IL-KUMMISSJONI EWROPEA

Brussell, 18.6.2021

COM(2021) 332 final

2021/0160(NLE)

Proposta għal

DEĊIŻJONI TA’ IMPLIMENTAZZJONI TAL-KUNSILL

dwar l-approvazzjoni tal-valutazzjoni tal-pjan għall-irkupru u r-reżiljenza għal-Lussemburgu

{SWD(2021) 159 final}

2021/0160 (NLE)

Proposta għal

DEĊIŻJONI TA’ IMPLIMENTAZZJONI TAL-KUNSILL

dwar l-approvazzjoni tal-valutazzjoni tal-pjan għall-irkupru u r-reżiljenza għal-Lussemburgu

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament (UE) 2021/241 tal-Parlament Ewropew u tal-Kunsill tat-12 ta’ Frar 2021 li jistabbilixxi l-Faċilità għall-Irkupru u r-Reżiljenza 1 , u b’mod partikulari l-Artikolu 20 tiegħu,

Wara li kkunsidra l-proposta tal-Kummissjoni Ewropea,

Billi:

(1)It-tifqigħa tal-COVID-19 kellha impatt ta’ tfixkil fuq l-ekonomija tal-Lussemburgu. Fl-2019, il-prodott domestiku gross (PDG) per capita tal-Lussemburgu kien 328 % tal-medja tal-UE. Skont it-tbassir tar-Rebbiegħa tal-Kummissjoni tal-2021, il-PDG reali tal-Lussemburgu naqas b’1,3 % fl-2020 u mistenni li jiżdied bi 3,1 %, b’mod kumulattiv, fl-2020 u l-2021. L-isfidi fit-tul b’impatt fuq il-prestazzjoni ekonomika fuq terminu medju huma relatati b’mod partikolari ma’ rati ta’ attività relattivament baxxi, b’mod partikolari għal ħaddiema akbar fl-età, u nuqqas ta’ ħaddiema tas-sengħa, aggravati mill-prezzijiet tal-proprjetà li qed jogħlew, li jipprevjeni lin-negozji milli jieħdu vantaġġ sħiħ mill-opportunitajiet offruti mit-tranżizzjonijiet ekoloġiċi u diġitali biex jiddiversifikaw l-ekonomija.

(2)Fid-9 ta’ Lulju 2019 u fl-20 ta’ Lulju 2020, il-Kunsill indirizza r-rakkomandazzjonijiet lil-Lussemburgu fil-kuntest tas-Semestru Ewropew. B’mod partikolari, il-Kunsill irrakkomanda li (i) jittieħdu l-miżuri kollha meħtieġa biex tiġi indirizzata b’mod effettiv il-pandemija, tiġi sostnuta l-ekonomija u jiġi appoġġat l-irkupru li jirriżulta, u meta l-kundizzjonijiet ekonomiċi jippermettu, jiġu segwiti politiki fiskali mmirati lejn il-kisba ta’ pożizzjonijiet fiskali prudenti fuq terminu medju u l-iżgurar tas-sostenibbiltà tad-dejn, filwaqt li jissaħħaħ l-investiment; tittejjeb ir-reżiljenza tas-sistema tas-saħħa billi tiżgura d-disponibbiltà xierqa tal-ħaddiema fil-qasam tas-saħħa, u tħaffef ir-riformi biex ittejjeb il-governanza tas-sistema tas-saħħa u tas-Saħħa elettronika; (ii) jittaffa l-impatt tal-kriżi fuq l-impjiegi, b’kunsiderazzjoni speċjali għal persuni f’pożizzjoni diffiċli fis-suq tax-xogħol. (iii) jiżguraw l-implimentazzjoni effettiva ta’ miżuri li jappoġġaw il-likwidità tan-negozji, b’mod partikolari l-intrapriżi żgħar u ta’ daqs medju u dawk li jaħdmu għal rashom, jantiċipaw proġetti ta’ investiment pubbliku maturi, jippromwovu l-investiment privat biex irawmu l-irkupru ekonomiku, jiffukaw l-investiment fuq it-tranżizzjoni ekoloġika u diġitali, b’mod partikolari fuq it-trasport u l-bini sostenibbli, il-produzzjoni u l-użu tal-enerġija nodfa u effiċjenti, jikkontribwixxu għal dekarbonizzazzjoni progressiva tal-ekonomija, u jrawmu l-innovazzjoni u d-diġitalizzazzjoni b’mod partikolari fis-settur tan-negozju; (iv) jiżguraw superviżjoni u infurzar effettivi tal-qafas kontra l-ħasil tal-flus fir-rigward tal-professjonisti li jipprovdu servizzi ta’ fiduċja u ta’ kumpanija, u servizzi ta’ investiment, kif ukoll iżidu l-azzjoni biex jiġu indirizzati l-karatteristiċi tas-sistema tat-taxxa li jiffaċilitaw l-ippjanar aggressiv tat-taxxa, b’mod partikolari permezz ta’ pagamenti ’l barra mill-pajjiż. Wara li vvalutat il-progress fl-implimentazzjoni ta’ dawn ir-rakkomandazzjonijiet speċifiċi għall-pajjiż fiż-żmien tal-preżentazzjoni tal-pjan għall-irkupru u r-reżiljenza, il-Kummissjoni ssib li r-rakkomandazzjoni li jittieħdu, f’konformità mal-klawżola liberatorja ġenerali, il-miżuri meħtieġa kollha biex tiġi indirizzata b’mod effettiv il-pandemija, tiġi sostnutal-ekonomija u jingħata appoġġ lill-irkupru li jirriżulta, twettqet totalment. Inkiseb progress sostanzjali fir-rigward tar-rakkomandazzjoni dwar l-appoġġ tal-likwidità tan-negozji u r-rakkomandazzjoni dwar il-forniment minn qabel ta’ proġetti ta’ investimenti pubbliċi maturi biex jitrawwem l-irkupru ekonomiku.

(3)[Ir-rakkomandazzjoni tal-Kunsill dwar il-politika ekonomika taż-Żona tal-Euro 2 rrakkomanda lill-Istati Membri taż-Żona tal-Euro biex jieħdu azzjoni, inkluż permezz tal-pjanijiet tagħhom għall-irkupru u r-reżiljenza, biex, fost l-oħrajn, jiżguraw pożizzjoni ta’ politika li tappoġġa l-irkupru u biex ikomplu jtejbu l-konverġenza, ir-reżiljenza u t-tkabbir sostenibbli u inklużiv. Ir-rakkomandazzjoni tal-Kunsill irrakkomandat ukoll it-tisħiħ tal-oqfsa istituzzjonali nazzjonali, l-iżgurar tal-istabbiltà makrofinanzjarja u l-ikkompletar tal-Unjoni Ekonomika Monetarja u t-tisħiħ tar-rwol internazzjonali tal-euro.] [Jekk ir-rakkomandazzjoni tal-Kunsill ma tiġix adottata saż-żmien tal-adozzjoni tas-CID, jekk jogħġbok neħħi l-premessa].

(4)Fit-30 ta’ April 2021, il-Lussemburgu ppreżenta l-pjan tiegħu għall-irkupru u r-reżiljenza lill-Kummissjoni, f’konformità mal-Artikolu 18(1) tar-Regolament (UE) 2021/241. Din il-preżentazzjoni segwiet proċess ta’ konsultazzjoni, imwettaq f’konformità mal-qafas legali nazzjonali, ta’ awtoritajiet lokali u reġjonali, sħab soċjali, organizzazzjonijiet tas-soċjetà ċivili, organizzazzjonijiet taż-żgħażagħ u partijiet ikkonċernati rilevanti oħra. Is-sjieda nazzjonali tal-pjanijiet għall-irkupru u r-reżiljenza qed tirfed l-implimentazzjoni b’suċċess tagħhom u l-impatt dejjiemi tagħhom fil-livell nazzjonali u l-kredibbiltà fil-livell Ewropew. Skont l-Artikolu 19 ta’ dan ir-Regolament, il-Kummissjoni vvalutat ir-rilevanza, l-effettività, l-effiċjenza u l-koerenza tal-pjan għall-irkupru u r-reżiljenza, f’konformità mal-linji gwida tal-valutazzjoni tal-Anness V ta’ dak ir-Regolament.

(5)Il-pjanijiet għall-irkupru u r-reżiljenza jenħtieġ li jsegwu l-objettivi ġenerali tal-Faċilità għall-Irkupru u r-Reżiljenza stabbiliti bir-Regolament (UE) 2021/241 u tal-Istrument ta’ Rkupru tal-UE stabbilit bir-Regolament tal-Kunsill (UE) 2020/2094 sabiex jiġi appoġġat l-irkupru wara l-kriżi tal-COVID-19. Huma għandhom jippromwovu l-koeżjoni ekonomika, soċjali u territorjali tal-Unjoni billi jikkontribwixxu għas-sitt pilastri msemmija fl-Artikolu 3 tar-Regolament (UE) 2021/241.

(6)L-implimentazzjoni tal-pjanijiet ta’ rkupru u reżiljenza tal-Istati Membri se tikkostitwixxi sforz ikkoordinat ta’ investiment u riformi madwar l-Unjoni. Permezz tal-implimentazzjoni kkoordinata u simultanja ta’ dawn ir-riformi u l-investimenti u l-implimentazzjoni ta’ proġetti transfruntiera, dawn ir-riformi u l-investimenti se jsaħħu lil xulxin b’mod reċiproku u jiġġeneraw effetti konsegwenzjali pożittivi madwar l-Unjoni kollha. Għalhekk, madwar terz tal-impatt tal-Faċilità fuq it-tkabbir u l-ħolqien tal-impjiegi tal-Istati Membri se jiġi minn effetti konsegwenzjali minn Stati Membri oħra.

Rispons bilanċjat li jikkontribwixxi għas-sitt pilastri

(7)F’konformità mal-Artikolu 19(3)(a) u t-Taqsima 2.1 tal-Anness V tar-Regolament (UE) 2021/241, il-pjan għall-irkupru u r-reżiljenza jirrappreżenta fil-parti l-kbira (Klassifikazzjoni A) rispons komprensiv u bbilanċjat b’mod adegwat għas-sitwazzjoni ekonomika u soċjali, u b’hekk jikkontribwixxi b’mod xieraq għas-sitt pilastri kollha kemm huma msemmija fl-Artikolu 3 tar-Regolament (UE) 2021/241, filwaqt li jqis l-isfidi speċifiċi u l-allokazzjoni finanzjarja tal-Istat Membru kkonċernat.

(8)Il-Lussemburgu jippreżenta firxa wiesgħa ta’ investimenti u riformi fil-pjan għall-irkupru u r-reżiljenza. Barra minn hekk, il-Lussemburgu qed jippjana li jikkomplementa l-appoġġ skont ir-Regolament (UE) 2021/241 permezz tal-użu ta’ fondi nazzjonali addizzjonali għall-implimentazzjoni tal-investimenti u r-riformi inklużi fil-pjan. Din l-istruttura li tinvolvi fondi nazzjonali addizzjonali tippermetti lil-Lussemburgu jinkludi miżuri li jikkontribwixxu b’mod raġonevoli għas-sitt pilastri kollha tal-Artikolu 3 ta’ dak ir-Regolament minkejja l-kontribuzzjoni finanzjarja massima limitata tiegħu.

(9)L-għażla tal-miżuri tal-Lussemburgu tpoġġi enfasi qawwija fuq it-tranżizzjoni ekoloġika u diġitali, b’kontribuzzjoni klimatika ta’ 60,9 % u kontribuzzjoni diġitali ta’ 31,6 %, ferm ogħla mill-allokazzjonijiet minimi korrispondenti ta’ 37 % u 20 % rispettivament. Il-komponenti ekoloġiċi tal-pjan għall-irkupru u r-reżiljenza huma wkoll ġeneralment konsistenti mal-Pjan Nazzjonali għall-Enerġija u l-Klima (National Energy and Climate Plan, NECP) tal-Lussemburgu, filwaqt li xi proġetti proposti fil-pjan huma wkoll parti minn strateġiji usa’, bħal waħda ddedikata għall-ekonomija bbażata fuq l-għarfien. Il-pjan għall-irkupru u r-reżiljenza għandu wkoll dimensjoni soċjali relattivament b’saħħitha (il-ħiliet, is-saħħa u l-akkomodazzjoni), biex b’hekk tittejjeb il-koeżjoni ekonomnika, soċjali u territorjali.

L-indirizzar tal-isfidi kollha jew ta’ subsett sinifikanti ta’ sfidi identifikati fir-Rakkomandazzjonijiet Speċifiċi għall-Pajjiżi

(10)F’konformità mal-Artikolu 19(3)(b) u t-Taqsima 2.2 tal-Anness V tar-Regolament (UE) 2021/241, il-pjan għall-irkupru u r-reżiljenza huwa mistenni li jikkontribwixxi biex jiġu indirizzati b’mod effettiv l-isfidi kollha, jew parti sinifikanti mill-isfidi (Klassifikazzjoni A), identifikati fir-rakkomandazzjonijiet speċifiċi relevanti għall-pajjiż, inklużi l-aspetti fiskali tagħhom, indirizzati lil-Lussemburgu jew l-isfidi identifikati f’dokumenti relevanti oħra uffiċjalment adottati mill-Kummissjoni fil-kuntest tas-Semestru Ewropew.

(11)Ir-rakkomandazzjonijiet relatati mar-rispons immedjat tal-politika fiskali għall-pandemija jistgħu jitqiesu li jaqgħu barra mill-kamp ta’ applikazzjoni tal-pjan ta’ rkupru u reżiljenza tal-Lussemburgu, minkejja l-fatt li l-Lussemburgu ġeneralment irreaġixxa b’mod adegwat u suffiċjenti għall-ħtieġa immedjata li l-ekonomija tiġi appoġġata permezz ta’ mezzi fiskali fl-2020 u l-2021, f’konformità mad-dispożizzjonijiet tal-Klawsola Liberatorja Ġenerali.

(12)Il-pjan jinkludi ġabra estensiva ta’ riformi u investimenti li jsaħħu lil xulxin li huma ta’ kontribut għall-indirizzar effettiv tal-isfidi ekonomiċi u soċjali kollha, jew parti sinifikanti tagħhom, imfissra fir-rakkomandazzjonijiet speċifiċi għall-pajjiż indirizzati lejn il-Lussemburgu mill-Kunsill fis-Semestru Ewropew fl-2019 u l-2020 dwar (i) il-politiki tas-suq tax-xogħol (l-indirizzar tan-nuqqas ta’ tlaqqigħ tal-ħiliet, it-titjib tal-impjegabbiltà ta’ ħaddiema akbar fl-età), (ii) ir-reżiljenza tas-sistema tal-kura tas-saħħa, (iii) iż-żieda fl-akkomodazzjoni disponibbli, (iv) it-tranżizzjoni ekoloġika ( l-investiment fil-ġenerazzjoni tal-enerġija rinnovabbli, it-trasport sostenibbli, l-ambjent naturali u l-bijodiversità), (v) it-tranżizzjoni diġitali (it-titjib tal-konnettività u tal-ħiliet diġitali tal-popolazzjoni, u t-trawwim tad-diġitalizzazzjoni tad-ditti u tal-amministrazzjoni pubblika), (vi) is-supervizjoni u l-infurzar effettivi tal-qafas kontra l-ħasil tal-flus;

(13)Kontribuzzjoni kbira għall-iżvilupp tal-ħiliet hija pprovduta minn investimenti fi programmi ta’ taħriġ vokazzjonali għal dawk li qed ifittxu impjieg u għall-ħaddiema mqiegħda fuq skema ta’ xogħol b’ħinijiet iqsar, rispettivament. Dawn il-programmi ta’ taħriġ vokazzjonali jenħtieġ li jikkontribwixxu wkoll biex itaffu l-impatt tal-kriżi fuq l-impjiegi. Il-pjan jinkludi wkoll riforma kumplimentari li għandha tfassal aktar programmi ta’ taħriġ vokazzjonali għall-profili tal-impjiegi l-aktar promettenti.

