This document is an excerpt from the EUR-Lex website
Document 52019PC0248
Recommendation for a COUNCIL DECISION to authorise the Commission to open negotiations on behalf of the European Union for the conclusion of a Sustainable Fisheries Partnership Agreement and protocol with the Islamic Republic of Mauritania
Rakkomandazzjoni għal DEĊIŻJONI TAL-KUNSILL li tawtorizza lill-Kummissjoni tiftaħ negozjati, f’isem l-Unjoni Ewropea, biex jiġu konklużi Ftehim ta’ Sħubija dwar is-Sajd Sostenibbli u Protokoll mar-Repubblika Iżlamika tal-Mauritania
Rakkomandazzjoni għal DEĊIŻJONI TAL-KUNSILL li tawtorizza lill-Kummissjoni tiftaħ negozjati, f’isem l-Unjoni Ewropea, biex jiġu konklużi Ftehim ta’ Sħubija dwar is-Sajd Sostenibbli u Protokoll mar-Repubblika Iżlamika tal-Mauritania
COM/2019/248 final
IL-KUMMISSJONI EWROPEA
Brussell, 4.6.2019
COM(2019) 248 final
Rakkomandazzjoni għal
DEĊIŻJONI TAL-KUNSILL
li tawtorizza lill-Kummissjoni tiftaħ negozjati, f’isem l-Unjoni Ewropea, biex jiġu konklużi Ftehim ta’ Sħubija dwar is-Sajd Sostenibbli u Protokoll mar-Repubblika Iżlamika tal-Mauritania
{SWD(2019) 195 final} - {SWD(2019) 196 final}
MEMORANDUM TA’ SPJEGAZZJONI
1.KUNTEST TAR-RAKKOMANDAZZJONI
•Raġunijiet u għanijiet tal-proposta
Il-Kummissjoni qed tipproponi li tinnegozja Ftehim ġdid ta’ Sħubija dwar is-Sajd Sostenibbli u Protokoll ġdid mar-Repubblika Iżlamika tal-Mauritania li t-tnejn li huma jkunu jissodisfaw il-bżonnijiet tal-flotta tal-Unjoni u jkunu konformi mar-Regolament (UE) Nru 1380/2013 dwar il-Politika Komuni tas-Sajd (il-PKS) u mal-Konklużjonijiet tal-Kunsill tad-19 ta’ Marzu 2012 dwar Komunikazzjoni tal-Kummissjoni dwar id-Dimensjoni Esterna tal-Politika Komuni tas-Sajd.
•Konsistenza mad-dispożizzjonijiet eżistenti fil-qasam ta’ politika
Il-Ftehim attwali ta’ Sħubija dwar is-Sajd bejn l-Unjoni Ewropea u l-Mauritania 1 ġie ffirmat fl-4 ta’ Awwissu 2008 2 . Din ir-Rakkomandazzjoni tipproponi li jiġi nnegozjat Ftehim ġdid ta’ Sħubija dwar is-Sajd Sostenibbli sabiex jiddaħħlu fih ċerti dispożizzjonijiet tar-Regolament (UE) Nru 1380/2013 3 li l-Ftehim attwali ta’ Sħubija dwar is-Sajd ma jkoprihomx. Il-Protokoll attwali ta’ erba’ snin tal-Ftehim ta’ Sħubija dwar is-Sajd 4 daħal fis-seħħ fis-16 ta’ Novembru 2015 5 u se jiskadi fil-15 ta’ Novembru 2019. Dan il-Protokoll ġie emendat bid-Deċiżjoni tal-Kummissjoni (UE) 2017/451 6 u bid-Deċiżjoni tal-Kummissjoni (UE) 2017/1373 7 . Huwa jistabbilixxi l-opportunitajiet tas-sajd tal-flotta tal-Unjoni u l-kontribuzzjonijiet finanzjarji korrispondenti li l-Unjoni u s-sidien tal-bastimenti jridu jħallsu.
Il-kontribuzzjoni finanzjarja pubblika annwali li l-UE għandha tagħti lill-Mauritania hija ta’ EUR 61 625 000 8 — minn dan l-ammont, EUR 4 125 000 huma allokati għall-appoġġ settorjali.
