This document is an excerpt from the EUR-Lex website
Document 52020PC0769
Proposal for a COUNCIL DECISION on the conclusion, on behalf of the European Union, of the Protocol amending the Agreement on the international occasional carriage of passengers by coach and bus (Interbus Agreement) by extending the possibility of accession to the Kingdom of Morocco
Proposta għal DEĊIŻJONI TAL-KUNSILL dwar il-konklużjoni, f’isem l-Unjoni Ewropea, tal-Protokoll li jemenda l-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) billi tiġi estiża l-possibbiltà ta’ adeżjoni għar-Renju tal-Marokk
Proposta għal DEĊIŻJONI TAL-KUNSILL dwar il-konklużjoni, f’isem l-Unjoni Ewropea, tal-Protokoll li jemenda l-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) billi tiġi estiża l-possibbiltà ta’ adeżjoni għar-Renju tal-Marokk
COM/2020/769 final
IL-KUMMISSJONI EWROPEA
Brussell, 30.11.2020
COM(2020) 769 final
2020/0341(NLE)
Proposta għal
DEĊIŻJONI TAL-KUNSILL
dwar il-konklużjoni, f’isem l-Unjoni Ewropea, tal-Protokoll li jemenda l-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) billi tiġi estiża l-possibbiltà ta’ adeżjoni għar-Renju tal-Marokk
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
F’konformità mad-Deċiżjoni tal-Kunsill (UE) 2020/[ŻID numru ta’ REFERENZA] ( 1 ), il-Protokoll li jemenda l-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) billi tiġi estiża l-possibbiltà ta’ adeżjoni għar-Renju tal-Marokk ġie ffirmat mill-Unjoni fi […2020], soġġett għall-konklużjoni tiegħu f’data aktar tard.
Il-kamp ta’ applikazzjoni ġeografiku tal-Ftehim Interbus huwa ristrett għall-pajjiżi membri tal-Konferenza Ewropea tal-Ministri tat-Trasport (ECMT) u għal dawk il-pajjiżi msemmija fl-Artikolu 30(2) tal-Ftehim Interbus. Minbarra l-Unjoni Ewropea, ir-Repubblika tal-Albanija, il-Prinċipat ta’ Andorra, il-Bożnija-Ħerzegovina, ir-Repubblika tal-Moldova, il-Montenegro, ir-Repubblika tal-Maċedonja ta’ Fuq, ir-Repubblika tat-Turkija u l-Ukrajna bħalissa huma Partijiet Kontraenti għall-Ftehim.
Il-Ftehim Interbus huwa miftuħ għall-adeżjoni ta’ pajjiżi li huma membri sħaħ tal-ECMT.
Ir-Renju tal-Marokk mhuwiex membru sħiħ iżda għandu status ta’ osservatur fl-ECMT.
Jenħtieġ li l-Ftehim Interbus jipprovdi bażi ġuridika ċara għall-adeżjoni tar-Renju tal-Marokk.
Il-Protokoll iżid ir-Renju tal-Marokk mal-lista tal-pajjiżi msemmija fl-Artikolu 30(2) li jistgħu jaderixxu mal-Ftehim Interbus. L-Artikolu 30(2) diġà jelenka r-Repubblika ta’ San Marino, il-Prinċipat ta’ Andorra u l-Prinċipat ta’ Monaco.
L-adeżjoni possibbli tar-Renju tal-Marokk ( 2 ) mal-Ftehim Interbus se tikkontribwixxi għal aktar żvilupp fir-relazzjonijiet internazzjonali tat-trasport tal-passiġġieri, fit-turiżmu u fl-iskambju kulturali lil hinn minn dawk il-pajjiżi li bħalissa huma Partijiet għall-Ftehim Interbus u se tiffaċilita l-organizzazzjoni tagħhom.