(14)Ir-reżiljenza u l-governanza tas-sistema tas-saħħa huma mistennija li jissaħħu permezz ta’ riformi u investimenti mmirati biex jindirizzaw uħud mill-problemi strutturali tas-settur tas-saħħa fil-Lussemburgu - in-nuqqas ta’ professjonisti tas-saħħa u l-ħtieġa li tiżdied l-effiċjenza tas-sistema tas-saħħa - b’mod partikolari permezz tad-diġitalizzazzjoni tagħha. Ir-riforma li għandha l-għan li tagħmel riformulazzjoni leġiżlattiva tal-kompetenzi ta’ għadd ta’ professjonisti tas-saħħa se żżid l-attrazzjoni tal-professjonijiet tas-saħħa u twieġeb għan-nuqqas ta’ prattikanti tal-kura f’kuntest ta’ domanda dejjem tikber għall-kura. L-investimenti jenħtieġ li jkunu wkoll ta’ għajnuna fl-iżvilupp tad-diġitalizzazzjoni tas-settur tas-saħħa bil-ħsieb tal-interoperabbiltà. Ir-reġistru diġitali uniku għall-professjonijiet tas-saħħa se jippermetti l-ġestjoni tad-data dwar il-professjonisti tas-saħħa fil-Lussemburgu, filwaqt li jippermetti proġettazzjonijiet demografiċi fuq terminu qasir sa medju u jidentifika aħjar il-ħtieġa għat-tobba skont il-qasam tal-għarfien espert, u ż-żoni ġeografiċi. Dan għandu jikkontribwixxi biex jiġu antiċipati n-nuqqasijiet ta’ professjonisti. L-iżvilupp tat-telekonsultazzjonijiet huwa wkoll mod kif tiġi limitata l-pressjoni fuq il-professjonisti tas-saħħa, filwaqt li titnaqqas il-ħtieġa għall-ivvjaġġar fiżiku fil-kuntest tal-pandemija tal-COVID-19.

(15)Il-pjan għall-irkupru u r-reżiljenza se jikkontribwixxi għat-titjib tas-sostenibbiltà tat-trasport. Dan jinkludi riforma biex jiġi promoss ix-xiri ta’ vetturi b’emissjonijiet żero jew baxxi mill-awtoritajiet u l-entitajiet tal-akkwist, u investiment biex ikompli jiġi skjerat network ta’ punti tal-iċċarġjar għall-vetturi elettriċi madwar il-pajjiż.

(16)Il-protezzjoni tal-ambjent u l-bijodiversità hija segwita permezz ta’ miżuri li jinkoraġġixxu lill-muniċipalitajiet jinvestu fit-titjib tal-ambjent naturali u l-istatus tal-bijodiversità taż-żoni urbani, miftuħa, akkwatiċi u tal-foresti tagħhom.

(17)Iż-żieda fil-provvista tal-akkomodazzjoni għandha tiġi appoġġata permezz ta’ investimenti u riformi, b’mod partikolari billi jiżdiedu l-inċentivi u jitneħħew l-ostakli għall-bini. Ir-riformulazzjoni leġiżlattiva tal-Patt dwar l-Akkomodazzjoni se tinċentiva lill-muniċipalitajiet biex joħolqu akkomodazzjoni affordabbli. Il-ġenerazzjoni tal-enerġija rinnovabbli bħala parti mill-proġett ta’ investiment “Neischmelz” għandha tappoġġa l-ħolqien ta’ distrett ġdid tad-djar, kif ukoll tikkontribwixxi għall-produzzjoni nadifa tal-enerġija.

(18)Il-pjan għall-irkupru u r-reżiljenza jinkludi investimenti fid-diġitalizzazzjoni u l-innovazzjoni u jservi t-tranżizzjoni diġitali. Il-programmi ta’ taħriġ FutureSkills u Ħiliet Diġitali jpoġġu l-enfasi fuq l-iżvilupp tal-ħiliet diġitali. L-investimenti f’reġistru diġitali tal-professjonisti tal-kura tas-saħħa, u t-telemediċina se jappoġġaw id-diġitalizzazzjoni tal-kura tas-saħħa. Il-miżuri għall-promozzjoni ta’ ekonomija bbażata fuq id-data se jsaħħu s-sigurtà tad-data personali permezz tal-implimentazzjoni ta’ soluzzjonijiet ta’ komunikazzjoni quantum ultra-sigura innovattivi ħafna. L-effettività u l-effiċjenza tal-amministrazzjonijiet pubbliċi u s-servizzi tagħhom se jiżdiedu permezz tad-diġitalizzazzjoni tagħhom.

(19)Il-pjan jinkludi wkoll għadd ta’ riformi li jappoġġaw l-indirizzar tar-rakkomandazzjoni speċifika għall-pajjiż li jitolbu lil-Lussemburgu jiżgura superviżjoni u infurzar effettivi tal-qafas kontra l-ħasil tal-flus fir-rigward tal-professjonisti li jipprovdu servizzi ta’ fiduċja u ta’ kumpanija, u servizzi ta’ investiment. Dawn ir-riformi huma mfassla biex isaħħu l-qafas kontra l-ħasil tal-flus u l-infurzar tiegħu, biex jużaw aħjar id-data rreġistrata dwar persuni ġuridiċi, biex jifhmu aħjar ir-riskji tal-ħasil tal-flus u l-finanzjament tat-terroriżmu bħala bażi għal miżuri ta’ mitigazzjoni mmirati, kif ukoll biex jiċċaraw is-sanzjonijiet applikabbli. Barra minn hekk, ir-reġim applikabbli għall-fornituri tas-servizzi fiduċjarji u tal-kumpaniji se jiġi rieżaminat u msaħħaħ permezz ta’ modifika tal-leġiżlazzjoni rilevanti.

(20)Il-pjan jinkludi miżura leġiżlattiva li tipprojbixxi d-deduċibbiltà ta’ royalties u pagamenti ta’ mgħax lil ġurisdizzjonijiet tat-taxxa li ma jikkooperawx, li daħlet fis-seħħ fl-1 ta’ Marzu 2021. Madankollu, din il-miżura tikkorrispondi mal-implimentazzjoni ta’ ftehim milħuq fil-livell tal-Kunsill tal-UE f’Diċembru 2019, li japplika għall-Istati Membri kollha, irrispettivament minn jekk ikunux ingħataw rakkomandazzjoni biex jindirizzaw l-ippjanar aggressiv tat-taxxa fil-kuntest tas-Semestru Ewropew.

Kontribut għall-potenzjal tat-tkabbir, il-ħolqien tal-impjiegi u r-reżiljenza ekonomika, soċjali u istituzzjonali

(21)F’konformità mal-Artikolu 19(3)(c) u t-Taqsima 2.3 tal-Anness V tar-Regolament (UE) 2021/241, il-pjan għall-irkupru u r-reżiljenza huwa mistenni li jkollu impatt qawwi (Klassifikazzjoni A) fuq it-tisħiħ tal-potenzjal tat-tkabbir, il-ħolqien tal-impjiegi, u r-reżiljenza ekonomika, soċjali u istituzzjonali tal-Lussemburgu li għalihom huwa kruċjali li jkun hemm suq intern jaħdem tajjeb, filwaqt li jikkontribwixxi għall-implimentazzjoni tal-Pilastru Ewropew tad-Drittijiet Soċjali, inkluż permezz tal-promozzjoni ta’ politiki għat-tfal u ż-żgħażagħ, u fuq it-taffija tal-impatt ekonomiku u soċjali tal-kriżi tal-COVID-19, u b’hekk isaħħaħ il-koeżjoni ekonomika, soċjali u territorjali u l-konverġenza fl-Unjoni.

(22)Is-simulazzjonijiet tas-servizzi tal-Kummissjoni juru li l-pjan għandu l-potenzjal li jżid il-PDG tal-Lussemburgu b’bejn 0,5 % u 0,8 % 3 sal-2026. Il-pjan għall-irkupru u r-reżiljenza jinkludi għadd sinifikanti ta’ riformi u investimenti li se jindirizzaw l-impatt tal-kriżi, isaħħu l-potenzjal tat-tkabbir tal-Lussemburgu kif ukoll ir-reżiljenza ekonomika, soċjali u istituzzjonali tiegħu. L-investimenti u r-riformi tal-pjan huma mistennija jippromwovu rkupru konsistenti mat-tranżizzjonijiet ekoloġiċi u diġitali. Huma mistennija wkoll li jikkontribwixxu biex jissolva n-nuqqas persistenti ta’ ħaddiema tas-sengħa, fattur li jillimita t-tkabbir u l-investiment, b’mod partikolari fit-Teknoloġiji tal-Informazzjoni u tal-Komunikazzjoni u s-saħħa. B’mod partikolari, il-pjan jinkludi diversi miżuri biex jipprovdu lil dawk li qed ifittxu impjieg programmi online kontinwi mfassla biex jiżviluppaw ħiliet diġitali u oħrajn orjentati lejn il-futur, żviluppati mill-Aġenzija għall-Iżvilupp tal-Impjiegi (ADEM) riformata biex jiżdiedu l-opportunitajiet ta’ impjieg. Miżuri oħra tal-istrateġija usa’ ta’ governanza diġitali se jikkontribwixxu biex titrawwem l-integrazzjoni diġitali fis-settur privat, b’mod partikolari billi l-esperjenza tal-utenti titqiegħed fiċ-ċentru. Il-miżuri inklużi fil-pjan jappoġġaw ukoll aċċessibbiltà mtejba għad-djar, sistemi ta’ trasport aktar nodfa u aktar effiċjenti u aċċessibbiltà u kwalità mtejba tas-sistema tas-saħħa.

(23)Il-pjan għall-irkupru u r-reżiljenza jipprevedi investimenti sinifikanti biex jiġu indirizzati l-isfidi soċjali u titjieb il-koeżjoni soċjali, u l-integrazzjoni ta’ gruppi vulnerabbli. B’mod partikolari, miżura fil-pjan tinkludi mira għall-parteċipazzjoni ta’ ħaddiema akbar fl-età biex titħajjar il-parteċipazzjoni tagħhom u biex tiġi ffaċilitata l-integrazzjoni fis-suq tax-xogħol tal-persuni li x’aktarx ma jkollhomx ħiliet diġitali aġġornati. Il-pjan għandu l-għan li jilħaq waħda mill-miri ewlenin tal-Pjan ta’ Azzjoni tal-Pilastru Ewropew tad-Drittijiet Soċjali għall-UE sal-2030, jiġifieri li mill-inqas 60 % tal-adulti kollha għandhom ikunu qed jipparteċipaw fit-taħriġ kull sena sal-2030. Barra minn hekk, l-investimenti fil-pjan biex tissaħħaħ is-sistema tas-saħħa huma mistennija li jkunu ta’ benefiċċju għall-persuni l-aktar vulnerabbli. Dan huwa mistenni wkoll li jikkontribwixxi għall-implimentazzjoni tal-Pilastru Ewropew tad-Drittijiet Soċjali u l-koeżjoni soċjali permezz tat-titjib tal-aċċessibbiltà għall-kura tas-saħħa f’żoni li mhumiex moqdijin tajjeb.

La tagħmilx ħsara sinifikanti

(24)F’konformità mal-Artikolu 19(3)(d) u t-Taqsima 2.4 tal-Anness V tar-Regolament (UE) 2021/241, il-pjan għall-irkupru u r-reżiljenza huwa mistenni jiżgura li l-ebda miżura (Klassifikazzjoni A) għall-implimentazzjoni ta’ riformi u proġetti ta' investiment inkluża fil-pjan għall-irkupru u r-reżiljenza ma tagħmel ħsara sinifikanti lill-objettivi ambjentali fis-sens tal-Artikolu 17 tar-Regolament (UE) 2020/852 tal-Parlament Ewropew u tal-Kunsill 4 (il-prinċipju “la tagħmilx ħsara sinifikanti”).

(25)Il-pjan tal-Lussemburgu għall-irkupru u r-reżiljenza jinkludi valutazzjoni sistematika ta’ kull miżura kontra l-prinċipju ta’ “la tagħmilx ħsara sinifikanti”. L-informazzjoni pprovduta tippermetti li jiġi vvalutat li l-miżuri se jikkonformaw mal-prinċipju, pereżempju, billi jipprovdu ġustifikazzjonijiet dwar il-modalitajiet ta’ applikazzjoni tal-qafas leġiżlattiv eżistenti tal-UE u tal-Lussemburgu biex tiġi evitata kwalunkwe ħsara sinifikanti.

Kontribut għat-tranżizzjoni ekoloġika inkluża l-bijodiversità

(26)F’konformità mal-Artikolu 19(3)(e) u t-Taqsima 2.5 tal-Anness V tar-Regolament (UE) 2021/241, il-pjan għall-irkupru u r-reżiljenza jinkludi miżuri li fil-parti l-kbira (Klassifikazzjoni A) jikkontribwixxu għat-tranżizzjoni ekoloġika, inkluża l-bijodiversità, jew biex jiġu indirizzati l-isfidi li jirriżultaw minnha. Il-miżuri li jappoġġaw l-objettivi klimatiċi jammontaw għal ammont li jirrappreżenta 60,9 % tal-allokazzjoni totali tal-pjan, ikkalkulat skont il-metodoloġija tal-Anness VI tar-Regolament (UE) 2021/241. Skont l-Artikolu 17 tar-Regolament (UE) 2021/241, il-pjan għall-irkupru u r-reżiljenza huwa konsistenti mal-informazzjoni inkluża fil-Pjan Nazzjonali għall-Enerġija u l-Klima 2021-2030.

(27)Il-pjan tal-Lussemburgu għall-irkupru u r-reżiljenza jpoġġi enfasi qawwija fuq it-tranżizzjoni ekoloġika. Parti sinifikanti mill-investimenti se tkun iddedikata għal proġetti f’dak il-qasam. Il-pjan jinkludi miżura li tikkonsisti fl-użu ta’ kapaċità ta’ ġenerazzjoni tal-enerġija rinnovabbli f’sit speċifiku, b’mod innovattiv. Il-Lussemburgu se jistabbilixxi skema ta’ appoġġ għall-punti tal-iċċarġjar għall-vetturi elettriċi. Se tappoġġa wkoll azzjonijiet ta’ protezzjoni u restawr tal-bijodiversità permezz ta’ konvenzjonijiet bejn il-gvern u l-muniċipalitajiet. Sfidi oħra, bħar-rinnovazzjoni tal-enerġija tal-bini, ma għandhomx post prominenti fl-ebda miżura ta’ investiment u huma spjegati l-aktar fil-kuntest tal-kontribuzzjoni finanzjarja massima baxxa. Dan huwa wkoll il-każ għall-iżvilupp tal-infrastruttura tat-trasport pubbliku, li, madankollu, il-Lussemburgu qed iwettaq indipendentement mill-appoġġ ipprovdut skont ir-Regolament (UE) 2021/241.

(28)B’mod ġenerali, il-miżuri deskritti fil-pjan huma mistennija li jkollhom impatt dejjiemi fuq it-tranżizzjoni ekoloġika. Huma mistennija jagħtu kontribut sinifikanti għall-avvanz tal-objettivi nazzjonali dwar il-klima u l-enerġija kif stabbilit fil-Pjan Nazzjonali għall-Enerġija u l-Klima tal-Lussemburgu, li jirrikjedi miżuri addizzjonali. Huma mistennija wkoll li jikkontribwixxu għall-miri tal-enerġija u tal-klima tal-Unjoni għall-2030 u għall-objettiv tan-newtralità klimatika tal-UE sal-2050.

Kontribut għat-tranżizzjoni diġitali

(29)F’konformità mal-Artikolu 19(3)(f) u t-taqsima 2.6 tal-Anness V tar-Regolament (UE) 2021/241, il-pjan għall-irkupru u r-reżiljenza fih miżuri li fil-parti l-kbira (Klassifikazzjoni A) jikkontribwixxu għat-tranżizzjoni diġitali jew għall-indirizzar tal-isfidi li jirriżultaw minnha. Il-miżuri li jappoġġaw l-objettivi diġitali jammontaw għal ammont li jirrappreżenta 31,6 % tal-allokazzjoni totali tal-pjan, ikkalkulat skont il-metodoloġija tal-Anness VII tar-Regolament (UE) 2021/241.

(30)Sett ta’ miżuri inklużi fil-pjan ta’ rkupru u reżiljenza tal-Lussemburgu jikkontribwixxi għat-tranżizzjoni diġitali. Għadd ta’ investimenti għandhom l-għan li jiddiġitalizzaw l-amministrazzjoni pubblika u s-servizzi pprovduti kif ukoll is-sistema tas-saħħa, bil-ħsieb li jiżdiedu l-effettività u l-effiċjenza tagħhom. Il-pjan jinkludi wkoll investimenti għall-iżvilupp ta’ ħiliet diġitali bażiċi u avvanzati. Dan għandu għax jippromwovi d-diġitalizzazzjoni u l-innovazzjoni u jikkontribwixxi biex tintlaħaq id-domanda fis-suq tax-xogħol.

(31)Il-pjan tal-Lussemburgu għall-irkupru u r-reżiljenza jinkludi wkoll miżuri biex jiġu indirizzati l-isfidi li jirriżultaw mit-trasformazzjoni diġitali. Wieħed mill-investimenti inkluż huwa l-iżvilupp ta’ infrastruttura ta’ komunikazzjoni ultra sigura bbażata fuq it-teknoloġija quantum, li se tikkontribwixxi għas-sigurtà tad-data personali, waħda mill-isfidi kbar li joħorġu mit-tranżizzjoni. Il-pjan għandu l-għan ukoll li jiddiġitalizza l-Aġenzija għall-Iżvilupp tal-Impjiegi (ADEM) biex ittejjeb l-effiċjenza tal-awtoritajiet pubbliċi fl-iżgurar tas-sodisfazzjon tal-ħtiġijiet tas-suq tax-xogħol.

