Skeda tas-Sommarju Eżekuttiv

Rapport tal-valutazzjoni tal-impatt li jakkumpanja l-proposta tad-dokument dwar il-Punt ta’ Access Uniku Ewropew

A. Il-ħtieġa li tittieħed azzjoni

Għaliex? X’inhi l-problema li qed tiġi indirizzata?

Sabiex jieħdu deċiżjonijiet sodi ta’ investiment, l-investituri fis-swieq kapitali jrid ikollhom aċċess għal u jkunu jistgħu jużaw b’mod diġitali l-informazzjoni li l-entitajiet huma obbligati jippubblikaw skont il-liġi tal-UE (relatata mal-finanzi u mas-sostenibbiltà, relatata mal-prodott, eċċ.). Illum il-ġurnata, l-aċċess għal din l-informazzjoni huwa mifrux madwar l-Istati Membri u ftit li xejn jista’ jintuża diġitalment. Ostakli oħra jinkludu l-ostaklu tal-lingwa, iżda wkoll termini restrittivi ta’ użu. Dan jagħmilha għalja għall-utenti tal-informazzjoni korporattiva u tal-prodott biex ifittxu, jużaw u janalizzaw l-informazzjoni rilevanti. Dan jikkontribwixxi għal servizzi finanzjarji tal-UE inqas effiċjenti u integrati u jxekkel it-tkabbir sostenibbli.

X’mistennija tikseb din l-inizjattiva?

L-istabbiliment ta’ Punt ta’ Aċċess Uniku Ewropew (ESAP) tħabbar fil-Pjan ta’ Azzjoni tal-Unjoni tas-Swieq Kapitali (CMU) tal-Kummissjoni f’Settembru 2020. Huwa għandu l-għan li jnaqqas l-ostakli għall-aċċess għall-informazzjoni b’mezzi diġitali. Dan se jżid il-flussi ta’ informazzjoni fi ħdan l-Unjoni, inkluż bejn il-fruntieri. Għandu wkoll l-għan li jrawwem l-użu u l-użu mill-ġdid diġitali tal-informazzjoni. Dawn il-kisbiet dwar il-flussi u l-użu tal-informazzjoni min-naħa tagħhom se jikkontribwixxu għall-integrazzjoni tas-servizzi finanzjarji u s-swieq kapitali u biex il-kapital jiġi allokat aħjar. Bħala spazju komuni għad-data, l-ESAP se jippermetti wkoll l-iżvilupp ta’ teknoloġiji u servizzi ġodda pereżempju bbażati fuq l-awtomatizzazzjoni jew l-intelliġenza artifiċjali.

X’inhu l-valur miżjud tal-azzjoni fil-livell tal-UE?

L-objettiv ta’ din l-inizjattiva (jiġifieri l-integrazzjoni tal-informazzjoni madwar l-Unjoni u l-użu diġitali tagħha) ma jistax jintlaħaq b’mod suffiċjenti mill-Istati Membri individwalment. Bħalissa, il-biċċa l-kbira mir-regoli li jappartjenu għall-kanali u l-formats tad-divulgazzjoni tal-informazzjoni tar-rapportar korporattiv huma stipulati mil-leġiżlazzjoni tal-Istati Membri. Meta wieħed iqis l-iskala u l-effetti tal-istabbiliment ta’ punt ta’ aċċess uniku Ewropew, l-indirizzar ta’ dawn il-kwistjonijiet jista’ jinkiseb b’mod aktar effiċjenti fil-livell tal-Unjoni.

B. Soluzzjonijiet

Liema għażliet ta' politika leġiżlattivi u mhux leġiżlattivi ġew ikkunsidrati? Hemm għażla ppreferuta jew le? Għaliex?