Tabilħaqq jenħtieġ li jitfakkar li t-trasport internazzjonali tal-passiġġieri bil-kowċ u bix-xarabank huwa settur importanti li jipprovdi l-mobbiltà liċ-ċittadini Ewropej bi struttura tal-prezzijiet affordabbli. L-iżvilupp ulterjuri tiegħu lil hinn mill-UE jkun ta’ benefiċċju kemm għaċ-ċittadini tal-UE, għat-turisti barranin, għall-industrija tat-turiżmu kif ukoll għar-reġjuni Ewropej.
Jenħtieġ li tiġi offruta l-possibbiltà ta’ aċċess għas-suq lir-Renju tal-Marokk abbażi tad-dispożizzjonijiet tal-Ftehim Interbus, soġġetta għall-implimentazzjoni tal-acquis tal-UE fil-qasam tat-trasport tal-passiġġieri bit-triq, inkluż is-sikurezza fit-toroq, id-dispożizzjonijiet tekniċi, il-kwalifiki tas-sewwieqa, ir-regoli soċjali, id-drittijiet tal-passiġġieri, l-ambjent u l-ammissjoni għall-impjieg.
Sabiex jiġu evitati l-kwistjonijiet ta’ governanza, jenħtieġ li l-Partijiet Kontraenti kollha għall-Ftehim Interbus jiffirmaw u japprovaw jew jirratifikaw il-Protokoll dwar ir-Renju tal-Marokk qabel il-pajjiż ikun jista’ jissieħeb.
Sabiex il-Partijiet Kontraenti għall-Ftehim Interbus jitħallew jiffirmaw u jikkonkludu l-Protokoll, huwa xieraq li l-Protokoll ma jkunx jipprevedi perjodu speċifiku li matulu dan ikun miftuħ għall-iffirmar.
Id-dħul fis-seħħ tal-Protokoll huwa l-ewwel jum tax-xahar wara dak meta l-Partijiet Kontraenti għall-Interbus kollha jkunu ffirmawh u approvawh jew irratifikawh.
Waħda mill-Partijiet Kontraenti biddlet isimha għar-Repubblika tal-Maċedonja ta’ Fuq, u jenħtieġ li dan jiġi rifless fil-Protokoll.
Il-Protokoll issa jindika wkoll li l-Prinċipat ta’ Andorra sar Parti Kontraenti għall-Ftehim Interbus.
•Konsistenza mad-dispożizzjonijiet eżistenti fil-qasam ta’ politika
Il-Protokoll huwa konformi mal-politika tal-UE tat-trasport bit-triq u jikkumplementaha. Jappoġġja l-aċċess ta’ pajjiżi ġirien tal-UE għas-suq tat-trasport tal-passiġġieri tal-UE (u viċi-versa) u joħloq qafas regolatorju għall-organizzazzjoni tat-turiżmu transfruntier fiż-żewġ direzzjonijiet.
•Konsistenza ma’ politiki oħra tal-Unjoni
Il-proposta hija konsistenti mal-politika tal-viċinat u tar-relazzjonijiet esterni tal-UE.
2.RIŻULTATI TAL-KONSULTAZZJONIJIET MAL-PARTIJIET INTERESSATI U VALUTAZZJONIJIET TAL-IMPATT
•Ġbir u użu tal-għarfien espert u valutazzjoni tal-impatt
L-impatti globali mistennija huma pożittivi: il-ftuħ tal-Ftehim Interbus għal pajjiż ieħor joffri opportunitajiet ġodda kemm lill-Partijiet Kontraenti eżistenti kif ukoll lir-Renju tal-Marokk. Peress li jgħin biex jestendi l-acquis tal-UE fil-qasam tat-trasport tal-passiġġieri lil dak il-pajjiż, se jkollu impatti pożittivi fuq il-kundizzjonijiet tekniċi, ekonomiċi u soċjali li skonthom jitwettqu l-operazzjonijiet rilevanti. L-impatt ambjentali globali se jkun limitat.
