IL-KUMMISSJONI EWROPEA
Brussell, 1.8.2022
COM(2022) 366 final
RAPPORT TAL-KUMMISSJONI
RAPPORT ANNWALI TAL-2021
DWAR L-APPLIKAZZJONI TAL-PRINĊIPJI TAS-SUSSIDJARJETÀ U TAL-PROPORZJONALITÀ U DWAR IR-RELAZZJONIJIET MAL-PARLAMENTI NAZZJONALI
RAPPORT ANNWALI 2021
DWAR L-APPLIKAZZJONI TAL-PRINĊIPJI TAS-SUSSIDJARJETÀ U TAL-PROPORZJONALITÀ U DWAR IR-RELAZZJONIJIET MAL-PARLAMENTI NAZZJONALI
1.introduzzjoni
Dan huwa d-29 rapport dwar l-applikazzjoni tal-prinċipji tas-sussidjarjetà u tal-proporzjonalità, sottomess skont l-Artikolu 9 tal-Protokoll Nru 2 dwar l-applikazzjoni tal-prinċipji ta’ sussidjarjetà u proporzjonalità (“Protokoll Nru 2”) tat-Trattat dwar l-Unjoni Ewropea u tat-Trattat dwar il-Funzjonament tal-Unjoni Ewropea. Bħat-tliet rapporti ta’ qablu, huwa jkopri r-relazzjonijiet tal-Kummissjoni mal-Parlamenti nazzjonali, li għandhom rwol ewlieni fl-applikazzjoni ta’ dawn il-prinċipji.
Fl-2021, il-Parlament Ewropew, il-Kunsill, il-Kummissjoni, u l-Kumitat tar-Reġjuni komplew japplikaw u jiżviluppaw aktar l-għodod u l-proċeduri ttestjati tagħhom sabiex jiżguraw li l-prinċipji tas-sussidjarjetà u tal-proporzjonalità ġew irrispettati fil-ħidma tagħhom sabiex iħejju l-leġiżlazzjoni tal-UE. Il-Kummissjoni, sabiex tikkonsolida l-politika tagħha ta’ regolamentazzjoni aħjar, adottat linji gwida ġodda u strumenti, bl-għan li timplimenta bis-sħiħ l-impenn tagħha li tipproduċi l-grilja ta’ valutazzjoni tas-sussidjarjetà proposta mit-Task Force dwar is-Sussidjarjetà, il-Proporzjonalità u dwar li “Isir inqas b’mod iktar effiċjenti” għall-proposti leġiżlattivi politikament sensittivi u importanti kollha akkumpanjati minn valutazzjoni tal-impatt. Dan ta aktar enfasi lil għodda b’saħħitha li, jekk tintuża mill-atturi kollha involuti, tista’ tiffaċilita b’mod sinifikanti l-valutazzjoni oġġettiva ta’ kif il-prinċipji tas-sussidjarjetà u tal-proporzjonalità qegħdin jiġu rrispettati fil-leġiżlazzjoni tal-UE. Il-Kumitat tar-Reġjuni żviluppa wkoll aktar il-kontribut tiegħu għall-aġenda tar-regolamentazzjoni aħjar, b’mod partikolari permezz tan-network tiegħu ta’ hubs reġjonali, u ppromwova l-kunċett ta’ “sussidjarjetà attiva”.
L-istituzzjonijiet kienu adattaw bis-sħiħ il-metodi ta’ ħidma tagħhom sabiex jakkomodaw il-kundizzjonijiet imposti mill-pandemija tal-COVID-19 u l-iżviluppi tagħha. F’din it-tieni sena ta’ restrizzjonijiet, il-kollaborazzjoni mal-Parlamenti nazzjonali intensifikat. Il-Parlamenti nazzjonali ppreżentaw 360 opinjoni, li huma konsiderevolment aktar mis-sentejn preċedenti (225 fl-2020 u 159 fl-2019), u li parzjalment jirriflettu n-numru akbar ta’ proposti li l-Kummissjoni ppreżentat. Minn dawn, kien hemm total ta’ 16-il opinjoni motivata, li esprimew tħassib li kien inkiser il-prinċipju tas-sussidjarjetà. Il-maġġoranza ta’ dawn iffukaw fuq il-proposti leġiżlattivi fil-pakkett “Lesti għall-mira ta’ 55 %”. L-ebda proposta individwali ma wasslet għal aktar minn tliet opinjonijiet motivati. Il-pakkett li rċieva l-ogħla grad ta’ attenzjoni kien “Lesti għall-mira ta’ 55 %”, u l-proposti individwali li rċivew l-aktar kummenti kienu l-Att dwar is-Servizzi Diġitali (10 opinjonijiet), id-Direttiva dwar pagi minimi adegwati (9 opinjonijiet) u ż-żewġ proposti dwar iċ-Ċertifikat COVID Diġitali tal-UE (8 opinjonijiet kull waħda).
L-iskambju bil-miktub mal-Parlamenti nazzjonali kompla jintensifika fl-2021, u hekk ukoll id-djalogu politiku orali fid-diversi forom tiegħu. Saru laqgħat f’format fiżiku, virtwali jew ibridu, u n-numru ta’ dawn u l-parteċipazzjoni tal-Kummissjoni f’avvenimenti interparlamentari komplew jiżdiedu, parzjalment bis-saħħa tal-possibbiltajiet offruti mill-vidjokonferenzi.
Elementi notevoli addizzjonali fir-relazzjonijiet tal-Parlamenti nazzjonali mal-istituzzjonijiet tal-UE fl-2021 kienu: (i) ir-rwol ewlieni li kellhom il-biċċa l-kbira tal-Parlamenti nazzjonali, skont ir-regoli kostituzzjonali nazzjonali tagħhom, meta approvaw id-Deċiżjoni tal-Kunsill tal-2020 dwar ir-riżorsi proprji; u (ii) il-livelli għoljin ta’ impenn tagħhom fit-tħejjija u fl-implimentazzjoni tal-Konferenza dwar il-Futur tal-Ewropa.
2.l-applikazzjoni tal-prinċipji tas-sussidjarjetà u tal-proporzjonalità mill-istituzzjonijiet
Il-Kummissjoni
Fl-2021, il-Kummissjoni kompliet tapplika l-aġenda tagħha ta’ “regolamentazzjoni aħjar”, li tiżgura t-tfassil tad-dritt tal-UE fuq il-bażi tal-evidenza u b’mod trasparenti, u li tintegra l-prinċipji tas-sussidjarjetà u tal-proporzjonalità fl-istadji kollha tat-tfassil tal-politika tagħha. Appoġġat dawk l-inizjattivi li x’aktarx ikollhom impatti sinifikanti b’valutazzjonijiet tal-impatt komprensivi. Hija segwiet ukoll l-impenn tagħha li tevalwa l-politiki eżistenti qabel ma tippreżenta proposti sabiex tirrevedihom. Dawn il-valutazzjonijiet u l-evalwazzjonijiet tal-impatt jinkludu l-analiżi tal-punt sa fejn l-inizjattivi jikkonformaw mal-prinċipji tas-sussidjarjetà u tal-proporzjonalità.
Regolamentazzjoni aħjar: komunikazzjoni, linji gwida u strumenti ġodda
F’Novembru 2021, il-Kummissjoni adottat linji gwida ġodda għal regolamentazzjoni aħjar u strumenti ġodda għal regolamentazzjoni aħjar. Il-linji gwida mibnijin fuq l-aspetti ewlenin deskritti fil-Komunikazzjoni tagħha dwar regolamentazzjoni aħjar tad-29 ta’ April 2021 li ħabbret ġenerazzjoni ġdida ta’ regolamentazzjoni aħjar.
Il-Komunikazzjoni pproponiet ħafna titjib għall-proċess tat-tfassil tad-dritt tal-UE, f’konformità mal-għanijiet ambizzjużi tal-Kummissjoni von der Leyen, u bniet fuq l-eżerċizzju ta’ rendikont tar-regolamentazzjoni aħjar tal-2019, li kien identifika diversi oqsma fejn seta’ jsir titjib fl-aġenda għal regolamentazzjoni aħjar. Il-Komunikazzjoni tenniet li regolamentazzjoni aħjar hija sforz konġunt għall-partijiet ikkonċernati kollha, sabiex jiġi żgurat li l-leġiżlazzjoni tkun tal-ogħla kwalità u li l-UE għandha taġixxi biss meta jkun neċessarju (sussidjarjetà) u sa fejn ikun neċessarju (proporzjonalità). Ħabbret ukoll il-pubblikazzjoni ta’ grilja ta’ valutazzjoni tas-sussidjarjetà ma’ kull proposta leġiżlattiva politikament sensittiva jew importanti li tkun akkumpanjata minn valutazzjoni tal-impatt, li tgħin sabiex dawn il-prinċipji jissarrfu fil-prattika. Dan is-segwitu għar-rakkomandazzjonijiet mit-Task Force dwar is-Sussidjarjetà, il-Proporzjonalità u dwar li “Isir inqas b’mod iktar effiċjenti”.
L-elementi l-ġodda introdotti jinkludu t-teħid ta’ approċċ ta’ “one in, one out” sabiex jiġi mminimizzat il-piż ta’ leġiżlazzjoni ġdida tal-UE għall-individwi u għan-negozji u t-titjib tal-mod kif ir-regolamentazzjoni aħjar tindirizza u tappoġġa s-sostenibbiltà u t-trasformazzjoni diġitali. Ta’ rilevanza diretta għall-Parlamenti nazzjonali hija s-simplifikazzjoni tal-konsultazzjonijiet pubbliċi bl-introduzzjoni ta’ “sejħa għal evidenza” waħda, li tieħu post diversi konsultazzjonijiet preċedenti fi stadji differenti tat-tħejjija tal-politika, fuq il-portal imtejjeb “Semma’ Leħnek”. Il-kontribut li l-Parlamenti nazzjonali u reġjonali jew l-awtoritajiet nazzjonali, reġjonali u lokali jistgħu jiddeċiedu li jagħtu huwa identifikat b’mod ċar u distint mill-kontribut minn partijiet ikkonċernati oħrajn. Madankollu, numru żgħir biss ta’ Parlamenti nazzjonali użaw dan il-portal fl-2021.
Il-pjattaforma “Fit for Future”
Stabbilita f’Mejju 2020 bħala s-suċċessur tal-pjattaforma REFIT, il-pjattaforma “Fit for Future” (“il-pjattaforma”) hija grupp ta’ esperti ta’ livell għoli li jgħin lill-Kummissjoni tissimplifika l-liġijiet, tnaqqas il-piżijiet regolatorji mhux neċessarji relatati, u tisfrutta l-għarfien espert u l-esperjenza f’livelli aktar baxxi ta’ governanza u tal-partijiet ikkonċernati sabiex tiżgura li l-leġiżlazzjoni tilħaq l-objettivi tagħha bl-aktar mod effiċjenti, filwaqt li tqis l-esperjenza mill-awtoritajiet nazzjonali, lokali u reġjonali.
Tiġbor flimkien rappreżentanti mill-awtoritajiet nazzjonali, reġjonali u lokali tal-Istati Membri, mill-Kumitat tar-Reġjuni – appoġġat min-network RegHub tiegħu –, mill-Kumitat Ekonomiku u Soċjali Ewropew u mill-partijiet ikkonċernati li jirrappreżentaw l-organizzazzjonijiet tan-negozju u dawk mhux governattivi. Il-pjattaforma għandha rwol importanti fl-għoti ta’ informazzjoni dwar kif qegħdin jiġu implimentati l-liġijiet. Fl-2021, hija ppreżentat l-ewwel programm ta’ ħidma annwali ambizzjuż, li kopra 15-il suġġett differenti f’firxa wiesgħa ta’ setturi, bi prijoritajiet stabbiliti fuq id-diġitalizzazzjoni, fuq it-tikkettar effiċjenti, fuq l-awtorizzazzjoni u fuq l-obbligi ta’ rapportar, u fuq is-simplifikazzjoni tal-leġiżlazzjoni tal-UE.
Valutazzjonijiet tal-impatt
Il-Kummissjoni tanalizza l-prinċipji tas-sussidjarjetà u tal-proporzjonalità fil-valutazzjonijiet tal-impatt kollha mħejjin għall-proposti ta’ politika. Dawn il-valutazzjonijiet huma soġġetti għal kontroll indipendenti tal-kwalità mill-Bord tal-Iskrutinju Regolatorju. Fl-2021, il-Bord tal-Iskrutinju Regolatorju skrutinizza 83 valutazzjoni tal-impatt, żieda konsiderevoli meta mqabbla mas-sena ta’ qabel (41).
Evalwazzjonijiet u kontrolli tal-idoneità
Is-sussidjarjetà u l-proporzjonalità huma wkoll aspetti essenzjali tal-evalwazzjonijiet u tal-kontrolli tal-idoneità, li jivvalutaw jekk azzjoni fil-livell tal-UE tatx ir-riżultati mistennijin f’termini ta’ effiċjenza, ta’ effettività, ta’ koerenza, ta’ rilevanza u ta’ valur miżjud tal-UE.
Fl-2021, il-Bord tal-Iskrutinju Regolatorju skrutinizza 15-il evalwazzjoni ewlenija, inklużi 2 kontrolli tal-idoneità, meta mqabblin ma’ 13 fl-2020. Uħud mill-aspetti li jkopru l-evalwazzjonijiet huma partikolarment rilevanti f’termini tas-sussidjarjetà u tal-proporzjonalità. Pereżempju, l-evalwazzjoni tar-Regolament (UE) Nru 1315/2013 dwar linji gwida tal-Unjoni għall-iżvilupp tan-network trans-Ewropew tat-trasport (TEN-T) eżaminat, fost l-oħrajn, il-bidliet li jista’ jiġi argumentat b’mod raġonevoli li huma dovuti għall-intervent tal-UE, u li jisbqu dak li seta’ kien mistenni minn azzjonijiet nazzjonali mill-Istati Membri. L-evalwazzjoni kkonkludiet li l-allinjament u l-implimentazzjoni effettivi tal-azzjonijiet fil-livell nazzjonali, reġjonali u lokali kienu dovuti għal politika Ewropea waħda u b’saħħitha. Innotat ukoll li l-valur miżjud sinifikanti ġġenerat permezz tal-kooperazzjoni tat-TEN-t ma’ pajjiżi terzi ma kienx ikun jista’ jinkiseb li kieku l-Istati Membri aġixxew individwalment.