Il-Ftehim ta’ Sħubija dwar is-Sajd mal-Mauritania jipprevedi opportunitajiet tas-sajd għas-sajd għall-ispeċijiet tal-ħut tal-qiegħ u tal-ħut pelaġiku, kif ukoll għas-sajd għat-tonn u għall-ispeċijiet tal-ħut li jpassi ħafna għall-bastimenti tal-UE minn għaxar Stati Membri (li huma l-Ġermanja, l-Irlanda, Spanja, Franza, l-Italja, il-Latvja, il-Litwanja, in-Netherlands, il-Polonja u l-Portugall) 9 . L-Unjoni Ewropea diġà għandha netwerk żviluppat ta’ Ftehimiet bilaterali ta’ Sħubija dwar is-Sajd Sostenibbli fl-Oċean Atlantiku, faċċata tal-Afrika tal-Punent, jiġifieri mal-Marokk, mas-Senegal, mal-Gambja, mal-Guinea-Bissau, mal-Liberja u mal-Kosta tal-Avorju.
Il-Ftehimiet ta’ Sħubija dwar is-Sajd Sostenibbli jikkontribwixxu għall-promozzjoni tal-objettivi tal-PKS fil-livell internazzjonali u jiżguraw li l-attivitajiet tas-sajd tal-Unjoni ’l barra mill-ilmijiet tagħha jissejsu fuq l-istess prinċipji u l-istess standards li japplikaw skont il-liġi tal-Unjoni. Barra minn hekk, il-Ftehimiet ta’ Sħubija dwar is-Sajd Sostenibbli jrawmu l-kooperazzjoni xjentifika bejn l-UE u s-sħab tagħha, jippromwovu t-trasparenza u s-sostenibbiltà sabiex ir-riżorsi tas-sajd jiġu ġestiti aħjar u jinkuraġġixxu l-governanza billi jappoġġaw il-monitoraġġ, il-kontroll u s-sorveljanza tal-attivitajiet tal-flotot nazzjonali u barranin u billi jipprovdu l-fondi biex jiġi miġġieled is-sajd illegali, mhux irrappurtat u mhux irregolat (is-sajd IUU). Il-Ftehimiet ta’ Sħubija dwar is-Sajd Sostenibbli jikkontribwixxu għall-iżvilupp sostenibbli tal-industrija lokali tas-sajd u wkoll għall-promozzjoni tat-tkabbir u ta’ xogħol deċenti b’rabta mal-attività marittima. Il-Ftehimiet ta’ Sħubija dwar is-Sajd Sostenibbli jsaħħu l-pożizzjoni tal-Unjoni Ewropea fl-organizzazzjonijiet reġjonali u internazzjonali tas-sajd — fil-każ tal-Mauritania, b’mod partikulari, isaħħu l-pożizzjoni tagħha fil-Kummissjoni Internazzjonali għall-Konservazzjoni tat-Tonn tal-Atlantiku (l-ICCAT) 10 u fil-Kumitat tas-Sajd għall-Atlantiku Ċentrali tal-Lvant (is-CECAF) 11 .
•Konsistenza ma’ politiki oħra tal-Unjoni
In-negozjar ta’ Ftehim ġdid u ta’ Protokoll mal-Mauritania huwa konformi mal-azzjoni esterna tal-UE b’rabta mal-pajjiżi Afrikani, tal-Karibew u tal-Paċifiku (il-pajjiżi AKP) u, b’mod partikulari, mal-objettivi tal-Unjoni f’dak li għandu x’jaqsam mal-ħarsien tal-prinċipji demokratiċi u tad-drittijiet tal-bniedem.
2.ELEMENTI ĠURIDIĊI TAR-RAKKOMANDAZZJONI
•Bażi ġuridika
Il-bażi ġuridika għad-deċiżjoni jipprovdiha l-Artikolu 218 tat-Trattat dwar il-Funzjonament tal-Unjoni Ewropea (it-TFUE), li jistabbilixxi l-proċedura għan-negozjar u għall-konklużjoni ta’ ftehimiet bejn l-UE u pajjiżi terzi u li jinsab fit-Titolu V, li jittratta l-ftehimiet internazzjonali, tal-Ħames Parti ta’ dak it-Trattat, li tittratta l-azzjoni esterna tal-Unjoni.
•Sussidjarjetà (għall-kompetenza mhux esklużiva)
Ma tapplikax — kompetenza esklużiva.
•Proporzjonalità
Id-deċiżjoni hija proporzjonali mal-objettiv.
•Għażla tal-istrument
L-istrument huwa previst fl-Artikolu 218(3) u fl-Artikolu 218(4) tat-TFUE.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Fl-2018 u fl-2019, il-Kummissjoni wettqet evalwazzjoni ex post tal-Protokoll attwali tal-Ftehim ta’ Sħubija dwar is-Sajd mal-Mauritania, kif ukoll evalwazzjoni ex ante tat-tiġdid potenzjali tal-Protokoll. Il-konklużjonijiet tal-evalwazzjoni huma mogħtija b’mod separat f’Dokument ta’ Ħidma tal-Persunal tal-Kummissjoni.