S’issa, l-operaturi jistgħu jkunu SMEs bi flotta iżgħar ta’ kowċis jew xarabankijiet jew kumpaniji akbar bi flotot akbar.
•Simplifikazzjoni
It-twessigħ tal-kamp ta’ applikazzjoni ġeografiku tar-regoli applikabbli għal operazzjonijiet ta’ trasport okkażjonali ta’ passiġġieri bil-kowċ u bix-xarabank skont il-Ftehim Interbus se jikkontribwixxi għas-simplifikazzjoni tat-twettiq ta’ operazzjonijiet bħal dawn ma’ pajjiż terz ieħor.
3.ELEMENTI ĠURIDIĊI TAL-PROPOSTA
Bażi Ġuridika
Il-bażi ġuridika hija t-Trattat dwar il-Funzjonament tal-Unjoni Ewropea (TFUE), u b’mod partikolari l-bażi ġuridika sostantiva, l-Artikolu 91 tat-TFUE, flimkien mal-Artikolu 218(6)(a) tat-TFUE.
•Għażla tal-istrument
L-Artikolu 218(6)(a) tat-TFUE jipprevedi Deċiżjoni tal-Kunsill bħala l-istrument applikabbli.
4.IMPLIKAZZJONIJIET BAĠITARJI
L-ebda.
5.ELEMENTI FAKULTATTIVI
•Arranġamenti ta’ monitoraġġ, ta’ evalwazzjoni u ta’ rapportar
It-tħaddim tal-Ftehim Interbus se jiġi evalwat kull ħames snin mill-Kumitat Konġunt stabbilit fl-Artikolu 23 tal-Ftehim.
Proċedura ulterjuri
Il-Kummissjoni tqis li jenħtieġ li l-proċedura tingħata bidu bil-għan li l-Protokoll jiġi konkluż. B’konsegwenza ta’ dan, il-Kummissjoni qiegħda tressaq din il-Proposta lill-Kunsill għal Deċiżjoni tal-Kunsill dwar il-konklużjoni, f’isem l-Unjoni, tal-Protokoll li jemenda l-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) billi tiġi estiża l-possibbiltà ta’ adeżjoni għar-Renju tal-Marokk.
•Spjegazzjoni fid-dettall tad-dispożizzjonijiet speċifiċi tal-proposta
Dispożizzjonijiet speċifiċi tad-Deċiżjoni tal-Kunsill proposta:
·L-Artikolu 1 tad-Deċiżjoni tal-Kunsill jipprevedi l-konklużjoni, f’isem l-Unjoni, tal-Protokoll li jemenda l-Ftehim Interbus billi tiġi estiża l-possibbiltà ta’ adeżjoni għar-Renju tal-Marokk.
·L-Artikolu 2 jikkonċerna s-setgħat għall-konklużjoni tal-Protokoll.
·L-Artikolu 3 jipprevedi d-dħul fis-seħħ tad-Deċiżjoni tal-Kunsill.
Dispożizzjonijiet speċifiċi tal-Protokoll:
·L-Artikolu 1 jipprevedi emenda għall-Ftehim Interbus dwar it-trasport okkażjonali internazzjonali ta’ passiġġieri bil-kowċ u bix-xarabank billi jagħti lir-Renju tal-Marokk l-għażla li jaderixxi mal-Ftehim.
·L-Artikoli 2 sa 6 ikopru l-proċeduri amministrattivi biex il-Protokoll jidħol fis-seħħ, jipprevedu li l-Partijiet Kontraenti kollha għandhom jiffirmaw il-Protokoll u jaderixxu miegħu jew jirratifikawh qabel dan jidħol fis-seħħ u, b’hekk, ir-Renju tal-Marokk ikun jista’ jissieħeb fil-Ftehim, u jinkludu dispożizzjonijiet dwar ir-reġim lingwistiku.