Il-Parlament Ewropew
Fl-2021, il-Parlament Ewropew formalment irċieva 227 sottomissjoni mill-Parlamenti nazzjonali skont il-Protokoll Nru 2, li minnhom 24 kienu opinjonijiet motivati u 203 kienu kontributi (sottomissjonijiet li ma qanqlux tħassib dwar is-sussidjarjetà). Bħala paragun, fl-2020, il-Parlament Ewropew irċieva 134 sottomissjoni, li 13 minnhom kienu opinjonijiet motivati.
Is-Sur Nacho Sánchez Amor (S&D/ES) u s-Sur Gilles Lebreton (ID/FR) kienu r-rapporteurs permanenti għas-sussidjarjetà tal-Kumitat għall-Affarijiet Legali (JURI) fl-2021, fl-ewwel u fit-tieni nofs tas-sena rispettivament. Matul il-mandat tagħhom, il-Kumitat – li skont l-Anness VI tar-Regoli ta’ Proċedura tal-Parlament Ewropew għandu responsabbiltà sħiħa sabiex jiżgura l-konformità tal-leġiżlazzjoni tal-UE mal-prinċipju tas-sussidjarjetà – ħareġ rapport dwar ir-rapporti annwali tal-Kummissjoni dwar is-sussidjarjetà u l-proporzjonalità li jkopri s-snin 2017-2019. Ir-rapporteur tiegħu kien is-Sur Mislav Kolakušić (NI/HR). Il-kumitat ikkontribwixxa wkoll għall-35 u għas-36 rapport biannwali mħejji mill-Konferenza tal-Kumitati Parlamentari għall-Affarijiet Ewropej tal-Parlamenti tal-Unjoni Ewropea (COSAC) dwar il-prattiki parlamentari.
Is-Servizz ta’ Riċerka Parlamentari Ewropew (EPRS) kompla jassisti lill-Parlament Ewropew fl-inkorporazzjoni ta’ kunsiderazzjonijiet tas-sussidjarjetà u tal-proporzjonalità fil-ħidma tiegħu billi:
-wettaq skrutinju sistematiku tal-aspetti tas-sussidjarjetà u tal-proporzjonalità tal-valutazzjonijiet tal-impatt tal-Kummissjoni u ġibed l-attenzjoni għal kull tħassib espress, b’mod partikolari mill-Parlamenti nazzjonali u mill-Kumitat tar-Reġjuni;
-żgura li l-ħidma tal-Parlament Ewropew stess taderixxi bis-sħiħ ma’ dawn il-prinċipji, pereżempju billi wettaq valutazzjonijiet tal-impatt tal-emendi sostanzjali tiegħu stess jew billi analizza l-valur miżjud tal-proposti tal-Parlament Ewropew għal leġiżlazzjoni ġdida, fuq il-bażi tal-Artikolu 225 tat-Trattat dwar il-Funzjonament tal-Unjoni Ewropea, u l-konsegwenzi ta’ ebda azzjoni mill-UE;
-skrutinizza l-aspetti tas-sussidjarjetà u tal-proporzjonalità meta abbozza l-valutazzjonijiet tal-impatt, b’fokus fuq il-valur miżjud tal-UE.
Fl-2021, l-EPRS ipproduċa 33 valutazzjoni inizjali tal-valutazzjonijiet tal-impatt tal-Kummissjoni u 2 valutazzjonijiet tal-impatt sostituttivi, 7 valutazzjonijiet tal-implimentazzjoni ex post Ewropej, 27 valutazzjoni tal-implimentazzjoni, 3 dokumenti ta’ “implimentazzjoni fl-azzjoni”, 2 evalwazzjonijiet ex post oħrajn (inkluża pubblikazzjoni dwar il-linji gwida l-ġodda għal regolamentazzjoni aħjar) u pubblikazzjoni waħda dwar “ir-regolamentazzjoni aħjar fl-azzjoni”, li tiskrutinizza l-programm ta’ ħidma annwali tal-Kummissjoni. Min-naħa tal-valur miżjud tal-UE, tlestew 2 rapporti dwar il-kost tan-non-Ewropa, 12-il valutazzjoni tal-valur miżjud tal-UE u dokument wieħed dwar il-valur miżjud tal-politiki eżistenti tal-UE.
Il-Kunsill
Fl-2021, il-Kunsill tal-Unjoni Ewropea (“il-Kunsill”) – inklużi l-Partijiet ta’ Ħidma rilevanti tiegħu – kompla jissorvelja l-implimentazzjoni effettiva tal-konklużjonijiet li l-Kunsill u l-Kunsill Ewropew kienu adottaw fis-snin ta’ qabel li koprew il-prinċipji tas-sussidjarjetà u tal-proporzjonalità. Dawn kienu l-konklużjonijiet tal-Kunsill Ewropew dwar “It-tlestija ulterjuri tal-aġenda tas-Suq Uniku”, il-konklużjonijiet tal-Kunsill fir-rigward ta’ “Regolamentazzjoni aħjar – l-iżgurar tal-kompetittività u tas-sostenibbiltà, tat-tkabbir inklużiv” u l-konklużjonijiet tal-Kunsill dwar “Ambjenti ta’ esperimentazzjoni regolatorja u klawżoli ta’ esperimentazzjoni bħala għodod għal qafas regolatorju li jiffavorixxi l-innovazzjoni, li jibqa’ validu fil-futur u reżiljenti li jilqa’ l-isfidi fixkiela fl-era diġitali”.
Minbarra l-obbligi tiegħu skont it-Trattat, il-Kunsill iżomm ukoll lill-Istati Membri infurmati dwar l-opinjonijiet tal-Parlamenti nazzjonali dwar il-proposti leġiżlattivi tal-Kummissjoni. Fl-2021, is-Segretarjat Ġenerali tal-Kunsill qassam 16-il opinjoni motivata li kienu waslu fil-qafas tal-Protokoll Nru 2 u 165 opinjoni maħruġa fil-qafas tad-djalogu politiku.
Il-Kumitat tar-Reġjuni
L-attivitajiet rilevanti għas-sussidjarjetà tal-Kumitat tar-Reġjuni fl-2021 kienu ggwidati mill-prijoritajiet għall-perjodu tal-mandat tal-2020-2025 li kien stabbilixxa fis-sena ta’ qabel. Dawn tennew id-determinazzjoni tal-Kumitat tar-Reġjuni li jkompli jtejjeb il-kwalità tal-leġiżlazzjoni tal-UE u li jantiċipa aħjar l-impatt territorjali tiegħu u jippromwovi l-prinċipju tas-sussidjarjetà attiva. Din id-determinazzjoni kienet appoġġata mis-sejbiet tal-Barometru Reġjonali u Lokali Annwali tal-UE 2021 tal-Kumitat tar-Reġjuni, li enfasizza li kważi żewġ terzi tal-politiċi lokali jħossu li r-reġjuni, l-ibliet u l-irħula ma għandhomx biżżejjed influwenza fuq it-tfassil tal-politika tal-UE. F’dan ir-rigward, il-Kumitat tar-Reġjuni kkonkluda li “l-Ewropa tista’ toħroġ aktar reżiljenti demokratikament u anke ambjentalment mill-kriżi tal-COVID-19 b’rikonoxximent formali u l-applikazzjoni tas-sussidjarjetà attiva biex jiġi żgurat li l-azzjonijiet jittieħdu fil-livell fejn l-azzjoni tiegħu se tipproduċi l-aqwa valur miżjud għaċ-ċittadini, u li jkun hemm fis-seħħ proċessi koordinati u effettivi għat-teħid tad-deċiżjonijiet”.
Fl-2021, il-Kumitat tar-Reġjuni ħareġ 59 opinjoni u 9 riżoluzzjonijiet. Minn dawn, 10 opinjonijiet leġiżlattivi, 17-il opinjoni mhux leġiżlattiva u 5 riżoluzzjonijiet kienu jinkludu referenzi speċifiċi għall-konformità mal-prinċipji tas-sussidjarjetà u tal-proporzjonalità jew rakkomandazzjonijiet konkreti sabiex tittejjeb dik il-konformità. Ħafna minn dawn kienu bbażati fuq it-30 kontribut dwar is-sussidjarjetà u l-proporzjonalità sottomessi fl-2021 permezz tar-REGPEX, is-sottonetwork tan-Network għall-Monitoraġġ tas-Sussidjarjetà, miftuħ għall-Parlamenti u għall-gvernijiet tar-reġjuni b’setgħat leġiżlattivi sabiex jappoġġa l-parteċipazzjoni tagħhom fil-fażi bikrija tal-proċess leġiżlattiv (analiżi tas-sussidjarjetà).
Il-Grupp ta’ Tmexxija tas-Sussidjarjetà, wara l-pariri li rċieva mill-Grupp ta’ Esperti tas-Sussidjarjetà tal-Kumitat tar-Reġjuni, identifika ħames inizjattivi ta’ prijorità fil-programm ta’ ħidma dwar is-sussidjarjetà tal-2021.
Fl-2021, il-Kumitat tar-Reġjuni adotta opinjonijiet li koprew dak li huwa jqis bħala tnejn mill-aktar proposti leġiżlattivi sensittivi fir-rigward tas-sussidjarjetà: il-Patt il-ġdid dwar il-migrazzjoni u l-ażil u l-proposta għal Direttiva dwar pagi minimi adegwati fl-UE. Wara li kkonsulta n-Network għall-Monitoraġġ tas-Sussidjarjetà tiegħu, il-Kumitat tar-Reġjuni kkonkluda li dawk il-proposti kienu konformi mal-prinċipju tas-sussidjarjetà.
Bħala parti mill-Ġimgħa Ewropea tar-Reġjuni u l-Bliet f’Ottubru 2021, il-Kumitat tar-Reġjuni koorganizza – flimkien mal-Konferenza tal-Assembleji Leġiżlattivi Reġjonali tal-UE (CALRE) – workshopdwar “Il-governanza fil-livell u s-sussidjarjetà attiva għall-irkupru sostenibbli u għar-reżiljenza”. Il-konklużjonijiet tal-workshop, imtennijin fir-riżoluzzjoni tal-Kumitat tar-Reġjuni dwar il-Barometru Annwali 2021, affermaw mill-ġdid il-ħtieġa li l-awtoritajiet lokali u reġjonali jiġu involuti fl-evalwazzjoni u fl-implimentazzjoni tal-Faċilità għall-Irkupru u r-Reżiljenza u, b’mod aktar speċifiku, tal-pjanijiet nazzjonali għall-irkupru u r-reżiljenza, u semmew id-dispjaċir li sa dak iż-żmien dan l-involviment kien għadu limitat.
Fis-sessjoni plenarja tiegħu ta’ Diċembru 2021, il-Kumitat tenna t-talba tiegħu li l-Ftehim Interistituzzjonali bejn il-Parlament Ewropew, il-Kunsill tal-Unjoni Ewropea u l-Kummissjoni dwar ir-Regolamentazzjoni Aħjar jiġi rrivedut sabiex jinkorpora d-dimensjoni f’diversi livelli tal-proċess regolatorju Ewropew, kif issuġġerit mit-Task Force dwar is-Sussidjarjetà, il-Proporzjonalità u li “Isir inqas b’mod iktar effiċjenti”.
Il-Kumitat tar-Reġjuni impenja ruħu wkoll li joħloq strumenti għal regolamentazzjoni aħjar tal-Kumitat tar-Reġjuni sabiex jintegra l-għodod eżistenti kollha tiegħu għal regolamentazzjoni aħjar (in-Network għall-Monitoraġġ tas-Sussidjarjetà, ir-RegHub u l-valutazzjonijiet tal-impatt territorjali) f’qafas ta’ governanza wieħed, sabiex jittejbu l-kooperazzjoni, in-nisġiet u s-sinerġiji bejn l-għodod u l-atturi individwali u sabiex jissawru nisġiet aktar b’saħħithom mal-istrumenti tal-Kummissjoni għal regolamentazzjoni aħjar (li jinkludu għodda dwar l-impatti territorjali) u l-għodod żviluppati mis-Servizz ta’ Riċerka Parlamentari Ewropew.
Dwar l-aġenda usa’ tas-sussidjarjetà, il-Kumitat tar-Reġjuni qiegħed lilu nnifsu fil-qafas tal-Konferenza dwar il-Futur tal-Ewropa. Ipprovda kontribut dwar kif “tintuża ‘sussidjarjetà attiva’ sabiex jiġu involuti aħjar il-parlamenti, ir-reġjuni u l-bliet fit-tfassil tal-politiki Ewropej”.
Il-Qorti tal-Ġustizzja tal-Unjoni Ewropea
Fl-2021, il-Qorti tal-Ġustizzja ma qatgħet l-ebda sentenza sinifikanti fir-rigward tal-prinċipji tas-sussidjarjetà u tal-proporzjonalità.
3.l-applikazzjoni tal-mekkaniżmu ta’ kontroll tas-sussidjarjetà mill-parlamenti nazzjonali
Fl-2021, il-Kummissjoni rċiviet 16-il opinjoni motivata mill-Parlamenti nazzjonali. Dan huwa aktar mill-aħħar sentejn (b’9 fl-2020 u l-ebda opinjoni motivata fl-2019), Iżda anqas mis-snin ta’ qabel (2016-2018), f’numri assoluti u fi proporzjon man-numru globali ta’ opinjonijiet mibgħutin mill-Parlamenti nazzjonali (ara wkoll it-tabella “Tipi ta’ opinjonijiet” fit-Taqsima 4).
Mis-16-il opinjoni motivata li waslu fl-2021, 9 kienu relatati mal-pakkett “Lesti għall-mira ta’ 55 %”, 3 mal-pakkett tal-Unjoni Ewropea tas-Saħħa, 2 mal-Patt dwar il-migrazzjoni u l-ażil, 1 mal-proposta għal Direttiva dwar pagi minimi adegwati fl-UE, u 1 mal-proposta li temenda d-Direttiva dwar il-VAT fir-rigward tal-għoti ta’ setgħat ta’ implimentazzjoni lill-Kummissjoni sabiex tiddetermina t-tifsira tat-termini użati f’ċerti dispożizzjonijiet ta’ dik id-Direttiva.