Mill-evalwazzjoni ħareġ li s-setturi tas-sajd tal-UE huma interessati ferm fis-sajd fil-Mauritania u li t-tiġdid tal-Protokoll se jgħin biex jissaħħu l-monitoraġġ, il-kontroll u s-sorveljanza u biex tittejjeb il-governanza tas-sajd fir-reġjun.
Minħabba li l-Mauritania għandha żona kbira tas-sajd taħt il-ġuriżdizzjoni tagħha, għall-UE huwa importanti li żżomm strument li jippermetti kooperazzjoni settorjali mill-qrib ma’ dan l-attur ewlieni tal-governanza tal-oċeani fil-livell sottoreġjonali. Barra minn hekk, għall-bastimenti tal-UE, l-iktar għal dawk ibbażati fir-reġjuni l-aktar imbiegħda, bħall-Gżejjer Kanarji, li jistadu għall-ispeċijiet tal-ħut tal-qiegħ u tal-ħut pelaġiku, u għall-bastimenti tas-sajd għat-tonn bit-tartaruni u għall-bastimenti tas-sajd bil-konz, dan ifisser li jinżamm l-aċċess għal żona importanti tas-sajd fejn jistgħu jużaw strateġiji ta’ qbid skont qafas legali internazzjonali pluriennali.
Għall-awtoritajiet tal-Mauritania, l-għan hu li jkomplu jżommu relazzjonijiet mal-UE biex tissaħħaħ il-governanza tal-oċeani u biex jibbenefikaw mill-appoġġ settorjali speċifiku li jipprevedi opportunitajiet ta’ finanzjament pluriennali.
•Konsultazzjonijiet mal-partijiet ikkonċernati
Bħala parti mill-evalwazzjoni ġew ikkonsultati l-Istati Membri, ir-rappreżentanti tal-industrija, l-organizzazzjonijiet internazzjonali tas-soċjetà ċivili, kif ukoll l-amministrazzjoni tas-sajd u s-soċjetà ċivili tal-Mauritania. Saru wkoll konsultazzjonijiet fil-qafas tal-Kunsill Konsultattiv għall-Flotta ta’ Distanzi Twal, b’mod partikulari waqt il-laqgħa tiegħu tas-27 ta’ Marzu 2019.
•Ġbir u użu tal-għarfien espert
Ma japplikawx.
•Valutazzjoni tal-impatt
Ma tapplikax.
•Idoneità regolatorja u simplifikazzjoni
Ma japplikawx.
•Drittijiet fundamentali
Id-direttivi tan-negozjar proposti fl-Anness ta’ din id-Deċiżjoni jirrakkomandaw li jiġi awtorizzat il-ftuħ tan-negozjati, inkluża klawżola dwar il-konsegwenzi li jkun hemm f’każ li jinkisru d-drittijiet tal-bniedem u l-prinċipji demokratiċi.
4.IMPLIKAZZJONIJIET BAĠITARJI
L-implikazzjonijiet baġitarji marbutin mal-Protokoll il-ġdid jinkludu l-ħlas ta’ kontribuzzjoni finanzjarja lir-Repubblika Iżlamika tal-Mauritania. Jeħtieġ li l-allokazzjonijiet baġitarji korrispondenti għall-approprjazzjonijiet ta’ impenn u ta’ pagament jiddaħħlu kull sena fil-linja baġitarja għall-Ftehimiet ta’ Sħubija dwar is-Sajd Sostenibbli (11 03 01) u li dawn l-allokazzjonijiet ikunu kompatibbli mal-ipprogrammar finanzjarju tal-Qafas Finanzjarju Pluriennali rilevanti. L-ammonti annwali għall-impenji u għall-pagamenti huma stabbiliti fil-proċedura baġitarja annwali, inkluża l-linja ta’ riżerva għall-protokolli li jkun għadhom ma daħlux fis-seħħ fil-bidu tas-sena 12 .
5.ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar
In-negozjati mistennija jinbdew fit-tieni kwart tal-2019.