·L-Artikolu 7 jipprevedi li dan il-Protokoll jissostitwixxi l-Protokoll dwar ir-Renju tal-Marokk li kien miftuħ għall-iffirmar bejn is-16 ta’ Lulju 2018 u s-16 ta’ April 2019.
2020/0341 (NLE)
Proposta għal
DEĊIŻJONI TAL-KUNSILL
dwar il-konklużjoni, f’isem l-Unjoni Ewropea, tal-Protokoll li jemenda l-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) billi tiġi estiża l-possibbiltà ta’ adeżjoni għar-Renju tal-Marokk
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 91 flimkien mal-Artikolu 218(6)(a) tiegħu,
Wara li kkunsidra l-proposta mill-Kummissjoni Ewropea,
Wara li kkunsidra l-kunsens tal-Parlament Ewropew,
Billi:
(1)F’konformità mad-Deċiżjoni tal-Kunsill (UE) Nru 2020/[ŻID numru ta’ REFERENZA] 3 , il-Protokoll li jemenda l-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) billi tiġi estiża l-possibbiltà ta’ adeżjoni għar-Renju tal-Marokk (“il-Protokoll”) ġie ffirmat mill-Unjoni fi [data] 2020, soġġett għall-konklużjoni tiegħu f’data aktar tard.
(2)Sabiex jiġu evitati l-kwistjonijiet ta’ governanza, il-Partijiet Kontraenti kollha għall-Ftehim Interbus ikollhom jiffirmaw u japprovaw jew jirratifikaw il-Protokoll dwar ir-Renju tal-Marokk qabel il-Protokoll jidħol fis-seħħ u dan il-pajjiż ikun jista’ jissieħeb. Ma hemm l-ebda perjodu speċifiku li matulu l-Protokoll se jkun miftuħ għall-iffirmar. Il-Protokoll jidħol fis-seħħ fl-ewwel jum tax-xahar wara r-ratifika mill-Partijiet Kontraenti kollha.
(3)Barra minn hekk, il-Protokoll iqis il-bidla fl-isem ta’ Parti Kontraenti, dak tal-Maċedonja ta’ Fuq. Il-Protokoll issa jirreferi wkoll għall-Prinċipat ta’ Andorra li sar Parti Kontraenti għall-Ftehim Interbus.
(4)Għal raġunijiet ta’ ċarezza u sabiex jiġu ffaċilitati l-iffirmar u d-dħul fis-seħħ tal-Protokoll, tqies li huwa xieraq li jitħejja Protokoll ġdid dwar ir-Renju tal-Marokk li jissostitwixxi l-Protokoll dwar ir-Renju tal-Marokk li kien miftuħ għall-iffirmar bejn is-16 ta’ Lulju 2018 u s-16 ta’ April 2019.
(5)Huwa mistenni li l-adeżjoni possibbli tar-Renju tal-Marokk mal-Ftehim Interbus tikkontribwixxi għall-iżvilupp fir-relazzjonijiet internazzjonali tat-trasport tal-passiġġieri, fit-turiżmu u fl-iskambju kulturali lil hinn minn dawk il-pajjiżi li bħalissa huma Partijiet għall-Ftehim Interbus. Huwa mistenni wkoll li adeżjoni possibbli tar-Renju tal-Marokk mal-Ftehim Interbus tgħin fl-estensjoni tal-acquis tal-Unjoni fil-qasam tat-trasport tal-passiġġieri għal dan il-pajjiż. Dan mistenni jkollu impatt pożittiv fuq il-kundizzjonijiet tekniċi, ekonomiċi u soċjali li skonthom jitwettqu l-operazzjonijiet relevanti. Għalhekk, jenħtieġ li r-Renju tal-Marokk, li għandu status ta’ osservatur fil-Konferenza Ewropea tal-Ministri tat-Trasport, jingħata l-opportunità li jaderixxi mal-Ftehim Interbus.