Id-9 opinjonijiet motivati relatati ma’ proposti mill-pakkett “Lesti għall-mira ta’ 55 %”, adottati mill-Kummissjoni fl-14 ta’ Lulju 2021, ġew minn 4 Parlamenti nazzjonali u koprew 13-il proposta differenti. Il-biċċa l-kbira ta’ dawn kienu relatati mal-parti tal-pakkett li tmiss mas-solidarjetà bejn l-Istati Membri, bl-aktar tħassib espress ta’ spiss li kien valutazzjoni insuffiċjenti tal-impatti u nuqqas ta’ evidenza għall-valur miżjud tal-azzjoni Ewropea. Madankollu, l-ebda proposta individwali ma wasslet għal aktar minn tliet opinjonijiet motivati, u għalhekk l-ebda waħda ma laħqet il-livell limitu għal rispons aggregat mill-Kummissjoni, wisq anqas għal “karta safra” li tkun teħtieġ li l-Kummissjoni tagħti raġunijiet għaż-żamma, għat-tibdil jew għall-irtirar tal-proposta tagħha.
Il-Kmamar tal-Oireachtas tal-Irlanda bagħtu żewġ opinjonijiet motivati dwar dan il-pakkett, li kull waħda minnhom kienet tkopri sitt proposti. Fl-ewwel waħda, huma argumentaw li l-proposti ma jikkonformawx mal-prinċipji tas-sussidjarjetà minħabba li l-Kummissjoni ma kinitx issodisfat b’mod adegwat ir-rekwiżiti proċedurali sabiex tipprovdi dikjarazzjoni dettaljata b’indikaturi kwantitattivi u kwalitattivi suffiċjenti, sabiex il-Parlamenti nazzjonali jkunu jistgħu jivvalutaw bis-sħiħ l-implikazzjonijiet kollha ta’ proposti ta’ din in-natura li jkopru l-UE kollha. Fit-tieni waħda, dwar punti oħrajn fil-pakkett, it-tħassib ewlieni tal-Kmamar tal-Oireachtaskien li n-“neċessità” u l-“benefiċċji akbar” tal-proposti b’kuntrast mal-miżuri meħudin fil-livell tal-Istati Membri ma kinux ġew stabbiliti b’mod adegwat u li, għalhekk, il-proposti la kienu proporzjonati u lanqas konformi mal-prinċipju tas-sussidjarjetà. Esprimew ukoll tħassib speċifiku fir-rigward tal-proposta għal sistema ġdida separata għall-iskambju ta’ kwoti tal-emissjonijiet għas-setturi tat-trasport bit-triq u tal-bini u l-allokazzjoni tad-dħul permezz tal-Fond Soċjali għall-Klima, indirizzata aktar fil-fond fil-paragrafi korrispondenti ta’ hawn taħt.
Fit-tweġibiet tagħha, il-Kummissjoni ċċarat in-neċessità u l-benefiċċji akbar ta’ dawn il-proposti u spjegat li kollha kemm huma kienu bbażati fuq il-Komunikazzjoni tal-Kummissjoni dwar il-pjan dwar il-Mira Klimatika għall-2030, li kienet akkumpanjata minn valutazzjoni tal-impatt estensiva li tirfed pjan komprensiv sabiex tiżdied b’mod responsabbli l-mira vinkolanti tal-UE għall-2030 għal tnaqqis nett fl-emissjonijiet ta’ mill-inqas 55 %. Kull waħda mill-proposti koperti mill-opinjoni motivata kienet appoġġata minn valutazzjoni tal-impatt speċifika. Il-Kummissjoni indikat ukoll li kienet għamlet ħilitha sabiex tgħaqqad l-effetti tal-proposti ta’ politika differenti f’valutazzjoni tax-xenarju ta’ Stat Membru li tipprova tkopri l-impatt kombinat tagħhom (ix-xenarju “TAĦLITA”). Din l-informazzjoni kollha hija disponibbli għall-pubbliku online.
Dwar il-Fond Soċjali għall-Klima, ir-Riksdag tal-Iżvezja qajjem dubju dwar il-benefiċċju klimatiku tal-miżura, peress li l-appoġġ dirett għall-introjtu mhux neċessarjament iwassal għal tnaqqis fl-emissjonijiet u jikkontribwixxi għall-miri komuni. Ikkritika wkoll l-irbit dirett tal-appoġġ għall-introjtu tal-unitajiet domestiċi fil-livell nazzjonali mal-baġit tal-UE. Fit-tweġiba tagħha, il-Kummissjoni spjegat li l-Fond Soċjali għall-Klima ġie propost sabiex jindirizza l-impatt soċjali mhux uniformi potenzjali li sistema ġdida għall-iskambju ta’ kwoti tal-emissjonijiet jista’ jkollha kemm fi ħdan l-Istati Membri kif ukoll bejniethom. L-objettivi tal-Fond għandhom jinkisbu permezz ta’ appoġġ għall-investiment u permezz ta’ appoġġ temporanju għall-introjtu. Madankollu, ma jkun hemm l-ebda pagament mill-baġit tal-UE direttament liċ-ċittadini. L-Istati Membri jirċievu appoġġ mill-baġit tal-UE u, sussegwentement, iħallsu l-appoġġ temporanju dirett għall-introjtu mill-baġits nazzjonali tagħhom, u kwalunkwe skema bħal din tkun stabbilita u ġestita mill-awtoritajiet nazzjonali skont il-leġiżlazzjoni u r-regolamentazzjoni nazzjonali.
Il-Kmamar tal-Oireachtas tal-Irlanda qajmu dubji dwar il-metodoloġija tal-Kummissjoni għall-kalkolu tal-allokazzjonijiet finanzjarji għall-Istati Membri mill-Fond Soċjali għall-Klima, minħabba nuqqas ta’ data nazzjonali rilevanti. Fit-tweġiba tagħha, il-Kummissjoni spjegat li l-ħtiġijiet speċifiċi tal-Istati Membri differenti kienu riflessi fil-metodoloġija tal-allokazzjoni. L-operat tal-fond jiżgura wkoll li l-Istati Membri jkunu jistgħu jieħdu miżuri sabiex jikkomplementaw l-azzjoni klimatika fil-livell tal-UE. Huma jinsabu fl-aħjar pożizzjoni sabiex ifasslu u jagħżlu l-miżuri u l-investimenti li jirriflettu l-ispeċifiċitajiet nazzjonali.
Is-Senát Ċek ikkunsidra li l-proposta għal riformulazzjoni tad-Direttiva dwar it-Tassazzjoni fuq l-Enerġija interferiet mas-setgħat tat-taxxa tal-Istati Membri b’diversi modi: i) billi l-Istati Membri ma tħallewx jistabbilixxu rati tat-taxxa differenti għal prodotti tal-enerġija fl-istess kategorija; ii) il-mekkaniżmu ta’ indiċjar awtomatiku tal-livelli tat-taxxa kisru s-setgħat tat-taxxa tal-Istati Membri billi pprekluda politika tat-tassazzjoni razzjonali speċjalment meta jkun hemm inflazzjoni għolja; iii) il-livelli minimi tat-taxxa jikkostitwixxu element essenzjali u, għalhekk, għandhom jiġu aġġustati biss permezz ta’ att leġiżlattiv, mhux permezz ta’ att delegat tal-Kummissjoni; u iv) id-definizzjoni ta’ unitajiet domestiċi vulnerabbli li jistgħu jibbenefikaw minn tnaqqis fit-taxxa ma kinitx flessibbli biżżejjed u kienet tillimita b’mod sinifikanti l-għażliet tal-Istati Membri sabiex jindirizzaw l-impatti soċjali tad-Direttiva.
Il-Kummissjoni wieġbet li l-proposta żammet il-flessibbiltà għall-Istati Membri sabiex jadattaw il-leġiżlazzjoni nazzjonali b’tali mod li jagħmluha adattata għall-kuntest u għall-ħtiġijiet speċifiċi tagħhom. L-istruttura tat-taxxa proposta tkun tiġbor flimkien il-prodotti tal-enerġija u l-elettriku f’kategoriji u tikklassifikahom skont il-prestazzjoni ambjentali tagħhom, u gruppi ta’ prodotti b’karatteristiċi simili (bħall-fjuwils fossili) ikollhom l-istess trattament tat-taxxa. Madankollu, l-Istati Membri jkunu liberi li jistabbilixxu l-livelli ta’ tassazzjoni tagħhom ’il fuq mill-valuri minimi kif iqisu xieraq, dment li jirrispettaw din il-klassifikazzjoni. Il-mekkaniżmu ta’ indiċjar propost, ibbażat fuq indiċi armonizzat mill-Eurostat, iżomm ir-rilevanza tar-rati minimi tat-taxxa u l-valur reali tagħhom maż-żmien. Fl-aħħar nett, l-eżenzjoni mit-taxxa possibbli għall-unitajiet domestiċi vulnerabbli tkun marbuta ma’ kriterju armonizzat iżda l-applikazzjoni ta’ dan il-kriterju tkun tiddependi mis-sitwazzjonijiet nazzjonali.
Fl-opinjoni motivata tiegħu dwar ir-reviżjoni tad-Direttiva tal-UE dwar is-Sistema għall-Iskambju ta’ Kwoti tal-Emissjonijiet, is-Senát Ċek qies li l-valutazzjoni tal-impatt u l-analiżi li jakkumpanjaw il-proposti leġiżlattivi tal-Kummissjoni ma kinux jinkludu analiżijiet tal-impatti speċifiċi għall-pajjiżi. Sostna li l-Kummissjoni ma kinitx qieset biżżejjed l-effetti soċjali u ekonomiċi negattivi tal-introduzzjoni tal-iskambju ta’ kwoti tal-emissjonijiet fis-setturi tat-trasport bit-triq u tal-bini fl-Istati Membri b’kapaċità tal-akkwist aktar baxxa, speċjalment fid-dawl tan-nuqqas ta’ mekkaniżmi għall-prevenzjoni tal-kummerċ spekulattiv.
Fit-tweġiba tagħha, il-Kummissjoni spjegat li x-xenarju ta’ politika, li jgħaqqad il-proposti ta’ politika differenti, huwa mibni fuq data speċifika għall-pajjiżi disponibbli għall-pubbliku. Il-Kummissjoni kienet ipproponiet l-introduzzjoni ta’ prezz tal-karbonju minbarra politiki fil-livell nazzjonali minħabba li s-snin ta’ qabel kienu wrew li l-politiki Ewropej u nazzjonali eżistenti sabiex jitnaqqsu l-emissjonijiet fis-setturi tat-trasport bit-triq u tal-bini ma pprovdewx riżultati suffiċjenti sabiex jintlaħaq l-objettiv għat-tnaqqis tal-emissjonijiet b’55 % sal-2030. Li kieku l-applikazzjoni tal-ipprezzar tal-karbonju għall-emissjonijiet tal-gassijiet serra mill-bini u mit-trasport bit-triq ikollha impatt soċjali mhux uniformi kemm fi ħdan l-Istati Membri kif ukoll bejniethom, il-Fond Soċjali għall-Klima jindirizza dawn l-impatti fuq l-aktar persuni u unitajiet domestiċi vulnerabbli.
Il-Kmamar tal-Oireachtas tal-Irlanda argumentaw li s-sistema proposta għall-iskambju ta’ kwoti tal-emissjonijiet x’aktarx ma tipprovdix livell komparabbli ta’ dħul bħat-taxxa nazzjonali fuq il-karbonju u, għalhekk, ikollha impatt fuq il-kapaċità tal-Irlanda li timplimenta miżuri klimatiċi sabiex tnaqqas l-emissjonijiet tal-gassijiet serra u tilħaq il-mira nazzjonali tagħha ta’ emissjonijiet tal-gassijiet serra żero netti. Azzjoni tal-Istati Membri tkun aktar effettiva milli azzjoni tal-UE. Il-Kummissjoni wieġbet li s-sistema l-ġdida għall-iskambju ta’ kwoti tal-emissjonijiet ma tkunx timpedixxi lill-Istati Membri milli jimplimentaw politiki nazzjonali aktar ambizzjużi dwar l-ipprezzar tal-karbonju permezz tat-tassazzjoni, jekk ikunu jixtiequ hekk.
Dwar il-proposta għal Regolament dwar il-varar ta’ infrastruttura tal-fjuwils alternattivi, is-Senát Ċek qies li l-Kummissjoni ma kinitx tat prova li l-miri vinkolanti proposti għall-infrastruttura dedikata għall-vetturi tqal kienu realistikament possibbli b’kost raġonevoli għall-Istati Membri, u, għalhekk, ma kinitx uriet il-valur miżjud reali tal-approċċ magħżul fil-livell tal-UE. Fit-tweġiba tagħha, il-Kummissjoni spjegat li l-miri vinkolanti jkunu japplikaw biss għan-network Ewropew ta’ toroq pubbliċi ewlenin (in-“network TEN-T”), u li l-attrezzar tiegħu b’infrastruttura xierqa jkun jeħtieġ azzjoni fil-livell tal-UE minħabba l-karattru tranżnazzjonali tiegħu u l-importanza tiegħu madwar l-Ewropa. Filwaqt li r-Regolament propost ħalla għad-diskrezzjoni tal-Istati Membri li jiddeterminaw il-mezzi sabiex jilħqu l-miri, l-Istati Membri li jipprevedu l-kofinanzjament jkunu jistgħu jagħmlu użu mill-fondi pprovduti mill-Faċilità għall-Irkupru u r-Reżiljenza.