•Spjegazzjoni fid-dettall tad-dispożizzjonijiet speċifiċi tal-proposta
Il-Kummissjoni tirrakkomanda:
— li l-Kunsill jawtorizzaha tiftaħ u twettaq negozjati biex jiġu konklużi Ftehim ġdid ta’ Sħubija dwar is-Sajd Sostenibbli u Protokoll mar-Repubblika Iżlamika tal-Mauritania;
— li hija tinħatar bħala n-negozjatur tal-UE dwar dan is-suġġett;
— li hija twettaq in-negozjati b’konsultazzjoni mal-kumitat speċjali, kif stabbilit fit-Trattat dwar il-Funzjonament tal-Unjoni Ewropea;
— li l-Kunsill japprova d-direttivi tan-negozjar mehmużin ma’ din ir-Rakkomandazzjoni.
Rakkomandazzjoni għal
DEĊIŻJONI TAL-KUNSILL
li tawtorizza lill-Kummissjoni tiftaħ negozjati, f’isem l-Unjoni Ewropea, biex jiġu konklużi Ftehim ta’ Sħubija dwar is-Sajd Sostenibbli u Protokoll mar-Repubblika Iżlamika tal-Mauritania
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikulari l-Artikolu 218(3) u (4) tiegħu,
Wara li kkunsidra r-rakkomandazzjoni tal-Kummissjoni Ewropea,
Billi jenħtieġ li jinfetħu n-negozjati bil-ħsieb li jiġu konklużi Ftehim ġdid ta’ Sħubija dwar is-Sajd Sostenibbli u Protokoll mar-Repubblika Iżlamika tal-Mauritania,
ADOTTA DIN ID-DEĊIŻJONI:
Artikolu 1
Il-Kummissjoni b’dan hija awtorizzata tiftaħ negozjati mal-Mauritania bil-ħsieb li tikkonkludi Ftehim ġdid ta’ Sħubija dwar is-Sajd Sostenibbli u Protokoll ma’ dan il-pajjiż.
Artikolu 2
In-negozjati għandhom jitwettqu b’konsultazzjoni mal-Grupp ta’ Ħidma tal-Kunsill dwar il-Politika Esterna tas-Sajd u abbażi tad-direttivi tan-negozjar stabbiliti fl-Anness ta’ din id-Deċiżjoni.
Artikolu 3
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 4.6.2019
COM(2019) 248 final
ANNESS
tar-
Rakkomandazzjoni
għal Deċiżjoni tal-Kunsill li tawtorizza lill-Kummissjoni tiftaħ negozjati, f’isem l-Unjoni Ewropea, biex jiġu konklużi Ftehim ta’ Sħubija dwar is-Sajd Sostenibbli u Protokoll mar-Repubblika Iżlamika tal-Mauritania
{SWD(2019) 195 final} - {SWD(2019) 196 final}
ANNESS
Direttivi tan-negozjar
–L-għan tan-negozjati huwa li jiġu konklużi Ftehim ta’ Sħubija dwar is-Sajd Sostenibbli u Protokoll bejn l-Unjoni Ewropea u r-Repubblika Iżlamika tal-Mauritania skont ir-Regolament (UE) Nru 1380/2013 dwar il-Politika Komuni tas-Sajd u l-Konklużjonijiet tal-Kunsill tad-19 ta’ Marzu 2012 dwar il-Komunikazzjoni tal-Kummissjoni tat-13 ta’ Lulju 2011 dwar id-Dimensjoni Esterna tal-Politika Komuni tas-Sajd.
–Għalhekk il-Ftehim ta’ Sħubija dwar is-Sajd Sostenibbli għandu jiddefinixxi l-qafas ġenerali, il-prinċipji ġenerali u l-objettivi li se jiffurmaw il-bażi tas-sħubija mar-Repubblika Iżlamika tal-Mauritania. Huwa għandu jinkludi klawżola li tħassar il-Ftehim attwali ta’ sħubija fis-settur tas-sajd bejn il-Komunità Ewropea u r-Repubblika Iżlamika tal-Mauritania 1 .