Impatt dejjiemi

(32)F’konformità mal-Artikolu 19(3)(g) u t-Taqsima 2.7 tal-Anness V tar-Regolament (UE) 2021/241, il-pjan għall-irkupru u r-reżiljenza huwa mistenni li jkollu fil-biċċa l-kbira impatt dejjiem fuq il-Lussemburgu (Klassifikazzjoni A).

(33)L-implimentazzjoni tal-investimenti u r-riformi previsti mil-Lussemburgu fil-pjan tiegħu tfasslet bħala lieva addizzjonali biex tappoġġa lil-Lussemburgu fil-kisba tal-objettivi fit-tul tiegħu. Il-miżuri ppreżentati fil-pjan jiffukaw fuq attivitajiet ekonomiċi innovattivi u sostenibbli b’potenzjal ta’ sfruttament sinifikanti. Permezz ta’ ħafna proġetti innovattivi, il-Lussemburgu qed jiddiversifika l-attività ekonomika tiegħu, joħloq opportunitajiet ġodda ta’ investiment, u jibda triq ta’ tkabbir aktar reżiljenti. Barra minn hekk, il-pjan ta’ rkupru u reżiljenza għandu l-għan li jipprovdi rispons adegwat għall-kriżi tas-saħħa attwali, li x’aktarx taggrava l-inugwaljanzi eżistenti. L-impatt dejjiemi tal-pjan jista’ jissaħħaħ ukoll permezz ta’ sinerġiji bejn il-pjan u programmi oħra, inklużi dawk iffinanzjati mill-Fondi tal-Politika ta’ Koeżjoni.

(34)It-tliet pilastri kollha tal-pjan għall-irkupru u r-reżiljenza jimmiraw lejn bidliet strutturali fil-politiki. L-inizjattivi li jippromwovu l-ħiliet diġitali għandhom l-għan li jsaħħu u jiddiversifikaw il-ħiliet professjonali ta’ dawk li qed ifittxu impjieg u tal-impjegati fuq skemi ta’ xogħol b’ħinijiet iqsar, b’enfasi partikolari fuq l-iżvilupp tal-ħiliet diġitali. F’perspettiva aktar fit-tul, ir-riformi inklużi fil-pjan biex jitrawwem it-tagħlim tul il-ħajja u titjieb l-adegwatezza tat-taħriġ għall-ħtiġijiet tas-suq tax-xogħol għandhom jagħmlu s-suq tax-xogħol aktar reżiljenti. Il-miżuri inklużi fil-pjan għandhom jikkontribwixxu għat-titjib tar-reżiljenza u l-prestazzjoni tas-settur tas-saħħa billi jindirizzaw in-nuqqas ta’ professjonisti u ħiliet tas-saħħa, jippromwovu governanza aħjar u d-diġitalizzazzjoni tas-settur tas-saħħa, inkluża t-telemediċina. Il-miżuri biex titħaffef id-dekarbonizzazzjoni tat-trasport huma mistennija li jikkontribwixxu b’mod pożittiv għat-tranżizzjoni ekoloġika billi jippromwovu l-użu ta’ sorsi ta’ enerġija rinnovabbli u billi joħolqu impjiegi “ekoloġiċi” ġodda. Barra minn hekk, sabiex tiġi promossa ekonomija aktar trasparenti u ġusta, ir-riformi inklużi fil-pjan għandhom l-għan li jsaħħu l-qafas superviżorju legali għall-ġlieda kontra l-ħasil tal-flus u l-finanzjament tat-terroriżmu. Għalhekk, jista’ jiġi konkluż li r-riformi u l-investimenti huma mistennija li jġibu bidla strutturali dejjiema fil-politiki rilevanti.

Monitoraġġ u implimentazzjoni

(35)F’konformità mal-Artikolu 19(3)(h) u t-Taqsima 2.8 tal-Anness V tar-Regolament (UE) 2021/241, l-arranġamenti proposti fil-pjan għall-irkupru u r-reżiljenza huma adegwati (Klassifikazzjoni A) biex jiżguraw monitoraġġ u implimentazzjoni effettivi tal-pjan għall-irkupru u r-reżiljenza, inkluż l-iskeda ta’ żmien prevista, l-istadji importanti u l-miri, u l-indikaturi relatati.

(36)Il-Lussemburgu ppreżenta sistema robusta ta’ awditjar u kontrolli bi struttura istituzzjonali ċara, allokazzjoni tal-kompiti u mekkaniżmi ta’ rappurtar li għandhom jiżguraw monitoraġġ bir-reqqa tal-implimentazzjoni tal-istadji importanti u l-miri. Id-Direttorat għall-Affarijiet Ekonomiċi u Baġitarji fil-Ministeru tal-Finanzi għandu r-responsabbiltà ġenerali għall-pjan u jaġixxi bħala punt uniku ta’ kuntatt għall-Kummissjoni. Dan is-servizz, li għandu jaġixxi bħala dipartiment ta’ ġestjoni, huwa responsabbli wkoll għat-tfassil tat-talba għal pagament u d-dikjarazzjonijiet ta’ ġestjoni u għandu jikkoordina u jimmonitorja l-implimentazzjoni tal-pjan għall-irkupru u r-reżiljenza. Id-dipartiment maniġerjali huwa responsabbli mill-aggregazzjoni tal-informazzjoni kollha relatata mal-indikaturi li għalihom iwettaq ukoll kontrolli tal-konsistenza u, b’mod aktar ġenerali, il-kontroll tal-kwalità. Il-Lussemburgu indika li qed tiġi żviluppata sistema tal-IT għall-ġestjoni u r-rappurtar tal-istadji importanti u tal-miri sabiex jintlaħqu r-rekwiżiti speċifiċi ta’ ġestjoni u rappurtar deskritti fil-pjan. Skont l-Artikolu 20(5)(e) tar-Regolament (UE) 2021/241, il-Lussemburgu għandu jimplimenta din il-miżura sabiex jikkonforma mal-Artikolu 22 ta’ dan ir-Regolament, billi jikkonferma l-istatus tal-implimentazzjoni tagħha mal-ewwel talba għall-ħlas. Għandu jsir awditjar dedikat fuq is-sistema. Ir-rapport jenħtieġ li janalizza kwalunkwe dgħufija relatata misjuba u azzjonijiet korrettivi meħuda jew ippjanati. Dan għandu jiżgura b’mod partikolari li l-Lussemburgu jkollu sistema li tissodisfa r-rekwiżiti rilevanti. Għaldaqstant, ġie introdott stadju importanti sabiex jiġi żgurat li s-sistema tiġi implimentata qabel ma ssir l-ewwel talba għall-pagament.

(37)L-Ispettorat Ġenerali tal-Finanzi (Inspection Générale des Finances — “IGF”), li huwa wkoll l-awtorità tal-awditjar għall-fondi ta’ ġestjoni kondiviża, għandu jaġixxi bħala l-awtorità tal-awditjar għall-implimentazzjoni tal-pjan. Fuq il-bażi tad-deċiżjoni tal-Lussemburgu li jippreżenta talba waħda għall-pagament kull sena, l-awtorità tal-awditjar għandha twettaq verifika annwali tal-operat u tas-sistema kull sena, li tirriżulta f’rapport annwali tal-awditjar. F’dan ir-rapport, se tivvaluta jekk is-sistema ta’ ġestjoni u kontroll hijiex qed taħdem b’mod effettiv, sabiex tipprovdi assigurazzjoni raġonevoli li l-istadji importanti u l-miri ddikjarati fit-talbiet għal pagament ippreżentati lill-Kummissjoni huma korretti. L-awtorità tal-awditjar hija indipendenti mid-dipartiment maniġerjali, li jiżgura segregazzjoni xierqa tar-responsabbiltajiet.

(38)L-istadji importanti u l-miri huma rilevanti wkoll għall-miżuri li diġà tlestew u li huma eliġibbli skont l-Artikolu 17(2) tar-Regolament. It-twettiq sodisfaċenti ta’ dawn l-istadji importanti u l-miri maż-żmien huwa meħtieġ biex tiġi ġġustifikata talba ta’ żborż.

(39)L-Istati Membri għandhom jiżguraw li l-appoġġ finanzjarju taħt il-Faċilità jiġi kkomunikat u rikonoxxut f’konformità mal-Artikolu 34 tar-Regolament (UE) 2021/241. L-appoġġ tekniku jista’ jintalab taħt l-Istrument ta’ Appoġġ Tekniku biex jassisti lill-Istati Membri fl-implimentazzjoni tal-pjan tagħhom.

Estimi tal-prezzijiet

(40)F’konformità mal-Artikolu 19(3)(i) u t-taqsima 2.9 tal-Anness V tar-Regolament (UE) 2021/241, il-ġustifikazzjoni mogħtija fil-pjan dwar l-ammont tal-ispejjeż totali stmati tal-pjan għall-irkupru u r-reżiljenza hija moderatament raġonevoli u plawżibbli, hija konformi mal-prinċipju tal-kosteffiċjenza u hija proporzjonata għall-impatt ekonomiku u soċjali nazzjonali mistenni.

(41)Għal kull riforma u investiment fil-pjan għall-irkupru u r-reżiljenza, il-Lussemburgu pprovda spjegazzjoni u ppreżenta dokumentazzjoni biex jissostanzja l-istimi tal-ispejjeż. L-informazzjoni dwar l-ispejjeż li waslet ġeneralment titqies kompluta u li tinftiehem, anki jekk għal xi miżuri, setgħet ingħatat aktar evidenza u spjegazzjoni aħjar tas-suppożizzjonijiet sottostanti sabiex tinkiseb Klassifikazzjoni A. L-Ispettorat Ġenerali tal-Finanzi (IGF) ivverifika l-miżuri kollha koperti fil-pjan għall-irkupru u r-reżiljenza biex jiżgura li l-ispejjeż stmati jkunu raġonevoli u plawżibbli. Madankollu, ma ġiet ippreżentata l-ebda evidenza dokumentarja ta’ din il-verifika. Fuq il-bażi tal-informazzjoni li waslet, l-ispejjeż stmati huma “raġonevoli” sa ċertu punt medju għal maġġoranza kbira tar-riformi u l-investimenti. Il-Lussemburgu b’mod ġenerali pprovda informazzjoni limitata dwar l-ispejjeż storiċi u komparattivi biex jivvaluta l-plawżibbiltà tal-istimi tal-ispejjeż. Għall-miżuri li bdew mill-1 ta’ Frar 2020 ’il quddiem, ġew ipprovduti fatturi, dokumenti tal-offerti u pjanijiet ta’ proġetti tal-investimenti ppjanati. Għalhekk, l-ispejjeż stmati huma “raġonevoli” sa ċertu punt medju għal maġġoranza kbira tar-riformi u l-investimenti. Fl-aħħar nett, l-ammont tal-kostijiet totali stmati tal-pjan għall-irkupru u r-reżiljenza huwa konformi mal-prinċipju tal-kosteffiċjenza u huwa proporzjonata għall-impatt ekonomiku u soċjali nazzjonali mistenni.

(42)Il-Lussemburgu pprovda biżżejjed informazzjoni u evidenza li l-ammont tal-ispejjeż totali stmati tal-pjan għall-irkupru u r-reżiljenza li għandu jiġi ffinanzjat skont ir-Regolament (UE) 2021/241 mhuwiex kopert minn finanzjament eżistenti jew ippjanat tal-Unjoni;

Ħarsien tal-interessi finanzjarji

(43)Skont l-Artikolu 19(3)(j) u t-Taqsima 2.10 tal-Anness V tar-Regolament (UE) 2021/241, l-arranġamenti proposti fil-pjan għall-irkupru u r-reżiljenza u l-miżuri addizzjonali li jinsabu f’din id-Deċiżjoni huma adegwati (Klassifikazzjoni A) biex jipprevjenu, jidentifikaw u jikkoreġu l-korruzzjoni, il-frodi u l-kunflitti ta’ interess meta jintużaw il-fondi previsti skont dak ir-Regolament, u l-arranġamenti huma mistennija li jevitaw b’mod effettiv il-finanzjament doppju minn dak ir-Regolament u minn programmi oħra tal-Unjoni. Dan huwa bla ħsara għall-applikazzjoni ta’ strumenti u għodod oħra li jippromwovu u jinfurzaw il-konformità mad-dritt tal-UE, inkluż għall-prevenzjoni, l-identifikazzjoni u l-korrezzjoni tal-korruzzjoni, il-frodi u l-kunflitti ta’ interess, u għall-protezzjoni tal-finanzi tal-Unjoni f’konformità mar-Regolament (UE, Euratom) 2020/2092 tal-Parlament Ewropew u tal-Kunsill.

(44)Fir-rigward tal-prevenzjoni, id-detezzjoni u l-korrezzjoni ta’ irregolaritajiet serji, il-Pjan jiddeskrivi l-istruttura organizzattiva nazzjonali li tkopri l-kompiti li għandhom jitwettqu fuq il-bażi ta’ mmappjar tar-riskji, responsabbiltajiet u kif dawn għandhom jipprevjenu, jidentifikaw u jikkoreġu l-frodi, il-korruzzjoni u l-kunflitti ta’ interess kull fejn iseħħu. L-użu tal-għodda unika għall-estrazzjoni tad-data u għall-punteġġ tar-riskju li għandha tiġi pprovduta mill-Kummissjoni huwa kkonfermat ukoll. Jenħtieġ li r-riżultati tal-kontrolli jinġabru fil-qosor f’rapport imħejji matul il-kontroll tan-nefqa. Madankollu, mhux il-proċeduri kollha għall-protezzjoni tal-interessi finanzjarji tal-Unjoni deskritti fil-pjan diġà huma fis-seħħ u dawn mistennija li jkunu kompluti sar-raba’ kwart tal-2021. Skont l-Artikolu 20(5)(e) tar-Regolament (UE) 2021/241, il-Lussemburgu għandu jimplimenta dawn il-proċeduri sabiex jikkonforma mal-Artikolu 22 ta’ dan ir-Regolament, billi jikkonferma l-istatus tal-implimentazzjoni tagħha mal-ewwel talba għall-ħlas. Dan għandu jiżgura b’mod partikolari li l-Lussemburgu jkollu sistema li tissodisfa r-rekwiżiti rilevanti. Għaldaqstant, ġie introdott stadju importanti sabiex tiġi żgurata l-protezzjoni tal-interessi finanzjarji tal-Unjoni qabel ma ssir l-ewwel talba għall-pagament.

(45)Jiġu implimentati miżuri speċifiċi biex tiġi vverifikata l-konformità mar-regoli relatati mal-akkwist pubbliku, biex tiġi evitata l-korruzzjoni u biex jitħarsu l-interessi finanzjarji. L-approċċ tal-awditjar tal-Ispettorat Ġenerali tal-Finanzi għandu jkun ibbażat fuq awditu annwali tas-sistema (li jkopri s-sistema stabbilita għar-rappurtar tal-istadji importanti u l-miri u li jkopri wkoll is-sistema ta’ kontroll intern għall-prevenzjoni, l-identifikazzjoni u l-korrezzjoni tal-frodi, il-kunflitt ta’ interess, il-korruzzjoni u l-finanzjament doppju) u awditi annwali tal-operazzjonijiet (fuq il-bażi ta’ kampjun adegwat).

Koerenza tal-pjan

(46)F’konformità mal-Artikolu 19(3)(k) u t-Taqsima 2.11 tal-Anness V tar-Regolament (UE) 2021/241, il-pjan jinkludi fil-parti l-kbira (Klassifikazzjoni A) miżuri għall-implimentazzjoni ta’ riformi u proġetti ta’ investiment pubbliku li jirrappreżentaw azzjonijiet koerenti.

(47)Il-pjan tal-Lussemburgu għall-irkupru u r-reżiljenza jikkonsisti fi tmien komponenti b’taħlita bbilanċjata ta’ investimenti u riformi. Kull komponent huwa mibni bħala kombinazzjoni koerenti ta’ miżuri u għandu wkoll sinerġiji mal-bqija tal-pjan. B’dan il-mod, l-investimenti u r-riformi inklużi fil-pjan, jew fl-istess komponent jew f’komponenti differenti, isaħħu jew jikkumplimentaw lil xulxin, u l-ebda miżura ma tikkontradixxi jew timmina l-effettività ta’ oħra.