Ġew esplorati diversi għażliet leġiżlattivi u mhux leġiżlattivi, li wasslu għall-għażliet preferuti li ġejjin fuq ħames dimensjonijiet ewlenin:

-Ambitu: l-ambitu tal-informazzjoni aċċessibbli permezz tal-ESAP se jinkludi l-entitajiet, il-prodotti u l-informazzjoni rilevanti l-oħra kollha ppubblikati mill-entitajiet fl-ambitu tal-leġiżlazzjoni tal-UE dwar is-servizzi finanzjarji, b’approċċ gradwali mill-2024 sal-2026;

-Formati: l-ESAP se jaċċetta informazzjoni/dokumenti mħejjija f’format miftuħ u użat b’mod wiesa’ ta’ data li tista’ tiġi estratta, u jippermetti l-iżvilupp ulterjuri ta’ formati li jinqraw minn magna fit-tul, fuq bażi ta’ każ b’każ, flimkien ma’ sett minimu komuni ta’ metadata;

-Punti ta’ ġbir: il-ġbir ta’ informazzjoni ser jiġi organizzat fuq bażi deċentralizzata, billi jibni fuq korpi nazzjonali eżistenti bħall-Mekkaniżmi Maħtura b’mod Uffiċjali, jew korpi tal-UE bħall-Awtoritajiet Superviżorji Ewropej. Il-punti ta’ ġbir kollha se jippermettu lill-ESAP jaċċessa dik l-informazzjoni permezz ta’ interfaċċi għall-ipprogrammar tal-applikazzjonijiet;

-Data miftuħa: l-ESAP se jrawwem politika ta’ data miftuħa bbażata fuq termini ta’ użu miftuħa li jippermettu b’mod sħiħ l-użu mill-ġdid u l-aċċess liberu għall-informazzjoni u formati miftuħa użati b’mod wiesa’;

-Governanza: l-ESAP se jkun irregolat mill-Awtorità Ewropea tat-Titoli u s-Swieq (ESMA).

Min jappoġġa liema għażla? 

L-ESAP għandu appoġġ mifrux fost il-gruppi ewlenin kollha tal-partijiet ikkonċernati. Fir-rigward tat-tfassil u l-istabbiliment, il-biċċa l-kbira ta’ dawk li wieġbu għall-konsultazzjoni mmirata u l-parteċipanti għas-sessjonijiet ta’ ħidma elettroniċi kienu favur li jkun hemm kamp ta’ applikazzjoni wiesa’ ta’ informazzjoni finanzjarja u ta’ sostenibbiltà żvelata pubblikament aċċessibbli faċilment u li tista’ tinqara mill-magni b’mod ċentralizzat. L-utenti ta’ din l-informazzjoni jitolbu data ta’ kwalità tajba u data diġitizzata ulterjuri biex jippermettu l-użu elettroniku tagħha. Fir-rigward tal-governanza, maġġoranza appoġġat l-idea li jkun hemm korp pubbliku inkarigat mill-ESAP, filwaqt li ħafna appoġġaw ukoll aktar involviment tas-settur privat fil-governanza.

C. Impatti tal-għażla ppreferuta

X’inhuma l-benefiċċji tal-għażla ppreferuta (jekk hemm, inkella x'inhuma dawk ewlenin)? 

L-ESAP se jtejjeb iċ-ċirkolazzjoni tal-informazzjoni, kemm fi ħdan l-Istati Membri kif ukoll bejn il-fruntieri. Dan se jżid l-użu diġitali ta’ din l-informazzjoni. Dan se jġib viżibbiltà akbar, ugwali u indiskriminata ta’ kwalunkwe parteċipant fis-suq u filer volontarju lill-investituri, l-analisti, l-intermedjarji, ir-riċerkaturi jew il-fondi, indipendentement mid-daqs tagħhom stess jew mid-daqs tas-suq tagħhom. Dan se jiftaħ opportunitajiet ta’ finanzjament u jikkontribwixxi għal allokazzjoni aħjar u spiża aktar baxxa tal-kapital kif ukoll aktar reżiljenza tas-suq intern. L-ESAP se joffri aċċess faċli għal firxa usa’ ta’ informazzjoni b’mod f’waqtu u effiċjenti, u b’hekk jiftaħ opportunitajiet ġodda. L-utenti se jiffrankaw ukoll il-ħin u r-riżorsi għat-tiftix u l-ipproċessar tal-informazzjoni. L-ESAP se jgħin sabiex tiġi indirizzata ħtieġa dejjem akbar għal data relatata mas-sostenibbiltà mill-kumpaniji, u b’hekk jikkontribwixxi għall-objettivi ta’ finanzjament sostenibbli u tal-Patt Ekoloġiku. L-ESAP se jippermetti li jiġu offruti servizzi innovattivi fil-qasam finanzjarju abbażi tal-analitika, il-big data jew l-intelliġenza artifiċjali/it-tagħlim awtomatiku, kif ukoll aċċess u użu fuq apparat elettroniku.