Dwar il-parti tal-enerġija tal-pakkett “lesti għall-mira ta” 55 %” – jiġifieri l-proposti dwar id-Direttiva dwar l-Enerġija Rinnovabbli u dwar id-Direttiva dwar l-Effiċjenza Enerġetika – il-Kummissjoni rċiviet żewġ opinjonijiet motivati, mir-Riksdag tal-Iżvezja dwar l-ewwel proposta u mis-Senát Ċek dwar iż-żewġ proposti. Huma kkritikaw il-livell dettaljat ta’ regolamentazzjoni (Riksdag), u qiesu li s-sitwazzjonijiet speċifiċi fl-Istati Membri ma ġewx ikkunsidrati (Senát). B’dawn il-proposti, jiġu esklużi soluzzjonijiet aktar kosteffettivi u effiċjenti (Riksdag, Senát). Barra minn hekk, il-miri ġew iddubitati dwar is-sustanza, speċjalment fis-settur tat-tisħin, pereżempju fir-rigward tat-tisħin distrettwali (Senát). Dwar l-enerġija rinnovabbli, is-Senát enfasizza li minħabba s-sitwazzjoni ġeografika taċ-Ċekja u l-potenzjal limitat għall-enerġiji rinnovabbli fil-pajjiż, l-enerġija nukleari għandha tiġi rrikonoxxuta bħala sostenibbli fit-tassonomija tal-UE, kif ukoll il-gass għal perjodu tranżizzjonali.
Il-Kummissjoni argumentat li l-azzjoni tal-UE hija ġġustifikata f’konformità mal-Artikolu 191 tat-Trattat dwar il-Funzjonament tal-Unjoni Ewropea, peress li l-koordinazzjoni fil-livell tal-UE żżid is-sigurtà tal-enerġija u l-benefiċċji ambjentali u klimatiċi. Qafas leġiżlattiv effettiv u approċċ koordinat u armonizzat fil-livell tal-UE kienu meħtieġa sabiex tintlaħaq il-mira ewlenija tal-UE tal-effiċjenza fl-enerġija. L-Istati Membri jżommu l-flessibbiltà fejn tidħol l-għażla tat-taħlita ta’ politiki tagħhom, tas-setturi u tal-miżuri individwali sabiex jiksbu l-iffrankar tal-enerġija meħtieġ, filwaqt li jqisu l-kuntest u l-ispeċifiċitajiet nazzjonali tagħhom. Il-mira vinkolanti ta’ tnaqqis ta’ 9 % tal-UE relatata mal-konsum tal-enerġija primarja u mal-konsum finali tal-enerġija kienet neċessarja bħala parti mill-pakkett leġiżlattiv li se jwassal għat-tnaqqis ta’ 55 % tal-emissjonijiet tal-gassijiet serra.
Dwar il-proposta li temenda r-Regolament dwar l-emissjonijiet u l-assorbimenti tal-gassijiet serra minn użu tal-art, tibdil fl-użu tal-art u l-forestrija (land use, land use change and forestry, LULUCF), is-Sénat Franċiż esprima tħassib, filwaqt li rrikonoxxa li l-istabbiliment ta’ mira ta’ emissjonijiet ta’ gassijiet serra żero netti għall-UE sal-2050 kellu valur miżjud tal-UE. Huwa qies li l-għoti tas-setgħa lill-Kummissjoni, għall-perjodu 2026-2029, li tadotta atti ta’ implimentazzjoni b’kamp ta’ applikazzjoni potenzjalment mingħajr limitu sabiex timponi livelli vinkolanti tas-CO2 għall-attivitajiet agrikoli fuq kull Stat Membru ma kienx jirrispetta l-prinċipji tas-sussidjarjetà u tal-proporzjonalità. Barra minn hekk, iddikjara li l-arranġamenti ta’ governanza assoċjati mal-istabbiliment tal-miri tal-Istati Membri għall-perjodu 2026-2030 ma stabbilewx biżżejjed il-proċeduri ta’ monitoraġġ għall-Parlamenti nazzjonali.
Fit-tweġiba tagħha, il-Kummissjoni spjegat li kienet ipproponiet mira għall-2030 allinjata ma’ trajettorja lejn settur tal-art newtrali għall-klima fl-2035 u li d-distribuzzjoni proposta bejn l-Istati Membri kienet ibbażata fuq żewġ elementi: i) kull Stat Membru jżomm il-livell reċenti ta’ assorbimenti u ta’ emissjonijiet irrapportati tiegħu (jiġifieri l-medja għall-perjodu 2016 sa 2018) – li jirrappreżenta l-istess livell ta’ tluq kif applikat skont ir-Regolament dwar il-Kondiviżjoni tal-Isforzi; ii) id-distakk li kellu jitneħħa sabiex tintlaħaq il-mira tal-UE fl-2030 jitqassam b’mod proporzjonat mal-erja tal-art ġestita f’kull Stat Membru. Il-Kummissjoni ċċarat li l-proposta ma tmurx lil hinn minn dak li huwa neċessarju sabiex jintlaħqu l-miri. Dwar il-governanza, il-Kummissjoni spjegat li bit-tranżizzjoni lejn il-miri nazzjonali annwali għall-użu tal-art, għat-tibdil fl-użu tal-art u għas-settur tal-forestrija fil-perjodu mill-2026 sal-2030, jiġu introdotti prinċipji simili għal dawk prevalenti fil-qafas ta’ konformità skont ir-Regolament (UE) 2018/842 dwar il-Kondiviżjoni tal-Isforzi. L-Istati Membri jintalbu jissottomettu pjanijiet nazzjonali li fihom jagħtu dettalji dwar il-kontribut tagħhom sabiex tintlaħaq il-mira tal-2035. Fl-aħħar nett, fl-eżerċizzju tas-setgħat ta’ implimentazzjoni tagħha, il-Kummissjoni indikat li kienet megħjuna minn Kumitat dwar it-Tibdil fil-Klima, li fih kienu rrappreżentati l-Istati Membri kollha.
Is-Sénat Franċiż ħareġ opinjonijiet motivati dwar kull waħda mit-tliet proposti fil-Pakkett dwar l-Unjoni Ewropea tas-Saħħa. Huwa kkritika dak li ra bħala ndħil fil-kompetenzi nazzjonali fil-proposta għal Regolament dwar rwol imsaħħaħ għall-Aġenzija Ewropea għall-Mediċini. Is-Sénat qies li d-dritt previst tal-Kummissjoni li tieħu l-miżuri neċessarji kollha sabiex ittaffi l-effetti ta’ nuqqas attwali jew potenzjali ta’ mediċini jew ta’ apparati mediċi, meqjus bħala kritiku f’kuntest ta’ emerġenza tas-saħħa, kien f’kunflitt mal-kompetenza tal-Istati Membri li jipprovdu servizzi tas-saħħa u tal-kura medika, f’konformità mal-Artikolu 168(7) tat-Trattat dwar il-Funzjonament tal-Unjoni Ewropea. Fil-proposta għal Regolament dwar iċ-Ċentru Ewropew għall-prevenzjoni u l-kontroll tal-mard, is-Sénat ikkritika l-allegata armonizzazzjoni tal-liġijiet jew tar-regolamenti tal-UE meħtieġa għall-interoperabbiltà tal-pjanijiet nazzjonali ta’ tħejjija u ta’ rispons għal theddid transfruntier serju għas-saħħa bħala li tmur kontra t-Trattati u, b’referenza għall-valutazzjoni tal-impatt, iddubita mill-kapaċità taċ-ċentru li jwettaq evalwazzjonijiet u awditi. Dwar il-proposta għal Regolament dwar theddid transfruntier serju għas-saħħa, is-Sénat ikkritika l-użu ta’ atti ta’ implimentazzjoni u indika kunflitt ta’ kompetenzi u inċertezzi fir-rigward tal-koordinazzjoni mal-mekkaniżmu integrat tal-UE ta’ rispons għall-kriżijiet politiċi.
Fit-tweġiba tagħha, il-Kummissjoni argumentat kontra l-fehma li r-Regolament propost dwar l-Aġenzija Ewropea għall-Mediċini kien jikser ir-responsabbiltajiet tal-Istati Membri skont l-Artikolu 168(7) tat-Trattat dwar il-Funzjonament tal-Unjoni Ewropea, peress li l-emerġenzi tas-saħħa pubblika bil-kobor tal-kriżi tal-COVID-19 għandhom riperkussjonijiet fuq l-Istati Membri kollha, li individwalment ma jistgħux jipprovdu rispons suffiċjenti. Il-monitoraġġ ikkoordinat fil-livell tal-UE ta’ nuqqasijiet possibbli jista’ jgħin lill-Istati Membri jħejju aħjar għal żieda f’daqqa fid-domanda, jevitaw restrizzjonijiet fuq l-esportazzjoni fis-suq uniku, jipprevjenu l-ħolqien ta’ riżervi eċċessivi u sproporzjonati, u jallokaw ir-riżorsi b’mod aktar effiċjenti fil-livelli nazzjonali u Ewropej. L-ebda waħda mill-proposti tagħha ma tkun teħtieġ l-armonizzazzjoni tal-pjanijiet ta’ tħejjija, tal-liġijiet jew tar-regolamenti nazzjonali. Il-miżuri ta’ implimentazzjoni kienu sempliċiment relatati mal-proċeduri u la jagħtu setgħat addizzjonali lill-Kumitat għas-Sigurtà tas-Saħħa u lanqas ma jagħmlu vinkolanti l-opinjonijiet tal-Kumitat għas-Sigurtà tas-Saħħa.
Bħal fl-2020, il-Patt il-ġdid dwar il-migrazzjoni u l-ażil wassal ukoll għal opinjonijiet motivati fl-2021, min-Národná rada tas-Slovakkja dwar il-proposta dwar il-ġestjoni tal-ażil u tal-migrazzjoni u mis-Senato della Repubblica Taljan dwar il-ħames proposti leġiżlattivi li jsawru l-pakkett. In-Národná Rada qies li kien hemm ksur tal-prinċipju tas-sussidjarjetà minħabba li l-proposta naqset milli tidentifika l-bażi legali għall-koeffiċjent tad-distribuzzjoni u għall-kompetenzi tal-Aġenzija Ewropea għall-Ażil u tal-Gwardja Ewropea tal-Fruntiera u tal-Kosta. Xeħet dubju wkoll fuq l-użu ta’ atti delegati u argumenta li kull Stat Membru kien kompetenti sabiex jiddeċiedi dwar l-ammissjoni ta’ persuni fit-territorju tiegħu stess, fuq il-bażi tal-liġijiet nazzjonali tiegħu dwar l-ażil. Is-Senato della Repubblica ra ksur tas-sussidjarjetà sa fejn il-proposti wrew assimetrija evidenti bejn l-obbligi u s-solidarjetà u ma kinux isolvu l-problemi attwali u, għalhekk, azzjoni fil-livell tal-UE ma kellha l-ebda valur miżjud. Fir-rigward tal-proporzjonalità, is-Senato ddikjara li s-sistema ta’ “qabel id-dħul” tirriskja li taffettwa b’mod eċċessiv l-ordinament ġuridiku nazzjonali u l-protezzjoni ġudizzjarja fil-pajjiż tad-dħul; li l-limitu, li taħtu trid tiġi attivata l-proċedura fuq il-fruntiera, kien ifisser li kważi l-migranti marittimi kollha jkunu soġġetti għall-proċedura fuq il-fruntiera minflok għall-proċeduri ta’ rilokazzjoni; u li r-regolamentazzjoni tal-mekkaniżmu għall-isponsorizzazzjoni tar-ritorni kienet iżżid l-ispejjeż u l-burokrazija għall-Istat Membru tad-dħul.
Fit-tweġibiet tagħha, il-Kummissjoni spjegat li l-koeffiċjent tad-distribuzzjoni ma kienx element ġdid u li l-Aġenzija tal-Unjoni Ewropea għall-Ażil u l-Aġenzija Ewropea għall-Gwardja tal-Fruntiera u tal-Kosta (Frontex) ikunu qegħdin hemm sabiex jiffaċilitaw biss l-aspetti operazzjonali ta’ att ta’ implimentazzjoni. Dwar l-atti delegati, il-Kummissjoni enfasizzat li dawn id-dispożizzjonijiet kienu bbażati fuq ir-Regolament Dublin III u ma jbiddlux ir-regoli fis-seħħ bħalissa. Innotat ukoll li l-Artikolu 78(3) tat-Trattat dwar il-Funzjonament tal-Unjoni Ewropea jżid għażla speċifika għall-Kunsill sabiex jaġixxi jekk ikun hemm emerġenza kkaratterizzata minn żieda f’daqqa fil-wasliet ta’ ċittadini minn pajjiżi terzi. Huwa biss jekk ritorn mit-territorju tal-Istati Membri benefiċjarji ma jirnexxiex li l-Istat Membru sponsor jintalab jittrasferixxi l-migrant irregolari fit-territorju tiegħu sabiex ikompli bl-isforzi sabiex jirritorna l-migrant.
Il-Kummissjoni qieset li l-patt jsib il-bilanċ bejn ir-responsabbiltà u s-solidarjetà, peress li numru ta’ eċċezzjonijiet kienu jiżguraw il-flessibbiltà tal-proċedura fuq il-fruntiera u l-każijiet li fihom trid tiġi applikata. Il-kriterju ta’ responsabbiltà marbut mal-ewwel pajjiż ta’ dħul għandu jitqies flimkien mal-kriterji l-oħrajn ta’ responsabbiltà. L-iskop tal-mekkaniżmu ta’ solidarjetà tal-patt kien ukoll li jnaqqas in-numru ta’ persuni preżenti fl-Istati Membri b’numru kbir ta’ wasliet u li jipprovdi appoġġ fil-bini tal-kapaċità, fl-operazzjonijiet u fil-miżuri fil-qasam tar-relazzjonijiet esterni fejn dawn jistgħu jaffettwaw il-flussi migratorji lejn Stati Membri partikolari. L-isponsorizzazzjoni tar-ritorni ma żżidx l-ispejjeż għall-Istat Membru benefiċjarju.
Dwar il-proposta għal Direttiva dwar pagi minimi adegwati fl-UE, adottata fit-28 ta’ Ottubru 2020, il-Kummissjoni rċiviet it-tielet opinjoni motivata, mill-Kamra tad‑Deputati ta’ Malta, wara ż-żewġ opinjonijiet motivati li diġà ġew riċevuti fl-2020.
Il-Kamra tad-Deputati kkontestat l-għażla tal-bażi legali. F’termini ta’ sussidjarjetà, hija qieset li l-objettivi tal-proposta setgħu jintlaħqu b’mod effettiv mill-azzjoni tal-Istati Membri, minħabba d-differenzi fl-iffissar tal-pagi. Għall-kuntrarju, il-proposta jista’ jkollha effetti negattivi, bħal li tagħmel il-proċess ta’ negozjar kollettiv aktar impenjattiv u żżid ir-riskju ta’ kunflitt industrijali f’xi setturi.