Ugwaljanza

(48)L-opportunitajiet indaqs fil-forma ta’ aċċess ugwali għal kulħadd għall-proċeduri u t-taħriġ tal-amministrazzjoni pubblika, kif ukoll l-inklużjoni diġitali ġew ikkunsidrati prinċipalment fit-tfassil tal-Komponenti 1A (“Taħriġ, taħriġ mill-ġdid u titjib tal-ħiliet”) u 3B (“Modernizzazzjoni tal-amministrazzjoni pubblika”). Persuni b’ħiliet diġitali aktar baxxi, persuni anzjani, u dawk li ma għandhomx smartphone ingħataw kunsiderazzjoni speċjali fit-tfassil tal-miżuri li jiffurmaw dawk il-komponenti. Barra minn hekk, l-investiment fit-telemediċina bħala parti mill-Komponent 1B (“Inżidu r-reżiljenza tas-sistema tas-saħħa”) jiżgura d-disponibbiltà tas-servizz permezz tat-telefon u l-email biex jipprovdi għall-inklużjoni diġitali ta’ persuni b’ħiliet diġitali aktar baxxi u persuni anzjani. Fl-aħħar nett, ir-riforma tal-Patt tal-Akkomodazzjoni 2.0 fil-Komponent 1C (“Inżidu l-provvista ta’ akkomodazzjoni pubblika affordabbli u sostenibbli”) għandha l-għan li twessa’ l-aċċess għall-akkomodazzjoni għal familji bi dħul baxx li jesperjenzaw diffikultajiet biex jakkwistaw jew jikru dar fis-suq privat.

Awtoevalwazzjoni ta’ sigurtà

(49)Ma ġietx ipprovduta awtoevalwazzjoni tas-sigurtà peress li ma tqisitx xierqa mil-Lussemburgu, skont l-Artikolu 18(4) punt (g) tar-Regolament (UE) 2021/241.

Proġetti transfruntiera u li jinvolvu aktar minn pajjiż wieħed

(50)Il-pjan għall-irkupru u r-reżiljenza jalloka ammont sostanzjali għal investiment fl-infrastruttura tal-komunikazzjoni tal-kwantum, li jaqa’ taħt l-Inizjattiva Ewropea għall-Infrastruttura tal-Komunikazzjoni Quantum (EuroQCI). Dan il-finanzjament u l-investiment immirati huma mmirati lejn qasam strateġiku, kif identifikat fl-istrateġija industrijali Ewropea aġġornata u se jikkontribwixxu għall-bini tal-kapaċità u l-istabbiliment ta’ pedamenti biex tiżdied ir-reżiljenza. Se tibni ekosistema ġdida fil-Lussemburgu li toħloq għarfien espert u impjiegi bi kwalifiki għolja f’teknoloġija diġitali avvanzata. Dan se jinkludi wkoll l-iżvilupp u l-użu ta’ konnessjonijiet transkonfinali bejn netwerks ta’ komunikazzjoni kwantum nazzjonali ġirien.

Proċess ta’ Konsultazzjoni

(51)L-abbozz tal-pjan għall-irkupru u r-reżiljenza ġie ppreżentat lill-Kumitat Parlamentari għall-Finanzi u l-Baġit, li l-feedback tiegħu informa l-finalizzazzjoni tal-pjan. Wara l-adozzjoni tiegħu mill-gvern, il-pjan ġie ppreżentat lill-kumitati parlamentari kkonċernati, kif ukoll lill-plenarja. Il-Membri tal-Parlament esprimew il-fehmiet tagħhom fid-dibattitu sussegwenti qabel il-preżentazzjoni formali. Is-sħab soċjali ġew ippreżentati l-abbozz tal-pjan għall-irkupru u r-reżiljenza, u qasmu l-fehmiet tagħhom dwar il-prijoritajiet li għandhom jiġu riflessi fil-pjan. Wara l-adozzjoni tal-pjan mill-Gvern, saret preżentazzjoni ġdida lill-imsieħba soċjali. Sabiex tiġi żgurata s-sjieda mill-atturi rilevanti, huwa kruċjali li jiġu involuti l-awtoritajiet lokali u l-partijiet ikkonċernati kollha kkonċernati, inklużi s-sħab soċjali, matul l-implimentazzjoni tal-investimenti u r-riformi inklużi fil-pjan.

Valutazzjoni pożittiva

(52)Wara l-valutazzjoni pożittiva tal-Kummissjoni dwar il-pjan għall-irkupru u r-reżiljenza tal-Lussemburgu bis-sejba li l-pjan jikkonforma b’mod sodisfaċenti mal-kriterji għall-valutazzjoni stabbiliti fir-Regolament (UE) 2021/241, skont l-Artikolu 20(2) ta’ dan ir-Regolament, jenħtieġ li din id-Deċiżjoni tistabbilixxi r-riformi u l-proġetti ta’ investiment meħtieġa għall-implimentazzjoni tal-pjan, l-istadji importanti, il-miri u l-indikaturi rilevanti, u l-ammont disponibbli mill-Unjoni għall-implimentazzjoni tal-pjan fil-forma ta’ appoġġ finanzjarju u ta’ self li ma jitħallasx lura.

Kontribuzzjoni finanzjarja

(53)L-ispiża totali stmata tal-pjan għall-irkupru u r-reżiljenza tal-Lussemburgu hija ta’ EUR 93 354 077. Billi l-pjan għall-irkupru u r-reżiljenza jikkonforma b’mod sodisfaċenti mal-kriterji għall-valutazzjoni stabbiliti fir-Regolament (UE)2021/241 u, barra minn hekk, billi l-ammont tal-ispejjeż totali stmati tal-pjan għall-irkupru u r-reżiljenza huwa aktar baxx mill-kontribuzzjoni finanzjarja massima disponibbli għal-Lussemburgu, jenħtieġ li l-kontribuzzjoni finanzjarja allokata għall-pjan għall-irkupru u r-reżiljenza tal-Lussemburgu tkun ugwali għall-ammont totali tal-ispejjeż totali stmati tal-pjan għall-irkupru u r-reżiljenza.

(54)F’konformità mal-Artikolu 11(2) tar-Regolament (UE) 2021/241, il-kalkolu tal-kontribuzzjoni finanzjarja massima għal-Lussemburgu irid jiġi aġġornat sat-30 ta’ Ġunju 2022. Bħala tali, f’konformità mal-Artikolu 23(1) ta’ dak ir-Regolament, jenħtieġ li issa jkun hemm ammont disponibbli għal-Lussemburgu għal impenn legali sal-31 ta’ Diċembru 2022. Jekk meħtieġ wara l-kontribuzzjoni finanzjarja massima aġġornata, jenħtieġ li l-Kunsill, bi proposta mill-Kummissjoni, jemenda din id-Deċiżjoni biex jinkludi l-kontribuzzjoni finanzjarja massima aġġornata mingħajr dewmien żejjed.

(55)L-appoġġ li għandu jingħata għandu jiġi ffinanzjat mill-għoti b’self mill-Kummissjoni f’isem l-Unjoni fuq il-bażi tal-Artikolu 5 tad-Deċiżjoni tal-Kunsill (UE, Euratom) 2020/2053 5 . L-appoġġ jenħtieġ li jitħallas bin-nifs ladarba l-Lussemburgu jkun wettaq b’mod sodisfaċenti l-istadji importanti u l-miri rilevanti identifikati b’rabta mal-implimentazzjoni tal-pjan għall-irkupru u r-reżiljenza;

(56)Il-Lussemburgu talab prefinanzjament ta’ 13 % tal-kontribuzzjoni finanzjarja. Jenħtieġ li l-ammont ikun għad-dispożizzjoni tal-Lussemburgu soġġett għad-dħul fis-seħħ u f’konformità mal-Ftehim ta’ Finanzjament previst fl-Artikolu 23(1) tar-Regolament (UE) 2021/241.

(57)Jenħtieġ li din id-Deċiżjoni tkun mingħajr preġudizzju għall-eżitu ta’ kull proċedura marbuta mal-għoti ta’ fondi tal-Unjoni skont kull programm ieħor tal-Unjoni ħlief ir-Regolament (UE) 2021/241 jew għal proċeduri marbuta ma’ distorsjonijiet tal-operazzjoni tas-suq intern li jistgħu jitwettqu, b’mod partikolari skont l-Artikoli 107 u 108 tat-Trattat. Din ma twarrabx il-ħtieġa li l-Istati Membri jinnotifikaw każijiet ta’ għajnuna potenzjali mill-Istat lill-Kummissjoni skont l-Artikolu 108 tat-Trattat,

ADOTTA DIN ID-DEĊIŻJONI:

Artikolu 1
Approvazzjoni tal-valutazzjoni tal-pjan għall-irkupru u r-reżiljenza

Il-valutazzjoni tal-pjan għall-irkupru u r-reżiljenza tal-Lussemburgu fuq il-bażi tal-kriterji previsti fl-Artikolu 19(3) tar-Regolament (UE) 2021/241 hija approvata. Ir-riformi u l-proġetti ta’ investiment skont il-pjan għall-irkupru u r-reżiljenza, l-arranġamenti u l-iskeda ta’ żmien għall-monitoraġġ u l-implimentazzjoni tal-pjan għall-irkupru u r-reżiljenza, inklużi l-istadji importanti u l-miri rilevanti, l-indikaturi rilevanti marbuta mal-issodisfar tal-istadji importanti u l-miri previsti, u l-arranġamenti biex il-Kummissjoni tagħti aċċess sħiħ għad-data rilevanti sottostanti huma stabbiliti fl-Anness ta’ din id-Deċiżjoni.

Artikolu 2
Kontribuzzjoni finanzjarja

1.L-Unjoni għandha tqiegħed għad-dispożizzjoni tal-Lussemburgu kontribuzzjoni finanzjarja fil-forma ta’ appoġġ li ma jitħallasx lura li jammonta għal EUR 93 354 077. Ammont ta’ EUR 76 625 886 għandu jkun disponibbli biex jiġi impenjat legalment sal-31 ta’ Diċembru 2022 6 . Soġġett għall-aġġornament previst fl-Artikolu 11(2) tar-Regolament (UE) 2021/241 li jikkalkola ammont għal-Lussemburgu li jkun ugwali għal dan l-ammont jew ogħla minnu, ammont ieħor ta’ EUR 16 728 191 għandu jkun disponibbli biex jiġi impenjat legalment mill-1 ta’ Jannar 2023 sal-31 ta’ Diċembru 2023.

2.Il-Kummissjoni għandha tagħmel il-kontribuzzjoni finanzjarja tal-Unjoni disponibbli għal-Lussemburgu fi ħlasijiet parzjali f’konformità mal-Anness. Ammont ta’ EUR 12 136 030 għandu jkun disponibbli bħala pagament ta’ prefinanzjament, ugwali għal 13 fil-mija tal-kontribuzzjoni finanzjarja. Il-Kummissjoni tista’ tiżborża l-prefinanzjament u ħlasijiet parzjali f’segment wieħed jew f’diversi segmenti. Id-daqs tas-segmenti għandu jkun soġġett għad-disponibbiltà tal-finanzjament.

3.Il-prefinanzjament għandu jkun rilaxxat soġġett għad-dħul fis-seħħ u f’konformità mal-Ftehim ta’ Finanzjament previst fl-Artikolu 23(1) tar-Regolament (UE) 2021/241. Il-prefinanzjament għandu jitħallas billi jitnaqqas proporzjonalment mill-pagament tal-ħlasijiet parzjali.

4.Ir-rilaxx tal-ħlasijiet parzjali f’konformità mal-Ftehim ta’ Finanzjament għandu jkun kondizzjonali għall-finanzjament disponibbli u deċiżjoni mill-Kummissjoni, f’konformità mal-Artikolu 24 tar-Regolament (UE) 2021/241, li l-Lussemburgu jkun laħaq b’mod sodisfaċenti l-istadji importanti u l-miri rilevanti identifikati fir-rigward tal-implimentazzjoni tal-pjan għall-irkupru u r-reżiljenza. Soġġett għad-dħul fis-seħħ tal-impenji legali msemmija fil-paragrafu 1, sabiex wieħed ikun eliġibbli għal pagament, l-istadji importanti u l-miri għandhom jitlestew sa mhux aktar tard mill-31 ta’ Awwissu 2026.

Artikolu 3
Destinatarju

Din id-Deċijoni hija indirizzata lill-Gran Dukat tal-Lussemburgu.

Magħmul fi Brussell,

(1)    ĠU L 57, 18.2.2021, p. 17-75.

(2)    Sakemm issir l-adozzjoni finali mill-Kunsill, wara l-approvazzjoni mill-Kunsill Ewropew. It-test miftiehem mill-Grupp tal-Euro fis-16 ta’ Diċembru 2020 jinsab fuq: https://data.consilium.europa.eu/doc/document/ST-14356-2020-INIT/en/pdf

(3)    Simulazzjonijiet bħal dawn jirriflettu l-impatt ġenerali tal-NGEU, li jinkludi wkoll finanzjament għal ReactEU, u aktar finanzjament għal Horizon, InvestEU, JTF, Żvilupp Rurali u RescEU. Simulazzjonijiet bħal dawn ma jinkludux l-impatt pożittiv possibbli tar-riformi strutturali, li jista’ jkun sostanzjali

(4)    Ir-Regolament (UE) 2020/852 tal-Parlament Ewropew u tal-Kunsill tat-18 ta' Ġunju 2020 dwar l-istabbiliment ta' qafas biex jiġi ffaċilitat l-investiment sostenibbli, u li jemenda r-Regolament (UE) 2019/2088 (ĠU L 198, 22.6.2020, p. 13).

(5)    ĠU L 424, 15.12.2020, p. 1.

(6)    Dan l-ammont jikkorrispondi għall-ammont disponibbli għal impenn legali sal-31 ta’ Diċembru 2022 wara t-tnaqqis tas-sehem proporzjonali tal-Lussemburgu tal-ispejjeż tal-Artikolu 6(2) tar-Regolament (UE) 2021/241, ikkalkulat skont il-metodoloġija tal-Artikolu 11 ta’ dak ir-Regolament.

IL-KUMMISSJONI EWROPEA

Brussell, 18.6.2021

COM(2021) 332 final

ANNESS

tal-

Proposta għal Deċiżjoni ta’ Implimentazzjoni tal-Kunsill

dwar l-approvazzjoni tal-valutazzjoni tal-pjan għall-irkupru u r-reżiljenza għal-Lussemburgu

{SWD(2021) 159 final}

ANNESS

TAQSIMA 1: RIFORMI U INVESTIMENTI SKONT IL-PJAN GĦALL-IRKUPRU U R-REŻILJENZA

1.Deskrizzjoni ta’ Riformi u Investimenti

A. KOMPONENT 1A: Taħriġ tal-ħiliet, Titjib tal-Ħiliet u t-Taħriġ mill-Ġdid

Il-komponent It-taħriġ, it-Titjib mill-Ġdid u t-Titjib tal-Ħiliet tal-pjan tal-Lussemburgu għall-irkupru u r-reżiljenza huwa rispons fl-istess ħin għaż-żieda minħabba l-kriżi fil-livell tal-qgħad, l-isfida fit-tul tan-nuqqas ta’ ħiliet fis-suq tax-xogħol, u r-rikors dejjem aktar mifrux għat-telexogħol, li jinvolvi bidliet organizzattivi u domanda aktar b’saħħitha prinċipalment għall-ħiliet diġitali. Żewġ programmi ta’ taħriġ huma mmirati lejn dawk li qed ifittxu impjieg u l-ħaddiema mqiegħda fuq skema ta’ xogħol b’ħinijiet iqsar, rispettivament. Riforma komplementari għandha twassal pjan ta’ azzjoni ta’ taħriġ li jistabbilixxi mogħdijiet għal taħriġ vokazzjonali (“Skillsbridges”) mfassal biex jipprovdi ħiliet identifikati bħala l-aktar meħtieġa għall-futur.

Il-komponent jikkontribwixxi biex jindirizza r-Rakkomandazzjoni Speċifika għall-Pajjiż 1, 2019 biex tissaħħaħ l-impjegabbiltà ta’ ħaddiema akbar fl-età, ir-Rakkomandazzjoni Speċifika għall-Pajjiż 3, 2019 biex jiġi stimulat l-iżvilupp tal-ħiliet, u r-Rakkomandazzjoni Speċifika għall-Pajjiż 2, 2020 biex jittaffa l-impatt tal-kriżi fuq l-impjiegi, b’kunsiderazzjoni speċjali għal persuni f’pożizzjoni diffiċli fis-suq tax-xogħol.

Huwa mistenni li l-ebda miżura f’dan il-komponent ma tagħmel ħsara sinifikanti lill-objettivi ambjentali skont it-tifsira tal-Artikolu 17 tar-Regolament (UE) 2020/852, filwaqt li jitqiesu d-deskrizzjoni tal-miżuri u l-passi ta’ mitigazzjoni stabbiliti fil-pjan għall-irkupru u r-reżiljenza skont il-Gwida Teknika tad-DNSH (2021/C58/01).