X’inhuma l-kosti tal-għażla ppreferuta (jekk hemm, inkella x'inhuma dawk ewlenin)? 

L-ispejjeż totali għall-implimentazzjoni (infrastruttura) u l-operat tal-ESAP mill-AETS matul l-2022 sal-2027 se jammontaw sa EUR 16-il miljun. L-ispejjeż għall-interkonnessjoni tal-punti ta’ ġbir tal-UE/nazzjonali mal-ESAP huma stmati għal madwar EUR 50 800 għal kull korp ta’ ġbir u EUR 3.1 miljun kollettivament (ta’ darba), filwaqt li l-ispejjeż rikorrenti jkunu ta’ madwar EUR 6 500 għal kull korp ta’ ġbir u madwar EUR 0.4 miljun kollettivament. Għal dawk li jippreparaw id-data fil-kamp ta’ applikazzjoni tal-ESAP, l-ispejjeż ta’ darba (eż. ir-reġistrazzjoni ma’ korp ta’ ġbir) għandhom ikunu negliġibbli iżda l-ispejjeż rikorrenti annwali għall-preżentazzjoni, l-akkwist ta’ identifikatur ta’ entità legali, iċ-ċertifikat diġitali u l-għodda ta’ ffirmar huma stmati sa EUR 800 fil-livell individwali u madwar EUR 121 miljun fil-livell kollettiv tal-UE.

Kif se jintlaqtu n-negozji, l-SMEs u l-mikrointrapriżi?

Peress li l-ħtieġa għal viżibbiltà akbar hija aktar prominenti fost l-SMEs (jiġifieri minħabba nuqqas ta’ riċerka tal-SMEs), l-ESAP se jippermetti l-upload volontarju ta’ informazzjoni minn entitajiet mhux elenkati bħal SMEs, u b’hekk jiftaħ aktar opportunitajiet ta’ finanzjament minħabba żieda fil-viżibbiltà, u jikkontribwixxi biex tiżdied il-kapaċità tagħhom li jespandu lil hinn mill-fruntieri tagħhom stess.

Se jkun hemm impatti sinifikanti fuq il-baġits u l-amministrazzjonijiet nazzjonali? 

Il-finanzjament ipprovdut lill-ESMA (kemm għall-ispejjeż amministrattivi kif ukoll għal dawk operattivi) wara d-dħul fis-seħħ tal-leġiżlazzjoni, se jiġi kofinanzjat permezz tal-baġit tal-UE sa 40 % u mill-Awtoritajiet Nazzjonali Kompetenti għas-60 % li jifdal. Il-proposta ma tippreskrivix il-modi li bihom il-korpi nazzjonali tal-ġbir pubbliku jaġġustaw is-sorsi ta’ finanzjament tagħhom, fejn meħtieġ. Il-programm TSI tal-Kummissjoni (DG REFORM) jista’ jiffinanzja parzjalment l-appoġġ tekniku għall-implimentazzjoni tal-ESAP mill-Awtoritajiet Kompetenti Nazzjonali, fuq talba tagħhom.

Se jkun hemm impatti sinifikanti oħra? 

Le.

D. Segwitu

Meta se tiġi rieżaminata l-politika?

Huwa propost li l-politika tiġi riveduta ħames snin wara d-dħul fis-seħħ, u li jiġu implimentati għodod ta’ monitoraġġ.