Il-Kummissjoni spjegat li l-maġġoranza tal-Istati Membri kienu qed jiffaċċjaw il-problema ta’ adegwatezza u/jew ta’ kopertura insuffiċjenti tal-pagi minimi, u l-azzjoni fil-livell nazzjonali kienet uriet li ma kinitx biżżejjed sabiex tindirizza l-problema. Enfasizzat id-differenzi kbar fl-istandards għall-aċċessar ta’ protezzjoni adegwata tal-paga minima u li tali diskrepanzi jistgħu jiġu indirizzati bl-aħjar mod fil-livell tal-UE. L-Istati Membri b’kopertura ta’ negozjar kollettiv ta’ anqas minn 70 % ikollhom jipprovdu qafas ta’ kundizzjonijiet abilitanti u jfasslu pjan ta’ azzjoni sabiex jippromwovu n-negozjar kollettiv, iżda, fi kwalunkwe aspett ieħor, it-tfassil tal-qafas u tal-pjan ta’ azzjoni jkun kompletament f’idejn il-pajjiżi individwali.
Dwar il-proposta li temenda d-Direttiva dwar il-VAT fir-rigward tal-għoti ta’ setgħat ta’ implimentazzjoni lill-Kummissjoni sabiex tiddetermina t-tifsira tat-termini użati f’ċerti dispożizzjonijiet ta’ dik id-Direttiva, ir-Riksdag tal-Iżvezja afferma mill-ġdid f’opinjoni motivata l-importanza tar-rekwiżit tal-unanimità dwar it-tassazzjoni u qies li l-proċedura tat-teħid ta’ deċiżjonijiet proposta mill-Kummissjoni tkun tfisser trasferiment ta’ setgħa mil-livell nazzjonali għal dak tal-UE f’qasam li huwa ċentrali għas-sovranità nazzjonali, b’mod li jmur lil hinn minn dak li jkun neċessarju sabiex jintlaħqu l-objettivi tal-proposta.
Il-Kummissjoni wieġbet li l-applikazzjoni mhux armonizzata mill-Istati Membri ta’ kunċetti li jinsabu fid-Direttiva dwar il-VAT kienet tfixkel il-funzjonament mingħajr xkiel tas-suq intern u x’aktarx li twassal għal tassazzjoni doppja jew għal nontassazzjoni, u li ma kienx possibbli għall-Istati Membri waħedhom li jindirizzaw dawn il-problemi. Il-proposta pprovdiet għall-adozzjoni ta’ atti ta’ implimentazzjoni mill-Kummissjoni biss fir-rigward ta’ sett limitat ta’ regoli li jimplimentaw id-dispożizzjonijiet tad-Direttiva dwar il-VAT, li għalihom kienet meħtieġa applikazzjoni uniformi tal-kunċetti fil-leġiżlazzjoni tal-UE dwar il-VAT. Il-proċeduri tal-votazzjoni b’maġġoranza kwalifikata u ta’ kumitat diġà ntużaw fir-rigward tat-tassazzjoni indiretta, u l-proċedura ta’ kumitat kienet l-approċċ standard li ilu żmien twil jintuża fid-dritt tal-Unjoni għall-iffaċilitar tal-ħolqien ta’ viżjoni u ta’ prattika komuni.
4.djalogu politiku bil-miktub mal-parlamenti nazzjonali
Minbarra l-mekkaniżmu ta’ skrutinju tas-sussidjarjetà stabbilit fil-Protokoll Nru 2 tat-Trattati, ir-relazzjonijiet tal-Kummissjoni mal-Parlamenti nazzjonali jinkludu wkoll firxa ta’ attivitajiet ulterjuri, b’mod partikolari d-djalogu politiku li ġie stabbilit fl-2006. Dan jinkludi skambji bil-miktub dwar kwalunkwe inizjattiva tal-Kummissjoni li l-Parlamenti nazzjonali jridu jagħtu kontribut jew jikkummentaw dwarha u djalogu politiku orali, deskritt aktar fit-Taqsima 5 aktar ’il quddiem.
Osservazzjonijiet ġenerali
Fl-2021, il-Parlamenti nazzjonali bagħtu 360 opinjoni lill-Kummissjoni. Dan kien jirrappreżenta żieda sinifikanti meta mqabbel mas-sentejn preċedenti (255 fl-2020 u 159 fl-2019) iżda kien għadu anqas mis-snin tan-nofs tal-mandat preċedenti tal-Kummissjoni (569 fl-2018, 576 fl-2017 u 620 fl-2016).
Minn dawn it-360 opinjoni, 199 (55,3 %), inklużi s-16-il opinjoni motivata (4,4 %), kienu relatati ma’ dawk il-proposti leġiżlattivi tal-Kummissjoni li kienu soġġetti għall-mekkaniżmu ta’ kontroll tas-sussidjarjetà. Dawn huma numru u perċentwal ferm ogħla milli fis-sentejn ta’ qabel, x’aktarx konsegwenza taż-żieda fin-numru ta’ proposti leġiżlattivi ppreżentati mill-Kummissjoni.
Il-161 opinjoni li jifdal (44,7 %) kienu jikkonċernaw prinċipalment inizjattivi mhux leġiżlattivi, bħal komunikazzjonijiet, jew kienu opinjonijiet fuq inizjattiva proprja mhux relatati direttament ma’ inizjattiva tal-Kummissjoni, b’numru stabbli (156 fl-2020) li wrew li xi Parlamenti nazzjonali għadhom jipprovdu lill-Kummissjoni b’kontribut politiku siewi li jħares ’il quddiem.
Il-Kummissjoni dejjem tiġbed l-attenzjoni tas-servizzi u tal-Kummissarji rilevanti tal-Kummissjoni u, għal proposti leġiżlattivi, tar-rappreżentanti tal-Kummissjoni li jieħdu sehem fin-negozjati tal-koleġiżlaturi, lejn il-punti mqajmin mill-Parlamenti nazzjonali jew mill-kmamar.
Parteċipazzjoni u kamp ta’ applikazzjoni
Bħal fis-snin preċedenti, in-numru ta’ opinjonijiet mibgħuta lill-Kummissjoni varja b’mod sinifikanti bejn il-Parlamenti nazzjonali. L-aktar 10 kmamar attivi ħarġu 285 opinjoni. Dan huwa 79 % tat-total, allinjat mal-medja għal dawn l-aħħar snin. In-numru ta’ Parlamenti nazzjonali jew ta’ kmamar li ma ħarġu l-ebda opinjoni naqas għal 8 ikmamar (minn total ta’ 39), li jfisser li 5 Stati Membri – li jirrappreżentaw anqas minn għoxrin fil-mija tat-total – ma involvewx irwieħhom fid-djalogu politiku bil-miktub fl-2021. Dan juri interess dejjem akbar mill-Parlamenti nazzjonali fil-parteċipazzjoni fl-iskrutinju tas-sussidjarjetà u fid-djalogu politiku.
Is-12-il Parlament nazzjonali jew kamra li bagħtu l-ogħla numru ta’ opinjonijiet fl-2021 kienu: il-Cortes Generales ta’ Spanja (57 opinjoni), l-Assembleia da República tal-Portugall (54 opinjoni), is-Senát taċ-Ċekja (47 opinjoni), il-Camera Deputaților tar-Rumanija (27 opinjoni), il-Bundesrat tal-Ġermanja (24 opinjoni), is-Senat tar-Rumanija (18-il opinjoni), is-Sénat ta’ Franza (17-il opinjoni), l-Eerste Kamer tan-Netherlands (17-il opinjoni), il-Poslanecká sněmovna taċ-Ċekja (12-il opinjoni), il-Camera dei Deputati tal-Italja (12-il opinjoni), is-Senattal-Polonja (12-il opinjoni) u r-Riksdag tal-Iżvezja (12-il opinjoni). Dawn kienu wkoll fost l-aktar kmamar attivi fis-snin ta’ qabel. L-Anness 2 jagħti dettalji dwar in-numru ta’ opinjonijiet mibgħutin minn kull kamra.
In-natura tal-opinjonijiet varjat ukoll minn Parlament nazzjonali jew minn kamra għal oħra. Xi wħud iffokaw l-aktar fuq il-verifika ta’ jekk proposta tal-Kummissjoni kinitx konformi mal-prinċipji tas-sussidjarjetà u tal-proporzjonalità, filwaqt li oħrajn ikkummentaw f’aktar dettall dwar il-kontenut tal-proposti jew bagħtu opinjonijiet fuq inizjattiva proprja. Fost dan il-grupp tal-aħħar, is-Senát taċ-Ċekja, il-Camera Deputaților u s-Senat tar-Rumanija, il-Bundesrat tal-Ġermanja, u s-Sénat ta’ Franza kienu partikolarment attivi.
Is-suġġetti ewlenin tal-opinjonijiet fid-djalogu politiku
Il-pakketti li rċivew l-ogħla grad ta’ attenzjoni fl-2021 kienu “Lesti għall-mira ta’ 55 %” (49 opinjoni), il-Patt il-ġdid dwar il-migrazzjoni u l-ażil (17-il opinjoni), is-servizzi diġitali (17-il opinjoni) u l-Unjoni Ewropea tas-Saħħa (11-il opinjoni). Fir-rigward ta’ inizjattivi individwali, il-Parlamenti nazzjonali bagħtu l-biċċa l-kbira tal-opinjonijiet dwar l-Att dwar is-Servizzi Diġitali (10 opinjonijiet), il-proposta dwar pagi minimi adegwati (9 opinjonijiet), iż-żewġ proposti dwar iċ-Ċertifikat Covid Diġitali tal-UE (8 opinjonijiet kull waħda), il-proposta għal Fond għall-Migrazzjoni u l-Ażil (7 opinjonijiet), l-Att dwar is-Swieq Diġitali (7 opinjonijiet), il-proposta għal Fond Soċjali għall-Klima (6 opinjonijiet), il-proposta emendata li tistabbilixxi proċedura komuni għall-protezzjoni internazzjonali fl-Unjoni (6 opinjonijiet) u l-proposta dwar paga ugwali għal xogħol ugwali (6 opinjonijiet). Fis-6 opinjonijiet dwar il-programm ta’ ħidma tal-Kummissjoni għall-2021, il-Parlamenti nazzjonali indikaw ukoll lill-Kummissjoni l-prijoritajiet annwali tagħhom għall-2021.
Mid-49 opinjoni dwar il-pakkett “Lesti għall-mira ta’ 55 %”, 9 kienu opinjonijiet motivati (diġà dettaljati fit-taqsima preċedenti), u 14 sempliċiment ikkonfermaw il-konformità tal-proposti mal-prinċipju tas-sussidjarjetà. Fost l-inizjattivi inklużi fil-pakkett, l-aktar waħda kkummentata kienet il-proposta li temenda r-Regolament dwar l-emissjonijiet u l-assorbimenti tal-gassijiet serra minn użu tal-art, tibdil fl-użu tal-art u l-forestrija (LULUCF), il-proposta għal Direttiva dwar l-Effiċjenza Enerġetika, il-proposta għal Direttiva dwar l-Enerġija Rinnovabbli, il-proposta għar-reviżjoni tad-Direttiva dwar it-Tassazzjoni fuq l-Enerġija, il-proposta għal Regolament li jistabbilixxi mekkaniżmu ta’ aġġustament tal-karbonju fil-fruntieri, il-proposta għal Regolament li jistabbilixxi Fond Soċjali għall-Klima u l-Komunikazzjoni dwar l-istrateġija l-ġdida tal-UE għall-foresti.
Dwar il-proposta li temenda r-Regolament dwar l-emissjonijiet u l-assorbimenti tal-gassijiet serra minn użu tal-art, tibdil fl-użu tal-art u l-forestrija (LULUCF), il-Kummissjoni rċiviet tliet opinjonijiet fil-qafas tad-djalogu politiku. Waħda minn dawn esprimiet tħassib dwar il-kapaċità li jinkisbu emissjonijiet ta’ gassijiet serra żero netti sal-2035, innotat nuqqas ta’ inċentivi sabiex jiżdiedu l-assorbimenti (li huma neċessarji sabiex jinkisbu emissjonijiet ta’ gassijiet serra żero netti), qieset li r-rapportar akkurat u armonizzat u sistema ta’ penali huma elementi importanti sabiex jintlaħqu l-objettivi tar-regolament propost, u qieset li l-miżuri sabiex jinkisbu emissjonijiet ta’ gassijiet serra żero netti diġà għandhom jiġu inklużi fil-pjanijiet strateġiċi tal-politika agrikola komuni għall-2023-2027. Opinjoni oħra talbet lill-Kummissjoni tħejji studju tal-impatt li jiddeskrivi l-fattibbiltà speċifika tal-miżuri proposti u li jikkwantifika l-effetti tal-bidliet ippjanati, speċjalment l-ispejjeż u l-benefiċċji għaċ-Ċekja.
Fit-tweġibiet tagħha, il-Kummissjoni spjegat kif hija tippjana li tikseb emissjonijiet ta’ gassijiet serra żero netti u x’valutazzjonijiet tal-impatt għamlet qabel ma ppreżentat il-proposti “Lesti għall-mira ta’ 55 %”. Fir-rigward tal-miri tal-2030 u tal-2035, hija enfasizzat l-importanza li tirċievi pjanijiet strateġiċi ambizzjużi mill-Istati Membri għall-politika agrikola komuni għall-2023-2027 u laqgħet l-appoġġ għal monitoraġġ u għal rapportar akkurati u armonizzati, kif ukoll għal sistema ta’ penali, bħala elementi essenzjali sabiex jintlaħqu l-objettivi tar-regolament propost.