A.1.    Deskrizzjoni tar-riformi u l-investimenti għal appoġġ finanzjarju li ma jitħallasx lura

Riforma: Skillsdësch

B'inizjattiva usa’ mmirata lejn l-iżvilupp ta’ strateġija għall-ħiliet, u l-promozzjoni ta’ taħriġ kontinwu u vokazzjonali, twettqet proċedura kollaborattiva li tinvolvi dibattiti madwar mejda dwar il-ħiliet immexxija mill-partijiet ikkonċernati kollha (“Skillsdësch”) biex tiġi analizzata d-domanda għall-ħiliet, u biex jiġu identifikati l-profili tal-impjiegi l-aktar promettenti. Il-pjan ta’ azzjoni li jirriżulta għandu jiddefinixxi mogħdijiet ta’ taħriġ iddedikati msejħa “skillsbridges” li jgħinu lill-ħaddiema u lil dawk li qed ifittxu impjieg biex itejbu l-impjegabbiltà tagħhom matul it-tranżizzjoni ekoloġika u diġitali. It-taħriġ vokazzjonali hekk maħsub għandu jitnieda fit-tieni kwart tal-2022.

Investiment 1: FutureSkills

Fl-istess kuntest, il-programm tal-FutureSkills jipprovdi ħiliet personali, diġitali u maniġerjali mfittxija lil persuni magħżula u motivati li qed ifittxu impjieg sabiex tiġi ffaċilitata l-integrazzjoni mill-ġdid tagħhom fuq perjodu qasir fis-suq tax-xogħol, u l-mobilità. Il-programm jistabbilixxi mira dedikata għal dawk li qed ifittxu impjieg li għandhom 45 sena u aktar biex jgħinu biex jitnaqqas l-irtirar bikri mifrux u biex jittejbu l-ħiliet. Il-kontenut iġġenerat mill-programm għandu jitqiegħed għad-dispożizzjoni ta’ popolazzjoni akbar ta’ persuni li qed ifittxu impjieg fuq medda itwal ta’ żmien.

Investiment 2: Ħiliet Diġitali

Skont il-programm tal-Ħiliet Diġitali, l-impjegati kollha li jitqiegħdu fuq skema ta’ xogħol b’ħinijiet iqsar bejn Jannar u Marzu 2021 jista’ jkollhom aċċess għal korsijiet ta’ tagħlim elettroniku ta’ ħiliet diġitali. Bl-użu ta’ vawċers li jiswew sa EUR 500, huma jistgħu jagħżlu minn fost korsijiet bażiċi u intermedjarji. Billi t-tagħmir tal-IT proprju mhuwiex meħtieġ, il-programm jaħseb għas-sitwazzjoni ta’ persuni b’ħiliet diġitali aktar baxxi.

A.2.    Stadji importanti, miri, indikaturi, u skeda ta’ żmien għall-monitoraġġ u l-implimentazzjoni għal appoġġ finanzjarju li ma jitħallasx lura

B. KOMPONENT 1B: Tisħiħ tar-reżiljenza tas-sistema tas-saħħa

Dan il-komponent tal-pjan ta’ rkupru u reżiljenza tal-Lussemburgu jinkludi żewġ riformi u żewġ investimenti mmirati biex jindirizzaw uħud mill-problemi strutturali tas-settur tas-saħħa fil-Lussemburgu: in-nuqqas ta’ professjonisti tas-saħħa u l-ħtieġa li tiżdied l-effiċjenza tas-sistema tas-saħħa, b’mod partikolari permezz tad-diġitalizzazzjoni tagħha. L-ewwel riforma tindirizza l-governanza tas-sistema tas-saħħa u tiddeskrivi l-proċess ta’ konsultazzjoni mal-partijiet ikkonċernati u l-metodu tal-programm ta’ ħidma biex jiġu indirizzati għadd ta’ sfidi identifikati minn qabel. L-għan tat-tieni riforma huwa li tiddefinixxi mill-ġdid u twessa’ l-kompetenzi tal-professjonisti differenti. L-investimenti għandhom jikkontribwixxu għad-diġitalizzazzjoni fis-settur tas-saħħa permezz ta’ (i) l-implimentazzjoni ta’ reġistru diġitali ta’ professjonisti tas-saħħa għal ġestjoni u antiċipazzjoni aħjar tal-kopertura tal-kura tas-saħħa, u l-professjonisti tal-kura tas-saħħa meħtieġa, u (ii) l-iżvilupp ta’ soluzzjonijiet għat-telemediċina.

Dan il-komponent huwa reazzjoni għar-Rakkomandazzjoni Speċifika għall-Pajjiż 2020 biex tittejjeb ir-reżiljenza tas-sistema tas-saħħa, li tikkonsisti fl-iżgurar tal-mobilizzazzjoni xierqa tal-ħaddiema tas-saħħa disponibbli, billi tittejjeb il-governanza tas-sistema, u s-Saħħa elettronika.

Huwa mistenni li l-ebda miżura f’dan il-komponent ma tagħmel ħsara sinifikanti lill-objettivi ambjentali skont it-tifsira tal-Artikolu 17 tar-Regolament (UE) 2020/852, filwaqt li jitqiesu d-deskrizzjoni tal-miżuri u l-passi ta’ mitigazzjoni stabbiliti fil-pjan għall-irkupru u r-reżiljenza skont il-Gwida Teknika tad-DNSH (2021/C58/01).

B.1.    Deskrizzjoni tar-riformi u l-investimenti għal appoġġ finanzjarju li ma jitħallasx lura

Riforma 1: Gesondheetsdësch

Il-Lussemburgu nieda proċess ta’ konsultazzjoni (“Gesondheetsdësch”) fost il-ministeri, il-maniġers tal-assigurazzjoni tas-saħħa, it-tobba u r-rappreżentanti tal-professjonisti tas-saħħa biex jimmodernizzaw il-governanza tas-settur tas-saħħa u jwieġbu għal għadd ta’ sfidi identifikati minn qabel f’sitt oqsma ta’ ħidma tematiċi. Ir-riformi u l-investimenti ppreżentati fil-pjan ta’ rkupru u reżiljenza tal-Lussemburgu — ir-riforma tal-kompetenzi tal-professjonisti tas-saħħa, il-ħolqien ta’ reġistru diġitali tal-professjonisti tas-saħħa u l-iżvilupp ta’ soluzzjonijiet tat-telemediċina, huma bbażati fuq ir-riżultati ta’ din il-konsultazzjoni. Il-flussi ta’ ħidma l-oħra ta’ dan il-proċess ikopru wkoll oqsma importanti ħafna relatati mar-reżiljenza tas-sistema tas-saħħa (speċjalment it-titjib tal-kura primarja, il-kura integrata, il-promozzjoni tas-saħħa, il-finanzjament sostenibbli tal-kura tas-saħħa), iżda ma jsarrfux f’impenji fil-pjan, ħlief għall-pubblikazzjoni ta’ programm ta’ ħidma għall-implimentazzjoni tar-riżultati tal-proċess Gesondheetsdësch.

Riforma 2: Riforma tar-regolamentazzjoni tal-kompetenzi tal-professjonisti tal-kura tas-saħħa

Din ir-riforma għandha l-għan li tirriformula l-kompetenzi ta’ għadd ta’ professjonisti tas-saħħa sabiex tiżdied l-attrattività tal-professjonijiet tas-saħħa, jinħolqu l-kundizzjonijiet għat-trasferiment tal-kompiti, u jiġi indirizzat in-nuqqas ta’ prattikanti tal-kura f’kuntest ta’ domanda dejjem tikber għall-kura. Għandhom jinħolqu wkoll kategoriji professjonali ġodda fost il-professjonisti tas-saħħa (bħal infermiera avvanzati u infermiera speċjalizzati), kif ukoll livell intermedju bejn l-infermiera u l-assistenti tal-kura.

L-ewwel professjonijiet li għandhom jiġu mmirati minn din id-definizzjoni mill-ġdid tal-kompetenzi huma l-infermiera u l-assistenti tal-kura. Il-leġiżlazzjoni adottata f’dan ir-rigward għandha tidħol fis-seħħ sat-30 ta’ Settembru 2025. L-istess proċess għandu jitwettaq għall-professjonijiet tas-saħħa l-oħra (inklużi infermiera speċjalizzati, terapisti, qwiebel, ħaddiema soċjali u esperti tad-dieta), li għalihom il-ħtiġijiet għandhom ikunu ġew identifikati fil-pjan direzzjonali li għandu jiġi ppubblikat sa mhux aktar tard mit-30 ta’ Ġunju 2024. Il-leġiżlazzjoni adottata f’dan ir-rigward għandha tidħol fis-seħħ sal-31 ta’ Diċembru 2025.

Investiment 1: Reġistru diġitali uniku tal-professjonisti tal-kura tas-saħħa

L-għan ta’ dan l-investiment huwa li jiġi stabbilit reġistru diġitali uniku għall-professjonijiet tas-saħħa, il-ġbir ta’ data amministrattiva u professjonali, sabiex tiġi ġestita d-data dwar il-professjonisti tas-saħħa fil-Lussemburgu (l-għadd ta’ tobba, l-ispeċjalitajiet tagħhom, l-oqsma ta’ għarfien espert, id-distribuzzjoni tal-età tagħhom, id-distribuzzjoni territorjali tagħhom...), il-professjonijiet u l-ħiliet meħtieġa previsti (projezzjonijiet demografiċi fuq terminu qasir sa medju minn żoni ta’ speċjalità u żoni ġeografiċi) u l-mobilizzazzjoni tal-persunal matul il-kriżijiet. Din l-għodda għandha tippermetti wkoll il-ġestjoni tal-liċenzji professjonali u għandha twieġeb għall-obbligu legali li d-data professjonali tinżamm aġġornata. Il-proġett għandu jitlesta sal-31 ta’ Marzu 2023.

Investiment 2: Soluzzjoni tat-telemediċina għal segwitu mediku remot tal-pazjenti

Dan l-investiment huwa mmirat lejn l-iżvilupp ta’ monitoraġġ mediku mill-bogħod (telemediċina) sal-31 ta’ Marzu 2022. Hija għandha tibni fuq sistema ta’ telekonsultazzjonijiet implimentati matul il-pandemija tal-COVID-19 mill-aġenzija tas-Saħħa elettronika f’Marzu 2020 (“Maela”, li tippermetti monitoraġġ mill-bogħod bejn it-tobba, id-dentisti jew il-qwiebel u l-pazjenti) u għandha tinvolvi soluzzjoni aktar avvanzata (“IdeoPHM”). Is-sistema l-ġdida għandha tiġi integrata fis-servizzi tas-Saħħa elettronika skjerati fuq il-pjattaforma nazzjonali tas-Saħħa elettronika. Fl-interess tal-inklużjoni diġitali ta’ persuni b’ħiliet diġitali baxxi u tal-anzjani, il-Ministeru tas-Saħħa waqqaf helpdesk li jista’ jintlaħaq permezz ta’ indirizz elettroniku jew telefon. Hija għandha ttejjeb l-aċċessibbiltà tal-kura tas-saħħa u tillimita l-pressjoni fuq il-professjonisti tas-saħħa, filwaqt li tnaqqas il-ħtieġa għall-ivvjaġġar fiżiku fil-kuntest tal-pandemija tal-COVID-19.

B.2.    Stadji importanti, miri, indikaturi, u skeda ta’ żmien għall-monitoraġġ u l-implimentazzjoni għal appoġġ finanzjarju li ma jitħallasx lura

C. COMPONENT 1C — Żieda fil-provvista ta’ akkomodazzjoni pubblika affordabbli u sostenibbli

L-objettiv ta’ dan il-komponent tal-pjan ta’ rkupru u reżiljenza tal-Lussemburgu huwa li jiżviluppa l-akkomodazzjoni u jżid il-provvista ta’ akkomodazzjoni affordabbli u sostenibbli fil-Lussemburgu. 

Bħala parti minn dan il-komponent, ir-riforma tal-“Patt dwar l-Akkomodazzjoni 2.0” tistabbilixxi qafas ta’ referenza ġdid għall-appoġġ tal-gvern lill-muniċipalitajiet għall-ħolqien ta’ proġetti ġodda ta’ akkomodazzjoni, permezz tal-kostruzzjoni ta’ bini ġdid jew ir-rinnovazzjoni tal-istokk tal-bini eżistenti. Dan il-komponent jinkludi wkoll miżura ta’ investiment, li tiffoka fuq l-appoġġ għall-ġenerazzjoni tal-enerġija rinnovabbli bħala parti mill-proġett “Neischmelz” fil-muniċipalità ta’ Dudelange (proġett usa’ li jinkludi r-riabilitazzjoni ta’ sit industrijali preċedenti biex jinħoloq distrett urban ġdid, u b’hekk tiżdied il-provvista ta’ akkomodazzjoni affordabbli u sostenibbli).

Permezz tal-miżura tal-Patt dwar l-Akkomodazzjoni 2.0, dan il-komponent jikkontribwixxi biex tiġi indirizzata r-Rakkomandazzjoni Speċifika għall-Pajjiż indirizzata lil-Lussemburgu biex “titrawwem politika ekonomika relatata mal-investiment fuq (...) iż-żieda fil-provvista tad-djar, inkluż billi jiżdiedu l-inċentivi u jitneħħew l-ostakli għall-bini” (ir-Rakkomandazzjoni Speċifika għall-Pajjiż 3, 2019). Permezz tal-proġett “Neischmelz”, u permezz tal-aspetti relatati mar-rinnovazzjoni tal-bini fil-Patt dwar l-Akkomodazzjoni 2.0, dan il-komponent jikkontribwixxi wkoll għat-tranżizzjoni ekoloġika, u biex tiġi indirizzata r-Rakkomandazzjoni Speċifika għall-Pajjiż 3, 2020 biex “l-investiment jiġi ffukat fuq it-tranżizzjoni ekoloġika (...), b’mod partikolari fuq (...) binjiet sostenibbli, il-produzzjoni u l-użu tal-enerġija nodfa u effiċjenti, li jikkontribwixxu għad-dekarbonizzazzjoni progressiva tal-ekonomija”.

Huwa mistenni li l-ebda miżura f’dan il-komponent ma tagħmel ħsara sinifikanti lill-objettivi ambjentali skont it-tifsira tal-Artikolu 17 tar-Regolament (UE) 2020/852, filwaqt li jitqiesu d-deskrizzjoni tal-miżuri u l-passi ta’ mitigazzjoni stabbiliti fil-pjan għall-irkupru u r-reżiljenza skont il-Gwida Teknika tad-DNSH (2021/C58/01).

C.1.    Deskrizzjoni tar-riformi u l-investimenti għal appoġġ finanzjarju li ma jitħallasx lura

Riforma: Patt dwar l-Akkomodazzjoni 2.0

Fil-Lussemburgu, livell għoli ta’ konċentrazzjoni ta’ proprjetà privata u ftit inċentivi biex l-art tiġi rilaxxata għall-iżvilupp jillimitaw il-kapaċità tal-awtoritajiet pubbliċi li jindirizzaw in-nuqqas kroniku ta’ provvista ta’ djar, li jkompli jgħolli l-prezzijiet fid-dawl tat-tkabbir qawwi tal-popolazzjoni. Sadanittant, id-dejn tal-unitajiet domestiċi qed ikompli jiżdied u jammonta għal 170 % tal-ING fl-2018 (li ħafna minnu huwa dejn ipotekarju u mhuwiex imqassam b’mod ugwali, li jagħmel l-unitajiet domestiċi ifqar relattivament aktar vulnerabbli).

F’dan l-isfond, din ir-riforma għandha tistabbilixxi “Patt dwar l-Akkomodazzjoni 2.0”, bħala qafas ta’ referenza biex tħeġġeġ lill-muniċipalitajiet jimmobilizzaw art għall-bini, u djar għar-rinnovazzjoni, sabiex tiżdied l-akkomodazzjoni soċjali fid-dawl tan-nuqqas ta’ akkomodazzjoni affordabbli; u biex jinkoraġġixxu l-kostruzzjoni ta’ skejjel u nurseries biex ilaħħqu mal-popolazzjoni li qed tikber. Din l-iskema tibni fuq it-tagħlimiet mitgħallma mill-“Patt dwar l-Akkomodazzjoni 1.0”, li ilu fis-seħħ mill-2008.

Skont il-Patt dwar l-Akkomodazzjoni 2.0, kull muniċipalità tista’ timpenja ruħha billi tiffirma “konvenzjoni inizjali” mal-Istat, li tippermetti li l-muniċipalità tkun assistita minn “konsulent tad-djar”. Jekk tagħmel dan, il-muniċipalità mbagħad għandha tistabbilixxi u tadotta l-istrateġija muniċipali tagħha għall-iżvilupp tad-djar (“Programme d’action local logement” jew PAL). Il-muniċipalitajiet imbagħad jiffirmaw “konvenzjoni ta’ implimentazzjoni” mal-Istat, li tinvolvi obbligu għall-muniċipalità li timplimenta l-proġetti ta’ żvilupp dettaljati fil-PAL, b’appoġġ finanzjarju mill-Istat abbażi tal-unitajiet ta’ akkomodazzjoni affordabbli mqiegħda fis-suq tal-kiri fis-sena preċedenti.