(6)Għalhekk, il-Protokoll jenħtieġ li jiġi approvat f’isem l-Unjoni,
ADOTTA DIN ID-DEĊIŻJONI:
Artikolu 1
Il-Protokoll li jemenda l-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) billi tiġi estiża l-possibbiltà ta’ adeżjoni għar-Renju tal-Marokk qiegħed jiġi approvat f’isem l-Unjoni.
It-test tal-Protokoll huwa mehmuż ma’ din id-Deċiżjoni.
Artikolu 2
Il-President tal-Kunsill għandu jaħtar lill-persuna li jkollha s-setgħa li tipproċedi, f’isem l-Unjoni Ewropea, biex tiddepożita l-istrument tal-approvazzjoni previst fl-Artikolu 3 tal-Protokoll, sabiex jesprimi l-kunsens tal-Unjoni Ewropea li tkun marbuta bil-Protokoll.
Artikolu 3
Din id-Deċiżjoni għandha tidħol fis-seħħ fil-jum tal-adozzjoni tagħha 4 .
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 30.11.2020
COM(2020) 769 final
ANNESS
tal-Proposta għal
DEĊIŻJONI TAL-KUNSILL
dwar il-konklużjoni, f’isem l-Unjoni Ewropea, tal-Protokoll li jemenda l-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) billi tiġi estiża l-possibbiltà ta’ adeżjoni għar-Renju tal-Marokk
PROTOKOLL
LI JEMENDA L-FTEHIM DWAR IT-TRASPORT OKKAŻJONALI INTERNAZZJONALI TA’ PASSIĠĠIERI BIL-KOWĊ U BIX-XARABANK (IL-FTEHIM INTERBUS) BILLI TIĠI ESTIŻA L-POSSIBBILTÀ TA’ ADEŻJONI GĦAR-RENJU TAL-MAROKK
IL-PARTIJIET KONTRAENTI,
WARA LI KKUNSIDRAW il-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) 1 u d-dħul fis-seħħ tiegħu fl-1 ta’ Jannar 2003 2 ,
WARA LI KKUNSIDRAW ix-xewqa li jkomplu jiżviluppaw ir-relazzjonijiet internazzjonali tat-trasport tal-passiġġieri, it-turiżmu u l-iskambju kulturali lil hinn minn dawk il-pajjiżi li bħalissa huma eliġibbli għall-adeżjoni,
WAQT LI JIXTIEQU jiftħu l-Ftehim Interbus għall-adeżjoni tar-Renju tal-Marokk,
WAQT LI JIKKUNSIDRAW li l-Protokoll li jemenda l-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) billi tiġi estiża l-possibbiltà ta’ adeżjoni għar-Renju tal-Marokk (“il-Protokoll dwar ir-Renju tal-Marokk”) kien miftuħ għall-iffirmar fi Brussell bejn is-16 ta’ Lulju 2018 u s-16 ta’ April 2019,
WAQT LI JIRRIKONOXXU li matul il-perjodu ta’ hawn fuq, mhux il-Partijiet Kontraenti kollha ffirmaw il-Protokoll dwar ir-Renju tal-Marokk,
WAQT LI JIXTIEQU jippermettu li l-Partijiet Kontraenti kollha jkunu jistgħu jiffirmaw il-Protokoll,
WAQT LI JIKKUNSIDRAW li jkun aktar xieraq għall-Protokoll dwar ir-Renju tal-Marokk li jidħol fis-seħħ ladarba l-Partijiet Kontraenti kollha għall-Ftehim Interbus jkunu rratifikaw il-Protokoll,
Billi:
(1)Il-Ftehim Interbus huwa miftuħ biss għall-adeżjoni tal-membri tal-Konferenza Ewropea tal-Ministri tat-Trasport (ECMT) u għal ċerti pajjiżi Ewropej oħra kif stabbilit f’dan il-Ftehim.
(2)Ir-Renju tal-Marokk, filwaqt li għandu status ta’ osservatur fl-ECMT, mhuwiex membru u lanqas ma huwa intitolat jaderixxi mal-Ftehim Interbus f’dan l-istadju.