Il-Kummissjoni rċiviet sitt opinjonijiet dwar il-parti tat-tassazzjoni tal-pakkett “Lesti għall-mira ta’ 55 %”, tlieta dwar il-proposta għall-istabbiliment ta’ mekkaniżmu ta’ aġġustament tal-karbonju fil-fruntieri u tlieta, li jinkludu opinjoni motivata, dwar il-proposta għal riformulazzjoni tad-Direttiva dwar it-Tassazzjoni fuq l-Enerġija. Dwar il-mekkaniżmu ta’ aġġustament tal-karbonju fil-fruntieri, il-Parlamenti nazzjonali staqsew dwar il-kompatibbiltà tiegħu mar-regoli tal-Organizzazzjoni Dinjija tal-Kummerċ, l-impatt tal-mekkaniżmu fuq il-kompetittività tal-UE u l-possibbiltà li jinżammu kwoti mingħajr ħlas temporanjament. Il-Kummissjoni wieġbet li l-proposta kienet tfasslet f’konformità mar-regoli tal-Organizzazzjoni Dinjija tal-Kummerċ, li l-valutazzjoni tal-impatt tagħha wriet li l-impatt fuq il-kompetittività jkun baxx, u li ż-żamma ta’ kwoti mingħajr ħlas tirriskja li tnaqqas l-inċentiv għall-investiment fi produzzjoni aktar ekoloġika. Dwar ir-riformulazzjoni tad-Direttiva dwar it-Tassazzjoni fuq l-Enerġija, filwaqt li l-opinjoni motivata esprimiet tħassib dwar l-interferenza mas-setgħat tat-taxxa tal-Istati Membri, iż-żewġ opinjonijiet l-oħrajn taw is-sostenn tagħhom, minkejja osservazzjoni dwar riskju ta’ tassazzjoni doppja. Għal din tal-aħħar, il-Kummissjoni wieġbet li d-Direttiva dwar it-Tassazzjoni fuq l-Enerġija u s-Sistema għall-Iskambju ta’ Kwoti tal-Emissjonijiet ma kinux jirkbu fuq xulxin, peress li tal-ewwel tistabbilixxi dazji fuq il-konsum tal-enerġija filwaqt li tal-aħħar tindirizza l-emissjonijiet.
Dwar il-proposti dwar id-Direttiva dwar l-Enerġija Rinnovabbli u dwar id-Direttiva dwar l-Effiċjenza Enerġetika, minbarra l-opinjonijiet motivati li diġà saru kummenti dwarhom fit-taqsima preċedenti, il-Kummissjoni rċiviet opinjonijiet ġeneralment ta’ sostenn minn tlett ikmamar. Bħal fl-opinjonijiet motivati, ġiet espressa xi kritika dwar il-miri, fid-dawl tal-iskadenzi fil-proposti, speċjalment fir-rigward tas-settur tat-tisħin. Dwar l-enerġija rinnovabbli, kamra waħda enfasizzat li l-enerġija nukleari għandha tiġi rikonoxxuta bħala sostenibbli fit-tassonomija tal-UE, u hekk ukoll il-gass għal perjodu tranżizzjonali. Dwar il-miri u l-implikazzjoni tagħhom, il-Kummissjoni enfasizzat li qieset il-punti tat-tluq differenti tal-Istati Membri meta kienet qed tħejji l-proposta u, b’mod partikolari, meta pproponiet miri u parametri referenzjarji għas-sorsi ta’ enerġija rinnovabbli b’mod ġenerali u f’setturi individwali. Enfasizzat li fl-aħħar għaxar snin, bis-saħħa tal-avvanzi teknoloġiċi, l-ispiża tal-ġenerazzjoni tal-enerġija rinnovabbli naqset b’mod sinifikanti ħafna, u li, għalhekk, il-mira proposta ta’ 40 % għas-sehem tal-enerġija rinnovabbli fl-UE sal-2030 kienet ekonomikament fattibbli. Fir-rigward tar-rwol tal-enerġija nukleari u tal-gass naturali, il-Kummissjoni nnotat li l-Att Delegat (Klimatiku) Komplementari għat-Tassonomija tal-UE jinkludi ċerti attivitajiet nukleari u tal-gass fil-kategorija ta’ attivitajiet tranżizzjonali koperti mill-Artikolu 10(2) tar-Regolament dwar it-tassonomija, soġġetti għal kriterji stretti.
Il-Parlamenti nazzjonali appoġġaw il-ħolqien tal-Fond Soċjali għall-Klima, u kienu favur l-allokazzjoni ta’ 25 % tad-dħul mis-Sistema għall-Iskambju ta’ Kwoti tal-Emissjonijiet għat-trasport bit-triq u għall-bini sabiex jappoġġaw it-trasformazzjoni tal-enerġija għall-persuni li jesperjenzaw faqar enerġetiku. Madankollu, kamra waħda esprimiet ukoll tħassib dwar id-definizzjoni madwar l-UE kollha ta’ “faqar enerġetiku” għall-finijiet tal-identifikazzjoni ta’ persuni u ta’ entitajiet li jeħtieġu appoġġ mill-fond u qieset li din id-definizzjoni għandha tqis aħjar l-ispeċifiċitajiet tal-Istati Membri individwali. Kamra oħra esprimiet tħassib fir-rigward tal-istrumenti eżistenti fil-baġit tal-UE li kienu mfasslin sabiex jilħqu l-istess objettivi.
Dwar id-definizzjoni madwar l-UE ta’ “faqar enerġetiku”, il-Kummissjoni enfasizzat il-flessibbiltà li tat lill-Istati Membri fl-identifikazzjoni ta’ unitajiet domestiċi, ta’ mikrointrapriżi u ta’ utenti tat-trasport vulnerabbli skont is-sitwazzjonijiet nazzjonali speċifiċi tagħhom. B’mod simili, ir-Regolament dwar il-Fond Soċjali għall-Klima jenfasizza li l-Istati Membri, f’konsultazzjoni mal-awtoritajiet fil-livell reġjonali, jinsabu fl-aħjar pożizzjoni sabiex ifasslu u jimplimentaw pjanijiet soċjali dwar il-klima li huma adattati għaċ-ċirkostanzi lokali, reġjonali u nazzjonali tagħhom u ffokati fuqhom. Dwar it-tħassib relatat mal-istrumenti eżistenti, il-Kummissjoni ċċarat li fondi oħrajn tal-UE li jappoġġaw il-ħidma tal-Istati Membri lejn tranżizzjoni ġusta għall-klima kellhom objettivi differenti mill-Fond Soċjali għall-Klima. Ma għandhomx l-istess perjodu ta’ żmien u ma għandhomx l-enfasi fuq gruppi speċifiċi fil-mira li għandu l-Fond Soċjali għall-Klima. Differenza kbira meta l-Fond Soċjali għall-Klima propost jitqabbel ma’ ħafna fondi oħrajn kienet li dan kellu enfasi qawwija fuq il-ħtieġa li l-Istati Membri jwettqu riformi sabiex jiġġustifikaw l-użu minnhom tal-fond.
Il-proposta għall-istrateġija l-ġdida tal-UE għall-foresti għall-2030, li hija wkoll parti mill-pakkett “Lesti għall-mira ta’ 55 %”, wasslet għal tliet opinjonijiet. Il-Parlamenti nazzjonali għarfu l-importanza tal-foresti fil-ġlieda kontra t-tibdil fil-klima, iżda qajmu tħassib dwar aktar ċentralizzazzjoni u aktar elementi supranazzjonali fl-istrateġija, filwaqt li t-Trattat ma kienx jistabbilixxi politika komuni dwar il-foresti. Barra minn hekk, il-valutazzjoni tal-impatti tal-miżuri previsti fuq l-Istati Membri ġiet ikkritikata bħala batuta u tqajmu mistoqsijiet dwar kif l-istrateġija kienet relatata mal-politika agrikola komuni u jekk il-miżuri proposti, speċjalment il-kamp ta’ applikazzjoni propost tal-prodotti, kinux biżżejjed sabiex jiġġieldu d-deforestazzjoni globali u l-qtugħ illegali tas-siġar għall-injam.
Il-Kummissjoni wieġbet li l-foresti u l-forestrija kienu jaqgħu taħt il-kompetenzi kondiviżi tal-UE u l-UE kienet eżerċitat dawn il-kompetenzi f’diversi każijiet, pereżempju d-Direttiva dwar il-Ħabitats jew ir-Regolament dwar l-Injam, filwaqt li dejjem irrispettat il-prinċipju tas-sussidjarjetà. Ġibdet l-attenzjoni lejn il-valutazzjoni tal-impatt ġenerali għat-tisħiħ tal-objettiv tal-UE ta’ tnaqqis nett tal-emissjonijiet għall-2030, u għall-proposti leġiżlattivi speċifiċi skont il-pakkett “Lesti għall-mira ta’ 55 %”, li għalihom ġew koperti l-impatti speċifiċi għall-pajjiżi, fuq il-bażi ta’ xenarju ta’ referenza tal-UE li l-Istati Membri kienu ġew ikkonsultati dwaru. Hija żiedet li ż-żieda fis-sostenibbiltà u l-kunsiderazzjoni tal-kundizzjonijiet u tal-ħtiġijiet lokali kienu komuni kemm għall-istrateġija l-ġdida għall-foresti kif ukoll għall-politika agrikola komuni l-ġdida. Fir-rigward tal-kompetenza tal-Istati Membri li jinfurzaw miżuri ta’ kontroll kontra l-qtugħ illegali tas-siġar għall-injam, il-Kummissjoni tkun tappoġġa lill-awtoritajiet nazzjonali u tippromwovi l-użu estiż tal-intelligence ġeospazjali. Fl-aħħar nett, leġiżlazzjoni futura jkollha kamp ta’ applikazzjoni progressiv tal-prodotti, li jippermetti enfasi fuq dawk il-prodotti u l-komoditajiet fejn l-impatt tad-deforestazzjoni u tad-degradazzjoni tal-foresti kien l-ogħla.
Fl-2021, il-Kummissjoni kompliet tirċievi opinjonijiet dwar il-patt il-ġdid dwar il-migrazzjoni u l-ażil, adottat fit-23 ta’ Settembru 2020. Dawn l-opinjonijiet urew pożizzjonijiet diverġenti, l-aktar fir-rigward tal-mekkaniżmu ta’ solidarjetà. Xi kmamar ħarġu opinjonijiet favorevoli, li waħda minnhom talbet xi informazzjoni addizzjonali fir-rigward tal-protezzjoni ġudizzjarja tar-refuġjati u tal-iskedi ta’ żmien stabbiliti fil-proposta. Opinjoni oħra esprimiet dubju dwar l-effettività tal-mekkaniżmu u talbet li r-rilokazzjoni ssir obbligatorja minflok ma tippermetti sponsorizzazzjoni tar-ritorni. Kmamar oħrajn kienu mħassbin li kwalunkwe rilokazzjoni obbligatorja bbażata fuq kwoti tista’ twassal għal żbilanċi nazzjonali, jekk ma tiġix ikkunsidrata s-sitwazzjoni oġġettiva fl-Istati Membri rispettivi. Xi wħud beżgħu li l-proċedura fuq il-fruntiera żżid piż addizzjonali fuq l-Istati Membri, u xi wħud wissew li din il-proposta tkun teħtieġ investiment addizzjonali fl-infrastrutturi u fil-persunal sabiex issir operazzjonali. F’termini aktar ġenerali, il-kmamar talbu wkoll approċċ li jqis id-drittijiet tar-refuġjati fil-passi proċedurali kollha, inklużi l-protezzjoni tad-data u r-rikorsi għal appell.
Fit-tweġibiet tagħha, il-Kummissjoni enfasizzat l-importanza li l-isponsorizzazzjoni tar-ritorni tiġi organizzata b’mod effettiv. L-iskop ta’ dan kien li jiġi żgurat permezz ta’ sforzi kollettivi kkoordinati sew mill-atturi rilevanti kollha – inkluża pereżempju l-Frontex – li r-ritorni jitwettqu malajr kemm jista’ jkun, filwaqt li jiġi offrut appoġġ reali lill-Istat Membru benefiċjarju. L-Istati Membri dejjem ikollhom għażla bejn tal-anqas żewġ tipi ta’ miżuri ta’ solidarjetà, sabiex ir-rilokazzjoni la tkun awtomatika u lanqas obbligatorja. L-Istati Membri jkunu jistgħu jagħmlu użu mill-fondi allokati għall-programmi nazzjonali tagħhom kemm taħt il-Fond eżistenti għall-Ażil, il-Migrazzjoni u l-Integrazzjoni kif ukoll taħt il-Fond il-ġdid għall-Migrazzjoni u l-Ażil sabiex jappoġġaw kwalunkwe investiment meħtieġ sabiex isostni l-proċedura fuq il-fruntiera. Dwar il-protezzjoni legali u d-drittijiet fundamentali, il-Kummissjoni enfasizzat li s-salvagwardji kollha jkunu garantiti f’kull ħin matul l-iskrinjar, u dan huwa ggarantit bl-obbligu għall-Istati Membri li jistabbilixxu mekkaniżmu ta’ monitoraġġ indipendenti.
Il-Kummissjoni rċiviet 17-il opinjoni minn 10 ikmamar dwar il-Pakkett tas-Servizzi Diġitali (l-Att dwar is-Servizzi Diġitali u l-Att dwar is-Swieq Diġitali). Il-kummenti tal-Parlamenti nazzjonali ffokaw l-aktar fuq il-protezzjoni tal-konsumaturi u d-deżinjazzjoni tal-gwardjani fi pjattaformi kbar. Diversi kmamar talbu kjarifiki dwar il-koordinazzjoni bejn l-atti proposti u r-regoli settorjali u leġiżlazzjoni eżistenti oħra. Kamra minnhom enfasizzat il-ħtieġa li jiġu ssalvagwardjati d-drittijiet tal-Istati Membri li jippreservaw il-pluraliżmu tal-media. Diversi kmamar esprimew tħassib dwar id-definizzjoni ta’ kontenut illegali u t-tneħħija tiegħu, u talbu jew proposti leġiżlattivi ulterjuri rigward kontenut legali iżda dannuż jew sabiex id-deċiżjonijiet rilevanti jitħallew f’idejn qrati indipendenti. Diversi kmamar riedu jaraw il-pakkett propost jindirizza t-tixrid tad-diżinformazzjoni.
