzjonali rilevanti u l-implimentazzjoni tagħhom, u permezz ta’ ħidma lejn ftehim internazzjonali dwar il-kooperazzjoni ġudizzjarja fi kwistjonijiet kriminali flimkien mal-Eurojust. Il-kooperazzjoni se tiffoka wkoll fuq il-proċess elettorali (inkluż is-segwitu tar-rakkomandazzjonijiet tal-Missjonijiet ta’ Osservazzjoni Elettorali u ta’ Esperti Elettorali tal-UE), l-appoġġ għall-ugwaljanza bejn il-ġeneri, inkluża l-ġlieda kontra l-vjolenza abbażi tal-ġeneru, u l-parteċipazzjoni politika sinifikanti tan-nisa u taż-żgħażagħ, u l-għoti tas-setgħa lin-nisa fil-ħajja politika u pubblika. Id-drittijiet ekonomiċi, soċjali u kulturali, l-edukazzjoni ċivika, it-tisħiħ tas-sistema tal-partiti politiċi u r-rwol ta’ sorveljanza u leġiżlattiv tal-Parlament, ir-rabtiet bejn il-politika lokali u nazzjonali, djalogu soċjali sinifikanti, il-proċess ta’ deċentralizzazzjoni, il-media pluralistika u indipendenti, it-trasparenza, inkluża t-trasparenza finanzjarja, u l-akkontabilità kif ukoll il-ġlieda kontra l-korruzzjoni se jkunu wkoll parti mill-kooperazzjoni bejn l-UE u l-Ġordan.
L-UE u l-Ġordan se jkomplu jiltaqgħu għal djalogu regolari dwar id-demokrazija u l-governanza tajba, il-ġustizzja, l-istat tad-dritt u d-drittijiet tal-bniedem. Id-djalogu se jibni fuq il-kisbiet u l-impenji internazzjonali, reġjonali u nazzjonali tal-Ġordan. Is-soċjetà ċivili se tiġi mistiedna b’mod konġunt sabiex tagħti kontribut.
Rigward id-drittijiet tal-bniedem b’mod speċifiku, id-djalogu regolari se jindirizza fost l-oħrajn: il-libertà tal-espressjoni fil-forom kollha tagħha; il-libertà ta’ assoċjazzjoni inkluż l-ambjent tax-xogħol għas-soċjetà ċivili u għas-sħab soċjali, bħat-trade unions u l-kmamar tal-kummerċ; id-drittijiet tan-nisa u l-emanċipazzjoni tan-nisa fil-ħajja politika, ekonomika u pubblika, u d-drittijiet tat-tfal. Amministrazzjoni pubblika responsabbli għal għemilha, trasparenti, effiċjenti u inklużiva hija essenzjali sabiex jiġu implimentati dawn il-miri, u sabiex jiġu promossi u msaħħa ulterjorment id-demokrazija u l-governanza tajba tal-Ġordan u l-ġlieda tiegħu kontra l-frodi u l-korruzzjoni, anki permezz ta’ kooperazzjoni effettiva u effiċjenti mal-Uffiċċju Ewropew ta’ Kontra l-Frodi u mal-Uffiċċju tal-Prosekutur Pubbliku Ewropew.
Id-djalogu se jqis kif xieraq l-impenji li diġà ħa l-Ġordan fil-livell multilaterali. Id-drittijiet ekonomiċi, soċjali u kulturali, pereżempju fuq l-edukazzjoni u x-xogħol, se jkunu koperti wkoll f’dan id-djalogu. Id-djalogu se jkun marbut b’mod partikolari ma’ oqsma li jinsabu fil-Prijoritajiet tas-Sħubija.
Sabiex jiġi żgurat livell għoli ta’ protezzjoni tad-data personali, l-UE se tkompli timpenja ruħha favur il-promozzjoni tal-konverżjoni ulterjuri mal-istandards tal-UE u dawk internazzjonali dwar il-protezzjoni tad-data. Il-Ġordan jenħtieġ li jieħu passi prattiċi ulterjuri sabiex jiggarantixxi r-rispett għad-drittijiet għall-privatezza u l-protezzjoni tad-data personali fis-setturi pubbliċi u privati, inkluż fil-qasam tal-infurzar tal-liġi u tal-ġustizzja kriminali.