–Sabiex tippromwovi s-sajd sostenibbli u responsabbli, filwaqt li tiżgura li dan il-Ftehim il-ġdid u dan il-Protokoll ikunu ta’ benefiċċju kemm għall-UE u kemm għar-Repubblika Iżlamika tal-Mauritania, il-Kummissjoni għandha ssejjes l-għanijiet tan-negozjati tagħha fuq dan li ġej:
·l-iżgurar tal-aċċess għall-bastimenti tal-flotta tal-UE għaż-żona tas-sajd tar-Repubblika Iżlamika tal-Mauritania, u tal-awtorizzazzjonijiet li dawn il-bastimenti jeħtieġu biex jistadu f’dik iż-żona u, b’hekk, l-iżvilupp, fost l-oħrajn, tan-netwerk ta’ Ftehimiet ta’ Sħubija dwar is-Sajd Sostenibbli li l-operaturi tal-UE għandhom għad-dispożizzjoni tagħhom fl-Afrika tal-Punent;
·il-fatt li jitqiesu l-aqwa parir xjentifiku disponibbli u l-pjanijiet ta’ ġestjoni rilevanti li jadottaw l-organizzazzjonijiet reġjonali tal-ġestjoni tas-sajd sabiex tiġi żgurata s-sostenibbiltà ambjentali tal-attivitajiet tas-sajd u tiġi promossa l-governanza tal-oċeani fil-livell internazzjonali. Fil-mira tal-attivitajiet tas-sajd għandhom ikunu biss ir-riżorsi disponibbli, filwaqt li jitqiesu l-kapaċità tas-sajd tal-flotta tal-post u filwaqt li jitqies b’mod speċjali l-fatt li l-istokkijiet ikkonċernati jpassu ħafna;
·il-fatt li jipprova jinkiseb sehem xieraq mir-riżorsi żejda tas-sajd li jkun konformi għalkollox mal-interessi tal-flotot tal-UE, f’każ li jkun hemm flotot barranin oħrajn interessati f’dawn ir-riżorsi wkoll, kif ukoll l-applikazzjoni tal-istess kundizzjonijiet tekniċi għall-flotot barranin kollha;
·l-iżgurar li l-aċċess għas-sajd jissejjes fuq l-attività storika tal-flotta tal-UE f’dan ir-reġjun u l-attività li din mistennija jkollha fih fil-ġejjieni, fid-dawl tal-aqwa valutazzjonijiet xjentifiċi disponibbli li jkunu l-aktar aġġornati u filwaqt li jitqiesu l-interessi tar-reġjuni l-aktar imbiegħda tal-UE;
·it-twaqqif ta’ djalogu biex tissaħħaħ il-politika settorjali bil-ħsieb li tiġi mħeġġa l-implimentazzjoni ta’ politika tas-sajd responsabbli b’rabta mal-għanijiet tal-iżvilupp tal-pajjiż, b’mod partikulari f’dak li għandu x’jaqsam mal-governanza tas-sajd, mal-ġlieda kontra s-sajd illegali, mhux irrappurtat u mhux irregolat, mal-kontroll, mal-monitoraġġ u mas-sorveljanza tal-attivitajiet tas-sajd u mal-għoti tal-pariri xjentifiċi; il-promozzjoni tal-attività ekonomika u l-indirizzar, fost l-oħrajn, tar-raġunijiet għall-emigrazzjoni irregolari mill-Mauritania;
·l-iżgurar li l-Protokoll jikkontribwixxi għall-promozzjoni tat-tkabbir u ta’ xogħol deċenti b’rabta mal-attività marittima, filwaqt li jitqiesu l-konvenzjonijiet rilevanti tal-Organizzazzjoni Internazzjonali tax-Xogħol (l-ILO);
·l-inklużjoni ta’ klawżola dwar il-konsegwenzi li jkun hemm f’każ li jinkisru d-drittijiet tal-bniedem u l-prinċipji demokratiċi.
–B’mod partikulari, il-Protokoll għandu jiddefinixxi l-affarijiet li ġejjin:
·l-opportunitajiet tas-sajd li l-bastimenti tal-Unjoni Ewropea għandhom jingħataw, imqassmin skont il-kategorija;
·il-kumpens finanzjarju u l-kundizzjonijiet biex dan jitħallas; u
·l-mekkaniżmi għall-implimentazzjoni tal-appoġġ settorjali.
–F’każ li n-negozjati dwar Ftehim ġdid ta’ Sħubija dwar is-Sajd Sostenibbli u Protokoll ġdid bejn l-Unjoni Ewropea u r-Repubblika Iżlamika tal-Mauritania jieħdu iktar żmien milli mistenni, u sabiex jiġi evitat li l-attivitajiet tas-sajd jiġu interrotti għal perjodu twil taż-żmien, il-Kummissjoni għandha tkun tista’ taqbel mar-Repubblika Iżlamika tal-Mauritania li ttawwal il-Ftehim u l-Protokoll attwali għal perjodu massimu ta’ sena sakemm tkompli tipprova tiftiehem dwar Ftehim ġdid ta’ Sħubija dwar is-Sajd Sostenibbli u Protokoll ġdid ma’ dan il-pajjiż skont l-għanijiet imsemmijin hawn fuq.