Il-Patt dwar l-Akkomodazzjoni 2.0 għandu jqis il-prijoritajiet ta’ żvilupp stabbiliti fil-pjanijiet settorjali u l-Programm Regolatorju Nazzjonali l-ġdid għall-Ippjanar Spazjali (PDAT), u sa fejn jippermetti l-għadd ta’ muniċipalitajiet firmatarji, jikkontribwixxi għal żvilupp koerenti fl-użu tal-art fil-livell nazzjonali, bil-ħsieb li tiżdied b’mod sostenibbli l-provvista tad-djar. Ir-riforma għandha l-għan li tqiegħed fis-suq mill-inqas 1200 unità residenzjali sal-2025.

Filwaqt li l-biċċa l-kbira tal-muniċipalitajiet kienu ffirmaw ftehim skont il-Patt dwar l-Akkomodazzjoni 1.0, dan ma rriżultax f’żieda notevoli fil-provvista tal-akkomodazzjoni soċjali. Meta mqabbel mal-predeċessur tiegħu, il-Patt dwar l-Akkomodazzjoni 2.0 għandu jipprevedi li l-pakkett finanzjarju disponibbli għat-trasferimenti tal-Istat lill-muniċipalitajiet jiġi kkalkulat abbażi tal-għadd ta’ unitajiet ta’ akkomodazzjoni affordabbli fit-territorju tagħhom imqiegħda fis-suq tal-kiri matul is-sena preċedenti (jew permezz tal-kostruzzjoni jew l-akkwist u r-rinnovazzjoni), u mhux aktar abbażi tat-tkabbir tal-popolazzjoni. Barra minn hekk, il-kontribuzzjonijiet finanzjarji mogħtija lill-muniċipalitajiet għandhom jitħallsu fuq il-bażi tal-implimentazzjoni ta’ proġetti approvati skont il-Patt dwar l-Akkomodazzjoni 2.0 u mmirati lejn il-kisba tal-objettivi tiegħu. Kooperazzjoni aktar mill-qrib bejn l-Istat u l-muniċipalitajiet hija objettiv ewlieni tar-riforma, immirata lejn it-tisħiħ tal-kapaċità tas-settur pubbliku biex jiżdied b’mod sinifikanti l-istokk residenzjali pubbliku u tiżdied il-prattika ta’ akkomodazzjoni għall-kiri affordabbli u sostenibbli. F’dan is-sens, l-abbozz tal-Patt dwar l-Akkomodazzjoni 2.0 jipprevedi li bejn 10 % u 30 % ta’ kull proġett ta’ żvilupp għandu jkun iddedikat għal akkomodazzjoni affordabbli mqiegħda fis-suq tal-kiri. Ir-riforma toffri l-opportunità li tiġi indirizzata b’mod sinifikanti x-xejra tal-inflazzjoni tal-prezzijiet tad-djar, li hija meqjusa wkoll bħala wieħed mill-ostakli ewlenin għall-investiment u t-tkabbir.

Investiment: Il-proġett “Neischmelz” f’Dudelange — enerġija rinnovabbli

Din il-miżura tikkonsisti fl-appoġġ ta’ sottoproġetti tal-proġett estensiv għall-konverżjoni tas-sit industrijali preċedenti “Neischmelz”, li jinsab fil-muniċipalità ta’ Dudelange, biex jiġi żviluppat distrett urban ġdid, u b’hekk jingħata kontribut biex jiġi indirizzat in-nuqqas ta’ akkomodazzjoni affordabbli fil-Lussemburgu. Aktar minn nofs l-abitazzjonijiet maħluqa bħala parti minn dan il-programm huma maħsuba għal kiri affordabbli. Il-programm globali huwa mistenni li jitlesta sal-2035.

F’dan il-kuntest, l-elettriku għandu jiġi prodott minn pannelli fotovoltajċi installati fuq il-wiċċ kbir tas-soqfa fuq l-istruttura antika riabilitata. Is-sħana għandha tiġi prodotta jew permezz ta’ sistema innovattiva ta’ enerġija ġeotermali profonda jew permezz ta’ sett ta’ pannelli termali solari, skont il-fattibbiltà li s-sistema ġeotermali tiġi kkonfermata wara investigazzjonijiet ulterjuri.

Ix-xogħlijiet tas-sistema tal-enerġija mhumiex kontinġenti fuq il-progress tal-operazzjonijiet għar-riabilitazzjoni tal-art imniġġsa fis-sit. Fir-rigward tal-produzzjoni tas-sħana permezz tal-enerġija ġeotermali, għandu jingħata kuntratt ta’ xogħlijiet sal-31 ta’ Diċembru 2022 biex jitnieda t-tħaffir tat-test il-ġdid, biex jiġu kkonfermati r-riżultati promettenti tal-ewwel tħaffir imwettaq fl-2018, u għandha tittieħed deċiżjoni finali sat-30 ta’ Settembru 2023 biex jiġi kkonfermat l-iżvilupp tas-sistema tal-enerġija ġeotermali, jew biex jaqa’ lura fuq impjant tal-enerġija solari termali. Fi kwalunkwe każ, ix-xogħol fuq in-networks tas-sħana għandu jiġi varat sat-30 ta’ Settembru 2024. Sal-31 ta’ Diċembru 2025, jekk il-fattibbiltà tiġi kkonfermata, iż-żewġ eżerċizzji definittivi ta’ tħaffir għas-sistema tal-enerġija ġeotermali għandhom jitlestew; jekk le, l-impjant tal-enerġija tat-tisħin ibbażat fuq il-pannell termali solari għandu jkun operattiv. Fir-rigward tal-produzzjoni tal-elettriku, mill-inqas 8 000 m² ta’ pannelli solari fotovoltajċi għandhom jitlestew sal-31 ta’ Diċembru 2025.

C.2.    Stadji importanti, miri, indikaturi, u skeda ta’ żmien għall-monitoraġġ u l-implimentazzjoni għal appoġġ finanzjarju li ma jitħallasx lura

D. KOMPONENT 2A: Dekarbonizzazzjoni tat-trasport

Dan il-komponent tal-pjan ta’ rkupru u reżiljenza tal-Lussemburgu għandu l-għan li jikkontribwixxi għad-dekarbonizzazzjoni tas-settur tat-trasport bit-triq (li ammonta għal 50 % tal-emissjonijiet tal-Lussemburgu fl-2018, aktar mid-doppju tal-medja tal-UE ta’ 21 % 1 , parzjalment minħabba t-trasport fi tranżitu), b’mod partikolari billi titrawwem elettrifikazzjoni akbar tal-mobbiltà.

Dan jikkonsisti f’riforma li tippromwovi x-xiri ta’ vetturi mingħajr emissjonijiet jew b’emissjonijiet baxxi mingħand l-awtoritajiet u l-entitajiet tal-akkwist, u investiment biex ikompli jiġi skjerat network ta’ punti tal-iċċarġjar għall-vetturi elettriċi madwar il-pajjiż.

Dan il-komponent jikkontribwixxi biex jindirizza r-Rakkomandazzjoni Speċifika għall-Pajjiż indirizzata lil-Lussemburgu (ir-Rakkomandazzjoni Speċifika għall-Pajjiż 3, 2019 u r-Rakkomandazzjoni Speċifika għall-Pajjiż 3, 2020) biex “jiffoka l-investiment fuq it-tranżizzjoni ekoloġika (...), b’mod partikolari fuq it-trasport sostenibbli”.

Huwa mistenni li l-ebda miżura f’dan il-komponent ma tagħmel ħsara sinifikanti lill-objettivi ambjentali skont it-tifsira tal-Artikolu 17 tar-Regolament (UE) 2020/852, filwaqt li jitqiesu d-deskrizzjoni tal-miżuri u l-passi ta’ mitigazzjoni stabbiliti fil-pjan għall-irkupru u r-reżiljenza skont il-Gwida Teknika tad-DNSH (2021/C58/01).

D.1.    Deskrizzjoni tar-riformi u l-investimenti għal appoġġ finanzjarju li ma jitħallasx lura

Riforma: L-elettrifikazzjoni tal-flotta tal-awtoritajiet u l-entitajiet kontraenti, u tat-trasport pubbliku

Id-Direttiva dwar il-Vetturi Nodfa 2 tistipula li l-Istati Membri jridu jiżguraw li l-akkwist ta’ vetturi ħfief u tqal mill-awtoritajiet kontraenti u l-entitajiet kontraenti jikkonforma mal-miri minimi tal-akkwist nazzjonali għall-vetturi nodfa, fuq perjodi ta’ referenza ta’ ħames snin (mill-inqas 38,5 % tal-vetturi ħfief, 45 % tax-xarabanks nodfa u 10 % tal-vetturi tqal matul il-perjodu 2021-2025).

Din ir-riforma tikkonsisti f’li wieħed imur lil hinn minn dak l-obbligu billi tirrikjedi, mhux biss li l-miri minimi għandhom jintlaħqu bħala medja nazzjonali għall-vetturi kollha akkwistati, iżda jridu jintlaħqu wkoll minn kull awtorità kontraenti u entità kontraenti individwalment.

Barra minn hekk, l-Istat tal-Lussemburgu bħala awtorità kontraenti stabbilixxa objettivi interni ogħla għalih innifsu, u qed jippjana li jelettrifika kompletament il-flotta tax-xarabanks imħaddma mill-operatur tat-trasport pubbliku RGTR sal-2030.

Investiment: Skema ta’ appoġġ għall-punti tal-iċċarġjar

Dan l-investiment għandu l-għan li jrawwem l-użu ta’ network dens u aċċessibbli ta’ punti tal-iċċarġjar għall-vetturi elettriċi madwar il-Lussemburgu, billi jistabbilixxi skema ġdida li tappoġġa finanzjarjament l-inizjattivi meħuda min-negozji biex jiżviluppaw punti tal-iċċarġjar ġodda. Din l-iskema hija maħsuba biex tikkumplimenta s-sistema eżistenti biex tappoġġa l-punti tal-iċċarġjar, fis-seħħ minn Lulju 2020, u li timmira lejn inizjattivi minn individwi. L-iskema l-ġdida għandha tappoġġa kemm il-punti tal-iċċarġjar aċċessibbli għall-pubbliku, kif ukoll il-punti li mhumiex aċċessibbli għall-pubbliku (l-infrastruttura għall-iċċarġjar tal-flotot tal-vetturi elettriċi, u l-iċċarġjar fil-post tax-xogħol għall-impjegati).

Fuq il-bażi ta’ studju preliminari, il-Lussemburgu għandu jadotta Liġi biex jistabbilixxi l-iskema sal-31 ta’ Marzu 2022. L-applikazzjonijiet tal-proġetti huma mistennija li jiġu pproċessati mill-ewwel kwart tal-2022, u l-iskema għandha tiġi implimentata sal-2025.

D.2.    Stadji importanti, miri, indikaturi, u skeda ta’ żmien għall-monitoraġġ u l-implimentazzjoni għal appoġġ finanzjarju li ma jitħallasx lura

E. KOMPONENT 2B: Il-ħarsien tal-ambjent u l-bijodiversità

Dan il-komponent tal-pjan ta’ rkupru u reżiljenza tal-Lussemburgu għandu l-għan li jrawwem il-protezzjoni u l-konservazzjoni tal-bijodiversità u tal-ekosistemi fil-Lussemburgu, bħala mod kif tissaħħaħ ir-reżiljenza, b’mod partikolari b’kont meħud tar-rabtiet bejn is-saħħa tal-bniedem u s-saħħa tal-ekosistemi. L-objettivi jinkludu r-restawr tal-ħabitats, iż-żieda fil-kontinwità ekoloġika, u r-reżiljenza u r-restawr tal-ekosistemi, kif ukoll is-sensibilizzazzjoni u l-kondiviżjoni tal-għarfien sostnuti.

Il-komponent jikkonsisti f’miżura waħda, li tinkludi xi elementi ta’ riforma u xi elementi ta’ investimenti, biex tappoġġa l-isforzi tal-muniċipalitajiet f’azzjonijiet ta’ konservazzjoni tal-ambjent naturali u tal-bijodiversità. Il-miżura tipproponi pjan ta’ azzjoni li jħejji lill-muniċipalitajiet biex jindirizzaw l-isfidi tat-tnaqqis fil-bijodiversità u d-degradazzjoni tal-ekosistemi.

Filwaqt li r-Rakkomandazzjonijiet Speċifiċi għall-Pajjiżi indirizzati lil-Lussemburgu ma jirreferux għall-ambjent naturali u l-bijodiversità bħala sfida speċifika għall-pajjiż, dan il-komponent ġeneralment jikkontribwixxi għar-Rakkomandazzjoni Speċifika għall-Pajjiż 3, 2020 li “l-investiment jiġi ffukat fuq it-tranżizzjoni ekoloġika (...)”.

Huwa mistenni li l-ebda miżura f’dan il-komponent ma tagħmel ħsara sinifikanti lill-objettivi ambjentali skont it-tifsira tal-Artikolu 17 tar-Regolament (UE) 2020/852, filwaqt li jitqiesu d-deskrizzjoni tal-miżuri u l-passi ta’ mitigazzjoni stabbiliti fil-pjan għall-irkupru u r-reżiljenza skont il-Gwida Teknika tad-DNSH (2021/C58/01).

E.1.    Deskrizzjoni tar-riformi u l-investimenti għal appoġġ finanzjarju li ma jitħallasx lura

Riforma u investiment: ‘Naturpakt’

Il-miżura proposta għandha l-għan li tistabbilixxi qafas ta’ referenza nazzjonali u skema ta’ appoġġ biex tħeġġeġ lill-muniċipalitajiet jinvolvu ruħhom dejjem aktar f’azzjonijiet ta’ protezzjoni tal-ambjent naturali u tal-bijodiversità. Għal dan il-għan, il-miżura tikkonsisti fl-istabbiliment tal-hekk imsejjaħ “Naturpakt”, li jipprovdi qafas ta’ referenza legali, finanzjarju, tekniku u konsultattiv għall-muniċipalitajiet. In-“Naturpakt” huwa ispirat ħafna mill-“Patt Klimatiku” li diġà jinsab fis-seħħ fil-Lussemburgu biex jippromwovi azzjonijiet ta’ tnaqqis tal-emissjonijiet ta’ gassijiet serra mill-muniċipalitajiet.

In-“Naturpakt” jagħmilha possibbli għall-Istat li jappoġġa finanzjarjament l-isforzi tal-muniċipalitajiet. Il-muniċipalitajiet li jixtiequ jimpenjaw ruħhom l-ewwel iridu jiffirmaw “kuntratt ta’ Naturpakt” mal-Istat, fejn jimpenjaw ruħhom li jimplimentaw azzjonijiet fit-territorju tagħhom, għall-perjodu sal-2030. Il-kategoriji possibbli ta’ azzjonijiet u azzjonijiet infushom huma elenkati f’“katalgu” ppubblikat mill-Istat — dawn jirriżultaw mill-istrateġiji nazzjonali għall-protezzjoni u l-konservazzjoni tal-ambjent naturali, inkluż fir-rigward tal-protezzjoni tan-natura, il-ġestjoni tad-distretti idrografiċi u l-adattament għat-tibdil fil-klima. Il-pubblikazzjoni tal-katalogu li jirrispetta l-prinċipju ta’ “la tagħmilx ħsara sinifikanti” għandha tkun l-ewwel pass importanti. Il-muniċipalitajiet li ffirmaw il-“kuntratt Naturpakt” jibbenefikaw mill-assistenza ta’ konsulent iffinanzjat fil-kuntest tal-iskema “Naturpakt”, u jirċievu sussidju annwali għall-parteċipazzjoni. Barra minn hekk, l-Istat ikopri spejjeż addizzjonali relatati mal-implimentazzjoni tan-“Naturpakt”, bħall-ispejjeż tal-assistenza teknika u l-verifiki.

Fl-ewwel sena wara li jkunu ffirmaw il-“kuntratt ta’ Naturpakt”, u mill-inqas kull tliet snin wara dan, il-muniċipalitajiet jgħaddu minn verifika biex jiddeterminaw il-livell ta’ prestazzjoni tagħhom skont l-azzjonijiet elenkati fil-katalogu. Il-muniċipalitajiet li jippreżentaw livell ta’ prestazzjoni ogħla minn ċertu limitu (40 % tal-azzjonijiet kollha elenkati fil-katalogu) jirċievu ċertifikazzjoni (imsejħa “Naturpakt Gemeng”), flimkien ma’ sussidji finanzjarji, ikkalkulati b’kunsiderazzjoni tal-prestazzjoni (li hija meħtieġa biex tiżdied is-sahra ladarba tkun intlaħqet iċ-ċertifikazzjoni), iż-żona tal-muniċipalità, u s-sena taċ-ċertifikazzjoni.