Rispons għall-Kriżi Sirjana
L-UE u l-Ġordan se jkomplu jaħdmu flimkien sabiex isibu soluzzjonijiet dejjiema u sostenibbli għall-kriżi Sirjana f’konformità mar-Riżoluzzjoni 2254 (2015) tal-Kunsill tas-Sigurtà tan-NU, sabiex jippermettu r-ritorn volontarju, sikur u dinjituż tar-refuġjati. L-isforzi tagħhom se jkomplu jipprovdu aċċess għall-protezzjoni, l-għajxien u s-servizzi kemm għar-refuġjati kif ukoll għall-komunitajiet ospitanti vulnerabbli, anki permezz tal-miżuri li ġejjin:
–L-iffaċilitar kontinwu tal-istatus amministrattiv tar-refuġjati u l-iżgurar ta’ protezzjoni effettiva, aċċess għal servizzi bażiċi u rispett għad-drittijiet bażiċi tal-bniedem u legali tagħhom;
–It-titjib tal-aċċess u l-kwalità tas-servizzi essenzjali, inklużi l-assistenza soċjali, is-servizzi tad-dranaġġ, il-kura tas-saħħa inklużi s-saħħa mentali u l-appoġġ psikosoċjali u l-edukazzjoni formali u mhux formali;
–Iż-żieda fl-għajxien u l-awtodipendenza tagħhom billi jinħolqu opportunitajiet ta’ kontribut għall-iżvilupp ekonomiku tal-Ġordan permezz, fost l-oħrajn, ta’: titjib tal-klima kummerċjali u tisħiħ tal-produttività u tal-kundizzjonijiet tas-suq tax-xogħol; appoġġ għall-politiki favur it-tqabbil tal-ħiliet u l-ħtiġijiet tas-suq tax-xogħol; iffaċilitar tal-aċċess għall-edukazzjoni u t-taħriġ; titjib u espansjoni tal-aċċess għal opportunitajiet tax-xogħol anki permezz tal-appoġġ ta’ negozji bbażati fid-dar u permessi tax-xogħol; tisħiħ tal-emanċipazzjoni ekonomika u tal-parteċipazzjoni taż-żgħażagħ u tan-nisa.
–It-trawwim tal-esportazzjonijiet lejn is-suq tal-UE, anki permezz tal-implimentazzjoni effettiva tal-iskema tar-regoli tal-oriġini għall-Ġordan, sabiex jiġu promossi l-investimenti u l-ħolqien tal-impjiegi, li jkunu ta’ benefiċċju kemm għall-Ġordaniżi kif ukoll għar-refuġjati Sirjani.
Mekkaniżmi għad-Djalogu u għall-Kooperazzjoni Reċiproka
Il-qafas ġenerali għar-relazzjonijiet bejn l-UE u l-Ġordan huwa stabbilit mill-Ftehim ta’ Assoċjazzjoni, li daħal fis-seħħ fl-2002, u l-Istatus Avvanzat miksub fl-2010. Ir-razzjonalizzazzjoni tal-implimentazzjoni tal-Ftehim ta’ Assoċjazzjoni nkisbet b’suċċess permezz tar-raggruppament tas-sottokumitati fi ftit djalogi tematiċi skont il-Prijoritajiet ta’ Sħubija u billi ġew ikkomplementati d-djalogi politiċi.
F’korrelazzjoni mar-rieżami tal-Aġenda għall-Mediterran u tal-Konklużjonijiet tal-Kunsill fl-2024, huwa previst ukoll rieżami ta’ nofs it-terminu sabiex jiġi evalwat l-impatt tal-Prijoritajiet tas-Sħubija li se jiġu miftiehma b’mod reċiproku bejn l-UE u l-Ġordan, ’ u, fejn meħtieġ, biex jiġu adattati.
Barra minn hekk, sabiex jiġi appoġġat l-għoti tal-appoġġ tal-UE b’reazzjoni għall-kriżi tar-refuġjati Sirjani, se jsir rieżami regolari tal-impenji reċiproċi rilevanti skont dawn il-Prijoritajiet fil-kuntest tal-kooperazzjoni bilaterali bejn l-UE u l-Ġordan kif ukoll djalogi u laqgħat rilevanti oħrajn, u permezz tas-segwitu għall-konferenzi ta’ Brussell.
F’konformità mal-prinċipju ta’ sjieda akbar tal-Politika Ewropea tal-Viċinat, l-UE, f’koordinazzjoni mill-qrib mal-Istati Membri, se tipparteċipa fil-koordinazzjoni ta’ mekkaniżmi mal-Gvern tal-Ġordan fil-livell ċentrali u lokali, u mas-sħab, bħas-soċjetà ċivili u s-settur privat.
Filwaqt li ssegwi l-ambizzjonijiet deskritti fil-Prijoritajiet tas-Sħubija, l-UE hija impenjata li tkompli tipprovdi appoġġ finanzjarju u li timpenja ruħha fil-komunità internazzjonali b’appoġġ għall-Ġordan, u l-Ġordan jimpenja ruħu li jkompli jimplimenta l-aġenda ta’ riforma tiegħu, li se tkun ċentrali sabiex ikun possibbli s-suċċess konġunt tas-sħubija.