Fit-tweġibiet tagħha, il-Kummissjoni spjegat li l-pakkett il-ġdid kien tfassal bir-reqqa sabiex joqgħod fil-qafas legali eżistenti u enfasizzat li l-awtoritajiet tal-Istati Membri jkunu involuti fl-infurzar tiegħu u jkunu jistgħu jitolbu lill-Kummissjoni tiftaħ investigazzjonijiet dwar id-deżinjazzjoni tal-gwardjani. F’dan ir-rigward, il-mekkaniżmu ta’ deżinjazzjoni kien ibbażat fuq kriterji kwantitattivi u kwalitattivi u kien hemm il-possibbiltà li jkun hemm reazzjoni għal bidliet rapidi fis-settur diġitali billi jiġu aġġustati l-limiti. Fir-rigward tal-libertà tal-media, il-Kummissjoni enfasizzat li l-proposti ma fixklux il-pluraliżmu tal-media b’xi mod iżda, għall-kuntrarju, isaħħu r-rwol tal-media fis-soċjetajiet Ewropej. L-Att dwar is-Servizzi Diġitali offra qafas regolatorju għall-indirizzar tal-kontenut illegali, li sab il-bilanċ it-tajjeb bejn l-impożizzjoni ta’ obbligi ċari fuq servizzi intermedjarji diġitali u s-salvagwardja tal-libertà tal-espressjoni u tal-informazzjoni. Fl-aħħar mill-aħħar il-qrati għandhom jiddeċiedu dwar l-illegalità tal-kontenut sabiex jippreservaw id-drittijiet u l-interessi leġittimi tal-partijiet affettwati kollha. Fir-rigward tal-kontenut dannuż, inkluża d-diżinformazzjoni, pjattaformi online kbar ħafna jkunu obbligati jivvalutaw u, konsegwentement, itaffu r-riskji sistemiċi li s-sistemi tagħhom jistgħu joħolqu.
Il-proposti dwar iċ-Ċertifikat Covid Diġitali tal-UE wasslu għal opinjonijiet minn sebat ikmamar, ilkoll favorevoli. Madankollu, opinjoni waħda esprimiet ukoll tħassib dwar it-trattament tad-data personali u d-durata tal-validità taċ-ċertifikat Covid. Is-Senato tal-Italja enfasizza li l-Istati Membri tal-UE kellhom id-dritt li jippermettu aċċess għat-territorju tagħhom skont il-leġiżlazzjoni tagħhom, inkluż għal persuni li ma setgħux jippreżentaw Ċertifikat Covid Diġitali tal-UE. Fit-tweġibiet tagħha, il-Kummissjoni enfasizzat li r-Regolament isegwi l-prinċipju tal-minimizzazzjoni tad-data stabbilit fir-Regolament Ġenerali dwar il-Protezzjoni tad-Data. Ma tinħoloq l-ebda bażi tad-data Ewropea dwar it-tilqim, l-ittestjar jew l-irkupru mill-COVID-19 iżda tkun possibbli l-verifika deċentralizzata ta’ ċertifikati interoperabbli ffirmati b’mod diġitali. Barra minn hekk, ir-Regolament ewlieni kien flessibbli biżżejjed sabiex iwieġeb għal evidenza u gwida xjentifiċi ġodda. Ma jkunx jaffettwa l-kompetenza tal-Istati Membri li jiddeċiedu dwar l-aktar miżuri xierqa għas-salvagwardja tas-saħħa pubblika. Madankollu, kwalunkwe restrizzjoni għall-moviment liberu ma għandhiex tmur lil hinn minn dik li tkun strettament neċessarja u ma għandha tagħmel l-ebda distinzjoni bejn il-vjaġġaturi fuq il-bażi tan-nazzjonalità tagħhom.
Minbarra l-opinjonijiet motivati spjegati hawn fuq, il-proposta għal Direttiva dwar pagi minimi adegwati fl-Unjoni Ewropea wasslet għal seba’ opinjonijiet oħrajn. Uħud jippreżentaw kritika, oħrajn ġeneralment jappoġġaw l-objettiv tal-proposta li ttejjeb l-adegwatezza tal-pagi minimi u tespandi l-aċċess tal-ħaddiema għall-protezzjoni tal-paga minima kif ukoll jippreżentaw suġġerimenti ulterjuri. Parlament minnhom ikkunsidra li l-bażi legali magħżula tat lill-UE kompetenza komplementari u ta’ appoġġ li ma setgħetx tiġi applikata fir-rigward tal-pagi. L-opinjoni qieset li rakkomandazzjoni tal-Kunsill kienet tkun strument legali aktar xieraq milli direttiva. Żewġ Parlamenti oġġezzjonaw għall-kundizzjonijiet differenti li qegħdin jiġu proposti għall-Istati Membri b’pagi minimi statutorji u għall-Istati Membri li jużaw sistemi ta’ negozjar kollettiv, filwaqt li qiesu dan bħala ksur tal-prinċipju tal-proporzjonalità. Xi kmamar enfasizzaw il-ħtieġa għal miżuri speċifiċi, adattati għal kull Stat Membru, sabiex jindirizzaw id-dumping soċjali u tal-pagi. Kamra minnhom talbet l-infurzar effettiv tal-pagi minimi statutorji billi jissaħħu s-superviżjoni, il-kontrolli u l-ispezzjonijiet fuq il-post. Parlament ieħor issuġġerixxa l-ħtieġa li tingħata ħarsa aktar mill-qrib lejn il-protezzjoni tal-baħħara li jaħdmu fuq bastimenti rreġistrati taħt il-bandiera ta’ Stat Membru tal-UE iżda li jirrisjedu b’mod permanenti f’pajjiżi terzi.
Fit-tweġibiet tagħha, il-Kummissjoni assigurat lill-Parlamenti li d-direttiva proposta ma tixħitx dubji fuq l-ispeċifiċitajiet tas-sistemi u tat-tradizzjonijiet nazzjonali, u kienet tirrispetta bis-sħiħ il-kompetenzi nazzjonali u l-awtonomija tas-sħab soċjali, f’konformità mal-prinċipji tas-sussidjarjetà u tal-proporzjonalità, u fi ħdan il-limiti tal-kompetenza tal-UE fil-qasam tal-pagi. Il-Kummissjoni enfasizzat li l-Istati Membri kollha, dawk b’paga minima statutorja u dawk b’negozjar kollettiv, ikollhom jivverifikaw il-ħtieġa għal bidliet politiċi u leġiżlattivi. Madankollu, kienu liberi li jiddeċiedu kif jikkonformaw mar-rekwiżiti minimi stabbiliti fil-proposta. Fir-rigward ta’ kontrolli aktar b’saħħithom, il-Kummissjoni nnotat ir-responsabbiltà tal-Istati Membri fir-rigward tal-pagi minimi statutorji. L-istess kien japplika għat-tfassil ta’ miżuri konkreti relatati man-negozjar kollettiv.
L-Anness 3 jelenka l-inizjattivi individwali tal-Kummissjoni li taw bidu għal tal-anqas ħames opinjonijiet.
5.kuntatti, żjarat, laqgħat, konferenzi u attivitajiet oħrajn
Żjarat tal-Kummissjoni fil-Parlamenti nazzjonali u laqgħat magħhom
Id-djalogu politiku orali bejn il-Kummissjoni u l-Parlamenti nazzjonali jinkludi diversi forom ta’ interazzjoni: żjarat mill-Membri tal-Kummissjoni lill-Parlamenti nazzjonali, żjarat tad-delegazzjonijiet tal-Parlamenti nazzjonali lill-Kummissjoni, il-parteċipazzjoni tal-Kummissjoni f’laqgħat u f’konferenzi interparlamentari (inkluża l-Konferenza tal-Kumitati Parlamentari għall-Affarijiet tal-Unjoni tal-Parlamenti tal-Unjoni Ewropea “COSAC”), preżentazzjonijiet tal-Kummissjoni lir-rappreżentanti permanenti tal-Parlamenti nazzjonali fi Brussell, dibattiti kontinwi dwar il-programmi ta’ ħidma tal-Kummissjoni, u Djalogi tas-Semestru Ewropew.
Numru ta’ żjarat tal-Kummissjoni fil-Parlamenti nazzjonali u ta’ laqgħat magħhom
mill-Membri tal-Kummissjoni fl-2021 (total għall-Istati Membri kollha: 130)
Fl-2021, il-Membri tal-Kummissjoni għamlu 130 żjara fil-Parlamenti nazzjonali jew laqgħat mad-delegazzjonijiet tal-Parlamenti nazzjonali, li laħqu kważi l-Parlamenti u l-kmamar nazzjonali kollha, żieda sinifikanti meta mqabbla mas-sentejn ta’ qabel (101 fl-2020 u 55 fl-2019). Il-format ta’ dawn l-avvenimenti (72 fiżiċi u 58 mill-bogħod b’vidjokonferenza) irrifletta l-iżvilupp tal-pandemija tal-COVID-19, bil-biċċa l-kbira tal-laqgħat virtwali li saru matul l-ewwel nofs tas-sena u l-biċċa l-kbira tal-laqgħat fiżiċi li saru matul it-tieni nofs tas-sena. Ir-rapport dwar “l-istat tad-dritt” kien l-aktar suġġett diskuss f’dawn l-avvenimenti, iżda l-Pilastru Ewropew tad-Drittijiet Soċjali, il-Konferenza dwar il-Futur tal-Ewropa u l-programm ta’ ħidma tal-Kummissjoni għall-2022 ġew indirizzati ta’ spiss ukoll.
Fl-2021, l-uffiċjali tal-Kummissjoni taw 36 preżentazzjoni (ilkoll permezz ta’ vidjokonferenza) lir-rappreżentanti tal-Parlamenti nazzjonali fi Brussell dwar diversi suġġetti, bħall-EU4Health, l-istrateġija tal-UE għall-vaċċini, ir-relazzjonijiet bejn l-UE u r-Renju Unit, il-pjan ta’ azzjoni tal-Pilastru Ewropew tad-Drittijiet Soċjali, l-Awtorità għat-Tħejjija u għar-Rispons f’Każ ta’ Emerġenza tas-Saħħa (HERA), il-pakkett “Lesti għall-mira ta’ 55 %”, il-Konferenza dwar il-Futur tal-Ewropa, ir-regolamentazzjoni aħjar, ir-rapport ta’ prospettiva strateġika jew il-Komunikazzjoni dwar l-Artiku. Il-preżentazzjonijiet permezz ta’ vidjokonferenza mhux biss għamluha possibbli li l-udjenza titwessa’ sabiex tinkludi uffiċjali mill-Parlamenti nazzjonali fil-bliet kapitali, u b’hekk jiżdied in-numru ta’ parteċipanti u titjieb il-ħidma tal-Kummissjoni sabiex tilħaq lill-Parlamenti nazzjonali, iżda ppermettew ukoll li jiġu organizzati ħafna aktar preżentazzjonijiet milli fis-snin ta’ qabel (meta mqabblin ma’ 23 fl-2020 – meta l-preżentazzjonijiet kienu kemm fiżiċi kif ukoll permezz ta’ vidjokonferenza – jew 13 fl-2019 – meta kienu kollha fiżiċi).
Laqgħat u konferenzi interparlamentari
Filwaqt li tibni fuq l-esperjenza tas-sena ta’ qabel, il-kooperazzjoni interparlamentari kompliet fil-forma ta’ vidjokonferenzi, ġeneralment bil-parteċipazzjoni tal-Membri tal-Kummissjoni, inklużi:
-il-Konferenza tal-Kumitati Parlamentari għall-Affarijiet Ewropej tal-Parlamenti tal-Unjoni Ewropea (COSAC);
-il-Ġimgħa Parlamentari Ewropea;
-il-Grupp ta’ Skrutinju Parlamentari Konġunt dwar l-Europol;
-diversi konferenzi interparlamentari (IPC) u laqgħat tal-kumitati (ICM).
Fil-laqgħa plenarja LXV tal-COSAC, li saret b’vidjokonferenza minn Lisbona fil-31 ta’ Mejju u fl-1 ta’ Ġunju, il-Kummissjoni kellha rappreżentanza b’saħħitha mill-Viċi Presidenti Šuica u Schinas u mill-Kummissarji Schmit u Gentiloni. Is-suġġetti diskussi kienu jinkludu r-rieżami tal-Presidenza Portugiża, il-mudell soċjali fit-tranżizzjoni ekonomika, diġitali u klimatika trippla, ir-rwol tal-Parlamenti nazzjonali fl-implimentazzjoni tal-pjanijiet nazzjonali għall-irkupru u r-reżiljenza, u s-sitwazzjoni attwali tal-Konferenza dwar il-Futur tal-Ewropa. Il-Viċi President Šuica attendiet ukoll għal-laqgħa plenarja LXVI tal-COSAC, li saret permezz ta’ vidjokonferenza minn Ljubljana fid-29-30 ta’ Novembru, u l-Kummissarju Várhelyi pparteċipa b’vidjomessaġġ. Is-suġġetti diskussi kienu jinkludu r-rieżami tal-Presidenza Slovena, il-perspettiva Ewropea għall-Balkani tal-Punent, ir-rwol futur taż-żgħażagħ fil-proċessi tat-teħid ta’ deċiżjonijiet tal-UE u lil hinn minnhom, u l-Konferenza dwar il-Futur tal-Ewropa.
Iż-żewġ laqgħat regolari tal-Presidenti tal-COSAC saru wkoll permezz ta’ vidjokonferenza, minn Lisbona u minn Ljubljana, fil-11 ta’ Jannar u fid-19 ta’ Lulju rispettivament. Il-laqgħa ta’ Jannar, li għaliha attendiet il-Kummissarju Ferreira, iffokat fuq il-prijoritajiet tal-Presidenza Portugiża u fuq l-irkupru u r-reżiljenza. Il-laqgħa ta’ Settembru, li għaliha attenda l-Kummissarju Breton, iffokat fuq il-prijoritajiet tal-Presidenza Slovena u taċ-ċibersigurtà.
Il-format tal-vidjokonferenza ppermetta lill-COSAC ikollha diversi skambji tematiċi informali, f’kooperazzjoni mal-Kummissjoni, minbarra l-avvenimenti regolari, li ffaċilita djalogu politiku aktar mill-qrib bejn il-Parlamenti nazzjonali u l-Kummissjoni.