Il-Faċilità hija mistennija tappoġġa t-tnedija ta’ din il-miżura, billi tappoġġa l-ewwel 30 muniċipalità li ffirmaw il-“kuntratt Naturpakt”, u l-ewwel 15-il muniċipalità li rċevew iċ-ċertifikazzjoni, matul il-perjodu ta’ implimentazzjoni 2021-2025.

E.2.    Stadji importanti, miri, indikaturi, u skeda ta’ żmien għall-monitoraġġ u l-implimentazzjoni għal appoġġ finanzjarju li ma jitħallasx lura

F. KOMPONENT 3A: Promozzjoni ta’ ekonomija bbażata fuq id-data 

Is-sigurtà tad-data personali hija sfida ewlenija għas-soċjetà billi l-aġenti ekonomiċi u soċjali qed jiddependu dejjem aktar fuq il-komunikazzjonijiet diġitali. Dan il-komponent tal-pjan ta’ rkupru u reżiljenza tal-Lussemburgu, “Promozzjoni ta’ ekonomija mmexxija mid-data”, huwa maħsub biex jindirizza din l-isfida. L-objettiv tagħha huwa li tiżviluppa infrastruttura ta’ komunikazzjoni ultra sigura bbażata fuq teknoloġija tal-quantum bil-għan li ttejjeb is-sigurtà ta’ komunikazzjoni ta’ data sensittiva. Dan il-komponent għandu l-għan ukoll li joħloq ekosistema teknoloġika ġdida fil-Lussemburgu, maħsuba biex toħloq l-impjiegi u tattira esperti xjentifiċi fil-qasam. 

F’dan il-kuntest, l-Infrastruttura ta’ Komunikazzjoni Quantum (Quantum Communication Infrastructure, QCI) skjerata għandu jkollha parti terrestri, li tkun kapaċi tgħaqqad żewġ punti b’distanza massima ta’ 100 km, u parti satellitari, li tkun kapaċi tikkonnettja żewġ punti jekk tkun tinsab aktar minn 100 km bogħod minn xulxin.   

Il-komponent huwa maħsub biex jikkontribwixxi għall-indirizzar tar-Rakkomandazzjonijiet Speċifiċi għall-Pajjiżi li waslu għand il-Lussemburgu fl-2019 u fl-2020, li jirrakkomandaw li l-politika ekonomika relatata mal-investiment tiġi ggwidata biex tħeġġeġ id-diġitalizzazzjoni u l-innovazzjoni. Il-komponent jikkontribwixxi wkoll għat-tranżizzjoni diġitali.

Huwa mistenni li l-ebda miżura f’dan il-komponent ma tagħmel ħsara sinifikanti lill-objettivi ambjentali skont it-tifsira tal-Artikolu 17 tar-Regolament (UE) 2020/852, filwaqt li jitqiesu d-deskrizzjoni tal-miżuri u l-passi ta’ mitigazzjoni stabbiliti fil-pjan għall-irkupru u r-reżiljenza skont il-Gwida Teknika tad-DNSH (2021/C58/01).

F.1.    Deskrizzjoni tar-riformi u l-investimenti għal appoġġ finanzjarju li ma jitħallasx lura

Riforma 1: It-trawwim tal-ħolqien ta’ ekosistema teknoloġika ġdida fil-Lussemburgu

L-iżvilupp u l-użu tat-teknoloġija tal-komunikazzjoni Quantum għadhom fi stadju sperimentali. Ir-riforma proposta għandha l-għan li tistimula l-iżvilupp ta’ ekosistema ġdida fil-Lussemburgu fir-rigward ta’ din it-teknoloġija ġdida, filwaqt li tinkoraġġixxi l-parteċipazzjoni tal-kumpaniji privati u r-riċerkaturi. Din il-miżura għandha tappoġġa l-innovazzjoni fil-komunikazzjonijiet tal-qukwantum bil-għan li tirriforma t-teknoloġiji ta’ komunikazzjoni eżistenti u tintegra l-infrastruttura nazzjonali fil-proġett EuroQCI. Il-kisba ta’ esperjenza f’din it-teknoloġija għandha tgħammar lil-Lussemburgu biex iħarreġ u jattira persuni bi kwalifiki għolja u jistimula kumpaniji innovattivi f’dan il-qasam.

Barra minn hekk, l-Infrastruttura ta’ Komunikazzjoni Quantum (QCI) għandha tippermetti l-iskambju ta’ informazzjoni b’mod sigur billi tipprevjeni lil terza persuna milli tinterċetta l-messaġġ mingħajr ma tiġi nnutata. Dan għandu jippromwovi l-ogħla livell ta’ protezzjoni u privatezza tad-data.   

Investiment 1: L-iżvilupp u l-iskjerament ta’ infrastruttura tal-ittestjar u soluzzjonijiet ta’ konnettività ultra sigura

Dan l-investiment jikkonsisti fl-iżvilupp u l-użu tal-infrastruttura tar-riċerka meħtieġa biex jinkisbu l-għarfien u l-esperjenza fil-qasam tal-komunikazzjoni bbażata fuq it-teknoloġija kwantistika. Biex jagħmel dan, il-laboratorju LuxQCI għandu jinħoloq f’kollaborazzjoni mal-Istitut tar-Riċerka SnT. Il-ħolqien ta’ dan il-laboratorju għandu jipprovdi l-għarfien espert meħtieġ lill-komunità xjentifika u lis-sħab tal-konsorzju biex jiżviluppaw u joperaw infrastruttura ta’ komunikazzjoni kwantistika. Żewġ dimostrazzjonijiet għandhom jitwettqu biex tinkiseb esperjenza rigward it-teknoloġija. L-ewwel dimostrazzjoni permezz tan-network terrestri hija mistennija li sseħħ sal-31 ta’ Marzu 2023, filwaqt li l-ewwel dimostrazzjoni permezz tas-satellita hija mistennija li sseħħ sat-30 ta’ Settembru 2024. 

F.2.    Stadji importanti, miri, indikaturi, u skeda ta’ żmien għall-monitoraġġ u l-implimentazzjoni għal appoġġ finanzjarju li ma jitħallasx lura

G. KOMPONENT 3B: Il-modernizzazzjoni tal-amministrazzjoni pubblika

Il-pandemija tal-COVID-19 u l-miżuri ta’ konteniment urew il-ħtieġa urġenti li jiġu żviluppati aktar soluzzjonijiet diġitali adegwati għas-servizzi u l-amministrazzjonijiet pubbliċi. Dan il-komponent għandu l-għan li jindirizza din l-isfida, billi jżid l-effettività u l-effiċjenza tal-amministrazzjonijiet pubbliċi u s-servizzi tagħhom permezz tad-diġitalizzazzjoni tagħhom, filwaqt li jqis l-isfidi, il-ħtiġijiet u l-aspettattivi attwali taċ-ċittadini u tal-uffiċjali tal-gvern.

Il-komponent tal-pjan ta’ rkupru u reżiljenza tal-Lussemburgu huwa maħsub biex iwieġeb għar-Rakkomandazzjonijiet Speċifiċi għall-Pajjiż indirizzati lil-Lussemburgu fl-2019 u l-2020, li rrakkomandaw it-trawwim tal-innovazzjoni u d-diġitalizzazzjoni, b’mod partikolari fis-settur tan-negozju, kif ukoll li jiggwida l-politika ekonomika relatata mal-investiment biex tħeġġeġ id-diġitalizzazzjoni u l-innovazzjoni. Il-komponent jikkontribwixxi wkoll għat-tranżizzjoni diġitali.

Huwa mistenni li l-ebda miżura f’dan il-komponent ma tagħmel ħsara sinifikanti lill-objettivi ambjentali skont it-tifsira tal-Artikolu 17 tar-Regolament (UE) 2020/852, filwaqt li jitqiesu d-deskrizzjoni tal-miżuri u l-passi ta’ mitigazzjoni stabbiliti fil-pjan għall-irkupru u r-reżiljenza skont il-Gwida Teknika tad-DNSH (2021/C58/01).

G.1.    Deskrizzjoni tar-riformi u l-investimenti għal appoġġ finanzjarju li ma jitħallasx lura

Investiment 1: Ġestjoni elettronika tad-dokumenti, Ġestjoni tal-Każijiet

L-investiment 1 għandu l-għan li jimplimenta pjattaforma ċentrali bil-funzjonalitajiet meħtieġa biex tkopri l-ġestjoni tad-dokumenti fl-amministrazzjonijiet pubbliċi kif ukoll skambji ta’ dokumenti bejn l-amministrazzjonijiet u ċ-ċittadini u n-negozji. Għandu joffri wkoll repożitorju għall-ġestjoni elettronika tad-dokumenti u għall-ġestjoni tal-każijiet. Biex isir dan, l-ewwel pjattaforma bażika bl-isem “GED Factory” għandha tiġi implimentata miċ-Ċentru tal-IT tal-Gvern (CTIE). L-amministrazzjonijiet pubbliċi kollha li jixtiequ jipparteċipaw fil-proġett għandhom jirċievu appoġġ tekniku mis-CTIE biex jidentifikaw il-ħtiġijiet speċifiċi tagħhom.

Investiment 2: Żvilupp ta’ MyGuichet — Proġett 1/3 — Ħatriet virtwali

L-objettiv ewlieni ta’ dan l-investiment huwa li l-amministrazzjonijiet pubbliċi jkunu jistgħu joffru appuntamenti virtwali u jistabbilixxu aċċess għal funzjonalitajiet differenti permezz ta’ appuntamenti b’vidjokonferenza. Dan għandu jiffranka l-ħin billi jevita l-ivvjaġġar għaċ-ċittadini u n-negozji u għandu jiffaċilita l-proċeduri amministrattivi għall-persuni b’mobilità mnaqqsa. L-awtoritajiet Lussemburgiżi għandhom jużaw l-infrastruttura meħtieġa għall-proċeduri amministrattivi permezz ta’ vidjokonferenza.

Investiment 2: Żvilupp ta’ MyGuichet — Proġett 2/3 — Diversi proċeduri bejn iċ-Ċittadin u l-Gvern (C2G) u min-Negozji għal Gvern (B2G)

L-Investiment 2 għandu l-għan li jintroduċi 12-il servizz online ġdid – allinjati mal-prijoritajiet tar-Regolament dwar il-gateway diġitali uniku – biex jespandi l-offerta diġitali għaċ-ċittadini u n-negozji u jissimplifika l-proċessi amministrattivi differenti. Pereżempju, se jiġi introdott approċċ minn Negozju għal Gvern fir-rigward tat-tnaqqis mit-taxxa tal-impjegati sabiex iċ-ċittadini jkun jista’ jkollhom aċċess għal din l-informazzjoni permezz ta’ MyGuichet. Servizz ieħor li għandu jiġi implimentat huwa l-introduzzjoni ta’ approċċ ta’ Ċittadin għall-Gvern biex jiffaċilita l-applikazzjoni tal-permessi tal-kaċċa permezz tal-MyGuichet.

Investiment 2: Żvilupp ta’ MyGuichet — Proġett 3/3 — App fuq il-mobajl MyGuichet.lu

L-għan ta’ dan l-investiment huwa li jittrasferixxi l-funzjonalitajiet offruti f’MyGuichet.lu għal applikazzjoni mobbli. Din l-applikazzjoni mobbli se tkun disponibbli għall-pubbliku ġenerali u għandha l-għan li ttejjeb l-effettività tal-proċeduri għaċ-ċittadini u n-negozji. L-applikazzjoni għandha tipprovdi aċċess għal funzjonijiet desktop bħal proċeduri mal-amministrazzjoni pubblika, minn mobile personali. Funzjoni oħra li din l-app se tipprovdi hija l-possibbiltà tal-iskennjar tad-dokumenti. Għalhekk, l-ismartphone għandu jkun jista’ jissostitwixxi skanner.

Investiment 3: eADEM

Is-suq tax-xogħol għaddej minn bidliet kbar fil-Lussemburgu. F’dan l-isfond, l-Aġenzija għall-Iżvilupp tal-Impjiegi (ADEM) fil-Lussemburgu trid tadatta biex ikollha l-kapaċità li tirrispondi b’mod effettiv għax-xejriet tat-trasformazzjoni tal-impjiegi li għaddejjin bħalissa. L-objettiv ta’ dan l-investiment huwa li l-ADEM tiġi diġitalizzata billi jiġu aġġornati r-riżorsi tal-IT tagħha, li għandu jżid l-effiċjenza tal-ADEM fit-trattament tal-klijenti u l-benefiċjarji tagħha. Biex jagħmel dan, għandu jiġi impjegat konsulent estern biex jidentifika l-ħtiġijiet tal-Aġenzija kif ukoll biex jiddefinixxi l-funzjonalitajiet meħtieġa, li huma meħtieġa biex tiġi żviluppata l-għodda tal-IT meħtieġa biex jinħoloq l-eADEM.

Din l-għodda l-ġdida għandha tiġġenera riżultati differenti:

·Għandha tiffaċilita u tħaffef ix-xogħol skjerat mill-persunal tal-ADEM billi jżid il-produttività tiegħu f’kuntest ta’ qgħad ogħla minħabba l-pandemija tal-COVID-19.

·Għandha wkoll ittejjeb l-effiċjenza tal-Aġenzija fir-rigward tal-ftuħ ta’ kontijiet personalizzati, l-istruzzjoni, l-eżekuzzjoni u l-kontroll tal-assistenza finanzjarja lill-benefiċjarji permezz tad-diġitalizzazzjoni tal-proċess. Is-sistema tal-IT għandha wkoll tiddiġitalizza l-mekkaniżmi biex tqabbel il-persuni li qed ifittxu impjieg u n-negozji b’pass aktar mgħaġġel.

Il-proġett eADEM għandu jikkontribwixxi għal suq tax-xogħol aktar trasparenti, effiċjenti u reżiljenti.

Investiment 4: Pjattaforma nazzjonali għall-ġestjoni tal-istħarriġ pubbliku

L-investiment 4 għandu jappoġġa l-iżvilupp ta’ pjattaforma nazzjonali għall-ġestjoni ta’ proċeduri ta’ stħarriġ pubbliku, li tikkonsisti minn portal tal-Internet, back-office u assistent MyGuichet.lu. L-għan ta’ dan l-investiment huwa li jiċċentralizza l-pubblikazzjoni ta’ stħarriġ pubbliku, li għandu jissimplifika l-aċċess u l-viżibbiltà tagħhom. Għandu wkoll jissimplifika l-preżentazzjoni ta’ kontribuzzjoni li għandha żżid il-parteċipazzjoni taċ-ċittadini. L-investiment għandu l-għan li jiddiġitalizza l-passi kollha ta’ dawk il-proċessi, filwaqt li soluzzjonijiet fiżiċi għandhom jibqgħu disponibbli.

G.2.    Stadji importanti, miri, indikaturi, u skeda ta’ żmien għall-monitoraġġ u l-implimentazzjoni għal appoġġ finanzjarju li ma jitħallasx lura

H. KOMPONENT 3C: Il-promozzjoni ta’ ekonomija trasparenti u ġusta

Dan il-komponent tal-pjan ta’ rkupru u reżiljenza tal-Lussemburgu fih miżura relatata mal-modernizzazzjoni tat-tassazzjoni korporattiva, jiġifieri liġi li tipprojbixxi t-tnaqqis għal finijiet ta’ taxxa fuq l-introjtu korporattiv ta’ interessi u royalties imħallsa lil impriżi relatati stabbiliti f’ġurisdizzjonijiet inklużi fil-lista tal-UE ta’ ġurisdizzjonijiet li ma jikkooperawx għal finijiet ta’ taxxa.

Bħala kompliment ma’ dik il-miżura, il-komponent jindika li l-Lussemburgu se jwettaq valutazzjoni tal-impatt tal-liġi msemmija hawn fuq, “bil-ħsieb li jinforma d-diskussjoni dwar estensjoni tal-miżura għal ġurisdizzjonijiet terzi għajr dawk inklużi fil-lista tal-UE dwar ġurisdizzjonijiet tat-taxxa li ma jikkooperawx”.

Il-komponent jindika wkoll li l-Lussemburgu ser ikompli jadotta attitudni kostruttiva fid-diskussjonijiet li għaddejjin u li ġejjin dwar il-modernizzazzjoni tas-sistema fiskali tal-UE u dik internazzjonali applikabbli għall-kumpaniji, b’mod partikolari bħala parti mill-Qafas Inklużiv tal-OECD fil-kuntest tal-inizjattivi mħabbra fil-Komunikazzjoni reċenti tal-Kummissjoni “Tassazzjoni tal-Intrapriżi għas-Seklu 21”.