(3)Biex jinfetaħ il-Ftehim Interbus għall-adeżjoni tar-Renju tal-Marokk, jenħtieġ li l-Ftehim Interbus jiġi emendat,
IDDEĊIDEW li jemendaw il-Ftehim Interbus kif xieraq, u
FTIEHMU KIF ĠEJ:
Artikolu 1
Fl-Artikolu 30 tal-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus), il-paragrafu 2 huwa sostitwit b’dan li ġej:
“Dan il-Ftehim għandu wkoll ikun miftuħ għall-adeżjoni tar-Repubblika ta’ San Marino, tal-Prinċipat ta’ Andorra, tal-Prinċipat ta’ Monaco u tar-Renju tal-Marokk.”.
DISPOŻIZZJONIJIET ĠENERALI U FINALI
Artikolu 2
Dan il-Protokoll għandu jkun miftuħ għall-iffirmar mill-Partijiet Kontraenti għall-Ftehim Interbus fis-Segretarjat Ġenerali tal-Kunsill tal-Unjoni Ewropea, li għandu jaġixxi bħala d-Depożitarju tal-Protokoll.
Artikolu 3
Dan il-Protokoll għandu jiġi ffirmat, approvat jew irratifikat mill-firmatarji f’konformità mal-proċeduri tagħhom stess. L-istrumenti ta’ approvazzjoni jew ta’ ratifika għandhom jiġu ddepożitati mad-Depożitarju tal-Protokoll, li għandu jinnotifika lill-Partijiet Kontraenti l-oħra kollha.
Artikolu 4
Dan il-Protokoll għandu jidħol fis-seħħ fl-ewwel jum tax-xahar wara dak li fih il-Partijiet Kontraenti kollha jkunu ddepożitaw l-istrumenti ta’ approvazzjoni jew ta’ ratifika tagħhom mas-Segretarjat Ġenerali tal-Kunsill tal-Unjoni Ewropea.
Artikolu 5
Dan il-Protokoll, imfassal bil-lingwa Ingliża, Franċiża u Ġermaniża, b’kull wieħed minn dawn it-testi jkun ugwalment awtentiku, għandu jiġi ddepożitat mad-Depożitarju, li għandu jittrażmetti kopja vera attestata lil kull waħda mill-Partijiet Kontraenti.
Artikolu 6
Kull Parti Kontraenti għandha tiżgura traduzzjoni tajba ta’ dan il-Protokoll bil-lingwa(i) uffiċjali tagħha minbarra l-lingwi awtentiċi msemmija fl-Artikolu 5. Kopja ta’ kull waħda minn dawn it-traduzzjonijiet għandha tiġi ddepożitata mad-Depożitarju li għandu jittrażmetti kopja ta’ dawn it-traduzzjonijiet kollha lil kull waħda mill-Partijiet Kontraenti.
Artikolu 7
Dan il-Protokoll jissostitwixxi l-Protokoll tal-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (il-Ftehim Interbus) billi tiġi estiża l-possibbiltà ta’ adeżjoni għar-Renju tal-Marokk, li kien miftuħ għall-iffirmar bejn is-16 ta’ Lulju 2018 u s-16 ta’ April 2019. Il-Protokoll preċedenti ma għandu jibqa' jkollu ebda valur ġuridiku.
Magħmul fi Brussell,
B’XHIEDA TA’ DAN, il-plenipotenzjarji sottoskritti ffirmaw dan il-Protokoll.
Miftuħ għall-iffirmar fi Brussell.
Għall-Unjoni Ewropea
Għar-Repubblika tal-Albanija
Għall-Prinċipat ta’ Andorra
Għall-Bożnija-Ħerzegovina
Għar-Repubblika tal-Moldova
Għall-Montenegro
Għar-Repubblika tal-Maċedonja ta’ Fuq
Għar-Repubblika tat-Turkija
Għall-Ukrajna