Wara l-laqgħa tal-Presidenti tal-COSAC tal-11 ta’ Jannar 2021, 34 delegat mill-Parlamenti nazzjonali bagħtu ittra b’kofirem tas-16 ta’ Frar, li fiha talbu lill-Presidenti tal-Parlament Ewropew, tal-Kunsill Ewropew, tal-Kunsill u tal-Kummissjoni jistabbilixxu rwol attiv għall-Parlamenti nazzjonali fid-Dikjarazzjoni Konġunta dwar il-Konferenza dwar il-Futur tal-Ewropa, li għandha tiġi adottata mit-tliet istituzzjonijiet. Din id-Dikjarazzjoni Konġunta, iffirmata fl-10 ta’ Marzu 2021, flimkien mar-regoli ta’ proċedura tal-Konferenza, żguraw komponent parlamentari b’saħħtu. Il-Parlamenti nazzjonali pparteċipaw ma’ 108 rappreżentanti – fuq l-istess livell tan-numru ta’ rappreżentanti tal-Parlament Ewropew u taċ-ċittadini fil-plenarja tal-konferenza, u t-trojka Presidenzjali tal-COSAC kienet osservatur permanenti fil-bord eżekuttiv tal-Konferenza. Barra minn hekk, il-Parlamenti nazzjonali ppresedew tnejn mill-gruppi ta’ ħidma tal-konferenza, dwar it-tranżizzjoni diġitali u dwar il-migrazzjoni.
F’ittra ffirmata fl-1 ta’ Ġunju 2021, it-Trojka tal-COSAC (Ġermanja-Portugall-Slovenja) laqgħet dawn l-arranġamenti għall-Parlamenti nazzjonali.
Dwar il-Konferenza, il-Kummissjoni daħlet f’kuntatt mal-Parlamenti nazzjonali l-aktar permezz tal-COSAC (bil-Viċi President Šuica li għamlet diskorsi ewlenin f’diversi avvenimenti interparlamentari) u użat il-kummenti u s-suġġerimenti mressqin f’żewġ opinjonijiet u f’dikjarazzjoni konġunta. F’dan il-kontribut, il-Parlamenti nazzjonali qasmu d-dispjaċir li r-rappreżentanti tagħhom ingħataw status ta’ osservatur biss mingħajr drittijiet tal-vot fil-bord eżekuttiv u talbu li l-konferenza tinkludi lill-Parlamenti nazzjonali mill-pajjiżi tal-Balkani tal-Punent li jaspiraw għas-sħubija fl-UE. Huma appellaw ukoll sabiex fil-konferenza jiġu indirizzati kwistjonijiet istituzzjonali, bħall-estensjoni tal-perjodu ta’ skrutinju tas-sussidjarjetà ta’ tmien ġimgħat u l-introduzzjoni ta’ “karta ekoloġika” li tippermetti lill-Parlamenti jissuġġerixxu inizjattivi ġodda jew emendi għal dawk eżistenti.
Ratifika tad-Deċiżjoni dwar ir-riżorsi proprji
Id-Deċiżjoni dwar is-sistema tar-riżorsi proprji tal-Unjoni ġiet adottata mill-Kunsill fl-14 ta’ Diċembru 2020 u l-Istati Membri kollha kellhom japprovawha f’konformità mar-rekwiżiti kostituzzjonali rispettivi tagħhom qabel ma setgħet tidħol fis-seħħ. Fi 22 Stat Membru, dan jinvolvi ratifika parlamentari. Ir-ratifika preċedenti ħadet aktar minn sentejn sabiex titlesta. Din id-darba, minħabba l-urġenza li jitnieda l-istrument ta’ rkupru NextGenerationEU, fi żmien 6 xhur, sal-31 ta’ Mejju 2021, l-Istati Membri kollha kienu nnotifikaw b’mod effettiv lill-Kunsill bir-ratifika tagħhom. Fl-1 ta’ Ġunju 2021, id-Deċiżjoni daħlet fis-seħħ u seta’ jibda s-self għall-istrument għall-irkupru NextGenerationEU fis-swieq.
F’konformità mal-kuntesti kostituzzjonali u politiċi nazzjonali, il-Parlamenti nazzjonali kienu involuti matul il-proċedura kollha, mir-ratifika tad-Deċiżjoni dwar ir-riżorsi proprji sal-bidu tal-finanzjament għall-proġetti ta’ rkupru. F’xi Stati Membri, kien hemm dibattitu dwar jekk il-pjan ta’ rkupru kienx se jistabbilixxi preċedent għas-self tal-UE jew kienx soluzzjoni ta’ darba. F’każ wieħed, il-proċedura ta’ ratifika tat bidu għal proċedimenti quddiem il-Qorti Kostituzzjonali f’dak il-pajjiż. Il-Parlamenti nazzjonali kellhom ukoll rwol sinifikanti fil-proċess ta’ approvazzjoni għall-pjanijiet nazzjonali għall-irkupru u r-reżiljenza, f’konformità mal-istruttura kostituzzjonali ta’ kull Stat Membru, fl-għoti tal-mandat lill-ministri tal-Finanzi tagħhom għal-laqgħat tal-Kunsill li adottaw deċiżjonijiet ta’ implimentazzjoni li bihom setgħu jiġu żborżati l-fondi. Il-President tal-Kummissjoni von der Leyen enfasizzat ukoll fid-dikjarazzjoni tagħha fil-laqgħa plenarja tal-COSAC f’Diċembru 2020 li l-esperjenza u l-kontribut tal-Parlamenti nazzjonali jistgħu jkunu siewja ħafna fit-tfassil u fl-implimentazzjoni tal-pjanijiet.
6.ir-rwol tal-parlamenti reġjonali
Il-Parlamenti reġjonali jikkontribwixxu indirettament għar-relazzjonijiet tal-Kummissjoni mal-Parlamenti nazzjonali. Skont il-Protokoll Nru 2, meta titwettaq l-analiżi tas-sussidjarjetà għal abbozzi ta’ atti leġiżlattivi tal-UE bl-għan li jinħarġu opinjonijiet motivati, tkun ir-responsabbiltà ta’ kull wieħed mill-Parlamenti nazzjonali li jikkonsulta, fejn xieraq, mal-Parlamenti reġjonali b’setgħat leġiżlattivi.
Il-membri tal-Parlamenti reġjonali huma rrappreżentati wkoll fil-Kumitat tar-Reġjuni, li jwettaq ħidma ta’ monitoraġġ permezz tan-Network għall-Monitoraġġ tas-Sussidjarjetà u l-pjattaforma online tiegħu maħsuba sabiex tappoġġa l-parteċipazzjoni mill-Parlamenti reġjonali b’setgħat leġiżlattivi fil-mekkaniżmu ta’ twissija bikrija dwar is-sussidjarjetà (REGPEX). Permezz tan-network RegHub huma jipparteċipaw ukoll fil-pjattaforma tal-Kummissjoni “Fit for Future”, li tagħmel parti mill-ħidma tagħha għal regolamentazzjoni aħjar.
Filwaqt li ma hemm l-ebda dispożizzjoni espliċita fit-Trattati għal interazzjoni diretta bejn il-Kummissjoni u l-Parlamenti reġjonali, il-Kummissjoni tieħu f’kunsiderazzjoni l-kontribut tagħhom. Diversi Parlamenti reġjonali ppreżentaw numru dejjem akbar ta’ riżoluzzjonijiet direttament lill-Kummissjoni dwar diversi kwistjonijiet, bħall-politika ta’ koeżjoni u kwistjonijiet reġjonali, kwistjonijiet Ewropej (fosthom il-Konferenza dwar il-Futur tal-Ewropa), u kwistjonijiet globali bħall-aċċess għall-vaċċini, id-drittijiet tal-bniedem u d-drittijiet tal-minoranzi madwar id-dinja. Xi kontributi ffokaw fuq Komunikazzjonijiet u fuq pakketti jew proposti leġiżlattivi speċifiċi tal-Kummissjoni. Minbarra l-opinjonijiet, il-Parlamenti reġjonali pparteċipaw fil-konsultazzjonijiet pubbliċi tal-Kummissjoni, għalkemm s’issa dan il-mezz intuża b’mod attiv minn Parlament reġjonali wieħed biss li ppreżenta tweġibiet għal diversi konsultazzjonijiet pubbliċi mnedijin mill-Kummissjoni. Parlament reġjonali wieħed uża mezz ieħor, u ppreżenta żewġ opinjonijiet permezz ta’ Parlament nazzjonali. Minbarra l-iskambji bil-miktub, il-Membri tal-Kummissjoni kellhom ukoll laqgħat ma’ diversi Parlamenti reġjonali.
7.konklużjoni
Mis-sommarju tal-iżviluppi fl-2021 rigward l-iskrutinju tar-rispett għas-sussidjarjetà u għall-proporzjonalità fil-leġiżlazzjoni tal-UE u dwar ir-relazzjonijiet bejn il-Kummissjoni u l-Parlamenti nazzjonali jinħarġu t-tliet konklużjonijiet ewlenin li ġejjin:
L-ewwel nett, l-enfasi tal-attenzjoni tal-Parlamenti nazzjonali tirrifletti l-prijoritajiet politiċi ewlenin segwiti minn din il-Kummissjoni, b’mod partikolari l-pakkett “Lesti għall-mira ta’ 55 %”, il-Patt il-ġdid għall-Migrazzjoni u għall-Ażil, it-trasformazzjoni diġitali, l-Unjoni Ewropea tas-Saħħa u l-pandemija tal-COVID-19.
It-tieni, numru ta’ Parlamenti nazzjonali jagħtu attenzjoni sinifikanti lill-kontrolli tas-sussidjarjetà u tal-proporzjonalità fil-proposti tal-Kummissjoni, iżda t-tħassib konkret dwar ksur perċepit għadu rari:
-It-tħassib espress mill-Parlamenti nazzjonali huwa relatat fil-biċċa l-kbira tal-opinjonijiet motivati mhux ma’ ksur perċepit konkret tal-prinċipju tas-sussidjarjetà iżda pjuttost ma’ dak li huma jqisu bħala ġustifikazzjoni fattwali insuffiċjenti għall-abbozzi tal-atti leġiżlattivi li ma tippermettilhomx jivvalutaw il-konformità ta’ dawn mal-prinċipji tas-sussidjarjetà u tal-proporzjonalità.
-Il-perċentwal tal-opinjonijiet tal-Parlamenti nazzjonali relatati mal-kontroll tas-sussidjarjetà kien ogħla fl-2021 milli fis-snin ta’ qabel – b’mod allinjat maż-żieda fil-proposti leġiżlattivi.
-L-ebda proposta individwali ma wasslet għal aktar minn tliet opinjonijiet motivati, ferm taħt il-limitu għal “karta safra”, u anqas min-numru ta’ opinjonijiet motivati li għalihom il-Kummissjoni ħadet impenn li tagħti viżibbiltà akbar lit-tħassib tal-Parlamenti nazzjonali dwar is-sussidjarjetà permezz ta’ rispons aggregat.
It-tielet, ir-relazzjonijiet bejn il-Kummissjoni u l-Parlamenti nazzjonali huma dinamiċi u estensivi, iżda jintużaw sa livelli varji mill-Parlamenti nazzjonali.
-Il-ġudizzju tal-kontribut tal-Parlamenti nazzjonali għall-proċess politiku fil-livell tal-UE biss fuq il-bażi tan-numru kwantitattiv ta’ opinjonijiet taħt il-kontroll tas-sussidjarjetà u l-effetti immedjati tagħhom huwa qarrieqi. Huma jikkontribwixxu wkoll permezz ta’ diversi kanali għad-djalogu orali fil-laqgħat u fl-avvenimenti interparlamentari.
-Il-mezzi diġitali użati matul il-pandemija tal-COVID-19 ippermettew kuntatt aktar regolari u produttiv bejn il-Kummissjoni u l-Parlamenti nazzjonali fil-livell politiku u tekniku.
-In-numru ta’ Parlamenti nazzjonali li jipparteċipaw fl-analiżijiet tas-sussidjarjetà u fid-djalogu politiku bil-miktub mal-Kummissjoni kompla jiżdied, u kompla din ix-xejra mill-2019. Fl-istess ħin, fl-2021, kien hemm ukoll tmien Parlamenti jew kmamar nazzjonali (ta’ ħames Stati Membri) li, għal raġunijiet ta’ struttura kostituzzjonali nazzjonali, ta’ tradizzjonijiet politiċi jew għal għażla politika, ma bagħtu l-ebda opinjoni.
-Madwar terz tal-Parlamenti jew tal-kmamar nazzjonali ħarġu aktar minn 10 opinjonijiet fl-2021. Bħal fis-snin ta’ qabel, kważi 80 % tal-opinjonijiet kollha ntbagħtu mill-aktar 10 Parlamenti jew kmamar attivi. Fost dawn, xi wħud iffokaw l-opinjonijiet tagħhom fuq jekk il-prinċipji tas-sussidjarjetà u tal-proporzjonalità kinux ġew irrispettati u ma tawx kritika jew suġġerimenti konkreti dwar il-proposti tal-Kummissjoni.
-In-numru ta’ opinjonijiet relatati ma’ inizjattivi mhux leġiżlattivi mill-Kummissjoni jew li esprimew il-fehmiet jew il-prijoritajiet politiċi tal-Parlamenti nazzjonali fuq inizjattiva tagħhom stess jibqa’ fl-istess livell għoli bħal fis-snin ta’ qabel, li juri li numru ta’ Parlamenti jew ta’ kmamar jagħmlu użu attiv ħafna mid-djalogu politiku bil-miktub mal-Kummissjoni sabiex jgħarrfuha x’inhuma l-pożizzjonijiet tagħhom fi stadju bikri fil-proċess politiku. Il-Kummissjoni ffaċilitat il-kontribut tal-Parlamenti nazzjonali għall-konsultazzjonijiet pubbliċi għat-tħejjija ta’ proposti leġiżlattivi billi identifikat il-kontribut tagħhom b’mod aktar ċar.
L-iżgurar li l-azzjoni tal-UE tittieħed biss meta tkun neċessarja u sa fejn tkun neċessarja biss jibqa’ responsabbiltà u impenn kondiviżi, li fihom id-djalogu attiv bil-miktub u orali mal-Parlamenti nazzjonali huwa vitali.