Dan il-komponent fih ukoll miżuri dwar il-ġlieda kontra l-ħasil tal-flus u l-finanzjament tat-terroriżmu, li huma mistennija jikkontribwixxu għar-rakkomandazzjoni speċifika għall-pajjiż biex jiġu żgurati superviżjoni u infurzar effettivi tal-qafas kontra l-ħasil tal-flus fir-rigward ta’ professjonisti li jipprovdu servizzi fiduċjarji u tal-kumpaniji, u servizzi ta’ investiment.

Huwa mistenni li l-ebda miżura f’dan il-komponent ma tagħmel ħsara sinifikanti lill-objettivi ambjentali skont it-tifsira tal-Artikolu 17 tar-Regolament (UE) 2020/852, filwaqt li jitqiesu d-deskrizzjoni tal-miżuri u l-passi ta’ mitigazzjoni stabbiliti fil-pjan għall-irkupru u r-reżiljenza skont il-Gwida Teknika tad-DNSH (2021/C58/01).

H.1.    Deskrizzjoni tar-riformi u l-investimenti għal appoġġ finanzjarju li ma jitħallasx lura

Riforma 1: Modernizzazzjoni tat-tassazzjoni korporattiva

Din ir-riforma tikkonsisti minn miżura leġiżlattiva li tipprojbixxi t-tnaqqis għal finijiet ta’ taxxa fuq l-introjtu korporattiv ta’ interessi u royalties imħallsa lil impriżi relatati stabbiliti f’ġurisdizzjonijiet inklużi fil-lista tal-UE ta’ ġurisdizzjonijiet li ma jikkooperawx għal finijiet ta’ taxxa. Din ir-riforma timplimenta ftehim milħuq fil-Kunsill tal-UE f’Diċembru 2019.

Riforma 2: Il-ġlieda kontra l-ħasil tal-flus u l-finanzjament tat-terroriżmu

Din ir-riforma tikkonsisti f’erba’ sottomiżuri interkonnessi u ssegwi żewġ objettivi ewlenin. L-ewwel nett, li jissaħħaħ il-qafas għall-ġlieda kontra l-ħasil tal-flus (money laundering, ML) u l-finanzjament tat-terroriżmu (terrorist financing (TF), TF) li huwa applikabbli għall-professjonisti li jipprovdu servizzi ta’ fiduċja u ta’ kumpaniji, u servizzi ta’ investiment. It-tieni objettiv jikkonsisti f’identifikazzjoni, valutazzjoni u fehim aħjar tar-riskji ML/TF.

L-ewwel sottomiżura tikkonsisti f’tisħiħ tad-dispożizzjonijiet nazzjonali dwar il-ġlieda kontra ML u TF li huwa applikabbli għal professjonisti li jipprovdu servizzi lil kumpaniji u trusts, u servizzi ta’ investiment. Minbarra t-traspożizzjoni ta’ ċerti dispożizzjonijiet tal-ħames Direttiva dwar il-Ġlieda Kontra l-Ħasil tal-Flus 3 , l-Att tat-25 ta’ Marzu 2020 isaħħaħ u jkompli jarmonizza s-setgħat ta’ superviżjoni u sanzjonar tal-awtoritajiet superviżorji, u tal-korpi awtoregolatorji inkarigati mis-superviżjoni tal-fornituri ta’ servizzi fiduċjarji u tal-kumpaniji u tas-servizzi ta’ investiment fil-qasam tal-ML u tat-TF. Id-Digriet Gran Dukali relatat tal-14 ta’ Awwissu 2020 jiċċara ċerti dispożizzjonijiet applikabbli għall-fornituri tas-servizzi fiduċjarji u tal-kumpaniji.

It-tieni sottomiżura tikkonsisti fl-approfondiment tal-identifikazzjoni, il-valutazzjoni u l-fehim tar-riskji ML/TF, inklużi r-riskji relatati ma’ professjonisti li jipprovdu servizzi lil kumpaniji u trusts, u servizzi ta’ investiment. Għal dan il-għan, il-Valutazzjoni tar-Riskju Nazzjonali ta’ ML/TF imwettqa fl-2018 ġiet aġġornata biex tkompli tikkalibra l-miżuri preventivi u ta’ mitigazzjoni, u l-allokazzjoni mill-Istat, l-awtoritajiet superviżorji, u l-korpi awtoregolatorji ta’ riżorsi għall-ġlieda kontra ML/TF. Barra minn hekk, tnediet Valutazzjoni Vertikali tar-Riskju tal-Finanzjament tat-Terroriżmu biex tapprofondixxi l-fehim tal-ġurisdizzjonijiet li fihom iseħħ it-TF, filwaqt li tiffoka fuq is-setturi meqjusa bħala l-aktar vulnerabbli għat-TF. Fl-aħħar nett, il-Valutazzjoni tar-Riskju Settorjali ta’ Persuni Legali u Arranġamenti Legali, meħtieġa skont il-Kriterju 24.2 tar-rakkomandazzjonijiet tat-Task Force ta’ Azzjoni Finanzjarja, għandha tippermetti l-iżvilupp ta’ miżuri ġodda li jtaffu r-riskji residwi possibbilment identifikati.

Bħala t-tielet sottomiżura, ir-Reġistru tan-Negozju tal-Lussemburgu, bħala l-korp li jamministra r-Reġistru tas-Sidien Benefiċjarji u r-Reġistru tal-Kummerċ u l-Kumpaniji, għandu jgħaddi minn trasformazzjoni estensiva bil-ħsieb li jestendi s-setgħat tiegħu ta’ sanzjonar, kontroll u eżekuttiv, u jiffaċilita l-użu tad-data tiegħu għall-valutazzjoni tar-riskji ML/TF. It-trasformazzjoni se tikkonċerna l-proċeduri, l-organizzazzjoni, u l-kapaċitajiet inklużi l-kapaċitajiet diġitali tar-Reġistru tan-Negozju tal-Lussemburgu sabiex dan tal-aħħar ikun is-sors primarju ta’ data essenzjali dwar l-entitajiet legali għall-utenti kollha kkonċernati.

Fl-aħħar nett, ir-raba’ sottomiżura se tikkonsisti fi studju li jirrevedi s-sistema legali attwali applikabbli għall-fornituri tas-servizzi fiduċjarji u tal-kumpaniji u, infurmat minn dan l-istudju, il-preżentazzjoni ta’ liġi li tikkonsolida dan il-qafas li għandha tidħol fis-seħħ sa Settembru 2023. Il-liġi hija mistennija tirrevedi r-reġim ta’ superviżjoni attwali, ittejjeb il-ġbir ċentralizzat tad-data tal-attivitajiet imwettqa mill-fornituri tas-servizzi, u tiċċara l-mekkaniżmi ta’ sanzjonijiet applikabbli.

H.2.    Stadji importanti, miri, indikaturi, u skeda ta’ żmien għall-monitoraġġ u l-implimentazzjoni għal appoġġ finanzjarju li ma jitħallasx lura

I. AWDITU U KONTROLL

I.1.    Deskrizzjoni tar-riformi u l-investimenti għal appoġġ finanzjarju li ma jitħallasx lura

Sistema repożitorja għar-reġistrazzjoni u l-ħażna tad-data rilevanti kollha relatata mal-implimentazzjoni tal-pjan għall-irkupru u r-reżiljenza — il-kisba tal-istadji importanti u l-miri, id-data dwar ir-riċevitur finali, il-kuntratturi, is-sottokuntratturi u s-sidien benefiċjarji — għandha tkun operattiva qabel ma tiġi ppreżentata l-ewwel talba għall-pagament. Qabel l-ewwel talba għal pagament, il-Lussemburgu għandu jippreżenta wkoll rapport tal-awditjar iddedikat li jikkonferma l-effettività tal-funzjonalitajiet minimi tas-sistema repożitorja.

B’żieda ma’ dan, qabel ma tiġi ppreżentata l-ewwel talba ta’ pagament, il-Lussemburgu għandu jiffinalizza l-implimentazzjoni ta’ proċeduri ulterjuri għall-protezzjoni tal-interessi finanzjarji tal-UE kif ippreżentati fil-Parti III, il-Kapitolu 4 dwar l-Implimentazzjoni, is-sottokapitolu x u l-Kapitolu 6 dwar l-Awditjar u l-Kontrolli subkapitolu xi tal-Pjan. Id-dikjarazzjoni ta’ ġestjoni u s-sommarju tal-awditi li jakkumpanjaw it-talba għal pagament għandhom jikkonfermaw l-istatus tagħhom ta’ implimentazzjoni u jidentifikaw kwalunkwe dgħufija relatata misjuba u azzjonijiet korrettivi meħuda jew ippjanati.

I.2.    Stadji importanti, miri, indikaturi, u skeda ta’ żmien għall-monitoraġġ u l-implimentazzjoni għal appoġġ finanzjarju li ma jitħallasx lura

2.Spiża totali stmata tal-pjan għall-irkupru u r-reżiljenza

L-ispiża totali stmata tal-pjan għall-irkupru u r-reżiljenza tal-Lussemburgu hija ta’ EUR 93 354 077.

TAQSIMA 2: APPOĠĠ FINANZJARJU

1.Kontribuzzjoni finanzjarja

1.1.L-Ewwel Parti (appoġġ mhux pagabbli):

1.2.It-Tieni Parti (appoġġ mhux pagabbli):

1.3.It-Tielet Parti (appoġġ mhux pagabbli):

1.4.Ir-Raba’ Parti (appoġġ mhux pagabbli):

1.5.Il-Ħames Parti (appoġġ mhux pagabbli):

TAQSIMA 3: ARRANĠAMENTI ADDIZZJONALI

1.Arranġamenti għall-monitoraġġ u l-implimentazzjoni tal-pjan għall-irkupru u r-reżiljenza

Il-monitoraġġ u l-implimentazzjoni tal-pjan għall-irkupru u r-reżiljenza tal-Lussemburgu għandhom isiru skont l-arranġamenti li ġejjin.

Id-Direttorat għall-Affarijiet Ekonomiċi u Baġitarji fil-Ministeru tal-Finanzi għandu jkollu r-responsabbiltà ġenerali għall-implimentazzjoni tal-pjan u jaġixxi bħala dipartiment maniġerjali u punt uniku ta’ kuntatt għall-Kummissjoni. Dan is-servizz għandu jkun responsabbli wkoll għat-tfassil tat-talbiet għall-ħlas u d-dikjarazzjonijiet ta’ ġestjoni u għandu jikkoordina u jimmonitorja l-implimentazzjoni tal-pjan. Hija għandha tiġbor ukoll id-data dwar l-indikaturi kif ippreżentati mir-riċeventi finali, u twettaq il-verifiki ta’ ġestjoni.

Id-dipartiment ta’ ġestjoni għandu jkun responsabbli għall-aggregazzjoni tal-informazzjoni kollha relatata mal-indikaturi li għalihom għandu jwettaq ukoll verifika tal-konsistenza u, b’mod aktar ġenerali, kontroll tal-kwalità. Id-dipartiment ta’ ġestjoni għandu jkun responsabbli wkoll għall-komunikazzjoni u l-użu ta’ din id-data ta’ monitoraġġ, kemm fil-kumitati ta’ koordinazzjoni kif ukoll fir-rapport annwali ta’ implimentazzjoni.

Id-dipartiment maniġerjali għandu jwettaq kontrolli (anki fuq il-post) fuq l-aspetti amministrattivi, finanzjarji, tekniċi u fiżiċi tal-operazzjonijiet, fl-istadji kollha tal-ġestjoni ta’ miżura inkluża fil-pjan għall-irkupru u r-reżiljenza. Tali kontrolli għandhom jitwettqu meta jiġu eżaminati l-iskedi ta’ finanzjament, matul l-implimentazzjoni u l-monitoraġġ tal-miżuri, meta l-applikazzjonijiet għar-rimborż ta’ għotjiet lir-riċevituri finali jiġu ppreżentati u meta l-pagamenti jsiru lir-riċeventi finali.

Barra minn hekk, għandhom jiġu implimentati miżuri speċifiċi biex tiġi vverifikata l-konformità mar-regoli relatati mal-akkwist pubbliku, biex tiġi evitata l-korruzzjoni, u biex jiġu protetti l-interessi finanzjarji tal-UE.

L-Ispettorat Ġenerali tal-Finanzi (IGF) għandu jkun l-awtorità tal-awditjar għall-pjan għall-irkupru u r-reżiljenza.

L-awtorità tal-awditjar għandha ssegwi approċċ tal-awditjar ibbażat fuq il-prinċipji li ġejjin: awditu annwali tas-sistema (li jkopri s-sistema fis-seħħ għar-rappurtar tal-istadji importanti u l-miri u li jkopri wkoll is-sistema ta’ kontroll intern għall-prevenzjoni, l-identifikazzjoni u l-korrezzjoni tal-frodi, il-kunflitt ta’ interess, il-korruzzjoni u l-finanzjament doppju) u l-awditi annwali tal-operazzjonijiet (fuq il-bażi ta’ kampjun adegwat).

Id-data relatata mar-riċevituri finali għandha tinġabar hekk kif dawn jidħlu fl-operazzjoni, li ssir jew billi tiddaħħal id-data direttament mid-dipartiment maniġerjali jew billi tiġi importata data permezz ta’ fajl Excel importat. Id-data miġbura b’dan il-mod għandha mbagħad tiddaħħal jew direttament fis-sistema ta’ informazzjoni jew tiġi importata permezz ta’ fajls.

2.Arranġamenti għall-forniment ta’ aċċess sħiħ mill-Kummissjoni għad-data sottostanti

Id-Direttorat għall-Affarijiet Ekonomiċi u Baġitarji fi ħdan il-Ministeru tal-Finanzi huwa l-korp ċentrali ta’ koordinazzjoni għall-pjan ta’ rkupru u reżiljenza tal-Lussemburgu u l-implimentazzjoni tiegħu, huwa responsabbli għall-koordinazzjoni u l-monitoraġġ ġenerali tal-pjan. B’mod partikolari, jaġixxi bħala korp ta’ koordinazzjoni għall-monitoraġġ tal-progress dwar l-istadji importanti u l-miri, għall-monitoraġġ u, fejn xieraq, għall-implimentazzjoni ta’ attivitajiet ta’ kontroll u bħala punt uniku ta’ kuntatt għall-Kummissjoni. Dan is-servizz għandu jkun responsabbli wkoll għat-tfassil tat-talbiet għal ħlas u d-dikjarazzjonijiet ta’ ġestjoni. Hija għandha tikkoordina r-rappurtar tal-istadji importanti u l-miri, l-indikaturi rilevanti, iżda wkoll informazzjoni finanzjarja kwalitattiva u data oħra, bħad-data dwar l-indikaturi kif sottomessi mir-riċevituri finali permezz ta’ sistema tal-IT dedikata, u twettaq il-verifiki ta’ ġestjoni. L-Ispettorat Ġenerali tal-Finanzi (IGF) għandu jkun l-awtorità tal-awditjar għall-pjan għall-irkupru u r-reżiljenza.

F’konformità mal-Artikolu 24(2) tar-Regolament (UE) 2021/241, malli jitlestew l-istadji importanti u l-miri rilevanti maqbula fit-Taqsima 2.1 ta’ dan l-Anness, il-Lussemburgu għandu jippreżenta talba debitament ġustifikata għall-ħlas tal-kontribuzzjoni finanzjarja lill-Kummissjoni. Il-Lussemburgu għandu jiżgura li, b’talba, il-Kummissjoni jkollha aċċess sħiħ għad-data sottostanti rilevanti li tappoġġa l-ġustifikazzjoni dovuta tat-talba għal pagament, kemm għall-valutazzjoni tat-talba għal pagament skont l-Artikolu 24(3) tar-Regolament (UE) 2021/241 kif ukoll għal finijiet ta’ awditjar u kontroll.

(1) Sors: L-Aġenzija Ewropea għall-Ambjent, viewer tad-data dwar il-gassijiet serra

(2)

Id-Direttiva (UE) 2019/1161 tal-Parlament Ewropew u tal-Kunsill tal-20 ta’ Ġunju 2019 li temenda d-Direttiva 2009/33/KE dwar il-promozzjoni ta’ vetturi ta’ trasport fuq it-triq nodfa u effiċjenti fl-użu tal-enerġija. ĠU L 188, 12.7.2019, p. 116–130

(3) Id-Direttiva (UE) 2018/843 tal-Parlament Ewropew u tal-Kunsill tat-30 ta’ Mejju 2018 li temenda d-Direttiva (UE) 2015/849 dwar il-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu, u li temenda d-Direttivi 2009/138/KE u 2013/36/UE, ĠU L 156, 19.6.2018, p. 43-74.